Chronological
मन्दिर मँ लेवीबंसियन क जरिये सेवा क जोजना
23 दाऊद बूढ़ा होइ गवा, एह बरे उ अपने पूत सुलैमान क इस्राएल क नवा राजा बनाएस। 2 दाऊद इस्राएल क सबहिं प्रमुखन क बटोरेस। उ याजकन अउ लेवीबंसियन क भी एकट्ठा किहस। 3 दाऊद तीस बरिस अउर ओहसे ऊपर क उमर क लेवीबंसियन क गनेस। सब मिलाइके अड़तीस हजार लेवीबंसियन रहेन। 4 दाऊद कहेस, “चौबीस हजार लेवीबंसियन यहोवा क मन्दिर क निर्माण कार्य क देखरेख करिहीं। छ: हजार लेवीबंसी अधिकारी अउर निआवधीस होइहीं। 5 चार हजार लेवीबंसी दुआरपाल होइहीं अउर चार जहार लेवीबंसी संगीतन होइहीं मइँ ओनके बरे बिसेस बाजा बनाएँउ ह। उ पचे ओन बाजन क उपयोग यहोवा क स्तुति बरे करिहीं।”
6 दाऊद लेवीबंसियन क तीन बर्गन मँ बाँट दिहस। उ पचे लेवी क तीन पूतन गेर्सोन, कहात अउ मरारी क परिवार समूह रहेन।
गर्सोन क परिवार समूह
7 गर्सोन क परिवार समूह स लादान अउ सिमी रहेन। 8 लादान क तीन पूत रहेन। ओकर सब स बड़ा पूत यहीएल रहा। ओकर दूसर पूत जेताम अउ योएल रहेन। 9 सिमी क पूत सलोमीत, हजीएल अउ हारान रहेन। इ सबइ तीनहुँ पूत लादान क परिवारन क रहेन।
10 सिमी क चार पूत रहेन। उ पचे यहत, जीना, यूस अउ बरीआ रहेन। 11 यहत सब स बड़का अउ जीजा दूसर पूत रहा। मुला यूस अउ बरीआ क जियादा पूत नाहीं रहेन। एह बरे यूस अउ बरीआ एक परिवार क रूप मँ गने जात रहेन।
कहात क परिवार समूह
12 कहात क चार पूत रहेन। उ पचे अम्राम, यिसहार, हेब्रोन अउ उज्जीएल रहेन। 13 अम्राम क पूत हारून अउर मूसा रहेन। हारून अउर ओकर पूतन सदा-सदा पवित्तर कार्य करइ बरे, यहोवा क समन्वा धूप भेंट चढ़ावइ बरे, याजक क रूप मँ यहोवा क सेवा करइ बरे अउर यहोवा क नाउँ पइ लोगन सदा-सदा आसीर्बाद देइ बरे प्रतिस्ठित कीन्ह गवा रहेन।
14 मूसा परमेस्सर क मनई रहा। मूसा क पूत, लेवी क परिवार समूह क हींसा स रहेन। 15 मूसा क पूत गेर्सोम अउ एलीएजेर रहेन। 16 गेर्सोम क बड़का पूत सबूएल रहा। 17 एलीएजेर क बड़का पूत रहब्याह रहा। एलीएजेर क अउर कउनो पूत नाहीं रहा। मुला रहब्याह क बहोत स पूत रहेन।
18 यिसहार क सब स बड़का पूत सलोमीत रहा।
19 हेब्रोन क सब स बड़का पूत यरीय्याह रहा। हेब्रोन क दूसर पूत अमर्याह रहा। यहजीएल तीसर पूत रहा। अउर यकमाम चउथा पूत रहा।
20 उज्जीएल क सब स बड़का पूत मीका रहा अउर यिस्सिय्याह ओकर दूसर पूत रहा।
मरारी क परिवार समूह
