Chronological

Li cuukub chi sello

6  Ut quicuil nak li Jun li chanchan carner quixte li xbe̱n sello. Ut quicuabi nak quia̱tinac jun reheb li ca̱hib li chanchaneb ángel, li yoˈyo̱queb. Chanchan nak na‑ecˈan li ca̱k nak quia̱tinac chi cau xya̱b xcux. Quixye: ―¡Quim! Chola̱cuil aˈin, chan. ² Quicuil nak cuan jun li cacua̱y sak rix. Ut cuan jun li yo̱ chi xic chirix cuan xtzimaj saˈ rukˈ. Ut quiqˈueheˈ jun lix corona ut co̱ cuiˈchic chi numta̱c saˈ xbe̱neb li cuanqueb saˈ ruchichˈochˈ. ³ Ut li Jun li chanchan carner quixte jun chic li sello ut quicuabi li xcab li chanchan ángel nak quixye: ―¡Quim! ¡Chola̱cuil aˈin! chan. ⁴ Ut qui‑el chak jun chic li cacua̱y cak rix. Ut li jun li cuan chirix quiqˈueheˈ jun li nimla chˈi̱chˈ re ut quiqˈueheˈ xcuanquil re ta̱risi li tuktu̱quil usilal saˈ ruchichˈochˈ re nak eb li cui̱nk teˈxcamsi ribeb chi ribileb rib. ⁵ Ut nak li Jun li chanchan carner quixte li rox sello, quicuabi li rox li chanchan ángel yo̱ chixyebal: ―¡Quim! Chola̱cuil aˈin, chan. Ut quicuil jun li cacua̱y kˈek rix. Ut li jun li cuan chirix cuan jun li bisleb saˈ rukˈ. ⁶ Ut quicuabi jun xya̱b cux quia̱tinac saˈ xya̱nkeb li ca̱hib li chanchaneb ángel ut quixye: ―Naru xlokˈbal cuib libra li trigo chiru li tojleb li re jun cutan ut naru xlokˈbal cuakib libra li cebada chiru li tojleb li re jun cutan. Abanan me̱terkˈusi xtzˈak li aceite ut li vino, chan. ⁷ Ut li Jun li chanchan carner quixte li xca̱ sello ut quicuabi nak li xca̱ li chanchan ángel quixye: ―¡Quim! Chola̱cuil aˈin, chan. ⁸ Quicuil jun li cacua̱y kˈan rix. Ut li cuan chirix li cacua̱y, aˈan Ca̱mc xcˈabaˈ. Ut li yo̱ chi ta̱ke̱nc re, aˈan Xnaˈaj Camenak xcˈabaˈ xban nak aˈan li ta̱cˈuluk reheb li teˈca̱mk. Li cuan chirix li cacua̱y quiqˈueheˈ xcuanquil chixcamsinquil nabaleb saˈ ruchichˈochˈ. Jun jachal saˈ xya̱nkeb li ca̱hib jachal (1ˈ4) chi cristian li cuanqueb saˈ ruchichˈochˈ teˈca̱mk. Cuan teˈcamsi̱k riqˈuin chˈi̱chˈ. Cuan teˈca̱mk xban cueˈej. Cuan teˈca̱mk xban yajel ut cuan ajcuiˈ li teˈcamsi̱k xban li joskˈ aj xul. ⁹ Nak li Jun li chanchan carner quixte li roˈ sello, quicuil nak cuanqueb rubel li artal li queˈcamsi̱c xban nak queˈpa̱ban ut xban nak queˈxchˈolob xya̱lal li ra̱tin li Dios. ¹⁰ Ut queˈxye chi cau xya̱b xcux: ―At nimajcual Dios, la̱at Santo ut la̱at ti̱c a̱chˈo̱l. ¿Jokˈe tatrakok a̱tin saˈ xbe̱neb li tenamit xban li raylal xeˈxba̱nu ke? Ut, ¿jokˈe ta̱qˈue re̱kaj reheb nak xoeˈxcamsi? chanqueb. ¹¹ Queˈqˈueheˈ xsaki akˈeb. Ut queˈyeheˈ reheb nak teˈhila̱nk ut teˈroybeni jarubak cutan chic toj ta̱tzˈaklok xqˈuialeb li rech aj cˈanjelil li toj teˈcamsi̱k joˈ nak queˈcamsi̱c eb aˈan. ¹² Ut quicuil nak li Jun li chanchan carner quixte li xcuak sello ut quicuan jun li nimla hi̱c. Li sakˈe quikˈojyi̱noˈ ru. Chanchan li kˈeki tˈicr li nequeˈrocsi li raheb saˈ xchˈo̱l. Ut li po quicakoˈ joˈ li quicˈ. ¹³ Ut eb li chahim quilajeˈtˈaneˈ chak chi chˈochˈ joˈ nak nahireˈ ru li higo xban li cacuil ikˈ nak toj ma̱jiˈ nakˈanoˈ. ¹⁴ Ut quisach li choxa nak quicuil. Chanchan jun li hu nak quixboti rib. Chixjunil li tzu̱l joˈ ajcuiˈ li chˈochˈ li sutsu saˈ haˈ quilajeˈecˈan saˈ xnaˈajeb. ¹⁵ Ut chixjunileb quilajeˈxmuk ribeb xbaneb xxiu. Queˈxmuk ribeb li rey ut eb li cuanqueb xcuanquil, joˈqueb ajcuiˈ li nequeˈtaklan saˈ xbe̱neb li soldado. Queˈxmuk ribeb li biom joˈqueb ajcuiˈ li cauheb rib, joˈqueb ajcuiˈ li lokˈbil mo̱s joˈ ajcuiˈ li ma̱cˈaˈeb xpatrón. Queˈxmuk ribeb saˈ li ochoch pec ut saˈ xya̱nkeb li ni̱nki pec li cuanqueb saˈ tzu̱l. ¹⁶ Ut queˈxye reheb li tzu̱l ut reheb ajcuiˈ li pec: ―Tˈanekex chak saˈ kabe̱n ut choe̱muk taxak chiru li cˈojcˈo saˈ lix lokˈlaj cˈojariba̱l. Choe̱muk chiru li Jun li chanchan carner, li yo̱ xjoskˈil saˈ kabe̱n. ¹⁷ Xcuulac xkˈehil li rakba a̱tin saˈ kabe̱n. ¿Ani ta cuiˈ ta̱ru̱k tixcol rib chiru aˈan? chanqueb.

