Chronological

सीबा क रानी सुलैमान स मिलइ आवत ह

10 सीबा क रानी सुलैमान क बारे मँ सुनेस। एह बरे उ कठिन सवालन स ओकर परीच्छा लेइ आइ। ² उ सेवकन क बिसाल गिनती क संग यरूसलेम क जात्रा किहस। अनेक ऊँट मसालन, रतन अउ बहोत सा सोना ढोवत रहेन। उ सुलैमान स मिली अउर उ ओन सब सवालन क पूछेस जेनका उ सोच सकत रही। ³ सुलैमान सबहिं सवालन क जवाब दिहेस। ओकर कउनो भी सवाल ओका जवाब देइ बरे बहोत जियादा कठिन नाहीं रहा। ⁴ सीबा क रानी समुझ लिहस कि सुलैमान बहोत बुद्धिमान अहइ। उ उ सुन्नर महल क भी लखेस जेका उ बनाए रहा। ⁵ रानी राजा क मेज पइ भोजन भी लखेस। उ ओकरे अधिकारियन क एक संग मिलत लखेस। उ महल क सेवकन अउर पिलाइवालन जउन अच्छे ओढ़नन क पहिर रखे रहा ओनका भी लखेस। उ ओकर दावतन अउर उ भेंटन क लखेस जउन उ यहोवा क मन्दिर मँ चढ़ाएस रहा। ओन सबहिं चिजियन असल मँ ओका चकित कइ दिहन। “मानो ओकर मुँह क बोली बन्द होइ गवा!”

⁶ एह बरे रानी राजा स कहेस, “मइँ अपने देस मँ आप क बुद्धिमानी अउ बहोत सी बातन क बारे मँ सुनेउँ जउन आप किहन। उ सबइ सबहिं बातन फुरइ अहइँ। ⁷ मइँ एन बातन मँ तब तलक नाहीं पतियात जब तलक मइँ हिआँ नाहीं आइ अउर एन चिजियन क अपनी आँखियन स नाहीं लखेउँ। अब मइँ लखत हउँ कि मोका एकर आधा भी नाहीं कहा गवा रहा। जेतना मोका लोग कहे रहा तोहार बुद्धिमत्ता अउ सम्पत्ति ओहसे बहोत जियादा अहइ। ⁸ आप क मेहररुअन अउ आप क अधिकारी बहोत भाग्गसाली अहइँ। उ पचे रोजाना आप क सेवा कइ सकत हीं अउर आपका बुद्धिमत्ता स भरी बातन सुन सकत हीं। ⁹ आप क यहोवा परमेस्सर स्तुति जोग्गा अहइ। उ तोहका इस्राएल क राजा बनावइ मँ खुस भइ रहा। यहोवा परमेस्सर इस्राएल स हमेसा पिरेम करत ह। एह बरे उ आप क राजा बनाएस। आप नेमन क अनुसरण करत हीं अउर लोगन क संग निआव स भरा बेउहार करत हीं।”

¹⁰ तब सीबा क रानी राजा क लगभग नौ हजार पौण्ड सोना दिहेन। उ ओका अनेक मसालन अउ रतन भी दिहस। जेतना मसाला पहिले कबहुँ कउनो इस्राएल क लिआइके दिहे रहा। सीबा क रानी ओहसे जियादा मसालन सुलैमान क दिहस।

¹¹ हीराम क जहान ओपोर स सोना लइ आएन। उ सबइ जहाज बहोत जियादा लकड़ी अउ रतन भी लिआएन। ¹² सुलैमान लकड़ी क उपयोग मन्दिर अउ महल क सम्भारइ बरे किहस। उ लकड़ी क उपयोग गायकन क बरे वीणन अउ बाँसुरियन बनावइ मँ भी किहेस। दूसर कउनो भी मनई उ तरह क लकड़ी इस्राएल मँ कबहुँ नाहीं लिआवा, अउर कउनो भी मनई तब स उ प्रकार क लकड़ी नाहीं लखेस।

