Chronological

28 Oba lot aum Saubat auset dicht biem easchta Dach enne Waeakj kjeem, kjeeme Marie Magdaleena en dee aundre Marie omm daut Grauf to beseene.

² En kjikj! doa pasead en grootet Eadbaebe; dan daem Herr sien Enjel kjeem utem Himel, en rolld daen Steen wajch en sad sikj doa enopp.

³ Sien Aunseene wea soo aus en Blits, en siene Kjleeda weare soo wit aus Schnee.

⁴ Ut Angst fa am, tsetade dee Wajchta en folle han soo aus wan see Doot weare.

⁵ En dee Enjel saed to dee Fruhes: "Aengst junt nich, dan ekj weet daut jie Jesus seakje dee jekjrietsicht wea.

⁶ Hee es nich hia, dan hee es oppjestone soo aus hee saed; komt, seet dee Staed wua hee jelaeaje haft.

⁷ En got schwind en fetalt siene Jinja daut hee fom Doot oppjestone es, en kjikjt! hee jeit fer junt no Galilaea. Doa woa jie am seene. Kjikjt! Ekj ha junt jesajcht!"

⁸ En see jinje schwind fom Grauf wajch enn Angst en groote Freid, en rande dee Jinja daut to fetale.

⁹ En seet! Jesus bejaeajend an en saed: "Ekj jrees junt!" En see kjeeme no am, en hilde am aune Feet, en baede am aun.

¹⁰ Donn saed Jesus to an: "Aengst junt nich. Got en sajcht miene Breeda daut see no Galilaea gone, doa woare see mie seene."

¹¹ Waearent see jinje, kjeeme walkje fonn dee Aunstaultswajchta enne Staut enenn, en fetalde dee Huagapriesta waut paseat wea.

¹² Dee fesaumelde sikj met dee Elteste, en hilde Rot, en jeewe dee Soldota jenuach Jelt,

¹³ en saede: "Sajcht daut dee Jinja enne Nacht kjeeme en stoole am wajch wiel wie schleepe.

¹⁴ En wan daut fer daem Rejeara kjemt, woa wie am aewaraede, daut jie omm nusscht sorje brucke."

¹⁵ Dee neeme daut Jelt en deede soo aus an wea unjarecht worde. En dee Raed wort fespreet mank aul dee Jude bott fonndoagendach.

¹⁶ Donn jinje dee alf Jinja no Galilaea, no daen Boajch soo aus Jesus bestalt haud.

¹⁷ Aus see am sage, baede see am aun, oba eenje twiewelde.

¹⁸ En Jesus kjeem no an, raed met an en saed: "Aule Follmacht es mie jejaeft em Himel en oppe Ead.

¹⁹ Nu got en moakt Jinja mank aule Natsjoone, en tauft an enn daem Foda, en daem Saen, en daem Heilje Jeist sien Nome,

²⁰ en leat an aules beoobachte waut ekj junt befoole ha; en kjikjt! ekj sie aule Doag met junt, soo lang aus de Welt steit."

16 Aus dee saubat febie wea, koffte Marie Magdaleena en Jakoobus siene Mutta Marie en Salome, Kjriedarie, omm hantogone en am enntosaulwe.

² En tiedich aum easchta Dach enne Waeakj kjeeme see no daut Grauf, jrod aus dee Sonn oppjinkj.

³ En see saede eena tom aundra: "Waea woat onns daen Steen fonn dee Opninj wajch rolle?

⁴ Aus see nehecht kjikjte, sage see daut dee Steen aul wajch jerollt wea, - daut wea en seeha groota Steen.

⁵ See jinje enn daut Grauf enenn, en sage aune rajchte Sied en junja Maun sette, enn wite Kjleeda, en see feschroke sikj seeha.

⁶ Oba hee saed to an: "Enjst junt nich. Jesus, dee Natsareena, dee jekjrietsicht wea, es oppjestone; hee es nich hia. Kjikjt! doa es dee Staed wua see am hanlaede..

⁷ Oba got en sajcht siene Jinja, en Peeta, daut hee fer junt no Galilaea jeit; doa woa jie am seene soo aus hee junt saed."

⁸ See jinje rut en rande fonn daut Grauf wajch, dan see tseddede en weare fewillat; en saede kjeenem irjent waut, dan see haude Ansgt.

⁹ Nu aus Jesus teadich daen easchte Dach enne Waeakj oppjestone wea, leet hee sikj eascht seene fonn Marie Magdaleena, fonn waem hee saewen beese Jeista rut jedraewe haud.

¹⁰ See jinkj eascht en saed daen dee met am weare jewast, dee nu hielde en truade.

¹¹ En aus dee heade daut Jesus laewd, en daut see am jeseene haud, jleewde see daut nich.

¹² No daut oppenboad hee sikj enn en aundra Jestault to twee aus see opp en Launtwajch jinje;

¹³ en dee jinje en fetalde dee aundre daut, oba dee jleewde daen uk nich.

¹⁴ Lota aus dee Alw romm saute, oppenboad hee sikj to an, en schullt an fa aea Onngloowe, en daut aea Hoat soo hoat wea daut see daen nich jleewde dee am jeseene haude, no daem daut hee oppjestone wea.

¹⁵ Donn saed hee to an: "Got enn dee gaunse Welt en praedicht aule Kjreatua daut Evanjeelium.

¹⁶ Waeaemma jleeft en sikj taufe lat woat seelich woare, oba waeaemma nich jleeft woat fedaumt woare.

¹⁷ En dise Teakjens woare daen nofolje dee jleewe: En mien Nome woare see beese Jeista rut driewe, dee woare met niehe Tunge raede,

¹⁸ dee woare Schlange naeme, en wan see Jeft drinkje woat an daut nusscht schode, dee woare aeare Henj opp dee Kranke opplaje en dee woare Jesunt woare."

¹⁹ Nu no daem daut dee Herr Jesus met an jeraet haud, wort hee em Himel enenn jenome, en sad sikj dol aun Gott siene rajchte Haunt.

²⁰ Jane oba jinje rut en deede aulewaeaje praedje, en de Herr wirkjt met an en bestaedijd daut Wuat met Wunndateakjens dee doaropp foljde