Chronological
मूरति पूजा स इस्राएल क विनास
8 “तुरही क आपन होंठन लगावा। यहोवा क भवन क ऊपर गिद्ध जइसा बनि जा,[a] काहेकि उ पचे मोर करार क तोड़ दिहन जउन ओकरे संग किहे रहेन। उ पचे मोर नेमन क खिलाफ अपराध किहेन ह। 2 उ पचे गोहरावत, ‘हे इस्राएल क परमेस्सर, मइँ तोहका जानत हउँ।’ 3 मुला इस्राएल हाय! उ भली बातन क नकार दिहस। इहइ स दुस्मन ओकरे पाछे पड़ि गवा ह। 4 उ पचे बिना मोसा सम्पर्क किए भए आपन राजा चुनेन। मइँ उ मुखियन क अनुमोदन नाहीं किहा जेका उ पचे चुने रहा। ओकर मुखियन ओकरे बरे सोना अउ चाँदी स मूरतियन बनाए रहेन। एह बरे उ पचे नास कीन्ह जाब। 5 हे सोमरोन, तोहरे बछवा-मूरती मोर बरे घृणित अहइ। मइँ एकर कारण बहोतइ कोहाइ हउँ। तू पचन्क एकरे कारण केतॅना देरी तलक इ पाप क दोखी रहब? 6 बछवा-मूरती इस्राएल क एक कारीगर दुआर बना ग रहेन अउर इ परमेस्सर नाहीं, एह बरे सोमरोन क बछवा-मूरती क टूकन-टूकन मँ तोर दीन्ह जाइ। 7 उ पचे बोइहीं जब हवा बहत हीं, अउर उ पचे काहिहीं जब चक्रवात चलिहीं। खेतन अनाज उगाइ मँ असमर्थ होइ। एह बरे हुवाँ खाइ बरे रोटी नाहीं होइ। अगर भुइँया थोड़ बहोत अनाज उग भी तउ ओका दुस्मन आइ अउर निगल जाइहीं।
8 “इस्राएल क रास्ट्रन क जरिये निगल लीन्ह गवा ह।
ऍकर लोग एक ठु अइसा बेकार क पात्र क नाईं अहइ जउन बाहेर फेंक दीन्ह ग अहइ।
रास्ट्रन क बीच स छितराइ दीन्ह गवा अहइ।
9 इस्राएल ‘अस्सूर’ जाइ बरे अइसा बल देत ह जइसे कउनो जंगली गदहा स्वंय ही भटकत फिरत ह।
एप्रैम जातियन क बीच रण्डी क धन दिहेन।
10 काहेकि इस्राएल जातियन क बीच रण्डी क धन दिहेन,
अब मइँ सबन क आपुस मँ कछू समई बरे
अस्सूर सम्राज क मातेहत
ओकरे अत्याचार क झेलइ बरे बटोरब।
इस्राएल क परमेस्सर क बिसरब अउ मूरतियन क पूजब
11 “जदपि पाप स छुकारा बरे एप्रैम जियादा स जियादा वेदियन क बनाए रहा,
मुला उ पचे इ वेदियन क प्रयोग
जियादा पाप करइ बरे करिहीं।
12 जदपि मइँ एप्रैम क बहोत साफ-साफ नेमन लिख दिहे रहेउँ,
तउ भी इ ओकरे बरे बिचित्र लागत ह।
13 उ पचे ओसे बलि भेंट किहेन
जउन मइँ ओनका दिहे रहा।
उ पचे बलि भेंट किहेन अउर ओका खाएन जउन उ बलि दिहे रहेन।
यहोवा इ लोगन स खुस नाहीं अहइ।
उ पचे ओकरे पापन क याद राखब, एह बरे उ ओका सज़ा देइहीं।
ओनका बन्दी क रूप मँ मिस्र लइ जावा जाइ।
14 इस्राएल आपन निर्माता क बिसरि गवा।
