M’Cheyne Bible Reading Plan
Leprahuan ungushca runatami Jesús alliyachishca
8 Yachachishca q'uipa urcumanta Jesús uriyamucujpica, achcacunami Paita catimurca. 2 Chashna shamucujpica, leprahuan ungushca runami Jesuspajman shamushpa, Paipaj ñaupajpi pambacama cumurishpa:
–Apu, ñucata alliyachisha ninguipishchari, alliyachihuai– nirca.
3 Shina nijpi Jesusca:
–Ari, lepra canmanta anchuchun ninimi– nishpa paita japirinca, lepraca chingarircallami.
4 Chashna alliyajpimi, Jesusca cashna nirca:
–Riqui, pi canta alliyachishcata pajta piman huillanguiman. Curamantajcarinpish ricuchigri. Paicuna can alliyashcata ricuchunca, Diosman imata cuchun nishpa Moisés mandashcapi nishca shinata cugri– nircami.
Patsaj soldadocunata mandajpaj servijtami Jesús alliyachishca
5 Jesús Capernaumman chayamucujpica, patsaj soldadocunata mandaj shamushpami cashna nirca:
6 –Amito, ñucata servij huambrami mana cuyurijta ruraj ungüi japijpi, llaquinayajta huasipi siricun– nirca.
7 Chashna nijpi Jesusca:
–Shinashpaca alliyachigrisha– nircami.
8 Shina nijpimi, patsaj soldadocunata mandajca, cashna nirca:
–¿Amito, ñucaca imallapish cajpichu, canca ñuca huasiman yaicunguiari? Can “Alliyai” nijpica, ñuca servijca alliyangallamari. 9 Ñucaca, mandajcuna mandashcallami cani. Ñucapish ñuca mandana soldadocunata charinimi. Maijan soldadota ñuca “Ri” nijpica rinllami, “Shamui” nijpipish, shamunllami. Shinallataj ñuca servijtapish “Caita rurai” nijpica, ruranllami– nircami.
10 Chashna nijta Jesús uyashpaca, achcata cushicushpami, Paita catijcunata cashna nirca:
–Israelcunapurapica, cai runa shina ñucata alli crijtaca manataj ricushcanichu, chaica chashnatajmi. 11 Cancunaman huillanimi: Inti llujshin, inti yaicun ladomanta achcacuna shamushpami, jahua pacha Dios mandacunpica yaicungacuna. Paicunami Abrahamhuan, Isaachuan, Jacobohuan tiyarishpa micungacuna. 12 Ashtahuanpish, ‘Dios mandacunpimi causacun’ nishcacunarajmi, canllaman shitashca cangacuna. Paicunaca, ucu pacha amsapi shitajpimi, huacangacuna, quirupish caniringacuna– nircami.
13 Shina nishpa Jesusca, patsaj soldadocunata mandajtaca:
–Cambaj huasiman rilla, cambaj huambraca can crishca shinallataj alliyangallami– nircami.
Jesús chashna nijpica, chai huambraca ña alliyashcallami carca.
Pedropaj suegratami Jesús alliyachishca
14 Chai q'uipami, Pedropaj huasiman Jesús chayashpaca, Pedropaj suegra fiebrehuan anchayashpa, camapi siricujta ricurca. 15 Ungushcapaj maquita Jesús japijpica, alliyarcallami. Alliyashcahuanmi, jatarishpa paicunaman cararca.
16 Ña tutayamucujpica, supai japishca achcacunatami Jesuspajman pushamurcacuna. Jesusca, shuj shimita rimashpallami, supaicunataca llujshichirca. Shinallataj ungushcacunatapish tucuicunatami alliyachirca. 17 Dios ima nishcata huillaj Isaiasmi: “Paica, ñucanchij ungüicunatapish, ñucanchij nanaicunatapish aparcami” nishca carca. Jesusca chashnatajmi pajtachirca.
Jesusta catisha nishpaca tucuitami saquina
18 Jesusca, Paipaj muyundijpi achcacuna cajta ricushpami, Paipaj yachacujcunataca:
–Cuchata ch'imbashunchij– nirca.
