Chronological

Lix camic laj Juan laj Cubsihom Haˈ

14  Saˈ eb li cutan aˈan laj Herodes li acuabej quirabi resil li cˈaˈru yo̱ chixba̱nunquil li Jesús. ² Ut aˈan quixye reheb laj cˈanjel chiru: ―Aˈan tana laj Juan laj Cubsihom Haˈ. Aˈan xcuacli cuiˈchic chi yoˈyo saˈ xya̱nkeb li camenak. Joˈcan nak cuan xcuanquil chixba̱nunquil li milagros, chan. ³ Ac junxil laj Herodes quixtakla xchapbal laj Juan. Queˈxbacˈ riqˈuin cadena ut queˈxqˈue saˈ tzˈalam. Laj Herodes quixba̱nu chi joˈcan yal xban nak joˈcan quiraj lix Herodías. Lix Herodías aˈan li rixakil laj Felipe li ri̱tzˈin laj Herodes. Ut laj Herodes quixcˈam chokˈ rixakil. ⁴ Toj ma̱jiˈ naqˈueheˈ saˈ tzˈalam laj Juan laj Cubsihom Haˈ nak quixye re laj Herodes chi joˈcaˈin: ―Nimla ma̱c xaba̱nu nak xacˈam chokˈ a̱cuixakil lix Herodías, chan laj Juan re. ⁵ Joˈcan nak laj Herodes quiraj raj xcamsinquil, aban quixucuac chiruheb li qˈuila tenamit xban nak laj Juan profeta nak cuan chiruheb aˈan. ⁶ Ut saˈ xninkˈeinquil lix chihab laj Herodes, lix coˈ lix Herodías quixajoc chiruheb chixjunileb li ulaˈ. Ut cˈajoˈ nak quicuulac chiru laj Herodes. ⁷ Joˈcan nak laj Herodes quixyechiˈi re riqˈuin juramento nak tixqˈue re chixjunil li cˈaˈru tixpatzˈ. ⁸ Ut li xkaˈal chi ac tacchiˈinbil xban lix naˈ, quixye re laj Herodes: ―Qˈue cue arin saˈ plato lix jolom laj Juan laj Cubsihom Haˈ, chan. ⁹ Ma̱ caˈchˈin nak quirahoˈ xchˈo̱l laj Herodes chirabinquil li quixye. Aban xban li juramento li ac quixye chiruheb li cuanqueb saˈ me̱x rochben, quixtakla xqˈuebal re li xkaˈal li cˈaˈru quixpatzˈ. ¹⁰ Quixtakla xchˈotbal xcux laj Juan aran saˈ tzˈalam. ¹¹ Ut queˈxcˈam chak lix jolom laj Juan saˈ jun plato ut quikˈaxtesi̱c re li xkaˈal. Ut li xkaˈal quixqˈue re lix naˈ. ¹² Nak queˈrabi resil lix camic laj Juan, eb lix tzolom queˈcuulac chixcˈambal li camenak ut coxeˈxmuk. Ut coxeˈxye chak resil re li Jesús.

