Chronological

यहूदा पइ अजर्याह क हुकूमत

15 यहूदा क राजा अमस्याह क पूत अजर्याह इस्राएल क राजा यारोबाम क राज्जकाल क सत्ताइसवें बरिस मँ राजा बना। ² हुकूमत करब सुरू करइ क समइ अजर्याह सोलह बरिस क रहा। अजर्याह यरूसलेम मँ बावन बरिस तलक हुकूमत किहस। अजर्याह क महतारी यकोल्याह यरूसलेम स रही। ³ अजर्याह ठीक अपने बाप अमस्याह क तरह उ सबइ काम किहस जेनका यहोवा अच्छा बताए रहा। अजर्याह ओन सबहिं कामन क अनुसरण किहस जेनका ओकर बाप अमस्याह किहे रहा। ⁴ मुला उ ऊँच ठउरन क नस्ट नाहीं किहस। लोगन हुआँ बलियन चढ़ावत रहे अउर धूप जरावत रहे।

⁵ यहोवा राजा अजर्याह क नोस्कान करइवाले कोढ़ रोग क रोगी बनाइ दिहस। उ मरइ क दिन तलक इहइ रोग स पीड़ित रहा। अजर्याह एक अलग महल मँ रहत रहा। राजा क पूत योताम राजमहल क देखभाल अउर जनता क संग निआव करत रहा।

⁶ अजर्याह जउन काम किहस उ सबइ, यहूदा क राजा लोग क इतिहास क किताबे मँ लिखे अहइँ। ⁷ अजर्याह मरा अउर अपने पुरखन क संग दाऊद क नगर मँ दफनावा गवा। अजर्याह क पूत योताम ओकरे पाछे नवा राजा भवा।

इस्राएल पइ जकर्याह क अल्पकालीन सासन

⁸ यारोबाम क पूत जकर्याह सोमरोन मँ इस्राएल पइ छ: महीने तलक हुकूमत किहस। जकर्याह यहूदा क राजा अजर्याह क राज्जकाल क अड़तीसवें बरिस मँ राजा भवा। ⁹ जकर्याह उ सबइ कारज किहेस जेनका यहोवा बुरा कहे रहा। उ उ सबइ ही कारज किहेस जउन ओकरे पुरखन किहे रहेन। उ नबात क पूत यारोबाम क पापन क करब बंद नाहीं किहेस जउन इस्राएल क पाप करइ बरे मजबूर किहस।

¹⁰ याबेस क पूत सल्लूम जकर्याह खिलाफ जोजना बनाएस अउर लोगन क बीच मँ ओह पइ हमला कइके ओका इब्लैम मँ मार डाएस। फुन सल्लूम ओकरे जगह पइ नवा राजा भवा। ¹¹ जकर्याह जउन दूसर कारज किहेस उ सबइ इस्राएल क राजा लोगन क इतिहास क किताबे मँ लिखे अहइँ। ¹² इ तरह यहोवा क कथन फुरइ सिद्ध भवा। यहोवा येहू स कहे रहा कि ओकरे संतानन क चार पीढ़ियन इस्राएल पइ राजा क तरह राज करब्या।

सल्लूम क इस्राएल पइ अल्पकालीन सासन

¹³ याबेस क पूत सल्लूम यहूदा क राजा उज्जिय्याह क राज्जकाल क उनतालीसवें बरिस मँ इस्राएल क राजा बना। सल्लूम सोमरोन मँ एक महीने तलक सासन किहस।

¹⁴ गादी क पूत मनहेम तिर्सा स सोमरोन आइ पहोंचा। मनहेम याबेस क पूत सल्लूम क मार डाएस। तब ओकरे पाछे मनहेम नवा राजा भवा।

¹⁵ सल्लूम जकर्याह क खिलाफ सडयंत्र करइ सहित जउन कारज किहेस, उ सबइ सबहिं इस्राएल क राजा लोगन क इतिहास क किताबे मँ लिखे गएन अहइँ।

इस्राएल पइ मनहेम क हुकूमत

¹⁶ सल्लूम क मरइ क पाछे मनहेम तिप्सह, एहमाँ रहइवाले सबइ लोगन क अउर तिर्सा स सुरू होइवालन छेत्रन क हराई दिहेस। लोग ओकरे बरे नगर दुआर क खोलब मना कइ दिहन। एह बरे मनहेम ओनका हराइ दिहस अउर नगर क सबहिं गरभवती मेहररूअन क गरभ क चीर गिराएस।

