M’Cheyne Bible Reading Plan

Исцелување на парализиран човек

Првите негодувања против Исус

(Мт. 9:1-8; Лк. 5:17-26) 2 По извесно време, Исус повторно се врати во Кафарнаум и набргу се дозна дека Тој е дома. ² Тогаш толку народ се насобра, што веќе немаше место ни пред вратата. Исус им ја проповедаше Божјата порака.

³ Четворица мажи, носејќи на носила еден парализиран човек, се упатија кон Исус. ⁴ Бидејќи не можеа да дојдат до Него, поради многубројниот народ, тие се искачија на кровот, направија отвор над местото каде што стоеше Исус и ги спуштија носилата со парализираниот човек.

⁵ Гледајќи со колкава вера го прават ова, Исус му рече на парализираниот: „Синко, гревовите ти се простуваат!“

⁶ Тука беа присутни и некои вероучители, кои во себе почнаа да се прашуваат: ⁷ „Како смее да зборува вака!? Тој се прави Бог^[a]! Кој може да простува гревови освен Бог!?“

⁸ Во истиот момент, Исус ги проѕре нивните мисли и им рече: „Зошто ви идат такви зли мисли? ⁹ Што е полесно за Мене: да му речам на парализираниот дека му се простуваат гревовите или да му речам да стане, да си ја земе постелата и да си оди дома? ¹⁰ Но ќе ви докажам дека Јас, Синот Човечки, имам власт да простувам гревови на Земјава!“ Тогаш Исус му рече на парализираниот: ¹¹ „Стани, земи си ја постелата и оди си дома!“

¹² Пред очите на сите, човекот веднаш стана, си ја зеде постелата и излезе. Луѓето беа вчудовидени и Му оддаваа слава на Бога, велејќи: „Вакво нешто досега не сме виделе!“

Исус го повикува Левиј (Матеј) за апостол

(Мт. 9:9-13; Лк. 5:27-32) ¹³ Исус повторно отиде на брегот на Галилејското Езеро. Голема толпа луѓе се собра околу Него и Тој ги поучуваше. ¹⁴ Одејќи, Исус го забележа Алфеевиот син Левиј. Тој седеше на своето работно место - собирач^[b] на данок. Исус го повика: „Дојди и биди Мој следбеник!“ Левиј стана и Му се придружи на Исус.

¹⁵ Подоцна Исус и Неговите ученици беа поканети на вечера кај Левиј. Меѓу поканетите беа и голем број собирачи на данок и други грешници кои одеа по Исус.

¹⁶ Некои од вероучителите беа припадници на фарисеите^[c]. Гледајќи како Исус вечера со грешници и собирачи на данок, тие им приговорија на Исусовите ученици, велејќи: „Зошто Исус вечера со собирачи на данок и со грешници!?“

¹⁷ Исус ги слушна и им одговори: „На здравите луѓе не им е потребен лекар, туку на болните. За Мои следбеници не дојдов да поканувам „праведници“, туку грешници!“

Прашања за постот

(Мт. 9:14-17; Лк. 5:33-39) ¹⁸ Учениците на Јован Крстител, како и фарисеите, практикуваа постење. Затоа некој дојде кај Исус и Го праша: „Зошто Твоите ученици не постат, како што постат учениците на Јован Крстител и на фарисеите?“ ¹⁹ Исус им одговори: „Зар очекувате сватовите да постат за време на свадбата, додека младоженецот е со нив? ²⁰ Ќе дојде време кога младоженецот ќе се оттргне од нив; тогаш тие ќе постат.

²¹ Не се крпи стара облека со нова крпа од непрано платно! Зашто, крпата од новото платно ќе се собере и ќе направи уште поголема дупка!

²² Не се става ново вино во стари кожни мешини! Новото вино ферментирајќи ќе ги пукне старите мешини! Тогаш и виното ќе истече и мешините ќе се уништат. Ново вино се става во нови мешини!“

Прашања околу саботниот ден

(Мт. 12:1-8; Лк. 6:1-5) ²³ Еден саботен ден Исус минуваше преку некои ниви, а Неговите ученици кинеа клавчиња. ²⁴ Некои од фарисеите Му приговорија, велејќи: „Зошто го прават во саботен ден она што не смее да се прави во сабота!?“

²⁵ Исус им одговори: „Зар не сте читале што направи Давид кога заедно со неговата дружина се најдоа во невола и огладнеа? ²⁶ Тоа беше во времето на Првосвештеникот Евјатар. Давид влезе во Божјиот храм, и тој и неговата дружина јадеа од посветените лебови, од кои само свештениците смеат да јадат!“

²⁷ Во заклучок, Исус им рече: „Саботата е создадена за човекот, а не човекот за саботата! ²⁸ Затоа, Јас, Синот Човечки, Сум господар и на саботата.“

