Chronological

24 Oba de easchte Dach enne Waeakj auset noch seeha Tiedich wea, kjeeme see nom Grauf, en brochte de Kjriedarie dee see reed jemoakt haude.

² En see funge daut dee Steen fom Grauf wajch jerollt wea,

³ en jinje enenn oba funge daen Herr Jesus sien Lief nich.

⁴ Aus see sikj nu seeha fawunndade doa aewa, meteemol stunnde doa twee Mana bie an dee blenkjrije Kjleede aun haude;

⁵ en aus see sikj seeha enjste en sikj met aeare Jesechta bott oppe Ead buage, saede dee Mana to an: "Wuaromm seakj jie dee Laewndje mank dee Doodje?

⁶ Hee es nich hia, hee es oppjestone. Denkjt aun waut hee junt saed aus hee noch enn Galilaea wea,

⁷ en saed: 'De Menschesaen mott enn Sinda aeare Henj jejaeft woare, en jekjrietsicht woare, en aum dredde Dach wada oppstone.'"

⁸ Donn foll an daut bie daut hee daut jesajcht haud,

⁹ en jinje trig fom Grauf en fetalde dee Alw uk aul dee aundre daut.

¹⁰ Daut wea Marie Magdaleena en Joanna en Joakopp siene Mutta Marie, en dee aundre met an dee de Apostel daut fetalde.

¹¹ Oba aeare Wead shiend an so aus Dommheit, en see jleewde an nich.

¹² [Donn stunnt Peeta opp en rand no daut Grauf, bekjt sikj dol en kjikjt rauf, en sach dee kertun Loakes apoat ligje, en jinkj trig en wunndad sikj waut paseat wea.]

¹³ En kjikj; doa weare daen selwja Dach twee dee reisde no en jewesset Darp daut Emaus heet, onnjefaea saewen Miel fonn Jerusalem,

¹⁴ en unjahilde sikj unjarenaunda fonn aules waut paseat wea.

¹⁵ Nu pasead daut, aus see sikj unjahilde en doafonn raede, daut Jesus selfst sikj nodad en reisd met an;

¹⁶ oba aeare Uage weare feschlote daut see am nich kjande.

¹⁷ En hee saed to an: "Waut es dit fonn waut jie ju unjahoole biem hia gone?" See stunnde truarich stel.

¹⁸ Eena fonn ann, Kleeofas, auntwuad am en fruach, "Best du en Framda enn Jerusalem en weetst nich waut doa enne latste Doag paseat es?"

¹⁹ Hee saed to an: "Waut fonne Dinj?" En see saede to am: "Daut fonn Jesus fonn Natsaret, dee en Profeet wea, kjraftich fer Gott en Mensche enn waut hee deed en saed,

²⁰ en woo onnse Huagapriesta en dee Rejiera am hanjeewe tom Uadeel tom Doot, en ha am jekjrietsicht.

²¹ Oba wie hopte daut hee dee wudd senne dee Iesrael rade wudd; en bowanenn es dit de dredde Dach seit dit aules paseat es.

²² En dan uk noch sent doa walkje fonn dee Fruehes mank onns dee tiedich biem Grauf weare, en erstaunde onns,

²³ en aus see sien Lief nich funge, kjeeme see en saede daut see haude Enjel jeseene dee jesajcht haude daut hee laewd.

²⁴ En walkje dee bie onns weare jinje nom Grauf, en funge daut jrod so aus dee Fruehes jesajcht haude, oba am sage see nich."

²⁵ Donn saed hee to an: "O jie Noare, en stommp enn Hoat aules to jleewe daut dee Profeete jeraet ha.

²⁶ Musst Christus dit nich aules liede en dan enn siene Harlichkjeit enenn gone?"

²⁷ En hee funk bie Mooses aun enn aul dee Profeete muak hee an dietlich enn aul dee Schreft waut fonn am jesajcht wea.

²⁸ En see kjeeme dicht bott daut Darp wua see hanjinje; en hee deed soo aus wan hee wiede gone wull.

²⁹ Oba see beraede am en saede: "Bliew hia met onns, dan daut es soomeeha Owent, en dee Dach es meist to Enj." Hee jinkj met an enenn bie an to bliewe.

³⁰ En daut pasead, aus hee met an saut, daut hee daut Broot neem, en dankt doafaea, en aus hee daut jebroake haud, jeef hee an daut.

