Chronological

दाऊद अउ नाबाल

25 समूएल मरि गवा। इस्राएल क सबहिं मनइयन बटुर गएन अउर उ पचे समूएल क मउत प अफसोस परगट किहेन। उ पचे समूएल क ओकरे घर रामा मँ दफनाइ दिहेन।

तब्बइ दाऊद परन क रेगिस्तान मँ चला गवा। ² हँवाँ एक ठु मनई रहा जउन माओन मँ रहत रहा। उ बहोत धनी मनई रहा। ओकरे लगे तीन हजार भेड़ी अउर एक हजार बोकरी रहिन। उ कर्मेल मँ आपन भेड़ी क ऊन काटत रहा। ³ उ मनई क नाउँ नाबाल रहा। उ कालेब क परिवार क रहा। ओकरी मेहरारु क नाउँ अबीगैल रहा। उ बुद्धिमती अउ बहोतइ सुन्नर मेहरारु रही। मुला नाबाल क्रूर नीच रहा।

⁴ दाऊद रेगिस्ताने मँ रहा, अउर उ सुनेस कि नाबाल आपन भेड़ी क ऊन काटत बाटइ। ⁵ ऍह बरे दाऊद दस जवानन क नाबाल स बात करइ पठएस। दाऊद कहेस, “कर्मेल जा। नाबाल स भेंटा अउर ओका मोरी कइँती स ‘पैलगी’ कहा।” ⁶ दाऊद नाबाल बरे इ संदेसा पठएस, “मोका आसा अहइ कि तू अउ तोहार परिवार सुखी अहइ। मइँ आसा करत हउँ कि जउन कछू तोहार अहइ, ठीक ठाक बाटइ। ⁷ मइँ सुनेउँ ह कि तू आपन भेड़ी स ऊन काटत बाट्या। तोहार गड़रियन कछू समइ तलक हम पचन क संग रहत रहेन। अउर हम पचे ओनका कउनो कस्ट नाहीं दीन्ह। जब तलक तोहार गड़रिया कर्मेल मँ रहेन, हम ओनसे कछू नाहीं लीन्ह। ⁸ आपन सेवकन स पूछा अउर उ पचे बताइ देइहीं कि इ सब कछू फुरे अहइ। कृपा कइके हमरे जवानन प दाया करा। इ खुसी क मौका प हम पचे आपक लगे पहुँचत अही। कृपा कइके आप जउन कछू चाहइँ, दइ देइँ। कृपा कइके इ मोरे बरे, आपन मीत दाऊद बरे करइँ।”

⁹ दाऊद क मनई नाबाल क लगे गएन। उ पचे दाऊद क सँदेसा नाबाल क दिहन। ¹⁰ मुला नाबाल ओनकइ बरे छोटपन स बेउहार किहस। नाबाल कहस, “दाऊद अहइ कउन? इ जेसे क पूत कउन होत ह? इ दिनन ढेरिके दास बाटेन जउन आपन सुआमी लोगन क हिआँ स पराइ ग अहइँ। ¹¹ मोरे लगे रोटी अउ पानी अहइ। अउर मोरे लगे उ माँस भी अहइ जेका मइँ भेड़ी स ऊन कतरइ वालन नउकरन बरे मारिके लिहेउँ ह। मुला मइँ ओका उ मनइयन क नाहीं दइ सकत हउँ जेनका मइँ जानत भी नाहीं हउँ।”

¹² दाऊद क मनइयन लउटि गएन अउर नाबाल जउन कछू कहे रहा दाऊद क बताइ दिहस। ¹³ तब दाऊद आपन मनइयन स कहेस, “आपन तरवार उठावा।” ऍह बरे दाऊद अउ ओकर मनइयन तरवार उठाइ लिहन। लगभग चार सौ मनई दाऊद क संग गएन। अउर दुइ सौ मनई सामान क संग रुका रहेन।