¹³ तब राजा सुलैमान सीबा क रानी क उ सबइ भेंटन दिहस जउन कउनो कउनो दूसर देस क सासक क सदा ही देत ह। तब उ ओका सब कछू दिहस जउन कछू भी उ माँगेस। एकरे पाछे रानी सेवकन सहित अपने देस क वापस लउट गइ।

¹⁴ राजा सुलैमान हर बरिस लगभग उन्नासी हजार नौ सौ बीस पौण्ड सोना प्राप्त करत रहा। ¹⁵ बइपार क जहाजन स सोना लिआए जाइ क अलावा उ वाषिक, बइपारियन अउ अरब क राजा लोग अउ देस क प्रसासकन क भी सोना प्राप्त किहन।

¹⁶ राजा सुलैमान दुइ सौ बड़की ढारन पीटा भवा सोना स बनाएस। हर एक ढार मँ लगभग पन्द्रह पौण्ड सोना लगा रहा। ¹⁷ उ पीटा भवा सोना स तीन सौ नान्ह ढारन भी बनाएस। हर एक ढार मँ लगभग चार पौण्ड सोना लगा रहेन। राजा ओनका उ भवन मँ धरेस जेका “लबानोन क वन” कहा जात रहा।

¹⁸ राजा सुलैमान एक ठु बिसाल हाथी दाँत क सिंहासन भी बनाएस। उ ओका निखालिस सोना स मढ़ेस। ¹⁹ सिंहासने पइ पहोंचइ बरे ओहमाँ छ: पैड़ियन रहिन। सिंहासन क पिछला भाग सिरे पइ गोल रहा। कुस्री क दुइनउँ कइँती हत्थन अउर कुर्सी क बगल लगे रहेन, अउ कुर्सी क दुइनउँ हत्थन क खाले सिंहन क मूरती बनी रहिन। ²⁰ छ: पैड़ियन मँ स हर एक पइ दुइ सिंह रहेन। हर एक क सिरे पइ एक सेर रहा। कउनो भी दूसर राज्ज मँ इ तरह क कछू भी नाहीं रहा।

²¹ सुलैमान क सबहिं पियालन अउ मग सोना क बने रहेन। सबहिं बरतन “लबानोन क वन” नाउँ क भवन मँ रखा रहेन उ सबइ भी निखालिस सोना क बने रहेन। हुवाँ महल मँ कछू भी चाँदी क नाहीं बना रहा। सुलैमान क समइ मँ सोना ऍतना जियादा रहा कि लोग चाँदी क महत्वपूर्ण नाहीं समुझत रहेन।

²² राजा क लगे बहोत स बइपार क जहाज भी रहेन जेनका उ दूसर देसन स चिजियन क बइपार करइ बरे बाहेर पठवत रहा। इ सबइ जहाज हीराम क जहाज क संग जात्रा करत रहेन। हर तीसरे बरिस जहाज सोना, चाँदी, हाथी दाँत अउ गोरु लिआवत रहेन।

²³ सुलैमान भुइँया पइ महानतम राजा रहा। उ सबहिं राजा लोगन स जियादा धनवान अउ बुद्धिमान रहा। ²⁴ सर्वत्र लोग राजा सुलैमान क लखइ चाहत रहेन। उ पचे परमेस्सर क जरिये दीन्ह गइ ओकर बुद्धिमानी क बात सुनइ चाहत रहेन। ²⁵ हर बरिस लोग राजा क दर्सन करइ आवत रहेन अउ हर मनई भेंट लिआवत रहा। उ पचे सोना, चाँदी, ओढ़नन, अस्त्र-सस्त्र, मसालन, घोड़न अउ खच्चरन लिआवत रहेन।