Li ca̱hib xcuakxakcˈa̱l mil (144,000) laj Israel li qˈuebileb retalil xban li Dios

7  Ut chirix chixjunil aˈin quicuil ca̱hib li ángel xakxo̱queb saˈ xca̱ pacˈalil li ruchichˈochˈ li nachal cuiˈ li ikˈ. Yo̱queb chixkˈusbal li ikˈ re nak incˈaˈ ta̱numekˈ chi cau saˈ xbe̱n li ruchichˈochˈ joˈ ajcuiˈ saˈ xbe̱n li palau ut saˈ xbe̱neb li cheˈ. ² Ut quicuil jun chic li ángel yo̱ chak chi cha̱lc na‑el cuiˈ chak li sakˈe. Cuan chak lix sello li yoˈyo̱quil Dios riqˈuin. Ut quia̱tinac chi cau xya̱b xcux riqˈuineb li ca̱hib chi ángel li ac qˈuebileb xcuanquil re xba̱nunquil raylal reheb li cuanqueb saˈ ruchichˈochˈ, joˈqueb ajcuiˈ li cuanqueb saˈ li palau. ³ Quixye reheb: ―Me̱ba̱nu raylal reheb li cuanqueb saˈ ruchichˈochˈ chi moco reheb li cuanqueb saˈ li palau chi moco reheb li cheˈ. Toj takaqˈue retalileb saˈ xpe̱quemeb riqˈuin li sello eb laj cˈanjel chiru li Dios. ⁴ Ut quicuabi lix qˈuialeb li queˈqˈueheˈ retalileb saˈ xpe̱quemeb riqˈuin li sello, aˈan ca̱hib xcuakxakcˈa̱l mil (144,000) chi cristian. Aˈaneb li quiqˈueheˈ retalileb saˈ xpe̱quemeb saˈ xya̱nkeb lix te̱paleb li ralal xcˈajol laj Israel. ⁵ Cablaju mil (12,000) li quiqˈueheˈ retalileb saˈ xpe̱quemeb saˈ xya̱nkeb li ralal xcˈajol laj Judá; ut saˈ xya̱nkeb li ralal xcˈajol laj Rubén, cablaju mil li quiqˈueheˈ retalileb saˈ xpe̱quemeb. Saˈ xya̱nkeb li ralal xcˈajol laj Gad, cablaju mil li quiqˈueheˈ retalileb saˈ xpe̱quemeb. ⁶ Cablaju mil (12,000) li quiqˈueheˈ retalileb saˈ xpe̱quemeb saˈ xya̱nkeb li ralal xcˈajol laj Aser; ut saˈ xya̱nkeb li ralal xcˈajol laj Neftalí, cablaju mil li quiqˈueheˈ retalileb saˈ xpe̱quemeb. Ut saˈ xya̱nkeb li ralal xcˈajol laj Manasés, cablaju mil li quiqˈueheˈ retalileb saˈ xpe̱quemeb. ⁷ Cablaju mil (12,000) li quiqˈueheˈ retalileb saˈ xpe̱quemeb saˈ xya̱nkeb li ralal xcˈajol laj Simeón: ut saˈ xya̱nkeb li ralal xcˈajol laj Leví, cablaju mil li quiqˈueheˈ retalileb saˈ xpe̱quemeb. Ut saˈ xya̱nkeb li ralal xcˈajol laj Isacar, cablaju mil li quiqˈueheˈ retalileb saˈ xpe̱quemeb. ⁸ Cablaju mil (12,000) li quiqˈueheˈ retalileb saˈ xpe̱quemeb saˈ xya̱nkeb li ralal xcˈajol laj Zabulón; ut saˈ xya̱nkeb li ralal xcˈajol laj José, cablaju mil li quiqˈueheˈ retalileb saˈ xpe̱quemeb. Ut saˈ xya̱nkeb li ralal xcˈajol laj Benjamín, cablaju mil li quiqˈueheˈ retalileb saˈ xpe̱quemeb.

