◀ All Reading Plans / Chronological / 1 Chronicles 26-29 Psalm 127 (Awadhi Bible: Easy-to-Read Version)

Prev Day

May 26, 2016

Next Day

Use the calendar to view readings from this devotional.

May 2016
Su	Mo	Tu	We	Th	Fr	Sa
1	2	3	4	5	6	7
8	9	10	11	12	13	14
15	16	17	18	19	20	21
22	23	24	25	26	27	28
29	30	31

Return to today's reading

Chronological

Read the Bible in the chronological order in which its stories and events occurred.

Duration: 365 days

1 इतिहास 26-29

दुआरपाल

26 दुआरपालन क समूह: इ सबइ दुआरपाल कोरह परिवार स अहइँ:

आसाप क परिवार क कोरह क पूत मसेलेम्याह अउर ओकरे पूत। ²मसेलेम्याह क पूत रहेन। जकर्याह सब स बड़का पूत रहा। यदीएल दूसर पूत रहा। जबद्याह तीसर पूत रहा। यतीएल चउथा पूत रहा। ³एलाम पाँचवाँ पूत रहा। यहोहानान छठा पूत रहा अउर एल्यहोएनै सातँवा पूत रहा।

⁴ओबेदेदोम अउर ओनकर पूत। ओबेदेदोम क सब स बड़का पूत समायाह रहा। यहोजाबाद ओकर दूसर पूत रहा। योआह ओकर तीसर पूत रहा। साकार ओकर चउथा पूत रहा। नतनेल ओकर पाँचवाँ पूत रहा। ⁵अम्मीएल ओकर छठाँ पूत रहा। इस्साकार ओकर सातवाँ पूत रहा अउर पुल्लतै ओकर आठवाँ पूत रहा। परमेस्सर फुरइ ओबेदेदोम क बरदान दिहस। ⁶ओबेदेदोम क पूत समायाह रहा। समायाह क भी पूत रहेन। समायाह क पूत अपने बाप क परिवार मँ प्रमुख रहेन काहेके उ पचे बीर जोधा रहेन। ⁷समायाह क पूत ओती, रपाएल, ओबेद, एलजाबाद, एलीहू अउर समक्याह रहेन। एलजाबाद क सम्बंधी कुसल कारीगर रहेन। ⁸उ पचे सबहिं लोग ओबेदेदोम क सन्तान रहेन। उ सबइ मनईयन अउर ओनकर पूत अउर ओनकर सम्बंधी सक्तीसाली मनईयन रहेन। उ सबइ अच्छे रच्छक रहेन। ओबेदेदोम क बासठ संतान रहिन।

⁹मसेल्मयाह क पूत अउर सम्बंधी सक्तीसाली लोग रहेन। सब मिलाइके अट्ठारह पूत अउर सम्बंधी रहेन।

¹⁰मरारी क परिवार स इ सबइ दुआरपाल रहेन ओनमाँ एक ठू होसा रहा। सिम्री पहिला पूत चुना गवा रहा। सिम्री असल मँ स बड़ा नाहीं रहा, मुला ओकर बाप ओका पहिलौठा पूत चुना लिहे रहा। ¹¹हिल्किय्याह ओकर दूसर पूत रहा। तबल्याह ओकर तीसर पूत रहा। अउर जकर्याह ओकर चउथा पूत रहा। सब मिलाइके होसा क तेरह पूत अउ सम्बन्धी रहेन।

¹²इ सबइ दुआरपालन क समूह क प्रमुख रहेन। दुआरपालन क यहोवा क मन्दिर मँ सेवा करइ क खास ढंग रहा, जइसा कि ओनकर सम्बंधी करत रहेन। ¹³हर एक परिवार क एक दुआर रच्छा करइ बरे दीन्ह गवा रहा। एक परिवार क बरे दुआर चुनइ क गोट डाई जात रही। बूढ़ा अउ जवानन क संग एक समान बर्त्ताव कीन्ह जात रहा।

¹⁴मसेल्मयाह पूरबी दुआर क रच्छा बरे चुना गवा रहा। तब मसेल्मयाह क पूत जकर्याह बरे गोट डाइ गइ। जकर्याह एक बुद्धिमान सलाहकार रहा। जकर्याह उत्तरि दुआर बरे चुना गवा। ¹⁵ओबेदेदोम दक्खिन दुआर बरे चुना गवा अउर ओबेदेदोम क पूत उ घर क रच्छा क बरे चने गएन जेहमाँ कीमती चिजियन रखी जात रहिन। ¹⁶सुप्पीम अउर होसा पच्छि दुआर अउर ऊपरी सड़क पइ सुल्लेकेत दुआर बरे चुने गएन।