²⁶ एह बरे सुलैमान क लगे अनेक रथ अउर घोड़न रहेन। ओकरे पास चौदह सौ रथ अउर बारह हजार घोड़न रहेन। सुलैमान एन रथन क बरे बिसेस नगरन बनाएस। राजा सुलैमान इ नगरन मँ कछू रथन राखेन अउर कछू क अपने लगे यरूसलेम मँ भी रखेस। ²⁷ राजा इस्राएल क बहोत सम्पन्न बनाइ दिहस। यरूसलेम नगर मँ चाँदी ऍतनी साधारण रही जेतनी चट्टानन, देवदारु क लकड़ी अउ पहाड़न पइ उगइवाले असंख्य अंजीर क बृच्छ साधारण रहेन। ²⁸ सुलैमान घोड़न क मिस्र अउ कुए स मँगाएस। ओकरे बइपारी ओनका कुए मँ खरीदेस रहेन अउर ओनका इस्राएल लिआवत रहेन। ²⁹ मिस्र क एक ठु रथ क कीमत लगभग पन्द्रह सौ पौण्ड चाँदी रही अउर एक ठु घोड़े क कीमत पौने चार पौण्ड चाँदी रही। सुलैमान घोड़न अउर रथ हित्ती अउ अरामी राजा लोगन क हाथ बेचत रहा।

सुलैमान अउ ओकर बहोत स मेहररुअन

11 राजा सुलैमान बहोत सारे गैर इस्राएली मेहररूअन स पिरेम किहे रहा। एनमाँ फिरौन क बिटिया, हित्ति, मोआबी, अम्मोनी, एदोमी अउर सीदोनी मेहररुअन रहिन। ² बीते समइ मँ यहोवा इस्राएल क लोगन स कहे रहा, “तोहका दूसर रास्ट्रन क मेहररुअन स बियाह नाहीं करइ चाही। जदि तू अइसा करब्या तउ उ सबइ लोग तोहार हिरदय क आपन देवतन क अनुसरण करइ बरे फिराइ लेइ।” किन्तु सुलैमान ओन मेहररुअन क पिरेम पासा मँ पड़ा। ³ सुलैमान क सात सौ पत्नियन रहिन। (इ सबइ राजकुमारी रहिन।) ओकरे पास तीन सौ दासियन भी रहिन, जउन ओकर रखैल रहिन। ओकरी पत्नियन ओकरे हिरदय क परमेस्सर स दूर हटाइ दिहेन। ⁴ जब सुलैमान बुढ़वा भवा तउ ओकर पत्नियन ओहसे दूसर देवतन क अनुसरण करइ बरे मज़बूर किहेन। सुलैमान पूरी हिरदय स यहोवा क अनुसरण नाहीं किहेस जउने तरह ओकर बाप दाऊद किहे रहा। ⁵ सुलैमान सीदोन क देवी, असतोरेत क पूजा किहस। उ अम्मोनियन क भयानक देवमूरति, मिलकोम क भी पूजा किहेन। ⁶ इ तरह सुलैमान यहोवा क बरे अपराध किहस। सुलैमान यहोवा क अनुसरण पूरी तरह उहइ प्रकार नाहीं किहस जउने प्रकार ओकर बाप दाऊद किहे रहा।

⁷ सुलैमान कमोस क पूजा बरे ऊँच ठउर बनाएस। कमोस मोआबी लोगन क भयानक देवमूरति रही। सुलैमान कामोस क ऊँच ठउर क यरूसलेम क अगली पहाड़ी पइ बनवाएस। सुलैमान उहइ पहाड़ी पइ मोलेक क ऊँच ठउर भी बनाएस। मोलेक अम्मोनी लोगन क भयानक देवमूरति रही। ⁸ तब सुलैमान दूसर देसन क अपनी सबहिं मेहररुअन क बरे उहइ किहस। ओकर मेहररुअन सुगन्धि बारत रहिन अउर अपने देवतन क बलि भेंट करत रहिन।

