M’Cheyne Bible Reading Plan

ВИДЕНИЈА ЗА ИДНИНАТА

Опис на Божјиот престол

4 Потоа имав друго видение. На небото видов отворена врата. Тогаш ми проговори истиот глас, силен како од труба, како и на почетокот, и ми рече: „Искачи се овде, за да ти покажам што ќе се случува во иднината!“

² Тогаш паднав во занес^[a] и таму, на небото, видов престол и Некој што седи на престолот. ³ Ликот на Тој што седеше на престолот Му блескаше како скапоцените камења јаспис и карнеол^[b]. Околу престолот имаше круг од божилак, со боја на смарагд. ⁴ Исто така, околу централниот престол имаше дваесет и четири други престоли. На нив седеа дваесет и четири старешини, облечени во бели облеки, со златни венци на главите. ⁵ Од централниот престол излегуваа молскавици, грмежи и татнежи. Пред престолот гореа седум факли кои Го претставуваа седумкратниот^[c] Божји Дух. ⁶ Исто така, пред престолот се простираше нешто што прилегаше на стаклено море, бистро како кристал.

Околу централниот престол имаше четири живи суштества полни со очи и однапред и одназад. ⁷ Првото суштество беше како лав, второто како јунец, третото со лице на човек, а четвртото беше како орел во лет. ⁸ Секое суштество имаше по шест крилја, и беа полни со очи и однадвор и однатре. Овие суштества деноноќно и без прекин викаат:

„Свет е, свет е, свет е Господ, Семоќниот Бог, Кој отсекогаш постоел, постои и ќе дојде!“

⁹ Секојпат кога четирите суштества Му оддаваа слава, чест и благодарност на Оној што седеше на престолот - на Вечно Живиот - ¹⁰ во истиот миг дваесет и четирите старешини паѓаа ничкум и Му се поклонуваа на Вечно Живиот, положувајќи ги своите венци пред престолот и говорејќи:

¹¹ „Достоен Си, Господе и Боже наш,

да примиш слава, чест и власт,

зашто Ти си Творецот на се,

и се што постои, Тебе Ти го должи^[d] своето постоење и создавање!“

3 Меѓу фарисеите^[a] имаше еден човек по име Никодим^[b], кој беше еврејски верски старешина. ² Тој дојде кај Исус ноќе и му рече: „Раби, знаеме дека Ти си учител дојден од Бог, зашто овие чуда што Ти ги правиш никој не може да ги прави, ако Бог не е со него!“

³ Исус му одговори: „Најсериозно ти велам: ако човек наново^[c] не се роди, не може да го види Божјото царство!“

⁴ „Како може стар човек наново да се роди!?“ - праша Никодим. „Може ли да се врати во утробата на својата мајка и повторно да се роди!?“

⁵ Исус му одговори: „Ти велам и ти нагласувам: ако човек не се роди од вода и Дух, не може да влезе во Божјото царство!

⁶ Телото може да роди само тело, додека Светиот Дух раѓа нов, духовен живот, од небото. ⁷ Не чуди се што ти реков: ,Морате наново да се родите!‘ ⁸ Ветрот дува каде што сака. Звукот му го слушаш, но не знаеш од каде доаѓа и каде оди. Така е со секој што е роден од Духот.“

⁹ „Како може тоа да биде!?“ - праша Никодим.

¹⁰ Исус му рече: „Како можеш да му бидеш учител на израелскиот народ, а да не го знаеш тоа!? ¹¹ Најсериозно ти велам: ние знаеме што зборуваме и сведочиме за она што сме го виделе, а вие нашето сведоштво не го примате. ¹² Ако не Ми верувате кога ви зборувам за земни работи, како ќе Ми верувате ако ви зборувам за небесни работи!? ¹³ Никој не бил горе на небото, освен Синот Човечки^[d], Кој слезе од небото. ¹⁴ Исто како што Мојсеј ја подигна бронзената змија во пустината^[e], така ќе мора и Јас, Синот Човечки, да бидам подигнат. ¹⁵ Тогаш секој што ќе поверува во Мене, ќе се здобие со вечен живот.

¹⁶ Зашто Бог толку ги засака луѓето од овој свет, што Го даде Својот Единороден Син, за да не загине ниту еден што верува во Него, туку да има вечен живот. ¹⁷ Бог не Го испрати Својот Син во светот за да го осуди светот, туку да го спаси преку Него. ¹⁸ Ниту еден што верува во Него нема да биде суден. Оној, пак, што не верува, веќе е осуден, затоа што не поверувал во Единородниот Божји Син.

¹⁹ Пресудата гласи: „Светлината дојде на светот, но луѓето ја засакаа темнината повеќе од Светлината, затоа што постапките им беа зли. ²⁰ Секој што врши зло ја мрази Светлината и не доаѓа кај неа, за да не се разоткријат неговите гревови. ²¹ Оној, пак, кој живее според вистината, доаѓа кај Светлината за да се види дека неговите постапки се направени во послушност спрема Бог.“

²² По ова, Исус и Неговите ученици заминаа од Ерусалим, но останаа во покраината Јудеја, каде што Исус помина извесно време со нив и крштаваше. ²³ Јован исто така крштаваше во Енон^[f], близу до Шалем, зашто таму имаше многу вода. Луѓето доаѓаа и беа крштавани. ²⁴ Тоа беше пред Јован да биде фрлен в затвор.

²⁵ Тогаш се разви една расправа меѓу Јовановите ученици и еден Евреин околу обредното миење. ²⁶ Тие дојдоа кај Јован и му рекоа: „Раби, Оној Човек што беше со тебе од другата страна на реката Јордан за Кого ти посведочи дека е Месијата - ете, Тој крштава и сите одат кај Него!“

²⁷ Јован им одговори: „Човек не може да врши никаква мисија, ако не му е дадено од небото^[g]. ²⁸ Вие самите сте ми сведоци дека реков оти јас не сум Месијата, туку дека сум испратен како Негова претходница. ²⁹ Невестата ќе оди таму каде што е Mладоженецот, а пријателот на Mладоженецот, кој стои и слуша, од се срце се радува што го слуша гласот на Mладоженецот. Мојата радост на тој начин се исполни. ³⁰ Тој мора да напредува, а јас да се намалувам.“

Дојдениот од небото

³¹ Најголем од сите е Оној што доаѓа одозгора. Оној што е од Земјата, пак, и припаѓа на Земјата и зборува за земни работи. Најголем од сите е Оној што доаѓа од небото. ³² Тој сведочи за она што го видел и слушнал, но малкумина го прифаќаат Неговото сведоштво. ³³ Оној што го прифаќа Неговото сведоштво потврдува дека Бог е вистинит. ³⁴ Зашто, Оној Кого Бог Го прати ги зборува Божјите зборови, затоа што Бог му дава Дух без мера. ³⁵ Таткото Го сака Својот Син и Му предал се во Неговите раце. ³⁶ Оној што верува во Синот има вечен живот; оној, пак, што му е непослушен^[h] на Синот, не ќе види живот, туку останува под Божјата казна!