Chronological

¹¹ सोर क राजा हीराम दाऊद क लगे दूतन क पठएस। हीराम देवदारू क बृच्छ, बढ़ई अउ राजमिस्त्री लोगन क भी पठएस। उ पचे दाऊद बरे एक ठु महल बनाएस। ¹² उ समइ दाऊद जान गएन कि यहोवा ओका फुरइ इस्राएल क राजा बनाएस ह। दाऊद इ भी जान गएन कि यहोवा ओकरे राज्ज क परमेस्सर क लोगन, अर्थात इस्राएलियन बरे बहोत महान बनाएस ह।

¹³ दाऊद हेब्रोन स यरूसलेम चला गवा। यरूसलेम मँ दाऊद अउर जियादा अउ पत्नियन अउ उप-पत्नियन क पाएस। ओका हुवाँ बहोत अधिक बेटवन अउर बिटियन भएन। ¹⁴ यरूसलेम मँ पइदा भए दाऊद क पूतन क नाउँ इ सबइ अहइँ: सम्मू, सोबाब, नातान, सुलैमान, ¹⁵ दिभार, एलोस नेपेग, यापी ¹⁶ एलीसामा, एल्यादा अउ एलीपेलेत।

दाऊद पलिस्तियन क खिलाफ जुद्ध मँ जात ह

¹⁷ पलिस्तियन इ सुनेन कि इस्राएलियन दाऊद क अभिसेक इस्राएल क राजा क रूप मँ किहेस ह तब सबहिं पलिस्ती दाऊद क मार डावइ बरे ओकर खोज करइ बाहेर निकरेन। किन्तु दाऊद क इ खबर मिल गइ। उ एक किला मँ चल गवा। ¹⁸ पलिस्ती आएन अउर रपाईस क घाटी मँ उ पचे आपन डेरा डाएन।

¹⁹ दाऊद बात कइके यहोवा स पूछेस, “का मोका पलिस्तियन क खिलाफ जुद्ध मँ जाइ चाही? का तू मोका पलिस्तियन क हरावइ देब्या?”

यहोवा दाऊद स कहेस, “जा, काहेकि मइँ निहचइ ही, पलिस्तियन क हरावइ मँ तोहार मदद करब।”

²⁰ तब दाऊद बालपरासीम आवा। हुवाँ उ पलिस्तियन क हराएस। दाऊद कहेस, “यहोवा मोरे समन्वा मोरे दुस्मनन क फउज क इ तरह दउड़ भगाएस जइसे जल बाँथ क तोरिके बहत ह।” इहइ कारण अहइ कि दाऊद उ ठउरे क नाउँ “बालपरासीम” रखेस। ²¹ पलिस्तियन बालपरासीम मँ अपनी देवमूरतियन क पाछे तजि दिहन। दाऊद अउ ओकर लोग ओन देवमूरतियन क हुवाँ स हटाइ दिहन।

²² पलिस्ती फुन आएन अउर रपाईम क घाटी मँ उ पचे डेरा डाएन।

²³ दाऊद यहोवा स पराथना किहस। इ समइ यहोवा कहेस, “ओन लोगन पई सामन्वा स हमला जिन करा। ओनके चारिहुँ कइँती ओनकर फउज क पाछे स जा। तूत बृच्छन क लगे ओन पर हमला करा। ²⁴ तूत बृच्छन क चोटी स तू पलिस्तियन क सामरिक प्रमाण क अवाज सुनब्या। तब तू पचन्क हाली स करइ चाही, काहेकि उ समइ यहोवा जाइ अउर तोहरे बरे पलिस्तियन क हराइ देइ।”

²⁵ दाऊद उहइ किहस जउन करइ क बरे यहोवा आदेस दिहे रहा। उ पलिस्तियन क हराएस। उ ओनकर पाछा सबइ रास्ते स गेबा स गेजेर तलक किहस।

