Chronological
Dee Psalme I
Dee 1 Psalm
1 Jesäajent es dee Maun dee nijch enn dee Gottloose äa Rot jewaundelt haft, un dee nijch enn dee Sinda äare Wäaj jestone haft, un dee nijch enn dee Spatta äare Set jesäte haft.
2 Oba sien Fejneaje es bloos enn däm Herr Gott sien Jesats, un dee sikj Dach en Nacht enn sien Jesats besenne deit.
3 Un hee saul jeplaunt senne soo aus en Boom bie dee Wota Streem, dee äare Frucht brinjt to rajchte Tiet; sien Blaut woat nijch fewalkje; un aules daut hee deit woat am jelinje.
4 Oba dee Gottloose sent nijch soo; oba sent soo aus daut Sprie daut dee Wint fepliesat.
5 Doaromm woare dee Onnjerajchte nijch enn daut Jerejcht bestone, uk nijch Sinda enn dee Jerajchte äare Fesaumlunje.
6 Dan dee Herr Gott kjant dee Jerajchte äa Wajch, oba dee Gottloose äa Wajch woat feschwinje.
Dee 2 Psalm
1 Wuaromm sent dee Natsjoone rosent, un doone nutslooset bedenkje?
2 Dee Kjeenije oppe Ead stale sikj jäajenaun; jo, dee Harsche ha toop jeplont jäajent daem Herr Gott un sien Ennjesaulwda, un saje:
3 "Wie woare äare Baunde entwei bräakje, un schmiete äa Jebunjnet fonn onns."
4 Dee enne Himels set woat lache; dee Herr Gott woat an spotte.
5 Dan woat hee to an räde enn sien Oaja, Hee woat an trubble enn sien Rach.
6 Doch ha ekj mien Kjeenijch opp mien heilja Boajch jesat, opp Zion.
7 Ekj woa daut aus en Jesats moake, dee Herr Gott säd to mie: "Du best mien Sän, fonndoag sie ekj dien Foda jeworde!"
8 Froag mie, un ekj woa die dee Natsjoone jäwe aus dien Oawgoot, un dee wietste Kaunte fonn dee Welt aus dien Habgoot.
9 Du woascht dän bräakje met ne Iesestang; du woascht dän to Biete schmattre soo aus en Toppstrikja sien Jefäs.
10 Nu dan, siet Weis, O Kjeenije, siet ennjeleat, O jie Rejchta oppe Ead;
11 Deent däm Herr Gott met Forjcht; jo, freit junt met Tsetre.
12 Kusst dän Sän, sest woat hee oajalijch senne, un junt fonn dän Wajch fenijchte wan sien Rach uk bloos en bät aunjestekjt woat. O, dee Säajen fa aul dän dee äa Toofetruehe enn am ha!
Dee 15 Psalm
En Psalm fonn Doft.
1 O Herr Gott, wäa saul enn diene Woninj wone? Wäa saul enn dien Heilja Boajch wone?
2 Soona dee opprajchtijch waundelt un deit Jerajchtijchkjeit eewe, un deit enn sien Hoat dee Woarheit raede.
3 Hee deit nijch hinjarikjsch räde met siene Tunj, un deit sien Frint uk nijch Beeset aun, un deit uk nijch sien Noba waut fäaschmiete.
4 Dee ennjewartelda Sinda es enn siene Uage fe-acht, oba hee deit däm eare dee däm Herr Gott ferjchte deit. Hee haft jeschweat to sien eajnet Schode, un woat daut nijch endre.
5 Hee haft sien Jelt nijch utjeliet fa Entrast, hee haft uk nijch Schmeijchel Jelt jenome jäajen dee Onnschuldje, soona dee soont deit woat emma bestendijcht senne.
Dee 22 Psalm
To dän haupt Musikaunt; opp dän Ree fonn Sonnopgank, en Psalm fonn Doft.
1 Mien Gott, mien Gott, wuaromm hast du mie felote, un best soo wiet auf fonn miene Aufleewrunk, un dee Wead fonn mien Staene?
