Read the Gospels in 40 Days

Li Jesús quixqˈueheb xcˈanjel lix cablaju chi tzolom

10  Saˈ jun li cutan li Jesús quixbokeb lix tzolom cablaju riqˈuin ut quixqˈueheb xcuanquil chirisinquil li ma̱us aj musikˈej ut quixqˈueheb xcuanquil chixqˈuirtesinquileb li yaj, aˈ yalak cˈaˈru chi xyajelil ut raylal. ² Aˈan aˈin lix cˈabaˈeb lix tzolom cablaju, li quixxakab chokˈ x‑apóstol: li xbe̱n, aˈan laj Simón, Pedro nayeman re; ut laj Andrés li ri̱tzˈin; laj Jacobo ut laj Juan li ri̱tzˈin. Laj Zebedeo, aˈan lix yucuaˈeb; ³ laj Felipe ut laj Bartolomé; laj Tomás ut laj Mateo laj titzˈol toj; laj Jacobo li ralal laj Alfeo ut laj Lebeo aj Tadeo xcab xcˈabaˈ, ⁴ laj Simón aj Canaán, ut laj Judas Iscariote, aˈ li quikˈaxtesin re li Jesús saˈ rukˈeb li xicˈ nequeˈiloc re. ⁵ Nak quixtaklaheb li cablaju aˈin chi cˈanjelac, li Jesús quixchakˈrabiheb ut quixye reheb: ―Mexxic saˈ lix tenamiteb li ma̱cuaˈeb aj judío chi moco tex‑oc saˈ xtenamiteb aj Samaria. ⁶ Texxic ban riqˈuineb laj judío. Aˈaneb li ralal xcˈajol laj Israel. Chanchaneb li carner li sachenakeb. ⁷ Ut nak yo̱kex chi xic, yo̱kex chixchˈolobanquil li xya̱lal ut chixyebal, “cuulac re xkˈehil nak ta̱qˈuehekˈ saˈ xcuanquil xban li Dios li ta̱cua̱nk xcuanquil saˈ xbe̱neb li ralal xcˈajol,” chaˈkex. ⁸ Cheqˈuirtesiheb li yaj, checuaclesiheb cuiˈchic chi yoˈyo li camenak. Cheqˈuirtesiheb li saklep rix ut cherisiheb li ma̱us aj musikˈej. Chi ma̱tan xecˈul le̱ cuanquil ut chi ma̱tan ajcuiˈ te̱ba̱nu li usilal. ⁹ Ma̱cˈaˈ cˈaˈru te̱cˈam che̱rix. Incˈaˈ te̱cˈam li oro chi moco li plata, chi moco li cocˈ tumin kˈan ru. ¹⁰ Chi moco te̱cˈam xnaˈaj li cˈaˈak re ru ta̱cˈanjelak e̱re saˈ be, chi moco te̱cˈam xjalbal le̱ rakˈ, chi moco xjalbal e̱xa̱b, chi moco e̱xukˈ. Me̱cˈam li cˈaˈak re ru aˈin xban nak laj cˈanjel, aˈan tento nak ta̱qˈuehekˈ re lix tzacae̱mk. ¹¹ Ut yalak bar tenamitil ut cˈaleba̱l toxex‑ocak cuiˈ, patzˈomak ani ta̱cˈuluk e̱re chi sa saˈ xchˈo̱l, ut aran texhila̱nk riqˈuin tojaˈ ya̱l jokˈe texxic. ¹² Ut nak tex‑oc saˈ li cab, qˈuehomak xsahil xchˈo̱leb ut te̱tzˈa̱ma li tuktu̱quil usilal saˈ xbe̱neb li cuanqueb saˈ li cab. ¹³ Ut cui texcˈulekˈ saˈ usilal, ta̱cana̱k riqˈuineb li tuktu̱quil usilal. Ut cui incˈaˈ texcˈulekˈ saˈ usilal, incˈaˈ ajcuiˈ ta̱cana̱k riqˈuineb li tuktu̱quil usilal. Ta̱sukˈi̱k cuiˈchic e̱riqˈuin. ¹⁴ Ut yalak ani incˈaˈ ta̱cˈuluk e̱re chi moco ta̱rabi le̱ ra̱tin, nak tex‑e̱lk saˈ li cab aˈan, malaj ut saˈ li tenamit, te̱chikˈchikˈi li poks cuan che̱rok chokˈ retalil nak incˈaˈ chic texcˈoxlak chirix li naˈajej aˈan. ¹⁵ Relic chi ya̱l tinye e̱re nak toj cubenak caˈchˈin lix tojbal xma̱queb li tenamit Sodoma ut li tenamit Gomorra chiru lix tojbal xma̱queb li tenamit aˈan saˈ xkˈehil li rakba a̱tin.