21 मरारी क पूत महली अउ मूसी रहेन। महली क पूत एलीआज़ार अउ कीस रहेन। 22 एलीआज़ार बिना पूतन क मरा। ओकर सिरिफ बिटियन रहिन। एलीआज़ार क बिटियन अपने सम्बन्धियन स बियाह किहेन। ओनकर सम्बन्धी कीस क पूत रहेन। 23 मूसी क पूत महली, एदेर अउर यरेमोत रहेन। सब मलाइके तीन पूत रहेन।
लेवीबंसियन क काम
24 इ सबइ लेवी क संतान रहेन। उ पचे अपने परिवार क अनुसार सूची मँ अंकित रहेन। उ पचे परिवारन क प्रमुख रहेन। सबइ व्यक्ति क नाउँ सूची मँ रहेन। जउन सूची मँ अंकित रहेन उ सबइ बीस बरिस क या ओहसे ऊपर क रहेन। उ पचे यहोवा क मन्दिर मँ सेवा करत रहेन।
25 दाऊद कहे रहा, “इस्राएल क यहोवा परमेस्सर अपने लोगन क सान्ति दिहस ह। यहोवा यरूसलेम मँ सदा ही रहइ बरे आइ गवा। ह। 26 एह बरे लेवीबंसियन क पवित्तर तम्बू या एकर सेवा मँ काम आवइवाली कउनो चीज़ क भविस्स मँ ढोवइ क जरूरत नाहीं अहइ।”
27 दाऊद क अन्तिम निर्देस इस्राएल क लोगन क बरे, लेवी क परिवार समूह क सन्तानन क गनब रहा। उ पचे लेवीबंसियन क बीस बरिस अउर ओहसे ऊपर क मनइयन क गनेन।
28 लेवीबंसियन क काम हारून क सन्तानन क यहोवा क मन्दिर मँ सेवा कार्य करइ मँ मदद करब रहा। लेवीबंसी मन्दिर क आँगन अउर बगल क कमरन क भी देखभाल करत रहेन। ओनकर काम सबहिं पवित्तर चिजियन क सुद्ध करइ क रहा। ओनकर काम इ भी रहा कि परमेस्सर क मन्दिर मँ सेवा करइँ। 29 मन्दिर मँ बिसेस रोटी क मेज पइ रखइ क जिम्मेदारी ओनकर ही रहेन। उ पचे आटा, अन्नबलि अउ अखमीरी रोटि बरे भी जिम्मेदार रहेन। उ पचे पकावइ क कढ़ाइयन अउर मिस्रित भेंटन क बरे जिम्मेदार रहेन। उ पचे सारा नाप तउल क काम करत रहेन। 30 लेवीबंसी हर एक भिंसारे खड़े होत रहेन अउर यहोवा क धन्यवाद अउ स्तुति करत रहेन। उ पचे एका हर एक साँझ क करत रहेन। 31 लेवीबंसी यहोवा क सबहिं होमबलियन बिस्राम क बिसेस दिनन, नवा चन्द्रिमा क उत्सव अउर सबहिं बिसेस पर्व क दिनन पइ तइयार करत रहेन। उ पचे यहोवा क समन्वा हर रोज़ सेवा करत रहेन। केतने लेवीबंसी हर दाईं सेवा करइ चाही एकरे बरे बिसेस नेम रहेन। 32 एह बरे लेवीबंसी उ सब काम करत रहेन जेनकर आसा ओनसे कीन्ह जात रही। उ पचे पवित्तर तम्बू क देखभाल करत रहेन। उ पचे पवित्तर जगह क देखभाल करत रहेन अउर उ पचे अपने सम्बन्धियन हारून क सन्तान याजकन क मदद देत रहेन। लेवीबंसी यहोवा क मन्दिर मँ सेवा कइके याजकन क मदद करत रहेन।
याजकन क समूह
