Chronological

¹ हे परमेस्सर, एक मनई अहइ जउन तोहार अनुसरण नाहीं करत।
    उ मनई दुट्ठ अहइ अउ झूठ बोलत ह।
    हे परमेस्सर, मोर मोकदमा लड़ा अउर इ निर्णय करा कि कउन सत्य बाटइ।
    मोका उ मनई स बचाइ ल्या।
² हे परमेस्सर, तू ही मोर सरणस्थल अहा!
    मोका तू काहे बिसराइ दिहा?
तू मोका इ काहे नाहीं देखाँया
    कि मइँ आपन दुस्मनन स कइसे बचिके निकरउँ?
³ हे परमेस्सर, तोहार जोति अउ सच्चाई क मोह पइ चमकइ द्या।
    उ मोका तोहार पवित्तर पर्वत पइ तोहार आपन वास-स्थान जाइ मँ अगुवाइ करइ।
⁴ मइँ तउ परमेस्सर क वेदी क लगे जाब।
    परमेस्सर मइँ तोहरे पास आउब।
उ मोका आनन्दित करत ह।
    हे परमेस्सर, हे मेरे परमेस्सर, मइँ वीणा पइ तोहार स्तुति करब।

⁵ मइँ ऍतना दुःखी काहे हउँ?
    मइँ काहे ऍतना बियाकुल हउँ?
“मोका परमेस्सर क सहारे क बाट जोहइ चाही।
    मोका अब भी ओकर स्तुति क अवसर मिली।
    उ मोका बचाई।”

⁹ मुला अब, हे यहोवा, तू हम लोगन स पीछे मुड़ि गवा ह अउ हमका नीचा कइ दिहा ह!
    तू हमरे फउज मँ जुरइ स इन्कार कइ दिहा ह जब हम जुद्ध मँ गए रहेन!
¹⁰ तू हमका हमरे दुस्मनन क लगे छोड़ि दिहेस,
    तउ उ पचे हमार सारा धन दौलत छीन लइ गएन।
¹¹ तू हमका उ भेड़ी क नाई तज्या जउन खइया क तरह खाइ क होत ह।
    तू हमका रास्ट्रन क बीच छितराइ दिहा।
¹² हे परमेस्सर, तू आपन लोगन क यूँ ही बेच दिहा,
    अउ ओनके मूल्य पइ भाव ताव नाहीं किहा।
¹³ तू हमका हमरे पड़ोसियन मँ हँसी क पात्र बनाया।
    हमरे पड़ोसी हमार मसखरी करत हीं, अउर हमार मजाक बनावत हीं।
¹⁴ लोग हमरी भी कथा उपहास कथा मँ कहत हीं।
    हिआँ तलक कि उ सबइ लोग जेनका आपन कउनो रास्ट्र नाहीं अहइ, आपन मूँड़ी हलाइके हमार मसखरी करत हीं।
¹⁵ मइँ लज्जा मँ बूड़ा अहउँ।
    मइँ सारे दिन भइ निज लज्जा निहारत रहत हउँ।
¹⁶ मोर दुस्मन मोका लज्जित किहेन ह।
    मोर मसखरी उड़ावत भए मोर दुस्मन, आपन बदला लेइ चाहत ह।
¹⁷ हे परमेस्सर, हम तोहका बिसरावा नाहीं।
    फिन भी तू हमरे संग अइसा करत ह।
    हम जब आपन करार पइ तोहरे संग हस्ताच्छर किहे रहे, झूठ नाहीं बोले रहे।
¹⁸ हे परमेस्सर, हम तउ तोहसे मुँह नाहीं मोड़ा।
    अउर न ही तोहार अनुसरण करब तजा ह।
¹⁹ मुला, हे यहोवा, तू हमका इ ठउरे पइ अइसे ठूँस दिहा ह जहाँ सियार रहत हीं।
    तू हमका इ जगह मँ जउन मउत क तरह अँधियर अहइ मूँद दिहा ह।
²⁰ का हम आपन परमेस्सर क नाउँ बिसरी?
    का हम विदेसी देवतन क अगवा निहुरी? नाहीं।
²¹ निहचय ही, परमेस्सर ऍन बातन क जानत ह।
    उ तउ हमार गहिर रहस्य तलक जानत ह।
²² हे परमेस्सर, हम तोहरे बरे रोज रोज मारा जात अही।
    हम ओन भेड़िन जइसा बना अही जउन बधइ बरे लइ जाई जात अहइँ।
²³ मोर सुआमी, उठ!
    नींदिया मँ काहे ओलरा अहा?
    उठा! हमका सदा बरे जिन तजा।
²⁴ हे परमेस्सर, तू हमसे काहे छुपत ह?
    का तू हमार दुःख अउर सबइ वेदना क बिसरि गवा अहा?
²⁵ हमका धूरि मँ पटक दीन्ह गवा ह।
    हम ओंधा मुँह कइके धरती पइ पड़ा भवा अही।
²⁶ हे परमेस्सर, उठा अउर हमका बचाइ ल्या।
    आपन नित्य पिरेम क कारण हमार रच्छा करा।

