Read the Gospels in 40 Days
Jesustaca Pilatopaj maquipimi churashcacuna
23 Chai q'uipa tucuicuna cutin huaicashpa jatarishpami, Jesustaca Pilatopajman pushashpa rircacuna. 2 Paipaj ñaupajpimi Jesustaca, cashna juchachircacuna:
–Cai runaca, ñucanchij llajta runacunata crichishpa, mana allita rurachishpami purin. Paica: ‘Cristo tucushpa, Jatun Mandajmi cani’ nishpami, Cesarman cuna cashca impuestotapish ama cuchun mandan– nircacunami.
3 Chashna nijpimi Pilatoca, Jesustaca:
–¿Canca judiocunata Jatun Mandajchu cangui?– nijpi, Jesusca:
–Ari, can nishcallatajmi cani– nircami.
4 Shina nijpi Pilatoca pushaj curacunatapish, chaipi tucui cajcunatapish:
–Cai runapica, ima mana allita rurashcata mana japinichu– nircami.
5 Chashna nijpipish, tucui chaipi cajcunami caparishpa:
–Galileamanta callarishpa caicamamari, tucui Judea llajtapi causajcunata crichishpa, mana allita rurachishpa purin– nircacuna.
6 ‘Galilea’ nijta Pilato uyashpaca:
–Shinashpaca, ¿cai runaca Galileamantachu?– nishpami tapurca.
7 Chashna tapujpica:
–Ari, Galileamantami– nijpi, Galileata mandaj Herodespajmanmi cacharca.
Chai punllacunapica, Herodespish Jerusalenllapitajmi carca. 8 Herodesca, paipajman pushajpi Jesusta ricushpaca, achcatami cushicurca. Herodesca, ñaupamanmi Jesús achca milagrocunata ruraj cashcata uyarca. Chaimantami, Pai ima señalta rurajta ricusha nicurca. 9 Herodesca Jesustaca, achcatami caita chaita tapurca. Chashna tapujpipish, Jesusca imata mana nircachu. 10 Pushaj curacunapish, Mandashcata yachachijcunapish chaillapitajmi carca. Paicunaca, Jesustaca caita chaita nishpa, achcatami juchachircacuna. 11 Chai q'uipami Herodespish, paipaj soldadocunapish Jesustaca p'iñashpa pugllarcacuna. Churanatapish, jatun mandajman shinami alli, sumaj churanata churachij tucurcacuna. Chashna rurashpaca, cutinllatajmi Pilatopajman tigrachishpa cacharca. 12 Chai punllami Pilatoca, Herodeshuan alli tucunacurca. Ñaupamanca p'iñanacushcami carca.
13 Paipajman cachajpimi, Pilatoca pushaj curacunatapish, llajtata mandajcunatapish, tucui chaipi cajcunatapish tandachirca. 14 Paicuna tandanacujpimi, Pilatoca cashna nirca:
–Cancunami cai runataca ‘Shujtajcunata crichishpa, mana allita rurachicun’ nishpa pushamushcanguichij. Cai runataca, cancunapaj ñaupajpimi ña tapurcani. Cancuna juchachicushca shina, ima mana allitaca mana japinichu. 15 Cancuna nijpi Herodespajman cachajpi, paipish ima mana allita mana japishcachu. Chaica riquichij, cai runaca huañuchishca canapaj shina ima mana allitaca mana rurashcachu. 16 Paitaca macachishpa cacharishalla– nircami.
17 Pilatoca Pascua punllapica, preźucunamanta shujta cacharij cashcamantami, maijantapish cacharina carca. 18 Ashtahuanpish chai tandanacushca gentecunaca:
–¡Paitaca huañuchilla! ¡Barrabastami cacharichun ninchij!– nishpami caparircacuna.
19 Barrabastaca, chai pueblopi macanacungapaj jatarichishcamantapish, huañuchij cashcamantapishmi carcelpi tiyacurca. 20 Pilatoca, Jesusta cacharisha nishpami cutin tapurca. 21 Cutin tapujpipish, tucuicunami:
–¡Chacatailla, chacatailla!– nishpa, ashtahuan caparircacuna.
22 Chashna caparicujpipish Pilatoca, caihuanca quimsa cutinmi cashna nirca:
–Paita huañuchingapajca, ¿ima mana allitataj rurashcari? Ima mana allita mana japinica. Paitaca, macachishpa cacharishalla– nircami.