Nabaleb li tenamit tikibanbileb riqˈuin saki akˈ

⁹ Ut chirix aˈan, quicuil ajcuiˈ nabaleb chi tenamit xakxo̱queb chiru li cˈojcˈo saˈ lix lokˈlaj cˈojariba̱l ut chiru li Jun li chanchan carner. Incˈaˈ naru rajlanquileb xban xqˈuialeb. Cuanqueb aran aˈ yal ani xte̱paleb xxeˈto̱nil xyucuaˈeb ut aˈ yal bar xtenamiteb ut aˈ yal chanru li ra̱tinoba̱leb. Tikibanbileb riqˈuin saki akˈ ut cuan chak saˈ rukˈeb li rukˈ cheˈ palma. ¹⁰ Ut japjo̱queb re chixyebal: ―Li kacolbal riqˈuin li Dios nachal chak, li cˈojcˈo saˈ lix lokˈlaj cˈojariba̱l, ut riqˈuin ajcuiˈ li Jun li chanchan carner.― ¹¹ Ut chixjunileb li ángel li cuanqueb chi xjun sutam li lokˈlaj cˈojariba̱l ut li ca̱hib li chanchaneb ángel, joˈqueb ajcuiˈ li ca̱hib xcaˈcˈa̱l li cˈojcˈo̱queb aran, queˈxcuikˈib ribeb chiru li lokˈlaj cˈojariba̱l ut queˈxlokˈoni li Dios. ¹² Ut queˈxye: ―Lokˈoninbil taxak li kaDios. Chinima̱k taxak ru. Chiqˈuehekˈ taxak xlokˈal xban nak numtajenak xcuanquil, xnaˈleb ut xcacuilal. Xcˈulub nak tobantioxi̱nk chiru chi junelic kˈe cutan. Joˈcan taxak. ¹³ Ut jun reheb li ca̱hib xcaˈcˈa̱l li cˈojcˈo̱queb aran quixpatzˈ cue: ―¿Aniheb aˈin li tikibanbileb riqˈuin saki akˈ? ut ¿Bar xeˈchal chak? ¹⁴ Ut la̱in quinchakˈoc ut quinye re: ―Ka̱cuaˈ, la̱at nacatnaˈoc re. Ut aˈan quixye cue: ―Aˈaneb aˈin li xeˈcuyuc chak xnumsinquil li nimla raylal xeˈxcˈul. Aˈaneb li cuybil sachbil lix ma̱queb xban nak quihoyeˈ xquiqˈuel li Jun li chanchan carner nak quicam saˈ xcˈabaˈeb. ¹⁵ Joˈcan ut nak cuanqueb chiru lix lokˈlaj cˈojariba̱l li Dios ut nequeˈcˈanjelac chiru chi kˈek chi cutan saˈ lix templo. Ut li cˈojcˈo saˈ lix lokˈlaj cˈojariba̱l, aˈan ta̱ilok reheb xban nak aˈan cua̱nk riqˈuineb. ¹⁶ Incˈaˈ chic teˈtzˈoca̱k chi moco ta̱chakik reheb. Incˈaˈ chic teˈxcˈul xtikcual li sakˈe chi moco teˈlubk xban tik. ¹⁷ Ut li Jun li chanchan carner li cˈojcˈo aran saˈ xyiheb li cˈojariba̱l, aˈan ta̱ilok reheb joˈ jun li cha̱bil pastor narileb lix carner. Ut aˈan ta̱qˈuehok re lix yuˈameb chi junelic. Incˈaˈ chic teˈya̱bak xban nak li Dios ta̱cˈojoba̱nk xchˈo̱leb.―