Li Jesús quixqˈueheb chi cuaˈac li o̱b mil chi cui̱nk

¹³ Nak quirabi resil li quicˈulman, li Jesús qui‑el aran. Qui‑oc saˈ jun li jucub ut co̱ saˈ jun naˈajej cuan xjunes. Ut nak queˈxqˈue retal li tenamit nak co̱, queˈel chak saˈ lix tenamiteb ut queˈco̱eb chi rokeb saˈ a̱nil bar co̱ cuiˈ li Jesús. ¹⁴ Ut li Jesús nak qui‑el saˈ li jucub, quiril li qˈuila tenamit li ac queˈcuulac xbe̱n cua chiru aˈan. Ut quixtokˈoba ruheb ut quixqˈuirtesiheb li yaj cuanqueb saˈ xya̱nkeb. ¹⁵ Ut nak qui‑ecuu, queˈcuulac lix tzolom riqˈuin li Jesús ut queˈxye re: ―Yo̱ chi ecuu̱c ut ma̱cˈaˈ cuan arin cuanco cuiˈ. Joˈcan nak ta̱taklaheb li qˈuila tenamit chixlokˈbal lix cua saˈ eb li cocˈ tenamit.― ¹⁶ Li Jesús quixye reheb: ―Moco tento ta nak teˈxic eb aˈan. Qˈuehomak xcuaheb la̱ex.― ¹⁷ Ut eb aˈan queˈxye: ―Ma̱cˈaˈ cuan ke la̱o arin, caˈaj cuiˈ o̱b chi caxlan cua ut cuib chi car.― ¹⁸ Li Jesús quixye reheb: ―Cˈamomak chak cuiqˈuin.― ¹⁹ Ut nak ac xtaklaheb li qˈuila tenamit chi cˈojla̱c saˈ li pachˈayaˈ, quixchap li o̱b chi caxlan cua ut li cuib chi car, qui‑iloc takecˈ ut quixbantioxi chiru li Dios. Ut quixjachi ut quixqˈue li caxlan cua reheb lix tzolom ut queˈxjeqˈui reheb li qˈuila tenamit. ²⁰ Ut queˈcuaˈac chixjunileb toj retal queˈcˈojla xchˈo̱leb. Ut queˈxxoc li joˈ qˈuial qui‑elaˈan. Cablaju chacach nujenak li relaˈ qui‑elaˈan. ²¹ Eb li queˈcuaˈac cuanqueb o̱b mil chi cui̱nk chi incˈaˈ qˈuebileb saˈ ajl li ixk ut eb li cocˈal.

Li Jesús quibe̱c chiru li palau

²² Tojoˈnak li Jesús quixtaklaheb lix tzolom chi oc saˈ li jucub re nak aˈaneb xbe̱n cua teˈxic jun pacˈal li palau roybeninquil nak tixchakˈrabiheb li qˈuila tenamit. ²³ Ut nak ac xchakˈrabiheb li tenamit, yo̱ chi oc li kˈojyi̱n nak li Jesús co̱ chiru tzu̱l chi tijoc. Ut aran cuan xjunes. ²⁴ Ut li jucub li yo̱queb chi xic cuiˈ lix tzolom ta̱cuulak saˈ xyi li palau, ut lix cau ok li palau cau nocoxquet rib chiru li jucub, xban nak chiru yo̱ chak chi cha̱lc li ikˈ. ²⁵ Sake̱uc re nak quicuulac li Jesús bar cuanqueb cuiˈ ut yo̱ chi be̱c chiru li haˈ. ²⁶ Nak queˈril lix tzolom nak cuan jun yo̱ chi be̱c chiru haˈ, queˈxucuac ut queˈxjap re ut queˈxye: ―Anum aˈan.― ²⁷ Aˈut li Jesús ticto quira̱tinaheb ut quixye reheb: ―Mexxucuac. La̱in li yo̱quex chicuilbal. Cacuubresihomak e̱chˈo̱l, chan reheb. ²⁸ Quichakˈoc laj Pedro ut quixye: ―Ka̱cuaˈ, cui la̱at, ye nak tinxic ajcuiˈ la̱in a̱cuiqˈuin chiru li haˈ.― ²⁹ Li Jesús quixye re: ―Quim.― Ut laj Pedro qui‑el chak saˈ li jucub ut qui‑oc chi be̱c chiru li haˈ re ta̱xic riqˈuin li Jesús. ³⁰ Abanan nak quixqˈue retal li cak‑sut‑ikˈ, quixucuac, ut qui‑oc chi subecˈ saˈ li haˈ ut quixjap re ut quixye: ―¡Ka̱cuaˈ, china̱colak! chan. ³¹ Ut li Jesús saˈ junpa̱t quixyeˈ li rukˈ, quixchap ut quixye re: ―At cui̱nk, incˈaˈ nacatpa̱ban chi tzˈakal. ¿Cˈaˈut nak xacuiba a̱chˈo̱l?― ³² Ut nak queˈoc saˈ li jucub, quichˈana li ikˈ. ³³ Ut eb li cuanqueb saˈ li jucub queˈxcuikˈib rib chiru li Jesús ut queˈxlokˈoni ut queˈxye re: ―Relic chi ya̱l nak la̱at li Ralal li Dios, chanqueb re.

