M’Cheyne Bible Reading Plan
Efesopimi Pablo huillashca
19 Apolos Corintopi cajpimi, Pabloca jahua llajtacunata purishpa, Efesoman chayarca. Chaipimi huaquin crijcunahuan tuparca. 2 Paicunatami:
–Cancuna crij tucushpaca, ¿jucha illaj Espiritutaca chasquircanguichijchu?– nishpa tapurca.
Chashna tapujpica:
–Jucha illaj Espíritu tiyashcataca, mana uyashcanchijllapishchu– nircacunami.
3 Shina nijpi Pabloca:
–¿Shinashpaca, imata crijpitaj cancunataca bautiźarca?– nijpi paicunaca:
–Juan yachachishcata chasquijllapimi bautiźarca– nircacuna.
4 Shina nijpimi, Pabloca:
–Juanca paipajman shamujcunataca: “Ñucapaj q'uipa shamujta cringuichij” nircami. Chashna nishpami, Diospajman cutirijcunataca bautiźarca. Jesustaca, Quishpichij Cristo cashcata crichun nishpami chashna nirca– nishpami alli entendichirca.
5 Pablo chashna huillajta uyashpaca, Apunchij Jesuspaj shutipimi bautiźarircacuna. 6 Chai q'uipa Pablo paicunapaj jahuapi maquita churajpimi, jucha illaj Espíritu paicunata japirca. Chaimantami shujtaj rimaicunata rimarcacuna, Dios ima nishcatapish huillarcacunami. 7 Paicunaca, chunga ishqui shinallami carca.
8 Pabloca, quimsa quillatami chai pueblopica, Taita Dios mandacunta paicunapish crichun, tandanacuna huasipi, mana manchashpa, alli huillarca. 9 Chashna huillajpipish taucacunami rumi shungu tucushpa, manataj crishun nircacuna. Crinapaj randica tucuicunapaj ñaupajpimi, ‘Jesuspaj Ñanta catinaca mana allichu’ nishpa rimarcacuna. Chaimantami Pabloca crijcunapuralla raquirishpa, Tirano shuti runa yachachina huasipi tandanacunata callarirca. Chaipimi, punllanta parlanacushpa yachachij carca. 10 Chashnami chai Asia llajtapica, Pabloca ishqui huatata causarca. Apunchij Jesusmanta alli huillaita Pablo chai huatacunapi huillashcataca tucui judiocunapish, griegocunapishmi uyarca.
11 Taita Diosca Pablotaca, jatun milagrocunatapishmi rurachij carca. 12 Chaimantami tucuicuna churanacunata, linsocunata Pablopi tupachishpaca, ungushcacunapaj jahuapi churagrijcuna carca. Chashna rurajpica, ima ungüihuan cajcunapish alliyarcallami. Millai espiritucunapish llujshircallami.
13 Supaicunata llujshichishpa purij maijan judiocunaca, paicunapish Apunchij Jesuspaj shutipimi, supaicunata llujshichishun yuyarcacuna. Chashna yuyashpami supaicunataca: «¡Pablo huillacushca Jesuspaj shutipimi cancunataca llujshichij nini!» nircacuna. 14 Judío curacunata mandaj Esceva shuti curapaj canchis churicunami chashna rurajcuna carca.
15 Paicunatami, millai supaica cashna nirca:
«Jesustaca rijsinimi, Pablo pipaj cashcatapish yachanimi. Ashtahuanpish cancunaca, ¿pipishchari canguichij?» nircami. 16 Chashna nishcahuan jatarishpami, chai millai supaihuan caj runaca, tucui paicunata churanacunatapish llatanashpa, mana jahuallata macarca. Chashna pairaj mishajpimi chai huasimantaca, lluchulla callparcacuna.
17 Chashna tucushcataca, Efesopi causajcunaca judiocuna, griegocuna, tucuicunami yachaj chayarcacuna. Chaimantami achcata mancharcacuna. 18 Chaita ricushpaca, crijcunapish taucacunami paicuna ñaupa imalla mana alli rurashcata huillanaman shamurcacuna. 19 Chashnallataj, yumbu ruraicunata rurajcunapish taucacunami, paicunapaj librocunata apamushpa, tucuicunapaj ñaupajpi rupachircacuna. Chai rupachishca librocuna mashna valishcata yupajpica, chunga huaranga cullquimi tucurca. 20 Chashnami maipipish, Apunchij Jesusmanta huillashca shimicunaca tucuita rurai tucuj cashcata ricurcacuna. Crijcunapish ashtahuanmi sinchiyarcacuna.