Nak quiteheˈ li xcuuk li sello

8  Nak quixte li xcuuk sello li Jun li chanchan carner, ma̱ ani chic qui‑ecˈan saˈ choxa. Mero o̱r na chˈanamil queˈcana. ² Ut quicuil cuukub li ángel xakxo̱queb chiru li Dios. Ut queˈqˈueheˈ cuukub li trompeta reheb. ³ Quichal jun chic li ángel ut quixakli chiru li artal yi̱banbil riqˈuin oro. Cuan chak saˈ rukˈ jun xnaˈaj li incienso yi̱banbil riqˈuin oro. Quiqˈueheˈ nabal li incienso re, re tixcˈat saˈ li artal li cuan chiru li cˈojariba̱l, re nak cuotz ta̱cuulak toj riqˈuin li Ka̱cuaˈ rochben lix tijeb laj pa̱banel. ⁴ Ut lix sibel li incienso li cuan saˈ rukˈ li ángel quicuulac riqˈuin li Dios rochben lix tijeb laj pa̱banel. ⁵ Ut li ángel quixchap li xnaˈaj li incienso ut quixnujobresi riqˈuin li ru xam li cuan saˈ li artal, ut quixcut saˈ ruchichˈochˈ. Nak quitˈaneˈ saˈ ruchichˈochˈ naquililnac joˈ nak namok li ca̱k, ut nareploc li rakˈ ca̱k ut quicuan ajcuiˈ hi̱c.

Li trompetas

⁶ Ut eb li cuukub chi ángel queˈxcauresi ribeb chixya̱basinquil li cuukub chi trompeta li cuan riqˈuineb. ⁷ Li xbe̱n ángel quixya̱basi lix trompeta. Ut quicuteˈ saˈ ruchichˈochˈ sakbach ut xam junajinbil riqˈuin quicˈ. Caˈchˈin chic ma̱ jun jachal (1ˈ3) li ruchichˈochˈ quicˈat. Ut queˈcˈat ajcuiˈ li cheˈ. Caˈchˈin chic ma̱ jun jachal li cheˈ queˈcˈat ut quicˈat chixjunil li rax pim. ⁸ Ut li xcab ángel quixya̱basi lix trompeta. Chanchan jun li nimla tzu̱l yo̱ chi cˈatc ut quicuteˈ saˈ li palau. Caˈchˈin chic ma̱ jun jachal li palau quisukˈi chokˈ quicˈ. ⁹ Ut caˈchˈin chic ma̱ jun jachal li xul li cuanqueb saˈ li palau quilajeˈcam. Ut caˈchˈin chic ma̱ yijach li ni̱nki jucub queˈsacheˈ. ¹⁰ Ut li rox ángel quixya̱basi lix trompeta ut jun nimla chahim quitˈaneˈ chak saˈ choxa. Yo̱ chi cˈatc. Chanchan jun li chaj yo̱ xxamlel. Caˈchˈin chic ma̱ yijach li nimaˈ ut caˈchˈin chic ma̱ yijach li yuˈam haˈ li quinak cuiˈ. ¹¹ Li chahim aˈan, Cˈa xcˈabaˈ. Caˈchˈin chic ma̱ yijach li haˈ quicˈahoˈ ut nabaleb li tenamit queˈcam xban nak queˈrucˈ li cˈahil haˈ. ¹² Ut li xca̱ ángel quixya̱basi li trompeta ut caˈchˈin chic ma̱ yijach (1ˈ3) li sakˈe incˈaˈ chic quicutanoˈ ru. Ut caˈchˈin chic ma̱ yijach li po incˈaˈ chic quicutanoˈ ru. Ut caˈchˈin chic ma̱ yijach li chahim incˈaˈ chic queˈlemtzˈun. Caˈchˈin chic ma̱ yijach li cutan quikˈojyi̱noˈ ru. Ut joˈcan ajcuiˈ li po chiru li kˈojyi̱n. Caˈchˈin chic ma̱ yijach li kˈojyi̱n incˈaˈ quicutanoˈ ru. ¹³ Ut quicuil jun chanchan nimla cˈuch yo̱ chi rupupic chiru choxa, ut yo̱ chixjapbal re chixyebal: ―Cˈajoˈ li raylal, cˈajoˈ li raylal. Cˈajoˈ li raylal li ta̱cha̱lk saˈ xbe̱neb li cuanqueb saˈ ruchichˈochˈ nak teˈya̱basi̱k li oxib chic chi trompeta xbaneb li oxib chi ángel, chan.

