Chronological

19 ^(A)Omuntu omwavu atambulira mu butuukirivu,
    asinga akamwa ak’omusirusiru akaweebuula.

^2 (B)Si kirungi okuba omujjumbize naye nga tolina kumanya,
    n’okwanguyiriza okukola ekintu kuleetera omuntu okukwata ekkubo ekyamu.

³ Obusirusiru bw’omuntu bwe bwonoona obulamu bwe,
    kyokka omutima gwe ne gunenya Mukama.

^4 (C)Obugagga buleeta emikwano mingi,
    naye emikwano gy’omwavu gimuddukako.

^5 (D)Omujulizi ow’obulimba talirema kubonerezebwa,
    era oyo ayogera eby’obulimba taliba na buddukiro.

^6 (E)Bangi banoonya okuganja mu maaso g’omufuzi,
    era buli muntu aba mukwano gw’oyo agaba ebirabo.

^7 (F)Baganda b’omwavu bonna bamwewala,
    mikwano gye tebaasingewo nnyo okumwewala?

Wadde abagoberera ng’abeegayirira,
    naye tabalaba.

^8 (G)Oyo afuna amagezi ayagala emmeeme ye,
    n’oyo asanyukira okutegeera, akulaakulana.

^9 (H)Omujulizi ow’obulimba talirema kubonerezebwa,
    n’oyo ayogera eby’obulimba alizikirira.

^10 (I)Omusirusiru tasaana kubeera mu bulamu bwa kwejalabya,
    kale kiwulikika kitya ng’omuddu afuga abalangira?

^11 (J)Omuntu omutegeevu alwawo okusunguwala,
    era kiba kya kitiibwa obutafa ku bye bamusobezza.

^12 (K)Obusungu bwa kabaka buli ng’okuwuluguma kw’empologoma,
    naye ekisa kye kiri ng’omusulo ku ssubi.

^13 (L)Omwana omusirusiru aleetera kitaawe okuzikirira,
    n’omukazi omuyombi ali ng’enkuba etonnya olutata.

^14 (M)Ennyumba n’obugagga bisikirwa okuva ku bazadde,
    naye omukazi omutegeevu ava eri Mukama.

^15 (N)Obugayaavu buleeta otulo tungi,
    n’omuntu atakola mirimu alirumwa enjala.

^16 (O)Oyo akwata ebiragiro akuuma obulamu bwe,
    naye oyo eyeeyisa mu ngeri embi alifa.

^17 (P)Oyo akwatirwa omwavu ekisa awola Mukama,
    era Mukama alimusasula olw’ekikolwa kye ekyo.

^18 (Q)Kangavvulanga omwana wo kubanga mu ekyo mulimu essuubi,
    oleme kumuwaayo mu kuzikirira.

¹⁹ Omuntu omukambwe ennyo alisasula ebiriva mu bukambwe bwe,
    kubanga ne bw’omununula ogusooka era oteekwa okukiddiŋŋaana.

^20 (R)Ssangayo omwoyo ku magezi agakuweebwa ne ku kuyigirizibwa,
    oluvannyuma lwa byonna oliba n’amagezi.

^21 (S)Enteekateeka z’omuntu ziba nnyingi mu mutima gwe;
    byo ebigendererwa bya Mukama bituukirira.

²² Ekintu omuntu kye yeegomba kwe kwagala okutaggwaawo,
    okuba omwavu kisinga okuba omulimba.

^23 (T)Okutya Mukama kutuusa mu bulamu;
    olwo omuntu n’awummula nga mumativu nga tatuukiddwako kabi.

^24 (U)Omugayaavu annyika omukono gwe mu kibya,
    n’atagukomyawo nate ku mumwa gwe.

^25 (V)Kangavvula omunyoomi, abatamanyi bayigire ku ye,
    buulirira ategeera, ajja kweyongera okutegeera.

^26 (W)Omwana abba ebya kitaawe n’agobaganya ne nnyina,
    aleeta obuswavu n’obuyinike.

²⁷ Mwana wange konoolekayo okuyigirizibwa,
    onoowaba okuva ku bigambo by’okumanya.

^28 (X)Omujulizi omulimba atyoboola ensala ey’amazima,
    n’akamwa k’ababi, kavaabira ebitali bya butuukirivu.

^29 (Y)Ebibonerezo bitekebwawo kukangavvula banyoomi,
    n’embooko zaakolebwa lwa migongo gy’abasirusiru.

20 ^(Z)Omwenge mukudaazi, ekitamiiza muleekaanyi,
    era buli alaga mu kkubo ekyamu olw’ebyo talina magezi.