परमेस्सर क पवित्तर सन्दूख यरूसलेम लिआवा गवा

6 दाऊद फुन इस्राएल क सबहिं चुने गए तीस हजार लोगन क बटोरेस। ² तब दाऊद अउ ओकर सबहिं लोग यहूदा क बाले^[a] मँ स परमेस्सर क पवित्तर सन्दूख क यरूसलेम मँ लइ बरे गएन। पवित्तर सन्दूक सर्वसक्तीमान यहोवा क नाउँ स जाना जात हीं। पवित्तर सन्दूख यहोवा क सिंहासन क तरह अहइ। पवित्तर सन्दूख क ऊपर करूब क मूरतियन अहइँ, अउर यहोवा एन सरगदूतन पइ राजा क तरह बइठत ह। ³ उ पचे परमेस्सर क सन्दूख क एक ठु नवी गाड़ी मँ रखेन। उ पचे गिबियाह मँ एक पहाड़ी पइ स्थित अबीनादाब क घरे स पवित्तर सन्दूख क लइ जात रहेन, उज्जा अउ अहह्यो अबीनादाब क पूतन नवी गाड़ी चलावत रहेन।

⁴ जब उ पचे गिबियाह मँ अबीनादाब क घर जउन पहाड़ी प रहा स पवित्तर सन्दूख क लइ जात रहेन। अहह्यो सन्दूखवाली गाड़ी क आगे-आगे चलत रहेन। ⁵ दाऊद अउ सबहिं इस्राएली यहोवा क समन्वा पूरे उत्साह क संग नाचत अउ गावत रहेन अउर सबइ प्रकार क संगीत यंत्र जइसे: वीणा, सितार, ढोल, झाँझ अउ मँजीरा बजावत रहेन। इ सबइ सनौवर क लकड़ी क बना रहेन। ⁶ जब दाऊद क लोग नकोन खरिहाने मँ आएन तउ बर्धा लड़खड़ाइ पड़ेन। परमेस्सर क पवित्तर सन्दूख बन्द गाड़ी स गिरइ लाग। उज्जा पवित्तर सन्दूखे क धइ लिहस। ⁷ यहोवा उज्जा पइ कोहाइ गवा अउर ओका मार डाएस। उज्जा पवित्तर सन्दूख छुइके परमेस्सर बरे अस्रद्धा देखाँएस। उज्जा हुवाँ परमेस्सर क पवित्तर सन्दूख क बगल मँ मरा। ⁸ दाऊद बहोत कोहाइ गवा काहेकि यहोवा उज्जा क आपन क्रोध मँ मार डाए रहा। दाऊद उ जगह क “पेरेसुज्जा” कहेस। उ जगह आजु तलक पेरेसुज्जा कहा जात ह।

⁹ दाऊद उ दिन यहोवा स डर गवा। दाऊद कहेस, “अब मइँ यहोवा क पवित्तर सन्दूख हिआँ कइसे लाइ सकत हउँ?” ¹⁰ एह बरे दाऊद यहोवा क पवित्तर सन्दूख क दाऊद नगर मँ नाहीं लेइ चाहत रहा। उ पवित्तर सन्दूख क गत स आए भए एक मनई ओबेदोदोम क घरे मँ रखेस। दाऊद एका सड़क स गत क ओबेदोदोम क घर लइ गवा। ¹¹ यहोवा क सन्दूख ओबेदोदोम क घरे मँ तीन महीने तलक रहा। यहोवा ओबेदोदोम अउ ओकरे सारे परिवार क आसीर्वाद दिहस।

¹² लोग दाऊद स कहेन, “यहोवा ओबेदोदोम क परिवार अउर ओकर सारी चिजियन क आसीर्वाद दिहस काहेकि परमेस्सर क पवित्तर सन्दूख हुवाँ अहइ।” एह बरे दाऊद गवा अउ ओबेदोदोम क घरे स परमेस्सर क पवित्तर सन्दूख क दाऊद नगर स लइ आवा। दाऊद एका खुसी स किहस। ¹³ जब यहोवा क पवित्तर सन्दूखे क लइ चलइवाले छ कदम चलेन तउ उ पचे रूक गएन अउर दाऊद एक ठु बर्धा अउ एक ठु मोटवार बछवा क बलि भेंट किहेस। ¹⁴ तब दाऊद यहोवा क समन्वा पूरे उत्साह क संग नाच किहेस। दाऊद सूती कपड़ा क एपोद पहिर रखे रहा।

¹⁵ दाऊद अउर सबहिं इस्राएली यहोवा क पवित्तर सन्दूख क नगर लिआवत समइ उल्लास स उद्घोस करइ अउर तुरूही बजावइ लागेन। ¹⁶ साऊल क बिटिया मीकल खिड़की स लखत रही जब यहोवा क पवित्तर सन्दूख नगर मँ आवा। दाऊद यहोवा क समन्वा नाचत अउ कूदत रहा। मीकल इ लखेस अउर उ आपन हिरदय मँ तुच्छ समझेस।

