Read the Gospels in 40 Days
‘Pita ama juchapi urmachinguichijchu’ nishcami
17 Jesusca Paipaj yachacujcunataca, cashnami nirca:
–Ñitcachij millaica tiyangatajmi. Shina cajpipish maijan ñitcachijca, ¡ai, imachari tucunga! 2 Cai uchillacunata ñitcachij canapaj randica, jatun cutana rumita cungapi huatashpa, mama cucha chaupipi shitashca canarajmi alli canman. 3 Chaimanta alli yuyaihuan causaichij. Cambaj huauqui canta llaquichijpica, cunashpa jarcangui. Can jarcajpi cutirijpica, perdonangui. 4 Shuj punllapi canchis cutin canta llaquichijpipish, canchis cutinllataj: “Mana allitamari rurashcani, perdonahuai” nishpa llaquirijpica, perdonanguilla– nircami.
5 Huillagrichun mingashcacunaca, Apunchij Jesustaca:
–Ñucanchijman ashtahuan crina yuyaita cuhuai– nircacunami.
6 Shina nijpimi, Apunchij Jesusca cashna nirca:
–Uchilla mostaza muyu shinallatapish crina yuyaita charishpaca, cai sicómoro yurata: ‘Caimanta anchui, jatun cuchapi tiyarigri’ nijpipish, cancuna nishcata uyashpa chaiman rinmanllami.
7 ¿Maijan cancuna shuj runata charishpaca pai yapushpa, mana cashpaca michishpa tigramujpica: “Shamui, cunanca micuj tiyarilla” ninguichijchu? 8 Chashna ninapaj randica: “Utca utca micunata yanushpa ñucamanraj carai, chai q'uipa canca micunguillami” ninguichijmi. 9 Chashna rurachishpapish, cancuna mandashcata rurashcamantaca, mana paguillapish ninguichijchu, ¿nachuchij? 10 Shinallataj, cancunapish Dios tucui imallata rurai nishcata rurashpapish: “Ñucanchijca imata rurana cashcallatami rurashcanchij. Ima alli servijcunallapish mana canchijchu” ninami canguichij– nircami.
Leprahuan ungushca chunga runacunatami alliyachishca
11 Jerusalenman Jesús ricushpaca, Galilea llajtata, Samaria llajtatami rirca. 12 Shuj aillu llajtaman chayajpica, leprahuan ungushca chunga runacunami Jesushuan tupangapaj shamurcacuna. Paicunaca, Jesuspajmanta carullapi shayarishpami:
13 –¡Yachachij Jesús, ñucanchijta llaquihuaiari!– nishpa caparircacuna.
14 Chashna caparijpi, Jesús paicunata ricushpaca:
–Richij, curacunaman ricuchirigrichij– nircami.
Chashna nishpa cachajpica, ñanta ricushpallataj alliyarcallacunami. 15 Chai alliyajcunamanta shujca, Taita Diosta ‘Sumajmari cangui’ nishpami tigramurca. 16 Ña Jesuspajman chayamushpaca, Paipaj ñaupajpi pambacama cumurishpami, pagui nirca. Chai runaca, Samaria llajta runami carca.
17 Jesusca, paitaca cashnami nirca:
–Chungatamari alliyachircani, ¿caishuj iscunca maipitaj? 18 Cai mana Israel runallamari, Taita Diosta sumajyachingapajca tigramushca– nircami.
19 Chashna nishca huashaca, chai runataca:
–Canca alliyachinata crishcamantami, alliyashcangui. Jatarishpa rilla– nishpami cacharca.
Dios ima punlla mandangapaj tiyarinatami tapushcacuna
20 Fariseocunaca, Jesustaca:
–¿Ima punllataj Taita Diosca mandangapaj tiyaringa?– nishpami tapurcacuna.
Chashna tapujpimi, Jesusca cashna nirca:
–Taita Dios mandanaca, mana ñahui ricunallachu. 21 Mana ‘Caipimari, chaipimari mandacun’ nishpa pi ricuchingachu. Taita Diosca, ñamari cancunapaj chaupipi mandacun– nircami.