दुआरपाल एक दूसरे क बगल मँ खड़े होत रहेन। ¹⁷पूरबी दुआर पइ छ: लेवीबंसी रच्छक हर दिन खड़े होत रहेन। उत्तरी दुआर पइ हर दिन चार लेवीबंसी रच्छक खड़े होत रहेन। दक्खिनी दुआर पइ चार लेवीबंसी रच्छक खड़े होत रहेन अउर दुइ लेवीबंसी रच्छक उ घरे क रच्छा करत रहेन जेहमाँ कीमती चिजियन धरी जात रहिन। ¹⁸चार रच्छक पच्छिमी निआव घर पइ रहेन दुइ रच्छक निआव घरे तलक क सड़कियन पइ रहेन।

¹⁹इ सबइ दुआरपालन क समूह रहेन। उ सबइ दुआरपाल कोरह अउर मरारी क परिवार मँ स रहेन।

कोसाध्यच्छ अउर दूसर अधिकारी

²⁰अहिय्याह लेवी क परिवार समूह स रहा। अहिय्याह परमेस्सर क मन्दिर क कीमती चिजियन क देखभाल क जिम्मेदार रहा। अहिय्याह ओन जगहन क रच्छा बरे भी उत्तरदायी रहा जहाँ पवित्तर चिजियन रखी जात रहिन।

²¹लादान गेर्सोन परिवार स रहा। यहोएल लादान परिवार समूह क प्रमुखन मँ स एक रहा। ²²यहोएला क पूत जेताम अउ जेताम क भाई योएल रहेन। उ पचे यहोवा क मन्दिर मँ कीमती चिजियन क बरे उत्तरदायी रहेन।

²³दूसर प्रमुख अम्राम, यिसहार, हेब्रोन अउर उज्जीएल क परिवार समूह स चुने गए रहेन।

²⁴सबूएल यहोवा क मन्दिर मँ चिजियन क रच्छा क उत्तरदायी प्रमुख रहा। सबूएल गेर्सोम क पूत रहा। गेर्सोम मूसा क पूत रहा। ²⁵इ सबइ सबूएल क सम्बंधी रहेन: एलीआज़ार स ओकर सम्बंधी रहेन: एलीआज़ार क पूत रहब्याह, रहब्याह क पूत यसायाह, यसायाह क पूत योराम, योराम क पूत जिवी अउर जिवी क पूत सलोमोत। ²⁶सलोमोत अउर ओकर सम्बंधी ओन सब चिजियन क बरे उत्तरदायी रहेन जेका दाऊद मन्दिर क बरे एकट्ठा किहे रहा।

सेना क अधिकारियन भी मन्दिर क बरे चिजियन दिहन। ²⁷उ पचे जुद्धन मँ लीन्ह गइ चिजियन मँ स कछू चिजियन दिहेन। उ पचे यहोवा क मन्दिर क मरम्मत करइ बरे उ सबइ चिजियन दिहन। ²⁸सलोमोत अउर ओकर सम्बंधी दर्सी समूएल, कीस क पूत साऊल, नेर क पूत अबनेर, सरूयाह क पूत योआब क जरिये दीन्ह गइ पवित्तर चिजियन क भी रच्छा करत रहेन। सलोमोत अउ ओकर सम्बंधी लोगन क जरिये, यहोवा क दीन्ह गइ सबहिं पवित्तर चिजियन क रच्छा करत रहेन।

²⁹कनन्याह यिसहार परिवार क रहा। कनन्याह अउर ओकर पूत मन्दिर क बाहेर काम करत रहेन। उ पचे इस्राएल क विभिन्न जगहन पइ अधिकारी अउ निआवधीस क कार्य करत रहेन। ³⁰हसब्याह हेब्रोन परिवार स रहा। हसब्याह अउर ओकर सम्बंधी यरदन नदी क पच्छिम मँ इस्राएल क राजा दाऊद क कामन अउर यहोवा क सबहिं कामन क बरे उत्तरदायी रहेन। हसब्याह क समूह मँ एक हजार सात सौ सक्तीसाली मनई रहेन। ³¹हेब्रोन क परिवार समूह इ बात पइ प्रकास डावत ह कि यरिय्याह ओनकर प्रमुख रहा। जब दाऊद चालीस बरिस तलक राजा रह चुका, तउ उ अपने लोगन क परिवार क इतिहासन स सक्तीसाली अउर वुसल मनइयन क खोज क आदेस दिहस। ओनमाँ स कछू हेब्रोन परिवार मँ मिलेन जउन गिलाद क याजार नगर मँ रहत रहेन। ³²यरिय्याह क लगे दुइ हजार सात सौ सम्बंधी रहेन जउन सक्तीसाली मनईयन रहेन अउर परिवारन क प्रमुख रहेन। दाऊद ओन दुइ हजार सात सौ सम्बंधियन क रूबेन, गाद अउ आधे मनस्से क परिवार क संचालन अउर यहोवा अउ राजा क कार्य क जिम्मेदारी सौंपेस।

