M’Cheyne Bible Reading Plan

Tej tyole Jesús tuya Nicodemo

3  Attzen junxin xjal Nicodemo tbi. Cyxol fariseoxin, kej xjal cyiw tuj cyley judío. Bix tocxxin te nejenel te cycloja judío nchi cawen tuj cyley judío. ² At jun koniyan e pon Nicodemo tuya Jesús te yolel. E xiˈ tkbaˈnxin te Jesús:

―Taat Xnakˈtzal, ntzkiˈna ka smaˈna tuˈn Dios te xnakˈtzal keya, cuma nuket min tzaj tonen Dios jay, mlayettzenle bint cykilcaj nbint tuˈna―tz̈ixin.

³ Bix e xiˈ tkbaˈn Jesús texin:

―Min tzˈel tniˈya tiˈj tcawbil Dios. Cxeˈl nkbaˈna tey, nuket min ma tzaj tkˈoˈn Dios tuˈn titzˈj jun xjal tuya jun acˈaj chunkˈlal, mlaytzen tzˈocx ja xjala tuj tcawbil Dios―tz̈i Jesús.

⁴ Bix e xiˈ tkanen Nicodemo te Jesús:

―¿Ti tten tuˈn titzˈj jun xjal tijtl juntl maj? ¿Jacˈapatzen tzˈocx juntl maj tuj tcˈuˈj ttxu, tuˈntzen titzˈjtl?―tz̈ixin.

⁵ Aj ttzakˈbeˈn Jesús:

―Jax wuˈna. Mlay tzˈocx jun xjal tuj tcawbil Dios nuk oˈcxj titzˈjlen tuˈn ttxu, sino cˈoquex oj titzˈj tuya jun acˈaj tchunkˈlal kˈoˈn tuˈn Espíritu Santo. ⁶ Jn‑itzˈj tiˈ jun xjal, jax nuk xjalx. Pero jn‑itzˈj tuˈn Espíritu Santo, jun acˈaj wikan tchunkˈlal. ⁷ Juˈ tzunj, miˈn jaw kleeˈy oj nxiˈ nkbaˈna tey il tiˈj tuˈn titzˈja tuya jun acˈaj tchunkˈlala kˈoˈn tuˈn Dios. ⁸ Miˈn tzˈel t‑xooˈna ja yol lu nuk tuˈnj min tzˈel tniˈya tiˈj. Min chicˈaj cykˈiˈk, pero nxiˈ nuk jaakˈch, bix ntbiˈna tkˈajkˈajel, amale mint tzˈel tniˈya tiˈj jaaˈ n‑itzˈja bix jaaˈ npona baj. Jax juˈx jaca juun xjal kˈoˈn jun tchunkˈlal acˈaj tuˈn Espíritu Santo. Amale mint tzˈel tniˈya tiˈj, pero chi itzˈjel juntl maj―tz̈i Jesús te Nicodemo.

⁹ Bix e xiˈ tkbaˈn Nicodemo te Jesús:

―¿Ti tten tuˈn titzˈj jun xjal tuya jun acˈaj tchunkˈlal?―tz̈ixin.

¹⁰ Bix aj ttzakˈbeˈn Jesús texin:

―Jay jun jawnex xnakˈtzal cyxol Israel. ¿Titzen tten min tzˈel tniˈya tiˈj? ¹¹ Cxeˈl nkbaˈna tey, cykilcaj tzin nkbaˈna tey, jaxxixte, pero ejeeˈy judío cycyˈiy. ¹² Ka mlay tzˈel cyniˈya tiˈj nyola tiˈj tuˈn cyitzˈj xjal juntl maj twitz txˈotxˈ tuya jun acˈaj cychunkˈlal, ¿titzen tten tuˈn tel cyniˈya tiˈj ka ma txiˈ nkbaˈna cyey tiˈj ti cbinel tuˈn Dios tuj cyaˈj? ¹³ Min‑al jun xjal baˈn t‑xiˈ tkˈumen cyey ti nbaj tuj cyaˈj, cuma min‑al o japan tuj cyaˈj. Nuk oˈcx jxjal o cuˈtz tuj cyaˈj baˈn t‑xiˈ tkˈumen tiiˈn tuj cyaˈj, inayen tzuna, Jsmaˈn tuˈn Dios tuˈn ntena cyuya xjal. ¹⁴ Bix ma chin ula tuˈn njaw kˈoˈna cywitz xjal. Tisenj e jaw tkˈoˈn Moisés techel lbaj te xcbil tuj jlugar mintiiˈ najbil tuj, tuˈntzen cyclet xjal, jax juˈx weya. Ilxsen tiˈj tuˈn njaw kˈoˈna, ¹⁵ tuˈntzen cyiikˈente cykilca xjal cychunkˈlal te junx maj n‑oc ke cycˈuˈj wiˈja, inayena, jxjal Smaˈn tuˈn Dios―tz̈i Jesús te Nicodemo.

