M’Cheyne Bible Reading Plan

Osetie a wɔyɛ ma Awurade mmara

¹²¹ Mayɛ nea ɛteɛ na ɛyɛ pɛ. Nnyaa me mma m’atamfo! ¹²² Hyɛ bɔ sɛ wobɛboa wo somfo. Mma ahantanfo nhyɛ me so. ¹²³ Mahwɛ wo nkwagye, wo gye kwan ama m’ani abu. ¹²⁴ Ma wo daa dɔ no nka me na kyerɛkyerɛ me w’ahyɛde. ¹²⁵ Meyɛ wo somfo; ma me ntease na mahu wo nkyerɛkyerɛ.

¹²⁶ Awurade, bere aso sɛ woyɛ biribi efisɛ, nnipa rebu mmara so. ¹²⁷ Medɔ w’ahyɛde sen sikakɔkɔɔ, sikakɔkɔɔ a ɛyɛ fɛ pa ara mpo. ¹²⁸ Enti midi wo nkyerɛkyerɛ so; mekyi akwammɔne.

Pɛ a wɔpɛ Awurade mmara sodi

¹²⁹ Wo nkyerɛkyerɛ yɛ nwonwa. Mede me koma nyinaa tie. ¹³⁰ Wo nkyerɛkyerɛ no kyerɛ me hann na ɛma nea onnim no nyansa. ¹³¹ Mede ahopere bue manom pɛ w’ahyɛde akyi kwan.

¹³² Dan w’ani hwɛ me na hu me mmɔbɔ sɛnea woyɛ ma wɔn a wɔdɔ wo no. ¹³³ Sɛnea woahyɛ me bɔ no, mma mennhwe ase. Mma bɔne nni me so. ¹³⁴ Gye me fi wɔn a wɔhyɛ me so no nsam, sɛnea medi w’ahyɛde so. ¹³⁵ Ma ba a woba me nkyɛn no nhyira me, na kyerɛ me wo mmara. ¹³⁶ Me nusu gu te sɛ asubɔnten efisɛ, nnipa ntie wo mmara.

Atɛntrenee a ɛwɔ Awurade mmara mu

¹³⁷ Woyɛ ɔtreneeni, Awurade, na wo mmara nso yɛ pɛ. ¹³⁸ Mmara a wode ama no ye na ɛteɛ. ¹³⁹ M’abufuw hyehye me sɛ ogya efisɛ, m’atamfo mmu w’ahyɛde no. ¹⁴⁰ Akyinnye nni wo bɔhyɛ ho! M’ani gye ho! ¹⁴¹ Menka hwee, na wommu me, nanso mempo wo nkyerɛkyerɛ no.

¹⁴² Wo treneeyɛ bɛtena hɔ daa daa. Wo mmara no yɛ nokware daa. ¹⁴³ Ɔhaw ne ahopere ahyɛ me ma nanso w’ahyɛde ma me ahosɛpɛw. ¹⁴⁴ Wo nkyerɛkyerɛ yɛ nokware daa; kyɛ me ntease na mɛtena ase.

Anyansafo a wofi apuei no

7 “Mummmu ntɛn, na afoforo ammu mo ntɛn. ² Nea mode yɛ afoforo no, ɛno ara na wɔde bɛyɛ mo. ³ Adɛn na woma ɔbo ketewaa a ɛda wo nua ani so no haw wo, bere a ɔbo kɛse da wo de so? ⁴ Ɛbɛyɛ dɛn na woatumi aka akyerɛ wo nua se, ‘Ma minyi bosea a ɛda w’ani so no mma wo,’ wɔ bere a, ɔbo kɛse da w’ani so? ⁵ Onipa huuhuu: Di kan yi ɔbo a ɛda w’ani so no ansa na woatumi ahu wo nua de ayi ama no.

⁶ “Mommfa nea ɛho tew mma akraman. Saa ara na monntow mo nhene pa ngu mprako anim! Wobetiatia so na wɔadan wɔn ho atow ahyɛ mo so.