³¹ Donn jinje aeare Uage op, en see kjande am, en platslich feschwunk hee fer an.

³² Donn saede see eena tom aundra: "Brende onnse Hoate nich enn onns aus hee met onns raed delengd de Wajch, aus hee onns de Schreft utlaed?"

³³ See stunnde enn dee selwje Stund opp en jinje trigj no Jerusalem, en funje dee Alw fesaumelt, en dee aundre met an,

³⁴ en saede: "De Herr es werklich oppjestone en haft sikj fonn Peeta seene lote".

³⁵ En see fetalde waut oppen Wajch paseat wea, en woo see am jekjant haude aus hee daut Broot jebroake haud.

³⁶ Aus see dit aules fetalde, stunnt Jesus selfst meteemol enn aeare Med, en saed: "Fraed met ju!"

³⁷ Oba see fefeade sikj, en engste sikj seeha, en dochte see sage en Jeist.

³⁸ En hee saed to an: "Wuaromm se jie soo besorcht, en wuaromm kome soone Jedanke enn june Hoate?

³⁹ Seet miene Henj en miene Feet, daut ekj et selfst sie, dan en Jeist haft nich Fleesch en Knoakes so aus jie seene daut ekj ha."

⁴⁰ [Aus hee daut saed, wees hee an siene Henj en Feet.]

⁴¹ Aus see fa Freid en Wunnda noch nich jleewde, saed hee to an: "Ha jie hia waut tom aete?"

⁴² See jeewe am en biet jebrodnet Fesch, en waut Honnich.

⁴³ Hee neem daut en aut fer an.

⁴⁴ Donn saed hee to an: "Dit es waut ekj junt saed aus ekj noch bie ju wea; daut aules daut enn Mooses en dee Profeete en enne Psalme fonn mie jeschraewe es, musst erfelt woare."

⁴⁵ Donn muak hee an daut Festenntnes op daut see de Schreft festone kunne,

⁴⁶ en saed to an: "Soo esset jeschraewe, en soo musst dee Christus liede, en de dredde Dach fom Doot oppstone,

⁴⁷ en daut derch sien Nome Buesse en Sindefejaewunk jepraedicht sull woare unja aule Felkja - en bie Jerusalem aunfange.

⁴⁸ "Jie sent Zeig fonn aul dise Dinje.

⁴⁹ En Kjikjt! ekj schekj mien Foda sien Fespraeakje opp ju; oba blieft enn Jerusalem bott jie met Krauft fonn bowe jekjleet sent."

⁵⁰ He neem an donn erut bott Betanien opptoo, en hoof siene Henj opp aewa an en saeajend an.

⁵¹ En daut pasead aus hee an saeajend daut hee fonn an feschwunk, en fua enopp nom Himel.

⁵² En see jinje trig no Jerusalem met groote Freid,

⁵³ en weare emma em Tempel en saeajende Gott.

20 Nu de easchte Dach enne Waeakj kjeem Marie Magdaleena tiedich wiel et noch Diesta wea nom Grauf, en sach daut dee Steen fom Grauf wajch jenome wea.

² Donn rannd see en kjeem no Siemoon Peeta en dee aundra Jinja daem Jesus leef haud en saed to an: "See habe daem Herr ut daut Grauf jenome, en wie weeta nich wua see am han jelajcht habe.

³ Donn jinje Peeta en dee aundra Jinja rut en jinje no daut Grauf.

⁴ See rannde beid toop, oba dee aundra Jinja rannd Peta feropp, en kjeem eascht nom Grauf.

⁵ Hee beckjt sikj dol en kjikjt nenn, en sach dee Leiwant Kjleeda doa lige, oba hee jinkj nich enenn.

⁶ Donn kjeem Siemoon am hinjaraun, en jinkj enn daut Grauf enenn, en sach dee Leiwant Kjleeda ligje,

⁷ en daut Haunduak daut romm sien Kopp wea, nich bie dee Leiwant Kjleeda ligje, oba toop jelajcht en bie sikj selfst ligje.

⁸ Donn jinkj dee aundra Jinja dee eascht wea bott daut Grauf jekome, uk enenn, en sach, en jleewd.

⁹ Dan see wiste de Schreft noch nich daut hee fomm Doot oppstone must.

¹⁰ Donn jinje dee Jinja wada no hus.