^2 (AA)Obusungu bwa kabaka buli ng’okuwuluguma kw’empologoma,
    n’oyo amusunguwaza yeefiiriza bulamu bwe.

^3 (AB)Kya kitiibwa omuntu okwewala entalo,
    naye buli musirusiru ayagala okuyomba.

⁴ Omugayaavu talima mu budde butuufu,
    kyanaavanga anoonya eby’amakungula nga talina kantu.

⁵ Ebigendererwa ebiba mu mutima gw’omuntu biba ng’amazzi ag’ebuziba,
    naye omuntu alina okutegeera alibiggyayo.

^6 (AC)Abantu bangi bagamba nti balina okwagala okutaggwaawo,
    naye ani ayinza okuzuula omuntu omwesigwa?

^7 (AD)Omuntu omutuukirivu, atambulira mu bulamu obutaliiko kyakunenyezebwa;
    ba mukisa abaana be abalimuddira mu bigere.

^8 (AE)Kabaka bw’atuula ku ntebe ye ey’obwakabaka ng’asala emisango,
    amaaso ge gasunsulamu ne gaggyamu ebibi byonna.

^9 (AF)Ani ayinza okugamba nti, “Ntukuzza omutima gwange,
    ndi mulongoofu era sirina kibi?”

^10 (AG)Ebipima obuzito ebitatuuka n’ebigera ebikyamu,
    byombi bya muzizo eri Mukama.

^11 (AH)Omuvubuka naye amanyibwa olw’ebikolwa bye,
    obanga birongoofu era nga birungi.

^12 (AI)Okutu okuwulira n’eriiso eriraba
    byombi Mukama ye y’abikola.

^13 (AJ)Toyagalanga kwebaka oleme kwavuwala,
    tunula, obeerenga n’ebyokulya bingi.

¹⁴ “Si kirungi, si kirungi,” bw’ayogera agula;
    naye bw’agenda n’alyoka yeenyumiririza mu ky’aguze.

¹⁵ Zaabu n’amayinja ag’omuwendo weebiri,
    naye emimwa egyogera eby’amagezi kye ky’omuwendo ekisingako.

^16 (AK)Omuntu bw’aleeta ekyambalo kye ne yeeyimiririra gw’atamanyi,
    kitwalire ddala, na ddala bw’abanga yeeyimiririra omukazi omubambaavu.

^17 (AL)Emmere enfune mu bukyamu ewooma mu kulya,
    naye emufuukira amayinja mu kamwa.

^18 (AM)Kola entegeka nga weebuuza ku magezi,
    bw’oba onoolangirira olutalo sooka weebuuze.

^19 (AN)Oyo agenda ng’asaasaanya olugambo abotola ebyama,
    noolwekyo weewale omuntu ayogerayogera ennyo ebitaliimu.

^20 (AO)Omuntu akolimira kitaawe oba nnyina,
    ettabaaza ye erizikizibwa n’asigala mu kizikiza ekikutte ennyo.

²¹ Eby’obusika ebifune ng’ekiseera kyabyo tekinnatuuka,
    ku nkomerero tebiba na mukisa.

^22 (AP)Toyogera nti, “Nzija kukusasula olw’ekibi kino!”
    Lindirira Mukama alikuyamba.

^23 (AQ)Ebipima ebikyamu bya muzizo eri Mukama,
    ne minzaani ez’obulimba tezisanyusa.

^24 (AR)Amakubo g’omuntu gategekebwa Mukama,
    omuntu ayinza atya okutegeera ekkubo lya Mukama?

^25 (AS)Kyambika eri omuntu okwanguyiriza okweyama eri Mukama,
    naye oluvannyuma n’afumiitiriza ku bye yeeyamye.

^26 (AT)Kabaka omugezi asengejja n’aggyamu abakozi b’ebibi,
    n’ababonereza awatali kusaasira.

²⁷ Ettabaaza ya Mukama ekebera omwoyo gw’omuntu,
    n’enoonya mu bitundu eby’omunda ennyo.

^28 (AU)Okwagala n’obwesigwa bikuuma kabaka mu butebenkevu,
    era obufuzi bwe bunywezebwa na kwagala.

^29 (AV)Amaanyi kye kitiibwa ky’abavubuka,
    envi kye kitiibwa ky’abakadde.

^30 (AW)Emiggo n’ebiwundu biggyawo ebibi,
    n’embooko zitereeza ebifo eby’omunda ennyo.