इस्राएल जियादा स जियादा महल क बनाइहीं
जब यहूदा गढ़वाले अनेक नगर बनाएन।
एह बरे मइँ यहूदा क नगरी मँ ओकर महलन क बर्बाद करइ बरे ओकर खिलाफ आगी पठउब।”
देस स निकारे भए क दुःख
9 हे इस्राएल, दूसर जातियन क तरह बहोत जियादा उत्सव पसन्द जिन करा। काहेकि तू मोर प्रति अविस्सासी होइ गवा ह अउर तू आपन परमेस्सर क दूर खड़ा होइ गवा ह। तू पचे लबार देवतन क वाचा क हर खरिहाने क धरती पइ पूरा करइ चाहत ह। 2 मुला ओन खरिहानन स मिला भवा अनाज इस्राएल क पर्याप्त भोजन नाहीं दइ पाइ। इस्राएल बरे पर्याप्त दाखरस भी नाहीं रही।
3 इस्राएल क लोग यहोवा क धरती पइ नाहीं रहि पइहीं। एप्रैम मिस्र क लउटि जाइ। अस्सूर मँ ओनका वइसा खइया क खाइ पड़ी जइसा ओनका नाहीं खाइ चाही। 4 उ पचे यहोवा बरे अउर दाखरस क चढ़ावा नाहीं चढ़इहीं। ओनकर बलियन ओका खुस नाहीं करब, उ पचे दाह-संस्कार क रोटी क नाई होइहीं जउन एका खइहीं अपवित्तर होइ जइहीं। ओनकर रोटी सिरिफ ओकर भूख मिटाहीं, मुला यहोवा क मन्दिर मँ बलि नाहीं होइहीं। 5 नियत पर्व क दिन अउर यहोवा क उत्सव क दिन तू पचे का करिहीं?
6 इस्राएल क लोग पूरी तरह स नस्ट होइ क डरे स अस्सूर क ग रहेन मुला मिस्र ओनका बटोरि क लइ लेइ। मोप क लोग ओनका गाड़ देइहीं। चाँदी स भरे ओनके खजानन पइ खरपतवार उगि आइ। ओनकर डेरन मँ, काँटेदार झाड़ी उगि अइहीं।
7 निआव क दिन आइ गवा! सज़ा क दिन आइ गवा! इस्राएल क एका जरूर जानइ चाही!
इस्राएल सच्चे नबियन क नकारेस
मुला उ पचे सोचत हीं कि नबी मूरख अहइ अउर आतिमा स प्रेरित जन पागल अहइ। तू आपन बहोत सारे पापन क कारण अउर काहेकि तू नबी क संदेस स घिना करत ह तू अइसा सोचत ह। 8 नबी क कारज परमेस्सर बरे अइसा ही अहइ जइसा कउनो पहरेदार एप्रैम बरे पहरेदारी करत ह। मुला रस्ता अनेक फँदन स भरा भवा अहइ, काहेकि परमेस्सर क लोग तउ प भी हम स घिना करत हीं।
9 उ पचे बहोत भरस्ट होइ गवा ह, ठीक वइसा ही जइसा गिबा क दिनन मँ होत रहेन। बहरहाल यहोवा ओनकर अपराध क याद रखत ह अउर ओनकर पाप क सज़ा देत ह।
मूरति पूजा क कारण इस्राएल क विनास
10 “जब मइँ इस्राएल क पाएस, मइँ यहोवा बहोत खुस भाव जइसा कउनो मनई रेगिस्ताने मँ अंगूर पाएस ह। जब मइँ तोहार पुरुखन क लेखस, मइँ महसूस किह्या कि जइसा कि ऋतु क सुरुआत मँ अंजीर क बृच्छ पइ कउनो क अंजीर क पहिले फल मिलत हीं। मुला उ पचे तउ बाल-पेआँर[b] क लगे चला गएन अउर बाल देवतन क भक्त होइ गएन। उ पचे घृणित देवतन क जइसा होइ गएन जेका उ पिरेम करत रहेन।