23 Chashna nijpipish:
–¡Chacatashpa huañuchilla!– nishpami, ashtahuan caparircacuna.
Pushaj curacunaca, chashna achcata caparishpami, paicuna nishcata rurachircacuna. 24 Pilatoca, paicuna nishcata caźushpami, Jesustaca ‘Huañunami cangui’ nishpa mana cacharirca. 25 Chai pueblopi macanacungapaj jatarichishcamantapish, huañuchishcamantapish preźu tiyacuj runata cacharichun paicuna mañashcatami cacharirca. Ashtahuanpish Jesustaca, paicuna munashcata rurashpami, paicunapaj maquipi churarca.
Jesustaca Golgotapimi chacatashcacuna
26 Jesusta ña chacatanaman pushacushpaca, Cirene pueblomanta Simón shuti shuj runatami chagramanta shamucujta japircacuna. Paimanmi, Jesusta chacatana cruzta apachishpa, Jesuspaj cati pushashpa rircacuna.
27 Achca gentecunapishmi caticurca. Achca huarmicunapish Jesusta llaquishpa, caparirishpa huacashpami caticurcacuna. 28 Jesusca, chai huacacuj huarmicunata tigralla ricushpami cashna nirca:
–Jerusalén huarmicunalla, ama Ñucamanta huacaichijchu. Cancuna quiquinmanta, cancunapaj huahuacunamanta huacaichij. 29 ‘Mana huachaj, mana chichuj, mana chuchuchij huarmicunaca cushicuichij’ nina punllacuna chayamungamari. 30 Chai punllacunapica, huañusha nishpa:
“Urcucuna llapihuaiari, lomacuna pacahuaiari” ningacunami. 31 Verde yurata cashna rurashpaca, chaquishca yuratacarin, ¿imatapishchari rurangacuna?– nircami.
32 Jesusdij chacatashpa huañuchingapajca, huañuchij ishqui runacunatapishmi pushashpa rircacuna. 33 Uma Tullu sirina shuti urcuman ña chayashpami, Jesustaca chaipi chacatarcacuna. Shinallataj huañuchij runacunatami, shujtaca Paipaj alli ladoman, caishujtaca lluqui ladoman chacatarcacuna. 34 Cruzpimi Jesusca:
–Ñuca Yayalla, Ñucata p'iñajcunataca perdonailla. Paicunaca, imata ruracushcata mana yachancunachu– nirca.
Cutin soldadocunaca, Jesuspaj churanataca, suerteta rurashpami chaupinacurcacuna. 35 Tucui chaipi cajcunami, Jesustaca chaparacurcacuna. Mandajcunapish asishpami, cashna nircacuna:
–Paica, shujtajcunataca quishpichijmari carca. Taita Dios cachashca Cristotaj cashpaca, cunan paillataj quishpirichunri– nircacunami.
36 Soldadocunapish Jesustaca pugllashpami, vinagreta ubyachishun nishpa asircacuna. 37 Chashna rurashpaca:
–Judiocunata Jatun Mandaj cashpaca, Canllataj quishpiriari– nircacunami.
38 Jesusta chacatashca uma jahuanijpica griego, latín, hebreo rimaicunapimi: “CAICA JUDIOCUNAPAJ JATUN MANDAJMI” nishpa quillcashcata churarcacuna.
39 Chacatashca shuj huañuchij runaca, Jesustaca:
–Can Cristo cashpaca, Canllatajpish quishpiri, ñucanchijtapish quishpichiari– nishpami c'ami callarirca.
40 Chashna rimacujpimi, caishuj huañuchij runaca cashna nirca:
–Canpish chacatashcallataj huañucushpapish, ¿manachu Diostaca manchangui, imatagari? 41 Ñucanchijca millaita rurashcamantami, cai llaquitaca apacunchij. Ashtahuanpish cai runaca, ima mana allita mana rurashcachu– nircami.
42 Shina nishpa chai runaca, Jesustaca:
–Can mandaj shamushpaca, ñucata yuyaripangui– nircami.
43 Chashna nijpi Jesusca:
–Cunanllatajmi Ñucahuan Paraisopi cangui, chashnatajmi canga– nircami.
