Historical

Onyankopɔn ka yɛn ho

46 Onyankopɔn ne yɛn guankɔbea ne yɛn ahoɔden a wasiesie ne ho sɛ ɔbɛboa ɔhaw bere mu. ² Enti sɛ asase rewosow koraa a, yensuro, na sɛ mmepɔw tutu kogu ɛpo bon mu nso a, saa ara. ³ Sɛ ɛpo huru so anibere so na nkoko wosow nhuruso no mu a, saa ara.

⁴ Asu bi wɔ hɔ a ɛde ahokeka ba Onyankopɔn kurow mu, Ɔsorosoroni kronkron no fi. ⁵ Onyankopɔn te saa kurow no mu, na obiara rensɛe no da; anɔpahema, ɔbɛba abɛboa. ⁶ Aman ho popo na ahemman nso wosow. Onyankopɔn pae aprannaa na asase mene.

⁷ Awurade Tumfoɔ ka yɛn ho. Yakob Nyankopɔn yɛ yɛn guankɔbea. ⁸ Bɛhwɛ nea Awurade ayɛ. Hwɛ anwonwade a wayɛ wɔ asase so. ⁹ Ɔpata wiase ko nyinaa. Obubu agyan, sɛe mpeaw, hyew nkatabo. ¹⁰ Ɔka se, “Munnyae ɔko no na munhu sɛ me ne Onyankopɔn, aman so tumfoɔ ne wiase tumfoɔ.”

¹¹ Awurade Tumfoɔ ka yɛn ho. Yakob Nyankopɔn yɛ yɛn guankɔbea.

Ɔhene Tumfo

47 Nnipa nyinaa, mommɔ mo nsam ahosɛpɛw so! Monto nnwom dennen nkamfo Onyankopɔn. ² Ɛsɛ sɛ wosuro Awurade, ɔsorosoroni no. Ɔyɛ ɔhene kɛse a odi wiase nyinaa so. ³ Ɔma yedii nnipa so nkonim. Ɔma yedii aman so. ⁴ Oyii asase a yɛte so yi maa yɛn. Ɛyɛ agyapade a ne nkurɔfo a ɔdɔ wɔn de hoahoa wɔn ho.

⁵ Onyankopɔn aforo n’ahengua. Ahosɛpɛw nteɛteɛm ne torobɛnto nne ba hɔ bere a Awurade rekɔ soro no. ⁶ To ayeyi dwom ma Onyankopɔn. To ayeyi dwom ma yɛn hene! ⁷ Onyankopɔn yɛ wiase nyinaa hene. Momfa nnwom nyi n’ayɛ. ⁸ Onyankopɔn tena n’ahengua kronkron no so. Odi aman so. ⁹ Aman so difo ne Onyankopɔn nkurɔfo a wɔyɛ Abraham asefo bɔ gua. Ne tumi sen asraafo Nyinaa. Ɔyɛ Otumfoɔ.

Sion, Onyankopɔn kurow

48 Awurade yɛ ɔkɛse enti ɛsɛ sɛ wɔkamfo no yiye wɔ yɛn Nyankopɔn kurow a ɛwɔ bepɔw kronkron no so no mu. ² Sion, Onyankopɔn bepɔw no korɔn na ɛyɛ fɛ. Ɔhene kɛse no kurow no de ahosɛpɛw ba wiase mmaa nyinaa.

³ Onyankopɔn ada no adi sɛ asomdwoe wɔ ne mu wɔ kurow no aban akɛse no mu. ⁴ Ahemfo yi boaa wɔn ho ano kotuaa Sion bepɔw. ⁵ Nanso wohui no, ɛyɛɛ wɔn nwonwa. Wosuroe, enti woguanee. ⁶ Ɛhɔ na ehu ne ɔhonam mu yaw kaa wɔn te sɛ ɔbea a awo aka no, ⁷ anaasɛ ɛhyɛn a ɛrebɔ mpata biribibiri wɔ ahum mu. ⁸ Yɛate nea Onyankopɔn ayɛ na mprempren yɛahu wɔ yɛn Nyankopɔn, Awurade Tumfoɔ kurow no mu; ɔbɛbɔ kurow no ho ban daa daa.

⁹ Wo fi no mu, O Onyankopɔn, na yedwen daa dɔ a wowɔ no ho. ¹⁰ Nnipa kamfo wo mmaa nyinaa, na wo din atrɛw wɔ asase so mmaa nyinaa. Wudi hene nokwarem. ¹¹ Ma Sionfo ani nnye. Wubu atɛntrenee. Ma ahosɛpɛw mmra Yuda nkurow mu! ¹² Onyankopɔn nkurɔfo twa Sion ho hyia kan n’abantenten. ¹³ Hwɛ n’afasuw na hwɛ n’aban akɛse no yiye na woaka ho asɛm akyerɛ nkyirimma.

¹⁴ “Saa Onyankopɔn yi yɛ yɛn Nyankopɔn daa daa. Obedi yɛn anim nna a ɛreba no nyinaa mu.”

Ahonya mu ahotoso yɛ nkwaseasɛm

49 Obiara ntie saa asɛm yi! Muntie, nnipa a mowɔ mmaa nyinaa, ² akɛse ne nketewa, adefo ne ahiafo nyinaa. ³ M’adwenem bɛdɔ. Mɛka anyansasɛm. ⁴ Mebu bɛ na makyerɛ ase bere a merebɔ me sanku. ⁵ Minsuro bɔne bi bere a atamfo ⁶ ne nnebɔneyɛfo a wɔde wɔn ho to ahonya so na wɔhoahoa wɔn ho wɔ wɔn ahonya mu no atwa me ho ahyia. ⁷ Onipa ntumi nnye ne ho mfi ɔhaw mu; ɔrentumi ntua ne nkwa ho ka mma Onyankopɔn. ⁸ Efisɛ, onipa nkwa so akatua bo yɛ den. Nea obetumi atua no ⁹ rentumi ntwe no mfi damoa mu mma ɔntena nkwa mu daa daa.