9  Ut li roˈ ángel quixya̱basi lix trompeta ut quicuil nak jun li chahim quitˈaneˈ chak saˈ choxa ut quinak saˈ ruchichˈochˈ. Ut quiqˈueheˈ re li chahim lix lacuil li chamal jul nak quicuil. ² Nak quixte li re li chamal jul, cˈajoˈ li sib qui‑el chak. Chanchan li sib li na‑el saˈ junak nimla horno. Quikˈojyi̱noˈ ru li sakˈe ut li ikˈ xban li sib li qui‑el chak saˈ li chamal jul. ³ Saˈ li sib aˈan queˈel chak nabaleb li xul chanchaneb laj sa̱cˈ ut queˈxjeqˈui ribeb saˈ ruchichˈochˈ. Queˈqˈueheˈ xcuanquil re nak teˈtiˈok. Lix may li teˈxtiu, aˈan chanchan xmay li nequeˈxtiu laj xo̱cˈ. ⁴ Queˈyeheˈ reheb nak incˈaˈ teˈxchˈeˈ li pim chi moco li acui̱mk saˈ ruchichˈochˈ, chi moco junak cheˈ. Caˈaj cuiˈ eb li cristian li ma̱cˈaˈ retalileb saˈ xpe̱quemeb xban li Dios, caˈaj cuiˈ eb aˈan li teˈtiˈekˈ. ⁵ Ut queˈyeheˈ ajcuiˈ reheb nak incˈaˈ teˈxcamsi li cristian. Caˈaj cuiˈ teˈxrahobtesiheb chiru o̱b po. Ut lix rahil li teˈxtiu li xul aˈan, chanchan xmay naxtiu laj xo̱cˈ. ⁶ Saˈ eb li cutan aˈan, eb li cristian teˈxsicˈ raj xcamiqueb xban li raylal yo̱keb chixcˈulbal. Teˈxra raj ru ca̱mc, abanan incˈaˈ teˈca̱mk. ⁷ Eb laj sa̱cˈ chanchaneb li cacua̱y ac cauresinbileb chi pletic. Chanchan cuanqueb xcorona yi̱banbil riqˈuin oro saˈ xjolomeb. Ut li riloba̱leb chanchan riloba̱leb cui̱nk. ⁸ Li rismal xjolomeb chanchan rismal xjolomeb ixk ut li ruch reheb, chanchan ruch reheb cakcoj. ⁹ Chanchan chˈi̱chˈ cuan chire xchˈo̱leb re xcolbaleb rib. Ut lix xiqˈueb nequeˈecˈan joˈ nequeˈecˈan qˈuila carruaje quelonbil xban cacua̱y nak ac yo̱queb chi xic chi pletic. ¹⁰ Eb li xul aˈan cuanqueb xmay saˈ ruˈujeb xye. Ut riqˈuin lix ye nequeˈtiˈoc joˈ laj xo̱cˈ. Ut riqˈuineb lix ye teˈxrahobtesiheb li tenamit chiru o̱b po. ¹¹ Cuan jun li nataklan saˈ xbe̱neb. Aˈan li ángel li kˈaxal nim xcuanquil chi takla̱nc saˈ li chamal jul. Aj Abadón xcˈabaˈ saˈ li a̱tinoba̱l hebreo, ut saˈ griego aj Apolión xcˈabaˈ. (Chi jalbil ru li cˈabaˈej aˈin naraj naxye “aj sachonel”.) ¹² Aˈin li xbe̱n raylal li quicˈulman nak quicuil. Abanan toj cuan cuib chic li raylal li teˈcha̱lk saˈ xbe̱neb li tenamit. ¹³ Li xcuak ángel quixya̱basi lix trompeta ut quicuabi jun xya̱b cux quia̱tinac chak saˈ xya̱nkeb li ca̱hib chi xucub li cuanqueb saˈ xca̱ xucu̱til li artal li yi̱banbil riqˈuin oro, li cuan chiru li Dios. ¹⁴ Quixye re li xcuak ángel li cuan xtrompeta riqˈuin: ―Hiteb li ca̱hib chi ángel li bacˈbo̱queb chire li nimaˈ Eufrates, chan. ¹⁵ Queˈachˈaba̱c li ca̱hib chi ángel li ac xakabanbileb re li ho̱nal aˈan ut re li cutan aˈan ut re li po aˈan ut re li chihab aˈan re nak teˈxic xcamsinquileb nabaleb li cristian. Caˈchˈin chic ma̱ yijach li cristian li teˈcamsi̱k. ¹⁶ La̱in quicuabi joˈ qˈuialeb li soldado li teˈxic chi pletic chirix cacua̱y. Cuib ciento millón (200,000,000) lix qˈuialeb. ¹⁷ Joˈcaˈin nak queˈcuil saˈ li visión eb li cacua̱y ut eb li yo̱queb chi xic chirix. Eb li yo̱queb chi xic chirix li cacua̱y cuanqueb xcolbal li re xchˈo̱leb. Chanchan xcakal li xam, chanchan xraxil li cha̱bil pec zafiro ut chanchan xkˈanal li azufre. Lix jolomeb li cacua̱y chanchan lix jolomeb li cakcoj. Ut saˈ reheb yo̱ chi e̱lc xam, sib ut azufre. ¹⁸ Xban li oxib chi raylal aˈin caˈchˈin chic ma̱ yijach li cristian queˈcamsi̱c. Nabaleb li cristian queˈcamsi̱c xban li xam, li sib ut li azufre li qui‑el chak saˈ reheb li cacua̱y. ¹⁹ Saˈ reheb cuanqueb xmay ut cuanqueb ajcuiˈ saˈ ruˈujeb xye. Lix yeheb chanchan xjolomeb li cˈantiˈ ut riqˈuin aˈan nequeˈxrahobtesiheb li cristian. ²⁰ Ut li joˈ qˈuial chic li cristian li incˈaˈ queˈcamsi̱c xban li raylal aˈan incˈaˈ ajcuiˈ queˈyotˈeˈ xchˈo̱leb ut incˈaˈ queˈxcanab xba̱nunquil li ma̱usilal. Incˈaˈ queˈxcanab xlokˈoninquil li ma̱us aj musikˈej chi moco queˈxcanab xlokˈoninquileb li jalanil dios yi̱banbil riqˈuin oro, plata, kˈan chˈi̱chˈ bronce joˈ ajcuiˈ riqˈuin pec ut cheˈ. Incˈaˈ queˈxcanab xlokˈoninquileb li yi̱banbil dios aˈin, li incˈaˈ nequeˈiloc, chi moco nequeˈabin, chi moco nequeˈbe̱c. ²¹ Incˈaˈ queˈxjal xcˈaˈuxeb chi moco queˈyotˈeˈ xchˈo̱leb xban nak incˈaˈ queˈxcanab xcamsinquil ras ri̱tzˈineb ut incˈaˈ queˈxcanab li tu̱lac, chi moco queˈxcanab li coˈbe̱tac yumbe̱tac ut incˈaˈ ajcuiˈ queˈxcanab li elkˈac.