⁹ सुलैमान यहोवा, इस्राएल क परमेस्सर क अनुसरण करइ स दूर हट गवा। ओकरे पाछे यहोवा सुलैमान क लगे दुइ दाई प्रगट भवा रहा। एह बरे यहोवा सुलैमान पइ कोहाइ गवा। ¹⁰ यहोवा सुलैमान स कहेस कि तोहका दूसर देवतन क अनुसरण नाहीं करइ चाही। किन्तु सुलैमान यहोवा क आदेस क पालन नाहीं किहस। ¹¹ एह बरे यहोवा सुलैमान स कहेस, “तू मोरे सँग कीन्ह गइ आपन करार क तोड़ब पसन्द किहा ह। तू मोरे आदेसन क पालन नाहीं किहा ह। एह बरे मइँ प्रतिग्या करत हउँ कि मइँ तोहसे तोहार राज्ज लइ लेब। मइँ प्रतिग्या करत हउँ कि मइँ तोहसे तोहार राज्ज धोर लेब। मइँ एका तोहरे सेवकन मँ स एक क देब। ¹² मुला मइँ तोहरे बाप दाऊद स पिरेम करत रहेउँ। एह बरे जब तलक तू जिअत अहा तब तलक मइँ तोहार राज्ज नाहीं लेब। मइँ तब तलक प्रतीच्छा करब जब तलक तोहार पूत राजा नाहीं बन जात। तब मइँ ओहसे एका लेब। ¹³ तउ भी मइँ तोहरे पूत स सारा राज्ज नाहीं लेब। मइँ ओका एक परिवार समूह पइ हुकूमत करइ देब। इ मइँ दाऊद बरे करब। उ एक ठु नीक सेवक रहा। अउर इ मइँ अपने चुने भए नगर यरूसलेम बरे भी करब।”

सुलैमान क दुस्मन

¹⁴ उ समइ यहोवा एदोमी हदद क सुलैमान क दुस्मन बनाएस। हदद एदोम क राजा परिवार क रहा। ¹⁵ इ इ तरह घटित भवा। कुछ समइ पहिले दाऊद एदोम क हराएस। योआब दाऊद क सेना क सेनापति रहा। योआब एदोम मँ मरे मनइयन क दफनावइ गवा। तब योआब हुवाँ जिअत सबहिं मनइयन क मार डाएस। ¹⁶ योआब अउ सारे इस्राएली एदोम मँ छ: महीने तलक ठहरेन। उ समइ क बीच उ पचे एदोम क सबहिं मनईयन क मार डाएन। ¹⁷ मुला उ समइ हदोद अबहिं एक ठु किसोर ही रहा। एह बरे हदद मिस्र क पराइ निकरा। ओकरे बाप क कछू सेवक ओकरे संग गएन। ¹⁸ उ पचे मिद्यान क तजेन अउर उ पचे परान क गएन। हुवाँ दूसर लोग भी ओकरे संग सामिल भएन। अउर पूरा समूह मिस्र गएन। उ पचे मिस्र क राजा फिरौन क लगे गएन अउर ओहसे मदद माँगेन। फिरौन हदद क एक ठु घर अउर कछू भुइँया दिहस। फिरौन ओका मदद भी दिहस अउर ओका खाइ क बरे भोजन भी दिहस।

¹⁹ फिरौन हदद क बहोत पसन्द किहस यह बरे उ ओका एक ठु पत्नी भी दिहस। मेहरारु फिरौन क पत्नी तहपनेस क बहिन रहिन। ²⁰ एह बरे तहपनेस क बहिन हदद स बीही गइ। ओकर एक ठु पूत गनूबत नाउँ क भवा। रानी तहपनेस गनूबत क अपने बच्चन क संग फिरौन क महल मँ बड़ा होइ दिहस।

²¹ मिस्र मँ हदद सुनेस कि दाऊद मर गवा। उ इ भी सुनेस कि सेनापित योआब मर गवा। एह बरे हदद फिरौन स कहेस, “मोका अपने देस मँ अपने घर वापस लउट जाइ द्या।”

²² किन्तु फिरौन जवाब दिहेस, “मइ तोहका सारी चीच, जेनकर हिआँ जरुरत अहइ, दीन्ह ह। तू अपने देस मँ वापस काहे जाइ चाहत अहा?”