सेना क समूह

27 इ ओन इस्राएली लोगन क सूची अहइ जउन रजा क सेना मँ सेवा करत रहेन। हर एक समूह हर बरिस एक महीने अपने काम पइ रहत रहा। ओहमाँ परिवारन क सासक, नायक, सेनाध्यच्छ अउर अधिकारी लोग रहेन जउन राजा क सेवा करत रहेन। हर एक सेना क समूह मँ चौबीस हजार मनईयन रहेन।

²जबदीएल क पूत यासोबाम पहिले महीने बरे पहिले समूह क अधीच्छक रहा। यासोबाम क समूह मँ चौबीस हजार मनइयन रहेन। ³यासोबाम पेरेस क सन्तानन मँ स एक रहा। यसोबाम पहिले महीने क फउजी अधिकारियन क प्रमुख रहा।

⁴दोदै दूसरे महीने बरे सेना समूह क अधिच्छक रहा। उ ओहोही स रहा। दोदै क समूह मँ चौबीस हजार मनई रहेन।

⁵यहोयादा क पूत बनायाह तीसरा सेनापति रहा। बनायाह तीसरे महीने क सेनापति रहा। यहोयादा प्रमुख याजक रहा। बनायाह क समूह मँ चौबीस हजार मनइयन रहेन। ⁶इ उहइ बनायाह रहा जउन तीस बीरन मँ स एक ठू वीर फउजी रहा। बनायाह ओन मनइयन क संचालन करत रहा। बनायाह क पूत अम्मीजाबाद बनायाह क समूह क अधीच्छक रहा।

⁷चउथा सेनापति असाहेल रहा। असाहेल चउथे महीने क सेनापति रहा असाहेल योआब क भाई रहा। पाछे, असाहेल क पूत जबद्याह ओकर जगह सेनापति क रूप मँ लिहस। असाहेल क समूह मँ चौबीस हजार मनई रहेन।

⁸पाँचवाँ सेनापति सम्हूत रहा, सम्हूत पाँचवें महीने क सेनापति रहा। सम्हूत यिज्राही क परिवार स रहा। सम्हूत क समूह मँ चौबीस हजार मनई रहेन।

⁹छठा सेनापति ईरा रहा। ईरा छठवें महीने क सेनापति रहा। ईरा इक्केस क पूत रहा। इक्केस तकोई नगर स रहा। ईरा क समूह मँ चौबीस हजार मनई रहेन।

¹⁰सातवाँ सेनापति हेलेस रहा। हेलेस सातवें महीने क सेनापति रहा। उ पेलोनी लोगन स रहा अउर एप्रैम क सन्तान रहा। हेलेस क समूह मँ चौबीस हजार मनई रहेन।

¹¹सिब्बकै आठवाँ सेनापति रहा। सिब्बकै आठवें महीने क सेनापति रहा। सिब्बकै हूस स रहा। सिब्बकै जेरह परिवार क रहा। सिब्बकै क समूह मँ चौबीस हजार मनई रहेन।

¹²नवाँ सेनापति अबीएजेर रहा। अबीएजेर नवें महीने क सेनापति रहा। अबीएजेर अनातोत नगर स रहा। अबीएजेर बिन्यामीन क परिवार समूह क रहा। अबीएजेर क समूह मँ चौबीस हजार मनई रहेन।

¹³दसवाँ सेनापति महरै रहा। महरै दसवें महीने क सेनापति रहा। महरै नतोप स रहा। उ जेरह परिवार क रहा। महरै क समूह मँ चौबीस हजार मनई रहेन।

¹⁴गियारहवाँ सेनापति बनायाह रहा। बनायाह गियारहवें महीने क सेनापति रहा। बनायाह पिरातोन स रहा। बनायाह एप्रैम क परिवार समूह क रहा। बनायाह क समूह मँ चौबीस हजार मनई रहेन।

¹⁵बारहवाँ सेनापति हेल्दै रहा। हेल्दै बारहवें महीने क सेनापति रहा। हेलदे, नपोत स रहा। हेल्दै ओत्नीएल क परिवार क रहा। हेल्दै क समूह मँ चौबीस हजार मनई रहेन।

परिवार समूह क प्रमुख

¹⁶इस्राएल क परिवार समूहन क प्रमुख इ सबइ रहेन:

रूबेन: जिक्री क पूत रहा एलीआजर।

सिमोन: माका क पूत सपत्याह।

¹⁷लेवी: समूएल क पूत हसब्याह।

हारून: सादोक।

¹⁸यहूदा: एलीहू (एलीहू दाऊद क भाइयन मँ स एक रहा।)