Li chˈina botbil hu li cuan riqˈuin li ángel

10  Quicuil nak quichal jun chic li ángel cau rib. Yo̱ chak chi cubec saˈ choxa sutsu saˈ chok. Ut lix jolom sutsu xban jun li xo̱quikˈab. Li riloba̱l nalemtzˈun joˈ li sakˈe ut li rok chanchan jun okech yo̱ xxamlel. ² Cuan chak saˈ rukˈ jun li chˈina hu teto. Lix nim ok quixxakab saˈ xbe̱n li palau ut lix tzˈe ok quixxakab saˈ xbe̱n li ruchichˈochˈ. ³ Ut quixjap re chi cau xya̱b xcux chanchan nak naxjap re li cakcoj. Ut qui‑abi̱c cuukub xya̱b cux chanchan ca̱k nak queˈecˈan. ⁴ Oc raj cue chixtzˈi̱banquil retalil li cˈaˈru queˈxye li chanchan cuukub chi ca̱k. Abanan quicuabi jun quia̱tinac saˈ choxa ut quixye cue: ―Ma̱tzˈi̱ba li cˈaˈru xeˈxye li cuukub chi xya̱b cux chanchan ca̱k. Li cˈaˈru xacuabi ma̱ bar ta̱ye resil. Xocxo̱k ban saˈ a̱chˈo̱l, chan. ⁵ Ut li ángel li quicuil xakxo saˈ xbe̱n li palau ut saˈ xbe̱n li ruchichˈochˈ, quixtaksi lix nim ukˈ, ⁶ ut quixba̱nu li juramento saˈ xcˈabaˈ li Jun li yoˈyo chi junelic, li quiyoˈobtesin re li choxa joˈ ajcuiˈ li ruchichˈochˈ ut chixjunil li cuan chiru, joˈ ajcuiˈ li palau ut chixjunil li cuan chi saˈ. Quixye nak ac xcuulac xkˈehil. Incˈaˈ chic ta̱ba̱yk. ⁷ Nak tixya̱basi lix trompeta li xcuuk ángel, saˈ eb li cutan aˈan ta̱tzˈaklok ru lix cˈaˈux li Dios, li mukmu nak quicuan. Ta̱tzˈaklok ru joˈ quixye reheb li profeta li queˈcˈanjelac chiru, chan. ⁸ Ut li jun li quia̱tinac cuiqˈuin saˈ choxa, quixye cuiˈchic cue: ―Ayu. Cˈul li hu li teto, li cuan saˈ rukˈ li ángel, li xakxo saˈ xbe̱n li palau ut saˈ xbe̱n li ruchichˈochˈ.― ⁹ La̱in co̱in riqˈuin li ángel ut quinye re nak tixqˈue cue li chˈina hu. Ut aˈan quixye cue: ―Cueˈ. Chap li hu ut ta̱nukˈ. Saˈ a̱cue quiˈak joˈ xquiˈal lix yaˈal cab, abanan cˈahak saˈ la̱ saˈ, chan cue. ¹⁰ Quincˈul li chˈina hu saˈ rukˈ li ángel ut quinnukˈ. Nak cuan saˈ cue chanchan xquiˈal li xyaˈal cab. Ut nak ac xinnukˈ quicˈahoˈ saˈ lin saˈ xban. ¹¹ Quixye cue: ―Tenebanbil saˈ a̱be̱n la̱at xyebal resil li cˈaˈru ta̱cˈulma̱nk. Toj ta̱ye cuiˈchic resil cˈaˈru teˈxcˈul eb li tenamit, joˈ ajcuiˈ li xni̱nkal ru tenamit joˈ ajcuiˈ lix reyeb. Ta̱ye ajcuiˈ resil li cˈaˈru teˈxcˈul saˈ eb li tenamit li jalan jala̱nk ra̱tinoba̱leb.