Jesusca chaupi chishitami huañushca
44 Ña chaupi punlla shinamantami, chaupi chishicama tucui cai pacha tutayarca. 45 Intipish mana achijyachircachu. Diospaj huasi ucupi jarcachishca jatun linsopish, chaupitami chaquiyajta uriman lliquirirca. 46 Chashna tucushca q'uipami, Jesusca:
–Yayito, Cambaj maquipimi Ñuca espiritutaca mingani– nishpa, sinchita caparirca.
Chashna nishpaca, huañurcallami.
47 Patsaj soldadocunata mandaj chaita ricushpaca, Taita Diosta sumajyachishpa:
–Cai runaca, cashcata ruraj runatajmari cashca– nircami.
48 Tucui chaipi cajcunapish, chai tucuita ricushpaca, mancharishpa, shungupi huajtarishpami tigramurcacuna. 49 Ashtahuanpish Jesuspaj tucui rijsishcacunahuan, Galilea llajtamanta Jesusta catishpa shamuj huarmicunaca, carullamantami chai tucuita ricushpa shayacurcacuna.
Arimatea pueblomanta Josemi Jesusta pambashca
50 Cashcata ruraj, José shuti shuj runami tiyarca. Paica, tandanacushca mandajcunapuramantami carca. 51 Paipish, Taita Dios mandachun shuyacushcamantami, caishuj mandajcuna ima shinalla yuyarinacushpa, Jesusta chashna rurashcahuanpish mana shujlla yuyai carca. 52 Chaimantami Pilatopajman rishpa, Jesuspaj aichata pambangapaj mañarca. 53 Chacatashcamanta uricuchishpaca linsohuan pillushpami, rumi quinripi jutcuchishca ucupi churarca. Chai jutcuca, pita manaraj churashcami carca. 54 Sábado punlla ña callarigrijpimi, Pascuapaj allichina carca.
55 Galilea llajtamanta Jesusta catishpa shamuj huarmicunapish Joseta catishpa rishpami, jutcupi Jesusta ima shina churajtaca ricurcacuna. 56 Chai huarmicunaca ña huasiman tigramushpaca, sumaj mishquiman ashnacujcunatapish, llihuina jambicunatapishmi Jesuspaj cuerpopi churangapaj allichircacuna. Chai q'uipaca, ña sábado punlla callarijpimi, mandashcapi nishca shina samarircacuna.
Jesusca domingo tutamantami causarishca
24 Domingo tutamanta manaraj alli pacarijpimi, huarmicunaca paicuna allichishca, mishquijllata ashnacujcunata apashpa, Jesusta churashca jutcuman shamurcacuna. Shujtaj huarmicunandijmi shamurcacuna. 2 Paicuna chayanapajca, jutcu pungupi jarcashca rumica ña anchuchishcami ricurirca. 3 Jutcuman yaicushpa ricujpica, Apunchij Jesuspaj cuerpoca mana ricurircachu. 4 Paipaj cuerpo mana ricurijpimi, achcata mancharishpa shayacurcacuna. Chaipimi ñapish ishqui runacunaca, lamyacuj churanata churashca, paicunapaj c'uchupi ricurirca. 5 Chaita ricushpacarin, ashtahuan mancharishpa cumurijpimi, chai ishqui runacunaca, cashna nircacuna:
–¿Ima nishpataj ña causarishcataca, huañushcacunapaj chaupipi mashcacunguichij? 6 Paica mana caipichu, ñamari causarirca. Pai Galileapi cashparaj, ima nishcataca yuyarichigari. 7 Illu Galileapi cashpaca: “Runa Aichayuj Ñucataca, juchayuj runacuna japishpa chacatashpa huañuchingacunami. Huañuchijpipish, quimsa punllapica causarishallami” nircami– nircacunami.
8 Chashna nijpimi chai huarmicunaca, Jesús chashna nishcataca yuyarircacuna. 9 Jutcumanta paicuna tigrashpami, chunga shuj yachacujcunamanpish, caishuj crijcunamanpish, tucui imalla tucushcata huillarcacuna. 10 Huillagrichun mingashcacunamanca, Magdalamanta Mariapish, Juanapish, Jacobopaj mama Mariapish, shujtaj huarmicunapishmi huillagrircacuna. 11 Paicuna chaita uyashpaca, musparishpalla chashna nicujtami yuyarcacuna. Jesús causarishcataj canataca, mana crircacunachu.