इस्साकार: मीकाएल क पूत ओम्नी।

¹⁹जबूलून: ओबद्याह क पूत यिसमायाह,

नप्ताली: अज्रीएल क पूत यरीमोत।

²⁰एप्रैम: अजज्याह क पूत होसे।

पच्छिमी मनस्से: फ़दायाह क पूत योएल।

²¹पूर्वी मनस्से: जकार्याह क पूत इद्दो।

बिन्यामीन: अब्नेर क पूत यासीएल।

²²दान: यारोहाम क पूत अजरेल।

उ सबइ इस्राएल क परिवार समूह क प्रमुख रहेन।

दाऊद इस्राएलियन क गणना करत ह

²³दाऊद इस्राएली क मनइयन क गणना क निहचइ किहस। हुवाँ बहोत लोग रहेन काहेकि परमेस्सर इस्राएल क लोगन क आसमान क तारन क बराबर बनावइ क प्रतिग्या किहस। एह बरे दाऊद सिरिफ बीस बरिस अउर ओहसे ऊपर क मनइयन क गणना किहस। ²⁴सरूयाह क पूत योआब लोगन क गनब सुरू किहस। मुला उ गणना क पूरा नाहीं किहस। परमेस्सर इस्राएल क लोगन पइ कोहाइ गवा। इहइ कारण अहइ कि लोगन क गिनती राजा दाऊद क इतिहास क किताबे मँ नाहीं लिखी गइ।

राजा क प्रसासक

²⁵इ ओन मनइयन क सूची अहइ जउन राजा क सम्पत्ति बरे उत्तरदायी रहेन:

अदीएल क पूत अजमावेत राजा भण्डारन क अधीच्छक रहा।

उज्जिय्याह क पूत यहोनातान नान्ह नगरन क भण्डारन, गाँव, खेतन, अउ मीनारन क अधीच्छक रहा।

²⁶कलूब क पूत एज़्री खेत मँ काम करइवालन क अधीच्छक रहा।

²⁷सिमी अंगूर क खेतन क अधीच्छक रहा। सिमी रामा नगर क रहा।

जब्दी अंगूर क खेतन स आवइवाली दाखरस क देखरेख अउ भंडारण करइ क अधीच्छक रहा। जब्दी सापाम क रहा।

²⁸बाल्हानान पच्छिमी पहाड़ी पहँटा मँ जइतून अउर अंजीर क बृच्छन क अधीच्छक रहा।

बाल्हानान गदेर क रहा। योआस जइतून क तले क भंडारण क अधीच्छक रहा।

²⁹सित्रै सारोन छेत्र मँ पसुअन क अधीच्छक रहा। सित्रै सारोन छेत्र क रहा।

अदलै क पूत सापात घाटियन मँ पसुअन क अधीच्छक रहा।

³⁰ओबील ऊँटन क अधीच्छक रहा। ओबील इस्माएली रहा।

येहदयाह गदहन क अधीच्छक रहा। येहदयाह एक मरोनेतवासी रहा।

³¹याजीज भेड़िन क अधीच्छक रहा। याजीज हग्री लोगन मँ स रहा।

इ सबइ सबहिं मनई उ सबइ प्रमुख रहेन जउन दाऊद क सम्पत्ति क देखभाल करत रहेन।

³²योनातान एक ठू बुद्धिमान सलाहकार अउर सास्त्री रहा। योनातान दाऊद क चाचा रहा। हक्मोन क पूत एलीएल राजा क पूतन क देखभाल करत रहा। ³³अहीतोपेल राजा क सलाहकार रहा। हूसै राजा क मीत रहा। हूसै एरेकी लोगन मँ स रहा। ³⁴पाछे यहोयदा अउर एब्यातार राजा क सलाहकार क रूप मँ अहीतोपेल क जगह लिहस। यहोयादा बनायाह क पूत रहा। योआब राजा क सेना क सेनापति रहा।

दाऊद मन्दिर क जोजना बनावत ह

28 दाऊद इस्राएल क सबहिं प्रमुखन क एकट्ठा किहस। उ सबइ प्रमुखन क यरूसलेम आवइ क हुकुम दिहस। दाऊद परिवार समूहन क हरेक प्रमुखन, राजा क सेवा करइवाली सेना क टुक्रड़िन क सेनापतियन, सेनाध्यच्छन अउर अधिकारीयन जउन राजा अउ ओनके पूतन क जनावरन अउ सम्पत्ति क देखरेख करत रहेन, राजा क महत्त्वपूर्ण अधिकारियन, सक्तीसाली बीरन अउर सबहिं बीर जोधन क बोलाएस।

²राजा दाऊद खड़ा भवा अउर कहेस, “मोर भाइयो अउर मोरे लोगो, मोरे बात सुना। मइँ अपने हिरदइ स यहोवा क करार क सन्दूख क रखइ बरे एक जगह बनावइ चाहत हउँ। मइँ एक अइसी जगह बनावइ चाहत हउँ जउन परमेस्सर क पद पीठ बन सकइ अउर मइँ परमेस्सर बरे एक ठू मन्दिर बनावाइ क जोजना बनाएउँ। ³मुला परमेस्सर मोहसे कहेस, ‘नाहीं दाऊद, तोहका मोरे नाउँ बरे मन्दिर नाहीं बनावइ चाही। तोहका इ नाहीं करइ चाही काहेकि तू एक जोधा अहा अउर तू बहोत स मनइयन क मार्या ह।’