इस्राएलियन क बंस नाहीं बाढ़ी
11 “एप्रैम क महिमा एक चिड़िया क नाईं उड़त हीं। उ पचे एकर पाछे न कउनो गरभ धारण करी, या न गरभवती होइ, या न कउनो गदेलन जन्म देइहीं। 12 मुला भले ही इस्राएली आपन गदेलन पाल भी लेइहीं तउ भी सब बेकार होइ जाइ। मइँ ओनसे ओनकर गदेलन छोर लेब। ओकर लगे सिरिफ मुसीबतन ही रहइ काहेकि मइँ ओनसे मु़डि जाब।”
13 मइँ लखत हउँ कि एप्रैम आपन सन्तानन क एक फँदा कइँती लइ जात अहइ। एप्रैम आपन गदेलन क इ हत्यारा क लगे बाहेर लइ जात अहइ। 14 हे यहोवा, तू ओनका का देइ चाहत अहइ? ओनका अइसा गरभ द्या, जेका गरभपात होइ जात ह। ओनका अइसेन थन दइ द्या जउन दूध नाहीं देइ सकी।
15 उ पचे गिलगल मँ बहोत सारा बुरा काम किहेन रहेन!
मइँ ओनसे ओकरे काम क कारण घिना करइ सुरू किहे रहेउँ।
मइँ ओनका आपन घरे स निकरि फेंकब,
मइँ ओनसे अब पिरेम नाहीं करत रहब।
ओनकर सबहिं मुखिया लोग
मोर खिलाफ मुड़ि गवा अहइँ।
16 एप्रैम पइ मसीबत आएस ह।
उ पचे पूरी तरह उपजहीन होइ जाई।
जदपि उ कउनो गदेलन क जन्म देइँ,
मइँ ओकरे कीमती गदेलन क मार डाउब
जइसे ही उ ओका जन्म देब्या।
17 मोर परमेस्सर ओका अस्वीकार करिहीं,
काहेकि उ पचे मोका नाहीं सुनिही।
इहइ कारण अहइ कि उ पचे जातियन क बीच मँ भटकत रहिहीं।
इस्राएल क बैभब इस्राएल स मूरति पूजा करवाएस
10 इस्राएल एक ठु अइसी दाख-लता अहइ
जेह पइ बहोत सारा फल लागत हीं।
उ जेतना फल देत हीं ओतना ही वेदियन बनत ही।
जब भूइँया नीक फसल पइदा करत ह,
तउ इस्राएल जियादा स जियादा महँगा स्मृति पाथर
लबार देवतन क मान देइ बरे लगावत ह।
2 इस्राएल क लोग आपन हिरदयन मँ परमेस्सर क धोखा देइ क जतन किहेस,
यह बरे ओका ओकरे पाप क बदले मँ जरूर सज़ा दीन्ह जाइ चाही।
यहोवा खुद ही ओकार वेदियन क तोड़े देब
अउर उ ओनकर स्मृति-स्तूपन क तहस-नहस करब।
यहोवा इस्राएलियन क राज्ज लइ लेब
3 अब इस्राएल क लोग कहा करत हीं, “न तउ हमार कउनो राजा अहइ अउर न ही हम यहोवा क मान करित ह। अउर ओकर राजा हमार कछू बिगारि नाहीं सकत ह।”
4 ओकर बचन सिरिफ एक सब्दन अहइँ। उ आपन प्रतिग्या क पूरा नाहीं किहेस अउर करार क तोड़ दिहेस। हिआँ बहोत स अदालत क मुकद्दमा अहइँ जइसा खेत मँ उगा भवा खरपतवार।