² सबइ मनइयन मँ, तू अति सुन्नर अहइ।
    तोहार मुँहे स कृपालु सब्द निकलत अहा।
    एह बरे परमेस्सर तोहका सदा-सर्वदा आसीस देइ।
³ तू आपन तरवार क जोद्धन क कमर पइ बाँधा।
    तू महिमा वाला वस्त्र धारण करा।
⁴ तू अद्भुत देखाँत अहा।
जा, धरम अउ निआउ क जुद्ध जीत ल्या।
    अद्भुत करम क करइ बरे सक्ती स भरी दाहिनी भुजा क प्रयोग करा।
⁵ तोहार तीर तइयार अहइँ।
    तू बहुतेरन क हराइ देब्या।
    तू आपन दुस्मनन पइ हुकूमत करब्या।
⁶ हे परमेस्सर,^[a] तोहार सिंहासन हमेसा रहब।
    तोहार साही राजदण्ड अच्छाई तोहार राज्ज क मज़बूत बनावत ह।
⁷ तू नेकी स पिआर अउ बुराई स घिना करत अहा।
    एह बरे सक्तीमान निआवाधीस,
    तोहार परमेस्सर तोहका तोहार साथियन क ऊपर राजा चुनेस ह।
⁸ तोहार ओढ़ना महकत अहइँ जइसे गंध रस, अगर अउ तेज पात स मधुर गंध आवति होइ।
    हाथी दाँत स जड़ा भवा राजमहलन स तोहका आनन्द मँ भरि देइ क मधुर संगीत क झंकार फइलति अहइँ।
⁹ राजा लोगन क बिटियन अइसा सेवा किहेन जइसा कि उ राजा क बिवाह मँ दुल्हन क सेविकन अहइँ।
    तोहार महरानी ओपीर क सोना स बना मुकुट पहिरे तोहरे दाहिन कइँती विराजति अहइँ।

¹⁰ हे राजपुत्री, मोरी बात क सुना।
    धियानदइके सुना, तबहिं तू मोरी बात क समझबू।
तू आपन निज लोगन अउर बाप क घराने क बिसरि जा।
¹¹     राजा तोहरे सुन्दरता पइ मोहित अहइ।
इ तोहार नवा सुआमी होइ।
    तोहका एकर सम्मान करब अहइ।
¹² सूर सहर क लोग तोहरे बरे उपहार^[b] लइ अइहीं।
    अउर धनी मानी तोहसे मिलइ चइहीं।

¹³ उ राजकन्या उ मूल्यवान रत्न क नाई अहइ
    जेका सुन्नर मूल्यवान सुवर्ण मँ जड़ा गवा होइ।
¹⁴ ओका रमणीक वस्त्र पहिराइके लिआवा गवा बाटइ।
    ओकरी सखियन क भी जउन ओकरे पाछे अहइँ राजा क समन्वा लावा गवा।
¹⁵ उ पचे हिआँ उल्लास मँ आई अहइँ।
    उ पचे आनन्द मँ मगन होइके राजमहल मँ प्रवेस करिहीं।