N‑oc cyakˈ cykil xjal te Dios

¹⁶ Nimxsen oc cyakˈ cykil xjal te Dios, bix juˈ tzunj e tzaj tkˈoˈnxin jaj junx Tcwalxin cye xjal. Juˈ tzunj, alcyej xjal ma tzˈocslan tiˈj Tcwalxin, ckˈojeltzen tchunkˈlal te junx maj, bix miˈn txiˈ tuj cyamecy te junx maj. ¹⁷ Min e tzaj tsmaˈn Dios Tcwal twitz txˈotxˈ te kˈol castiwa cye xjal, sino e tzaj tsmaˈnxin tuˈn cyclet xjal tuj castiwa tuˈn Tcwalxin. ¹⁸ Alcyej xjal ma tzˈocslan tiˈj Tcwalxin, mlay cub castiwa tibaj. Pero kej xjal min chi ocslan tiˈj, ckˈojeltzen cycastiwa, cuma n‑el cyxooˈn jjunx Tcwal Dios. ¹⁹ Ckˈojeltzen cycastiwa tuˈnj cycyˈi jxjal ul kˈol spiˈyen cye. Min e jaw tzalajke tiˈj spiˈyen smaˈn tuˈn Dios, cuma mas e cyajbe jcyil twitzj jaxxix yol ul tiiˈnxin. ²⁰ Kej xjal nchi binchan kaˈ n‑el cyiiqˈuen jspiˈyen. Cycyˈi tuˈn cyul nka tiˈ spiˈyen, cuma cycyˈi tuˈn tchicˈajax tiˈj jkaˈ nbint cyuˈn. ²¹ Pero kej xjal nchi oc lpe tiˈj jiquen, nchi jyon jjaxxix yol, cuma cyaj tuˈn tel baˈn cybinchben tuj twitz Dios.

Tej tyole Juan juntl maj tiˈ Jesús Jscyˈoˈn tuˈn Dios

²² Tbajlenxitltzen jlu tuj Jerusalén, bix iyˈ Jesús tuj tnom cyuyax t‑xnakˈatzxin, bix e bet‑xin cyuyaxin cab kˈij tuj departamento te Judea. Nchi cuˈx xjal tuj aˈ cyuˈn t‑xnakˈatzxin. ²³ Jax juˈx e ten Juan Bautista tuj Judea nchi bautizarj xjal tuj aˈ tuˈnxin. E tenxin tuj tnom te Enón, nka taˈ tnom te Salim, cuma at nim aˈ tuj Enón. Bix nchi ponxetzen xjal tuyaxin tuˈn cycuˈx tuj aˈ tuˈnxin. ²⁴ Tzinx chi cuˈx xjal tuj aˈ tuˈnxin, cuma mitknaˈx tocx kˈoˈnxin tuj tzeeˈ.

²⁵ Tuˈnj e bautizarj ke xjal tuj aˈ cyuˈn t‑xnakˈatz Jesús, juˈ tzunj e jaw jun kˈoj cyxol ke judío bix kej t‑xnakˈatz Juan. Yaaˈn baˈn tuj cywitz t‑xnakˈatz Juan tuˈn cycuˈx xjal tuj aˈ cyuˈn t‑xnakˈatz Jesús. ²⁶ Juˈ tzunj e pon lkˈe ke t‑xnakˈatz Juan tiˈ Juan, bix e xiˈ cykbaˈn texin:

―Taat Xnakˈtzal, jxjal e ten tuyey jlajxe nimaˈ te Jordán bix e xiˈ tkˈoˈna jun baˈn te te tej tjaw tnimsaˈna tbi, nchi cuˈx xjal tuj aˈ tuˈn, bix cykilca xjal ncyaj cykˈoˈn jay tuˈn cyaj tuyaxin. Yaaˈn tumel jlu―tz̈ikexin.