21 Tucui chaicunata rurashca q'uipami Pabloca, Macedonia, Acaya llajtacunapi crijcunata ricuihuan, Jerusalenman rinata yuyarirca. «Chaimanta tigrashpatajca, Romaman rishami» nishpa, chai yuyaillami carca. 22 Chashna yuyashpami, paita ayudaj Timoteohuan, Erastohuan ishquitaca Macedoniaman cacharca. Paica chai Asia llajtallapitajmi, ashacama saquirirca.
Efesopica Demetriomi huillanata jarcashca
23 Chai punllacunami Efesopica, Jesuspaj Ñanta catinamanta huillacujta jarcangapaj achca gentecunata jatarichircacuna. 24 Cullquita imatapish ruraj Demetrio shuti runami chaita callarichirca. Paica cullquihuanmi, Diana shuti huarmi diosta yuyarina uchilla huasicunata ruraj carca. Chaicunata paipaj rurajcunapish achca cullquiyujcunami tucurcacuna. 25 Pai shinallataj chai shinacunata ruraj shujtajcunatapish tandachishpami, cashna nirca:
–Uyaichij tiocuna, cancunallataj allimi yachanguichij. Caicunata rurashpallami, ñucanchijca, alli cullquiyuj tucushcanchij. 26 Shinallataj chai Pablo imallata nishpa puricujtapish cancunallataj uyashcanguichijmi. Paica, ‘Maquihuan rurashcallacunaca mana diostajchu’ nishpami puricun. Mana cai Efesollapichu chashna nishca, ashtahuanpish tucui Asia llajtapimari, achcacunata chashna crichishpa puricun. 27 Pai chashnalla catijpica, mana ñucanchij cullqui japinalla tucurigrinchu. Ashtahuancarin, ñucanchij Diana shuti jatun diostamari, tucuicuna cungarishpa, paipaj huasitapish shitashcata saquigrincuna. Tucui Asia llajtapi causajcunapish, mai shujtaj llajtacunapi causajcunapish adorashca cashca jahuamari chashna tucugrin– nircami.
28 Chaita huillajpica, mana jahuallata p'iñarishpami:
–¡Efesopi causajcunapaj Diana diosca jatunmari!– nishpa caparircacuna.
29 Chaita uyashpami, tucui chai pueblopi causajcunaca musparishpa jatarircacuna. Chaimantaca Macedoniamanta Pablohuan shamuj Gayotapish, Aristarcotapish japishpami, tucuicuna huaicashpa teatroman aparcacuna. 30 Tucui chai ucupi cajcunaman huillangapaj Pablo yaicusha nijpica, crijcunami mana cacharircacuna. 31 Asia llajtata maijan mandajcunapish Pablopaj alli rijsishcacuna cashpami, ‘Ama teatromanca yaicupangui’ ninaman cacharcacuna.
32 Chaipi tandanacushca gentecunaca musparishpami, shujcunaca shujta, shujtajcunaca shujta capariricurcacuna. Ashtahuancarin, imapaj tandanacushcatapish mana yacharcacunachu. 33 Chai gentecunapaj chaupimantami judiocunaca, imamanta chashna caparicushcata tucuicunaman huillachun, Alejandrota t'angashpa, ñaupajman cacharcacuna. Alejandroca tucuicunapaj ñaupajpi shayarishpami, upallachun maquihuan jarcarca. Gentecuna ama ashtahuan p'iñarichunmi alli huillasha yuyarca. 34 Ashtahuanpish Alejandrota, judiocunapura cashcata rijsishpacarin:
–¡Efesopi causajcunapaj Diana diosca jatunmari!– nishpami, tucuicuna shuj shinalla, ishqui horas shinata caparicurcallacuna.