5 सोमरोन क लोग बेतावेन मँ बछवन क पूजा करत हीं अइसे लोग क असलियत मँ विलाप करिहीं। ओन याजक लोग असलियत मँ विलाप करिहीं काहेकि ओकर सुन्नर मूरति खो गइ अहइ। काहेकि ओकर महिमामय मूरतियन क लइ लीन्ह जाब। 6 उ पचे अस्सूर राजा क लगे उपहार क रूप लइ लेइ जाब्य जउन हमेसा ओकर संग जुद्ध करत हीं। एप्रैम लज्जित होइहीं, अउर इस्राएल आपन मूरतियन पइ लजाइ। 7 सोमरोन क लबार देवतन क बर्बाद कइ दीन्ह जाइ। उ पानी पइ उतरात भए कउनो काठे क टूका जइसा होइ जाइ।
8 जउन ठउरन पइ इस्राएल पाप किहेस नस्ट कीन्ह जाब्या। ओनकर वेदियन पइ काँटन अउ घास-फूस उगिहीं। उ पचे पहाड़न स कइहीं, “हमका ढाँपि ल्या” अउर पहाड़िन स कइहीं, “हम पइ भहराइ पड़ा।”
इस्राएल क आपन पापे क भुगतान करइ होइ
9 “हे इस्राएल, तू गिबा क समइ स ही पाप करत आया, अउर तू पचे वइसा ही हुआँ भी सुरु कइ दिहेस ह। का गिबा क जउन लोगन बुरा काम किहे रहेन फुरइ जुद्ध क चपेटे मँ नाहीं आहइँ? 10 मइँ आउब अउर ओनका सज़ा देब। मइँ जातियन क ओनके खिलाफ बटोरब अउर ओनका ओकरे दुई ठू पापन कारण जंजीर स बाँधिहीं।
11 “एप्रैम एक ठू जवान प्रसिच्छत गइया क नाई अहइ जउन खरिहाने मँ अनाज माँड़इ पसन्द करत अहइँ। मइँ ओकरे गटइ पइ जुआ राखब। किन्तु अब मइँ ओका खेत जोताई मँ जियादा कठिन काम देब। मइँ ओह पइ लसुरी लगाउब। यहूदा भुइँया जोतब अउर याकूब कठोर धरती क फोड़ब।”
12 तोहका आपन प्रतिग्या क पूरा कइके नीक करम बोइ चाही, तउ तू सच्चा पिरेम क फसल काटब्या। इ तोहार बरे नई बात होब्या। इ अइसे धरती क जोतइ क जइसा होइ जेका तू फसल बरे कबहूँ उपयोग नाहीं किहेस। यहोवा क आसीर्बाद लेइ क समइ अहइ जब तक कि उ तोह पइ बर्खा क रूप मँ नीक चिजियन नाहीं देइ।
13 मुला तू तउ बदी क एक बिआ बोया ह; तू पचे आपन झूठ क फल भोग्या ह। अइसा एह बरे भवा कि तू आपन रथन पइ निर्भर रह्या अउर आपन फउजियन पइ बिस्सास किहा। 14 जुद्ध क सोर तोहार लोगन क खिलाफ जियादा स जियादा बढ़िहीं। तोहार सारे गढ़ियन वइसी भहराइ जइसे बेतअरबेल सहर क जुद्ध क समइ सल्मन बर्बाद कइ दीन्ह ग रहा। दुइनउँ महतारी अउर गदेलन क टूका कीन्ह ग रहा। 15 हे बेतेल, इ तोहार संग होइ काहेकि तू बहोत स कुकर्म किहा ह! भिंसारे ही इस्राएल क राजा क पूरी तरह विनास कीन्ह जाब्या।
इस्राएल यहोवा क बिसरि गवा
11 “जब इस्राएल अबहीं गदेला रहा, मइँ, (यहोवा) ओहसे पिरेम किहे रहेउँ।
मइँ आपन गदेला क मिस्र स बाहेर बोलाइ लिहे रहेउँ।
