Chronological

² मुखिया लोगो, इ सँदेसा क सुना।
    हे इ देस क बसइया लोगो, तू पचे सबहिं मोर बात सुना।
का तु पचन्क सारी जिन्नगी मँ पहिले कबहुँ कउनो अइसी बात घटी ह
    का तू पचन्क पुरखन क जिन्नगी मँ कबहुँ कउनो अइसी बात घटी ह
³ इ बातन क बारे मँ तू पचे आपन लरिकन क बतावा करब्या
    अउर तोहार पचन्क लरिकन इ सबइ बातन आपन लरिकन क बतइहहीं
    अउर तोहार पचन्क नाती पोतन इ सबइ बातन अगवा क पीढ़िन क बतइहीं।
⁴ कुतरत भइ टिड्डियन स जउन कछू भी बच गवा,
    ओका भिन्नात भइ टिड्डियन खाइ लिहन
अउर भिन्नात भइ टिड्डियन स जउन कछू बचा,
    ओका फुदकत भइ टिड्डियन खाइ लिहन ह
अउर फुदकत भइ टिड्डियन स जउन कछू रहि गवा,
    ओका बिनास करइवाली टिड्डियन चट कइ डाइन ह।

⁵ ओ नसाबाज लोगो, जाग्ग, उठा अउ विलाप करा।
    ओ सबहिं दाखमधु पिवइया लोगो, विलाप करा।
काहेकि तू लोगन क लगे अब अउर कबहुँ पिवइ बरे
    मीठ दाखमधु नाहीं होब्या।
⁶ एक सक्तिसाली रास्ट्र क नाईं जउन
    आपन अंगिनत सिपाहियन क संग होइ भयंकर टिड्डियन क मोरे देस पइ हमला करइ बरे आएस।
ओनकर दाँत सेर क दाँत क नाई रहेन,
    ओनकर जबरा सेरनी क जबरा क नाई रहेन।

⁸ अब तू उ जवान दुलहन जइसा जउन आपन होइवाली मनसेधू (मंगेतर) जउन कि सादी स पहिले ही मारा गएस ह
    क कारण सोक क ओढ़ना पहिरे होइ अहइ, रोआ।
⁹ हे याजक लोगो!
हे यहोवा क सेवक लोगो, विलाप करा।
    काहेकि यहोवा क मंदिर मँ स तू अब अउर न तउ अन्न क भेंट अउर न ही पेय भेंट पाउब्या।
¹⁰ खेत बर्बाद होइ गवा अहइँ।
    हिआँ तलक कि धरती भी रोअत ह
    काहेकि अन्न बर्बाद होइ गवा ह।
नवा दाखमधु नाहीं होब्या काहेकि अंगूर क फसल बर्बाद होइ गवा ह
    अउर जइतून क बृछ तेल दइ क काबिल नाहीं होब्या।
¹¹ हे किसान लोगो, तू पचे लाज करा।
    हे अंगूरे क बागबान लोगो, जोर स विलाप करा।
तू पचे गोहूँ अउर जउ बरे भी विलाप करा।
    काहेकि खेते क फसल बर्बाद होइ गवा ह।
¹² अंगूरे क बेलन झुराइ गइ अहइँ
    अउर अंजीर क बृच्छ मुरझात अहइँ।
अनारे क बृच्छ, खजूरे क बृच्छ अउ सेब क बृच्छ,
    बगियन क इ सबइ बृच्छ झुराइ ग अहइँ।
    लोगन क बीच खुसी मरि गइ अहइ।
¹³ हे याजक लोगो, सोक क ओढ़ना पहिरा, जोर स बिलाप करा।
    हे वेदी क सेवक लोगो, जोर स बिलाप करा।
हे मोरे परमेस्सर क दास लोगो, आपन सोक ओढ़ना मँ तू पचे सोइ जाब्या।
    काहेकि अब हुआँ अन्न अउ पेय भेंटन परमेस्सर क मंदिर मँ नाहीं होइहीं।