²⁷ Bix aj ttzakˈbeˈn Juan:

―Miˈn chi labta tiˈj chˈin woclena. Mlay tuˈn tten mas woclena twitzj o kˈoj tuˈn Dios weya tuj cyaˈj. ²⁸ Yaaˈn jawnex kena tisenj xjal nchi yolena tiˈj. Ejeeˈxa tstiwa e xiˈ nkˈumena: “Yaaˈn inayena Jscyˈoˈn tuˈn Dios. Nuk jun sanjel kena smaˈn tuˈn Dios tuˈn binne cyten xjal oj tulxin,” ntz̈iya. ²⁹ Tisen jun mejoblenel. Yaaˈn jxjal t‑amiwa chmilbaj cmajebel tuya xuuj, sino ja te chmilbaj. Jtaakˈen jun t‑amiwa chmilbaj, nuk ja tej tuˈn tnincˈun tunwen, bix cˈayoltzen ti toc tuˈn chmilbaj, ka ma tzˈel baˈn taakˈen tuj twitz chmilbaj. Katzen ma tkba chmilbaj ma tzˈel taakˈen baˈn, cjaweltzen tzalaj jt‑amiwa chmilbaj. Juˈ tzunj weya nuk tisen jun tuya chmilbaj kena. Juˈ tzunj, nimxsen nchin tzalaja tuˈn nim xjal nchi pon tuya Jesús, cuma baˈn ma tzˈel waakˈena, tisen taakˈen jun xjal tuj mejoblenel. ³⁰ Tumel tuˈn cypon xjal tuya Jesús, cuma il tiˈj tuˈn tjaw nimset tipemal Jesús, bix tuˈn tcub jweya wipemal cubne―tz̈i Juan.

Jun xjal o tzaj tuj cyaˈj

³¹ Jxjal ma tzaj tuj cyaˈj, mas jawnex twitz cykilca xjal. Kej xjal, nchi itzˈj twitz txˈotxˈ, bix te twitz txˈotxˈ cynaabl. Baˈn chi txˈolban nuk tiˈj ti tten jnbaj twitz txˈotxˈ. Pero jxjal ma tzaj tuj cyaˈj, ³² ttzkiˈn ti tten tuj cyaˈj, bix ntxˈolban j‑o til bix o tbi. Pero min‑al xjal taj tyolxin. ³³ Pero ja tzunkej xjal ma cyocsla tyolxin, tzin cyyeecˈan jax ma cyocsla jtzin tkbaˈn Dios, ³⁴ cuma jxjal e tzaj tsmaˈn Dios, tex Dios tyol ntkˈumen. At tipemalxin tuˈn tyolenxin j‑e tkba Dios, cuma o txiˈ tkˈoˈn Dios Espíritu Santo texin te junx maj. ³⁵ N‑oc takˈ Tcwal Dios te Tman, bix o txiˈ tkˈoˈn Dios cykilca at tuj tkˈabxin tuˈn tcawenxin tibaj. ³⁶ Alcyej xjal ma tzˈocslan tiˈj Tcwal Dios, attzen tchunkˈlal te junx maj. Pero kej xjal cycyˈi tzˈoc cybiˈn Tcwal Dios, mlay kˈoj cychunkˈlal te junx maj. Nuk oˈcx chi cyjel ten tuj castiwa tuˈn Dios.