2 मुला मइँ ओका जेतना जियादा बोलाएउँ
उ पचे मोहसे ओतना ही जियादा दूर होइ गए रहेन।
उ पचे बाल देवतन क बलियन चढ़ाए रहेन
अउर मूरतियन क अगवा धूप बारे रहेन।
3 “उ मइँ ही अहउँ जउन एप्रैम चलब सिखाएस।
मइँ इस्राएल क आपन बाँहन मँ लिहे रहेउँ,
मुला उ नाहीं जानत ह कि
कउन ओका तन्दुरुस्त किहेस ह।
4 मइँ ओनका पिआर अउ स्नेह क
‘लसुरी’ स अगुवाइ किहे रह्या।
मइँ ओकरे गटइ स जुआ क हटाइ दिहेस
अउर विनम्रता स खिलाएस ह।
5 “मुला उ पचे मोर कइँती नाहीं मुड़ब्या! नाहीं, उ पचे मिस्र चला गएन या आपन राजा अस्सूर क राजा क लगे गएन। उ पचे मोर कइँती वापिस आवइ स इन्कार करत ह। 6 ओनकर सहरन क ऊपर लटकत भवा तरवार ओनकर सबइ ताकतवार मनइयन क ओनकर बुरे जोजना क कारण बर्बाद कइ देइहीं।
7 “मोर लोग मोह स मुड़ि जाब अउर उ एका नाहीं रोक सकब। उ पचे आपन मदद बरे बाल देवता क पुकारेस, का उ ओका बचा सकेस?”
यहोवा इस्राएल क बिनास नाहीं चाहत
8 “हे एप्रैम, मइँ तोहका तजि देइ नाहीं चाहत हउँ।
हे इस्राएल, मइँ चाहत हउँ कि मइँ तोहार रच्छा करउँ।
मइँ तोहका अदमा क तरह नाहीं कइ देइ चाहत हउँ।
मइँ नाहीं चाहत हउँ कि तोहका सबोर्याम जइसा बनाइ देउँ।
मइँ आपन मन बदलत हउँ
तोहरे बरे पिरेम बहोत गहिर अहइ।
9 मइँ आपन भयंकर किरोध क जीतइ नाहीं देब।
मइँ फुन एप्रैम क बर्बाद नाहीं कइ देब।
मइँ तउ परमेस्सर अहउँ,
मइँ कउनो मनई नाहीं।
मइँ तउ उ पवित्तर हउँ, मइँ तोहरे संग हउँ।
मइँ आपन किरोध क नाहीं देखाउब।
10 मइँ सेर क दहाड़ स गर्जन करब।
मइँ गर्जन करब अउर मोरी संतानन निचके अइहीं अउर मोरे पाछे चलिहीं।
मोर संतानन जउन डर स थर-थर काँपति अहइँ,
पच्छिम स अइहीं।
11 उ पचे कँपकँपात चिड़ियन स
मिस्र स अइहीं।
उ पचे काँपत कबूतरे क नाई अस्सूर क धरती स अइहीं
अउर मइँ ओनका ओनके घर वापस लइ जाब।”
यहोवा इ कहे रहा।
12 “एप्रैम मोर बरे बहोत सारा लबार बोलेस;
इस्राएल क घर मोर बरे बहोत सारा गलत बातन बोलेस।
मुला अबहीं भी यहूदा परमेस्सर क सेवा करत रहेन
अउर उ पवित्तर क बरे विस्सासी अहा।”[c]
यहोवा इस्राएल क खिलाफ रहा
12 एप्रैम हवा पकड़इ क जतन करत ह। उ पचे सारे दिन पूर्वी हवा क पाछा करत रहत ह। सारा रास्ट्र बेईमानी अउर हिंसा मँ व्यस्थ अहइ, उ पचे अस्सूर क संग संधि किहेन। उहइ समइ नज़राना क रूप मँ मिस्र क तेल भेजत ह।