¹⁶ राजा, तोहरे पाछे तोहार पूत सासक होइहीं।
    तू ओनका समूचे धरती क राजा बनउब्या।
¹⁷ मइँ तोहरे नाउँ क प्रचार जुग जुग तलक करब।
    तू प्रसिद्ध होब्या, तोहरे जसे क गीतन क लोग सदा सदा ही गावत रइहीं।

⁵ अइसा कउनो कारण नाहीं जउन मइँ कउनो भी बिनास स डेराइ जाउँ।
    अगर लोग मोका घेरइँ अउ फँदा फइलावइँ, मोका डेराइ क कउनो कारण नाहीं।
⁶ उ सबइ लोग मूरख अहइँ जेनका आपन निज सक्ति
    अउ आपन धन पइ भरोसा अहइ।
⁷ कउनो मानव मीत ओनका छोड़ा नाहीं सकत।
    कउनो मनई परमेस्सर क रिसवत दइके बिना सज़ा क जाई देइ नाहीं सकत।
⁸ कउनो मनई क लगे ऍतना धन नाहीं होई कि जेहसे
    उ खुद आपन निज जिन्नगी मोल लइ सकइ।
⁹ कउनो मनई क लगे
    ऍतना धन नाहीं होइ सकत
    कि उ आपन देह कब्र मँ सड़इ स बचाइ सकइ।
¹⁰ लखा, बुद्धिमान जन, बुद्धिहीन जन अउ पाथर जइसा मूरख जन एक जइसे मरि जात हीं,
    अउर ओनकर सारा धन दूसर लोगन क हाथे मँ चला जात ह।
¹¹ कब्र सदा ही बरे हर कउनो क घर बनी,
    एकर कउनो अरथ नाहीं कि उ पचे केतनी भुइँया क सुआमी रहेन।
¹² धनी मनई मूरख लोगन स अलग नाहीं होतेन।
    सबहिं लोग गोरूअन क तरह मर जात हीं।
¹³ मूरख लोगन बरे इहइ होत ह।
    इ ओनकर भाग्य अहइ अउर ओकरे संतानन क भाग्य जउन ओकरे जइसा इच्छा रखत ह।
¹⁴ सबहिं लोग भेड़ी जइसेन बाटेन।
    कब्र ओनकर बरे बाड़ा बन जाइ।
मउत ओनके चरवाहा बनी।
    ओनकर काया छीन होइ जाइ
    अउर उ पचे कब्र मँ सड़ गल जइहीं।

¹⁵ मुला यहोवा मोर मूल्य चुकाई अउर मोका कब्र स बचाइ।
    काहेकि उ मोका आपन संग लेब।

¹⁶ धनवानन स जिन डेराअ कि उ पचे धनी अहइँ।
    लोगन स ओनकर धन दौलत स भरा घरन क लखिके जिन डेराअ।
¹⁷ उ सबइ लोग जब मरिहीं कछू भी संग न लइ जाइ जइहीं।
    ओन सुन्नर वस्तुअन मँ स कछू भी न लई जाइ पइहीं।
¹⁸ लोगन क चाही कि उ सबइ जब तलक जिअत रइहीं परमेस्सर क स्तुति करइँ।
    जब परमेस्सर ओनके संग भलाई करइ, तउ लोगन क ओकर स्तुति करइ चाही।
¹⁹ मनइयन बरे एक अइसा समइ आइ जब उ पचे आपन पुरखन क संग मिल जइहीं।
    फिर उ पचे कबहुँ दिन क प्रकास नाहीं लखि पइहीं।
²⁰ धनी मनई मूरख लोगन स अलग नाहीं होतेन।
    सबहिं लोग गोरुअन क नाईं मरत हीं।

⁵ उ सबइ लोग आपन हिरदइ मँ गीतन क संग जउन तोहरे मन्दिर मँ आवत हीं,
    बहोतइ आनन्दित अहइँ।
⁶ उ सबइ खुस लोग बाका घाटि
    जेका परमेस्सर झरना क तरह बनाएस ह
    गुजरत हीं गर्मी क गिरत भइ बर्खा क बूँदन जल क सरोवर बनावत हीं।
⁷ लोग आपन परमेस्सर स मिलइ बरे सहर स सहर होत भए
    इ रास्ता पइ सिय्योन पहाड़ पइ जात हीं।