Jaj o tzaj tyeecˈan Dios te Pablo

12  Amale yaaˈnt tumel te nimsaljaw nbiˈya, pero cjawel wiin wiiba chˈintl mas, tuˈn t‑xiˈ nyeecˈana jun jaxxix t‑akˈanal Cristo kena. Juˈ tzunj, cxeˈl nkbaˈna cyey tiˈj e tzaj tyeecˈan Dios weya bix j‑e tzaj tkbaˈn Dios weya. ² Ntzkiˈna jun ocslal tiˈ Cristo. Aj tiiˈn Dios jaxin tuj toxen cyaˈj jun rato maa jaaˈ taˈ Dios. Ma bint cyajlaaj jnabkˈi tbajlen jlu. Mintiiˈ tumel wuyena ka tuyax t‑xumlalxin e jax tiiˈn Dios tuj cyaˈj bix ka e cyaj t‑xumlalxin twitz txˈotxˈ. Nuk ja Dios itzkilte. ³ Pero jax wuˈna, kale tuyax t‑xumlalxin, bix kale yaaˈn tuyax, ⁴ pero e jax tiiˈn Dios jaxin tuj cyaˈj. Jatztzen oca tbiˈnxin jyol jawnexsen nunca tzˈel cyniyˈ xjal te twitz txˈotxˈ tiˈj, bix min e kˈoj texin tuˈn tcub tenxin txˈolbalte ti otk tzˈoc tbiˈnxin tuj cyaˈj. ⁵ Tiˈj tzunj nintzaj xtalbil lu e tzaj tkˈoˈn Dios tej ocslal lu, nchin tzalaja tiˈj. Pero te weya, yaaˈn te nnimbil wiiba, sino nuk jaj tiˈj qˈuixcˈaj o tziyˈx wuˈna cxeˈl ntxˈolbaˈna, tuˈntzen tel cyniˈya tiˈj yaaˈn jawnex kena. ⁶ Nuket waja tuˈn t‑xiˈ nkˈumena inayen tzuna in x‑aja tuj cyaˈj, jacˈa baj nkˈumena, cuma jaxte in x‑aja. Pero miˈn txiˈ nkbaˈna mas ti tten, cuma ncyˈiya tuˈn toc cynimana inayena nuk tuˈnj nx‑ajlena tuj cyaˈj jun maj. Waja tzˈoc cynimana inayena nuk tuˈnj baˈn nnaabla nxiˈ nyeecˈana cyxola bix tuˈnj nyola o tzˈoc cybiˈna.

⁷ Tuˈnj tikˈch e tzaj tyeecˈan Dios weya tuj cyaˈj, kape njaw nnimsan wiiba tiˈj. Juˈ tzunj jun nimxsen pena oc weya, tisen jun chˈiˈx n‑oc ẍuyˈj tuj nchuˈla, tuˈntzen taajtz tiˈ nnaabla. Jpena niyˈx wuˈna tisen jun tsanjel taaw il toc yajlal te weya. ⁸ Oxe maj e xiˈ ncubsaˈna nwitza te Kaaw tuˈn tel tiiˈnxin jpena toc wiˈja. ⁹ Pero min e tcuyaxin, sino e tzaj tkbaˈnxin weya: “Cxeˈl nkˈoˈna wipemala tey te onl tey. Ka yaaˈn jawnexa, mas cchicˈajaxel weya wipemal oj woniya tiˈja,” tz̈i Kaaw weya. Juˈ tzunj mas nchin tzalaja tiˈj yaaˈn jawnex kena, twitzj nbaj nniman wiiba tiˈj oc ncyeˈyena tuj cyaˈj, cuma ka yaaˈn jawnex kena, mas nchicˈajax tipemal Cristo weya oj tbint taakˈen Dios wuˈna. ¹⁰ Juˈ tzunj baˈn tuj nwitza yaaˈn jawnex xjal kena. Nchin tzalaja oj nchi jaw cyakbitl xjal wiˈja tuˈnj nchin akˈanana tuj taakˈen Cristo. Bix nchin tzalaja oj at pena wiˈja, bix oj nchi jaw ilen xjal wiˈja, bix oj nim kaˈ toc wiˈja, cuma oj tchicˈajax yaaˈn jawnex kena, qˈueleltzen cyniyˈ xjal tiˈj nuk tuˈnj tipemalxin nbint taakˈenxin wuˈna.

¹¹ Key hermano, junxsen nchˈixewa xjaw nnimsan wiiba, pero nuket e yolenkey baˈn wiˈja cywitz kej ẍtakˈ xnakˈtzal, mintetletiiˈ il tiˈj tuˈn tjaw nnimsan wiiba. Amale jawnexit t‑akˈanal Cristo ejeeˈ tuj cywitz, pero yaaˈn mas ajnintz kena cywitz, amale yaaˈnt jawnex kena. ¹² Tej ntena cyxola, tuˈnj jawnex akˈuntl e bint wuˈna, bix tuˈnj jawnex techlal e bint wuˈna, e xiˈ nyeecˈana cyey jun jaxxix t‑xel Jesús kena, bix e bint tuya nim iyˈx wuˈna. ¹³ O txiˈ nyeecˈana tuj cykilca tnom t‑xel Cristo kena. Oˈcx min e bint wuˈna cyxola min e nkaniya twiˈ ncˈuˈja cyey. Juˈ tzunj, ¿tzimpa cykbaˈna yaaˈn il cyiˈja wuˈna cywitzj ocslal cyuj juntl tnom? Katzen tuj cywitza yaaˈn il cyiˈja wuˈna, cynajsam chˈin wiˈja min e nkaniya twiˈ ncˈuˈja cyey.