Li Jesús quixqˈuirtesi li yaj aran Genesaret

³⁴ Nak quicuulac li Jesús rochbeneb lix tzolom jun pacˈal li palau, coxeˈel saˈ li naˈajej Genesaret. ³⁵ Eb li cui̱nk cuanqueb aran ticto queˈxqˈue retal nak aˈan li Jesús ut queˈxye resil saˈ chixjunil li naˈajej aˈan. Ut quilajeˈxcˈam li yaj riqˈuin re nak tixqˈuirtesiheb. ³⁶ Ut queˈxtzˈa̱ma chiru nak tixcanabeb li yaj chixchˈeˈbal li rakˈ. Ut chixjunileb li queˈchˈeˈoc re li rakˈ quilajeˈqˈuira.

Li Jesús quitzˈekta̱na̱c aran Nazaret

6  Li Jesús qui‑el saˈ li naˈajej aˈan ut co̱ saˈ lix tenamit rochbeneb lix tzolom. ² Saˈ li hiloba̱l cutan co̱ saˈ li cab li nequeˈxchˈutub cuiˈ ribeb laj judío. Qui‑oc chixtzolbaleb li tenamit. Nabal queˈabin re ut quilajeˈsach xchˈo̱l chirabinquil ut queˈxye chi ribileb rib: ―¿Bar xtzol lix naˈleb? ¿Cˈaˈru chi naˈlebil li naxnau? ¿Chanru nak naxba̱nu li milagro? chanqueb. ³ ―¿Ma ma̱cuaˈ ta biˈ aˈin laj pechˈ? Ut ¿ma̱cuaˈ ta biˈ lix María lix naˈ? ¿Ma ma̱cuaˈ ta biˈ laj Jacobo li ri̱tzˈin ut laj José, laj Judas ut laj Simón? ¿Ma ma̱cuaˈ ta biˈ aˈin eb li ri̱tzˈin li cuanqueb saˈ kaya̱nk? chanqueb. Ut queˈchal xjoskˈil saˈ xbe̱n. ⁴ Ut li Jesús quixye: ―Junak profeta naqˈueheˈ xlokˈal yalak bar, abanan saˈ lix tenamit ut saˈ xya̱nkeb li rechˈalal ut saˈ rochoch incˈaˈ naqˈueheˈ xlokˈal.― ⁵ Ut incˈaˈ quiru quixba̱nu li milagro saˈ lix tenamit xban nak incˈaˈ queˈxpa̱b nak cuan xcuanquil. Cuib oxib ajcuiˈ li yaj quixqˈue li rukˈ saˈ xbe̱neb re nak teˈqˈuira̱k. ⁶ Ut li Jesús quisach xchˈo̱l chirilbaleb nak incˈaˈ nequeˈxpa̱b nak cuan xcuanquil. Ut nak qui‑el aran, co̱ saˈ chixjunil li cˈaleba̱l chixtzolbaleb li tenamit.

