Chronological
Dee 7 Psalm
En Leet fonn Doft, daut hee to daem Herr Gott sunk wäajen däm Benjamiet Kusch siene Wead.
1 O Herr Gott mien Gott, ekj seakj no Tooflucht enn die; rad mie fonn aul dän dee mie hinjaraun sent, un doo mie aufleewre.
2 Daut hee nijch miene Seel feriete saul soo aus en Leiw, un daut to Bieta rit un doa kjeene es dee mie aufleewre woat.
3 O Herr Gott mien Gott, wan ekj dit jedone ha, un doa beeset es enn miene Henj;
4 Wan ekj Beeset to mien Frint jedone ha, oda wan ekj Raup jenome ha oone Uasoak fonn däm dee mien Fient wea -
5 dan lot dee Fient mie hinjaraun joage un miene Seel näme; un mien Laewe no de Ead traumple,un miene Ea enn dän Stoff laje. Selah.
6 Sto opp, O Herr Gott enn dien Oaja; sie oppjeräajcht wäajen miene Fiend äa Rach; un wakj opp fa mie! Du hast Jerejcht aunjekommendeat.
7 En dee Mensche äare Fesaumlunk saul romm die senne, un du woascht doa huach äwa trigj kome;
8 Dee Herr Gott woat sien Folkj rejchte. O Herr Gott, doo mie rejchte no miene Jerajchtijchkjeit, un no miene Follstendijchkjeit.
9 O lot dee Gottloose äare Gottloosijchkjeit to en Enj kome; un du woascht dee Jerajchte bestädje; dan dee Jerajchta Gott deit daut Hoat un Jewesse utproowe.
10 Mien Feteidje es opp Gott, dee dee Jerajchte enn Hoat rade deit.
11 Gott es en jerajchta Rejchta, un Gott es jieda Dach oajalijch äwa dee Sinda.
12 Wan dee sikj nijch omm dreihe woare, dan woat hee sien Schweat schoape; hee haft sien Boaje jeboaje, hee muak daut reed;
13 Jo, hee haft Jereetschoft reed jemoakt fa dän Doot; hee woat siene Fiele heet moake fa dän dee hinjaraun joage.
14 See, hee es met Beeset febunje, un woat Schowanackjet fäa brinje, hee es en Foda jeworde to Läajes;
15 Hee growd ne Kul, un es enn dän Growe enenn jefolle dän hee jemoakt haft.
16 Sien Showanackjet woat opp sien eajna Kopp trigj kome, un sien Jewault saul opp sien Scheedel trigj kome.
17 Ekj woa däm Herr Gott danke enn siene Jerajchtijchkjeit, un ekj woa Preis sinje to däm aulahejchsta Herr Gott sien Nome.
Dee 27 Psalm
En Psalm fonn Doft.
1 Dee Herr Gott es mien Lijcht un miene Radunk, wäm sull ferjchte? Dee Herr Gott es dee Krauft enn mien Laewe, fa wäm sull ekj mie enjste?
2 Aus dee, dee Beeset aungone, miene Fiend un miene Jäajne, no mie kjeeme mien Fleesch opp to fräte, stolpade dee un folle dol.
3 Wan ne Armee sikj sull jäajen mie loagre, wudd ekj enn mien Hoat nijch engste; wan doa uk sull Kjrijch jäajen mie oppkome, woa ekj enn dit fetruehe.
4 Ekj ha däm Herr Gott no eent jefroacht, daut woa ekj seakje, daut ekj aul miene Doag enn däm Herr Gott sien Hus wone kaun, däm Herr Gott sien Straumet to seene, un enn sien Tempel aun to froage.
5 Dan enn dee Beese Doag woat hee mie festäakje enn daut Jeheemet fonn sien Aundachts Zelt; Hee woat mie opp dän groota Steen oppstale.
6 En nu woat hee mie opphäwe hejcha aus miene Fiend dee mie ommrinje, un ekj woa Freid Opfa brinje enn sien Aundachts Zelt; ekj woa sinje, Jo, ekj woa Preis sinje to däm Herr Gott.
7 Horjch, O Herr Gott wan ekj die aunroop, un doo mie Gonnst bewiese, un doo auntwuate.
8 Mien Hoat saed to die: "Seakj mien Jesejcht;" O Herr Gott, ekj woa dien Jesejcht seakje.
9 Doo dien Jesejcht nijch fonn mie festäakje, schekj dien Deena nijch wajch enn Oaja. Du best mien Help jewast, felot mie nijch, doo nijch fesieme, O mien Radunks Gott!