¹¹ Oba Marie stunnt bute biem Grauf en hield. Aus see doa hield, beckjt see sikj en kjikjt em Grauf enenn,

¹² en sach twee Enjel sette enn witte Kjleeda, eena biem Koppen-enj, en eena biem Feeten Enj wua Jesus sien Lief jelaeaje haud,

¹³ en dee saede to aea: "Fru, wuaromm hielst du?" See saed to an: "Dee ha mien Herr wajch jenome en ekj weet nich wua see am hanjelajcht habe. Aus see daut jesajcht haud, dreid see sikj romm, en sach Jesus doa stone, wist oba nich dautet Jesus wea.

¹⁵ Jesus saed to aea: "Fru, wuaromm hielst du? Waem seakjst du?" See docht daut wea de Goadna en saed to am: "Herr, wan du am wajch jedroacht hast, dan saj mie wua du am hast hanjenome, dan woa ekj am hole."

¹⁶ Jesus saed to aea: "Marie!" See dreid sikj omm en saed to am en Hebraeesch: "Rabunie!" daut meent Leara.

¹⁷ Jesus saed to aea: "Fot mie nich aun, wiel ekj sie noch nich enopp jefoare no mien Foda; oba go no miene Breeda en saj an: Ekj go enopp no mien Foda en jun Foda, en no mien Gott and jun Gott."

¹⁸ Marie Magdaleena kjeem en saed de Jinja: "Ekj hab daem Herr jeseene," en saed an waut hee to aea jesajcht haud.

¹⁹ Daen selwja Dach oppenowent, daut wea de easchte Dach enne Waeakj, en de Daeare weare toojeschlote wua dee Jinja sikj fesaummelt haude ut ansgt fa de Jude, kjeem Jesus en stunnt enne med, en saed to an: "Fraed met ju!"

²⁰ Aus hee dit jesajcht haud, wees hee an siene Henj en siene Sied. Donn weare dee Jinja froo aus see daem Herr sage.

²¹ Donn saed Jesus wada to an: "Fraed met ju! Soo aus de Foda mie jeschekjt haft, soo shekj ekj ju."

²² Aus hee daut jesacht haud, puest hee an aun, en saed to an: "Naemt daen Heilje Jeist.

²³ Waem siene Sind jie jejaewe, dee sent fejaeft, en waem siene Sind jie hoole, dee sent jehoole."

²⁴ Oba Toomas, eena fonn dee Twalw, uk Tweelinkj jenannt, wea nich bie an aus Jesus kjeem.

²⁵ Dee aundre Jinja saede donn to am: "Wie habe daem Herr jeseene!" Oba hee saed to an: "Bott ekj dee Naeajelmoole en siene Henj see, en miene Finjasch doa enenn laj, en miene Haunt enn siene Sied enenn laj, woa ekj nich jleewe."

²⁶ Omm acht Doag weare siene Jinja wada toop, en Toomas wea uk doa. Donn kjeem Jesus, de Daeare weare toojeschlote, en stunnt mede mank an, en saed: "Fraed met ju!"

²⁷ Donn saed hee to Toomas: "Reakj emol diene Finjasch haea en kjikj no miene Henj, en reakj diene Haunt haea en laj dee en miene Sied. En sie nich onnjleefsch, oba jleew!"

²⁸ Toomas auntwuad en saed to am: "Mien Herr en mien Gott!"

²⁹ Jesus saed to am: "Jleefst du wiel du jeseene hast? Seelich sent dee, dee nich seene, en doch jleewe."

³⁰ Jesus deed uk noch fael aundre Teakjens fer siene Jinja dee nich en dit Buuk jeschraewe sent,

³¹ oba dise sent jeschraewe daut jie jleewe kjenne daut Jesus dee Christ es, de Gottessaen, en daut jie derch daen Gloowe enn sien Nome kjenne daut Laewe habe.

21 Nodaem leet Jesus sikj wada seene fonn siene Jinja biem tibearische Maea. Daut pasead so aus dit:

² Siemoon Peeta, Toomas dee Tweelinkj, Natanael fonn Kana en Galilaea, Tsebedaeus siene Saens, en noch twee aundre Jinja weare toop.

³ Siemon Peeta saed to an: "Ekj go fesche." See saede to am: "Wie woare met die met kome." See jinje rut, steaje enne Lomm enenn, en dee Nacht jreepe see nusscht."

⁴ Tiedich tsemorjenst stunnt Jesus aum Eewa, oba de Jinja wiste nich dautet Jesus wea.