Li Jesús quixtaklaheb lix tzolom chixyebal resil li colba‑ib

⁷ Tojoˈnak quixbokeb lix tzolom cablaju ut quixtaklaheb chi caˈcabil ut quixqˈueheb xcuanquil chirisinquil li ma̱us aj musikˈej. ⁸ Ut quixye reheb: ―Ma̱cˈaˈ cˈaˈru te̱cˈam nak texxic, caˈaj cuiˈ le̱ xukˈ. Incˈaˈ te̱cˈam e̱tzacae̱mk, chi moco junak bo̱ls, chi moco tumin te̱cˈam. ⁹ Caˈaj cuiˈ le̱ xa̱b cuan che̱rok te̱cˈam ut caˈaj cuiˈ le̱ rakˈ cuan che̱rix te̱cˈam. ¹⁰ Ut quixye ajcuiˈ reheb: ―Nak texcuulak saˈ junak tenamit, saˈ li cab tex‑oc cuiˈ chi hila̱nc, aran texcana̱k ut incˈaˈ yal yo̱kex chixjalbal e̱naˈaj. Nak ac xic e̱re saˈ jalan chic tenamit, tojoˈnak te̱jal le̱ naˈaj. ¹¹ Cui texcuulak saˈ junak naˈajej bar cuiˈ incˈaˈ texcˈulekˈ chi moco teˈraj rabinquil le̱ ra̱tin, nak tex‑e̱lk riqˈuineb te̱chikˈ li poks che̱rok joˈ retalil li raylal teˈxcˈul. Relic chi ya̱l ninye e̱re nak kˈaxal cuiˈchic li raylal teˈxcˈul chiruheb laj Sodoma ut laj Gomorra saˈ xkˈehil li rakba a̱tin, chan. ¹² Joˈcan nak queˈco̱eb lix tzolom li Jesús ut queˈxchˈolob xya̱lal chiruheb li tenamit re nak teˈxyotˈ xchˈo̱l ut teˈxjal xcˈaˈuxeb. ¹³ Queˈrisi nabal li ma̱us aj musikˈej riqˈuineb ut queˈxqˈue li aceite saˈ xjolomeb li yaj joˈ retalil xcuanquil li Dios ut queˈxqˈuirtesiheb.

Nak queˈxcamsi laj Juan laj Cubsihom Haˈ

¹⁴ Li tenamit yo̱queb chixserakˈinquil li milagro yo̱ chixba̱nunquil li Jesús. Nak quirabi aˈan, li rey Herodes quixye: ―Aˈan laj Juan laj Cubsihom Haˈ. Xcuacli cuiˈchic chi yoˈyo saˈ xya̱nkeb li camenak. Joˈcan nak cuan xcuanquil chixba̱nunquil li milagro, chan. ¹⁵ Ut cuan queˈyehoc re nak aˈan li profeta Elías. Ut cuan ajcuiˈ queˈyehoc re nak aˈan jun li profeta joˈ li profeta queˈcuan najter. ¹⁶ Ut nak quirabi aˈan, laj Herodes quixye: ―Aˈan laj Juan li quintakla xchˈotbal xcux. Aˈan xcuacli chi yoˈyo saˈ xya̱nkeb li camenak, chan. ¹⁷ Quixye chi joˈcan xban nak aˈan quitaklan re xchapbal laj Juan. Queˈxbacˈ ut queˈxqˈue saˈ tzˈalam. Quixba̱nu chi joˈcan xban nak joˈcan quiraj lix Herodías. Lix Herodías aˈan rixakil laj Felipe, ri̱tzˈin laj Herodes ut laj Herodes quixcˈam chokˈ rixakil. ¹⁸ Nak toj ma̱jiˈ naqˈueheˈ saˈ tzˈalam, laj Juan laj Cubsihom Haˈ quixye re