M’Cheyne Bible Reading Plan

Jun cotz cuˈx tkˈoˈn jun viuda

21  Bix oc ten Jesús cyeyˈlte, bix e tilxin ncuˈx cykˈoˈn kˈina cyoybil tuj tcublel pwak tuj tja Dios. ² Juˈx e tilxin tej tcuˈx tkˈoˈn junxuj viuda mebe caˈba centavo tuj tcublel pwak. ³ Bix e xiˈ tkbaˈnxin cye t‑xnakˈatzxin:

―Tuj cywitza yaaˈn nim ma cuˈx tkˈoˈn ja xuuj viuda, pero cxeˈl nkbaˈna cyey ma cuˈx tkˈoˈnxuj mas cywitzj cykilca kej kˈina, ⁴ cuma nuk chˈin n‑el cyiiˈnxin tiˈ nimxsen at cyuyaxin ncuˈx cykˈoˈnxin, pero ja tzunj xuuj lu ma cuˈx tkˈoˈn tuya cykil tcˈuˈjxuj jmancˈbil kˈiˈn tuˈnxuj tuˈn titzˈjxuj―tz̈ixin.

Tej tkbante Jesús tuˈn tcub xitj tja Dios

⁵ Yaj chˈintl akˈ ke t‑xnakˈatzxin yolel tiˈj nintzaj tja Dios. E xiˈ cykbaˈnxin:

―Cyecaxsen tcyeˈncj tja Dios lu. Binne tuya ttxˈotxˈel nmak xak bix tbanel, bix cyecaxsen tuya tikˈch techel toc twitz xak, bix e bint tuˈn cyoybil xjal―tz̈i ke t‑xnakˈatzxin.

⁶ Pero e xiˈ tkbaˈn Jesús cyexin:

―Cykilcaj n‑oc cycyeˈyena, tzul jun kˈij tuˈn tbaj xitj. Mi nuket jun xak tej lu cyjel tibaj juntl―tz̈i Jesús.

Kej yecˈbil cyuj mancˈbil kˈij

⁷ Bix e xiˈ cykanenxin te Jesús:

―Taat Xnakˈtzal, cykilca kej lu ma tkbay keya tiˈj ti pjel jun kˈij, ¿jtojtzen pjel? ¿Bix alcye techel tzul te yecˈbil oj chˈitk tuˈn tbaj?―tz̈ikexin.

⁸ Aj ttzakˈbeˈn Jesús tiˈj alcyej tuˈn tbaj cyuj kˈij tzul:

―Cycˈojlanx cyiiba cywitz kej xjal chi ul tzpetsal cyey tuj cyocslabla tiˈj jaxxix tyol Dios, cuma cyuj jkˈij chi ul, tzul nim xjal te kbalte ka ejeeˈ Jscyˈoˈn tuˈn Dios. “Chˈixcˈa tuˈn tbaj twitz txˈotxˈ,” tz̈i cybel. Miˈn cheˈx lpey cyiˈj. ⁹ Cyuj jkˈij chi ul cˈoquel nim kˈoj twitz txˈotxˈ tnom tuya tnom, bix chi jawel meltzˈaj xjal kˈojlel tiˈ cygobierno. Oj cybinte at kˈoj, miˈn chi jaw seyˈpaja tuˈnj at kˈoj, cuma il tiˈj at kˈoj te mitknaˈx wula. Pero kej kˈoj lu yaaˈnja te yecˈbil chˈixcˈa tpon mancˈbil kˈij―tz̈i Jesús cye t‑xnakˈatzxin.

¹⁰ Bix e xiˈ tkbaˈntl Jesús cye t‑xnakˈatzxin:

―Cyuj jkˈij chi ul, chi jawel nmak tnom te kˈojlel cyuya juntl nmak tnom, bix juˈ pjel tuj cykilca twitz txˈotxˈ. ¹¹ Bix qˈuiyela nim xcyaklajnab cyiw, bix tuj nim lugar tzul weyaj bix yabel. Bix cwel ttz̈i twitz txˈotxˈ, bix twitz cyaˈj cchicˈajaxel jawnex seyˈpajlenel. ¹² Pero oj mintknaˈx tbaj cykilcaj lu, tuˈnj lepcheckey wiˈja chi tzyetela bix chi yasjela cyuˈn kej xjal nchi kˈojl wiˈja. Chi xeˈl kˈiˈna cyuˈn tuj xkela cyuj camon jaaˈ, bix chi xeˈla tuj tzeeˈ. Bix chi xeˈl txqueta cywitz cawel bix cywitz gobernador nuk wiˈja. ¹³ Pero oj tbint cykilcaj qˈuixcˈaj lu cyey, cˈajbeltzen tuˈn tkˈumj nbiˈya. ¹⁴ Juˈ tzunj miˈn chi labta cyiˈjxa, tiˈj ti tten tuˈn cyclon cyiiba tuˈn cytzakpeta. ¹⁵ Jaca maj oj cyyolena wiˈja cywitz cawel, inayenxa cxeˈl onenta cynaabla. Amale cˈoquelet cycˈuˈj tiˈj tuˈn tcub cyyeecˈan yaaˈn jaxxix cyyola wiˈja, pero mlay tzˈel cyiiˈn tipemal cyyola. Mlay maket cyyola cyuˈn. ¹⁶ Pero yal te cyey, chi xeˈl qˈueyeta tuj cykˈab cawel. Hasta cyexa cymana bix cytzicya bix cyitzˈena bix ke te cyjay bix ke cyuyey cxeˈl cyqˈueyen ejeeˈy tuj cykˈab cawel, bix juun cyey chi cwel byeta. ¹⁷ Cykilca xjal qˈuelel cyiiqˈuen ejeeˈy tuˈnj cykˈon cyiiba wuyena. ¹⁸ Pero yal te cychunkˈlala te junx maj, min‑al baˈn toc ipan tiˈj. Mi nuket jun ttzmal cywiˈy cnaal. ¹⁹ Ka ma tziyˈx qˈuixcˈaj cyuˈna wiˈja bix ka min chin cyaj cycyeˈyena, chi oquela tuj cychunkˈlala te junx maj.

²⁰ Yaltzen tiˈj cykanbila tiˈj jtoj tuˈn tcub xitj tja Dios, oj t‑xiˈ cycyeˈyena cysutˈen cyiib soldado tiˈj tnom te Jerusalén, qˈueleltzen cyniˈya tiˈj otk pon tumel tuˈn tcub xitj. ²¹ Oj tpon tzunj kˈij, chi elxit ok kej xjal te departamento te Judea cyxol witz tuˈn cyclet, bix chi etzxit kej xjal tuj Jerusalén. Kej xjal najl ttxaˈn tnom, miˈntet chi ocx tuj tnom tuˈn cyclet, ²² cuma oj tpon tzunj kˈij, cwel castiwa tibaj tnom te Jerusalén, tuˈntzen tbaj tisenj e cykba tyolel Dios jatxe ootxa. ²³ Oj tpon tzunj kˈij, lastim kej xuuj at cyal tuj cycˈuˈj bix kej xuuj nchˈuˈn cyal cyiˈj, cuma qˈuiyel nim qˈuixcˈaj tuj tnom bix nim cwel castiwa cyibaj aj Jerusalén. ²⁴ Chi cwel byet cyuˈn soldado tuya cyspada, bix chi xeˈl kˈiˈn te pres cyuj cabtl tnom, bix cˈoquel Jerusalén tjakˈ cycawbil kej xjal yaaˈn judío bix min nchi niman Dios, hasta ojxe tpon jkˈij tuˈn tweˈ cycawbil.

Ti tten oj chˈitk tul meltzˈaj Jesucristo juntl maj

²⁵ Cyujtzen mancˈbil kˈij c‑yeecˈaltzen twitz cyaˈj jbajx bina juˈwa. Bix tuj tiyˈ twitz txˈotxˈ qˈuiyel seyˈpajlenel cyuj tnom, bix mlay cnet cyuˈn tnom ti tten tuˈn tweˈ, cuma pjel nim tkˈajkˈajel mar oj toctz punntzˈaj mar twitz txˈotxˈ. ²⁶ Qˈuelel cyanem xjal tuˈnj ttz̈i ti pjel twitz txˈotxˈ cyiˈj, cuma entera twitz clichˈpajel cyaˈj tisen xlokˈlaj cyaˈj. ²⁷ Bix oj tbaj cykilcaj lu, cylaˈ xjal inayena, Jsmaˈn tuˈn Dios cye xjal, oj ncuˈtza tuj jun muj tuya nim wipemala bix nchin txakakanxsena. ²⁸ Oj takˈ chicˈajaxel cykil kej yecˈbil lu, cyocslaˈy at tuˈn wula bix chi ayona wiˈja tuya cykil cycˈuˈja, cuma qˈuelel cyniˈya tiˈj chˈixcˈa tpon jkˈij tuˈn cycleta―tz̈i Jesús cye t‑xnakˈatzxin.