हदद जवाब दिहेस, “मेहरबानी कइके मोका घरे लउटइ द्या।”

²³ यहोवा दूसरे मनई क भी सुलैमान क खिलाफ दुस्मन बनाएस। इ मनई एल्यादा क पूत रजोन रहा। रजोन अपने सुआमी क हिआँ स पराइ गवा रहा। ओकर सुआमी सोबा क राजा हददेजेर रहा। ²⁴ दाऊद जब सोबा क सेना क हराइ दिहस तब ओकरे पाछे रजोन कछू मनइयन क बटोरेस अउर एक ठु नान्ह सेना क प्रमुख बन गवा। रजोन दमिस्क गवा अउर हुवइँ ठहरा। रजोन दमिस्क क राजा होइ गवा। ²⁵ रजोन अराम पइ हुकूमत करत रहा। रजोन इस्राएल स घिना करत रहा, एह बरे सुलैमान जब तलक जिअत रहा उ पूरे समइ इस्राएल क दुस्मन बना रहा। रजोन अउ हदद इस्राएल बरे बड़की परेसानियन पइदा किहन।

²⁶ नबात क पूत यारोबाम सुलैमान क सेवकन मँ स एक रहा। यारोबाम एप्रैम परिवार समूह स रहा। उ सरेदा नगर क रहा। यारोबाम क महतारी क नाउँ सरुयाह रहा। ओकर बाप मर चुका रहा। उ राजा क खिलाफ होइ गवा।

²⁷ यारोबाम राजा क खिलाफ कइसे भवा। एकर कहानी इ अहइ। सुलैमान मिल्लो बनावत रहा अउर आपन बाप दाऊद क नगर क देवार क मजबूत करत रहा। ²⁸ यारोबाम एक ठु बलवान मनई रहा। सुलैमान लखेस कि इ जवान एक ठु नीक स्रमिक अहइ। एह बरे सुलैमान ओका यूसुफ परिवार समूह क स्रमिकन क अधिकारी बनाइ दिहस। ²⁹ एक दिन यारोबाम यरूसलेम क बाहेर जात्रा करत रहा। सीलो क अहिय्याह नबी ओहसे सड़किया पइ मिला। अहिय्याह एक ठु नवा अंगरखा पहिरे रहा। इ दुइनउँ मनई देस मँ अकेले रहेन।