⁴“यहोवा इस्राएल क परमेस्सर इस्राएल क परिवार समूहन क अगुवाई करइ क बरे यहूदा क परिवार समूह क चुनेस। तब उ परिवार समूहस मँ स, यहोवा मोरे पिता क परिवार क चुनेस अउर उ परिवार स परमेस्सर मोका सदा बरे इस्राएल क राज चुनेस। परमेस्सर मोका इस्राएल क राजा बनावइ चाहत रहा। ⁵यहोवा मोका बहोत स पूत दिहेस ह अउर ओन सारे पूतन मँ स, सुलैमान क यहोवा इस्राएल क नवा राजा चुनेस। परन्तु इस्राएल फुरइ यहोवा क राज्ज अहइ। ⁶यहोवा मोहसे कहेस, ‘दाऊद, तोहार पूत सुलैमान मोर मन्दिर अउर एकरे चारिहुँ कइँती क पहँटा बनाई, काहेकि मइँ सुलैमान क आपन पूत चुनेउँ ह अउर मइँ ओकर बाप रहब। ⁷जदि सुलैमान मोर विधियन अउर नेमन पालन करत रहत ह जइसा कि आज करत ह। तउ मइँ ओकर राज्ज क सदा क बरे सक्तीसाली बनाइ देबउँ।’”

⁸दाऊद कहेस, “अब, सबहिं इस्राएलियन अउ परमेस्सर क समन्वा मइँ तोहसे इ सबइ बातन कहत हउँ: यहोवा अपने परमेस्सर क सबहिं आदेसन क मानइ मँ सावधान रहा। तब तू इ अच्छे देस क अपने लगे रख सकत ह अउर तू सदा क बरे एका अपने सन्तानन क दइ सकत ह।

⁹“अउर मोरे पूत सुलैमान, तू, अपने बाप क परमेस्सर क जानत अहा। समूचइ हिरदइ अउ इच्छा स परमेस्सर क सेवा करा। काहेकि यहोवा परखत ह कि हर एक क हिरदइ मँ का बाटइ। हर बात जउन सोचत ह यहोवा जानत ह। जदि तू यहोवा क लगे मदद क बरे जाब्या, तउ तोहका उ मिली। किन्तु जदि ओका तजत ह, तउ उ तोहका सदा क बरे तजि देइ। ¹⁰सुलैमान, तोहका इ समुझइ चाही कि यहोवा तोहका आपन पवित्तर मन्दिर बनावइ बरे चुनेस ह। सक्तीसाली बना अउर काम क पूरा करा।”

¹¹तब दाऊद अपने पूत सुलैमान क मन्दिर बनावइ बरे जोजनन दिहस। उ सबइ जोजनन मन्दिर क चारिहुँ कइँती ओसारा, अउर एकर भवन, एकर भंडार-कच्छ, एकरे ऊपरी कच्छ, एकरे भीतरी कच्छ अउ दयापीठ क जगह बरे रही। ¹²दाऊद मन्दिर क सबहिं हींसक क बरे जोजनन बनाए रहा। दाऊद ओन जोजनन क सुलैमान क दिहस। दाऊद यहोवा क मन्दिर क चारिहुँ ओर क आँगन अउर एकरे चारहिँ कइँती क कच्छन जोजनन दिहस। दाऊद मन्दिर क भंडारकच्छन अउर ओन भण्डारकच्छन क जोजना दिहस जहाँ उ पचे ओन पवित्तर चिजियन क धरत रहेन जउन मन्दिर मँ काम आवत रहिन। ¹³दाऊद सुलैमान क याजकन अउर लेवीबंसियन क समूहन क बारे मँ बताएस। दाऊद सुलैमान क यहोवा क मन्दिर मँ सेवा करइ क काम क बारे मँ अउर मन्दिर मँ काम आवइवाली चिजियन क बारे मँ बताएस। ¹⁴दाऊद सुलैमान क बताएस कि मन्दिर मँ काम आवइवाली चिजियन क बनावइ मँ केतना सोना अउ चाँदी लागइ चाही। ¹⁵सोना क दीपकन अउ दीपाधारन क जोजनन रहिन अउर चाँदी क दीपकन अउर दीपाधारन क जोजनन रहिन। दाऊद बताएस कि हर एक दीपधार अउ ओकरे दीपक बरे केतना सोना या चाँदी क उपयोग कीन्ह जाइ। बिभिन्न दीपधार, जहाँ जरूरत रही, उपयोग मँ आवइवाले रहेन। ¹⁶दाऊद बताएस कि पवित्तर रोटी क बरे काम मँ आवइवाली हर एक मेज क बरे केतना सोना काम मँ आइ। दाऊद बताएस कि चाँदी क मेजन बरे केतनी चाँदी काम मँ आई। ¹⁷दाऊद बताएस कि केतना सुद्ध सोना, काँटन, छिछकारइ क चिलमची अउर कलसा बनाइ मँ लागी। दाऊद बताएस कि हर एक तस्तरी मँ केतनी चाँदी लागी। ¹⁸दाऊद बताएस कि सुगन्धि क वेदी बरे केतना सुद्ध सोना लागी। दाऊद सुलैमान क परमेस्सर क रथ, यहोवा क करार क सन्दूख क ऊपर अपने पखनन क फइलास सोना क करूब सरगदूत क संग दयापीठ क जोजना भी दिहेस।