Li cuib chi cui̱nk li teˈyehok resil li cˈaˈru ta̱cˈulma̱nk

11  Ut quiqˈueheˈ cue jun li cheˈ re bisoc ut quiyeheˈ cue: ―Ayu, bis chak lix templo li Dios joˈ ajcuiˈ li artal ut ta̱cuajlaheb jarubeb li cristian li nequeˈlokˈonin aran. ² Abanan ma̱bis li neba̱l li cuan chiru lix templo li Dios xban nak aˈan kˈaxtesinbil reheb li ma̱cuaˈeb aj judío. Eb aˈan teˈxmux ru li santil tenamit chiru oxib chihab riqˈuin media (42 po). ³ La̱in tintaklaheb cuib aj cˈanjel chicuu. Cua̱nk rakˈeb chirix kˈes ru retalil li rahil chˈo̱lej. Eb aˈan teˈxye cuesilal chiru oxib chihab riqˈuin cuakib po.― ⁴ Chiru li Ka̱cuaˈ li cuib chi cui̱nk aˈin chanchanakeb li cuib chi cheˈ olivo ut chanchanakeb li cuib chi candelero li cuanqueb chiru li Dios, laj e̱chal re li ruchichˈochˈ. ⁵ Ut cui ani ta̱ajok xrahobtesinquileb, chanchan xam li ta̱e̱lk saˈ reheb li cuib chi cui̱nk xban nak yal riqˈuin li ra̱tineb teˈca̱mk li xicˈ nequeˈiloc reheb. Joˈcaˈin nak teˈca̱mk li ani teˈajok re xrahobtesinquileb li cuib chi cui̱nk aˈin. ⁶ Eb li cuib chi cui̱nk aˈin qˈuebileb xcuanquil chixba̱nunquil re nak incˈaˈ tixqˈue li hab chiruheb li cutan nak yo̱keb chixyebal li cˈaˈru ta̱cˈulma̱nk. Ut cuanqueb xcuanquil re xsukˈisinquil li haˈ chokˈ quicˈ ut cuanqueb ajcuiˈ xcuanquil re xrahobtesinquileb li cuanqueb saˈ ruchichˈochˈ riqˈuin chixjunil li raylal aˈ yal jarub sut teˈraj xba̱nunquil. ⁷ Nak acak xeˈrakeˈ xyebal resilal li cˈaˈru ta̱cˈulma̱nk, jun li chanchan joskˈ aj xul ta̱e̱lk chak saˈ li chamal jul ut ta̱pletik riqˈuineb aˈan. Ta̱numta̱k saˈ xbe̱neb toj retal tixcamsiheb. ⁸ Li camenak teˈcana̱k chi tˈantˈo saˈ eb li be re li nimla tenamit bar quicamsi̱c cuiˈ chiru cruz li Ka̱cuaˈ Jesucristo. Cuan nak nequeˈxjuntakˈe̱ta li tenamit aˈan riqˈuineb li tenamit Sodoma ut Egipto xban li ma̱usilal queˈxba̱nu. ⁹ Oxib cutan riqˈuin jun cuaˈleb teˈcua̱nk aran chi tˈantˈo li camenak ut incˈaˈ teˈqˈuehekˈ chi mukecˈ. Ut yalak ani teˈilok reheb, aˈ yal ani xte̱paleb lix xeˈto̱nil yucuaˈeb, ut aˈ yal bar xtenamiteb, ut aˈ yal chanru li ra̱tinoba̱leb. ¹⁰ Ut li cuanqueb saˈ ruchichˈochˈ ta̱sahokˈ saˈ xchˈo̱leb nak teˈca̱mk li cuib chi cui̱nk ut ta̱cˈojla̱k xchˈo̱leb. Joˈcan nak teˈoc chixsihinquil cˈaˈru reheb chi ribileb rib. Ta̱sahokˈ xchˈo̱leb nak teˈca̱mk li cuib chi cui̱nk xban nak chˈaˈaj queˈrecˈa nak queˈyeheˈ reheb nak ta̱cha̱lk raylal saˈ xbe̱neb. ¹¹ Ut quicuil ajcuiˈ nak ac xnumeˈ li oxib cutan riqˈuin jun cuaˈleb, queˈyoˈobtesi̱c cuiˈchic li cuib chi cui̱nk xban li Dios ut queˈxakli cuiˈchic chi yoˈyo chiruheb li tenamit. Ut cˈajoˈ nak qui‑oc xxiuheb li queˈiloc reheb. ¹² Ut li cuib chi cui̱nk queˈrabi jun yo̱ chi a̱tinac saˈ choxa. Chi cau xya̱b xcux quixye reheb: ―Takenkex chak arin, chan. Ut queˈtakeˈ saˈ choxa saˈ jun li chok chiruheb li xicˈ nequeˈiloc reheb. ¹³ Ut saˈ li ho̱nal aˈan quicuan jun nimla hi̱c ut li xlaje jachalal li tenamit qui‑ukˈeˈ. Cuukub mil (7,000) xqˈuial li cristian queˈcam xban li hi̱c. Ut li joˈ qˈuial chic incˈaˈ queˈcam, queˈxucuac ut queˈxqˈue xlokˈal li Dios cuan saˈ choxa. ¹⁴ Aˈin li xcab li raylal ac xnumeˈ. Abanan toj cuan jun chic li raylal ta̱cha̱lk chi se̱b saˈ xbe̱neb.