Resil li ra xi̱cˈ li ta̱cha̱lk saˈ xbe̱neb

¹⁶ Chenauhak nak la̱in tintakla̱nk e̱re saˈ xya̱nkeb li xicˈ nequeˈiloc e̱re. Chanchanakex li carner saˈ xya̱nkeb laj xoj. Se̱bak e̱chˈo̱l joˈcakex li cˈantiˈ ut ti̱cak e̱chˈo̱l joˈcakex li paloma. ¹⁷ Cauhak le̱ chˈo̱l xban nak cuanqueb li teˈkˈaxtesi̱nk e̱re saˈ rukˈeb laj rakol a̱tin. Ut chi ma̱cˈaˈ e̱ma̱c texsaqˈuekˈ xbaneb saˈ li cab li nequeˈxchˈutub cuiˈ ribeb laj judío. ¹⁸ Ut texcˈamekˈ chiruheb li acuabej ut chiruheb li rey saˈ incˈabaˈ la̱in. Ut te̱chˈolob li xya̱lal chiruheb aˈan, joˈ ajcuiˈ chiruheb li ma̱cuaˈeb aj judío. ¹⁹ Ut nak toxexxakaba̱k chiruheb, mexcˈoxlac chirix li cˈaˈru te̱ye, chi moco texcˈoxlak chirix chanru tex‑a̱tinak xban nak saˈ li ho̱nal aˈan ta̱yehekˈ e̱re cˈaˈru te̱ye. ²⁰ Ma̱cuaˈ la̱ex li tex‑a̱tinak. Aˈ ban li Santil Musikˈej ta̱a̱tinak. Yal tixtoˈoni lix tzˈu̱mal e̱re. ²¹ Saˈ eb li cutan aˈan, cuan li asbej tixkˈaxtesi li i̱tzˈinbej re ta̱camsi̱k ut cuan li i̱tzˈinbej tixkˈaxtesi li asbej. Ut cuan li yucuaˈbej tixkˈaxtesi li alalbej. Ut cuan li alalbej xicˈ teˈrileb lix naˈ xyucuaˈ ut teˈxqˈueheb chi camsi̱c. ²² Ut chixjunileb xicˈ teˈilok e̱re saˈ incˈabaˈ. Abanan li ani teˈcuyuk xcˈulbal li raylal toj saˈ rosoˈjic lix yuˈam, eb aˈan teˈcolekˈ. ²³ Nak texrahobtesi̱k saˈ jun li tenamit, texxic saˈ jalan chic. Relic chi ya̱l ninye e̱re nak toj ma̱jiˈ ajcuiˈ nequechoy xbeninquil chixjunileb li tenamit cuanqueb Israel teˈxnau nak xoline̱lk la̱in li Cˈajolbej. ²⁴ Junak li yo̱ chi tzoloc incˈaˈ naru tixkˈax xcuanquil li yo̱ chi tzoloc re, chi moco li mo̱s naxkˈax xcuanquil lix patrón. ²⁵ Chicˈojla̱k xchˈo̱l li yo̱ chi tzoloc nak ta̱cuulak joˈ laj tzolol re, ut li mo̱s joˈcak lix patrón. Cui aj tza nayeheˈ re laj e̱chal cab, ¿ma tojaˈ ta chic incˈaˈ teˈyehekˈ aj tza reheb li ralal xcˈajol? ²⁶ Joˈcan utan mexxucuac chiruheb li xicˈ nequeˈiloc e̱re. Ma̱ jun naˈleb mukmu anakcuan chi incˈaˈ ta ta̱tauma̱nk ru mokon, ut ma̱cˈaˈ mukmu anakcuan chi incˈaˈ ta̱cˈutbesi̱k. ²⁷ Li cˈaˈru xexintzol cuiˈ e̱junes, aˈan te̱ye chiruheb chixjunileb, ut li cˈaˈru xinye e̱re e̱junes, aˈan te̱ye chi cau xya̱b e̱cux chiruheb chixjunileb li tenamit. ²⁸ Mexxucuac chiruheb laj camsinel xban nak li a̱mej incˈaˈ naru teˈxcamsi. Aˈ li te̱xucua ru, aˈan li Ka̱cuaˈ li cuan xcuanquil chixcamsinquil li tibelej ut chixtaklanquil li a̱mej saˈ xbalba.

