Chronological
Dee 43 Psalm
1 Doo mie rejchte, O Gott, un doo fa mie ennstone jäajen ne Natsjoon dee nijch jetlijch es, rad mie fonn däm Lestfola un onnjerajchta Maun.
2 Dan bloos du best dee Gott fonn miene Krauft; wuaromm deist du mie wajch schmiete? Wuraomm doo ekj dän dachäwa truare äwa daut Älend fonn daen Fient?
3 O schekj dien Lijcht un diene Woarheit erut; lot dän mie leide un mie no dien Heilja Boajch brinje, un no diene Fesaumlunjs Staed.
4 Dan woa ekj no Gott sien Aultoa gone, no Gott dee miene Freid un Fejneaje es; Jo, ekj woa die met dee Hoap danke, O Gott mien Gott.
5 O miene Seel, wuaromm best du doljeschloage enn mie, un deist Stäne enn mie? Dan ekj woa am noch preise, dee Radunk fa mien Jesejcht un mien Gott.
Dee 44 Psalm
To dän Haupt Musikaunt fa dee Korah Säns. En Nodenkje.
1 Wie ha jeheat met onnse Uare, O Gott, onnse Fodasch ha onns fetalt fonn daut Woakj daut du enn äare Doag deetst, enn dee Freajoasche Tiede.
2 Du deetst Natsjoone rut driewe met diene Haunt, un deetst dee plaunte. Du deetst dee Mensche betriebe un deetst dän rut driewe.
3 Dan dee deede daut Launt nijch oawe derjch äa eajnet Schweat, un äa eajne Oarm deed an nijch rade; oba daut wea diene rajchte Haunt un dien Oarm un daut Lijcht fonn dien Jesejcht – dan du hautst en Jefaule enn an.
4 Du best dee, mien Kjeenijch, O Gott; doo Radunk aunkommendeare fa Joakopp.
5 Derjch die woa wie onnse Fiend dol schuwe, derjch dien Nome woa wie dän dol traumple dee jäajen onns oppstone.
6 Dan ekj woa nijch enn mien Boage fetruehe, un mien Schweat woat mie nijch rade.
7 Oba du hast onns fonn onnse Fiend jerat, un hast dän to schaunde jemoakt dee onns hausste.
8 Wie doone Gott daen Dachäwa lowe, un doone dien Nome fa emma preise. Selah
9 Oba du hast onns wajch jeschmäte un onns to schaunde jemoakt; un du jeist nijch rut met diene Armeeha.
10 Du hast onns jemoakt fonn dän Fient wajch rane; un see, dee onns hausse doone onns plindre fa sikj selfst.
11 Du hast onns henjejäft soo aus Schop fa Äte, un hast onns festreit mank dee Natsjoone.
12 Du hast dien Folkj fekoft fa nuscht. Un du hast äa Pries nijch hejcha jestalt.
13 Du hast onns en Fluch jemoakt to onnse Nobasch, en Fe-achte un en Spott to dän dee runnt omm onns sent.
14 Du moakst onns soo aus en Sprejchwuat mank dee Natsjoone, en Koppscheddre mank dee Felkja.
15 Miene Schaund es fer mie dän Dach äwa, jo, dee Schaund fonn mien Jesejcht bedakjt mie;
16 wäajen däm siene Stem die mie schlajchtet noräde deit, un dee Spatta fer dän Fient un däm dee Rach eewe deit.
17 Dit es aules opp onns jekome, oba wie ha die nijch fejäte, un ha uk nijch faulsch jehaundelt met dien Bunnt.
18 Wie sent nijch trigjaun jegone met onnse Hoate, un wie sent uk nijch tosied jedreit fonn dien Wajch,
19 Wan du onns uk fekjneddat hast enn dee wile Tiare äare Städ, un hast onns bedakjt met dän Doodes Schaute.
20 Wan wie dän Nome fonn onns Gott fejäte ha, un ha onnse Henj utjestrakjt no en framda Gott,
21 sull Gott daut nijch utseakje? Dan hee weet daut Jeheemet fonn daut Hoat.
22 Jo, omm dienet haulwe sent wie dän dachäwa to dän Doot äwejäft; wie sent soo aunjseene aus Schop tom schlachte.
23 Wakj opp! Wuaromm deist du schlope, O Herr? Sto opp! doo onns nijch fa emma auntsied schmiete.
24 Wuaromm deist du dien Jesejcht festäakje, un deist onns Älend un Noot fejäte?
25 Dan onnse Seel es raufjebrocht bott daut Stoff. Onns Buk blift faust oppe Ead.
26 Sto opp fa onnse Help un doo onns rade, omm diene Leeftolijchkjeit haulwe.
Dee 45 Psalm
To dän Haupt Musilkaunt opp Schoschannim, fa dee Korah Säns. En Jedijcht; en Leet fonn miene Leefate.