12 Mana cricushpapish, Pedroca huasimanta llujshishcahuanmi, callpashpa jutcuman rirca. Chaiman chayashpaca, pillushca linsocunallatami siricujta ricurca. Chaita ricushpaca, achcata mancharishpami huasiman tigramurca.
Jesusca Emausman ishqui yachacujcuna ricujpimi tupashca
13 Chai punllallatajmi ishqui yachacujcunaca, Emausman ricurca. Chai puebloca, Jerusalenmanta chunga shuj kilómetro shinallapimi. 14 Paicunaca tucui imalla tucushcatami, parlanacuihuan ricurcacuna. 15 Chashna caishuj chaishuj parlanacushpa rimanacuihuan ricujpimi, Jesusca ñapish paicunapajman c'uchuyashpa, paicunahuan tandalla rirca. 16 Shina cajpipish Jesusta ama rijsichun, paicunapaj ñahuicunaca huichcashca shinami carca. 17 Jesusca:
–¿Imatataj parlanacuihuan ricunguichij? ¿Ima nishpataj llaquilla canguichij?– nishpami tapurca.
18 Chashna nijpi chai ishquimanta Cleofas shuti runaca, cashnami nirca:
–Illu tucuicunatajmari cai punllacuna Jerusalenpi ima tucushcataca yachancuna. ¿Maimanta cashpataj canllaca mana yachanguiari?– nircami.
19 Shina nijpica:
–¿Imataj tucushca canga?– nircami.
Chashna nijpi, paicunaca cashnami nirca:
–Dios ima nishcata huillaj, Nazaretmanta Jesustamari parlanacunchij. Paica Taita Diospaj ñaupajpipish, tucui gentecunapaj ñaupajpipish, imata rurangapaj, imata yachachingapajpish tucuita rurai tucuj cashcatamari ricuchirca. 20 Paitamari pushaj curacunapish, ñucanchij llajtata mandajcunapish juchachishpa, chacatashpa huañuchircacuna. 21 Ñucanchijca paillatamari, ‘Ñucanchij Israel llajtataca quishpichingami’ nishpa chapacurcanchij. Ashtahuanpish Paita huañuchishcaca, ñamari quimsa punllapish tucun. 22 Chashna cajpipish manaraj pacarijpi, ñucanchijpura maijan huarmicuna chai jutcupi ricugrishpamari, ñucanchijtaca ashtahuan manchachincuna. 23 Paicunamari Jesuspaj cuerpotaca, chai jutcupi ña mana ricushcacuna. Ashtahuanpish ‘Angelcuna ricurishpamari, Jesús causarishcata huillan’ nishpamari tigramurcacuna. 24 Chashna huillajpimi, ñucanchijpuramanta maijancunaca jutcupi ricunaman rishcacuna carca. Paicunapish huarmicuna parlashca shinallataj, Jesuspaj cuerpotaca ña mana japishcacunachu carca– nircacunami.
25 Chashna nijpimi, Jesusca cashna nirca:
–¡Cancunaca upacunamari canguichij! ¿Ima nishpataj Dios ima nishcata huillajcuna nishcataca, mana utca cringuichigari? 26 Quishpichij Cristoca sumajyachishca canapajca, ¿manachari llaquitaraj apana carcari?– nircami.
27 Chashna nishpaca, Moisés Quillcashcamanta callarishpa, tucui Dios ima nishcata tucui huillajcuna quillcashcacamami, Dios tucui Quillcachishcacunapi Paimanta imalla nishcataca huillashpa yuyachirca.
28 Paicuna ricushca puebloman ña chayajpica, Jesusca ashtahuan caruman ricuj shinami tucurca. 29 Shina cajpipish paicunaca, mana cachasha nishpami:
–Shuyailla, ñamari chishi. Ña tutayacunpishmari– nircacuna.
Chashna nijpi Jesusca, paicunahuan saquiringapaj yaicurcami. 30 Ña micungapaj meźapi paicunahuan tiyacushpaca, tandata japishpami Diosta pagui nirca. Chaimantaca chaupishpami paicunaman cararca. 31 Chashna rurajpi chai runacunapaj ñahuicunaca pascarij shina ricushpaca, Jesús cashcata rijsircacunami. Ashtahuanpish Jesusca, paicunapaj ñahuimantaca chingarircallami. 32 Pai ña mana ricurijpimi, paicunaca:
–Dios Quillcachishcacunata ñanpi ñucanchijta Pai yuyachishpa rimashpaca, ¿manachu ñucanchijtaca, shunguman yaicujtamari rimarca?– ninacurca.