22 Cutin paipaj yachacujcunataca, Jesusca cashnami nirca:
–Runa Aichayuj Ñuca mandana punllapi, shuj punllallatapish causasha nina chayamucunmi. Shina cashpapish, mana ricunguichijchu. 23 Chashna yuyacujpitajmi ‘Paica caipimari, chaipimari’ ningacuna. Chashna nijpipish, pajta cringuichijman, pajta catinguichijman. 24 Runa Aichayuj Ñuca shamushpaca, relampa achij nishpa, tucuita achijyachij shinami shamusha. 25 Ashtahuanpish cunanca, achca llaquicunata apanarajmi cani. Cai runacuna p'iñashca canarajmi cani. 26 Ima shinami ñaupa yaya Noé causai punllacunapi tucurca, chashnallatajmi Runa Aichayuj Ñuca shamuna punllacunapish canga. 27 Huambuj jatun huasipi Noé yaicungacamaca, allita micucurca, ubyacurca, caźaracurca, caźarana tucucurcacunami. Noé ña ucuman cajpi tamya callarijpimi, yacu millpujpi tucuicuna huañurca. 28 Cutin shinallataj ñaupa yaya Lot causai punllacunapipish allita micucurca, ubyacurca, c'atucurca, randicurca, tarpucurca, huasichicurcacunami. 29 Chashna ruracujpi Lot ña Sodoma pueblomanta llujshijpica, jahuamanta ninahuan azufrehuan tamyashpami, tucuicunata huañuchirca. 30 Chashnallatajmi Runa Aichayuj Ñuca shamui punllapipish canga. 31 Chai punllapica, maijanpish huasi jahuapi cashpaca, ucupi ima tiyajta apangapaj ama yaicuchun. Shinallataj maijan chagrapi cashpapish, huasiman ama tigrachun. 32 Lotpaj huarmi ima tucushcata yuyarichij. 33 Quiquin causaita llaquijca, chingaringami. Quiquin causaita mana llaquijca, quishpiringami. 34 Cancunaman huillanimi: Chai tutaca, shuj camapi ishqui dormicujpipish, shujtaca apanga, shujtaca saquingami. 35 Shinallataj ishqui huarmicuna cutacujpipish, shujtaca apanga, shujtaca saquingami. 36 Shinallataj ishqui runacuna chagrapi cajpipish, shujtaca apanga, shujtaca saquingami– nircami.
37 Chashna nijta uyashpaca:
–Apu, ¿maipitaj chashnaca tucunga?– nijpi:
–Maipi huañushca siricujpica, chaipimi angacuna tandanacunga– nircami.
Millai juezta shuj viuda mañagrishcahuan ch'imbapurashpa yuyachishca parlomi
18 Mana shaicushpa, punllanta Diosta mañanata yachachingapajmi, Jesusca yuyachij cai parlota cashna parlarca:
2 «Shuj pueblopica, Taita Diostapish, pitapish mana manchaj juezmi causarca. 3 Chai pueblollapitajmi, shuj viudapish causarca. Chai huarmica: “Ñucata llaquichicujmanta, mitsahuai” nishpa puricurcallami. 4 Juezca pai mañashcataca, mana utca uyasha nircachu. Shinapish chashna mañashpa puricujllapimi, chai juezca cashna yuyarca: “Diostapish, pitapish mana manchanichu. 5 Shina cajpipish cai huarmica, ña yallitajmi mañashpa p'iñachin. Chashna nishpa puricujllapica, p'iñarina yuyai atingallatajmari. Ama ashtahuan p'iñachichun, cunantajca paita llaquichicujta rimashpa mitsasha” yuyarcami» nircami.
6 Chashna nishpaca, Apunchij Jesusca cashnami nirca:
«Riquichij, chai juez millai cashpapish chashnami rurashca. 7 Taita Dioscarin, Pai agllashcacuna punllapish, tutapish caparishpa mañajpica, ¿manachu uyanga? Mana uniyashpamari uyanga. 8 Cancunaman huillanimi. Paica mana uniyashpa uyashpami, cancunataca mitsanga. Shina cajpipish ¿Runa Aichayuj Ñuca shamunapajca, chashna crijcunaca cai pachapica tiyangachu imashi?» nircami.
Shuj fariseomantapish, impuestota japijmantapish parlashpa yuyachishcami
9 Maijancunaca ‘Cashcata rurajcunami canchij’ nirishpa, shujtajcunata p'iñajcunami chaipi carca. Paicunata yuyachingapajmi, cai parlota cashna parlarca:
10 «Ishqui runami Diospaj huasipi Diosta mañangapaj rirca. Shujca fariseo, caishujca impuestota japijpimi carca. 11 Fariseoca shayarishpami, shungullapi cashna mañarca: ‘Taita Dioslla, ñucaca mana shujtajcuna shina shuhua, millai, huainayaj canichu. Cai impuestota japij shinapish mana canichu. Chaimanta cantaca, pagui ninimi. 12 Ñucaca, semanapi ishqui cutinmi ayunani. Ñuca imalla charishcamantapish, patsajmanta chungatami cuni’ nirircami. 13 Ashtahuanpish impuestota japij runaca carullaman cumulla shayashpami, shungupi huajtarishpa: “Taita Dioslla, ñucata llaquihuaiari, ñucaca juchasapamari cani” nirca. 14 Cancunaman huillanimi: Impuestota japij runarajmi huasimanca ima juchachina illaj tigrarca. Caishujtarajmi Diosca mana uyarca. Pipish ‘Jatunmi cani’ nirijtaca, pingachishcami canga. Pipish mana jatun tucushcataca, jatun nishcami canga» nircami.
Jesusca huahuacunatami bendiciashca
15 Jesuspajmanca huahuacunatami, maquicunahuan paicunata tuparichun pushamurcacuna. Ashtahuanpish yachacujcunaca, sinchita rimashpami jarcarcacuna. 16 Chaimantami Jesusca, yachacujcunata cayashpa cashna nirca: «¿Ima nishpataj jarcacunguichij? Ñucapajman huahuacuna shamuchun saquipaichij. Taita Dios mandacunca chashnacunapajmi. 17 Maijanpish Taita Dios mandacunta mana shuj huahua shina chasquijca, chaimanca mana yaicui tucungachu, chashnatajmi canga» nircami.
