M’Cheyne Bible Reading Plan

6 Ние, во улога на Божји соработници, ве молиме да не ја пропуштите Божјата милосрдна благонаклоност спрема вас, ² зашто Бог вели:

„Повикај Ме во вистинскиот час

и Јас ќе ти ја услишам молитвата;

побарај Ме во денот кога ти нудам спасение

и Јас ќе ти помогнам!^[a]“

Сега е вистинскиот час! Денес е денот кога Бог ти нуди спасение!

Тешкотиите со кои се соочувал Павле

³ Не даваме повод нашето поведение некого да поколеба да поверува во Господ, затоа се трудиме нашата работа да биде беспрекорна. ⁴ Во се се однесуваме како Божји службеници, стрпливо поднесувајќи ги сите напади, страдања и тешкотии. ⁵ Не тепаат, не ставаат в затвор, креваат бунтови против нас, а ние работиме, минуваме бессони ноќи и гладуваме^[b]. ⁶ Се докажуваме преку нашата чистота, знаење, стрпливост, љубезност, преку силата на Светиот Дух и преку нашата искрена љубов. ⁷ Верно ја проповедаме вистината. Божјата сила работи во нас. Праведноста е нашето оружје и за напад и за одбрана^[c].

⁸ Му служиме на Бог без разлика дали луѓето не почитуваат, или не презираат, дали имаат добро или лошо мислење за нас. Ние сме чесни, но тие не нарекуваат измамници. ⁹ Сите знаат за нас, а се однесуваат спрема нас како да не не познаваат. Соочени со смртни закани, а сепак, ете, живи сме. Казнувани сме, но не сме убиени. ¹⁰ Се обидуваат да не растажат, но ние сепак сме радосни. Сиромашни сме, но на многумина им дадовме духовно богатство. Немаме ништо, а сепак поседуваме се.

¹¹ Драги наши пријатели во Коринт, ние искрено ви проговоривме, широко ги отворивме нашите срца. ¹² Не сме ние затворени спрема вас, туку вие сте затворени спрема нас. ¹³ Како на свои деца ви велам: отворете ги и вие вашите срца спрема нас!

Пазете се од штетни компромиси

¹⁴ Немојте да се здружувате^[d] со неверници! Како може праведен и неправеден да работат заедно? Како може светлината и темнината да живеат заедно? ¹⁵ Може ли да има слога меѓу Христос и Ѓаволот^[e]? Каква заедница може да има еден христијанин со безверник? ¹⁶ Треба ли во Божјиот храм да ставате и идоли? Ние сме храмови на Живиот Бог. Како што Самиот Тој вели за Своите следбеници:

„Ќе живеам во нив,

ќе се движам меѓу нив;

Јас ќе бидам нивни Бог,

а тие Мој народ^[f].“

¹⁷ „,Затоа, напуштете ги оние што не Му припаѓаат на Бог,

одвојте се од нив,‘ - вели Господ.

,Не мешајте се со она што е нечисто

и Јас ќе ве прифатам^[g].‘“

¹⁸ „,Ќе ви бидам Татко,

а вие ќе бидете

Мои синови и ќерки,‘

- вели Семоќниот Господ^[h].“