19 Jesús chashna nicujpica, Mandashcata yachachijca Paipajman chayamushpami:
–Yachachij, can maiman rijpipish canhuanmi risha– nirca.
20 Chashna nijpimi, Jesusca cashna nirca:
–Atujcunapish causana jutcuta charinmi, pajarocunapish t'aźinta charinmi. Ashtahuanpish Runa Aichayuj ñucaca, maipi samarinallatapish mana charinichu– nircami.
21 Shujtaj yachacuj c'uchuyashpaca:
–Amito, shuyapai ñuca yayataraj pambamugrisha– nirca.
22 Chashna nijpimi, Jesusca cashna nirca:
–Canca ñucahuan jaculla. Huañushcaman rijchashpa causacujcuna, paicunapaj huañushcacunata pambachun saquilla– nircami.
Jesusca yacuta huaira cuyuchijpi jarcashcami
23 Chashna nishca q'uipa, barcoman Jesús huichiyajpica, Paipaj yachacujcunapish catishpa rircallacunami. 24 Ñapish achca huaira jatarishpami, yacuta caiman chaiman cuyuchirca. Yacu jatarishpa barcopi jundai callarijpipish, Jesusca dormicurcallami. 25 Pai manataj rijcharijpimi, yachacujcunaca:
–¡Apunchij Jesús, ña huañugrinchijca, quishpichihuaiari!– nishpa rijchachircacuna.
26 Jesús rijcharishpaca:
–¿Ima nishpataj manchaihuan huañucunguichij? Ñucataca, manamari tucui shunguhuan cringuichijchu– nishpami jatarirca.
Jatarishcahuanmi, huairatapish, yacutapish sinchita rimashpa jarcarca. Pai jarcajpica huairapish, yacupish casijlla tucurcallami. 27 Chaita ricushpaca, tucui chaipi cajcunami achcata mancharinacushpa:
–Cai Runaca, ¿imatajchu, imamí? Pai rimashcataca huairapish, yacupish uyanllamari– ninacurca.
Ishqui runacunamantami supaicunata llujshichishca
28 Cuchata ch'imbashpa Gadara llajtaman Jesús chayajpica, ishqui runacunami panteonmanta llujshishpa, Paihuan tupanaman shamurca. Chai runacunaca supaihuan cashcamanta, yallitaj millai runacunami carca. Chaimantami chai ñantaca, pipish mana puri tucurca. 29 Ñapish chai runacunaca:
–Diospaj Churi Jesús, canca, ¿imatataj ñucanchijtaca nij shamunguiari? ¿Llaquichina punlla manaraj chayamujpichu, llaquichij shamungui?– nishpami caparircacuna.
30 Chai chaininijllapica, achca cuchicunami micushpa puricurca. 31 Chaimantami supaicunaca, Jesustaca:
–Cai runacunamanta ñucanchijta llujshichishpaca, chai cuchicunapi yaicuchun saquihuai– nircacuna.
32 Shina nijpi Jesús:
–Richijlla– nijpica, chai ishqui runacunamanta llujshij supaicunaca, cuchicunapimi yaicurcacuna.
Chaimantami chai tucui cuchicunaca, jahua quinrimanta singushpa, cuchaman huashicushpa huañurca.
33 Chashna tucujpica cuchicunata michijcunaca, mancharishpa puebloman callpashpami, tucui imalla tucushcata parlarcacuna. Shinallataj chai ishqui runamanta Jesús supaicunata llujshichishcatapishmi parlarcacuna. 34 Chaita uyashcahuanmi, chai pueblomanta tucuicuna Jesuspajman chayamushpaca: “Ñucanchij llajtamantaca ripailla” nircacuna.