Li Dios na‑iloc e̱re

²⁹ ¿Ma incˈaˈ ta biˈ nacˈayi̱c cuib chi tzentzeyul chi jun centavo? Kˈaxal cubenak xtzˈak, abanan ma̱ jun li chˈina tzentzeyul nacam chi incˈaˈ ta tixnau li Dios le̱ Yucuaˈ. ³⁰ Joˈcan ajcuiˈ li rismal le̱ jolom ajlanbileb chixjunil xban li Dios. ³¹ Joˈcan nak mexxucuac chiruheb li xicˈ nequeˈiloc e̱re xban nak la̱ex kˈaxal terto e̱tzˈak chiruheb nabal chi tzentzeyul. ³² Li ani naxye chiruheb li tenamit nak niquinixpa̱b, la̱in tinye chiru lin Yucuaˈ cuan saˈ choxa nak aˈan li cualal. ³³ Ut li ani ta̱tzˈekta̱na̱nk cue chiruheb li tenamit, la̱in tintzˈekta̱na ajcuiˈ aˈan chiru lin Yucuaˈ cuan saˈ choxa. ³⁴ Me̱cˈoxla nak xinchal ta chixqˈuebal li tuktu̱quil usilal saˈ ruchichˈochˈ. Xinchal ban chixchˈolobanquil li xya̱lal; ut xban li xya̱lal li nachˈoloba̱c, nacuan li chˈaˈajquilal. ³⁵ Xinchal ut chixchˈolobanquil li xya̱lal ut li ani ta̱pa̱ba̱nk cue, teˈxcˈul li raylal. Li alalbej ta̱cua̱nk saˈ ra xi̱cˈ riqˈuin lix yucuaˈ, ut li coˈbej ta̱cua̱nk saˈ ra xi̱cˈ riqˈuin lix naˈ, ut li alibej ta̱cua̱nk saˈ ra xi̱cˈ riqˈuin li naˈbej saˈ incˈabaˈ la̱in. ³⁶ Li cuanqueb saˈ jun cabal, xicˈ teˈril rib saˈ incˈabaˈ la̱in. ³⁷ Ut ani kˈaxal naxra xnaˈ xyucuaˈ chicuu la̱in, moco xcˈulub ta nak tincˈul chokˈ cualal. Ut ani kˈaxal naxra li ralal xcˈajol chicuu la̱in, moco xcˈulub ta nak tincˈul chokˈ cualal. ³⁸ Li ani tixcuy inta̱kenquil usta tixcˈul li camsi̱c saˈ incˈabaˈ, li jun aˈan xcˈulub nak tincˈul chokˈ cualal. Abanan li ani incˈaˈ tixcuy inta̱kenquil, li jun aˈan moco xcˈulub ta nak tincˈul chokˈ cualal. ³⁹ Li ani naxra lix yuˈam arin saˈ ruchichˈochˈ, aˈan tixsach li junelic yuˈam. Ut li ani tixsach lix yuˈam arin saˈ ruchichˈochˈ saˈ incˈabaˈ la̱in, aˈan ta̱re̱chani li junelic yuˈam.

Lix kˈajca̱munquil li nacˈuluc reheb lix tzolom li Jesús

⁴⁰ Li ani ta̱cˈuluk e̱re la̱ex, tinixcˈul ajcuiˈ la̱in. Ut li ani ta̱cˈuluk cue, tixcˈul ajcuiˈ li xtaklan chak cue. ⁴¹ Li ani ta̱cˈuluk re junak profeta chi anchal xchˈo̱l xban nak aˈan naxye ra̱tin li Dios, li joˈ qˈuial lix kˈajca̱munquil li tixcˈul li profeta, aˈan ajcuiˈ li tixcˈul li ta̱cˈuluk re. Ut li ani ta̱cˈuluk re li ti̱c xchˈo̱l xban nak aˈan ti̱c xchˈo̱l, li joˈ qˈuial lix kˈajca̱munquil li tixcˈul li ti̱c xchˈo̱l, aˈan ajcuiˈ li tixcˈul li ta̱cˈuluk re. ⁴² Li ani tixqˈue jun secˈak rucˈa junak reheb lin tzolom usta cubenak xcuanquil, cui tixqˈue li rucˈa xban nak aˈan intzolom, relic chi ya̱l ninye e̱re nak li jun aˈan tixcˈul lix kˈajca̱munquil.