Bisa, hwehwɛ, pem

⁷ “Mummisa, na wɔbɛma mo; monhwehwɛ, na mubehu; mompem, na wobebue mo. ⁸ Na obiara a obisa no, onya. Obiara a ɔhwehwɛ no, ohu; na nea ɔpem no, wobue no. ⁹ Na hena na ne ba bisa no abodoo a, ɔbɛma no ɔbo? ¹⁰ Anaasɛ obisa no nsumnam a, ɔbɛma no ɔwɔ? Ɛremma saa da! ¹¹ Na sɛ mo a, mo koma yɛ den a moyɛ nnebɔneyɛfo mpo nim sɛnea moma mo mma nnepa a, ɛbɛyɛ dɛn na mo agya a ɔwɔ soro no mfa nnepa mma ne mma a wobisa no no?

¹² “Enti sɛnea mmara no ne adiyifo no ka no, ade biara a mopɛ sɛ nnipa nyɛ mma mo no, mo nso monyɛ mma wɔn saa ara.

Ɔkwan hihiaa no

¹³ “Ɔkwan hihiaa no nko ara so na wubetumi afa akɔ soro! Ɔkwan a ɛkɔ ɔbonsam kurom no so trɛw, na n’apon nso mu bae ma nnipadɔm a wɔpɛ sɛ wɔfa so kɔ ɔsɛe mu no. ¹⁴ Ɔpon a wowura mu de kɔ nkwa mu no yɛ ketewaa, na ɔkwan a wɔfa so no nso yɛ teaa, na nnipa kakraa bi na wohu fa so.

¹⁵ “Monhwɛ mo ho yiye wɔ atoro akyerɛkyerɛfo a wɔba mo nkyɛn ahobrɛase mu sɛ nguan, nanso wɔyɛ mpataku a wonya mo a, wɔbɛtetew mo pasaa no ho. ¹⁶ Wɔn nneyɛe na mode behu wɔn, sɛnea mutumi de dua bi aba hu dua ko a ɛyɛ no. Worentumi mfa kokora nyɛ bayerɛ; saa ara nso na worentumi mfa kwaeborɔfere nyɛ borɔfere. ¹⁷ Dua a ɛwɔ nnyinaso pa no tumi sow aba pa; na dua a enni nnyinaso pa no nso sow aba bɔne. ¹⁸ Dua a ɛwɔ ahoɔden no ntumi nsow aba a enye, ɛnna dua a enni ahoɔden no nso ntumi nsow aba a eye. ¹⁹ Dua biara a ɛnsow aba pa no, wotwa, de gu gya mu, hyew. ²⁰ Onipa nneyɛe na ɛma yehu ne suban. Saa ara nso na dua bi aba a ɛsow no na ɛma yɛde hu sɛ ɛyɛ dua pa anaa dua bɔne.

²¹ “Ɛnyɛ obiara a ɔbɔ me din ‘Awurade,’ ‘Awurade’, no na ɔbɛkɔ ɔsoro ahenni mu. ²² Atemmu da no, nnipa pii bɛka akyerɛ me se, ‘Awurade, yɛkaa wo ho asɛm kyerɛɛ afoforo. Yɛnam wo din nso so tuu ahonhommɔne, san yɛɛ anwonwade ahorow.’ ²³ Na mabua wɔn se, ‘Minhuu mo da, na minnim mo nso. Nnebɔneyɛfo, mumfi ha nkɔ!’

²⁴ “Wɔn a wotie nea meka, na wodi so no te sɛ onyansafo a osi ne dan si ɔbotan so.

²⁵ Sɛ osu tɔ, na osuframa bɔ, na nsu yiri, na emu biara ka ɔdan no a, ɛremmu da, efisɛ, wosi sii ɔbotan so.

²⁶ “Nanso wɔn a wotie nea meka na wonni so no yɛ nkwaseafo. Wɔte sɛ obi a osii ne dan sii anhwea so. ²⁷ Sɛ osu tɔ, na osuframa bɔ, na nsu yiri, na emu biara ka ɔdan no a, ebedwiriw agu fam abubu pasaa.”

²⁸ Yesu asɛnka no maa nnipadɔm a wotiee no no nyinaa ho dwiriw wɔn, ²⁹ efisɛ, ɔkyerɛkyerɛe sɛ obi a okita tumi, na ɛnyɛ nea mmara no akyerɛkyerɛfo no kyerɛ no.