2 O mien Gott, ekj schrie wäarent dän Dach, oba du deist nijch auntwuate, un enne Nacht, oba aules es fa mie Stel.
3 Oba du best Heilijch, dee opp Iesrael äa Preis jetroont es.
4 Onnse Fodasch deede enn die fetruehe, dee fetruede, un du deetst an rade.
5 See roopte die aun, un worde jerat, see fetruede enn die un bruckte sikj nijch schäme.
6 Oba ekj sie en Worm, un nijch en Maun, en Aufschue fonn Menscheit, un fonn daut Folkj fe-acht.
7 Aule dee mie seene, lache äwa mie enn Spott; dee moake äare Leppe op un scheddre äa Kopp.
8 Hee feleet sikj opp däm Herr Gott, lot däm am nu aufleewre; lot däm am rade, sentamol hee en Jefaule haud enn am.
9 Dan du best dee, dee mie fonn daut Muttalief rut neemst, un leetst mie opp miene Mutta eare Brosste fetruehe.
10 Mie wort opp die jeschmäte fonn daut Muttalief; du best mien Gottt fonn miene Mutta äa Buk.
11 Sie nijch wiet auf fonn mie, dan Trubbel es dijcht bie wiels doa kjeene es tom habe.
12 Fäl Bolles ha mie ommrinjt, stoakje Bolles fonn Baschan sent runnt omm mie.
13 Dee muake äa Mul op jäajen mie soo aus en rietende un brelende Leiw.
14 Ekj sie utjegote soo aus Wota, un aul miene Knoakes sent utaneen jespreet, mien Hoat es soo aus Waus, daut es jeschmolte enne med fonn miene Dorm.
15 Miene Krauft es oppjedreajcht soo aus en Biet fonn en Leemtopp, un miene Tunj es faust aun mien Unjamul;
16 Dan du hast bestemmt to daut Stoff fonn dän Doot. Dan Hunj sent runnt omm mie, ne Baund fonn dee Beese ha mie ommrinjt, dee spekjte mie derjch miene Henj en Feet.
17 Ekj tal aul miene Knoakes; dee kjikje un glupte mie aun.
18 See fedeele miene Kjleeda mank an un doone fa mien Rok Leese.
19 Oba du, O Herr Gott, sie nijch wiet auf; O miene Krauft, spood die mie to halpe.
20 Rad miene Seel fonn daut Schweat; mien eensja fonn däm Hunt siene Poot.
21 Rad mie fonn däm Leiw sien Mul, un fonn däm willa Oss siene Heanna hast du mie jeauntwuat.
22 Ekj woa dien Nome aundiede to miene Breeda, ekj woa die med enn dee Fesaumlunk preise.
23 Jie, dee jie däm Herr Gott ferjchte, doot am preise; aule fonn Joakopp siene Nokome, doot an feharlijche, Un aul dee Some fonn Iesrael, doot am ferjchte.
24 Dan Hee haft nijch daut Älend fonn dee Älendje fe-acht oda jehaust; en hee haft sien Jesejcht nijch festoake fonn am, oba aus hee no am schreajch head hee.
25 Mien Preis saul fa die senne enn dee groote Fesaumlunj; ekj woa mien Fespraeakje betole fer daen dee am ferjchte.
26 Dee Bedrekjte sele äte un tofräd senne; dee däm Herr Gott seakje woare am preise, dien Hoat woat fa emma laewe.
27 Dee Enje fonne Ead sele behoole un sikj no däm Herr Gott nodre, un aul dee Natsjoone Famieljes sele fer die aunbäde.
28 Dan daut es däm Herr Gott sient, Hee es Harscha mank dee Natsjoone.
29 Aul dee Fatte oppe Ead ha jeäte, un ha aunjebät fer am; un aule woare dolbeaje dee rauf gone nom Stoff, un hee hilt siene eajne Seel aum laewe.
30 En Sot woat am deene, daut woat fonn däm Herr jerät woare to daut komendet Jeschlajcht.
31 Dee woare kome un siene Jerajchtijchkjeit erkjläare to en Folkj dee noch nijch jebuare es, daut Hee utjeoabit haft.
Dee 23 Psalm
En Psalm fonn Doft.
1 Dee Herr Gott es mien Hoad, mie fältet aun nuscht.
2 Hee moakt mie dol laje enn jreene Weid; Hee deit mie biesied stelle Wotasch leide.
3 Hee deit miene Seel oppfresche. Hee deit mie enn dän Jerajchtijchkjeit Stijch leide omm sien Nome haulwe.
4 Jo, un wan ekj uk derjch dän Doodes-schaute Tol wank, woa ekj kjeen Beeset ferjchte, dan du best bie mie, diene Stang un dien Gonstock doone mie treeste.
