Chronological

Dee 95 Psalm

¹ O komt, un sinjt to däm Herr Gott; moakt en froohet Jelud to däm groota Steen fonn onnse Radunk.

² Well wie fer sien Jesecht kome met Preis; well wie to Am juble fa Freid met Jesank.

³ Dan dee Herr Gott es en groota Gott, un en groota Kjeenijch äwa aule Kjeenijchs.

⁴ Dee deepa Städe enne Ead sent enn siene Henj; dee Spetze fonne Boaj sent uk siene.

⁵ Dee See es sient, un hee muak dee; un siene Henj deede daut dreajet Launt forme.

⁶ O kom, well wie Am aunbäden un onns dol bäajen; well wie onns dolkjneehe fer däm Herr Gott dee onns jemoakt haft.

⁷ Dan Hee es ons Gott; un wie sent daut Folkj fonn siene Weid, un dee Schop enn siene Haunt. Fondoag wan die siene Stem heascht,

⁸ dan doo dien Hoat nich hoat moake aus enn Meriba; aus enn dän Dach fonn Massa enne Wiltnis,

⁹ aus june Fodasch Mie ut proowde, dee fesochte Mie un sage mien Woakj.

¹⁰ Fa Featich Joa jrämd ekj mie äwa dee Jennerazion; un ekj säd: "Daut es en Folkj daut emma enn äa Hoat erre deit, un, dee kjane nich miene Wäaj.

¹¹ Soo schwua ekj enn mien Oaja daut see nich wudde enn miene Ru enenn kome.

Dee 97 Psalm

¹ Dee Herr Gott rejiat; lot dee Ead froo senne; lot dee Menj Insel froo senne.

² Wolkje un Diesta sent romm Am; Jerajchtichkjeit un Jerejcht sent dee Gruntloag fonn sien Troon.

³ En Fia jeit fer am un febrent aul siene Fiend runt om.

⁴ Sien Blitz deit de gaunse Welt oppdache; dee Ead sach un scheddad.

⁵ Dee Boaj äwa dee gaunse Welt deede schmelte soo aus Waus fer däm Herr Gott sien Jesejcht.

⁶ De Himmel deit siene Jerajchtichkjeit bekaunt moake un aul dee Mensche seene siene Harlichkjeit.

⁷ Aul dee, dee Jetta deene schäme sikj, dee sikj selfst puche met äare Jetta, aule Jetta motte sikj fer Am dol bäaje.

⁸ Zion head un wia Froo; jo, dee Judah Dajchta freide sikj äwa diene Jerejchte, O Herr Gott.

⁹ Dan Du, Herr Gott, hast dee Ea enn dee gaunse Welt; du best huach oppjehowe äwa aule Jetta.

¹⁰ Jie dee däm Herr Gott leef habe, doot daut Beeset hausse; Hee bewoat siene Heilje äare Seel; Hee deit dän ut de Gottloose äare Henj rade.

¹¹ Lijcht woat jeseit fa dee Jerajchte, un Freid fa dän dee opprajcht sent en Hoat.

¹² Sie froo enn däm Herr Gott, O jie Jerajchte; jäft Dank fa daut Behoole fonn siene Heilichkjeit.

Dee 98 Psalm

En Psalm.

¹ O sinjt en niehet Leet to däm Herr Gott, dan Hee haft wundaboare Dinje jedone, siene rajchte Haunt un sien Oarm ha dän Siech fa Am jewonne.

² Dee Herr Gott haft siene Radunk bekaunt jemoakt; Hee haft siene Jerajchtichkjeit opjedakjt to dee Nazione äare Uage.

³ Hee haft sien Erboarme un Woarheit behoole to Israel; derjch dee gaunse Welt es onns Gott siene Radunk to seene.

⁴ Moakt en froohet Jelud to däm Herr Gott derjch dee gaunse Ead; bräakj rut un siet froo un sinjt Preis.

⁵ Sinjt Preis to däm Herr Gott met dee Jittoa; met dee Jittoa un dee Stem fonn en Leet.

⁶ Met Trompeete un daut Jelud fonn en Huarn, moakt en froohet Jelud fer däm Kjeenich Herr Gott.

⁷ Lot dän See roare, un daut Follet; dee Welt un dee, dee doabenne wone.

⁸ Lot dee Riefasch äare Henj klautsche; lot daut Hejchste toop juble

⁹ fer däm Herr Gott; dan Hee kjemt dee Ead to rechte; met Jerajchtichkjeit saul Hee dee Welt rechte, un daut Folkj Opprajcht rechte.

Dee 99 Psalm

¹ Dee Herr Gott rejiat; lot dee Mensche zetre; Hee set opp dee Cherubim; lot dee Ead schedre.

² Dee Herr Gott es groot enn Zion; un Hee es huach äwa aul dee Mensche.

³ Dee selle dien groota un furchtboara Nome danke; dee es Heilijch.

⁴ Däm Kjeenich siene Macht haft uk Jerejcht leef: Du hast Opprajcht jejrint; du deist Jerecht oabeide, un Jerajchtichkjeit enn Joakopp.

⁵ Doot däm Herr Gott onns Gott eare, un doot bie siene Footbenkj aunbäde, dan Hee es Heilijch.

⁶ Mooses un Oant weare mank dee Priesta; un Samuel wia mank dän dee sien Nome aunroope deede; dee roopte däm Herr Gott aun, un Hee deed an auntwuate.

⁷ Hee räd met an enn dee Wolkj; dee hilde siene Zeichnise un daut Jesats daut Du to an jeefst.

⁸ Du deetst an auntwuate, O Herr Gott onns Gott: du weascht en Gott dee an fejäwe deed, oba deetst Rach eewe opp äare Woakje.

⁹ Doo däm Herr Gott ons Gott eare, un aunbäde bie sien heilja Boajch; dan dee Herr Gott onns Gott es Heilijch.