Tej t‑xiˈ tile Pablo ke ocslal tuj tnom Corinto

¹⁴ Key hermano, caˈba maj o chin pona cyxola, bix waja tuˈn npona te toxen maj. Bix oj npona, miˈn chin kanewa pwak cyey. Yaaˈn cypwaka tzin njyoˈna. Nuk jun baˈn te cyey waja. Yaaˈn tumel oj cycˈojlan neeˈ tiˈ cyman, sino ejeeˈ cyman neeˈ chi cˈojlalcye neeˈ. Tujtzen tyol Dios inayena tisen cymana. ¹⁵ Juˈ tzunj nimxsen nchin akˈanana nuk tuˈn jun baˈn te cyey. Nimxsen n‑oc cyakˈa weya. Yajtzen cyey, ¿tikentzen nuk chˈin wakˈa n‑oc cyey?

¹⁶ Amale mint e xiˈ nkanena pwak cyey, pero at juun cyxola tzin cykbaˈn tuˈn xtzˈimj yol o tzˈel wiiˈna cypwaka, cuma n‑el nniˈya tiˈj ti tten tuˈn tcub yaaˈna ke xjal, tz̈ike. ¹⁷ Pero cxeˈl nkanena cyey, ¿ti tten tej cycub yaaˈnkey tuˈn tel wiiˈna cypwaka? Kej e xiˈ nsmaˈna cyuyey nejl, ¿tzimpa cub cybisena e cykanen cyonbila otk chmet te cye mebe tuˈn ttzaj te weya? ¹⁸ Tej t‑xiˈ nsmaˈna Tito tuya juntl tuyaxin cyxola nejl te cyiwsalte cycˈuˈja tuˈn tchmet cypwaka te cye mebe, ¿elpa tiiˈn Tito cypwaka tuˈn ttzaj tkˈoˈn weya? ¡Min! Ejeeˈxa itzkilte e xiˈ texin tuya jun tnaablxin baˈnxix cyxola, tisenxj weya, bix junelne taˈ kyola cyuyaxin.

¹⁹ Key hermano n‑oc cyakˈa weya, oj t‑xiˈ cycyeˈyena wuˈja, kape tuj cywitza nchin clon wiiba cywitza tuˈntzen wela baˈn tuj cywitza. Pero yaaˈn juˈwa. Ttzkiˈn Dios inayena, jun ocslal tiˈ Cristo, ma chin yolena yaaˈn tuˈn wela baˈn tuj cywitza, sino tuˈntzen cycywixa tuj cyocslabla. ²⁰ Ma txiˈ nkbaˈna cykilcaj lu cyey, cuma najkel ncˈuˈja cyiˈja. Kape oj npona cyxola, mintzen otk cyaj cykˈoˈna cyila, bix juˈ tzunj iltzen tiˈj chi oquel wilena, amale cyajata tuˈn nyolena cyuyey tujxix ttz̈yal. Oj npona, kape at kˈoj cyxola. Kape min tzˈoc cycˈuˈja tiˈ cykˈoja, bix kape nchiˈlec cycˈuˈja tiˈ juntl, bix kape nbaj cypaˈn cyiiba, bix kape at ẍtakˈ cyxola, bix kape nchi yolena kaˈ tiˈ juntl, bix kape nchi jaw tz̈ˈiya, bix kape yaaˈn tuj tumel eteˈy. ²¹ Najkel ncˈuˈja, cuma kape oj npona cyxola juntl maj, at nchˈixewa twitz Dios tuˈnj kaˈ nbint cyuˈna. Kape at tuˈn wookˈa cyiˈj ocslal minaˈn tcyaj cykˈoˈn pajbaj bix yaaˈn baˈn bix il.