10 Wan mien Foda un miene Mutta mie felote, dan woat dee Herr Gott mie oppnäme.
11 Lea mie dien Wajch, O Herr Gott, un leid mie enn en jlikja Wajch wäajen dän dee mie beoobachte.
12 Aewajef mie nijch aun miene Fiend aeare Seel, dan faulsche Zeij sent jäajen mie oppejstone, un soone dee Ommenschlijchet püste.
13 Buta wan ekj jejleeft haud daut ekj däm Herr Gott sien Goots jeseene haud enn dee Läwendje äa Launt.
14 Hop enn dän Herr Gott; sie stoakj, en Hee woat dien Hoat stoakje; jo, hop enn däm Herr Gott.
Dee 31 Psalm
To dän haupt Musikaunt, en Psalm fonn Doft.
1 Ekj socht Tooflucht enn die, O Herr Gott; lot mie niemols to schaund kome, rad mie enn diene Jerajchtijchkjeit.
2 Beaj dien Ua dol no mie, rad mie schwind, sie en stoakja Steen to mie fa en Fasting Hus fa mie, mie to rade.
3 Dan du best mien groota Steen, un miene Fastinj, leid un lenk mie omm dien Nome haulwe.
4 Brinj mie ut daut Nat daut see fa mie festoake ha, dan du best miene Krauft.
5 Ekj äwajäw mien Jeist enn dien Henj enenn, dan du hast mie aufjeleewat, O Herr Gott, dee Woarheits Gott.
6 Ekj ha dän jehaust dee nutsloose Jetta habe, oba ekj doo enn däm Herr Gott fetruehe.
7 Un ekj woa froo senne un mie freihe enn dien Erboarme, dan du hast mien Älend jeseene; du weetst dee Trubbels enn miene Seel,
8 un hast mie nijch äwajäft enn mien Fiend äare Henj; du hast miene Feet enn ne breede Städ bestädijcht.
9 Sie mie jnädijch, O Herr Gott, dan ekj sie enn Trubbel, mien Uag es moaga jeworde derjch Trua, miene Seel un mien Buk.
10 Dan mien Läwe kjemt to en enj derjch Trua, un miene Joare met sefte, miene Krauft feschwinjt wäajen miene Sind, un mien Knoakes sent oolt jeworde.
11 Ekj wea en Fe-achte mank aul miene Fiend, oba besondasch to miene Nobasch, un en Forjcht to miene Frind; dee mie buta sage rande wajch fonn mie.
12 Mensche ha fonn mie fejäte soo aus doodja Maun, fonn daut Jedajchtnes wajch, ekj sie soo aus en Jefäs daut feschwinjt.
13 Dan ekj ha daut Noräde fonn Fäl jeheat, doa wea Ansgt aun aule Kaunte, wäarent see sikj toop beräde jäajen mie, see plonde mien Laewe wajch to naeme.
14 Oba ekj deed enn die fetruehe O Herr Gott, ekj säd: "Du best mien Gott."
15 Miene Tiede sent enn diene Henj, rad mie fonn miene Fiend äare Henj un fonn dän dee mie hinjaraun sent.
16 Moak dien Jesejcht opp dien Deena to schiene; rad mie enn dien Erboarme.
17 Halp mie soo daut ekj mie nijch schäme bruck, O Herr Gott; dan ekj ha die aunjeroopt; lot dee Gottloose sikj schäme; lot dän stel senne enn daut Grauf.
18 Lot dee Leppe dee leaje stel jemoakt woare, dee onnbekjemmat jäajen dee Jerajchte räde met Stolltheit en Spott.
19 Woo Groot es dien Goots daut du oppjelajcht hast fa dän dee die ferjchte; Du hast jeoabeit fa dän dee fer Menscheit enn die fetruede.
20 Du woascht dän festäakje enn daut Jeheemet fonn dien Doasenne, fonn Mensche aea Plone; du woascht dän bedakje enn ne Bood fonn daut Sträwe met Tunje.
21 Jesäajent es dee Herr Gott, dan hee haft wunndaboa jeoabeit met sien Erboarme to mie enn ne beloagada Grootstaut.
22 Dan ekj säd enn mien Haust, ekj sie aufjeschnäde fonn diene Uage; sejchalijch hast du miene Jebäde jeheat aus ekj to die schreajch.
23 O hat däm Herr Gott leef, aul jie siene Heilje; dee Herr Gott deit dee Truehe oppbewoare, un deit dee Stollte trigj tole emm folle.