laj Herodes: ―Nimla ma̱c xaba̱nu nak xacˈam chokˈ a̱cuixakil lix Herodías xban nak ac sumsu riqˈuin la̱ cui̱tzˈin, laj Felipe, chan re. ¹⁹ Riqˈuin aˈan ma̱ caˈchˈin nak quijoskˈoˈ lix Herodías saˈ xbe̱n laj Juan ut quiraj raj xcamsinquil. Abanan incˈaˈ naru xban nak laj Herodes incˈaˈ quixcanab chixcamsinquil. ²⁰ Laj Herodes naxnau nak laj Juan ti̱c xchˈo̱l ut santil cui̱nk. Joˈcan nak naxucuac ut incˈaˈ naraj nak ta̱camsi̱k. Quicuulac chiru rabinquil li quixye laj Juan usta cˈajoˈ nak naqˈueheˈ chi cˈoxlac xban li a̱tin nayeheˈ re. ²¹ Abanan lix Herodías quixtau chanru nak naru xcamsinquil laj Juan. Joˈcaˈin quicˈulman. Nak laj Herodes quixninkˈei lix chihab, quixbokeb chi cuaˈac li ni̱nkeb xcuanquil saˈ li tenamit, ut quixbokeb ajcuiˈ li nequeˈtaklan reheb li soldado ut joˈcan ajcuiˈ chixjunileb li xni̱nkal ru cui̱nk re Galilea. ²² Lix coˈ lix Herodías qui‑oc bar yo̱queb cuiˈ chi cuaˈac li ulaˈ ut qui‑oc chi xajoc chiruheb. Laj Herodes quicuulac chiru chanru naxajoc. Ut quicuulac ajcuiˈ chiruheb li ulaˈ. Joˈcan nak laj Herodes quixye re li xkaˈal: ―Ta̱tzˈa̱ma cue li cˈaˈru ta̱cuaj ut la̱in tinqˈue a̱cue, chan. ²³ Ut quixye ajcuiˈ re li xkaˈal: ―Saˈ xcˈabaˈ li Dios, tinqˈue a̱cue li cˈaˈru ta̱patzˈ cue. Usta yijach lin jun cablal ta̱patzˈ cue, tinqˈue a̱cue, chan. ²⁴ Ut li xkaˈal co̱ chixpatzˈbal re lix naˈ: ―¿Cˈaˈru us tintzˈa̱ma re? chan. Ut lix naˈ quixye re: ―Tzˈa̱ma re nak tixqˈue a̱cue lix jolom laj Juan laj Cubsihom Haˈ, chan. ²⁵ Saˈ junpa̱t co̱ li xkaˈal riqˈuin laj Herodes ut quixye re: ―La̱in tincuaj nak anakcuan ajcuiˈ ta̱qˈue cue saˈ junak plato lix jolom laj Juan laj Cubsihom Haˈ, chan. ²⁶ Ut laj Herodes cˈajoˈ nak quirahoˈ saˈ xchˈo̱l. Abanan ma̱cˈaˈ chic quiru quixye xban nak chixjunileb li ulaˈ queˈabin re nak quixye saˈ xcˈabaˈ li Dios tixqˈue re li cˈaˈru tixtzˈa̱ma. ²⁷ Laj Herodes ticto quixtakla jun li soldado chixcˈambal chak lix jolom laj Juan. Li soldado co̱ saˈ tzˈalam chixchˈotbal lix cux laj Juan. ²⁸ Ut quixcˈam chak lix jolom saˈ jun li plato. Quixqˈue re li xkaˈal ut li xkaˈal quixkˈaxtesi re lix naˈ. ²⁹ Nak queˈrabi lix tzolom laj Juan nak queˈxcamsi, queˈchal chixcˈambal li camenak ut coxeˈxmuk.