¹⁷ गादी क पूत मनहेम यहूदा क राजा जकर्याह क राज्जकाल क उनतालीसवें बरिस मँ इस्राएल क राजा भवा। मनहेम सोमरोन मँ दस बरिस हुकूमत किहस। ¹⁸ मनहेम उ सबइ काम किहेस जेनका यहोवा बुरा बताए रहा। मनहेम पूरी जिन्नगी, नबात क पूत यारोबाम क पापन क करब बंद नाहीं किहेस, जउन इस्राएल स पाप कराएस।

¹⁹ अस्सूर क राजा पूल इस्राएल क खिलाफ जुद्ध करइ आवा। मनहेम पूल क पचहत्तर हजार पौण्ड चाँदी दिहस। उ इ एह बरे किहस कि पूल मनहेम क बल प्रदान करी अउर जेहसे राज्ज पइ ओकर अधिकार सुदृढ़ होइ जाइ। ²⁰ मनहेम सबहिं धनी अउर सक्तीसाली लोगन स करन क भुगतान करवाइके धन बटोरेस। मनहेम हर मनई पइ चाँदी क पचास सेकेल कर लगाएस। तब मनहेम अस्सूर क राजा क धन दिहस। एह बरे अस्सूर क राजा चला गवा अउर इस्राएल मँ नाहीं ठहरा।

²¹ मनहेम जउन कारज किहेस उ सबइ इस्राएल क राजा लोगन क इतिहास क किताबे मँ लिखे अहइँ। ²² मनहेम मरा अउर अपने पुरखन क संग दफनावा गवा। मनहेम क पूत पकह्याह ओकरे पाछे नवा राजा भवा।

इस्राएल पइ पकह्याह क हुकूमत

²³ मनहेम क पूत पकह्याह यहूदा क राजा अजर्याह क राज्जकाल क पचासवें बरिस मँ सोमरोन मँ इस्राएल क राजा भवा। पकह्याह दुइ बरिस तलक राज्ज किहस। ²⁴ पकहयाह नबात क पूत यारोबाम क पापन क करब बन्द नाहीं किहस जउन इस्राएल क पाप करइ बरे मजबूर किहे रहा।

²⁵ पकह्याह क फउज क सेनापति रमल्याह क पूत पेकह रहा। पेकह पकहयाह क मार डाएस। उ ओका सोमरोन मँ राजा क महल मँ मारेस। पेकह जब पकहयाह क मारेस, ओकरे संग अरगोब अरीआह अउर गिलाद क पचास मनसेधू रहेन। तब पेकह ओकरे पाछे नवा राजा भवा।

²⁶ पकहयाह जउन काम किहस उ सबइ इस्राएल क राजा लोगन क इतिहास क किताबे मँ लिखे अहइँ।

इस्राएल पइ पेकह क हुकूमत

²⁷ रमल्याह क पूत पेकह यहूदा क राजा अजर्याह क राज्जकाल क बावनेवे बरिस मँ इस्राएल पइ हुकूमत करब सुरू किहेस। पेकह बीस बरिस तलक सासन किहस। ²⁸ पेकह उ सबइ काम किहस जेनका यहोवा बुरा कहे रहा। पेकह इस्राएल क पाप करइ बरे मजबूर करइवाले नबात क पूत यारोबाम क पाप करमन क करब बंद नाहीं किहस।

²⁹ अस्सूर क राजा तिग्लत्पिलेसेर इस्राएल क खिलाफ लड़इ आवा। इ उहइ समइ रहा जब पेकह इस्राएल क राजा रहा। तिग्लत्पिलेसेर इय्योन अबेल्बेत्माका, यानोह, केदेस, हासोर, गिलाद, गालील अउर नप्ताली क सारे छेत्र पइ अधिकार कइ लिहस। तिगलत्पिलेसेर एन जगहन पइ लोगन क बन्दी बनाइके अस्सूर लइ गवा।

³⁰ एला क पूत होसे रमल्याह क पूत पेकह क खिलाफ सड्यंत्र किहस। होसे पेकह क मार डाएस। तब होसे पेकह क पाछे नवा राजा बना। इ यहूदा क राजा उज्जिय्याह क पूत योताम क राज्जकाल क बीसवें बरिस मँ भवा।

³¹ पेकह जउन सारे कारज किहस उ सबइ इस्राएल क राजा लोगन क इतिहास क किताबे मँ लिखे अहइँ।