Crijcunatami llaquichishpa urata janajta cachashcacuna
8 Saulo shuti runaca, Estebanta huañuchijta ricushpaca, ‘Allimi’ nicurcami. Chai punllallatajmi, Jerusalenpi causacuj tandanacushca crijcunataca, achcata llaquichi callarirca. Chaimantami crijcunaca, tucuicuna caita chaita miticushpa, Judea llajtata, Samaria llajtata rircacuna. Huillagrichun Jesús mingashcacunallami mana maiman rircacuna. 2 Diosta manchaj runacunami achcata huacashpa, Estebantaca pambarcacuna. 3 Ashtahuanpish Sauloca, tandanacushca crijcunata chingachinatatajmi yuyarca. Chashna yuyashpami, huasin huasin yaicushpa, c'aricunata, huarmicunatapish sirijta aisashpa carcelman aparca.
Felipemi Samaria pueblopi huillashca
4 Chashna llaquichijpi Jerusalenmanta miticushpa rij crijcunaca, maita rishpapish alli huillaita huillanataca, mana saquircacunachu. 5 Felipe shuti runapish Samaria llajtapi shuj puebloman rishpami, Quishpichij Cristomanta huillarca. 6 Pai huillashcatapish uyashpa, achca señalcunatapish rurajta ricushpaca, tucuicunami alli yuyaihuan uyarcacuna. 7 Mapayachij supaicunatapish achcacunamantami, jatunta caparichishpa llujshichirca. Mana cuyuri tucujcunatapish, patojocunatapish achcacunatami alliyachirca. 8 Chashna rurajpica, chai pueblopi causajcunaca, tucuicunami jatunta cushicurcacuna.
Simón shuti yumbumantami parlashca
9 Samariapica ñaupamantami, Simón shuti shuj runa causaj carca. Paica, ‘Imatapish rurai tucuj jatun yumbumi cani’ nirijmi carca. Chashna nishpami, chai llajtapi causajcunataca, yumbu ruraicunahuan manchachishpa causarca. 10 Chaimantami jatuncunapish, uchillacunapish chai runa yachachishcataca, alli uyajcuna carca. Chaimantami: “Cai runaca, Dios rurachijpimi cai tucuitaca rurai tucun” nijcuna carca.
11 Yumbu ruraicunahuan, ña unaita umashpa charishca cajpimi, tucuicuna paitaca alli uyajcuna carca. 12 Chashna cajpipish Felipeca, Dios mandacunmanta alli huillaitapish, Jesucristomantapish huillarcami. Pai huillashcata crishpami c'aricunapish, huarmicunapish bautiźarircacuna. 13 Chai Simonpish crishpa bautiźarircami. Chaimantaca, Felipe maita rijpipish, paihuanmi purirca. Felipe yachachishcacunata uyashpa, ima señalcunatapish, jatun milagrocunatapish rurajta ricushpaca, achcata mancharircami.
14 Huillagrichun mingashcacunaca Jerusalenpimi, Samariapi causajcunapish Diospaj Shimita huillajpi chasquishcataca, yachaj chayarcacuna. Chaimantami Pedrotaca, Juandijta chaiman cacharcacuna. 15 Paicuna chaiman chayashpaca, chai crijcunapish jucha illaj Espirituta chasquichun nishpami, Diosta mañarcacuna. 16 Paicunapajmanca Espirituca manaraj uriyashcachu carca. Apunchij Jesuspaj shutillapimi, bautiźashcacuna carca. 17 Chaimantami Pedrohuan, Juanhuan chai crijcunapaj jahuapi maquita churajpi, jucha illaj Espirituta chasquircacuna.
18 Huillagrichun mingashcacuna maquita churajpi, crijcuna jucha illaj Espirituta chasquijtami Simonca ricurca. Chaimantami paimanpish cuchun yuyashpa, cullquita ricuchishpa, 19 cashna nirca:
–Ñucapish maijanpaj jahuapi maquita churajpi, jucha illaj Espirituta chasquichun, ñucamanpish chai rurai tucunata cuhuaichij– nircami.
20 Chashna nijpica, Pedroca cashnami nirca:
–Dioslla cui tucushcata cullquihuan randisha nishcamanta, cambaj cullquindij chingarigrilla. 21 Cambaj shungu Diospaj ñaupajpi mana alli cashcamanta, canca cai ruranapica ima ricunata, ima ruranata mana charinguichu. 22 Chashna mana allita yuyashcata saquishpa, Mandaj Diospajman cutiri. Cambaj millai yuyaita perdonangapishchari, Diosta mañai. 23 Cambaj shunguca, millai yuyaicunahuan jundami. Juchapaj maquipi huatashcamari cangui– nircami.