35 Chai pueblota mandana huasipi jatun quillcaj runa shamushpami, tucuicunata upallachishpa cashna nirca:
–Efesopi causajcuna, jatun Diana diospaj huasita tucui caipi causajcuna cuidacuj cashcataca, tucuicunallatajmi yachancuna. Dianaca Júpiter nishca diosmantami urmarca. 36 ¿Pitaj chaitaca, ‘Mana chashnachu’ ningari? Chashna cashcamantaca, ña upallapaichij. Ñataj manapish alli yachashpa, pita imata ruranguichijman. 37 Cancuna pushamushca runacunaca, ima mana millaita mana rurashcachu. Cancunapaj diostapish mana c'amishcachu. 38 Demetriotapish, paipajta rurajcunatapish pi p'iñachijpica, juezcuna tiyanmi, paicunaman huillagrichunlla. Paicunapaj ñaupajpi ch'imbapura imatapish huillanacugrichunlla. 39 Cancuna ima shujtaj allichinata charijpipish, mandashcapi nishca shina tucuicunata tandachishpa, alli yuyarinacushpa allichishunllami. 40 Cunan cashna jatarishcata tapujpica, ñucanchijca llaquimari tucushun. ‘¿Imamantataj jatarircanguichij?’ nishpa, juchachij imajpica, ¿imatataj nishunri?– nircami.
41 Chashna nishcahuan, chai tandanacushcacunataca, ‘Ña richijlla’ nishpa cacharcallami.
Jesusta huañuchingapaj japinatami yuyarishcacuna
14 Pascuapi levadura illajlla tandata micuna fiesta punllapajca, ishqui punllacunallami illarca. Chaimantami pushaj curacunapish, Mandashcata yachachijcunapish Jesustaca, ima shinapish umashpalla japishpa huañuchinata mashcarcacuna. 2 Chaimantami: «Cai fiesta punllacunapica ama japishunchijchu, gentecunaca imatapish ningallatajmari» ninacurcacunami.
3 Jesusca, Betaniapimi leproso nishca Simonpaj huasipi, meźapi tiyacurca. Chaipi tiyacujpimi shuj huarmica, alabastro botellapi achca valij, mishquiman ashnacuj, nardo shuti aceiteta apashpa shamurca. Paica alabastro botellata p'aquishpami, chai aceitetaca Jesuspaj umapi tallirca. 4 Chashna rurajpimi, maijancunaca, shungullapi huañurishpa, cashna ninacurca:
–¿Ima nishpataj mishquiman ashnacujtaca, cashna yanga tallinchu, imamí? 5 Chaitaca, quimsa patsaj yalli denariocunapi c'atushpamari, huajchacunaman cunchijman carca– nishpami, chai huarmitaca rimarcacuna.
6 Ashtahuanpish Jesusca, cashnami nirca:
–Saquichij, ama p'iñachijchu. Ñucapajca allitamari ruran. 7 Huajchacunaca mana illangachu, paicunapaj ima allita rurasha nishpaca, ruracunguichijllami. Ashtahuanpish Ñucataca, mana cancunahuan charicunguichijllachu. 8 Cai huarmica, pai rurai tucushcatami rurashca. Ñucata pambanapajmari, Ñuca aichataca ñaupaman allichishca. 9 Tucui cai pachapica, maipipish cai alli huillaita huillacushpaca, cai huarmi imata rurashcatapishmi huillangacuna. Chaita uyashpaca, “Allitamari rurashca” ningacunami, chaica chashnatajmari– nircami.
10 Chai q'uipami, chunga ishquipuramanta Judas Iscarioteca, Jesusta japichisha nishpa, pushaj curacunapajman rirca. 11 Pai japichisha nijpitajcarinpish paicunaca, achcata cushicushpami, cullquita cushun nircacuna. Chaimantami Judasca, ima shina japichinallata yuyacurca.
Jesusca Pai huañushcata yuyachij micuitami callarichishca
12 Levadura illaj tandata micuna fiesta callari punllapica, malta ovejata Diosman cushpa huañuchishpami, Pascua micuita rurajcuna carca. Chaimantami yachacujcunaca:
–Pascua punllapi can micuchunca, ¿maipitaj allichigrichun ningui?– nishpa tapurcacuna.