³⁰ अहिय्याह आपन नवा अंगरखा लिहस अउर एका बाहर टूकन मँ फार डाएस। ³¹ तब अहिय्याह यारोबाम स कहेस, “इ अंगरखा क दस टूकन तू अपने बरे लइ ल्या। यहोवा इस्राएल क परमेस्सर कहत ह, ‘मइँ सुलैमान स राज्ज क छीन लेब अउर मइँ परिवार समूहन मँ स दस क तोहका देब। ³² अउर मइँ दाऊद क परिवार क सिरिफ एक परिवार समूह पइ हुकूमत करइ देब। मइँ ओनका सिरिफ इ समूह क लेइ देब। मइँ इ अपने दाऊद अउ यरूसलेम बरे अइसा करइ देब। यरूसलेम उ नगर अहइ जेका मइँ सारे इस्राएल के परिवार समूह स चुनेउँ ह। ³³ मइँ सुलैमान स राज्ज लइ लेब काहेकि उ मोर अनुसरण करब तजि दिहस। उ सीदोनी देवमूरति अस्तोरेत, मोआबी देवता कमोस अउ अम्मोनी देवता मिल्कोम क पूजा करत ह। सुलैमान उ नाहीं करत ह जउन मोरे नजर मँ नीक अहइ। उ मोरे नेमन अउ आदेसन क पालन नाहीं करत। उ उ मारग मँ नाहीं रहत जेह पइ ओकर बाप दाऊद रहत रहा। ³⁴ एह बरे मइँ राज्ज क सुलैमान क परिवार स लइ लेब। किन्तु मइँ सुलैमान क ओकरे बाकी जिन्नगी भइ ओनकर सासक रहइ देब। इ मइँ अपने सेवक दाऊद बरे करब। मइँ दाऊद क एह बरे चुने रहेउँ कि उ मोर सबहिं आदेसन व नेमन क पालन करत रहा। ³⁵ मुला मइँ ओकरे पूत स राज्ज लइ लेब। अउर मइँ तोहका दस परिवार समूहन पइ हुकूमत करइ क अनुमति देब। ³⁶ मइँ सुलैमान क पूत क एक परिवार समूह पइ हुकूमत करत भए रहइ देब। मइँ एका एह बरे करब कि मोर सेवक दाऊद क हुकूमत यरूसलेम मँ मोर समन्वा सदा ही रही। यरूसलेम उ नगर अहइ जेका मइँ आपन निजी नगर चुनेउँ ह। ³⁷ मुला मइँ तोहका ओन सबहिं पइ हुकूमत करइ देब जेका तू चाहत अहा। तू पूरे इस्राएल पइ हुकूमत करब्या। ³⁸ अगर तू उ करब्या जेका मइँ आदेस दिहेउँ ह अउर तू सच्चाई क संग रहब्या अउर अउर तू मोरे सारे नेमन अउ आदेसन क पालन करब्या जइसा मोर सेवक दाऊद किहे रहा, तउ मइँ तोहरे संग रहब। मइँ तोहरे परिवार क राजा लोगन क परिवार वइसे ही बनाइ देब जइसे मइँ दाऊद क बनाएउँ। मइँ तोहका इस्राएल देब। ³⁹ मइँ दाऊद क सन्तानन क ओकर सजा देब जउन सुलैमान किहस। किन्तु मइँ हमेसा क बरे ओनका सजा नाहीं देब।’”

सुलैमान क मउत

⁴⁰ सुलैमान यारोबाम क मार डावइ क जतन किहस। मुला यारोबाम मिस्र पराइ गवा। उ मिस्र क राजा सीसक क लगे गवा। यारोबाम हुँवा सुलैमान क मरि तलक रहा।

⁴¹ सुलैमान अपने सासन-काल मँ बहोत बड़के अउर बुद्धिमानी स पूर्ण काम किहस। जेनकर विवरण सुलैमान क इतिहास-ग्रन्थ मँ लिखा अहइ। ⁴² सुलैमान यरूसलेम मँ पूरे इस्राएल पइ चालीस बरिस तलक हुकूमत किहस। ⁴³ तब सुलैमान मरा अउ अपने पुरखन क संग दफनावा गवा। उ अपने बाप क दाऊद नगर मँ दफनावा गवा, अउर ओकर पूत रहूबियाम ओकरे जगह पइ राजा बना।

सीबा क राही सुलैमान क हिआँ आवत ह

9 सीबा क रानी सुलैमान क जस सुनेस। उ यरूसलेम मँ कठिन सवालन स सुलैमान क परीच्छा लेइ आइ। सीबा क रानी अपने संग एक लोगन क बड़ा समूह लइके आइ रही। ओकरे पास ऊँट रहेन जेन पइ मसालन, बहोत जिआदा सोना अउ कीमती पाथर लदे रहेन। उ सुलैमान क लगे आइ अउर उ सुलैमान स बातन किहस। ओका सुलैमान स अनेक सवाल पूछब रहेन। ² सुलैमान ओकरे सबहिं सवालन क उत्तर दिहेस। सुलैमान क बरे व्याख्या करइ या जवाब देइ बरे कछू भी बहोत कठिन नाहीं रहा। ³ सीबा क रानी सुलैमान क बुद्धिमानी अउ ओकर बनाए महल क लखेस। ⁴ उ भोजन क निरिच्छन किहेस जउन सुलैमान क मेज पई परोसा जात रहा। उ लखेन कि अधीकारियन अउर नउकर कइसा कार्य करत अहइँ अउर उ पचे कइसा वस्त्र पहिरे रखे अहइँ, उ लखेस कि ओकर दाखरस पिआवइवाले सेवक कइसे कार्य करत अहइँ अउर उ पचे कइसे वस्त्र पहिर रखे अहइँ। उ यहोवा क मन्दिर क ओर जात भवा जुलूस क लखेस। जब सीबा क रानी एन सबहिं चिजियन क लखेस तउ माना कि ओकर मुँह क बोली बन्द होइ गवा।