²⁹ Bix e xiˈ tkbaˈn Jesús jun techel cyexin:

―Cycyeˈnc ke tzeeˈ. Cycyeˈnc jcˈul higuera bix ka juntl wik tzeeˈ. ³⁰ Oj takˈ xulel tzeeˈ, qˈueleltzen cyniˈya tiˈj chˈixcˈa toc jbalel. ³¹ Jaxse juˈx oj wula. Oj cyakˈ chicˈajaxel kej yecˈbil ma txiˈ nkbaˈna cyey, qˈueleltzen cyniˈya tiˈj chˈixcˈa tul tcawbil Dios. ³² Cˈoquel cycˈuˈja tiˈj ti cxeˈl nkbaˈna cyey. Kej xjal cylaˈ cykilca kej yecˈbil ma txiˈ nkbaˈna cyey, min otk chi cyim oj takˈ tcawbil Dios. ³³ Jma txiˈ nkbaˈna pjel. Cyaˈj bix twitz txˈotxˈ cwel xitj, pero nyola mlay naj.

³⁴ Juˈ tzunj kˈoˈnc cyipena tiˈj tuˈn binne cytena. Miˈntet txiˈ tzˈak tipen cynaabla tuˈnj achbil te twitz txˈotxˈ bix tuˈn kˈeˈn bix tuˈnj nuk nchi labta tiˈj ti tten tuˈn cyitzˈja. Ka ma tzˈoc cycˈuˈja nuk cyiˈj lu, yaaˈntzen binne cytena oj ya nulqˈuetl jmancˈbil kˈij. ³⁵ Tisen jun jil nuk chˈinnchˈe oj ttzyet tuˈn cˈoˈbil, juˈtzen pjel tuj cykilca twitz txˈotxˈ cyej xjal min tzˈoc cycˈuˈj tiˈj ka at tulel mancˈbil kˈij. Chˈinnchˈe oj tul mancˈbil kˈij oj yaaˈn binne cyten. ³⁶ Juˈ tzunj kˈoˈnc cyipena tiˈj tuˈn iˈtzkey, tuˈntzen binne cytena tuj jmancˈbil kˈij. Bix cykanenx te Dios tuˈn tiyˈx jqˈuixcˈaj tzul, tuˈntzen mintiiˈ cychˈixewa nwitza, inayena, Jsmaˈn tuˈn Dios tuˈn ntena cyuya xjal―tz̈i Jesús.

³⁷ Jaca kˈij e xiˈ tkˈoˈn Jesús t‑xnakˈtzbilxin tuj tja Dios, pero te koniyan e xiˈxin tcˈuˈj jwitz te Olivos te wutal. ³⁸ Yaltzen cye cykilca xjal, e jaw weˈke jyaˈx tuˈntzen cypon tuj tja Dios te ebilte Jesús.

6  Nchin akˈanana tuya Dios te kˈumlte t‑xtalbil. Juˈ tzunj cxeˈl ncubsaˈn nwitza cyey tuˈn miˈn tzˈel cyxooˈna jnxiˈ nkˈumena. ² Cˈoquel cycyeˈyena ti toc tuˈn tyol Dios. Tz̈i Dios te jun xjal cyjulu: “Tej tpon tumel tuˈn t‑xiˈ nkˈoˈna xtalbil tey, e nbiˈya tyola bix e tzaj wonena. Bix tej tpon tumel tuˈn tcleta wuˈna, bix e xiˈ wonena,” tz̈i Dios. Ja tzunj yol lu nyeecˈan at jun kˈij tuˈn kiikˈente jun t‑xtalbil Dios, bix nxiˈ nkˈumena cyey jatzen kˈij lu.