2 यहोवा कहत ह, “इस्राएल क खिलाफत मँ मोर एक अभियोग अहइ। याकूब जउन करम किहेन ह, ओका ओनके बरे सजा दीन्ह जाइ चाही। आपन किए भए कुकरमन बरे ओका निहचइ ही सजा दीन्ह जाइ चाही। 3 अबहीं याकूब आपन माता क गरभ मँ ही रहा कि उ आपन भाई क संग चालबाजी करब सुरू कइ दिहस। याकूब एक ठु सक्तीवाला युवक रहा अउर उ समइ उ परमेस्सर क संग कुस्ती लड़े रहा। 4 याकूब परमेस्सर क सरगदूत स कुस्ती लड़ेस अउ ओका जीत लिहस। उ गोहराएस अउर कृपा करइ बरे बिनती किहस। इ बेतेल मँ भवा रहा। उ जगह पइ उ ओहसे बातचीत किहे रहा। 5 हाँ, यहोवा फउजन क परमेस्सर अहइ। ओकर नाउँ यहोवा अहइ। 6 तउ आपन परमेस्सर कइँती लउटि आवा। ओकरे बरे वफ़ादार रहा। निआव अउर दयालुता कायम रखा। हमेसा आसावादी रहा कि परमेस्सर आपन वाचा क पूरा करब्या।
7 “याकूब अइसा व्यापारी क तरह अहइ जउन लोगन स छल करइ बरे गलत तराजू क उपयोग करत ह। 8 एप्रैम कहेस, ‘मइँ धनवान हउँ। मइँ सच्ची सम्पत्ति पाइ लिहे अहउँ। मोरे अपराधन क कउनो मनई क पता ही नाहीं चली। मोरे पापन क कउनो मनई जान ही नाहीं पाई।’
9 “मुला मइँ तउ तबहिं स तोहार परमेस्सर यहोवा हउँ जब तू मिस्र क धरती स आवा रहा, जब मइँ तोहका रेगिस्तान मँ तम्बुअन मँ राखे रहा, ठीक वइसा ही जइसा कि पनाह क त्यौहार क समइ मँ रहा करत रहेन। 10 मइँ नबियन स बात किहेउँ। मइँ ओनका अनेक दर्सन दिहेउँ। मइँ नबियन क तू पचन्क आपन पाठ पढ़ावइ क बहोत स तरिका दिहेउँ। 11 मुला गिलाद मँ अबहुँ भी पाप अहइ। हुआँ बियर्थ देवतन अहइँ। गिलगाल मँ लोग बर्धन क बलियन क अर्पण करत हीं। हुवाँ बहुत स वेदियन मँ जोते भए खेते क कतारन क नाईं अहइँ।
12 “याकूब आराम क भुइँया कइँती भाग गवा। उ पचे दास क नाईं काम किहेन जे आपन दुई ठू पत्नियन पावइ खातिर भेड़िन क निगरानी किहेस। 13 तब यहोवा एक ठु नबी क जरिये इस्राएल क मिस्र स बाहेर लाएस, अउर पाछे दूसर नबी दुआरा इस्राएल क सुरच्छा किहेस। 14 मुला एप्रैम यहोवा क बहोत जियादा गुस्साइ दिहस, एह बरे परमेस्सर यहोवा एका आपन अपराधन बरे भुगतवाएस। ओकर सुआमी (परमेस्सर) ओहसे ओकर लज्जा बरदास्त करइ देइ।”
इस्राएल आपन नास खुद किहस
