Chronological

¹ यहोवा क गुण गावा।

यहोवा क आपन सम्पूर्ण मने स अइसी उ सभा मँ धन्यवाद करत हउँ
    जहाँ सज्जन मिला करत हीं।
² यहोवा महान करम करत ह।
    लोगन जउन ओन चिजियन क महत्व जानत हीं ओनका खोजत हीं।
³ यहोवा फुरइ इ महिमामय अउर अचरजे स भरा काम करत हीं।
    ओकरा खरापन सदा-सदा बना रहत ह।
⁴ परमेस्सर अद्भुत करम करत ह ताकि हम याद राखी
    कि यहोवा करुणा स भरा अउर दाया स भरा बाटइ।
⁵ उ आपन भगतन क भोजन देत ह।
    उ हमेसा आपन करार क याद राखत ह।
⁶ उ आपन लोगन क ओन भुइँया देइके
    जउन दूसर रास्ट्रन अहइ महान कारज देखाएस ह।
⁷ परमेस्सर जउन कछू करत ह उ बिस्सास योग्य अउर फुरइ बाटइ।
    ओकर सबहिं आग्यन नियावपूर्वक अहइँ।
⁸ परमेस्सर क आग्यन सदा ही बना रइहीं।
    परमेस्सर क ओन आदेसन क देइ क प्रयोजन फुरइ अउ निस्पच्छ रहेन।
⁹ उ आपन लोगन क मुक्त करत ह।
    उ ओनसे एक करार किहेस ह जउन सदा-सदा रहइ।
    परमेस्सर क नाउँ अचरजे स भरा अउर पवित्तर अहइ।
¹⁰ विवेक भय अउर यहोवा क आदर स उपजत ह।
    उ पचे लोग बुद्धिमान होत हीं जउन यहोवा क आदर करत हीं।
    यहोवा क स्तुति सदा-सदा गाई जात रही।

¹ यहोवा क बड़कई करा।

अइसा मनई जउन यहोवा स डेरात ह अउर ओकर आदर करत ह उ बहोत सफल होइ।
    परमेस्सर क आदेस अइसे लोग क भावत हीं।
² धरती पइ अइसे मनई क संतानन मज़बूत होइहीं।
    अच्छे मनई क संतानन आसीर्बाद पाइहीं।
³ अइसे मनई क परिवार बहोत धनवान होइ।
    ओकर नीक करम सदा सदा बनी रही।
⁴ सच्चे लोगन बरे परमेस्सर अइसा होत ह जइसे अँधियारा मँ चमकत प्रकास होइ।
    उ सच्चा अहइ, अउर करुणा स भरा बाटइ अउर दाया स भरा बा।
⁵ इ मनई बरे नीक बाटइ कि उ दयालु अउर उदार होइ।
    मनई क इ उत्तिम अहइ कि उ आपन वादा मँ खरा रहइ।
⁶ अइसा मनई क पतन कबहुँ नाहीं होइ।
    एक सच्चा मनई क सदा याद कीन्ह जाइ।
⁷ सज्जन व्यक्ति बुरी खबरन स नाहीं डेरात।
    अइसा मनई यहोवा क भरोसे अहइ अउर आस्वस्त रहत ह।
⁸ अइसा मनई आस्वस्त रहत ह उ ससान नाहीं रहत।
    उ आपन दुस्मनन क हराइ देइ।
⁹ अइसा मनई दीन जनन क मुक्त दान देत ह।
    ओकर नीक करम जेका उ दीन लोगन बरे दिखावत ह उ सदा सदा बना रइहीं।
    उ बहोत सम्मानित कीन्ह जाइ।
¹⁰ कुटिल लोग ओका लखिहीं अउर कुपित होइहीं।
    उ पचे किरोध मँ आपन दाँतन क पिसिहीं अउर फुन लुप्त होइ जइहीं।
    दुट्ठ लोग ओका कबहुँ नाहीं पइहीं जेका उ सब स जियादा पावइ चाहत हीं।