24 हारून क पूतन क इ सबइ समूह रहेन: हारून क पूत नादाब, अबीहू, एलीआजर अउ ईतामार रहेन। 2 मुला नादाब अउ अबीहू अपने बाप क मउत क पहिले ही मर गएन अउर नादाब अउ अबीहै क कउनो पूत नाहीं रहा एह बरे एलीआजर अउ ईतामार याजक क रूप मँ कार्य किहन। 3 दाऊद एलीआजर अउ ईतामार क परिवार समूह क दुइ भिन्न समूहन मँ बाँटेस। दाऊद इ एह बरे किहस कि इ सबइ समूह ओनका दीन्ह गए कर्त्तव्यन क पूरा कइ सकइ। दाऊद इ सब सादोक अउर अहीमेलेक क मदद स किहेस। सादोक एलीआजर क सन्तान रहा अउर अहीमेलेक ईतामार क सन्तान रहा। 4 एलीआजर क परिवार समूह क प्रमुख ईतामार क परिवार समूह क प्रमुखन स जियादा रहेन। एलीआजर क परिवार समूह क सोलह प्रमुख रहेन अउर ईतामार क परिवार समूह स आठ प्रमुख रहेन। 5 हर एक परिवारे स मनईयन चुने गए रहेन। उ पचे गोट डाइके चुने गए रहेन। कछू मनईयन पवित्तर जगह क अधिकारी चुने गए रहेन अउर दूसर मनई याजक क रूप मँ सेवा बरे चुने गए रहेन। इ सबइ मनई एलिआजर अउर ईतामार क परिवार समूहन स चुने गए रहेन।
6 समायाह लिपिकार रहा। उ नतनेल क पूत रहा। समायाह लेवी परिवार समूह स रहा। समायाह ओन सन्तानन क नाउँ लिखेस। उ ओन नामन क राजा दाऊद अउर एन प्रमुखन क समन्वा लिखेस: याजक सादोक, अहीमेलेक अउ याजक अउ लेवीबंसियन क परिवारन क प्रमुख। अहीमेलेक एब्यातार क पूत रहा। हर एक दाईं उ पचे गोट डाइके एक मनई चुनत रहेन अउर समायाह उ मनई क नाउँ लिख लेत रहा। इ तरह उ पचे एलीआजर अउर ईतामार क परिवारन मँ काम क बाँटेस।
7 पहला समूह यहोयारीब क रहा।
दूसरा समूह यदायाह क रहा।
8 तीसरा समूह हारीम क रहा।
चउथा समूह सोरीम क रहा।
9 पाँचवा समूह मल्किय्याह क रहा।
छठा समूह मिय्यामीन क रहा
10 सातवाँ समूह हक्कोस क रहा।
आठवाँ समूह अबिय्याह क रहा।
11 नवाँ समूह येसू क रहा।
दसवाँ समूह सकन्याह क रहा।
12 गियारहवा समूह एल्यासीब क रहा।
बारहवाँ समूह याकीम क रहा।
13 तेरहवाँ समूह हुप्पा क रहा।
चौदहवाँ समूह येसेबाब क रहा।
14 पन्द्रहवाँ समूह बिल्गा क रहा।
सोलहवाँ समूह इम्मेर क रहा।
15 सत्रहवाँ समूह हेजीर क रहा।
अट्ठरहवाँ समूह हप्पित्सेस क रहा।
16 उन्नीसवाँ समूह पतह्याह क रहा।
बीसवाँ समूह यहेजकेल क रहा।
17 इक्कीसवाँ समूह याकीन क रहा।
बाईसवाँ समूह गामूल क रहा।
18 तेईसवाँ समूह दलायाह क रहा।
चौबीसवाँ समूह माज्याह क रहा।
19 यहोवा क मन्दिर मँ सेवा करइ क बरे इ सबइ समूह चुने गए रहेन। उ पचे मन्दिर मँ सेवा करइ बरे हारून क नेमन क मानत रहेन। इस्राएल क यहोवा परमेस्सर एन नेमन क हारून क दिहे रहा।
दूसर लेवीबंसी
20 इ सबइ नाम सेस लेवी सन्तान क अहइँ:
अम्राम क सन्तानन स सूबाएल।