1 Mien Hoat es äwafoll fonn ne goode Sach; ekj räd fonn miene Woakje to däm Kjeenijch; miene Tunj es dee Stolfada fonn en pienje Schriewa.
2 Du best dee Straumste mank dee Mensche Säns; Jnod es opp diene Leppe utjegote; doaromm haft Gott die fa emma jesäajent.
3 Stäakj dien Schweat enn diene Schajcht, O du Majchtja; met diene Harlijchkejit un Madastijchkjeit.
4 En lot die daut jelinje enn diene Madastijchkjeit; ried wieda wäajen Woarheit enn Saunftmoot un Jerajchtijchkjeit; un diene rajchte Haunt woat die wunndaboare Dinje leare.
5 Diene Fiele sent schoap enn däm Kjeenijch siene Fiend äare Hoate, Mensche faule unja die.
6 Dien Troon, O Gott, es fa emma en emma; dee Stang fonn dien Rikj es dee Stang fonn diene Jerajchtijchkjeit.
7 Du hast Jerajchtijchkjeit leef, un deist Beeset hausse; doaromm woat Gott, dien Gott, die met dee Freid Eelj saulwe meeh aus diene Komrode.
8 Aul diene kjleede rikje fonn Mir un Saulweelj; ut dee Aulfensteen Paulauste, derjch woont dee die froo moake.
9 Kjeenijchs Dajchta sent mank dee Kjestlijche; dee Kjeenijin steit to diene rajchte Haunt, enn Golt fonn Ofir.
10 Horjch, O Dochta, un kjikj; un horjch, un fejat fonn dien eajnet Folkj un dien Foda sien Hus.
11 En see doato daut dee Kjeenijch dien Straumet felange wudd; dan Hee es dien Herr un du saust am aunbäde.
12 Un dee Tiarus Dochta met ne Gow; dee Rikje mank dee Felkja woare dien Gonnst seakje.
13 Dee kjeenijchlijche Dochta es seeha harlijch fonn benne, äare Kjleede sent met Golt jewäft.
14 See woat no däm Kjeenijch jeleit woare enn utjeneidet Woakj; dee Eentletsje dee äare Komrode sent woare no die jebrocht woare.
15 Dee woare jebrocht woare froo un schaftijch; dee woare enn däm Kjeenijch sien Paulaust enenn kome.
16 Diene Säns sele enn diene Fodasch äare Städ senne; du woascht dän Ferschte moake enne gaunse Ead.
17 Ekj woa dien Nome bekaunt moake enn aule Jeschlajchte; doaromm woare dee Felkja die fa emma en emma danke.
Dee 49 Psalm
To dän Haupt Musikaunt, en Psalm fa dee Korah Säns.
1 Horjcht no dit, jie gaunse Welt; horjcht aul jie dee enne Welt wone.
2 Beides Mensche Saens un Mensche Kjinje, rikj un oam toop:
3 Mien Mul saul Weisheit räde, un dee Jedankje enn mien Hoat sele Festentnis jäwe.
4 Ekj woa mien Ua dol beaje to en Jlikjnes; ekj woa mien diestret Räde op moake opp ne Haop.
5 Wuaromm sull ekj mie enn dee Doag ferjchte wan Beeset kjemt, wan daut Gottlooset kjemt fonn dän dee mie ommrinje?
6 Soone dee enn äa Rikjdom fetruehe, un enn äa Hab un Goot, doone sikj puche.
7 En Maun kaun sien Brooda nijch rade, oda Leesjelt to Gott jäwe fa am –
8 dan dee Radunk fa äare Seel es kjestlijch, un daut deit fa emma oppheare –
9 dan hee woat doch fa emma läwe; hee woat niemols Fewäsunk seene.
10 Dan dee seeha Weise stoawe, dee Noa un dee soo aus en Tia sent kome toop omm, un lote äa Rikjdom to aundre.
11 Äare ennalijche Jedanke sent daut äare Hiesa emma bliewe woare, un äare Woninj to aule Jeschaljchte; see nane äare Lenda no äare eajne Nomes.
12 Oba dee Mensch saul nijch enn Ea bliewe: hee es soo aus dee Tiare, dee sele ommkome.
13 Dit es dee Noarische äa Wajch, un doch woare soone en Fejneaje ha dee an nofolje.
14 Dee woare bestemmt to dän Doot, dee Doot woat äwa an rejeare; un dee Opprajchte woare äwa an aum Morje rejeare; äa Form es fa fefule, daut Grauf es sien Heim.