Charij mosomi Jesushuan parlashca
18 Chai q'uipami shuj mandajca, Jesustaca:
–Alli Yachachij, huiñai causaita charingapajca, ¿imatataj rurana cani?– nishpa tapurca.
19 Chashna tapujpi Jesusca, cashnami nirca:
–¿Ima nishpataj Ñucataca alli ningui? Taita Diosllamari allica. 20 Mandashcataca yachanguillatajca: “Ama huainayangui, ama huañuchingui, ama shuhuangui, ama llullangui, yaya mamata c'uyangui” ninmi– nircami.
21 Chashna nijpimi, chai runaca:
–Ñucaca huahuapachamantamari, tucui caicunataca pajtachicuni– nirca.
22 Shina nijpimi, Jesusca cashna nirca:
–Chashnapish shuj illanrajmari. Tucui imalla charishcacunata c'atushpa, huajchacunaman cugri. Chashna rurashpaca, jahua pachapi achcata charijyanguimi. Ñucata catilla– nircami.
23 Shina nijpi chai runaca, achcata charij cashcamanta achcatami llaquirirca. 24 Chaita ricushpami, Jesusca cashna nirca:
–Achcata charijcuna Taita Dios mandacunman yaicunaca, yallitaj sinchimi. 25 Achcata charijcuna Taita Dios mandacunman yaicunaca, auja rinrinta shuj camello yaicusha nicushcatapish yalli sinchimari– nircami.
26 Chaita uyajcunaca:
–Shinashpaca, ¿pitaj quishpiri tucungari?– nircacunami.
27 Chashna nijpi, Jesusca:
–Pi mana rurai tucushcatapish, Taita Diosca ruranllami– nircami.
28 Shina nijpimi, Pedroca:
–Ñucanchijca canta catingaraicumi tucui imalla charishcacunata saquishcanchij– nirca.
29 Chashna nijpi Jesusca, cashnami nirca:
–Dios mandacunpi yaicusha nijca, huasita, yaya mamata, huauquicunata, huarmita, saquishcami. 30 Paica, cai pachapipish ashtahuan charingami, shamuj punllapipish huiñai causaita japingami, chaica chashnatajmi– nircami.
Jesusca cutinmi Paita huañuchinata huillashca
31 Chai q'uipami Jesusca, Paipaj chunga ishqui yachacujcunallata pushashpa cashna nirca: «Cunanca, Jerusalenmanmi huichiyanchij. Chaipimi Dios ima nishcata huillajcuna, Runa Aichayuj Ñucamanta imallata quillcashcaca pajtanga. 32 Ñucataca, mana israelcunapaj maquipimi churangacuna. Paicunami Ñucataca pugllashpa asingacuna, c'amingacuna, ch'ucangacuna. 33 Macashca huashami, huañuchingacuna. Huañuchijpipish, quimsa punllapica causarishallami» nircami.
34 Chashna nijpipish yachacujcunaca, Jesús imata nisha nishcata mana entendircacunachu. Mana yachai tucuipajlla cashcamantami, ima yuyaita mana japircacuna.
Jesusca mana ricuj runatami Jericopi alliyachishca
35 Jericoman Jesús chayagricujpica, ñan c'uchupimi mana ricuj runa mañashpa tiyacurca. 36 Chai runaca, achca gentecunata uyashpami: “¿Imataj tiyan?” nishpa tapurca. 37 Pai tapujpica: “Nazaretmanta Jesusmari caita pasacun” nishpami huillarcacuna. 38 Chaita uyaihuanmi:
–¡Davidpaj Churi Jesús, ñucata llaquihuaiari!– nishpa caparirca.
39 Shina nijpica, ñaupashpa ricujcunami:
–Upalla, ama caparichu– nircacuna.
Chashna nicujpipish:
–¡Davidpaj Churi Jesús, ñucata llaquihuai!– nishpami, ashtahuan sinchita caparirca.
40 Chaimantami Jesusca shayarishpa, Paipaj ñaupajman pushamuchun cacharca.
Ña chayamujpica:
41 –¿Imatataj rurachun ningui?– nishpami tapurca.
Shina nijpi, chai runaca:
–Apu, ñuca ñahuita alliyachihuai– nircami.
42 Shina nijpi Jesusca:
–Shinashpaca ricuilla. Alliyachinata crishcamanta, alliyailla– nircami.
43 Jesús chashna nijpi, paipaj ñahui ña ricujpimi chai runaca, Taita Diosta jatunyachishpa, Jesusta catishpa rirca. Chashna alliyachijta ricujcunapish, tucuicunami Taita Diostaca alabarcacuna.
Mushuj Testamento Diospaj Shimi (Quichua‐Chimborazo New Testament) Copyright © 2010 by Biblica, Inc.™ Used by permission. All rights reserved worldwide.