Сите сме виновни пред Бог

2 Затоа, ниеден човек нема оправдување! Дури ни тој што ги осудува таквите постапки, зашто и самиот е виновен за нив. Тој што им пресудува на другите си пресудува и себеси! ² Знаеме дека Бог е справедлив и ќе ги казни сите што прават такви работи. ³ Немој да мислиш дека Бог ќе ги казни другите луѓе за нивните грешни постапки, а ти за слични постапки ќе ја избегнеш Божјата казна! ⁴ Не сфаќај ја погрешно Божјата прекумерна добрина, воздржливост и долгата трпеливост спрема тебе! Божјата добрина ти дава време за да се покаеш!

⁵ Ако останеш тврдоглав и не се покаеш, си собираш гнев против себе со кој Бог справедливо ќе те казни на Судниот ден, ⁶ кога Бог на секого ќе му плати според неговите дела^[a]. ⁷ На оние што истрајуваат во вршењето добри дела, и во копнежот по небесна слава, чест и бесмртност, Бог ќе им даде вечен живот, ⁸ а врз оние што се себични, што одбиваат да ја слушаат вистината, а го следат злото, Бог ќе излее гнев и лутина. ⁹ Маки и страдања ќе има за сите што прават зло, прво за Евреите, а потоа и за другите народи, ¹⁰ а слава, чест и мир за сите што прават добро, прво за Евреите, а потоа и за другите народи. ¹¹ Кај Бог нема пристрасност!

¹² Кога грешат неевреите, Бог ќе ги казни, без оглед на тоа што ним не им бил даден Божјиот Закон во пишана форма. Кога грешат Евреите, Бог и нив ќе ги казни, бидејќи тие го знаат Божјиот Закон и ќе бидат судени според него. ¹³ Зашто не се станува праведник пред Бог само со познавање на Законот, туку со придржување кон него.

¹⁴ Кога неевреите, кои го немаат Божјиот Закон во пишана форма, инстинктивно се придржуваат кон заповедите што произлегуваат од него, тоа покажува дека длабоко во себе тие умеат да го разликуваат доброто од злото. ¹⁵ Тоа е доказ дека она што Божјиот Закон го бара е запишано во нивните срца. За нив мерило за поведението е нивната совест, која им кажува кога некоја нивна постапка е за осуда, а кога е оправдана. ¹⁶ Ќе дојде ден кога Бог, преку Исус Христос, ќе го суди она што е скриено во луѓето, како што кажува Радосната вест што јас ја проповедам.

Предупредување за Евреите

¹⁷ Ако си Евреин, ти се потпираш на Божјиот Закон, фалејќи се со посебната поврзаност на твојот народ со Бог. ¹⁸ Ја познаваш Божјата волја и знаеш да го одбереш она што е најдобро, бидејќи си учел од Божјиот Закон. ¹⁹ Уверен си дека можеш да им бидеш водач на слепите, светло на луѓето што се загубени во мрак, не познавајќи го Бога. ²⁰ Сметаш дека можеш да ги упатуваш неупатените и да ги учиш незрелите, уверен дека Божјиот Закон ти дал совршено познавање на вистината. ²¹ Но, учејќи ги другите, зошто самиот не се поучиш!? Ти што проповедаш да не се краде, дали и самиот не крадеш!? ²² Ти што други учиш да не прават прељуби, дали и самиот не правиш прељуби!? Ти што се гнасиш од идоли, дали и самиот не крадеш од храмовите? ²³ Толку се фалиш со Божјиот Закон, а го прекршуваш, и Му нанесуваш срам на Бог! ²⁴ Токму така и стои запишано во Светото Писмо: „Поради вас другите народи го навредуваат Божјото име^[b]!“

²⁵ Од еврејскиот обичај на обрежување има полза само ако се придржуваш кон Божјиот Закон. Ако го прекршуваш, твоето обрежување е безвредно. ²⁶ Затоа, ако необрезан човек се придржува кон Божјиот Закон, зарем нема да се смета за еднакво добар со обрежаните? ²⁷ Оние што телесно не се обрежани, а се придржуваат кон Божјиот Закон, ќе ве судат вас кои, иако го имате Божјиот Закон во пишана форма и сте обрежани, сепак го прекршувате.

²⁸ Зашто, да се биде вистински Евреин не се доволни само телесните податоци и телесното обрежување, туку ²⁹ вистински Евреин е оној чие срце му припаѓа на Бог, а вистинско обрежување е духовниот препород во срцето. Тоа е дело на Светиот Дух, а не на пишаниот Закон. Оној што доживеал таква промена, ќе бара пофалба од Бог, а не од луѓето.