2 सिय्योन पइ नरसिंहा फूँका।
    मोरे पवित्तर पर्वते पइ चिताउनी सुनावा।
ओन सबहिं लोगन क जउन इ धरती पइ रहत हीं, तू पचे डर स कँपाइ द्या।
    यहोवा क बिसेस दिन आवत अहइ।
    इ बहोत ही लगे अहइ।
² उ दिन अँधियारा भरा होइ, उ दिन उदासी अउर सोक क होइ,
    उ दिन करिया होइँ अउर उ दिन दूदिनर्न होइ।
भोरे क पहिली किरन क संग तू पचन्क पहाड़े पइ फउज फइलत भइ देखाँइ देइ।
    उ फउज बिसाल अउर सक्ति होइ।
तू अइसा फउज पहिले तउ कबहुँ भी नाहीं लखा रहा
    अउ अगवा भी कबहुँ भविस्स काल मँ अइसा नाहीं लखी।
³ उ फउज इ धरती क धधकत आगी जइसे तहस-नहस कइ देइ।
    जब फउज उ धरती स होइ क आगे बढ़इ
तउ उ धरती जउन कि एदेन क बगीचा जइसा रहा उ एक उजड़ भवा रेगिस्तान मँ बदल जाइ।
    ओनसे कछू भी नाहीं बचि पाइ।
⁴ टिडिय घोड़न क तरह देखइ जात अहइ
    अउर अइसे दउड़त हीं जइसे सिपाही दोड़त हीं।
⁵ का तू इ आवाज क सुनत ह।
इ पहाड़े पइ चढ़त भए
    रथन क खड़-खड़ क आवाज क नाई आवाज करत ह।
इ आवाज अइसा अहइ जइसे
    जलत भइ भूसा क चटपट आवाज।
उ सबइ लोग सक्तिवाले अहइँ।
    उ पचे जुद्ध बरे तइयार अहइँ।
⁶ इ फउज क अगवा लोग डर स काँपत हीं।
    ओनकर मुँर डर स पिअर पड़ि जात हीं।

¹² किन्तु अब भी यहोवा क सँदेसा इ अहइ:
    “पुरे मन स मोरे लगे वापस आवा।
विलाप करा अउ चीख व पुकार करा
    अउर उपवास करा।
¹³ अरे आपन ओढ़ना क बदले,
    तू पचे आपन सोक व दुःख क देखाइ बरे आपन दिल क ही फारि डावा।”
तू पचे आपन परमेस्सर यहोवा क लगे लउटि आवा।
    उ दयालु अउ करूणा स पूर्ण अहइ।
ओका हाली किरोध नाहीं आवत ह।
    ओकर पिरेम महान अहइ।
होइ सकत ह जउन किरोध उ तू पचन्क बरे सोचे होइ,
    ओकरे बरे उ आपन मन बदल लेइ।
¹⁴ कउन जानत ह, होइ सकत ह यहोवा आपन मन बदल लेइ
    अउर इ भी होइ सकत ह कि उ तू पचन क बरे कउनो वरदान छोड़ जाइ।
फुन तू पचे आपन परमेस्सर यहोवा क
    अन्नबलि अउ पेय भेंट अर्पण कइ पावा।

¹⁵ सिय्योन पइ नरसिंहा फूँका।
    उ बिसेस सभा बरे बोलावा द्या।
    उ उपवास क खास समइ क बोलावा द्या।
¹⁶ तू पचे, लोगन क बटोरा।
    बिसेस सभा बरे ओनका बोलावा।
तू पचे बुढ़वा मनइयन क बटोरा अउर लरिकन क भी संग मँ बटोरा।
    उ सबइ नान्ह गदेलन भी लिआवा जउन अब भी महतारी क दूध पिअत अहइँ।
नई दुलहिन क अउर दुलहा लोगन क
    ओनकर ओलरइ-कमरा स बोलावा।
¹⁷ हे यहोवा क सेवक,
    याजक लोगो आँगन अउ वेदी क बीच विलाप करा।
ओन सबहिं लोगन क इ परथना करइ द्या: “हे यहोवा आपन लोगन पइ दया करा।
    तू पचे आपन लोगन क लजाइ जिन द्या।
    दूसर रास्ट्र क हम लोगन पइ हँसत
भए इ कहइ क मौका जिन द्या कि
    ‘ओनकर परमेस्सर कहाँ अहइ?’”

¹⁸ तउ यहोवा क आपन देस क बारे जलन होइ गवा।
    अउर आपन लोगन क बरे मँ अफसोस परकट किया।
¹⁹ ओनके परथना क उत्तर मँ यहोवा आपन लोगन स कहेस।,
“मइँ तोहरे पचन्क बरे भरपूर अन्न, दाखमधु अउर तेल पठउब।
    मइँ अब दूसर रास्ट्रन क तू पचन्क
    पइ हँसइ नाहीं देब।
²⁰ मइँ उत्तर क हमलाआवर फउजन क तू पचन्क धरती स वापस भेज देब।
    मइँ ओनका झुरान अउ उजड़ी भइ धरती पइ पठाउब।
ओनमाँ स कछू पूरब क समूद्दरे मँ
    अउ ओनमाँ स कछू पच्छिम समूद्दरे मँ जइहीं।
उ पचे मरि भए होइ ओनके सड़त भइ दुर्गन्ध आकासे तलक जाइ
    काहेकि उ पचे बहोत ही खउफनाक करम किहस।
परमेस्सर बहोत महान काम किहेउँ ह।”