13 “एप्रैम बंसज इस्राएल क तमाम जातियन क बीच मँ बहोत जियादा सक्तीसाली बनि गवा। एप्रैम जब बोला करत रहा, तउ लोग काँपात रहेन। मुला एप्रैम मरि गवा, कहेकि उ बाल देवता क पूजइ क कारण पाप किहे रहा। 2 अउर अब उ पचे अपने बरे मूरतियन बनाइके लगातार पाप किहेन। ओकर कुसल कारीगर आपन सबसे अच्छा कुसला स ओकर चित्रन क तरासइ लागेन। तउ उ पचे ओन चित्रन स बातन करइ लागेन अउर उ सबइ लोग ओन बछवा क चित्रन चूमइ लागेन। 3 इहइ कारण उ पचे भिंसारे क उ कोहरा अउ भिंसारे क ओस क नाईं नज़र स ओझल होइ जाइहीं। जउन गायब होइ जात ह। उ पचन्क उ भूसा क तरह उड़ा लेजाइ चाही जेका खरिहाने स उड़ावा जात ह। उ पचे उ धुआँ क समान होइहीं जउन कउनो चिमनी स उठत ह अउर लुप्त होइ जात ह।
4 “तू लोग जब मिस्र मँ भवा करत रह्या, मइँ तबहिं स तोहार परमेस्सर यहोवा अहउँ। मोका तजिके तू पचे कउनो परमेस्सर क नाहीं जानत रह्या। मोर इलावा तोहका कउनो नाहीं बचाइ सकत ह। 5 बयाबान मँ, हाँ, सूखा रेगिस्ताने मँ जहाँ पानी नाहीं होइ, मइँ तू सबन्क धियान दिहे रह्या। 6 मइँ इस्राएलियन क खाइ क दिहेउँ। उ पचे उ भोजन खाएन। आपन पेट भरिके उ पचे तृप्त होइ गएन। ओनका घमंड होइ गवा अउर उ पचे मोका बिसरि गएन।
7 “मइँ इहइ बरे सरे क तरह होइ जाबउँ। मइँ राहे पइ घात लगाए भए चीता जइसा होइ जाब। 8 मइँ ओन पइ उ रीछनीं क तरह झपट पड़ब, जेहसे ओकर गदेलन छोर लीन्ह गवा होइँ। मइँ ओन पइ हमला करब। मइँ ओनकर छातियन क चीर फाड़ देबउँ। मइँ उ सेर या कउनो दूसर अइसे हिसंक पसु क तरह होइ जाबँउ जउन आपन सिकार क फारिके खात रहत होत ह।
परमेस्सर क किरोध स इस्राएल क कउनो बचाइ नाहीं सकत
9 “हे इस्राएल, मइँ तोहार रच्छा किहे रहेउँ, मुला तू मोसे मुँह मोड़ लिहा। तउ अब मइँ तोहार नास करब 10 तोहार राजा कहाँ बाटइ जउन तोहरे सबहिं नगरन मँ तोहका बचाइ? कहाँ बाटइ तोहार सासक जेहसे तू आपन जरूरत क मागत ही कि ‘मोका एक राजा अउर राजकुमार द्या।’ 11 मइँ कोहाइ गएउँ अउर मइँ तू पचन्क एक राजा दइ दिहेउँ। मइँ अउर जियादा कोहाइ गएउँ अउर मइँ तू पचन्स ओका छोरि लिहेउँ।
12 “एप्रैम आपन अपराध छुपावइ क जतन किहस,
उ सोचे रहा कि ओकर पाप गुप्त अहइँ।
मुला ओन बातन बरे ओका सजा दीन्ह जाइ।
13 ओकर सज़ा अइसी होइ जइसे कउनो मेहरारू एक बच्चा क जमन देइ क जतन करत अहइ,
मुला उ बच्चा बुद्धिमान नाहीं होइ।
हिआँ तलक कि जब समइ आइ,
उ गरभ स बाहेर नाहीं निकरी।
14 “का मइँ ओनका गढ़ा स बचाइ लेब? नाहीं, मइँ नाहीं बचाब!
का मइँ ओनका मउत क पकड़ स बचाइ लेब? नाहीं! मइँ नाहीं बचाब!
हे मउत, आपन महामारियन ओन पइ लावा!
हे कब्र, आपन तबाही ओन पइ लावा!