यहूदा पइ योताम हुकूमत करत ह

³² उज्जिय्याह क पूत योताम यहूदा क राजा बना। उ इ इस्राएल क राजा रमल्याह क पूत पेकह क राज्जकाल क दूसरे बरिस मँ भवा। ³³ योताम जब राजा बना, उ पच्चीस बरिस क रहा। योताम यरूसलेम मँ सोलह बरिस तलक हुकूमत किहस। योताम क महतारी सादोक क बिटिया यरूसा रही। ³⁴ योताम अपने बाप उज्जियाह क तरह उ सबइ काम किहेस, जेनका यहोवा ठीक बताए रहा। ³⁵ मुला उ ऊँच ठउरन क नस्ट नाहीं किहेस। लोग ओन पूजा ठउरन पइ तब भी बलि चढ़ावत अउर सुगन्धि बारत रहेन। योताम यहोना क मन्दिर क उपरी दुआर बनवाएस। ³⁶ सबहिं कारज जउन योताम किहस उ सबइ यहूदा क राजा लोगन क इतिहास क पुस्तक मँ लिखे अहइँ।

³⁷ उ समइ यहोवा अराम क राजा रसीन अउर रमल्याह क पूत पेकह क यहूदा क खिलाफ लड़इ पठएस।

³⁸ योताम मरा अउर अपने पुरुखन क संग दफनावा गवा। योताम अपने पुरूखन दाऊद क नगर मँ दफनावा गवा। योताम क पूत आहाज ओकरे पाछे नवा राजा भवा।

यहूदा क राजा उज्जिय्याह

26 तब यहूदा क लोग अमस्याह क जगह पइ नवा राजा होइ क बरे उज्जिय्याह क चुनेन। अमस्याह उज्जिय्याह क बाप रहा। जब इ भवा तउ उज्जिय्याह सोलह बरिस क रहा। ² उज्जिय्याह एलोत नगर क दुबारा बनाएस अउर एका यहूदा क लउटाइ दिहस। उज्जिय्याह इ अमस्याह क मरि जाइ अउ पुरखन क संग ओकरे दफनाए जाइ क पाछे किहस।

³ उज्जिय्याह जब राजा भवा तउ उ सोलह बरिस क रहा। उ यरूसलेम मँ बावन बरिस तलक राज्ज किहस। ओकर महतारी क नाउँ यकील्याह रहा। यकील्याह यरूसलेम क रही। ⁴ उज्जिय्याह उ कामन किहस जेका यहोवा नीक समुझत ह। उ यहोवा क अनुसरण वइसा ही किहस जइसे ओकर बाप अमस्याह किहे रहा। ⁵ उज्जिय्याह परमेस्सर क अनुसरण जकर्याह क जीवन-काल मँ किहस। जकर्याह उज्जिय्याह क सिच्छा दिहस कि परमेस्सर क सम्मान अउ ओकरी आग्या क पालन कइसे कीन्ह जात ह। जब उज्जिय्याह यहोवा क आग्या क पालन करत रहा तब परमेस्सर ओका कामयाबी दियाएस।

⁶ उज्जिय्याह पलिस्ती लोगन क खिलाफ एक जुद्ध किहस। उ गत, यब्ने, अउर असदोद नगर क देवारन क गिराइ दिहस। उज्जिय्याह असदोद नगर क लगे अउर पलिस्ती लोगन क बीच दूसर जगहन मँ नगर बसाएस। ⁷ परमेस्सर उज्जिय्याह क पलिस्तियन अउर अरबियन जउन गुर्बाल नगर मँ रहत रहेन अउर मूनियन क खिलाफ जुद्ध करइ मँ मदद किहेन। ⁸ अम्मोनी उज्जिय्याह क नज़राना (कर) देत रहेन। उज्जिय्याह क नाउँ मिस्र क सीमा तलक प्रसिद्ध होइ गवा। काहेकि उ बहोत सक्तीसाली रहा।

⁹ उज्जिय्याह यरूसलेम मँ कोने क फाटक पइ, घाटी क फाटक पइ अउर देवारे क मुड़इ क जगहन पइ मीनारन बनवाएस। उज्जिय्याह ओन मीनारन क दृढ़ बनाएस। ¹⁰ उज्जिय्याह मीनारन क रेगिस्ताने मँ बनाएस। उ बहोत स कुएँ भी खोदवाएस। ओकरे लगे पहाड़ी देसन अउर मइदानी छेत्र मँ बहोत स गोरूअन रहेन। उज्जिय्याह क लगे पर्वतन मँ अउर जहाँ अच्छी उपज होत रही, उ भुइँया मँ किसान रहेन। उ अइसे मनइयन क भी रखे भए रहा जउन ओन खेतन क रखवारी करत रहेन जेनमाँ अंगूर रहेन। ओका खेती स पिरेम रहा।