24 Sie stoakj, un Hee woat dien Hoat stoakje, aul jie dee enn däm Herr Gott hope.
Dee 34 Psalm
En Psalm fonn Doft aus sien Benäme enndad fer Abimilech, un dee am wajch schekjt, en hee jinkj.
1 Ekj woa däm Herr Gott säajne to aule Tiede. Sien Preis saul emma enn mien Mul senne.
2 Miene Seel woat sikj puche enn däm Herr Gott; dee Deemietje sele daut heare un sikj freihe.
3 O feharlijcht däm Herr Gott met mie, un wel wie toop sien Nome opphäwe.
4 Ekj socht däm Herr Gott, un hee deed mie auntwuate, un rad mie fonn aul miene Forjcht.
5 See kjikjte no am, un weare jefelt met Lijcht; un äare Jesejchte bruckte sikj nijch schäme.
6 Dis Oama Mensch roopt, un dee Herr Gott head, un rad am ut aul siene Trubbels.
7 Daem Herr Gott sien Enjel loagat runnt omm dän dee am ferjchte, un Hee deit an rade.
8 Schmack un see daut dee Herr Gott goot es; jesäajent es dee Maun dee enn am fetruet.
9 O ferjcht däm Herr Gott, jie Heilje, dan dee, dee am ferjchte fältet aun nuscht.
10 Dee junje Leiw ha Noot jeläde un sent hunjrijch, oba dee däm Herr Gott seakje fältet aun nuscht Goodet.
11 Komt, horjcht no mie, miene Säns, un ekj woa junt däm Herr Gott siene Forjcht ennleare.
12 Wäa es dee Maun dee Laewe wel ha, dee goode Doag leef haft soo daut hee Goodet seene kaun?
13 Hool diene Tunj fonn Beeset, un diene Leppe fonn Faulscheit;
14 Drei die wajch fonn Beeset; seakj Fräd un joag daut hinjaraun.
15 Däm Herr Gott siene Uage sent opp dee Jerajchte, un siene Uare sent op to äa schriehe.
16 Däm Herr Gott sien Jesejcht es jäajen soone dee Beeset eewe, dän aea Jedachtnes fonne Ead wajch to näme.
17 Dee Jerajchte roope, un dee Herr Gott heat, un deit dän rade fonn aul äa Älend.
18 Dee Herr Gott nodat sikj no soone dee en jebroaknet Hoat ha, un deit soone rade dee en Busfoadja Jeist ha.
19 Dee Jerajchte erfoare fäl Beeset, oba dee Herr Gott deit an rade ut daut aules,
20 un bewoat aul sien Knoakes, nijch eent es jebroake.
21 Daut Beeset woat dee Gottlose fenijchte, un soone dee dee Jerajchte hause woare schuldijch senne.
22 Dee Herr Gott deit siene Deena äare Seel rade; un kjeene fonn dee dee enn am fetruehe woare schuldijch senne.
Dee 52 Psalm
To dän Haupt Musikaunt: en Nodenkje: en Psalm fonn Doft- aus Doeg dee Eedomieta kjeem en fetald Saul, en säd to am: "Doft es no däm Ahimilech sien Hus jekome."
1 Wuaromm deist du die enn Beeset puche, O majchtja Maun? Gott sien Erboarme es eewijch!
2 Diene Tunj deit Fenijchte utjrebble soo aus en schoapet Putsmassa, un deit Lest wirkje.
3 Du hast Beeset meeha leef aus Goodet; Leaje meeha aus Jerajchtijchkjeit to räde. Selah.
4 Du hast aule Wead leef dee oppschlucke, O lestje Tunj!
5 Gott woat die jrod soo fenijchte fa emma; Hee woat die wajch näme, soogoa wajch plekje fonn dien Tselt; un erut riete fonn daut Launt wua dee Läwendje sent. Selah.
6 Un dee Jerajchte sele seene un ferjchte, un äwa am lache, en saje:
7 Hia es dee Maun dee Gott nijch siene Tooflucht muak, hee fetrued sikj enn sien Rikjdom; hee wea stoakj enn sien Fenijchte.
8 Oba ekj sie soo aus en jreena Oliewaboom enn Gott sien Hus; ekj doo enn Gott sien Erboarme fetruehe fa emma un emma.
9 Ekj wel die fa emma danke, wiels du daut jedone hast, un ekj doo enn dien Nome hope, wiels daut es Goot enn dee Heilje äa Doasenne.
Copyright © 2001 by Elmer Reimer