13 Shina nijpimi, Paipaj yachacujcunamanta ishquita cashna nishpa cacharca:
–Jerusalenman richij. Chaiman chayajpica, yacu puñuta aparishca shuj runami tupanga. Paita catishpa ringuichijlla. 14 Chai runa mai huasiman yaicujpica, chai huasiyuj runataca: “Ñucanchij Yachachijca: ‘¿Mai ucupitaj Ñuca yachacujcunandij Pascua micuitaca micusha?’ ninmi” ninguichij. 15 Chashna nijpica paica, altibajopimi ña allichishca jatun ucuta ricuchinga. Chaipica, ñucanchij micunapaj allichicunguichijlla– nishpami cacharca.
16 Cachashca yachacujcuna puebloman chayajpica, Jesús nishca shinallataj pajtajpimi, Pascua micuita chaipi allichircacuna.
17 Ña tutayamucujpimi, chunga ishqui yachacujcunandij shamurcacuna. 18 Ña meźapi micushpa tiyacushpami, Jesusca:
–Ñucahuan micucuj, cancunapurallataj shujmi Ñucata japichinga, chaica chashnatajmi– nircami.
19 Chashna nijpica llaquirinacushpami, caishuj chaishuj:
–¿Ñucachu cani?– nijpica, caishujpish –¿Ñucachu cani?– nishpa huashan tapurcacuna.
20 Chaimantami Jesusca, cashna nirca:
–Chunga ishquipuramanta shujca, Ñucahuan cai platollapitajmi tandata llutacun. Paimi Ñucata japichinga. 21 Runa Aichayujtaca, Paimanta Quillcashcapi nishca shinallatajmi pajtachingacuna. Ashtahuanpish Runa Aichayujta japichij runaca, ¡ai, imachari tucunga! Chai runaca mana huacharishca cashpachari, alli canman carca– nircami.
22 Micucushpami Jesusca tandata japishpa, Diosta pagui nishpaca, chaupishpa cushpaca:
–Japichij, caica Ñuca aichami– nirca.
23 Shinallataj ubyanatapish japishpa, Diosta pagui nishpa cujpica, chaitapish tucuicunami ubyarcacuna. 24 Chaita ubyacujpimi cashna nirca:
–Caica, achcacunata quishpichingapaj, ari ninacushca mushuj ruranamanta jichana Ñuca yahuarta ricuchijmi. 25 Dios mandacunpi ubyana punllacama uvas vinotaca, cutinca mana ubyashachu. Chaica chashnatajmi– nircami.
26 Salmocunata cantashca q'uipami, Olivos urcuman llujshircacuna.
Jesusca Pedro Paita ‘Mana rijsinichu’ ninatami huillashca
27 Chaipimi Jesusca, cashna nirca:
–Cunan tutaca, tucuicunami Ñucataca shitahuanguichij. Dios Quillcachishcapica: “Michijtaca huañuchishami, ovejacunaca caita chaitami ringacuna” nicunmi. 28 Ashtahuanpish causarishca q'uipaca, cancunapaj ñaupami Galileaman risha– nircami.
29 Chashna nijpimi, Pedroca:
–Tucuicuna p'iñarishpa saquijpipish, ñucatajca manataj saquishachu– nircami.
30 Shina nijpi, Jesusca:
–Cancarin cunan tutallatajmi, gallo ishqui cutin cantanapajca, quimsa cutin Ñucataca, “Mana rijsinichu” ningui– nircami.
31 Ashtahuan sinchiyarishpami, Pedroca:
–Canhuan huañuna cashpapish, ñucatajca manataj chashna nishachu– nirca.
Pai chashna nijpica, caishujcunapish, tucuicunami chashnallataj nircacuna.
Getsemaní huertapimi Jesús Diosta mañashca
32 Chai q'uipami, Getsemaní huertaman chayamurcacuna. Chaipimi Jesusca, Paipaj yachacujcunataca: «Diosta Ñuca mañangacama, caillapi tiyacuichij» nircami.