Laj Juan laj Cubsihom Haˈ naxtakla xpatzˈbal ani li Jesús

11  Nak quirakeˈ li Jesús chixtaklanquileb chi xic chi cˈanjelac lix tzolom cablaju, qui‑el aran ut co̱ chixchˈolobanquil li xya̱lal saˈ eb li tenamit. ² Ac cuan chi pre̱xil laj Juan laj Cubsihom Haˈ nak quirabi resil li cˈaˈru yo̱ chixba̱nunquil li Cristo. Laj Juan quixtaklaheb lix tzolom chi a̱tinac riqˈuin ut chixpatzˈbal re: ³ ¿Ma la̱at li Cristo li yechiˈinbil, li yo̱co chiroybeninquil? ¿Malaj toj takoybeni chic junak? chanqueb. ⁴ Quichakˈoc li Jesús ut quixye reheb: ―Ayukex ut te̱serakˈi re laj Juan li cˈaˈru yo̱quin chixba̱nunquil che̱ru ut te̱ye re li cˈaˈru yo̱quex chirabinquil chicuix la̱in. ⁵ Yehomak re nak eb li mutzˈ nequeˈiloc chic; eb li ye̱k rok nequeˈbe̱c chic; eb li saklep rix xeˈqˈuirtesi̱c; eb li tzˈap xic nequeˈabin chic; eb li camenak nequeˈcuaclesi̱c cuiˈchic chi yoˈyo; ut eb li nebaˈ yo̱queb chirabinquil resil li usilal, chaˈkex re. ⁶ Us xak reheb li ani incˈaˈ ta̱chˈina̱nk xchˈo̱l inban, chan li Jesús. ⁷ Ut nak queˈel eb aˈan, qui‑oc chi a̱tinac li Jesús riqˈuineb li tenamit chirix laj Juan ut quixye chi joˈcaˈin: ―¿Cˈaˈru coxe̱ril chak saˈ li chaki chˈochˈ? ¿Ma junak cui̱nk nacuiban xchˈo̱l chanchan li caxlan aj yo̱ recˈasinquil xban ikˈ coxe̱ril chak? ⁸ ¿Cˈaˈ put ru coxe̱ril chak? ¿Ma junak cui̱nk cha̱bil xtikibanquil coxe̱ril chak? Aˈ li cha̱bileb rakˈ saˈ rochocheb li rey cuanqueb. ⁹ ¿Cˈaˈru coxe̱ril chak? ¿Ma junak profeta coxe̱ril chak? Ya̱l nak aˈan jun profeta. Abanan la̱in tinye e̱re nak li jun aˈin naxkˈax ru xcuanquil junak profeta. ¹⁰ Chirix laj Juan tzˈi̱banbil saˈ li Santil Hu nak naxye chi joˈcaˈin:

¹¹ Relic chi ya̱l tinye e̱re nak ma̱ jun reheb li nequeˈyoˈla arin saˈ ruchichˈochˈ naxkˈax xcuanquil laj Juan laj Cubsihom Haˈ. Aban li kˈaxal caˈchˈin saˈ lix nimajcual cuanquil li Dios, kˈaxal us chokˈ re aˈan chiru laj Juan (xban nak laj Juan incˈaˈ quiril lix nimajcual cuanquilal li Dios arin saˈ ruchichˈochˈ). ¹² Chalen chak nak quixtiquib xchˈolobanquil xya̱lal laj Juan laj Cubsihom Haˈ ut toj anakcuan cuanqueb li nequeˈxyal xxakabanquil lix nimajcual cuanquilal li Dios, yal xjuneseb, ut queˈraj xba̱nunquil saˈ junpa̱t usta riqˈuin raylal ta̱uxma̱nk. ¹³ Chixjunileb li profeta joˈ cuiˈ lix chakˈrab laj Moisés, toj riqˈuin laj Juan xolrakekˈ xyebal nak ta̱xakaba̱k lix nimajcual cuanquilal li Dios. ¹⁴ Ut cui te̱raj xtaubal lix ya̱lal chirix laj Juan, aˈan laj Elías li tol‑e̱lk. ¹⁵ Li ani na‑abin re li yo̱quin xyebal chixqˈuehak retal chi us li cua̱tin xban nak cuan xya̱lal. ¹⁶ ¿Ani ta cuiˈ aj iqˈuin ta̱ru̱k tebinjuntakˈe̱ta li cuanqueb saˈ ruchichˈochˈ anakcuan? Ma̱cˈaˈ nacuulac chiruheb. Chanchaneb li cocˈal li nequeˈcˈojla chi batzˈu̱nc saˈ eb li cˈayil ut nequeˈxjap re chixyebal reheb lix comon: ¹⁷ “Xkaya̱basi li kaxo̱lb ut incˈaˈ xexxajoc; xobichan chi ra saˈ kachˈo̱l, ut incˈaˈ xyotˈeˈ e̱chˈo̱l chi moco xexya̱bac xban”, chanqueb. ¹⁸ Nak quicˈulun laj Juan laj Cubsihom Haˈ, cuan li incˈaˈ quixtzaca, ut cuan li incˈaˈ quirucˈ, ut eb li tenamit incˈaˈ queˈxcˈul ut queˈxye, “Ma̱us aj musikˈej cuan riqˈuin”, chanqueb. ¹⁹ Ut nak xincˈulun la̱in li Cˈajolbej, nincuaˈac ut nin‑ucˈac, ut incˈaˈ ajcuiˈ quineˈxcˈul saˈ xya̱lal. Eb li tenamit nequeˈxye chicuix, “Li jun cuan arin, junes cuaˈac ut junes ucˈac vino naxba̱nu. Aˈan rami̱gueb laj ma̱c ut eb laj titzˈol toj”, chanqueb. Aˈut li naˈleb li qˈuebil xban li Dios, xakxo xcuanquil riqˈuin li xba̱nu laj Juan ut li cˈaˈru xinba̱nu la̱in.