Li Jesús quixqˈueheb chi cuaˈac li o̱b mil chi cui̱nk

³⁰ Ut nak queˈsukˈi chak lix tzolom li Jesús chixba̱nunquil li cˈanjel queˈtakla̱c cuiˈ, coleˈxchˈutub rib riqˈuin li Jesús ut queˈxserakˈi re cˈaˈru quilajeˈxba̱nu chak. Ut queˈxye ajcuiˈ re chanru nak queˈxtzol li tenamit. ³¹ Nequeˈel nequeˈoc li qˈuila tenamit riqˈuin li Jesús. Joˈcan ajcuiˈ riqˈuineb lix tzolom. Ut riqˈuin aˈan incˈaˈ naru nequeˈhilan chi moco naru teˈcuaˈak. Joˈcan nak quixye li Jesús: ―Yoˈkeb saˈ junak naˈajej bar ma̱cˈaˈ cuiˈ tenamit re nak naru tohila̱nk caˈchˈinak kajunes, chan li Jesús. ³² Ut queˈoc saˈ jun li jucub ut queˈco̱eb saˈ jun naˈajej bar cuiˈ teˈhila̱nk raj caˈchˈinak xjuneseb. ³³ Abanan nabaleb queˈiloc re nak yo̱queb chi xic ut queˈxnau nak aˈan li Jesús. Nabal quilajeˈel saˈ li tenamit junju̱nk. Queˈco̱eb chi rokeb saˈ a̱nil ut aˈaneb xbe̱n cua queˈcuulac saˈ li naˈajej bar yo̱ cuiˈ chi xic li Jesús rochbeneb lix tzolom. ³⁴ Ut nak qui‑el li Jesús saˈ li jucub, quirileb li qˈuila tenamit. Quixtokˈoba ruheb xban nak chanchaneb li carner ma̱cˈaˈ aj ilol reheb. Ut nabal li cˈaˈak re ru quixtzoleb cuiˈ. ³⁵ Nak queˈril nak yo̱ chi ecuu̱c, queˈco̱eb lix tzolom riqˈuin li Jesús ut queˈxye re: ―Yo̱ chi ecuu̱c ut arin ma̱cˈaˈ cuan. ³⁶ Ma̱cˈaˈ xcuaheb. Taklaheb chixlokˈbaleb lix cua saˈ eb li cˈaleba̱l ut saˈ eb li cocˈ tenamit li cuanqueb chi nachˈ, chanqueb. ³⁷ Ut nak quichakˈoc li Jesús quixye reheb: ―Qˈuehomakeb chi cuaˈac la̱ex.― Ut eb aˈan queˈxye: ―¿Ma toxic chixlokˈbal cuibak ciento denarios chi caxlan cua chi joˈcanan re teˈkaqˈue chi cuaˈac? chanqueb. ³⁸ Li Jesús quixye: ―¿Jarub li caxlan cua cuan e̱riqˈuin? Ayukex, ilomak chak.― Queˈco̱eb chi rilbal ut nak queˈsukˈi queˈxye re: ―Cuan o̱b li caxlan cua ut cuib li car, chanqueb. ³⁹ Li Jesús quixtaklaheb lix tzolom chixyebal reheb li tenamit nak teˈcˈojla̱k saˈ li pachˈayaˈ chi junju̱nk chˈu̱tal. ⁴⁰ Ut queˈcˈojla chi junju̱nk chˈu̱tal. Cuan queˈcˈojla chi jun ciento saˈ ju̱nk chˈu̱tal ut cuan cuiˈchic queˈcˈojla chi mero ciento saˈ li junju̱nk chˈu̱tal. ⁴¹ Tojoˈnak li Jesús quixchap li o̱b chi caxlan cua ut li cuib chi car ut qui‑iloc saˈ choxa. Quixbantioxi chiru li Dios. Ut quixjachi li caxlan cua ut quixqˈue reheb lix tzolom re nak teˈxjeqˈui reheb li qˈuila tenamit. Ut queˈxjeqˈui ajcuiˈ li car. ⁴² Queˈcuaˈac chixjunileb toj retal queˈcˈojla xchˈo̱l. ⁴³ Ut qui‑elaˈan li caxlan cua. Joˈcan ajcuiˈ li car. Cablaju chacach li qui‑elaˈan. ⁴⁴ Nabal chi tenamit queˈcuaˈac. Saˈ xya̱nkeb li queˈcuaˈac cuanqueb o̱b mil junes cui̱nk.

Li Jesús quibe̱c chiru li palau

⁴⁵ Ut chirix chic aˈan, li Jesús quixtaklaheb lix tzolom saˈ li jucub ut quixye reheb: ―Xbe̱n cua texxic jun pacˈal li palau saˈ li tenamit Betsaida. La̱in toj tincana̱k chixchakˈrabinquileb li tenamit, chan reheb. ⁴⁶ Ut nak ac xchakˈrabiheb li tenamit, li Jesús co̱ chiru tzu̱l chi tijoc. ⁴⁷ Teˈcuulak lix tzolom saˈ xyi li palau nak qui‑oc li kˈojyi̱n, aˈut li Jesús toj cuan xjunes chire li palau. ⁴⁸ Quiril nak lix tzolom cuanqueb saˈ jun chˈaˈajquilal saˈ li jucub. Yo̱queb chixtacuasinquil ribeb chixberesinquil li jucub xban nak saˈ xbe ikˈ yo̱queb chixcˈambal. Sake̱uc re nak quicuulac li Jesús bar cuanqueb cuiˈ ut yo̱ chi be̱c chiru haˈ. Quixba̱nu joˈ li ti̱c ta̱numekˈ. ⁴⁹ Nak queˈril lix tzolom nak cuan jun yo̱ chi be̱c chiru haˈ, queˈxucuac ut queˈxjap re. Queˈxcˈoxla nak anum yo̱queb chirilbal. ⁵⁰ Chixjunileb queˈiloc re ut cˈajoˈ nak queˈxucuac. Li Jesús ticto quira̱tinaheb ut quixye reheb: ―Mexxucuac. La̱in li yo̱quex chicuilbal. Cacuubresihomak e̱chˈo̱l, chan reheb. ⁵¹ Nak qui‑oc saˈ li jucub saˈ xya̱nkeb, chˈanamil li ikˈ. Incˈaˈ chic qui‑ecˈan. Ut eb lix tzolom quilajeˈsach xchˈo̱l chirilbal. ⁵² Queˈsach xchˈo̱l xban nak toj ma̱jiˈ nequeˈxtau xya̱lal chirix li milagro quixba̱nu li Jesús riqˈuin li caxlan cua. Kˈaxal cauheb xchˈo̱l. Joˈcan nak incˈaˈ queˈxtau ru.