अबीगैल मसीबत क रोकत ह

¹⁴ नाबाल क नउकरन मँ स एक ठु नाबाल क मेहरारु अबीगैल स बतियान। नउकर कहेस, “दाऊद रेगिस्तान स आपन दूतन क हमरे सुआमी (नाबाल) क लगे पठएस। मुला नाबाल दाऊद क दूतन क संग आपन निचकई क बेउहार किहस। ¹⁵ इ पचे हम पचन बरे बहोत भला रहेन। हम पचे भेड़ी लइके खेतन मँ जात रहेन। दाऊद क मनइयन हमरे संग बराबर रहेन। अउर उ पचे हमरे संग कउनो बुरा नाहीं किहेन। उ पचे पूरे समइ मँ हमार कछू भी नाहीं चोराएन। ¹⁶ दाऊद क मनइयन दिन रात हमार रच्छा किहेन। उ पचे हम लोग बरे चहरदेवार क नाई रच्छक रहेन। उ पचे हमार रच्छा तबहिं किहेन जब हम पचे भेड़ी क रखवारी करत भए ओनकइ संग रहेन। ¹⁷ अब इ बारे मँ सोचा अउर तय करा कि तू का कइ सकत ह। नाबाल कछू कहेस उ मूरखपन स भरा अहइ। हमार सुआमी अउर ओकरे समूचइ परिवार बरे अला बला आवति अहइ।”

¹⁸ अबीगैल हाली किहस। उ दुइ सौ पाव रोटी, दुइ दाखरस स भरा मसक, पाँच ठु भुना भइ भेड़ी, लगभग एक बुसल भुना भवा अनाज, दुइ र्क्वाट मुनक्का अउर दुइ सौ झूरान अंजीर क टिकिया लिहेस अउ ऍका गदहन प लादि दिहस। ¹⁹ तब अबीगैल आपन नउकरन स कहेस, “आगे चलत रहा। मइँ तोहरे पाछे आवति अहउँ।” मुला उ आपन भतार स कछू नाहीं कहेस।

²⁰ अबीगैल आपन गदहा प बइठी अउर पहाड़े क दूसर कइँती पहुँची। उ दूसर कइँती स आवत भइ दाऊद अउ ओकरे मनइयन स भेटेस।

²¹ अबीगैल स मिलइ क पहिले दाऊद कहत रहा, “मइँ नाबाल क धन दौलत क रच्छा रेगिस्तान मँ कीन्ह। मइँ चिन्तित रहा कि ओकर कउनो भेड़ी खोवइ नाहीं। मइँ इ सब कछू बिना लिहे किहेउँ। मइँ ओकरे बरे नीक किहेउँ। मुला उ मोरे बरे कछू नीक नाहीं किहे रहा। ²² परमेस्सर मोका सजा देइ जदि मइँ नाबाल क परिवारे क कउनो एक मनई क जिअत रहइ देउँ।”

²³ ठीक उहइ टेमॅ प अबीगैल आइ। मुला जब अबीगैल दाऊद क लखेस। उ हाली हाली आपन गदहा स उतरि पड़ी। उ दाऊद क समन्वा प्रणाम करइ निहुरी। उ आपन माथा भुइँया प टेकेस। ²⁴ अबिगैल दाऊद क गोड़े प गिर पड़ी। उ कहेस, “मान्न, कृपा कइके मोका कछू कहइ देइँ। जउन मइँ कहउँ ओका सुना। जउन कछू भवा ओकरे बरे मोका दोख द्या। ²⁵ मइँ उ मनइयन क नाहीं लखेउँ जेनका आप पठएन ह। साहब! उ बेकार मनई (नाबाल) प धियान जिन द्या। उ ठीक उहइ अहइ जइसे ओकर नाउँ अहइ। अउर उ फुरे ‘मूरख’ अहइ। ²⁶ यहोवा आप क बेकसूर मनइयन क मारइ स रोकेस ह। फुरइ जइसे यहोवा हमेसा रहत ह वइसे आप जिअत अहइँ। मइँ आसा करत हउँ कि आपक दुस्मन लोग अउर जउन आप क नोस्कान पहुँचावइ चाहत हीं, उ सबइ नाबाल क राज्ज मँ होइहीं। ²⁷ अब मइँ आप बरे इ भेंट लइ आइ अहउँ। कृपा कइके इ चीजन क आप उ मनइयन क दइ देइँ जउन आप क पाछे चलत हीं। ²⁸ जुर्म करइ बरे मोका छिमा करइँ। मइँ जानत हउँ कि यहोवा आप क परिवार क मजबूत करिहीं अउ तोहरे परिवारे स ढेर क राजा अइहीं। यहोवा इ करिहीं काहेकि आप सब ओनके बरे जुद्ध करत हीं। मनइयन तब तलक आप मँ बुराई न पइहीं जब तलक आप जिअत रइहीं। ²⁹ जदि कउनो मनई आप क मारि डावइ क पाछा करत ह, तउ यहोवा आपक परमेस्सर आपक जिन्नगी क रच्छा करिहीं। मुला यहोवा ओकर जिन्नगी क अइसे दूरि लोकइहीं जइसे गुलेल स पाथर लोकाइ दीन्ह जात ह। ³⁰ यहोवा आप बरे बहोत स नीक चीजन क करइ क प्रण किहेस ह। अउर यहोवा आपन सबहिं वचन क पूरा करिहीं। परमेस्सर आप क इस्राएल क राजा बनइहीं। ³¹ अउर आप बेकसूर मनई क मारि डावइ क अपराधी न होइहीं। अउ आप इ जाल मँ न फँसिहीं। मेहराबानी कइके मोका उ टेम मँ याद राखा जब यहोवा आप क सफलता देइ।”