Ra teˈxcˈul li tenamit cui incˈaˈ teˈxxo̱to xma̱c

²⁰ Tojoˈnak li Jesús qui‑oc chixkˈusbaleb li tenamit saˈ eb li naˈajej bar quixba̱nu cuiˈ nabal li milagro xban nak incˈaˈ queˈyotˈeˈ xchˈo̱leb ut incˈaˈ queˈxjal xcˈaˈuxeb, ut quixye reheb: ²¹ ―Raylal cha̱lel saˈ e̱be̱n, ex aj Corazín. Raylal cha̱lel saˈ e̱be̱n ex aj Betsaida. Cui ta qui‑uxman aran Tiro li milagro aˈin li xinba̱nu che̱ru ut cui ta qui‑uxman aran Sidón, ac najter raj queˈxqˈue li cha saˈ xjolomeb ut ac queˈxqˈue raj li kˈes ru tˈicr chirixeb chokˈ retalil nak raheb saˈ xchˈo̱l ut queˈyotˈeˈ raj xchˈo̱leb ut queˈxjal raj xcˈaˈuxeb. ²² Joˈcan ut nak tinye e̱re nak saˈ xkˈehil li rakba a̱tin, kˈaxal cuiˈchic li raylal li te̱cˈul la̱ex chiru li raylal li teˈxcˈul eb laj Tiro ut eb laj Sidón. ²³ Ut la̱ex aj Capernaum, cˈajoˈ nak nequenimobresi e̱rib. ¿Ma nequecˈoxla nak ta̱taksi̱k le̱ cuanquil toj saˈ choxa? Ta̱cubsi̱k ban le̱ cuanquil toj saˈ xnaˈajeb li camenak. Cui ta riqˈuineb laj Sodoma quilaj‑uxman eb li milagro li x‑uxman e̱riqˈuin la̱ex, toj cuanqueb raj saˈ li cutan anakcuan. ²⁴ Joˈcan ut nak tinye e̱re nak saˈ xkˈehil li rakba a̱tin, kˈaxal cuiˈchic nabal lix tojbal e̱ma̱c li te̱cˈul la̱ex chiru li teˈxcˈul eb laj Sodoma.―

Cha̱lkex cuiqˈuin ut texinqˈue chi hila̱nc, chan li Jesús

²⁵ Saˈ eb li cutan aˈan, li Jesús quitijoc ut quixye: ―At inYucuaˈ, la̱at laj e̱chal re li choxa joˈ ajcuiˈ li ruchichˈochˈ. Ninbantioxi cha̱cuu xban nak xamuk li xya̱lal chirix lix nimal la̱ cuanquilal chiruheb li cuanqueb xnaˈleb nak nequeˈxye rib, ut xamuk ajcuiˈ chiruheb li tzolbileb. Ut xacˈut li xya̱lal chiruheb li cubenakeb xcuanquil, li chanchaneb cocˈal. ²⁶ Xaba̱nu chi joˈcan xban nak joˈcan xcuulac cha̱cuu, chan li Jesús nak quitijoc. ²⁷ Ut quixye reheb li tenamit: ―Chixjunil li cˈaˈak re ru xkˈaxtesi saˈ cuukˈ lin Yucuaˈ. Ma̱ ani nanaˈoc cuu la̱in li Cˈajolbej, caˈaj cuiˈ li Acuabej Dios. Ma̱ ani nanaˈoc ru li Acuabej Dios, caˈaj cuiˈ la̱in li Cˈajolbej. Ut ta̱naˈekˈ ajcuiˈ ru xbaneb li ani tincˈut cuiˈ li xya̱lal, la̱in li Cˈajolbej. ²⁸ Joˈcan ut cha̱lkex cuiqˈuin che̱junilex li lublu̱quex ut li tacuajenakex ut la̱in texinqˈue chi hila̱nc. ²⁹ Cˈulumak li yugo li tinqˈue saˈ e̱be̱n ut tzolomak e̱rib cuiqˈuin xban nak tu̱lanin ut kˈun inchˈo̱l ut te̱tau xcˈojobanquil e̱chˈo̱l, ³⁰ xban nak lin yugo kˈun ut se̱b li i̱k li tinqˈue saˈ e̱be̱n.