15 Oba Gott woat miene Seel fonn daut Grauf rade, dan Hee woat mie näme. Selah.
16 Ha nijch Angst wan doa wäa Rikj woat, wan dee Harlijchkjeit fonn sien Hus toonemmt;
17 Dan wan hee stoaft, woat hee nuscht met näme, siene Harlijchkjeit woat nijch met am met gone.
18 Dan wäarent hee läft, deit hee siene Seel säajne – jo, Mensche doone die preise wan du goot deist fa die selfst-
19 Hee woat no dee Jeschlajchte fonn siene Fodasch gone; dee woare niemols Lijcht seene.
20 En Mensch dee huach enn Ea es, oba nijch Festentnis haft, es soo aus dee Tiare, dee woare feschwinje.
Dee 84 Psalm
To dän Haupt Musikaunt opp Jittit. En Psalm fa dee Kora Säns
1 Woo harlijch sent diene Woninj, O Aulmajchtja Herr Gott!
2 Miene Seel sänt sikj un deit soogoa feschmachte fa däm Herr Gott siene Fäaleew; mien Hoat un mien Fleesch schriehe fa däm läwendja Gott.
3 Soogoa dee Spoalinkj haft en Hus jefunje; un dee Schwaulm en Nast fa sikj selfst wua see äare Junja kaun han laje, opp diene Aultoare, O Almajchtja Herr Gott, mien Kjeenijch un mien Gott.
4 Jesäajent sent dee, dee enn Dien Hus wone; dee woare Die emma preise. Selah.
5 Jesäajent es dee Maun däm siene Macht enn Die es; dee Huachwäaj sent enn äare Hoate.
6 Wan see derjch dän Tol fonn Hiele derjch gone, moake see daut ne Wotakjwal; jo, dee Räajen deit bekjleede met Säajens.
7 Dee gone fonn eene Karuft no dee Näakjste, un kome enn Zion fer Gott.
8 O Aulmajchtja Herr Gott, hea mien Jebäd; horjch, O Joakopp sien Gott. Selah.
9 See, O Gott onns Schilt, un kjikj opp dien Ennjesaulwda sien Jesejcht.
10 Dan een Dach enn diene Fäaleew es bäta aus Dusent; ekj ha jewält bie dee Däa fonn mien Gott sien Hus to stone, aus enn dee Gottloose äare Tselte to wone.
11 Dan dee Herr Gott es en Sonn un en Schilt; dee Herr Gott woat Jnod un Harlijchkjeit jäwe; Hee woat nuscht Goodet trigj hoole fonn dän dee opprajchtijch waundle.
12 O Aulmajchtja Herr Gott, jesäajent es dee Maun dee enn die fetruehe deit!
Dee 85 Psalm
To dän Haupt Musikaunt. En Psalm fa dee Kora Säns.
1 O Herr Gott, du best jnädijch jewast to dien Launt; du hast Joakop siene Jefangenschoft trigj jedreit.
2 Du hast dien Folkj äare Gottloosijchkjeit wajch jenomen; du hast aul äare Sind bedakjt. Selah.
3 Du hast aul dien Oaja toop jesaumelt; du hast fonn dee Hett fonn dien Oaja wajch jedreit.
4 O onnse Radunks Gott, drei onns romm, un sie onns nijch lenje ojalijch.
5 Woascht du opp emma oajlijch senne jäajen ons? Woascht du dien Oaja felenjre to aule Jeschlajchte?
6 Woascht ons niehet Laewe jäwe soo daut dien Folkj sikj en die freihe kaun?
7 Wies onns dien Erboarme, O Herr Gott, un jeff onns diene Radunk.
8 Ekj woa heare waut dee Herr Gott saje woat, dan Hee woat Fräd to sien Folkj räde, un to siene Heilje; oba lot dän nijch wada no Dommheit dreihe.
9 Sejchalijch es siene Radunk dijcht bie jekomen no dän dee Am ferjchte; soo daut daut Harlijchkjeit wone kaun enn daut Launt.
10 Erboarme un Woarheit ha sikj toop jetroffe; Jerajchtijchkjeit un Fraed ha sikj jekust.
11 Woarheit woat ut dee Ead rut sprinje, un Jerajchtijchkjeit kjikjt rauf fom Himel.
12 Jo, dee Herr Gott woat onns goodet jäwe, un onns Launt wudd dee Arnt femeare.
13 Jerajchtijchkjeit woat fer Am gone, un woat en Wajch moake fa siene Staupe..
Dee 87 Psalm
Fa dee Kora Säns, en Psalm. En Leet
1 Sien Grunt es enn dee heilje Boaj.
2 Dee Herr Gott haft dee Zions Puate mea leef aus aul dee Zelte enn Joakop.
3 Harlijche Dinje woare fonn die jerät, O Gottes Staut, Selah.
4 Ekj woa Rahab un Babeloon erwäne to dän dee mie kjane; See, Filiste un Tiarus met Ietiopia, disa wea doa jebuaren.
5 En daut saul to Zion jesajcht woare: Disa un Jana weare enn ar jebuaren; un dee Aulahejchsta selfst woat ar bestädje.
6 Dee Herr Gott woat dolteakjne, enn däm daut hee dee Natsjoone dol schriewe woat, dis Maun wea doa jebuare. Selah.
7 Un see Senja, dee de Piep späle. Aul miene Wotakjwale sent en Die.
Copyright © 2001 by Elmer Reimer