³² दाऊद अबीगैल क उत्तर दिहेस, “इस्राएल क परमेस्सर, यहोवा क गुण गावा। परमेस्सर तोहका मोसे भेंटइ पठए अहइ। ³³ परमेस्सर तोहार नीक निर्णय बरे तोहका आसीर्बाद देइँ। तू आज मोका बेकसूर मनइयन क मारइ स बचावा। ³⁴ सचमुच जइसे इस्राएल क परमेस्सर, यहोवा हमेसा रहत ह, जदि तू जल्दी स मोसे भेंटइ न आइ होती तउ भियान भिन्सारे तलक नाबाल क परिवार क कउनो भी मनई जिअत नाहीं बच पावत।”

³⁵ तउ दाऊद अबीगैल क भेंट क अंगीकार किहस। दाऊद ओसे कहेस, “सान्ति स घर जा। मइँ तोहार बातन क सुनेउँ ह अउर मइँ उहइ करब जउन तू करइ क कहया ह।”

नाबाल क मउत

³⁶ अबीगैल नाबाल क लगे लउटी। नाबाल घरे मँ मोजूद रहा। नाबाल एक ठु राजा क तरह भोज खात रहा। नाबाल जी भरिके दाखरस पिए रहा। उ बहोत जियादा पिए रहा। ऍह बरे अबीगैल नाबाल क दूसर भिन्सारे तलक कछू भी नाहीं बताएस। ³⁷ दूसर दिन भिन्सारे ओकर नसा उतरा। ऍह बरे ओकर मेहरारु हर बात बताइ दिहस। फिन नाबाल क दिल क दउरा पड़ि गवा। उ चट्टान क नाई कठोर होइ गवा। ³⁸ दस दिनाँ क पाछे यहोवा नाबाल क मरि जाइ दिहस।

³⁹ दाऊद सुनेस कि नाबाल मरि गवा अहइ। दाऊद कहेस, “यहोवा क गुन गावा। नाबाल मोरे खिलाफ खराब बात किहेस ह, मुला यहोवा मोर समर्थन किहस। यहोवा मोका पाप करइ स बचाएस। अउर यहोवा नाबाल क मरि जाइ दिहस काहेकी उ अपराध किहे रहा।”

तब दाऊद अबीगैल क सँदेसा पठएस। दाऊद ओका आपन मेहरारू होइ क कहेस। ⁴⁰ दाऊद क नउकर कार्मल गएन अउ अबीगैल स कहेस, “दाऊद हम पचन क तोहका लइ आवइ क पठएस ह। दाऊद चाहत ह कि तू ओकर मेहरारु बना।”

⁴¹ अबीगैल भुइँया तलक आपन माथा निहुराएस। उ कहेस, “मइँ आपक दासी अहउँ। मइँ सुआमी क सेवकन क गोड़ धोवइ बरे तइयार अहउँ।”

⁴² अबीगैल फउरन गद्हा प बइठी अउ दाऊद क दूतन क संग चल दिहस। अबीगैल आपन संग पाँच ठु नउकरानी लइ आइ। उ दाऊद क मेहरारु बनी। ⁴³ दाऊद यिज्रेल क अहिनोअम स बियाह किहेस। अहिनोअम अउ अबीगैल दुइनउँ दाऊद क मेहरारु रहिन। ⁴⁴ दाऊद साऊल क बिटिया मीकल स भी बियाह किहे रहेस। मुला साऊल ओका लइ लिहस अउर ओका एक मनई जेकर नाउँ पल्ती रहा, जउन लैस क पूत अउर गल्लीम क निवासी रहा ओकर क संग बियाही दिहस।

दाऊद अउ अबीसै साऊल क डेरा मँ घुसत हीं

26 जीप क मनई साऊल स भेंटइ गिबिया गएन। उ पचे साऊल स कहेन, “दाऊद हकिला क पहाड़ी मँ लुकान बा। इ पहाड़ी यसीमोन क ओह पार बा।”