Lix tzolom li Jesús queˈxchˈot ru li acui̱mk saˈ li hiloba̱l cutan

12  Ut chirix chic aˈan saˈ jun hiloba̱l cutan, li Jesús yo̱ chi be̱c bar cuiˈ aubil li acui̱mk trigo. Ut eb lix tzolom teˈtzˈoca̱k ut queˈoc chixchˈotbal ru li acui̱mk ut yo̱queb chixcuaˈbal. ² Ut nak queˈril eb laj fariseo, queˈxye re li Jesús: ―Ileb la̱ tzolom. Yo̱queb chixsicˈbal ru li acui̱mk. Yo̱queb chixba̱nunquil li cˈanjel moco uxc ta naraj saˈ li hiloba̱l cutan, chanqueb. ³ Li Jesús quichakˈoc ut quixye reheb: ―¿Ma incˈaˈ ta biˈ xeril saˈ li Santil Hu cˈaˈru quixba̱nu laj David nak aˈan ut eb li rochben teˈtzˈoca̱k? ⁴ Qui‑oc saˈ li cab bar nequeˈxlokˈoni cuiˈ li Dios ut cuan aran li mayejanbil caxlan cua. Ma̱cuaˈ raj re laj David xcuaˈbal li caxlan cua aˈan, chi moco reheb li rochben. Juneseb laj tij naru nequeˈxcuaˈ li mayejanbil caxlan cua. Abanan laj David quixcuaˈ. ⁵ Ut, ¿ma incˈaˈ e̱rilom saˈ lix chakˈrab laj Moisés nak eb laj tij ma̱cˈaˈ xma̱queb nak nequeˈxkˈet li hiloba̱l cutan nak nequeˈcˈanjelac saˈ rochoch li Dios? ⁶ La̱in tinye e̱re nak cuanquin arin la̱in, ut kˈaxal nim incuanquil chiru li rochoch li Dios. ⁷ La̱ex incˈaˈ nequenau xya̱lal li a̱tin aˈin li tzˈi̱banbil saˈ li Santil Hu:

Cui ta xetau ru li naˈleb aˈin, incˈaˈ raj xetzˈekta̱naheb li ma̱cˈaˈeb xma̱c.

⁸ La̱in li Cˈajolbej. La̱in laj e̱chal re li hiloba̱l cutan. Cuan incuanquil chixyebal cˈaˈru ta̱uxma̱nk saˈ li hiloba̱l cutan, chan li Jesús.

Li Jesús quixqˈuirtesi li cui̱nk sic li rukˈ

⁹ Ut nak qui‑el chak aran, quichal saˈ li cab li nequeˈxchˈutub cuiˈ ribeb laj judío. ¹⁰ Ut aran cuan jun li cui̱nk sic jun li rukˈ. Ut eb laj fariseo queˈxpatzˈ re li Jesús yal re xjitbal: ―¿Ma us qˈuirtesi̱nc saˈ li hiloba̱l cutan? ¹¹ Ut li Jesús quichakˈoc ut quixye reheb: ―Cui junak saˈ e̱ya̱nk cuan junak lix carner ta̱tˈanekˈ saˈ junak jul saˈ li hiloba̱l cutan, ¿ma incˈaˈ raj toxchap ut toxrisi chak saˈ li jul? ¹² ¿Ma incˈaˈ ta biˈ numtajenak terto xtzˈak junak cui̱nk chiru junak carner? Cui us xcolbal li carner saˈ li hiloba̱l cutan, ¿ma incˈaˈ ta biˈ kˈaxal cuiˈchic us xtenkˈanquil li cui̱nk saˈ li hiloba̱l cutan?― ¹³ Tojoˈnak quixye re li cui̱nk li sic li rukˈ: ―Yeˈ la̱ cuukˈ, chan re. Ut li cui̱nk quixyeˈ li rukˈ ut saˈ junpa̱t quicana chi ma̱cˈaˈ re̱cˈ joˈ li jun chic. ¹⁴ Ut eb laj fariseo queˈel aran ut queˈoc chixcˈu̱banquil chanru nak teˈxcamsi li Jesús.

Najter quiyeman resil xcˈanjel li Jesucristo

¹⁵ Li Jesús quixnau nak yo̱queb xcˈu̱banquil chanru nak teˈxcamsi ut qui‑el saˈ li naˈajej aˈan. Ut nabaleb li tenamit queˈta̱ken re ut naxqˈuirtesiheb chixjunileb li yaj. ¹⁶ Ut li Jesús quixye reheb nak ma̱ ani aj e teˈxye resil nak aˈan li xqˈuirtesin reheb. ¹⁷ Aˈin quicˈulman joˈ yebil chak xban li profeta Isaías nak quixye chi joˈcaˈin:

Ma̱cˈaˈ chic xcuybal xma̱c li namajecuan re li Santil Musikˈej

²² Ut mokon chic quicˈameˈ chak riqˈuin li Jesús jun li cui̱nk cuan ma̱us aj musikˈej riqˈuin. Mutzˈ ut mem li cui̱nk aˈan. Ut li Jesús quixqˈuirtesi, ut li cui̱nk li mutzˈ ut mem nak quicuan, quia̱tinac ut qui‑iloc chic. ²³ Ut chixjunileb li tenamit queˈsach xchˈo̱l ut yo̱queb chixyebal: ―¿Malaj aˈin ta ut ralal li rey David, li yo̱co chiroybeninquil? ²⁴ Ut eb laj fariseo nak queˈrabi aˈan, queˈxye: ―Li cui̱nk aˈin na‑isin ma̱us aj musikˈej riqˈuin xcuanquil laj Beelsebú, lix yucuaˈileb li ma̱us aj musikˈej, chanqueb. ²⁵ Li Jesús quixnau li cˈaˈru yo̱queb chixcˈoxlanquil ut quixye reheb: ―Cui cuan jun te̱pak chi tenamit xicˈ teˈril rib chi ribileb rib, li jun te̱p chi tenamit aˈan tixsach xcuanquil xjunes rib. Ut cui cuan ta jun cabalak xicˈ teˈril rib chi ribileb rib, li jun cabal aˈan teˈxsach xcuanquil lix jun cablal. ²⁶ Joˈcan ajcuiˈ laj tza cui teˈxpleti rib chi ribileb rib, aˈan tixsach xcuanquil xjunes rib. ²⁷ Cui ut saˈ xcˈabaˈ laj tza nacuisiheb li ma̱us aj musikˈej, ¿ani saˈ aj cˈabaˈ nequeˈisin ma̱us aj musikˈej li nequeˈta̱ken e̱re? Joˈcan nak aˈaneb ajcuiˈ teˈyehok re nak incˈaˈ ya̱l li yo̱quex chixyebal. ²⁸ Cui ut riqˈuin xcuanquil li Dios nacuisiheb li ma̱us aj musikˈej, riqˈuin aˈan nacˈutun nak relic chi ya̱l ac xcˈulun saˈ e̱ya̱nk lix nimajcual cuanquilal li Dios. ²⁹ Ut chanru nak ta̱oc junak saˈ rochoch jun cui̱nk cau rib chixmakˈbal li cˈaˈru cuan re cui incˈaˈ ta xbe̱n cua tixbacˈ li cui̱nk cau rib, tojoˈnak ta̱oc chixcˈambal li cˈaˈru cuan re. ³⁰ Li ani incˈaˈ na‑oquen chicuix, aˈan xicˈ niquinril. Ut ani incˈaˈ naxococ cuochben, aˈan paji̱nc naxba̱nu. ³¹ Relic chi ya̱l ninye e̱re nak ta̱cuyma̱nk ta̱sachma̱nk lix ma̱queb li cristian ut ta̱cuyma̱nk ajcuiˈ xma̱queb li nequeˈmajecuan. Abanan li ani ta̱majecua̱nk re li Santil Musikˈej, incˈaˈ ta̱cuyekˈ ta̱sachekˈ lix ma̱c. ³² Li ani ta̱hobok cue la̱in, li Cˈajolbej, ta̱cuyekˈ xma̱c; abanan li ani ta̱hobok re li Santil Musikˈej incˈaˈ ta̱cuyekˈ xma̱c chi moco saˈ eb li cutan aˈin, chi moco saˈ eb li cutan cha̱lel. Cua̱nk ban saˈ xbe̱n chi junelic lix tojbal rix li nimla ma̱c aˈan. ³³ Joˈcan ajcuiˈ cui cha̱bil junak cheˈ, cha̱bil ajcuiˈ li ru. Cui incˈaˈ us li cheˈ, li ru incˈaˈ ajcuiˈ us. Ut riqˈuin li naru̱chin, nanaˈli ru li cheˈ. ³⁴ ¡La̱ex chanchanex ral li cˈambolay! ¿Chan ta cuiˈ ru nak tex‑a̱tinak cha̱bil a̱tin nak moco usex ta? Joˈ chanru lix chˈo̱l junak, joˈcan ajcuiˈ naa̱tinac. ³⁵ Li cha̱bil cui̱nk naa̱tinac chi cha̱bil xban nak cha̱bil li cuan saˈ xchˈo̱l. Ut li cui̱nk li incˈaˈ us lix naˈleb, yibru naa̱tinac xban nak incˈaˈ us li cuan saˈ xchˈo̱l. ³⁶ La̱in tinye e̱re nak saˈ xkˈehil li rakba a̱tin li junju̱nk tixkˈaxtesi xcue̱nt chirix chixjunil li joˈ ma̱joˈil aj a̱tin quixye. ³⁷ Riqˈuin le̱ ra̱tin ta̱qˈuehekˈ e̱retal. Riqˈuin le̱ ra̱tin ta̱cˈutu̱nk nak ma̱cˈaˈ le̱ ma̱c malaj riqˈuin le̱ ra̱tin ta̱teneba̱k li tojbal ma̱c saˈ e̱be̱n.―