Li Jesús quixqˈuirtesiheb li yaj aran Genesaret

⁵³ Nak queˈcuulac li Jesús rochbeneb lix tzolom jun pacˈal li palau, coxeˈe̱lk saˈ li tenamit Genesaret. Queˈxbacˈ li jucub chire li haˈ. ⁵⁴ Nak yo̱queb chi e̱lc saˈ li jucub, eb li cuanqueb aran ticto queˈxnau nak aˈan li Jesús. ⁵⁵ Joˈcan nak saˈ junpa̱t queˈco̱eb saˈ chixjunil li naˈajej chixcˈambaleb chak lix yaj chiruheb lix cuarib. Nak queˈxnau bar cuan li Jesús, quilajeˈxcˈam li yaj riqˈuin. ⁵⁶ Yalak bar quinumeˈ li Jesús quilajeˈxcˈam li yaj riqˈuin, joˈ saˈ tenamit, joˈ saˈ cˈaleba̱l. Queˈxqˈueheb li yaj saˈ li be bar cuiˈ yo̱ chi numecˈ li Jesús. Queˈxtzˈa̱ma chiru: ―Ba̱nu usilal, qˈue chikachˈeˈ la̱ cuakˈ, chanqueb re xban nak nequeˈxnau nak usta caˈaj cuiˈ re li rakˈ teˈxchˈeˈ, teˈqˈuira̱k. Ut chixjunileb li queˈchˈeˈoc re li rakˈ, queˈqˈuira.

Li Jesús quixtaklaheb lix tzolom cablaju chixchˈolobanquil resil li colba‑ib

9  Li Jesús quixchˈutubeb lix tzolom cablaju ut quixqˈueheb xcuanquil chirisinquileb li ma̱us aj musikˈej ut quixqˈueheb ajcuiˈ xcuanquil chixqˈuirtesinquileb li yaj. ² Quixtaklaheb chixchˈolobanquil resil lix nimajcual cuanquilal li Dios ut chixqˈuirtesinquileb li yaj. ³ Quixye reheb: ―Ma̱cˈaˈ te̱cˈam e̱re nak texxic. Incˈaˈ te̱cˈam e̱xukˈ, chi moco e̱bo̱ls, chi moco e̱tzacae̱mk chi moco e̱tumin. Caˈaj cuiˈ le̱ rakˈ li cuan che̱rix te̱cˈam. ⁴ Nak texcˈulekˈ saˈ junak cab, aran texcana̱k. Toj ta̱cuulak xkˈehil nak texxic, tex‑e̱lk saˈ li naˈajej aˈan. ⁵ Cui texcuulak saˈ junak naˈajej bar cuiˈ incˈaˈ texcˈulekˈ, tex‑e̱lk riqˈuineb ut te̱chikˈ li poks che̱rok joˈ retalil li raylal teˈxcˈul xban nak incˈaˈ queˈraj rabinquil li ra̱tin li Dios, chan li Jesús. ⁶ Co̱eb ut lix tzolom li Jesús saˈ eb li junju̱nk chi naˈajej ut yo̱queb chixchˈolobanquil resil li colba‑ib. Ut yo̱queb ajcuiˈ chixqˈuirtesinquileb li yaj.