¹¹ उज्जिय्याह क लगे प्रसिच्छित फउजियन क एक फउज रही। उ सबइ फउजी सचिव यीएल अउर अधिकारी मासेयाह जरिये बर्गन मँ बेटे रहेन। हनन्याह ओनकर प्रमुखन रहा। यीएल अउर मासेयाह ओन फउजियन क गनेस अउर ओनका बर्गन मँ रखेस। हनन्याह राजा क अधिकारियन मँ स एक रहा। ¹² फउजियन क ऊपर दुइ हजार छ: सौ प्रमुखन रहेन। ¹³ उ पचे परिवार परिवार प्रमुखन तीन लाख सात हजार पाँच सौ मनसेधुअन क उ फउज क अधिपति रहेन जउन बड़की सक्ती स लड़त रहिन। उ सबइ फउजी राजा क दुस्मनन क बिरुद्ध मदद करत रहेन। ¹⁴ उज्जिय्याह फउज क ढार, भालन, टोप, कवच, धनुस अउ गुलेलन बरे पाथर दिहे रहा। ¹⁵ यरूसलेम मँ उज्जिय्याह जउन यन्त्र बनाएस उ बुद्धिमानन क आविस्कार रहेन। उ सबइ यन्त्र मीनारन अउ कोने क देवारन पइ रखे गए रहेन। इ सबइ यन्त्र क बड़के पाथर लोकावइ अउर बाण चलावइ बरे प्रयोग रहेन। उज्जिय्याह प्रसिद्ध होइ गवा। लोग ओकर नाउँ दूर-दूर क देसन मँ जानत रहेन। ओकरे लगे बड़की मदद रही अउर उ सक्तीसाली राजा होइ गवा।

¹⁶ किन्तु जब उज्जिय्याह सक्तीसाली होइ गवा, तउ ओकर घमण्ड ओकरे नस्ट क कारण बनेस। उ यहोवा आपन परमेस्सर यहोवा क मन्दिर मँ वेदी पइ सुगन्धित बारइ बरे जाइ क धोका दिहस। ¹⁷ याजक अजर्याह अउर यहोवा क अस्सी हिम्मती याजक सेवक उज्जिय्याह क पाछे मन्दिर मँ गएन। ¹⁸ उ पचे उज्जिय्याह स कहेन कि तू गलत अहा। उ पचे ओहसे कहेन, “उज्जिय्याह यहोवा क बरे सुगन्धि बारब तोहार काम नाहीं अहइ। याजक, हारून क संतान ही सिरिफ यहोवा बरे सुगन्धि बारत हीं। एन याजकन क सुगन्धि बारइ क पवित्तर सेवा क बरे प्रसिच्छण दीन्ह गवा अउर समर्पित कीन्ह गवा ह। सब स जियादा पवित्तर ठउर स बाहेर निकरि जा तू यहोवा परमेस्सर क धोका देत ह। उ तोहका एकरे बरे सम्मान नाहीं देइ।”

¹⁹ मुला उज्जिय्याह कोहाइ गवा। ओकरे हाथे मँ सुगन्धि बारइ बरे एक ठु खोरा रहा। जउने समइ उज्जिय्याह याजकन पइ बहोत कोहाइ गवा, उहइ समइ माथे पइ कोढ़ होइ गवा। इ याजकन क समन्वा यहोवा क मन्दिर मँ सुगन्धि बारइ क वेदी क लगे भवा। ²⁰ प्रमुख याजक अजर्याह अउ सबहिं याजकन उज्जिय्याह क लखेन। उ पचे ओकरे माथे पइ कोढ़ देखत रहेन। याजकन हाली स उज्जिय्याह क मन्दिर स बाहेर जाइ क मजबूर किहन। उज्जिय्याह खुद ही हाली स बाहेर गएस काहेकि यहोवा ओका सजा दइ दिहे रहा। ²¹ राजा उज्जिय्याह मउत तलक कोढ़ी रहा। उ यहोवा क मन्दिर मँ प्रवेस नाहीं कइ सकत रहा। उ दूसर घरन स दूर एक अलग घरे मँ रहेन। उज्जिय्याह क पूत योताम राजमहल क कब्जा मँ रखेस अउर लोगन क प्रसासक रहेन।

²² उज्जिय्याह सुरु स लइके आखीर तलक जउन कछू किहस उ यसायाह नबी क जरिये लिखा गवा। यसायाह क बाप यामोस रहा। ²³ उज्जिय्याह मरा अउर अपने पुरखन क लगे दफनावा गवा। उज्जिय्याह क राजा लोगन क कब्रिस्तान क लगे मैदान मँ दफनावा गवा। काहे काहेकि लोग कहेन, “उज्जिय्याह क कोढ़ अहइ।” योताम उज्जिय्याह क जगह पइ नवा राजा भवा। योताम उज्जिय्याह क पूत रहा।