सूबाएल क सन्तानन स येहदयाह।
21 रहब्याह स: यिस्सिय्याह (यिस्सिय्याह सब स बड़का पूत रहा)
22 इसहारी परिवार समूह स: सलोमोत।
सलोमोत क परिवार स: यहत।
23 हेब्रोन क सब स बड़का पूत यरिय्याह रहा।
अमर्याह हेब्रोन क दूसर पूत रहा।
यहजीएल तीसर पूत रहा।
अउर यकमान चउथा पूत
24 उज्जीएल क पूत मीका रहा।
मीका क पूत सामीर रहा।
25 यिस्सिय्याह मीका क भाई रहा।
यिस्सिय्याह क पूत जकर्याह रहा।
26 मरारी क सन्तान महली, मूसी अउर ओकर पूत याजिय्याह रहेन।
27 मरारी क पूत याजिय्याह क पूतन नाउँ: सोहम, जक्कू अउर इब्री रहेन।
28 महली क पूत एलीआजर रहा किन्तु एलीआजर क कउनो पूत नाहीं रहा।
29 कीस क पूत यरह्मेल रहा।
30 मूसी क पूत महली, एदेर अउर यरीमोत रहेन।
उ पचे लेवीबंसी परिवारन क प्रमुख अहइ। उ पचे अपने परिवारन क सूची मँ अहइ। 31 उ पचे बिसेस कामन बरे चुने गए रहेन। उ पचे अपने सम्बन्धी याजकन क तरह गोट डावत रहेन। याजक हारून क सन्तान रहेन। उ पचे राजा दाऊद, सादोक, अहीमेलेक अउर याजकन अउ लेवी क परिवारन क प्रमुखन क समन्वा गोटन डाएन। जब ओनके काम दिए गएन तउ पुराने अउ नवा परिवारन क एक सा बेउहार भवा।
संगीत समूह
25 दाऊद अउ सेनापतियन आसाप क पूतन क बिसेस सेवा बरे अलग किहन। आसाप क पूत हेमान अउ यदूतून रहेन। ओनकर बिसेस काम परमेस्सर क सँदेसा क भविस्वाणी सारंगी, वीणा, मंजीरे क उपयोग कइके करब रहा। हिआँ ओन मनईयन क सूची अहइ जउन इ तरह सेवा किहन।
2 आसाप क परिवार समूह स, जक्कूर, योसेप, नतन्याह अउर असरेला रहेन। राजा दाऊद आसाप क भविस्सबाणी क बरे चुनेस अउ आसाप अपने पूतन क अगुवाइ किहेस।
3 यदूतून परिवार स: गदल्याह, सरी, यसायाह, सिमी, हसब्याह अउर मत्तित्याह रहेन। इ सबइ छ: रहेन। यदूतून आपन पूतन क अगुवाइ किहेन। यदूतून सारंगी क उपयोग भविस्सबाणी करइ अउर यहोवा क धन्यबाद देइ अउर ओकर स्तुति बरे किहस।
4 हेमान क पूत जउन सेवा करत रहेन बुक्किय्याह, मत्तन्याह, लज्जीएल, सबूएल अउर यरीमोत, हनन्याह, हनानी, एलीआता, गिद्दलती अउर रोममतीएजेर, योसबकासा, मल्लोती, होतीर अउर महजीओत रहेन। 5 इ सबइ सबहिं मनई हेमान क पूत रहने। हेमान दाऊद क दर्सी रहा। परमेस्सर हेमान क सक्तीसाली बनावइ क बचन दिहस। एह बरे हेमान क कई पूत रहेन। परमेस्सर हेमान क चौदह पूत अउ तीन बिटियन दिहस।