Qui‑oc xcˈaˈux laj Herodes xban li Jesús

⁷ Laj Herodes li nataklan aran Galilea quirabi resil chixjunil li yo̱ chixba̱nunquil li Jesús ut qui‑oc xcˈaˈux xban nak cuan yo̱queb chi yehoc re nak aˈan laj Juan li xcuacli cuiˈchic chi yoˈyo saˈ xya̱nkeb li camenak. ⁸ Ut cuan ajcuiˈ li yo̱queb chi yehoc re nak aˈan li profeta Elías li xchal cuiˈchic. Ut cuan cuiˈchic li yo̱queb chi yehoc re nak ma̱re aˈan jun xcomoneb li profeta li queˈcuan junxil li xcuacli cuiˈchic chi yoˈyo saˈ xya̱nkeb li camenak. ⁹ Laj Herodes quixye saˈ xchˈo̱l: ―Aˈan ma̱cuaˈ laj Juan xban nak la̱in quintaklan re xchˈotbal xcux. ¿Ani anchal aˈan li yo̱quin chirabinquil resil? chan. Joˈcan nak ta̱raj rilbal ru.

Li Jesús quixqˈueheb chi cuaˈac li o̱b mil chi cui̱nk

¹⁰ Nak queˈsukˈi chak lix tzolom chixba̱nunquil li cˈanjel queˈtakla̱c cuiˈ, queˈxserakˈi re li Jesús li cˈaˈru quilajeˈxba̱nu chak. Li Jesús quixcˈameb xjuneseb saˈ jun naˈajej bar ma̱cˈaˈ cuan, li cuan xcue̱nt li tenamit Betsaida. ¹¹ Abanan li qˈuila tenamit queˈxqˈue retal nak li Jesús yo̱queb chi xic saˈ li naˈajej aˈan, ut queˈco̱eb chirix. Li Jesús quixcˈuleb ut qui‑oc chixchˈolobanquil xya̱lal chiruheb chirix lix nimajcual cuanquilal li Dios. Ut quixqˈuirtesiheb ajcuiˈ li yaj. ¹² Nak ac yo̱ chi ecuu̱c, lix tzolom cablaju queˈco̱eb bar cuan cuiˈ li Jesús ut queˈxye re: ―Chakˈrabiheb li tenamit re nak teˈxic xsicˈbal lix naˈajeb bar teˈhila̱nk cuiˈ ut teˈxsicˈ ajcuiˈ lix tzacae̱mk saˈ eb li cˈaleba̱l ut saˈ eb li naˈajej li cuanqueb chi nachˈ, chanqueb re. ¹³ Li Jesús quixye reheb: ―Qˈuehomak xcuaheb la̱ex. Ut eb aˈan queˈxye: ―Ma̱cˈaˈ tzacae̱mk kiqˈuin la̱o. O̱b ajcuiˈ li caxlan cua ut cuib ajcuiˈ li car cuan. ¿Malaj ut yo̱cat chixcˈoxlanquil nak la̱o toxic chixlokˈbal xtzacae̱mkeb li qˈuila tenamit aˈin? chanqueb lix tzolom. ¹⁴ Chixjunileb li cuanqueb aran cuanqueb tana o̱b mil chi cui̱nk. Li Jesús quixye reheb lix tzolom nak teˈxchunub ribeb chi chˈu̱tal, chi laje̱tk roxcˈa̱l. (50) ¹⁵ Eb lix tzolom li Jesús queˈxba̱nu joˈ quiyeheˈ reheb. Ut li cristian queˈchunla chi chˈu̱tal. ¹⁶ Li Jesús quixchap li o̱b chi caxlan cua ut li cuib chi car. Qui‑iloc saˈ choxa. Quixbantioxi chiru li Dios. Quixjachi ut quixqˈue reheb lix tzolom re nak teˈxjeqˈui reheb li qˈuila tenamit. ¹⁷ Queˈcuaˈac chixjunileb toj retal queˈcˈojla xchˈo̱l. Ut cablaju chacach chic li relaˈ quicana.