¹ यहोवा क स्तुति करा,

हे यहोवा क सेवकन, ओकर स्तुति करा।
    यहोवा क नाउँ क बड़कई करा।
² यहोवा क नाउँ अबहुँ
    अउर सदा सदा बरे आसीसित होइ।
³ मोर इ कामना अहइ, यहोवा क नाउँ क गुण पूरब स जहाँ सूरज उगत ह,
    पच्छिउँ तलक उ ठउरे मँ जहाँ सूरज बूड़त ह गावा जाइ।
⁴ यहोवा सबहिं रास्ट्रन स महान अहइ।
    ओकर महिमा अकासे तलक उठति ह।
⁵ यहोवा हमरे परमेस्सर क नाई कउनो भी मनई नाहीं अहइ
    जउन ऊँचाइ पइ विराजमान अहइ।
⁶ भले ही उ सबइ बातन क जउन धरती अउर आकासे पइ घटत ह,
    लखइ बरे उ नीचे झुकिके निगाह डावइ ह।
⁷ परमेस्सर गरीब मनइयन क धूरि स उठावत ह।
    उ ओनका क गन्दगी स निकारत ह।
⁸ परमेस्सर ओनका महत्वपूर्ण बनावत ह।
    परमेस्सर ओन लोगन क महत्वपूर्ण मुखिया बनावत ह।
⁹ कउनो मेहरारू बे औलाद होइ सकत ह, किन्तु परमेस्सर ओका बच्चा स आसीसित करी,
    अउर ओका खुस करी।

यहोवा क गुणगान करा।

¹ जब याकूब क घराना
    बिदेसियन क रास्ट्र मिस्र क तजेस।
² उ समइ यहूदा परमेस्सर क खास मनई बना,
    इस्राएल ओकर राज्ज बन गवा।
³ लाल सागर ऍका लखेस, उ पराइ गवा।
    यरदन नदी उलटिके बह चली।
⁴ पर्वत मेमनन क नाई नाच गएन।
    पहाड़ी भ़ेड़न क नाई नाचि गइन।

⁵ हे लाल सागर, तू काहे पराइ गया?
    हे यरदन नदी, तू काहे उलटी बहिउ?
⁶ हे पहाड़ो, काहे तू पचे भ़ेडन क नाई नाच्या?
    हे पहाड़ियो, तू पचे काहे मेमनन जइसी नाचिउ?

⁷ हे धरती, यहोवा याकूब क परमेस्सर,
    सुआमी क समन्वा काँप।
⁸ परमेस्सर ही चट्टानन क चीरिके जल क बाहेर बहाएस।
    परमेस्सर पक्की चट्टान स जल क झरना बहाए रहा।

¹ यहोवा, हमका कउनो गैारव ग्रहण नाहीं करइ चाही।
    गौरव तउ तोहार अहइ।
    तोहार पिरेम अउ निस्ठा क कारण गौरव तोहार अहइ।
² रास्ट्रन काहे कहिइ,
    “ओकर परमेस्सर कहाँ अहइ?”
³ मोर परमेस्सर सरगे मँ अहइ।
    उ उहइ करत ह जउन कछू उ चाहत ह।
⁴ ओन जातियन क “देवता” बस सिरिफ पुतला अहइँ जउन सोना चाँदी क बना अहइँ।
    उ सबइ बस सिरिफ पुतलन अहइँ जेनका कउनो मनई बनाएस ह।
⁵ ओन पुतलन क मुँह अहइँ, मुला उ सबइ बोल नाहीं पउतेन।
    ओनकर आँखिन अहइँ, पर उ सबइ लखि नाहीं पउतेन।
⁶ ओनके कान अहइँ, मुला उ सबइ सुन नाहीं सकतेन।
    ओनके लगे नाक अहइँ, मुला उ सबइ सूँघ नाहीं पउतेन।
⁷ ओनके हाथ अहइँ, मुला उ पचे कउनो चीज क छुइ नाहीं सकतेन।
    ओनके गोड़ अहइँ, मुला उ पचे चल नाहीं सकतेन।
    उ पचे आपन गटइ स कउनो आवाज़ नाहीं निकारइ सकतेन।
⁸ जउन मनई इ सबइ पुतलन बनावत हीं, अउर ओनमाँ बिस्सास धरत हीं
    बिल्कुल इ सबइ मूरतियन जइसे बन जइहीं।

⁹ ओ इस्राएल क लोगो, यहोवा मँ भरोसा रखा।
    यहोवा इस्राएल क मदद देत ह अउर ओकर रच्छा करत ह।
¹⁰ ओ हारून क घराने, यहोवा मँ भरोसा रखा।
    हारून क घराने क यहोवा सहारा देत ह, अउ ओकर रच्छा करत ह।
¹¹ हे यहोवा क सबइ मनवइयो, ओनमाँ भरोसा रखा।
    उ सहारा देत ह अउर आपन लोगन क रच्छा करत ह।

¹² यहोवा हमका याद राखत ह।
    यहोवा हमका वरदान देइ,
यहोवा इस्राएल क आसीसित करी।
    यहोवा हारून क परिवार क आसीसित करी।
¹³ उ ओन लोगन क आसीसित करी जउन ओहसे डेरात ह,
    छोटा स लइके बरा तलक।

¹⁴ मोका आसा अहइ यहोवा तोहार बढ़ोतरी करी अउर मोका आसा अहइ,
    उ तोहार संतानन क भी जियादा स जियादा देइ।
¹⁵ यहोवा जउन सरग अउ धरती क बनाएस ह,
    तोहका आसीस देइ।
¹⁶ सरग यहोवा क अहइ।
    मुला उ धरती क मानव जाति क दिहेस ह।
¹⁷ मरे भए लोग यहोवा क गुण नाहीं गउतेन।
    कब्र मँ पड़े भए लोग यहोवा क गुणगान नाहीं करतेन।
¹⁸ मुला हम अबहुँ यहोवा क स्तुति करति ह,
    अउर हम ओकर स्तुति सदा-सदा करब!