⁵ तब उ राजा सुलैमान स कहेस, “मइँ अपने देस मँ तोहरे महान कार्यन अउर तोहार बुद्धिमानी क बारे मँ जउन कहानी सुनेउँ ह। उ सबइ सच अहइ! ⁶ मोका एन कहानियन पइ तब तलक बिस्सास नाहीं होत रहा जब तलक मइँ आई नाहीं अउर अपनी आँखिन स लखेउँ नाहीं। ओह! तोहरी बुद्धिमानी क आधा भी मोहसे नाहीं कहा गवा रहा। जउन कछु मइँ सुनेउँ तू उ सबइ स जियादा महान अहइ। ⁷ तोहार मेहरुअन अउर तोहार अधिकारी बहोत भाग्यसाली अहइँ। उ पचे तोहार गियान क बातन तोहार सेवा करत भए सुन सकत हीं। ⁸ तोहरे परमेस्सर यहोवा क बड़कई होइ। उ तोह पइ खुस अहइ अउर उ तोहका अपने सिंहासन पइ, परमेस्सर यहोवा बरे, राजा बनई क बइठाएस ह। तोहार परमेस्सर इस्राएल स पिरेम करत ह अउर इस्राएल क मदद सदा ही करत रही। इहइ कारण अहइ कि यहोवा तोहका इस्राएल क राजा बनाएस ह कि तू निआव अउर धार्मिकत्ता क बनाए राख।”

⁹ तब सीबा क रानी राजा सुलैमान क 4,140 किलोग्राम सोना, बहोत स मसाला अउ कीमती पाथर दिहस। कउनो ऍताना नीक मसाला राजा सुलैमान क नाहीं दिहस जेतना नीक रानी सीबा दिहस।

¹⁰ हूराम क नउकर अउर सुलैमान क नउकर ओपीर स सोना लइ आएन। उ पचे चन्दन क काठ अउर बहुमुल्य रत्न पाथर भी लइ आएन। ¹¹ राजा सुलैमान यहोवा क मन्दिर अउ महल क सीढ़ियन क बरे चन्दन क काठे क उपयोग किहस। सुलैमान चन्दन क काठे क उपयोग गायकन क बरे वीणा अउ तम्बूरा बनावइ क बरे भी किहस। यहूदा देस मँ चन्दन क काठे स बनी ओन जइसी सुन्नर चिजियन कउनो कबहुँ लखे नाहीं रहा।

¹² जउन कछू भी सीबा देस क रानी राजा सुलैमान स माँगेस, ओका उ दिहस। जउन उ दिहस, उ ओहसे जियादा रहा जउन उ राजा सुलैमान बरे लिआइ रहीं। ओकरे पाछे उ अपने सेवक अउ सेविकाओं क संग बिदा भइ। उ अपने देस लउट गइ।

सुलैमान क खूब धनदौलत

¹³ एक बरिस मँ सुलैमान जेतना सोना पाएस, ओकर वजन पचीस टन रहा। ¹⁴ बइपारी अउ सौदागर सुलैमान क लगे अउ जिआदा सोना लाएन। अरब क सबहिं राजा अउर प्रदेसन क सासक भी सुलैमान क बरे सोना चाँदी लाएन।

¹⁵ राजा सुलैमान सोने क पत्तर क दुइ सौ बरा ढारन बनाएस। लगभग छ: सौ सेकेल पीटा सोना हर एक ढार क बनावइ मँ उपयोग मँ आवा। ¹⁶ सुलैमान तीन सौ नान्ह ढारन भी सोने क पत्तर क बनाएस। लगभग तीन सौ सेकेल सोना हर एक ढार क बनावइ मँ उपयोग मँ आवा रहा। राजा सुलैमान सोना क ढारन क “लबानोन क बन महल” मँ रखेस।