⁸ फउजन क परमेस्सर यहोवा, मोर पराथना सुना।
    याकूब क परमेस्सर तू मोर सुनि ल्या।

⁹ परमेस्सर, हमरे संरच्छक क रच्छा करा।
    आपन अभिसिक्त भए राजा पइ दयालु ह्वा
¹⁰ हे परमेस्सर, कहूँ अउर हजार दिन ठहरइ स
    तोहरे मन्दिर मँ एक दिन ठहरब उत्तिम अहइ।
दुट्ठ लोग क बीच बसइ स,
    आपन परमेस्सर क मन्दिर क दुआरे क लगे खड़ा रइहउँ इहइ उत्तिम बाटइ।
¹¹ यहोवा हम लोगन क सूर्य अउर ढार अहइ।
    यहोवा महिमा अउ सम्मान देइ।
उ जउन खरी जिन्नगी गुजारत ह
    ओका उ हर एक नीक चीज देत ह।
¹² हे सर्वसक्तिमान यहोवा,
    जउन लोग तोहरे भरोसे अहइँ उ पचे फुरइ बहोत खुस अहइँ।

³ हे यहोवा, कोहाइ जाब क तजि द्या।
    अउर तू आपन गुस्सा क लइ लिहा।
⁴ परमेस्सर, हमार मुक्तिदाता, कृपा कइके हम पचन पइ कोहाइ जाब तजि द्या
    अउर हम लोगन क फुन हमार भुइयाँ पइ वापिस लइ आवा।
⁵ का तू हमेसा हमेसा कोहान रहब्या?
    का तू सदा आपन कोहान जारी रखब्या?
⁶ कृपा कइके हमका फुन जिआइ द्या
    ताकि तोहार लोग तोहसे फुन स खुस होइ सकइँ।
⁷ हे यहोवा, तू हमका आपन बिस्सासनीय पिरेम देखावा।
    हमार रच्छा करा।

⁸ जउन परमेस्सर कहत ह, मइँ ओह पइ कान दिहेउँ।
    उ अपने लोगन अउर अपने बिस्सासी चेलों से सान्ति क वाचा करत ह
    उ नाहीं चाहत ह कि उ पचे बेवकूफी क राहे पइ लउटि जाइँ।
⁹ फुरइ, ओकर उद्धार ओन लोगन क निचके बाटइ जउन ओहसे डेरात ह,
    एह बरे ओकर महिमा तोहार देस मँ निवास करी।
¹⁰ पिरेम अउर सच्चाई एक साथ मिलब।
    धर्मता अउ सान्ति एक दूसर क चुम्मा क संग स्वागत करिहीं।
¹¹ सच्चाई धरती स अंकुरित होइहीं,
    अउर धार्मिकता अकासे स बसिर्हीं।
¹² यहोवा बहोत स उत्तिम वस्तुअन क देइहीं।
    अउर हमार धरती प्रचुर मात्रा मँ फसल उपजिहीं।
¹³ परमेस्सर क अगवा अगवा नेकी चली,
    अउर उ ओकरे बरे राह बनाई।

⁴ मइँ सिय्योन ओन लोगन क सूची बनाउब जउन मोका जानत ह,
    एहमाँ ओन लोगन भी सामिल अहइँ जउन मिस्र, बाबुल, पलिस्ती, सोर अउ इथोपिया मँ भी रहत हीं।
⁵ उ हरेक जन क जउन
    सिय्योन मँ पइदा भएन जानत ह।
    सर्वोच्च परमेस्सर इ सहर क स्थापना किहेस ह।
⁶ यहोवा आपन रास्ट्रन क सूची राखत ह।
    उ जानत ह कि कउन सिय्योन मँ पइदा भवा ह। सेला

⁷ ओकर मनवइयन बहोत खुसी स गावत अउर नाचत हीं।
    उ पचे कहा करत हीं, “सबहिं उत्तिम चिजियन यरूसलेम स आइन।”