6 हेमान अपने पूतन क यहोवा क मन्दिर मँ गायन मँ अगुवाइ किहेन। ओन पूतन सारंगी, वीणा, मजीरा क उपयोग किहस। उ पचे परमेस्सर क मंदिर मँ राजा आसप क आदेस क अनुसार जउन उ यदूतून अउर हेमान क दिहे रह इहइ तरिका स सेवा किहस। 7 उ सबइ मनई अउर लेवी क परिवार समूह क ओनकर सम्बन्धियन गायन मँ प्रसिच्छित रहेन। दुई सौ अट्ठासी मनइयन यहोवा क स्तुति क गीत गाउब सीखेन। 8 हर एक मनई जउने भिन्न कार्य क करी, ओकरे चुनाव बरे उ पचे गोट डावत रहेन। हर एक मनई क संग समान बेउहार होत रहा। बूढ़े अउर जवान क संग समान बेउहार रहा अउर गुरु क संग उहइ बउहार हरा। जउन सिस्य क संग।
9 पहिले, आसाप (यूसुफ) क पूतन अउ सम्बन्धियन मँ स बारह मनई चुनेस गए रहेन।
दूसर, गदल्याह क पूतन अउर सम्बनंधियन मँ स बारह मनई चुने गएन।
10 तीसरे, जक्कूर क पूतन अउ सम्बंधियन मँ स बारहह् मनई चुने गएन।
11 चउथे, यिस्री क पूतन अउ सम्बंधियन मँ स बारह मनई चुने गएन।
12 पाँचवे, नतन्याह क पूतन अउ सम्बंधियन मँ स बारह मनई चुने गएन।
13 छठे, बुक्किय्याह क पूतन अउ सम्बंधियन मँ स बारह मनई चुने गएन।
14 सातवें, यसरेला क पूतन अउ सम्बंधियन मँ स बारह मनई चुने गएन।
15 आठवें, यसायाह क पूतन अउ सम्बंधियन मँ स बारह मनई चुने गएन।
16 नवें, मत्तन्याह क पूतन अउ सम्बंधियन मँ स बारह मनई चुने गएन।
17 दसवें, सिमी क पूतन अउ सम्बंधियन मँ स बारह मनई चुने गएन।
18 गियारहवें, अजरेल क पूतन मँ अउर सम्बंधियन मँ स बारह मनई चुने गएन।
19 बारहवें, हसब्याह क पूतन अउर सम्बंधियन मँ स बारह मनई चुने गएन।
20 तेरहवें, सूबाएल क पूतन अउ सम्बंधियन मँ स बारह मनई चुने गएन।
21 चउदहवें, मत्तिय्याह क पूतन अउर सम्बंधियन मँ स बारह मनई चुने गएन।
22 पन्द्रहवें, यरेमोत क पूतन अउर सम्बंधियन मँ स बारह मनई चुने गएन।
23 सोलहवें, हनन्याह क पूतन अउर सम्बंधियन मँ स बारह मनई चुने गएन।
24 सत्रहवें, योसबकासा क पूतन अउर सम्बंधियन मँ स बारह मनई चुने गएन।
25 अट्ठरहवें, हनानी क पूतन अउ सम्बंधियन मँ स बारह मनई चुने गएन।
26 उन्नीसवें, मल्लोती क पूतन अउ सम्बंधियन मँ स बारह मनई चुने गएन।
27 बीसवें, इलिय्याता क पूतन अउ सम्बंधियन मँ स बारह मनई चुने गएन।
28 इक्कीसवें होतीर क पूतन अउ सम्बंधियन मँ स बारह मनई चुने गएन।
29 बाईसवें, गिद्दलती क पूतन अउ सम्बंधियन मँ स बारह मनई चुने गएन।
30 तेईसवें, महजीओत क पूतन अउ सम्बंधियन मँ स बारह मनई चुने गएन।
31 चौबीसवें, रोममतीएजेर क पूतन अउर सम्बंधियन मँ स बारह मनई चुने गएन।
Awadhi Bible: Easy-to-Read Version. Copyright © 2005 Bible League International.