33 Shina nishpa Pedrota, Jacobota, Juantapish pushashpaca, achcata llaquirishpami chujchui callarirca. 34 Chaimantami paicunataca: «Ñuca almaca llaquihuan huañucunmari. Caillapi chaparashpa shuyacuichij» nircami.
35 Jesusca chaimanta ashallata rishpaca, pambacama cumurishpami, ‘Ñuca apana cai llaquitaca, ima shinamanta anchuchinguimanpishchari’ nishpa, Diosta cashna mañarca: 36 «“¡Abba! Ñuca Yayito, Cambajca tucui imapish jahuallami. Cai ubyanataca, Ñucamanta anchuchipai. Ñuca shina nijpipish, ama Ñuca munashca shinaca rurapaichu, Can munashca shina rurapailla”» nircami.
37 Chai q'uipa tigramushpaca, dormicujta japishpami, Pedrotaca cashna nirca: «Simón, ¿dormicunguillachu? ¿Manachu ashallatapish rijcharishca cai tucungui? 38 Mana alli yuyaicuna ama japichun chaparaichij, mañaraichij. Cancunapaj espirituca mañanata yuyacunmari, ashtahuanpish aichapica shaicushcamari canguichij» nircami.
39 Cutin mañanaman rishpaca, ñaupaman nishca shinallatajmi mañarca. 40 Chaimanta tigramushpaca, cutinllatajmi dormicujta japirca. Dorminaihuan ñahuicunapish huichcaricujpimi, imata mana ni tucurcacuna. 41 Caihuanca, ña quimsa cutin tigramushpaca, cashnami nirca: «Cancunatajca, dormicunguichij, samaricunguichijllami. Riquichij, ñamari Runa Aichayujtaca juchayujcunapaj maquipi churana pajtamushca. 42 ¡Jatarichij! ¡Jacuchij! ¡Ñucata japichij runaca, ñami chayamucun!» nircami.
Jesustaca Judasmi japichishca
43 Jesús rimacujpirajmi, Judasca ña chayamurca. Paica, chunga ishquipuramanta shujmi carca. Paihuanca, achca runacunami espadacunahuan, caspicunahuan shamurcacuna. Paicunaca pushaj curacuna, Mandashcata yachachijcuna, cunaj yuyajcuna cachajpimi shamurcacuna. 44 Jesusta japichijca: «Maijantami ñuca muchani, chaita ricuranguichij. Paitaca japishpa, alli charirashpa apanguichijlla» nishpami yachachishca carca.
45 Ña chayamushpaca, Jesuspajman c'uchuyashpami:
–Yachachij, Yachachij– nishpa mucharca.
46 Chaita ricushpaca, huaicashpami japircacuna. 47 Ashtahuanpish chaipi cajcunamanta shujca, espadata surcushcahuanmi, curacunata mandaj curapaj servijtaca, shuj rinrinta p'itirca. 48 Cutin Jesusca, cashnami nirca:
–¿Shuhuata shinachu espadacunahuan, caspicunahuan Ñucataca japij shamunguichij? 49 Illu Diospaj huasipica, punllantamari cancunataca yachachicurcani. Chaipica mana japircanguichijca. Ashtahuanpish Dios Quillcachishca pajtachunmi, chashnaca ruranguichij– nircami.
50 Chashna nijpica tucui yachacujcuna, shitashcahuanmi miticushpa rircacuna. 51 Shuj mosoca, linsohuan pillurishcallami, Jesusta caticushca carca. Paitapish japircacunami. 52 Ashtahuanpish paica, pillurishca linsota shitashpami, lluchulla miticugrirca.
Tandanacushca mandajcunapajmanmi Jesusta apashcacuna
53 Jesustaca, curacunata mandajpajmanmi pushamurcacuna. Chaimanca, pushaj curacunapish, cunaj yuyajcunapish, Mandashcata yachachijcunapishmi tandanacurcacuna. 54 Pedroca, huasha huashalla catishpami, curacunata mandaj curapaj huasi canllacama rirca. Chaipimi, huasita cuidajcunahuan tandalla ninapi cunushpa tiyacurca.