¹ मइँ यहोवा स पिरेम करत हउँ जब उ मोर पराथनन क सुनत ह
    अउर एकर जवाब देत ह।
² मइँ ओका पिरेम करत हउँ काहेकि उ मोर सुनत ह।
    मइँ आपन सारी जिन्नगी ओका मदद बरे बुलावत हउँ।
³ मइँ लगभग मरि चुका रहेउँ।
    मोरी चारिहुँ कइँती मउत क रस्सा बँधि चुका रहेन।
    कब्र मोका लीलत रही।
    मइँ डेरान रहेउँ अउर मइँ चिंतित रहेउँ।
⁴ तब मइँ यहोवा क ओकर मदद लेइ बरे गोहराएउँ,
    मइँ कहेउँ, “यहोवा, मेहरबानी कइक मोका बचाइ ल्या।”
⁵ यहोवा खरा अहइ अउर दया स पूर्ण अहइ।
    परमेस्सर करुणा स पूर्ण अहइ।
⁶ यहोवा असहाय लोगन क देख-रेख करत ह।
    मइँ परेसानी मँ रहेउँ अउर यहोवा मोका बचाएस।
⁷ हे मोर प्राण, फुन स आराम करा।
    काहेकि यहोवा तोहार देख-रेख करत ह।
⁸ हे परमेस्सर, तू मोर प्राण मउत स बचाया।
    मोर आँसुअन क तू रोक्या
    अउर गिरइ स तू मोका थाम लिहा।
⁹ जीवित लोगन क धरती मँ
    मइँ यहोवा क सेवा करत हउँ।

¹⁰ मइँ लगातार बिस्सास बनाए राखेउँ हिआँ तलक कि जब मइँ कहि दिहे रहेउँ,
    “मइँ बहोत पीड़ा मँ होइ गवा रहेउँ।”
¹¹ मइँ हिआँ तलक बिस्सास संभाले राखेउँ जब कि मइँ डेरान रहेउँ अउर मइँ कहेउँ,
    “सबहिं लोग झूठा अहइँ।”

¹² मइँ भला यहोवा क ओन नीक कामन क बदले मँ का अर्पित कइ सकत हउँ
    जउन उ मोर बरे किहेस?
¹³ मइँ ओका पेय भेंट देब
    काहेकि उ मोका बचाएस ह।
    मइँ यहोवा पइ आस्रित रहब।
¹⁴ मइँ यहोवा क लोगन क समन्वा आपन बचन क पूरा करब
    जउन मइँ ओहसे किहे रहेउँ।

¹⁵ हिआँ तलक कि कउनो एक मउत भी ओन लोगन क जउन यहोवा बरे अपराध किहेन ह,
    ओकरे बरे बहोत महत्वपूर्ण अहइ।
¹⁶ हे यहोवा मइँ तोहार एक
    मेहरारु नउकर क सन्तान हउँ।
    हे यहोवा, तू ही मोका मोरे बंधन स अजाद किहा।
¹⁷ मइँ तोहका एक धन्यवाद बलि अर्पित करब।
    मइँ यहोवा क नाउँ स गोहराउब।
¹⁸ मइँ यहोवा क लोगन क समन्वा आपन वचन क पूरा किहेउँ ह
    जउन मइँ ओहसे किहे रहेउँ।
¹⁹ मइँ यहोवा क मन्दिर क आंगन मँ जाब
    जउन यरूसलेम मँ अहइ।

यहोवा क क स्तुति करब।

¹ समूचइ रास्ट्रन यहोवा क नाउँ क बड़कई करा।
    हे लोगो, यहोवा क गुण गावा।
² काहेकि उ हम पइ बहोत पिरेम दिखावत ह।
    ओकर बिस्सास सदा-सदा बरे रही।

यहोवा क बड़कई करा।

¹ मइँ यहोवा क धन्यवाद देत हउँ, काहेकि उ नीक अहइ।
    ओकर पिरेम सदा ही रहत ह।
² इस्राएल इ कहइ द्या,
    “ओकर बिस्ससनीय पिरेम सदा ही रहत ह।”
³ याजक अइसा कहत हीं,
    “ओकर बिस्ससनीय पिरेम सदा अटल रहत ह।”
⁴ तू लोग जउन यहोवा क उपासना करत अहा, कहा करत अहा,
    “ओकर बिस्ससनीय पिरेम सदा ही अटल रहत ह।”