5 Du moakst en Desch reed fa mien enn miene Fiend äare Jaeajenwoat; du deist mien Kopp ennsaulwe met Eelj, mien Kuffel rant aul aewa.
6 Sejchalijch, Goots en Erboarme woare mie nofolje mien Läwelank; un ekj woa enn daem Herr Gott sien Hus wone soo lang aus ekj laew.
Dee 24 Psalm
En Psalm fonn Doft.
1 Dee Ead es daem Herr Gott sient, un daut Follet doafonn, un dee, dee doabenne wone.
2 Dan hee haft haut opp dee See jejrint, un daut bestädijcht opp dee Riefasch.
3 Wäa woat enopp gone no däm Herr Gott sien Boajch? Oda wäa woat enn siene heilje Städ stone?
4 Dee, dee reine Henj haft, un en ajchtet Hoat; dee siene Seel nijch nehejcht jehäft haft to Faulscheit, un haft nijch hinjem Lijcht jefeat met Schweare.
5 Dee woat däm Herr Gott sien Säajen kjriehe, un Jerjachtijchkjeit fonn däm Gott fonn siene Radunk.
6 Dit es daut Jeschlajcht fonn dän dee am utseakje, dee dien Jesejcht seakje, O du Joakopp sien Gott. Selah.
7 Häft june Kjapp opp, jie Puate; un siet oppjehaeft, jie eewje Däare; un dee Harlijchkjeits Kjeenijch woat enenn kome.
8 Waea es dis Harlijchkjeits Kjeenijch? Dee Herr Gott, majchtijch emm Kjrijch!
9 Häft june Kjapp opp, jie Puate; un siet oppjehaeft, O eewje Däare; un dee Harlijchkjeits Kjeenijch woat enenn kome.
10 Waea es dis Harlijchkjeits Kjeenijch? Dee Aulmajchtja Herr Gott, Hee es dee Harlijchkjeits Kjeenijch. Selah.
Dee 47 Psalm
To dän Haupt Musikaunt, en Pslam fa dee Korah Säns.
1 Klautscht june Henj, aul jie Felkja; shriet lud to Gott met ne siejchreijche Stem.
2 Dan dee aulahejchsta Herr Gott es Wunndaboa, en groota Kjeenijch aewa dee gaunse Ead.
3 Hee woat dee Felkja unja onns deemietje, un Natsjoone unja onns Feet.
4 Hee waelt onns Oawgoot fa onns, dee Madastijchkjeit fonn Joakopp daem Hee Leef haud. Selah.
5 Gott es met en Jeschrejcht nehejcht jegone, dee Herr Gott met daut Jelud fonn ne Trompeet.
6 Sinjt Preis to Gott, sinjt Preis; sinjt Preis to onns Kjeenijch, sinjt Preis.
7 Dan Gott es dee Kjeenijch aewa dee gaunse Ead; sinjt en Psalm tom berieme.
8 Gott deit rejeare aewa dee Natsjoone; Gott set opp daen Troon fonn siene Heilijchkjeit.
9 Dee Ferschte fonn dee Felkje ha sikj fesaumelt, Obrahaum sien Gott siene Felkje.
10 Dee Ead aeare Schilte jeheare Gott; Hee es huach oppjehowe.
Dee 68 Psalm
To dän Haupt Musikaunt. En Psalm fonn Dift. En Leet.
1 Gott deit sikj opprejchte, un siene Fiend sent festreit, en dee, dee am hausse, rane fonn am wajch.
2 Doo an wajch driewe soo aus Ruak wajch jedräwe woat; soo aus Wauss schmelte deit ferem Fia, soo woare dee Beese ommkome fer Gott sien Doasenne.
3 Oba dee Jerjachte freihe sikj, dee schriehe fa Freid fer Gott; jo, dee juble met Freid.
4 Sinjt to Gott, sinjt Preis to sien Nome; häft däm huach dee enne Wiltnes riede deit, derjch Ja, sien Nome; jo, jubelt enn sien Doasenne.