33 Chashna ninacushpaca, jatarishcahuan Jerusalenman shamurcallacunami. Ña chayamushpaca, chunga shuj yachacujcunataca, shujtajcunahuanpish tandanacushcatami japircacuna. 34 Tucui paicunami: «Apunchij Jesusca causarishcatajmari. Simonmari Paitaca ricushca» nircacunami.
35 Shina nijpimi, paicunapish ñanpi imalla tucushcatapish, tandata chaupishpa caracujpi ima shina rijsishcatapish huillarcacuna.
Jesusca chunga yachacujcunamanmi ricurishca
36 Jesusta ricushcata caishuj chaishuj parlanacucujpirajmi, Jesusca ñapish paicunapaj chaupipi ricurirca. Chaipi ricurishpaca:
–Ama manchaichijchu– nirca.
37 Chashna ricurijpica, ‘Ayatami ricunchij’ yuyashpami, chujchushpa achcata mancharircacuna. 38 Chashna mancharijpimi, Jesusca cashna nirca:
–¿Ima nishpataj mancharinguichij? ¿Ima nishpataj cancunapaj shungupica, chashna yuyacunguichij? 39 Ñuca maquita, Ñuca chaquita japishpa ricuichigari, Ñucallatajmari cani. ¿Maitataj ayaca aichata, tullutaca charingari? Ñucaca cancuna ricucuj shinallataj aichayuj, tulluyujmari cani– nircami.
40 Shina nishpami maquita, chaquita ricuchirca. 41 Chashna ricuchijpipish cushicushpa, mancharishpa, Pai cashcata manaraj crijpimi Jesusca:
–¿Ima micunata caipi charinguichijchu?– nirca.
42 Chashna nijpi cusashca asha chalhuahuan, asha abeja mishquihuanmi cararcacuna. 43 Chaita carajpica, japishpa paicunapaj ñaupajpi micurcami. 44 Ña micushca q'uipaca, Jesusca paicunataca cashnami nirca:
–Moisés Mandashcapipish, Dios ima nishcata huillajcuna Quillcashcapipish, Salmocunapi Ñucamanta tucui imalla nishcacunapish pajtachunmi, chashnaca tucurca. Illu chashna tucunataca, ñaupamanmari huillarcani– nircami.
45 Chashna yuyaita cushpami, Dios Quillcachishcacunapi imalla nicushcata entendichun yuyaita pascarca. 46 Cashnami entendichirca:
–Diospaj Quillcapi nishca shinallatajmi, Quishpichij Cristoca huañuna carca. Huañushpapish, quimsa punllapica causarinami carca. 47 Chai huashaca Jerusalenmanta callarishpa, tucui llajtacunapimi: “ ‘Juchacunata anchuchichun Diospajman cutirichij’ nishpa, Paipaj shutipi huillashca canga” nishcamari. 48 Chai quillcashca shinallataj tucujtaca, quiquin ñahuihuanmi ricushcanguichij. 49 Chaicunata huillachunca, Ñuca Yaya cachasha nishca Paipaj Espirituta cancunapajman cachashami. Paita Ñuca cachangacamaca, Jerusalenllapitaj shuyanguichijlla. Ñuca cachajpi jahuamanta Pai shamushpa cancunata japijpimi, imatapish rurai tucunguichij– nircami.
Apunchij Jesusca Betaniamantami jahua pachaman rishca
50 Jesusca, chai q'uipami paicunataca, Betania pueblo ch'imbanijman pushashpa rirca. Chaipimi, paicunapaj jahuata maquicunata chutashpa bendiciarca. 51 Paicunata bendiciashpa, paicunamanta raquirijpica, jahua pachaman aparcallami. 52 Paicunaca Jesusta adorashca q'uipaca, achcata cushicushpami, Jerusalenman tigrarcacuna. 53 Chaiman tigramushpaca, Diospaj huasipi Taita Diosta ‘Allimari cangui’ nishpa, punllanta alabarcallacunami. Chashna cachun.
Mushuj Testamento Diospaj Shimi (Quichua‐Chimborazo New Testament) Copyright © 2010 by Biblica, Inc.™ Used by permission. All rights reserved worldwide.