24 Pedro chashna nijpi, Simonca:
–Cancuna nishca shina ama tucuchun, Mandaj Diosta ñucamanta mañapaichij– nircami.
25 Mandaj Diospaj Shimita Samariapi huillashca q'uipami, Pedroca Juandij Jerusalenman tigrarcacuna. Chaiman tigracushpaca, Samariapi caj shujtaj pueblocunapipish alli huillaita huillaihuanmi rircacuna.
Etiopía llajta runamanmi Felipe huillashca
26 Mandaj Dios cachashca angelmi, Felipetaca: “Llujshiri, Jerusalenmanta Gazaman rina uranij, shitashca pamba ñanman ri” nirca. 27 Chashna nijpi Felipeca, jatarishcahuan rircallami. Pai ñanta ricushpaca, Etiopiamanta eunuco runahuanmi tuparca. Paica Etiopía llajtata jatun mandaj Candace shuti mandaj huarmipaj cullquitapish, tucui imalla charishcacunatapish ricujmi carca. Chai runaca, Jerusalenpi Diosta adoranamanmi shamushca carca. 28 Paipaj carretapi tiyashpami paica, Dios ima nishcata huillaj Isaías quillcashcata reźaihuan tigracurca. 29 Felipetaca, jucha illaj Espiritumi: “Chai carretaman c'uchuyagri” nirca.
30 Chaiman c'uchuyashpaca, Dios ima nishcata huillaj Isaías quillcashcata reźacujtami uyarca. Chaimantami:
–¿Can reźacushca imata nisha nishcataca, entendinguichu?– nishpa tapurca.
31 Chashna tapujpi chai runaca:
–Pi mana yachachijpica, ¿ima shinataj yachashari?– nircami. Chashna nishpaca carretaman huichiyachishpami, Felipetaca paipaj c'uchupi tiyachirca. 32 Pai reźacushca quillcashcapica cashnami nicurca:
«Paitaca, malta ovejata shinami huañuchinaman aparcacuna.
Rutujpaj ñaupajpi oveja upalla sirij shina,
imata mana rimarcachu.
33 P'iñashpa llaquichicujpipish,
Paitaca pi mana mitsarcachu.
Paita cai pachapi huañuchishcamantaca,
Paita catijcunataca, ¿pitaj yupai tucungari?» nicurcami.
34 Chaitami chai eunuco runaca, Felipetaca:
–Dios ima nishcata huillajca, ¿pai quiquinllamantatajchu, maijan shujtajmantachu chashna nishca canga? Huillahuairi– nishpa tapurca.
35 Shina tapujpimi Felipeca, chai reźacushca quillcallamantataj callarishpa, Jesusmanta alli huillaita huillarca. 36 Ñanta ricushpaca, shuj yacuman chayashpami chai runaca:
–Riquiari, caipica yacu tiyanmari. ¿Bautiźari tucunichu, allichu canga?– nirca.
37 Shina nijpimi, Felipeca:
–Can tucui shunguhuan crishpaca, bautiźari tucunguimi– nijpi chai runaca:
–Ari, Jesucristotaca Diospaj Churi cashcata crinimari– nircami.
38 Shina nishpa carretata shayachichishpa, ishquindijtaj yacuman uriyashpami, Felipeca chai runata bautiźarca. 39 Bautiźashpa yacumanta llujshijpica, Mandaj Diospaj Espirituca Felipeta ñapish aparcallami. Chaimanta Felipeta ña mana ashtahuan ricushpapish, cushicushpa rircallami. 40 Ashtahuanpish Felipeca, Azoto pueblopi ricurishpami, chaimanta callarishpa, Cesareaman chayangacama, tucui pueblocunapi huillaihuan rirca.
Mushuj Testamento Diospaj Shimi (Quichua‐Chimborazo New Testament) Copyright © 2010 by Biblica, Inc.™ Used by permission. All rights reserved worldwide.