¹⁹दाऊद कहेस, “इ सबइ जोजना यहोवा स मिले निर्देसन क अनुसार लिखा ग रहेन अहइँ। यहोवा जोजना क हर एक भाग समुझइ मँ मोका मदद दिहस।”

²⁰दाऊद अपने पूत सुलैमान स इ भी कहेस, “दृढ़ अउर बीर बना अउर इ काम क पूरा करा। डेराअ जिन, काहेकि यहोवा, मोर परमेस्सर तोहरे संग अहइ। उ तोहार मदद तब तलक करी जब तलक तोहार इ काम पूरा नाहीं होइ जात। उ तोहका छोड़ी नाहीं। तू यहोवा क मन्दिर बनाउब्या। ²¹परमेस्सर क मन्दिर क सबहिँ काम करइ बरे याजकन अउ लेवीबंसियन क समूह तइयार अहइँ। सबहिं काम न मँ तोहका मदद देइ बरे कुसल कारीगर तइयार अहइँ जउन भी तू आदेस देब्या ओकर पालन अधिकारी अउर सबहिं लोग करिहीं।”

मन्दिर बनावइ बरे भेंट

29 राजा दाऊद हुवाँ एक संग बटुरे इस्राएल क सबहिं लोगन स कहेस, “परमेस्सर मोरे पूत सुलैमान क चुनेस। सुलैमान बालक अहइ अउर उ ओन सब बातन क नाहीं जानत जेनकर जरूरत ओका इ काम क करइ बरे अहइ। किन्तु काम बहोत महत्वपूर्ण अहइ। इ भवन लोगन क बरे नाहीं अहइ अपितु यहोवा परमेस्सर क बरे अहइ। ²मइँ आपन पूरी सक्ती स परमेस्सर क मन्दिर बनावइ क चिजियन क प्रबंध किहेउँ ह। मइँ सोना स बनइवाली चिजियन बरे सोना दिहेउँ ह। मइँ चाँदी स बनइवाली चिजियन क बरे चाँदी दिहेउँ ह। मइँ काँसा स बनइवाली चिजियन क बरे काँसा दिहेउँ ह। मइँ लोहा स बनइवाली चिजियन क बरे लोहा दिहेउँ ह। मइँ काठे स बनइवाली चिजियन क बरे काठ दिहेउँ ह। मइँ नीलमणि, रतनजटित फकनन क बरे बिभिन्न रंग क सबहिं प्रकार क कीमती रतन अउ सफेद संगमरमर भी दिहउँ ह। मइँ यहोवा क मन्दिर क बनावइ बरे इ सबइ चिजियन बहोत जियादा संख्याँ मँ दिहेउँ ह। ³मइँ अपने परमेस्सर क मन्दिर बरे सोना अउ चाँदी क एक बिसेस भेंट देत अहइँ। मइँ इ एह बरे करत हउँ कि मइँ फुरइ अपने परमेस्सर क मन्दिर क बनावइ चाहत हउँ। मइँ इ पवित्तर मन्दिर क बनावइ बरे एन सब चिजियन क देत हउँ। ⁴मइँ ओपीर स एक सौ दस टन सुद्ध सोना दिहेउँ ह। मइँ दुई सौ साठ टन सुद्ध चाँदी दिहेउँ ह। चाँदी मन्दिर क भवनन क देवारन क ऊपर मढ़इ बरे अहइ। ⁵मइँ सोना अउ चाँदी ओन सब चिजियन बरे दिहेउँ ह जउन सोना अउर चाँदी क बनी होत हीं। मइँ सोना अउ चाँदी दिहेउँ ह जेनसे कुसल कारीगर मन्दिर क बरे सबहिं विभिन्न तरह क चिजियन बनाइ सकइँ। अब आप लोगन मँ स केतने आजु यहोवा क काम बरे योगदान देइ बरे तइयार अहइँ?”