21 Omutima gwa kabaka guli ng’amazzi agakulukutira mu mukono gwa Mukama,
    era agukyusiza gy’ayagala yonna.

^2 (AX)Buli kkubo lya muntu liba ng’ettuufu mu maaso ge,
    naye Mukama apima omutima.

^3 (AY)Okukola ebituufu n’eby’amazima
    kisanyusa Mukama okusinga ssaddaaka.

^4 (AZ)Amaaso ageegulumiza, n’omutima ogw’amalala,
    ye ttabaaza y’ababi, era ebyo kwonoona.

^5 (BA)Enteekateeka z’omunyiikivu zivaamu magoba meereere,
    naye okwanguyiriza okutalina nteekateeka kuvaamu bwavu.

^6 (BB)Okufuna obugagga n’olulimi olulimba,
    mpewo buwewo etwalibwa eruuyi n’eruuyi era mutego gwa kufa.

⁷ Obukambwe bw’ababi bulibamalawo,
    kubanga bagaana okukola eby’ensonga.

^8 (BC)Ekkubo ly’abazza emisango liba kyamu,
    naye ery’abataliiko musango liba golokofu.

^9 (BD)Okusula ku kasolya k’ennyumba,
    kisinga okubeera mu nnyumba n’omukazi omuyombi.

¹⁰ Emmeeme y’omubi yeegomba okukola ebibi;
    talaga muliraanwa we kisa n’akatono.

^11 (BE)Omukudaazi bw’abonerezebwa, atalina magezi agafuna;
    n’ow’amagezi bw’ayigirizibwa afuna okutegeera.

^12 (BF)Katonda alaba ebifa mu nnyumba y’omubi,
    era abakozi b’ebibi abazikkiririza ddala.

^13 (BG)Oyo aziba amatu ge eri okulaajana kw’omwavu,
    naye alikoowoola nga talina amwanukula.

^14 (BH)Ekirabo ekigabire mu kyama kikakkanya obusungu obungi,
    n’enguzi ebikiddwa mu munagiro eggyawo ekiruyi ekingi.

^15 (BI)Ensonga bwe zisalibwa mu bwenkanya, lye ssanyu eri abatuukirivu,
    naye kiba kyekango eri abakozi b’ebibi.

^16 (BJ)Omuntu awaba okuva mu kkubo ly’okutegeera,
    agukira mu bafu.

^17 (BK)Aganza eby’amasanyu anaabanga mwavu, n’oyo
    ayagala omwenge n’amafuta taligaggawala.

^18 (BL)Abakozi b’ebibi batuukibwako emitawaana egyandigudde ku balungi,
    n’ekyandituuse ku b’amazima kituuka ku batali beesigwa.

^19 (BM)Okubeera mu ddungu,
    kisinga okubeera n’omukazi omuyombi anyiiganyiiga.

²⁰ Mu nnyumba y’omutuukirivu mubaamu eby’obugagga eby’omuwendo,
    naye omusirusiru ebibye byonna abyonoona.

^21 (BN)Agoberera obutuukirivu n’ekisa,
    alibeera n’obulamu obukulaakulana n’ekitiibwa.

^22 (BO)Omuntu ow’amagezi alumba ekibuga eky’abazira nnamige,
    era n’asesebbula enfo yaabwe gye beesiga.

^23 (BP)Afuga akamwa ke n’olulimi lwe,
    yeewoonya emitawaana.

^24 (BQ)“Mukudaazi,” lye linnya ly’ab’amalala abeeraga,
    abeetwalira mu kwemanya okw’ekitalo mwe batambulira.

^25 (BR)Okwetaaga kw’omugayaavu lwe luliba olumbe lwe,
    kubanga emikono gye tegyagala kukola.

^26 (BS)Olunaku lwonna aba yeegomba kweyongezaako,
    naye omutuukirivu agaba awatali kwebalira.

^27 (BT)Ssaddaaka y’omubi ya muzizo,
    na ddala bw’agireeta ng’alina ekigendererwa ekitali kirungi.

^28 (BU)Omujulizi ow’obulimba alizikirira,
    naye ekigambo ky’oyo ayogera eby’amazima kiribeerera emirembe gyonna.

²⁹ Omuntu omubi yeekazaakaza,
    naye omuntu ow’amazima yeegendereza amakubo ge.

^30 (BV)Tewali magezi, newaakubadde okutegeera, wadde ebiteeso
    ebiyinza okulemesa Mukama.

^31 (BW)Embalaasi etegekerwa olunaku olw’olutalo,
    naye obuwanguzi buva eri Mukama.