¹⁷ दाऊद पवित्तर सन्दूखे बरे एक ठु तम्बू लगाएस। इस्राएलियन यहोवा क सन्दूख क तम्बू मँ ओकरी जगह पइ रखेस। तब दाऊद होमबलि अउ मेलबलि यहोवा क चढ़ाएस।

¹⁸ जब दाऊद होमबलि अउ मेलबलि चढ़ाउब पूरा किहस तब उ सर्वसक्तीमान यहोवा क नाउँ पइ लोगन क आसीर्बाद दिहस। ¹⁹ दाऊद रोटी, किसमिस क टुकड़ा, अउर खजूर क रोटी क हींसा इस्राएल क हर एक मेहरारू मनसेधू क दिहस। तब सबहिं लोग अपने घर चले गएन।

मीकल दाऊद क डाटत ह

²⁰ दाऊद अपने घरे मँ आसीर्बाद देइ गवा। किन्तु साऊल क बिटिया मीकल ओहसे भेटंइ निकरि आइ। मीकल कहेस, “आज इस्राएल क राजा अपना ही सम्मान नाहीं किहस। तू अपनी प्रजा क दासियन क समन्वा आपन ओढ़ना उतार दिहा। तू उ मूरख क तरह रह्या जउन बगैर लज्जा क आपन ओढ़ना उतारत ह।”

²¹ तब दाऊद मीकल स कहेस, “यहोवा मोका चुनेस ह, न कि तोहार बाप अउ ओकरे परिवार क कउनो मनई क। यहोवा मोका इस्राएल, अपने लोगन क मार्ग दर्सक बनवई बरे नियुक्त किहेस ह। इहइ कारण अहइ कि मइँ यहोवा क समन्वा उत्सव मनाउब अउर नाचब। ²² मइँ अउर भी जिआदा सरमनाक हरकत कइ सकत हउँ! अउर आपन नज़र मँ अपमानित होइ जाउँ। होइ सकत ह तू मोका सम्मान न देइ। किन्तु जउन लड़कियन क बारे मँ तू बात करति अहा उ पचे मोर सम्मान करति हीं।”

²³ साऊल क बिटिया क कबहुँ सन्तान न भइ। उ बिना सन्तान क मरी।

करार क सन्दूख क वापस लिआउब

13 दाऊद अपनी फउज क सबहिं अधिकारियन स बात किहस। ² तब दाऊद इस्राएल क सबहिं लोगन क एक संग बोलाएस। उ ओनसे कहेस: “जदि तू लोग एक नीक बिचार सुमझत अहा। अउर जदि इ उहइ अहइ जेका यहोवा चाहत ह, तउ हम लोग अपने भाइयन क इस्राएल क सबहिं छेत्रन मँ सँदेस पठइ। हम लोग ओन जादकन अउ लेवीबंसियन क भी सँदेस पठइ जउन हम लोगन क भाइयन क संग नगरन अउ ओनके निअरे क खेतन मँ रहत हीं। सँदेसा मँ ओनसे आवइ अउर हमार साथ देइ क कहा जाइ। ³ हम लोग करार क सन्दूख क यरूसलेम मँ अपने मँ अपने लगे वापस लिआइ। हम लोग करार क सन्दूख क देखभाल साऊल क सासन काल मँ नाहीं कीन्ह।” ⁴ एह बरे इस्राएल क सबहिं लोग दाऊद क सलाह स्वीकार किहन। ओन सबहिं इ विचार किहेन कि इहइ करब ठीक अहइ।

⁵ एह बरे दाऊद मिस्र क सीहोर नदी स हमात क प्रवेस दुआर तलक क सबहिं इस्राएल क लोगन क बटोरेस। उ पचे किर्यत्यारीम नगर स करार क सन्दूख क वापस लइ जाइ क बरे एक संग आएन। ⁶ दाऊद अउ इस्राएल क सबहिं लोग ओकरे संग यहूदा क बाला क गएन। (बाला किर्यत्यारीम क दूसर नाउँ अहइ।) उ पचे हुवाँ करार क सन्दूख क लिआवत बरे गएन। उ करार क सन्दूख यहोवा परमेस्सर क सन्दूख अहइ। उ करूब सरगदूत क ऊपर बइठत ह। इहइ सन्दूख अहइ जउन यहोवा क नाउँ स गोहराइ जात ह।