⁶परिवारन क प्रमुख, इस्राएल क परिवार समूहन क प्रमुख, उच्च अधिकारियन, कप्तान लोगन अउर राजा क काम करइ क बरे जिम्मेदार अधिकारी सबहिं तइयार रहेन अउर उ पचे कीमती चिजियन दिहन। ⁷इ सबइ उ सब चिजियन अहइँ जउन उ पचे परमेस्सर क घर क बरे दिहन: एक सौ नब्बे टन सोना, तीन सौ पचहत्तर टन ऐ चाँदी, छ: सौ पचहत्तर टन ऐ काँसा; तीन हजार सात सौ पचास टन ऐ लोहा; ⁸जउने लोगन क लगे कीमती रतन रहेन, उ पचे एका यहोवा क मन्दिर क खज़ाना मँ जउन यहीएल क सुरच्छा मँ रहेन, दिहेन। यहीएल गेर्सोन क परिवार स रहा। ⁹लोग बहोत खुस रहेन। काहेकि ओनकर प्रमुख ओतना जियादा देइ मँ खुस रहेन। प्रमुख स्वतंत्रता पूर्वक खुले दिल स देइ मँ खुस रहेन। राजा दाऊद भी बहोत खुस रहा।

दाऊद क सुन्नर पराथना

¹⁰तब दाऊद ओन लोगन क समन्वा, जउन हुवाँ एक संग बटुरे रहेन, यहोवा क बड़कई किहन। दाऊद कहेस:

“यहोवा इस्राएल क परमेस्सर, हमार बाप,
    सदा-सदा बरे तोहार स्तुति होइ।
¹¹महानता, सक्ती, यस बिजइ अउर प्रतिस्ठा तोहार अहइ।
    काहेकि हर एक चीज धरती अउर आसमान क तोहार ही अहइ।
हे यहोवा! राज्ज तोहार अहइ:
    तू हर एक क ऊपर सासक अहा।
¹²सम्पत्ति अउर प्रतिस्ठा तोहसे अवत ह।
    तोहार सासन हर चीज पइ अहइ।
तू सक्ती अउर बल अपने हाथे मँ रखत ह।
    तोहरे हाथे मँ सक्ती अहइ कि तू कउनो क भी महान अउर सक्तीसाली बानावइ सकत ह।
¹³अब, हमार परमेस्सर हम तोहका धन्यवाद देत अही,
    अउर हम तोहरे यसस्वी नाउँ क स्तुति करत अही।
¹⁴इ सबहिं चिजियन ओहसे अउर मोरे लोगन स नाहीं आइ अहइँ।
    इ सबइ सबहिं चिजियन तोहसे आइन
    अउर हम तोहका उ सबइ चिजियन दिहेउँ जउन तोहसे आई अहइँ।
¹⁵हम पचे ठीक अपने पुरखन क नाईं
    इ संसार मँ तोहरे समन्वा बिदेसी क तरह रहत हउँ।
इ धरती पइ हमार समइ बिना उम्मीद क
    छाया क नाईं गुज़रत अहइ।
¹⁶हे यहोवा हमार परमेस्सर, हम इ सबइ चिजियन तोहार मन्दिर बनवइ बरे बटोरेन ह।
    हम लोग तोहार मन्दिर तोहार नाउँ क सम्मान बरे बनाउब।
मुला इ सबइ चिजियन तोहसे आई अहइँ
    अउर हर चीज तोहर अहइ।
¹⁷मोर परमेस्सर, मइँ इ भी जानत हउँ तू लोगन क हिरदइ क जाँच करत ह,
    अउर तू खुस होत ह,
जदि लोग अच्छे काम करत हीं,
    मइँ सच्चे हिरदइ स इ सबइ चिजियन देइ मँ खुस रहेउँ।
अब मइ तोहरे लोगन क हुवाँ बटुरा लखइ सकत हउँ
    जउन इ सबइ चिजियन तोहका देइ मँ खुस अहइँ।
¹⁸हे यहोवा, तू परमेस्सर अहा
    हमार पुरखा इब्राहीम, इसहाक अउ इस्राएल क।
कृपा कइके तू लोगन क मदद सही जोजना बनावइ मँ कइके
    ओनका तोहरे बरे बिस्सास जोग्ग अउर सच्चा होइ मँ करा।
¹⁹अउर मोरे पूत सुलैमान क तोहरे बरे सच्चा होइ मँ मदद द्या
    तोहार कानून, नेमन अउर आदेसन क सर्वदा पालन करी मँ मदद द्या।
ओन कामन क करइ मँ सुलैमान क मदद करा
    अउर उ सानदार महल क बनावइ मँ ओकर मदद करा जेकर जोजना मइँ बनाएउँ ह।”

