Chronological

¹ मइँ ऊपर ऊँच पहाड़न क कइँती लखत हउँ।
    मुला फुरइ मइँ कहाँ स पावइँ?
² मोका तउ सहारा यहोवा स मिली
    जउन सरग अउ धरती क बनावइवाला अहइ।
³ परमेस्सर तोहका गिरइ नाहीं देइ।
    तोहर बचवइया कबहुँ भी नाहीं सोइ।
⁴ इस्राएल क उद्धारकर्त्ता कबहुँ न ही ओंघात ही
    अउर न ही सोवत अहइँ।
⁵ यहोवा तोहार रच्छक अहइ।
    उ तोहका आस्रय देइ बरे तोहार बगल मँ अहइ।
⁶ दिन क समइ सूरज तोहका हानि नाहीं पहोंचाइ सकत।
    राति मँ चाँद तोहार नोस्कान नाहीं कइ सकत।
⁷ यहोवा तोहार रच्छा हर संकट स करी।
    यहोवा तोहरी आतिमा क रच्छा करी।
⁸ यहोवा उ सबइ पइ धियान रखी जउन कछू तू करब्या।
    जहाँ कहुँ भी तू जाब्या अउ आउब्या, अबहुँ अउ सदा सर्वदा उ तोहार रच्छा करी।

¹ हे परमेस्सर, मइँ आँखी उठाइके तोहार पराथना करत हउँ।
    तू सरग मँ राजा क रूप मँ बिराजत अहा।
² दास लोग आपन सुआमियन क ऊपर ओन चिजियन बरे आसरे पइ रहा करत हीं, जेकर ओनका जरूरत अहइ।
    दासियन आपन सुआमिनियन क ऊपर आसरे पइ रहा करत हीं।
इहइ तरह हमका यहोवा हमरे परमेस्सर तब तलक लखत हउँ
    जब तलक उ हम पइ दाया देखाँवइ।
³ हे यहोवा, हम लोगन पइ कृपालु ह्वा।
    हम लोगन पइ दयालु ह्वा काहेकि बहोत लम्बी समइ स हम लोगन क अपमान होत अहइ।
⁴ घमण्डी लोग बहोत दिनन स
    हम लोगन क अपमानित कइ चुका अहइँ।

¹ अगर यहोवा हमरे संग नाहीं होतेन
    तउ इस्राएल क कहइ द्या,
² अगर यहोवा हमरे संग नाहीं होत,
    जब हमार बिरोधी हम लोगन पइ हमला किहे रहेन?
³ तब हमार दुस्मन हमका जिअत ही निगल गए होतेन
    जब उ पचे गुस्सा भए रहेन।
⁴ तब हमार सत्रुअन क फउजन
    बाढ़ क तरह हमका बहावत भइ
    उ नदी क जइसी होइ जातिन जउन हमका बोरत रही होइँ।
⁵ तब उ सबइ घमण्डी लोग उ पानी जइसे होइ जातेन
    जउन हमका बोरत भवा हमरे मुँहना तलक बाढ़त आवति होइ।

¹ जउन लोग यहोवा क भरोसे रहत हीं, उ पचे सिय्योन क पहाड़ जइसे होइहीं।
    ओनका कबहुँ कउनो डुगाइ नाहीं पाई।
    उ पचे सदा ही अटल रइहीं।
² यहोवा आपन लोगन क वइसे ही आपन आस्रय मँ लिहस ह, जइसे यरूसलेम चारिहुँ कइँती पहाड़न स घिरा बाटइ।
    यहोवा सदा-सर्वदा आपन लोगन क रच्छा करी।
³ बुरे लोग भले लोगन क धरती क ऊपर राज्ज नाहीं कइ सकिहीं,
    अगर बुरे लोग अइसा करइ लग जाइँ तउ होइ सकत ह सज्जन लोग भी बुरा काम करइ लागइँ।

¹ जउन कउनो यहोवा क सम्मान करत हीं धन्न अहइँ।
    उ पचे ओकरे राहन पइ चलत हीं।

¹ पूरी जिन्नगी भइ मोर अनेक दुस्मन रहेन ह।
    इस्राएल क घोसना करइ द्या
² पूरी जिन्नगी भइ मोर अनेक दुस्मन रहेन ह।
    बहोत सारे दुस्मन मोह पइ हमला किहन।
    मुला उ पचे हमका हराइ नाहीं पाएन।
³ उ पचे मोका तब तलक पीटेन जब तलक मोरी पिठिया पइ गहिर घाव नाहीं बनेन।
    मोरे बड़का बड़का अउर गहिर घाव होइ गएन।
⁴ मुला यहोवा उ किहेस जउन नीक रहा अउर रस्सा काट दिहस।
    उ मोका ओन दुट्ठ लोगन स अजाद किहस।
⁵ ओन सबइ क जउन सिय्योन स घिना करत ह हारइ द्या,
    उ पचन क खदेड़इ द्या।
⁶ उ सबइ लोग अइसे रहेन, जइसे कउनो घरे क छत पइ क घास
    जउन उगइ स पहिले ही मुरझाइ जात ह।
⁷ उ घसिया स कउनो मजदूर आपन मूठी तलक नाहीं भरि पावत
    अउर इ गठरी पुलंदा बनाइ बरे भी प्रयाप्त नाहीं होइ।
⁸ अइसे ओन दुट्ठ जनन क लगे स जउन लोग गुजरत हीं।
    उ पचे नाहीं कइहीं, “यहोवा तोहार भला करइ।”
    उ पचे नाहीं कहिहीं, “हम तू पचन्क यहोवा क नाउँ पइ आसीस देत अही।”

¹ हे यहोवा, मइँ गहिर कस्ट मँ हउँ
    तउ सहारा पावइ क मइँ तोहका गोहरावत हउँ।
² मोर सुआमी, तू मोर सुनि ल्या।
    मोर मदद क गोहार पइ कान द्या।
³ हे यहोवा, अगर तू लोगन क ओनकर सबहिं पापन्क सचमुच सजा द्या
    तउ फुन कउनो भी बच नाहीं पाइ।
⁴ मुला तू, यहोवा, आपन लोगन क छिमा करा;
    तउ उ लोग तोहार सम्मान करिहीं।