¹⁰ Obiara nim pefee sɛ anyansafo mpo wu. Saa ara na nkwaseafo ne agyimifo nso wu. Wɔn nyinaa gyaw wɔn ahonya no hɔ ma wɔn asefo. ¹¹ Wɔn adamoa yɛ wɔn fi afebɔɔ. Ɛwom sɛ na wɔwɔ wɔn ara wɔn nsase nanso ɛhɔ na wɔtena daa nyinaa. ¹² Onipa kɛseyɛ rentumi nnye no nkwa mfi owu mu. Ɛyɛ dɛn ara a, obewu te sɛ nea mmoa nso wu. ¹³ Hwɛ nea ɛba wɔn a wɔde wɔn ho to wɔn ho so no so, nea ɛba wɔn a wɔn ani sɔ wɔn ahonya no so.

¹⁴ Wɔadome wɔn sɛ wonwu sɛ nguan, na Owu na ɔbɛyɛ wɔn hwɛfo. Atreneefo bedi wɔn so nkonim bere a wɔn honam aporɔw wɔ asaman a ne kwan ne wɔn afi ware no.

¹⁵ Nanso Onyankopɔn begye me. Obegye me afi owu tumi ase. ¹⁶ Sɛ onipa nya ne ho a, mma ɛnhaw wo; na sɛ onya ma ɛboro so nso a, saa ara. ¹⁷ Sɛ owu a, ɔrentumi mfa nkɔ. N’ahonya no ne no renkɔ damoa mu. ¹⁸ Mpo sɛ obi ani sɔ asetena yi na esiane sɛ odi yiye nti, nnipa kamfo no a, ¹⁹ ɔbɛkɔ akɔka n’asefo ho wɔ owu mu a esum wɔ hɔ daa nyinaa no. ²⁰ Onipa kɛseyɛ rentumi nnye no mfi owu mu; obewu te sɛ nea mmoa wu ara pɛ!.

Ɔsom pa

50 Otumfoɔ Awurade Nyankopɔn kasa; ɔkasa kyerɛ asase nyinaa fi apuei kosi atɔe.

² Onyankopɔn hyerɛn fi Sion, kurow a ne fɛ so nni. ³ Yɛn Nyankopɔn reba nanso ɔremma komm; ogya frama di n’anim. Ahum dennen atwa ne ho ahyia. ⁴ Ɔfrɛ soro ne asase adansefo sɛ wɔmmɛhwɛ sɛ ɔrebu ne nkurɔfo atɛn. ⁵ Ɔka se, “Boaboa me gyidifo ano brɛ me; wɔn a wɔnam afɔrebɔ so ne me yɛɛ apam no.” ⁶ Ɔsoro pae mu ka se, Onyankopɔn yɛ ɔtreneeni, na ɔno ankasa yɛ ɔtemmufo.

⁷ Muntie, me nkurɔfo; mɛkasa. Medi adanse atia wo, Israel. Mene Onyankopɔn, mo Nyankopɔn no. ⁸ Ɛnyɛ mo afɔrebɔ no anaa ɔhyew afɔre a mobɔ ma me daa no nti na mereka mo anim. ⁹ Merenhwehwɛ anantwinini mfi mo mfuw mu. Saa ara na merenhwehwɛ mmirekyi mfi mo nguankuw mu. ¹⁰ Kwae mu mmoa nyinaa yɛ me de. Anantwi a wɔwɔ mmepɔw mpempem so nso saa ara. ¹¹ Wuram nnomaa nyinaa ne nneɛma a nkwa wɔ mu a wɔwɔ mfum nso yɛ me de. ¹² “Sɛ ɔkɔm dee me a, anka merenka nkyerɛ mo; efisɛ, wiase ne nea ɛwɔ mu nyinaa yɛ me de. ¹³ Mewe anantwinini, nom mmirekyi mogya anaa? ¹⁴ Momma aseda a moda Onyankopɔn no nyɛ afɔre a mobɔ ma no, na momfa biribiara a mohyɛ Otumfoɔ no ho bɔ no mma no. ¹⁵ Amane mu, momfrɛ me na megye mo na mobɛkamfo me.”

¹⁶ Nanso Onyankopɔn bisa nnebɔneyɛfo no se, “Adɛn nti na moka me mmara? Adɛn nti na moka m’apam ho asɛm? ¹⁷ Mompɛ sɛ mɛteɛteɛ mo so. Mopoo me mmara. ¹⁸ Owifo biara a mubehu no no, mofa no yɔnko na mo ne awaresɛefo bɔ. ¹⁹ Daa musiesie mo ho sɛ mobɛka bɔne; monkyɛ atorotwa ho. ²⁰ Moasiesie mo ho sɛ moka asɛm to mo nuanom so na mopɛ mfomso tia wɔn. ²¹ Moayɛ eyinom nyinaa; nanso manka hwee, enti mususuw sɛ mete sɛ mo. Nanso afei meka mo anim ma asɛm no mu da hɔ ma mo. ²² Mo a moantie me, muntie asɛm yi, anyɛ saa a, mɛsɛe mo na obi nni hɔ a obegye mo nkwa.

²³ “Aseda a mobɛda no yɛ afɔre a ɛhyɛ me anuonyam na akyinnye biara nni ho sɛ megye wɔn a wotie me no nkwa.”