²⁰तब दाऊद हुवाँ एक संग बटुरे सबहिं समूहन क लोगन स कहेस, “अब यहोवा, अपने परमेस्सर क स्तुति करा।” एह बरे सब यहोवा परमेस्सर, उ परमेस्सर क जेकर आराधना ओनकर पुरखन किहेन, स्तुति किहस। उ पचे यहोवा तथा ओकर राजा क सम्मान देइ क बरे धरती पइ माथा टेकिके प्रणाम किहन।

सुलैमान राजा होत ह

²¹अगले दिन लोगन यहोवा क बलि भेंट किहन। उ पचे यहोवा क होमबलि भेंट किहेन। उ पचे एक हजार बैल, एक हजार भेड़न एक हजार मेमनन भेंट क रूप मँ दिहन अउर उ पचे पेयबलि भी भेंट किहेन। इस्राएल क सबइ लोगन बरे हुवाँ अनेक बलिदान दिए गएन। ²²उ दिन लोग खाएन अउर पीएन अउर यहोवा हुवाँ ओनके संग रहा उ पचे बहोत खुस रहेन।

अउर पचे दाऊद क पूत सुलैमान क दूसरी दाईं राजा बनाएन। उ पचे सादोक क अभिसेक राजा क रूप मँ किहन अउर उ पचे सादोक क अभिसेक याजक बनवावइ बरे किहन। उ पचे इ उ जगह पइ किहन जहाँ यहोवा रहा।

²³तब सुलैमान राजा क रूप मँ यहोवा क सिंहासन पइ बइठा सुलैमान अपने बाप क जगह लिहस। सुलैमान बहोत सफल रहा। इस्राएल क सबहिं लोगन सुलैमान क आदेस मानत रहेन। ²⁴सबहिं प्रमुख, फउजी अउर राजा दाऊद क सबहिं पूतन सुलैमान क राजा क रूप मँ स्वीकार किहन अउर ओकरी आग्या क पालन किहन। ²⁵यहोवा सुलैमान क बहोत महान बनाएस। इस्राएल क सबहिं लोग जानत रहेन कि यहोवा सुलैमान क महान बनावत अहइ। यहोवा सुलैमान क उ सम्मान दिहस जउन एक राजा क मिलइ चाही। यहोवा सुलैमान क साही प्रताप दिहेस जउन पहिले इस्राएल क कउनो राजा क नाहीं मिला।

दाऊद क मउत

^26-27यिसै क पूत दाऊद पूरे इस्राएल पइ चालीस बरिस तलक राजा रहा। दाऊद हेब्रोन नगर मँ सात बरिस तलक राजा रहा। तब दाऊद यरूसलेम मँ तैंतीस बरिस तलक राजा रहा। ²⁸दाऊद तब मरा जब उ बूढ़ा रहा। दाऊद एक नीक लम्बी जिन्नगी बिताएस। दाऊद क लगे बहोत सम्पत्ति अउ प्रतिस्ठा रही अउर दाऊद क पूत सुलैमान ओकरे पाछे राजा बना।

²⁹उ सबइ कार्य, जउन सुरू स लइके आखिर तलक दाऊद किहस, समूएल दर्सी क रचना मँ अउर नातान नबी क रचना मँ अउ गाद दर्सी क रचना मँ लिखे गएन ह। ³⁰उ सबइ रचना इस्राएल क राजा क रूप मँ दाऊद जउन काम किहेस ओन सब क सूचना देत ह। उ सबइ दाऊद क सक्ती अउर ओकरे संग जउन घटा, ओकरे बिसय मँ भी बतावत हीं, अउर उ सबइ इस्राएल अउ ओकरे चारिहुँ कइँती क राज्जन मँ जउन भवा, ओकरे बारे मँ बतावत ह।

भजन संहिता 127

सुलैमान क मन्दिर क आरोहण गीत।

¹अगर घर क निर्माता खुद यहोवा नाहीं अहइ,
तउ घरे क बनावइ वाला बेकार समइ गँवावत ह।
अगर सहर क रखवाला खुद यहोवा नाहीं अहइ,
तउ रखवारे बेकार समइ गँवावत हीं।

²अगर भिन्सारे जागिके तू देर राति तलक काम करा।
एह बरे कि तू सबन्क बस खइया बरे कमाइ क अहइ,
तउ तू पचे बेकार समइ गँवावत ह।
परमेस्सर आपन भगतन क ओनके सोवत तलक मँ धियान रखत ह।

³गदेलन यहोवा क उपहार अहउँ।
    गदेलन क जनम माता बरे ओकर उपहार अहइँ।
⁴जवान मनई क पूत
    जोद्धा क हाथन मँ बाण क नाईं होत हीं।
⁵जउन मनई बाण रूपी पूतन स तरकस क भरत ह
    उ बहोत खुस होइ।
उ मनई कबहुँ हारी नाहीं।
    ओकर पूत आपन दुस्मनन स सार्वजनिक जगहियन पइ ओकर रच्छा करिहीं।

Awadhi Bible: Easy-to-Read Version (ERV-AWA)