5 Gott enn siene heilje Woninj es en Foda to dän dee kjeen Foda ha, un en Rejchte fa dee Wätfruehes.
6 Gott moakt daut soo daut dee Eensaume Tus wone kjenne; Hee brinjt dän rut dee met Kjäde jebunje sent, wäarent dee Oppsternootsche enn en dreajet Launt wone,
7 O Gott, aus du fer dien Folkj mascheare deetst, aus du derjch dee Wiltnes jinjst. Selah.
8 Dee Ead scheddad, un dee Himels folle rauf fer Gott, dis Sienaie fer Gott, Iesrael äa Gott.
9 O Gott, du schekjst en groota Räajen, derjch woont du dien Oawgoot bestädje deetst aus dee Meed wea, du deetst dee bestädje.
10 Diene Fesaumlunj wond doabenne; Du, O Gott hast dien Goodet reed jemoakt fa dee Oame.
11 Dee Herr Gott jeef daut Wuat, un doa wea ne groote Menj Mensche dee daut utjeewe.
12 Armeehe äare Kjeenijchs rande wajch, dee spoode sikj; jo, see dee Tus jebläwe wea haft daut Raup ennjedeelt.
13 Wan du die dol laje deist em Schophock, dan woare diene Flijchte soo senne aus met Selwa bedakjt, un dee Faddre met hallet Golt.
14 Wan dee Aulmajchtja Kjeenijchs doarenn festreihe deit, dan schniet daut opp Salmon.
15 Dee Baschan Boajch es Gott sien Boajch; dee Baschan Reaj es en Boajch fonn Spetse.
16 Wuaromm glup jie soo enn Neit, O Reaj fonn Boaj, no daen Boajch dän Gott jewält haft fa siene Woninj? Jo, dee Herr Gott woat doa fa emma benne wone.
17 Gott haft fäl Kjrijchswoagees, seeha, seeha fäl, dee Herr es mank dän; enn Sienaie dee heilje Staed.
18 Du best nehejchte jefoare; du hast dee Jefangne jefange jenome, du hast Gow jekjraeaje mank Mensche, soogoa mank dee Oppsternootsche, O Gott Herr Gott.
19 Jesäajent es dee Herr; dach fa dach deit hee Lauste droage fa onns, dee Gott fonn onnse Radunk. Selah.
20 Onns Gott es dee Gott fonn Radunk; un daut Looskome fomm Doot jeheat to däm Herr Gott.
21 Jo, Gott woat dee Fiend äa Kopp fewunnde; dee hoarija Kopp fonn dän dee enn siene Gottloosijchkjiet wieda jeit.
22 Dee Herr saed: "Ekj woa fonn Baschan trigj brinje; ekj woa mien Folkj trigj brinje fonn daut deepstet emm See;
23 Soo daut dien Foot kaun enducke enn daut Bloot fonn diene Fiend, dee Hunj äare Tunj doabenne.
24 Dee ha dien Mascheare jeseene O Gott; wua mien Kjeenijch, mien Gott gone deit enn dee heilje Städ.
25 Dee Senja jinje feropp, dan soone dee opp Späldinje spälde; un mank dän weare dee eentletsje Mäakjes dee opp kjleene Hoape spälde.
26 O säajent Gott enn dee Fesaumlunje, dee Herr, fonn daen Wotakjwal Iesrael.
27 So es Benjamin äa Harscha; dee Leida enn Judah enn dee Menj, un dee Lieida fonn Zebulon, dee Leida fon Naftalie.
28 Dien Gott haft diene Macht enjeordent; O Gott, doo stoakje enn daut waut du fa onns utjeoabeit hast.
29 Wäajen dien Tempel äwa Jerusalem, woare Kjeenije Gow brinje no die.
30 Doo dee wile Beeste fonn mank dee Schelprua dodle, dee Menj fonn dee Bolles met dee Kjalwe fonn daut Folkj, jieda eena deit dol traumple met bieta Selwa; Hee festreit dee Mensche dee sikj fejneaje enn Kjrijch.
31 Lot Bronz jebrocht woare fonn Iejipte; Itieopia saul äare Henj utstrakje no Gott.
32 Sinjt to Gott, jie Kjeeneijchrikje oppe Ead; Preist to däm Herr. Selah.
33 To däm dee opp dee Himels Himle riede deit fonn jee häa; see, Hee schekjt siene Stem rut, ne majchtje Stem.
34 Doo Gott Macht auneajne äwa Iesrael, siene Madastijchkjeit un siene Krauft enn dee Wolkje.
35 O Gott du best hejcha enn Ea ut diene heilje Städe; Iesrael äa Gott es dee, dee Krauft un Macht jeft to daut Folkj. Jesäajent es Gott!
Copyright © 2001 by Elmer Reimer