²¹ हे धरती, तू डर स जिन काँपा।
    खुस होइ जा अउर आनन्द स भरि जा।
    यहोवा बहोत महान काम किहेउँ ह।
²² ओ मैदान क पसुओ, तू पचे जिन डरा।
    रेगिस्तान क चरागाहन मँ घास उगइहीं।
फल क बृच्छ फल देइ लागिही।
    अंजीर क बृच्छ सबन्त नीक फल अउर अंगूरे क बेलन भरपूर फसल देइहीं।

²⁸ “एकरे पाछे
    मइँ तू सबन्पइ आपन आतिमा उडेरबउँ।
तोहार पचन्क बेटवन-बिटियन भविस्सवाणी करिहीं।
    तोहार पचन्क बूढ़े सपनन लखिहीं
    अउर तोहार पचन्क नउजवान दर्सन लखिहीं।
²⁹ उ समइ मइँ आपन आतिमा
    तोहार दास-दासियन तलक पइ भी उडेरब।
³⁰ धरती पइ अउ अकासे मँ जउन घटित होहीं ओकरे बरे मँ मइँ चेतावनी देब्या।
    हुआँ खून, आगी अउ गहिर धुआँ क स्तम्भ होइ।
³¹ सूरज अँधियारे मँ बदल जाइ
    अउर चाँद खून क रंग मँ बदली।
    तउ फुन यहोवा क दिन जउन कि सचमुच मँ महान अउ भयानक दिन अहइ आइ।
³² तब कउनो भी मनई जउन यहोवा स ओकरे नाउ लइ क परथना करइ ओका बचा लइ जाइ।
    काहेकि यहोवा वादा किहेस ह
    कि सिय्योन क पर्वते पइ अउर यरूसलेम मँ उ सबइ लोग होइहीं जेका बचावा गवा अहइँ।
सिरिफ उहइ लोग बचिहीं
    जेका यहोवा बुलावत ह।

⁹ लोगन क इ बताइ द्या
    जुद्ध क तइयार रहा।
सपहसालार लोगन क जगावा,
    सारे जोधन क नजदीक आइ द्या।
    ओनका हियाँ आइ द्या।
¹⁰ आपन हरे क फारन क पीटिके तरवार बनावा
    अउ आपन हँसुआ क भाला मँ बदल द्या।
दुर्बल लोग जरुर कहइ लागइँ कि
    “मइँ एक ठु सूरबीर हउँ।”
¹¹ हे सबहिं रास्ट्र क लोगो, हाली आवा।
    एक ठु जगह पइ बटुर जा।
    ये यहोवा, तू भी आपन बरिआर सिपाहियन क लइ आवा।
¹² हे रास्ट्र जागा!
    यहोसापात क घाटी मँ आ जा।
मइँ सबहिं रास्ट्रन क जउन कि मोरे धरती क आसपास रहत अहइँ
    क निआउ करइ बरे बइठिहीं।
¹³ तू पचे आपन संग हँसुआ लइ आवा,
    काहेकि फसल पक गवा ह।
आवा, तू पचे अंगूर रौंदा
    काहेकि अगूंर क कोल्हू भरा भवा अहइ।
घड़न भरि भवा अइहीं अउर बाहेर उफनिहीं
    काहेकि रास्ट्रन क पाप बहोत बड़का अहइ।

¹⁸ “उ दिन मधुर दाखमधु पहाड़न स टपकी।
    पहाड़न स दूधे क नदियन बहइहीं अउर
    यहूदा क सबहिं झुराइ नदियन बहत भए जले स भरि जइहीं।
यहोवा क मन्दिर स एक फौआरा फूटी
    जउन सित्तीम क घाटी क पानी स सींची।
¹⁹ मिस्र उजाड़ होइ जाइ
    अउर एदोम एक उजाड़ भुइँया मँ बदल जाइ।
काहेकि उ पचे यहूदा क लोगन क संग निर्दयी रहेन।
    उ पचे ओनके ही देस मँ निरपराध लोगन क जान स मारि रहेन।
²⁰ मुला यहूदा मँ लोग हमेसा ही बसा रइहीं
    अउर यरूसलेम मँ लोग पीढ़ी दर पीढ़ियन तलक रइहीं।
²¹ ओ लोग मरे लोगन क बध किहे रहेन एह बरे निहचय ही मइँ ओन लोगन स बदला लेब।
    मइँ कसूरवार लोगन क सजा दइ बिना नाहीं जाइ देब!”