Nak quiya̱basi̱c li xcuuk li trompeta

¹⁵ Ut li xcuuk ángel quixya̱basi lix trompeta. Ut qui‑abi̱c nabal li xya̱b cux saˈ choxa. Yo̱queb chixyebal chi cau: ―Anakcuan teˈcana̱k rubel xcuanquil li Ka̱cuaˈ chixjunileb li cuanqueb saˈ ruchichˈochˈ. Aˈ chic li Ka̱cuaˈ Dios ut li Cristo teˈtakla̱nk saˈ xbe̱neb chixjunileb chi junelic kˈe cutan, chanqueb. ¹⁶ Ut eb li ca̱hib xcaˈcˈa̱l li cˈojcˈo̱queb saˈ lix cˈojariba̱l queˈxcuikˈib ribeb ut queˈxlokˈoni li Dios. ¹⁷ Ut queˈxye: ―At Ka̱cuaˈ, at nimajcual Dios, nocobantioxin cha̱cuu. La̱at li ac cuancat ajcuiˈ chak junxil ut cuancat anakcuan ut cua̱nkat chi junelic. La̱at cuan a̱cuanquil chi junelic ut la̱at chic tattakla̱nk saˈ xbe̱neb chixjunileb li cuanqueb saˈ ruchichˈochˈ. ¹⁸ Cˈajoˈ nak queˈjoskˈoˈ li tenamit li xicˈ nequeˈiloc a̱cue. Abanan xcuulac xkˈehil nak ta̱cˈut la̱ joskˈil chiruheb. Xcuulac xkˈehil nak tatrakok a̱tin saˈ xbe̱neb li camenak. Ut ta̱qˈueheb xkˈajca̱munquileb laj cˈanjel cha̱cuu li queˈyehoc resil li cˈaˈru ta̱cˈulma̱nk. Ut ta̱qˈueheb ajcuiˈ xkˈajca̱munquileb laj pa̱banel li queˈqˈuehoc a̱lokˈal, usta cuanqueb xcuanquil usta ma̱cˈaˈ. Ut la̱at ta̱sach ruheb li queˈba̱nun raylal reheb li cuanqueb saˈ ruchichˈochˈ, chanqueb. ¹⁹ Ut quicuil nak quiteheˈ lix templo li Dios cuan saˈ choxa. Ut quicˈutun li Lokˈlaj Ca̱x li cuan cuiˈ li contrato saˈ lix templo li Dios. Nareploc li rakˈ ca̱k ut nabal li choki̱nc. Quicuan jun li hi̱c ut nabal li sakbach quitˈaneˈ nak quicuil.