⁷ लोग करार क सन्दूख अबीनादाब क घरे स हटाएन। उ पचे ओका एक नई गाड़ी मँ रखेन। उज्जा अउ अह्यो गाड़ी क चलावत रहेन।

⁸ दाऊद अउ इस्राएल क सबहिं लोग परमेस्सर क सम्मुख उत्सव मनावत रहेन। उ पचे परमेस्सर क स्तुति करत रहेन अउ गीत गावत रहेन। वे पचे वीणा तम्बूरा, दोत, मंजीरा अउ तुरही बजावत रहेन।

⁹ उ पचे कीदोन क खरिहाने मँ आएन। गाड़ी हींचइवाले बर्धन क ठोकर लाग अउ करार क सन्दूख लगभग भहराइ गवा। उज्जा सन्दूख क धरइ बरे आपन हाथ आगे बढ़ाएस। ¹⁰ यहोवा उज्जा पइ बहोत जियादा कोहाइ गवा। यहोवा उज्जा क मार डाएस काहेकि उ सन्दूख क छुइ लिहस। इ तरह उज्जा परमेस्सर क समन्वा हुवाँ मरा। ¹¹ परमेस्सर आपन किरोध उज्जा पइ देखाएल अउर एहसे दाऊद कोहाइ गवा। उ समइ स अब तलक उ जगह “पेरेसउज्जा” कही जात ह।

¹² उ दिन दाऊद परमेस्सर स डेराइ गवा। दाऊद कहेस, “मइँ करार क सन्दूख क हिआँ अपने लगे नाहीं लिआइ सकत।” ¹³ उ एह बरे दाऊद करार क सन्दूख क अपने संग दाऊद नगर मँ नाहीं लइ गवा। उ करार क सन्दूख क ओबेद-एदोम क घर पइ तजेस। ओबेद-एदोम गत नगर स रहा। ¹⁴ करार क सन्दूख ओबेद-एदोम क परिवार मँ ओकरे घरे मँ तीन महीने रहा। यहोवा ओबेद-एदोम क परिवार अउर ओकरे हिआँ जउन कछू रहा, क आसीर्बाद दिहस।

दाऊद क राज्ज बिस्तार

14 हीराम सूर नगर क राजा रहा। हीराम दाऊद क लगे सँदेस वाहक पठएस। हीराम देवदारु क लट्ठन, संगतरास अउ बढ़ई भी दाऊद क लगे पठएस। हीराम ओनका दाऊद बरे एक ठु महल बनावइ बरे पठएस। ² तब दाऊद समुझ सका कि यहोवा ओका फुरइ ही इस्राएल क राजा बनाएस ह। यहोवा दाऊद क राज्ज क बहोत विस्तृत अउ सक्तीसाली बनाएस। परमेस्सर इ एह बरे किहस कि उ दाऊद अउर इस्राएल क लोगन स पिरेम करत रहा।

³ दाऊद यरूसलेम मँ बहोत सी मेहरारुअन क संग बियाह किहेस अउर ओकरे बहोत स बिटवा अउ बिटिया भइन। ⁴ यरूसलेम मँ पइदा भइ दाऊद क सन्तानन क नाउँ इ सबइ अहइँ: सम्मू, सोबाब, नातान, सुलैमान, ⁵ यिभार, एलीसू, एलपेलेत, ⁶ नोगह, नेपेग, यापी, ⁷ एलीसामा, बेल्यादा, अउर एलीपेलेद।

दाऊद पलिस्तियन क पराजित करत ह

⁸ पलिस्ती लोग सुनेन कि दाऊद क अभिसेक इस्राएल क राजा क रूप मँ भवा ह। एह बरे, सबहिं पलिस्ती लोग दाऊद क खोज मँ गएन। दाऊद एकरे बारे मँ सुनेस। एह बरे उ पलिस्ती लोगन स लड़इ गवा। ⁹ पलिस्तियन रपाईम क घाटी मँ रहइवले लोगन पइ हमला किहेन अउर ओनकी चिजियन चुराएन। ¹⁰ दाऊद परमेस्सर स पूछेस, “का ओका जानइ चाही अउर पलिस्ती लोगन स जुद्छ करइ चाही? क तू मोका ओनका हरावइ देब्या?”