³ Tuj taakˈen Dios n‑oc ncˈuˈja tiˈj tuˈn miˈn bint kaˈ wuˈna, tuˈntzen min‑al jun xjal baˈn tjaw yolen wiˈja, tuˈn miˈn tzˈel t‑xooˈn jnxiˈ nkˈumena. ⁴ N‑oc wipena tiˈj tuˈn t‑xiˈ nyeecˈana jaxxix jun t‑akˈanal Dios kena. Juˈ tzunj, tuj taakˈen Dios niyˈx qˈuixcˈaj wuˈna tuya pasensya. At maj nimxsen qˈuixcˈaj bix bisbajil n‑oc weya. ⁵ At maj nxiˈ tzˈuˈn wiˈja cyuˈn xjal, bix at maj nchin ocxa tuj tzeeˈ nuk tiˈj tyol Dios. At maj cyakbajnin eteˈ xjal wiˈja hasta nchi jaw kˈojl weya. At maj sicninxsen kena tuj taakˈen Dios cuma cyiwxsen nchin akˈanana. Bix at maj n‑ex juun akˈbil wuˈna mintiiˈ nwatla n‑oc, bix at maj ncub npaˈna weyaj. ⁶ Bix jax juˈx tuˈn jun baˈn nnaabla ncub nyeecˈana jun t‑akˈanal Dios jaxxix kena. Jiquen jun nnaabla nxiˈ wiiˈna, bix n‑el nniˈya tiˈj alcye jaxxix bix nxiˈ nnimana. Niyˈx wuˈna oj toc cyyajlaˈn xjal inayena, bix nchin binchana jun baˈn cye cabtl. Nchix lpewa tiˈ Espíritu Santo, bix at tkˈakˈbil ncˈuˈja jaxxix tiˈ cabtl. ⁷ Tuˈnj tkˈumj jun jaxxix tyol Dios, bix tuˈnj tchicˈajax tipemal Dios oj t‑xiˈ nkˈumena tyol, nxiˈ nyeecˈana jun jaxxix t‑akˈanal Dios kena. Tisen ke soldado nchi kˈojl tuya macbil te biybil tuj cymankˈab taˈ, bix cyneẍ kˈilte juntl macbil te makbilte tuˈn miˈn chi akˈ, juˈxsen nchin kˈojla weya tuya kaˈ tuˈnj baˈn nbint wuˈna bix tuˈnj ncolbil wiiba twitz il. ⁸ Oj t‑xiˈ nkˈumena tyol Dios, at xjal tzin cybiˈn inayena, pero at juuntl n‑el cyiiqˈuen inayena. At juun nchi yolen baˈn wiˈja, pero at juuntl nchi yolen kaˈ wiˈja. Amale tujet tumel nchin yolena, at juun tzin cykbaˈn ẍtakˈ kena. ⁹ Amale atet juun xjal tzin cykbaˈn yaaˈn jun jaxxix t‑xel Cristo kena, pero at nim xjal n‑el cyniyˈ tiˈj jaxxix t‑xel Cristo kena. At xjal cyaj tuˈn ncub byeta, pero lux kena iˈtza. Nim o chin iˈya tuj castiwa, pero minaˈn cycaman tuˈn ncuba. ¹⁰ Tuj cywitz juun xjal, nchin bisena, pero nchin tzalaja. Bix amale tzint cykbaˈn juun xjal mebe xjal kena, pero nim xtalbil te tyol Dios nxiˈ nkˈoˈna cye nim xjal. Bix amale minttiiˈ at wuyena, pero at cykilca kˈinemal at wuyena tuˈnj mojbabl wiiba tuya Cristo.

¹¹ Key ocslal tuj Corinto, ma txiˈ nkbaˈna cyey cykilca niyˈ tuj ncˈuˈja, cuma nim n‑oc cyakˈa weya. ¹² Jminaˈn tbint jaj tkˈakˈbil cycˈuˈja wiˈja, yaaˈn jweya te cyey. ¹³ N‑oc cyakˈa weya tisen jun mambaj n‑oc cyakˈ tcwal te. Juˈ tzunj cˈoquel wakˈa cyey tisentzen n‑oc cyakˈ cyman cwal cye.

Tja Dios koˈ, jaj jun Dios iˈtz

¹⁴ Key hermano, miˈn tzˈoc cylichˈon cyiiba junx maj cyuya kej xjal yaaˈn ocslal. Kej xjal jiquen nbint cyuˈn yaaˈn junx taˈ cynaabl cyuyaj xjal nuk kaˈ nbint cyuˈn, tisen spiˈyen yaaˈn junx taˈ tuya klolj. ¹⁵ ¿Ti tten at tmojbabl tiib Cristo tuya taaw il? ¿Bix ti tten at tmojbabl tiib jun ocslal tiˈ Cristo tuya jun xjal min tzˈocslan tiˈ Cristo? ¹⁶ ¿Bix ti tten ka ma tzˈocx jun sant tuj tja Dios? Kej nchi niman Dios mlay tuˈn at cymojbabl cyiib cyuyaj kej nchi niman sant, cuma najl Dios kxol ejooˈ ocslal, jxin Dios iˈtz. Jatxe ootxa e tzaj tkbaˈn Dios cyej e xiˈ lpe tiˈjxin: “Chin najala cyxola bix chin betela cyxola. Chin oquela te Cydiosa, bix chi oquela te nxjala. ¹⁷ Juˈ tzunj qˈuelel cypaˈn cyiiba cyiˈ kej xjal yaaˈn nxjala, tuˈntzen miˈn chi binchana j‑il nbint cyuˈn, bix tuˈntzen cyajbena oˈcx te weya. Ka cbinel cyuˈna juˈwa, chi xeˈl wocslaˈna te nxjala. ¹⁸ Juˈtzen chin oquela te Cymana jaxxix, bix ejeeˈy chi oquela te ncwala,” tz̈i Dios, Cawel tibaj cykilca, cye aj Israel jatxe ootxa.