Eb laj fariseo queˈxtzˈa̱ma li milagro

³⁸ Cuan xcomoneb laj tzˈi̱b ut xcomoneb laj fariseo queˈa̱tinac ut queˈxye: ―At tzolonel, ba̱nu junak milagro chiku. Cˈut chiku nak riqˈuin li Dios nachal la̱ cuanquil, chanqueb. ³⁹ Ut li Jesús quichakˈoc ut quixye reheb: ―Li incˈaˈ useb xnaˈleb nequeˈraj nak ta̱cˈutbesi̱k junak milagro chiruheb, aban ma̱ jun milagro ta̱cˈutbesi̱k chiruheb. Caˈaj cuiˈ li milagro li qui‑ux re laj Jonás, li quicˈutbesi̱c chiruheb junxil, aˈan li ta̱cˈutbesima̱nk chiruheb. ⁴⁰ Joˈ nak laj Jonás oxib cutan ut oxib kˈojyi̱n quicuan chak saˈ xsaˈ li nimla car, joˈcan ajcuiˈ nak la̱in li Cˈajolbej tincua̱nk oxib cutan ut oxib kˈojyi̱n saˈ li mukleba̱l. ⁴¹ Laj Jonás quixchˈolob xya̱lal chiruheb laj Nínive ut queˈyotˈeˈ xchˈo̱l queˈxjal xcˈaˈux. Ut la̱in kˈaxal nim incuanquil chiru laj Jonás ut cuanquin arin saˈ e̱ya̱nk, abanan la̱ex incˈaˈ niquine̱pa̱b. Joˈcan nak eb laj Nínive teˈcuacli̱k chak saˈ xkˈehil li rakba a̱tin e̱rochben ut texjiteb xban nak incˈaˈ nequexpa̱ban. ⁴² Li ixk li quicuan chokˈ reina saˈ li tenamit li cuan saˈ li sur ta̱cuacli̱k chak saˈ xkˈehil nak ta̱rakekˈ a̱tin saˈ e̱be̱n ut tixye nak cuan e̱ma̱c xban nak incˈaˈ nequexpa̱ban. Aˈan quichal chak toj saˈ xmaril li ruchichˈochˈ chirabinquil lix naˈleb laj Salomón. Ut la̱in kˈaxal cuiˈchic cuan innaˈleb chiru laj Salomón ut cuanquin arin saˈ e̱ya̱nk. Abanan incˈaˈ nequepa̱b li cua̱tin. ⁴³ Li ma̱us aj musikˈej nak ac x‑el riqˈuin junak cui̱nk, nalajnumeˈ saˈ li chaki naˈajej ut yo̱ chixsicˈbal bar ta̱oc chi hila̱nc. Ut ma̱ bar naxtau xnaˈaj. ⁴⁴ Tojoˈnak naxye saˈ xchˈo̱l: ―La̱in tinsukˈi̱k cuiˈchic riqˈuin li cui̱nk bar quin‑el cuiˈ chak, chan. Ut nak nocoxtau li cui̱nk, chanchan jun li cab ma̱cˈaˈ chic cuan chi saˈ, mesunbil ut cauresinbil re oybeni̱nc. ⁴⁵ Ut li ma̱us aj musikˈej naxsicˈ cuukub chic chi ma̱us aj musikˈej kˈaxal cuiˈchic numtajenak xma̱usilaleb chiru aˈan. Nequeˈoc chi cua̱nc riqˈuin li cui̱nk. Ut lix naˈleb li cui̱nk aˈan numtajenakak chic xyibal ru chiru nak xcuan chak junxil. Ut joˈcan ajcuiˈ te̱cˈul la̱ex li numtajenak le̱ ma̱usilal.

Lix naˈ ut eb li ri̱tzˈin li Jesús

⁴⁶ Ut toj yo̱ ajcuiˈ chi a̱tinac li Jesús riqˈuineb li tenamit nak quicuulac aran lix naˈ rochbeneb li ri̱tzˈin li Jesús. Cuanqueb chirix cab ut teˈraj raj ra̱tinanquileb. ⁴⁷ Ut jun quiyehoc chak re li Jesús: ―Ka̱cuaˈ, la̱ naˈ ut eb la̱ cui̱tzˈin cuanqueb chirix cab. Teˈraj a̱cua̱tinanquil. ⁴⁸ Ut li Jesús quixye re: ―¿Ani lin naˈ ut aniheb li cui̱tzˈin nak nequecˈoxla la̱ex?― ⁴⁹ Ut quixyeˈ li rukˈ cuanqueb cuiˈ lix tzolom ut quixye: ―Aˈineb lin naˈ ut aˈineb li cui̱tzˈin. ⁵⁰ Chixjunileb li teˈba̱nu̱nk re li naraj lin Yucuaˈ li cuan saˈ choxa, aˈaneb li cui̱tzˈin, aˈaneb li cuanab ut aˈaneb lin naˈ, chan.