यहोवा दाऊद क जवाब दिहस, “जा! मइँ तोहका पलिस्ती लोगन क हरावइ देब।”

¹¹ तब दाऊद अउर ओकर लोग बालपरासीम नगर तलक गएन। हुवाँ दाऊद अउ ओकर लोग पलिस्ती लोगन क हराएन। दाऊद कहेस, “जिस तरह टूटहे बाँधे स पानी फूट पड़त ह उहइ तरह, परमेस्सर मोरे दुस्मनन पइ पूट पड़ा ह। परमेस्सर इ मोरे माध्यम स किहस ह।” इहइ कारण अहइ कि इ जगह बालपरासीम क नाउँ स जाना जात ह। ¹² पलिस्ती लोग अपनी मूरतियन क बालपरासीम मँ तजि दिहन। दाऊद ओन मूरतियन क बार देइ क आदेस दिहस।

पलिस्ती लोगन पइ दूसर बिजइ

¹³ पलिस्तियन रपाईम घाटी मँ रहइवाले लोगन पइ फुन हमला किहन। ¹⁴ दाऊद फुन परमेस्सर स पराथना किहस। परमेस्सर दाऊद क पराथना क जवाब दिहस। परमेस्सर कहेस, “दाऊद, जब तू हमला करा तउ पलिस्ती लोगन क पाछे पहाड़ी पइ जिन जा। एकरे बदले, ओनके चारिहुँ कइँती जा। हुवाँ छुपा, जहाँ मोखा क बृच्छ अहइ। ¹⁵ एक ठू पहरेदार क बृच्छ क चोटी पइ चढ़इ क कहा। जइसे ही उ बृच्छन क चोटी स फउज क चलइ क आवाज क सुनी, उहइ समइ तू पलिस्तियन पइ हमला करा। परमेस्सर तोहरे समन्वा आइहीं अउ पलिस्ती फउज क हराइहीं।” ¹⁶ दाऊद उहइ किहस जउन परमेस्सर करइ क कहेस एह बरे दाऊद अउ ओकर फउज पलिस्ती फउज क हराएस। उ पचे पलिस्ती फउजियन क लगातार गिबोन नगर स गेजेर नगर तलक मारेन। ¹⁷ इ तरह दाऊद सबहिं देसन मँ मसहूर होइ गवा। यहोवा सबहिं रास्ट्रन क हिरदइ मँ ओकर डर बइठाइ दिहस।

करार क सन्दूख यरूसलेम मँ

15 दाऊद, अपने बरे दाऊद नगर मँ महल बनवाएस। तब उ करार क सन्दूख क बरे एक ठु जगहिया बनाएस। उ एकरे बरे एक तम्बू डाएस। ² तब दाऊद कहेस, “सिरफ लेवीबंसियन क करार क सन्दूख लइ चलइ क मंजूरी अहा। यहोवा ओनका करार क सन्दूख चलइ अउर ओकर सदा ही सेवा बरे चुनेस ह।”

³ दाऊद इस्राएल क सबहिं लोगन क यरूसलेम मँ एक संग मिलइ बरे बोलाएस जब तलक लेवीबंसियन करार क सन्दूख क उ जगहिया पइ लइके आएन जउन उ ओकरे बरे बनाए रहा। ⁴ दाऊद हारून क सन्तानन अउ लेवीबंसियन क एक संग बोलाएस।

याजक अउ लेवीबंसियन स दाऊद बातन करत ह

¹¹ तब दाऊद सादोक अउ एब्यातार याजकन स कहेस कि उ पचे ओकेरे लगे आवइँ। दाऊद ऊरीएल, असायाह, योएल, समायाह, एलीएल अउर अम्मीनादाब लेवीबंसियन क भी अपने लगे बोलाएस। ¹² दाऊद ओनसे कहेस, “तू लोग लेवी परिवार समूह क प्रमुख अहा। तू पचन्क अपने अउर दूसर लेवीबंसियन क पवित्तर बनावइ चाही। तब करार क सन्दूख क उ जगह पइ लिआवा, जेका मइँ ओकरे बरे बनाएउँ ह। ¹³ पिछली दाईं हम लोग यहोवा परमेस्सर स नाहीं पूछा कि करार क सन्दूख क हम कइसे लइ चली। लेवीबंसियन, तू पचे एका नाहीं लइ चल्या, इहइ कारण अहइ कि यहोवा हम क सजा दिहस।”