¹⁷ राजा सुलैमान एक बिसाल सिंहासन बनावइ क बरे हाथी दाँत क उपयोग किहस। उ सिंहासने क निखालिस सोना स मढ़ेस। ¹⁸ सिंहासने पइ चढ़इ क छ: सीढ़ीयन रहिन अउर एकर एक ठु पद पीठ रहा। उ सोने क बना रहा। सिंहासने मँ दुइनउँ कइँती भुजन क आराम देइ क बरे बाजू लगी एक-एक सेर क मूरती खड़ी रही। ¹⁹ हवाँ छ: सीढ़ियन स लगे बगल मँ बारह सेरन क मूरतियन खड़ी रहिन। हर सीढ़ी क हर कइँती एक सेर रहा। इ तरह क सिंहासन कउनो दूसर राज्ज मँ नाहीं बना रहा।

²⁰ राजा सुलैमान क सबहिं पिअइ क पियालन सोना क बने रहेन। लबानोन वन महल क सबहिं हर रोज क चिजियन निखालिस सोना क बनी रहिन। सुलैमान क समइ मँ चाँदी कीमती नाहीं समुझी जात रही।

²¹ राजा सुलैमान क लगे जहाज रहेन जउन तर्सीस क जात रहेन। हूराम क आदमी सुलैमान क जहाजन क चलावत रहेन। हर तीसरे बरीस जहाज तर्सीस स सोना, चाँदी, हाथी-दाँत, बनार अउ मोर लइके सुलैमान क लगे लउटन रहेन।

²² राजा सुलैमान धन अउर बुद्धि दुइनउँ मँ संसार क कउनो भी राजा स बड़ा होइ गवा। ²³ संसार क सारे राजा सुलैमान क लखइ बरे आइतेन अउर ओकरे बुद्धिमानी क सब्दन जउन परमेस्सर ओका दिहेस ह सुनतेन। ²⁴ हर बरिस उ पचे राजा सुलैमान क भेंट लिआवत रहेन। उ पचे चाँदी सोना क चिजियन, ओढ़ना, कवच, मसालन, घोड़न अउ खच्चर लिआवत रहेन।

²⁵ सुलैमान क लगे ओकर घोड़न अउर रथन क रखइ बरे चार हजार अस्तबल रहेन। ओकरे लगे बारह हजार सारथी रहेन। सुलैमान ओनका आपन रथन क नगरन मँ रखत रहा अउर कछू क यरूसलेम मँ अपने लगे रखत रहा। ²⁶ सुलैमान फरात नदी स लगातार पलिस्ती लोगन क देस तलक अउर मिस्र क सीमा तलक क राजा लोगन क सम्राट रहा। ²⁷ राजा सुलैमान क लगे बहोत स चाँदी क पाथर समान्य पाथर जइसा अउर बहोत सारा देवदार काठ क पहाड़ी देस मँ गूलर क बृच्छन जइसा रहेन। ²⁸ लोग सुलैमान क बरे मिस्र अउर दूसर सबहिं देसन स घोड़न लिआवत रहेन।

सुलैमान क मउत

²⁹ सुरू स लइके अन्त तलक सुलैमान अउर जउन कछू किहस उ नातान नबी क लेखन, सीलो क अहिय्याह क भविस्सबाणियन अउर इद्दो दर्सी क दर्सनन मँ अहइ। इद्दो एक दर्सी रहा जउन नबात क पूत यारोबाम क बारे मँ भविस्सबाणी किहेस। ³⁰ सुलैमान यरूसलेम मँ पूरे इस्राएल क राजा चालीस बरिस तलक रहा। ³¹ तब सुलैमान अपने पुरखन क संग बिस्राम करइ गवा। लोगन ओका ओकरे बाप दाऊद क नगर मँ दफनाएन। सुलैमान क पूत रहूबियाम सुलैमान क जगह नवा राजा भवा।