55 Pushaj curacunapish, tucui tandanacushca mandajcunapish, Jesusta huañuchingapajmi, imatapish juchachishun nishpa yuyarinacurca. Ashtahuanpish imata mana juchachi tucurcacunachu. 56 Achcacuna llullashpalla Jesusta juchachishpapish, shujta shujtami nircacuna. 57 Chaimantami shujcunaca, ñapish shayarishpa, cashna llullashpa juchachircacuna:
58 –Ñucanchijca: “Diosta yuyaringapaj maquillahuan rurashca cai huasitaca urmachishami. Chaipaj randica, shujtajtami quimsa punllallapi shayachisha. Chaitaca, mana maquihuan rurashachu” nijtami uyarcanchij– nircacunami.
59 Chashna huillashpapish, manataj shujlla yuyaiman chayarcacunachu. 60 Chaimantami curacunata mandaj curaca, chaupipi shayarishcahuan Jesustaca:
–Canta cai tucuita juchachicujpipish, ¿manachu imata cutichingui?– nishpami tapurca.
61 Ashtahuanpish Paica, imata mana nircachu. Curacunata mandajca cutinllatajmi:
–¿Canca, sumaj Diospaj Churi, Quishpichij Cristochu cangui?– nishpa tapurca.
62 Chashna nijpimi Jesusca:
–Ñucaca, chaitajmi cani. Runa Aichayuj Ñucataca, Tucuita Rurai Tucuj Diospaj alli ladopi tiyacujtapish, jahua pachamanta p'uyupi shamucujtapishmi ricunguichij– nircami.
63 Shina nijpica, curacunata mandajca, paipaj quiquin churanata lliquishpami cashna nirca:
–Paita juchachishpa, pi shujtaj huillajcunataca, ña mana ninchijchu. 64 Dios tucushpa chashna rimaricujtaca, cancunapaj rinrinhuantajmi uyashcanguichij. Cunanca, ¿imatataj yuyanguichij?– nircami.
Chashna nijpica tucuicunami: “¡Cai runaca huañunatajmi can!” nishpa juchachircacuna.
65 Chaimantami maijancunaca, Jesusta ñahuipi ch'ucashpa, linsohuan ñahuita huatashpa huajtarcacuna.
Chaimantaca:
–Huillaiari, ¿maijantaj huajtanchij?– nircacunami.
Huasita cuidajcunapish, ñahuipi huajtarcacunami.
Pedromi Jesustaca ‘Mana rijsinichu’ nishca
66 Pedro huasi canllapi cajpimi, curacunata mandaj curapaj servij huarmicunamanta shujca shamurca. 67 Paica, Pedro cunucujta ricushpami, paipaj ñahuita chaparashpa:
–Canpish, Nazaretmanta Jesushuanmari puricurcangui– nirca.
68 Ashtahuanpish Pedroca:
–Pipishchari, mana rijsinichu. Imatapishchari nicungui, mana yachanichu– nircami.
Chashna nishpa huasi canlla punguman llujshijpica, galloca cantarcallami. 69 Chai huarmillataj cutin ricushpaca:
–Cai runaca paicunapuratajmari– nishpami, chaipi cajcunaman huillai callarirca.
70 Pedropish cutinllatajmi, ‘Mana rijsinichu’ nirca. Chai q'uipallami, chaipi cajcunaca cutintaj Pedrotaca:
–Cashcatatajmari nicunchij, canpish paicunapuratajmari cangui. Rimaipish rijsinallamari, galileocuna shinallatajmari rimangui– nircacuna.
71 Chaimantami Pedroca:
–Ñuca llullajpica, ima llaquipish japichunlla. ¡Chai runataca mana rijsinichu, pitapishchari nicunguichij, mana rijsinichu!– nircami.
72 Pedro chashna nicujpica, galloca ñapish cati cuti cantarcallami. Chaipimi Pedroca: «Gallo cati cuti cantanapajca, quimsa cutinmi Ñucataca ‘Mana rijsinichu’ nihuangui» nishpa, Jesús nishcata yuyarirca. Chaita yuyarishpami, Pedroca huacacurca.
Mushuj Testamento Diospaj Shimi (Quichua‐Chimborazo New Testament) Copyright © 2010 by Biblica, Inc.™ Used by permission. All rights reserved worldwide.