⁵ मइँ परेसानी मँ रहेउँ, एह बरे मइँ मदद बरे यहोवा क पुकारेउँ।
    उ मोका जवाब दिहस अउर यहोवा मोका अजाद किहस।
⁶ यहोवा मोरे कइँती अहइ, मइँ कबहुँ नाहीं डेराब।
    लोग मोका कउनो हानि नाहीं पहोंचावइ सकतेन।
⁷ यहोवा मोर सहायक अहइ।
    मइँ आपन दुस्मनन क हारा देखब।
⁸ मनइयन पइ भरोसा रखइ स
    यहोवा पइ भरोसा राखब उत्तिम अहइ।
⁹ इ हमेसा उत्तिम अहइ कि पहिले आपन यहोवा पइ भरोसा करा
    तउ आपन मुखियन पइ।

¹⁰ मइँ आपन दुस्मनन दुआरा घेरि लिहे गवा रहेउँ।
    यहोवा क सक्ति स मइँ आपन बैरी लोगन क हराइ दिहेउँ।
¹¹ बहोत सारा दुस्मनन मोका चारिहउँ कइँती स घेरि लिहन ह।
    मइँ आपन दुस्मन क यहोवा क सक्ति स हराएउँ।
¹² दुस्मनन मोका मधु माखियन क झुण्ड क नाई घेरि लिहन।
    मुला, उ सबइ हाली बरत भइ झाड़ी क नाई बर्बाद भएन।
    यहोवा क सक्ति स मइँ ओका हराएउँ ह।

¹³ मोर दुस्मनन मोह पइ वार किहन अउ मोका लगभग बर्बाद कइ दिहन
    मुला यहोवा मोका सहारा दिहस।
¹⁴ यहोवा मोर सक्ति अउर मेार विजय गीत अहइ।
    अउर उ रच्छक बनि गवा ह।
¹⁵ सज्जनन क घर मँ जउन विजय पर्व मनत अहइ तू ओका सुन सकत ह।
    देखा, यहोवा आपन महासक्ति फुन देखाएस ह।
¹⁶ यहोवा क भुजन विजय मँ उठी भइ अहइँ।
    देखा यहोवा आपन महासक्ति फुन स देखाएस।

¹⁷ मइँ जिअत रहब, मइँ मरब नाहीं,
    अउर जउन करम यहोवा किहस ह, मइँ ओन लोगन क गनती फुन स करब।
¹⁸ यहोवा मोका दण्ड दिहस,
    मुला उ मोका मरइ नाहीं दिहस।
¹⁹ सच्चाई क दुआरन क खोला,
    ताकि मइँ भीतर आइ पाउँ अउर यहोवा क आराधना करउँ।
²⁰ यहोवा क मौजूदगी मँ जाइ क दुआर हिआँ अहइ।
    बस सिरिफ धर्मी लोग ही ओन दुआरन स होइके जाइ सकत हीं।
²¹ हे यहोवा, मोर पराथना क जवाब देइ बरे
    अउर मोका रच्छा करइ बरे तोहका धन्यवाद देत अहउँ।

²² जउन पाथार क राज मिस्त्रियन नकार दिहे रहेन
    उहइ पाथर क प्रयोग कोना क पाथर क रूप मँ कीन्ह गवा।
²³ यहोवा इ घटना क होइ दिहस।
    अउर हम सबइ एहमाँ अद्भूत महसूस कीन्ह।
²⁴ इ उहइ दिना अहइ जेका यहोवा बनाएस ह।
    आवा हम खुसी क अनुभव करी अउर आजु आनन्दित होइ जाइ।

²⁵ लोग कहेन, “हे यहोवा, हम पचन क बचाव करा,
    हे यहोवा हमार रच्छा करा।
²⁶ उ मनई धन्न होइ जउन यहोवा क नाउँ मँ आवत अहइ।”
    “मइँ यहोवा क घर मँ तोहार स्तुति करित हउँ।
²⁷ यहोवा परमेस्सर अहइ।
    उ आपन प्रकास स हम पचन क छाया दिहेस ह।
    वेदी क कोनन पइ भेंट क मेमना क बाँधा।”

²⁸ हे यहोवा, तू हमार परमेस्सर अहा, अउर मइँ तोहार धन्यवाद करत हउँ।
    मइँ तोहार गुण गावत हउँ, हे मोर परमेस्सर।
²⁹ यहोवा क बड़कई करा काहेकि उ उत्तिम अहइ।
    ओकर सच्ची करुणा सदा-सदा बनी रहत ह।