¹⁴ तब याजक अउ लेवीबंसियन अपने क पवित्तर किहन जेहसे उ पचे इस्राएल क यहोवा परमेस्सर क सन्दूख क लइके चल सकइँ। ¹⁵ लेवीबंसियन बिसेस डंडन क उपयोग, अपने काँधन पइ करार क सन्दूख क लइ चलइ बरे किहन जइसा मूसा क आदेस रहा। उ पचे सन्दूख क उ तरह स लइ चलेन जइसा यहोवा कहे रहा।

गायक

¹⁶ दाऊद लेवीबंसियन क ओनके गायक भाइयन क लिआवइ बरे कहेस। गायकन क अपनी वीणा, तम्बूरा अउर मंजीरा लिआउब रहा अउर खुसी क गीत गाउब रहा।

¹⁷ तब लेवीबंसियन हेमान अउर भाइयन आसाप अउ एतान क बोलाएन। हेमान योएल क पूत रहा। आसाप बेरेक्याह क पूत रहा। एतान कूसायाह क पूत रहा। इ सबइ मनई मरारी परिवार समूह क रहेन। ¹⁸ हुवाँ लेवीबंसियन क दूसर समूह भी रहा। उ पचे जकर्याह, बेन याजीएल, समीरामोत, यहीएल, उन्नी, एलीआब, बनायाह, मासेयाह, मत्तित्याह, एलीपलेह, मिकनेयाह, ओबेदेदोम अउ यीएल रहेन। इ सबइ लोग लेवीबंस क रच्छक रहेन।

¹⁹ गायक हेमान, आसाप अउ एतान काँसे क मँजीरा बजावत रहेन। ²⁰ जकर्याह, अजीएल, समीरामोत, यहीएल, उन्नी, एलीआब, मासेयाह अउ बनायाह, अलामोत वीणा बजावत रहेन। ²¹ मत्तित्याह, एलीपलेह, मिकनेयाह, ओबेदेदोम, यीएल अउर अजज्याह सेमिनिथ तम्बूरा बजावत रहेन। इ ओनकर सदा ही क काम रहा। ²² लेवीबंसी प्रमुख कनन्याह गायन क प्रबन्धक रहा। कनन्याह क इ काम मिला रहा काहेकि उ गावइ मँ बहोत जियादा कुसल रहा।

²³ बेरेक्याह अउ एलकाना, करार क सन्दूख क रच्छकन मँ स दुइ रहेन। ²⁴ याजक सबन्याह, योसापात, नतनेल, अमासै, जकर्याह, बनायाह अउर एलीएजेर क काम करार क सन्दूख क समन्वा चलत समइ तुरही बजाउब रहा। ओबेदेदोम अउर यहिय्याह करार क सन्दूख बरे दूसर रच्छक रहेन।

²⁵ दाऊद इस्राएल क अग्रज अउ सेनापति करार क सन्दूख क लेइ गएन। उ पचे ओका ओबेदेदोम क घरे स बाहेर लिआएन। हर एक बहोत खुस रहा। ²⁶ परमेस्सर ओन लेवीबंसियन क मदद किहस जउन यहोवा क करार क सन्दूखे क लइके चलत रहेन। उ पचे सात बर्धन अउर सात भेड़न क बलि दिहन। ²⁷ सबहिं लेवीबंसी जउन करार क सन्दूख लइके चलत रहेन, उत्तिम सन क चोगे पहिरे रहेन। गायन क प्रबन्धक कनन्याह अउर सबहिं गायक उत्तिम सन चोगान पहिरे रहेन अउ दाऊद भी उत्तिम सन क बना एपोद पहिरे रहा।

²⁸ इ तरह इस्राएल क सारे लोग यहोवा क करार क सन्दूख क लइ आएन। उ पचे उद्घोष किहन, उ पचे भेड़न क सींग अउ तुरही बजाएन अउर उ पचे मँजीरन, वीणा अउर तम्बूरन बजाएन।