⁵ Donn fruach Jesus an: "Ha jie kjeene Fesch?" See auntwuade am: "Nae!"

⁶ Hee saed to an: "Schmiet daut Nat aune rajchte sied fonne Lomm, dan woa jie finje." See schmeete daut, en donn haude see soo fael daut see daut Nat nich kunne enenn krieeje.

⁷ Donn saed dee Jinja daem Jesus leef haud to Peeta: "Daut es de Herr!" Aus Siemoon Peeta head dautet de Herr wea, neem hee sien Wanikj eromm, wiel hee wea noaktich, en schmeet sikj em Maea enenn.

⁸ Oba dee aundre Jinja kjeeme enn daut kjleene Lomm, wiel see weare nich wiet fomm Eewa, mau bie hunndat Meeta, en schlapte daut Nat foll Fesch.

⁹ Aus see donn oppem Launt enopp steaje, sage see en Kolefia aul reed, en Fesch oppem Fia, en Broot.

¹⁰ Jesus saed to an: "Brinjt fonn dee Fesch dee jie jejraepe ha."

¹¹ Siemoon Peeta jinkj en schlapt daut Nat foll groote Fesch oppem Launt enopp, - hunndat dree-e-feftich, en wan doa uk so fael weare, reet daut Nat doch nich twei.

¹² Jesus saed to an: "Komt Freestikj aete!" Kjeena fonn dee Jinja woagd sikj am to froage: "Waea best du?" wiel see wiste dautet dee Herr wea.

¹³ Jesus kajeem en neem daut Broot en jeef an daut, uk fonn dee Fesch.

¹⁴ Dit wea nu daut dredde Mol, daut Jesus sikj jeoppenboat haud to siene Jinja no daem daut hee fom Doot wea oppjestone.

¹⁵ Aus see jeaete haude, saed Jesus to Siemoon Peeta: "Siemoon, Jonas Saen, hast du ne jratre Leew fa mie aus dise?" Hee saed to am: "Jo, Herr, du weetst daut ekj die goot sie." Jesus saed: "Dan fooda miene Lama!"

¹⁶ Hee saed tom tweede mol to am: "Siemoon, Jonas Saen, hast du mie Leef?" Hee saed to am: "Jo, Herr, du weetst daut ekj die goot sie." Jesus saed to am: "Dan weid miene junge Shop."

¹⁷ Hee saed daut dredde mol to am: "Siemoon, Jonas Saen; best du mie goot?" Peeta wea jeschloage daut hee am daut dredde mol fruach, "Best du mie goot?" en saed to am: "Herr, du weetst aules, du weetst daut ekj die goot sie." Jesus saed to am: "Fooda miene junge Shop.

¹⁸ Enn Woarheit, enn Woarheit saj ekj die: aus du jinje weascht, holdsd du die selfst daen Gort omm en jingst wuaemma du han wust, oba wan du woascht oolt senne, woascht du diene Henj utstrakje, en sestwaea woat die daen Gort aunhole, en woat die handroage wua du nich han west."

¹⁹ Hee saed dit omm aun to diede derch waut fonn Doot hee Gott feharliche wudd. Aus hee daut jesajcht haud, saed hee to am: "Folj mie no!"

²⁰ Peeta dreid sikj donn omm en sach daen Jinja daem Jesus Leef haud, dee sikj uk biem Owenkost aete aun Jesus sien Brost jelaent haud en jefroagt haud, "Waea es dee, dee die ferode woat?" - aus Peeta daem sach saed hee to Jesus: "Herr, ei waut met disem?"

²² Jesus saed to am: "Wan ekj wel habe daut dee saul hia bliewe bott ekj trigj kom, waut jeit die daut aun? Folj du mie no!"

²³ Dise raed jinkj donn romm mank dee Breeda daut dis Jinja nich stoawe wudd, oba Jesus saed nich to am daut hee nich stoawe wudd, oba, "wan ekj wel daut hee hia bliewe saul bott ekj trigj kom, waut jeit die daut aun?"

²⁴ Dit es dee Jinja dee Zeichness jeft fonn dise Dinje, en haft dee dol jeschraewe, en wie weete daut sien Zeichnes woa es.

²⁵ Doa sent uk fael aundre dinje dee Jesus deed, en wan dee aule sulle eenselt dol jeschraewe woare, wudd ekj denke daut de Welt selfst nich wudd Ruem habe fa aul dee Beakja.