मइँ ओह पइ कउनो दया नाहीं देखाउब।
15 सायद उ कछू समइ क लिए सरकण्डा क पउधा क नाईं बढ़इ जारी रखिहीं।
मुला गरम पुर्बी हवा आउब्या, अउर यहोवा क कइँती स, रेगिस्तान स आउब्या।
परिणाम ओकर झरना सूख जाई;
अउर पानी क स्रोत सूख जाई।
उ हवा ओकर सबइ खज़ाना उड़ा लेजाइहीं जेका उ आपन गोदाम मँ जमा किहे रह्या ह।
16 सोमरोन क सजा दीन्ह जाइ
काहेकि उ आपन परमेस्सर स मुँह फेरे रहा।
इस्राएलियन तरवारे स मार दीन्ह जइहीं।
ओनकर संतानन क चिथरा उड़ाइ दीन्ह जाइ।
ओनकर गाभिन मेहररुअन चीरिके खोल दीन्ह जइहीं।”
यहोवा कइँती मुड़ब
14 हे इस्राएल, तोहार पतन भवा अउर तू परमेस्सर क खिलाफ पाप किहा। एह बरे अब तू पचे आपन परमेस्सर यहोवा कइँती लौटि आवा। 2 यहोवा कइँती लौटि आवा अउर आपन जिन्नगी क बदल दे! यहोवा स कहा,
“हमरे तमाम पापन माफ़ करा, मोर पराथना क सुना।
बलिदान क जगह पइ हम पचे आपन मुँहे स
तोहार स्तुति कइके तोहका भेंट करत हउँ।
3 अस्सूर हमका बचाइ नाहीं सकब,
हम पचे जुद्ध क घोड़न पइ सवार नाहीं होब्या।
हम पचे तोहसे प्रतिग्या करत हउँ कि तोहका ‘उ मूरतियन’ क जइसा नाहीं समुझब
जेका हम आपन ही हाथन स बनाएस ह।
काहेकि तू उहइ पमेस्सर अहइ जउन अनाथ बच्चन पइ दाया देखॉवइवाला ह
तू हम पचन पइ भी दाया देखाउब।”
यहोवा इस्राएल क छिमा करी
4 यहोवा कहत ह,
“उ पचे मोका तजि दिहन।
मइँ ओनका एकरे बरे छिमा कइ देब।
मइँ ओनसे मुक्त भाव स पिरेम करबउँ।
मइँ अब ओन पइ कोहान नाहीं अहउँ।
5 मइँ इस्राएल बरे ओस क नाईं होइ जाब।
चमेली क नाईं खिलब।
उ लबानोन क देवदार बृच्छन नाइ बढ़ब्या।
6 उ नवा डारन निकारइ सुरू करब्या।
उ जइतून क बृच्छ क नाईं सुन्नर होब्या।
अउ ओकर सुगंध
देवदार बृच्छन क नाईं होब्या।
7 इस्राएल फुन स उ लोगन क सहारा देइ जेका मदद क जरूरत अहइ।
उ पचे अन्न क नाईं या
अंगूरे क बेल क नाईं जउन कि बृच्छ क छाया मँ बढ़त ह।
इस्राएल लबानोन क दाखरस क तरह प्रसिद्ध होइहीं।
इस्राएल क मूरतियन क बारे मँ यहोवा क चितउनी
8 “हे एप्रैम, मोका मूरतियन क बराबर जिन समुझा।
उ मइँ ही अहउँ जउन सरग मँ स तोहका बचाएस।
मइँ एक सदाबहार सनोवार क बृच्छ क नाईं हउँ।
तोहार फल मोहसे ही आवत हीं।”
अन्तिम सम्मति
9 बुद्धिमान कउन अहइ? ओन व्यक्ति क एन बातन समुझइ द्या!
कउनो समुझ रहत ह उ व्यक्ति क सच्चाइ क समुझइ द्या।
काहेकि यहोवा क राहन नीक अहइँ।
अच्छे लोग ओन पइ चलिहीं,
लेकिन बिद्रोही लोग ओह पइ ठोकर खाइहीं।
Awadhi Bible: Easy-to-Read Version. Copyright © 2005 Bible League International.