²⁹ जब करार क सन्दूख दाऊद नगर मँ पहोंचा, मीकल खिड़की स लखेस। मीकल साऊल क बिटिया रही। उ राजा दाऊद क चारिहुँ कइँती नाचत अउर बजावत लखेस। उ अपने हिरदइ मँ दाऊद क बरे सम्मान क खोइ दिहस उ सोचेस कि उ मूरख बनत बाटइ।

16 लेवीबंसी करार क सन्दूख लइ आएन। अउर ओका उ तम्बू मँ धरेन जेका दाऊद एकरे बरे खड़ी कइ रखे रहा। तब उ पचे परमेस्सर क होमबलि अउ मेलबलि चढ़ाएन। ² जब दाऊद होमबलि अउ मेलबलि देब पूरा कइ चुका तउ उ लोगन क आसीर्बाद देइ क बरे यहोवा क नाउँ लिहस। ³ तब उ हर एक इस्राएली मेहरारु-मनई क एक-एक रोटी, खजूर अउ किसमिस दिहस।

⁴ तब दाऊद करार क सन्दूख क समन्वा सेवा बरे कछू लेवीबंसियन क चुनेस। ओन लेवीबंसियन क इस्राएलियन क यहोवा परमेस्सर बरे उत्सव क मनावइ, आभार परगट करइ अउ स्तुति करइ क जिम्मेदारी सौंपा गवा। ⁵ आसाप, पहिले समूह क प्रमुख रहा। आसाप क समूह सारंगी बजावत रहा। जकर्याह दूसरे समूह क प्रमुख रहा। इ सबइ दूसर लेवीबंसियन रहेन: यीएल, समीरामोत, यहीएल, मत्तित्याह, एलीआब, बनायाह, ओबेद-एदोम अउ यीएल। इ सबइ मनई वीणा अउ तम्बूरा बजावत रहेन ⁶ बनायाह अउर यहजीएल अइसे याजक रहेन जउन करार क सन्दूख क समन्वा सदा ही तुरही बजावत रहेन। ⁷ इ उहइ समइ रहा जब दाऊद पहिली बार आसाप अउर ओकरे भाइयन क यहोवा क स्तुति करइ क काम किहस।

दाऊद क आभार गीत

सबहिं लोगन कहेन, “आमीन!” उ पचे यहोवा क स्तुति कहेन।

³⁷ तब दाऊद आसाप अउ ओकरे भाइयन क हुवाँ यहोवा क करार क सन्दूख क समन्वा छोड़ेस। दाऊद ओनका ओकरे समन्वा हर रोज सेवा करइ बरे छोड़ेस। ³⁸ दाऊद आसाप अउर ओकरे भाइयन क संग सेवा करइ बरे ओबेद-एदोम अउर दूसर अड़सठ लेबीबंसियन क छोड़ेस। ओबेद-एदोम अउर होसा रच्छक रहेन। ओबेद-एदोम यदूतून क पूत रहा।

³⁹ दाऊद याजक सादोक अउ दूसर याजकन क जउन गिबोन मँ ऊँची जगह पइ यहोवा क तम्बू क समन्वा ओकरे संग सेवा करत रहेन ओकर संग छड़ेस। ⁴⁰ हर भिंसारे अउ साँझ सादोद अउ दूसर याजक होमबलि क वेदी पइ होमबलि चढ़ावत रहेन। उ पचे इ यहोवा व्यवस्था मँ लिखे गए ओन नेमन क पालन करइ बरे करत रहेन जेनका यहोवा इस्राएल क दिहे रहा। ⁴¹ हेमान अउ यदूतून अउ सबहिं दूसर लेवीबंसियन यहोवा क स्तुतिगान करइ बरे नाउँ लइके चुने गए रहेन, काहेकि “ओकर पिरेम सदा ही बना रहत ह।” ⁴² हेमान अउ यदूतून ओनके संग रहेन। ओनकर काम तुरही अउ मँजीरा बजाउब रहा। उ पचे दूसर संगीत बाजा बजावइ क काम भी करत रहेन, जब परमेस्सर क स्तुति क गीत गाए जात रहेन। यदूतून क पूतन दुआरन क रच्छा करत रहा।

⁴³ उत्सव मनावइ क पाछे, सबहिं लोग चले गएन। हर एक मनई अपने-अपने घर चला गवा अउर दाऊद भी अपने परिवार क आसीर्बाद देइ बरे घर गवा।