² साऊल जीप क रेगिस्तान मँ गवा। साऊल तीन हजार सिपाहियन क खुद समूचइ इस्राएल स छाँटिके साथ लिहस। साऊल अउ इ मनई जीप क रेगिस्ताने मँ दाऊद क हेरत रहेन। ³ साऊल आपन डेरा हकीला क पहाड़ी प डाएस। डेरा सड़क क किनारे यसीमोन क पार रहा।

दाऊद रेगिस्तान मँ रहत रहा। दाऊद क पता लाग कि साऊल ओकर हुवाँ पाछा किहेस ह। ⁴ तब दाऊद आपन जासूसन क पठएस अउ दाऊद क पता लाग कि साऊल हकीला क पहाड़ी प आइ गवा अहइ। ⁵ तब दाऊद उ ठउरे प गवा जहाँ साऊल आपन डेरा डाए रहा। दाऊद लखेस कि साऊल अउ अब्नेर कहाँ सोवत अहइँ। (नेर क पूत अब्नेर साऊल क फउज क सेनापति रहा।) साऊल डेरा क बीच सोवत रहा। सारी फउज साऊल क चारिहुँ कइँती रही।

⁶ दाऊद हित्ती अहीमेलेक अउ यरूयाह क पूत अबीसै स बात किहस। (अबीसै योआब क भाई रहा।) उ ओसे कहेस, “मोरे संग साऊल क नगिचे ओकरे डेरा मँ कउन चली?”

अबीसै उत्तर दिहस, “मइँ तोहरे संग चलब।”

⁷ रात भइ। दाऊद अउ अबीसै साऊल क डेरा मँ गएन। साऊल डेरा क बीच सोवा रहा। ओकर भाला भुइँया मँ ओकरे मूँड़े क लगे धँसा रहा। अब्नेर अउ फउज साऊल क चारिहुँ कइँती सोइ रही। ⁸ अबीसै दाऊद स कहेस, “आजु, परमेस्सर तोहरे दुस्मनन क हरावइ दिहेन ह। मोका साऊल क ओकरे भाला स ही जमीन मँ भोकां देइ द्या। मइँ ओका एक ही वार मँ मार देब।”

⁹ मुला दाऊद अबीसै स कहेस, “साऊल क जिन मारा। जउन कउनो चुना भवा राजा क मारत ह उ जरुर सजा पावत ह। ¹⁰ इ सच अहइ यहोवा जब तलक रही उ साऊल क खुद ही सजा देइ। होइ सकत ह साऊल आपन मउत पाइ या इ होइ सकत ह कि साऊल जुद्ध मँ मारा जाइ। ¹¹ मुला मइँ पराथना करत हउँ कि यहोवा आपन चुना भवा राजा क मोसे चोट न करवावइ। अब पानी क गगरी अउर भाला उठावा जउन साऊल क मूँड़े क लगे बा। तब हम पचे चली।”

¹² ऍह बरे दाऊद भाला अउ पानी क गगरी लिहस जउन साऊल क मूँड़े क लगे रहेन। तब दाऊद अउ अबीसै साऊल क डेरा क तजि दिहस। कउनो मनई एकरे बारे मँ न जान सका। कउनो भी मनई जागा नाहीं। साऊल अउ ओकर सिपाही सोवत रहेन काहे यहोवा ओनका गहिर नीदं मँ डाइ दिहे रहा।

दाऊद साऊल क फुन लजावत ह

¹³ दाऊद घाटी क दूसर कइँती निकरि गवा। साऊल क डेरा स घाटी क पार पहाड़े क चोटी प खड़ा रहा। दाऊद अउ साऊल क डेरा बहोत दूरी प रहेन। ¹⁴ दाऊद सेना अउ नेर क पूत अब्नेर क नरियाइके गोहराएस, “अब्नेर, मोका जवाब द्या।”

अब्नेर पूछेस, “तू कउन अहा? तू राजा क काहे बोलावत अहा?”

¹⁵ दाऊद जवाब दिहेस, “तू एक मनई अहा। मोसे कहा, का तू नाहीं अहा? अउर तू इस्राएल मँ कउनो भी दूसर मनई स नीक अहा। तब तू आपन सुआमी, राजा क रच्छा काहे नाहीं किहा? एक मामूली मनई तोहरे डेरा मँ तोहार सुआमी, राजा क मारइ आवा। ¹⁶ तू बहोतइ बड़ी गल्ती किहा। यहोवा क जिन्नगी क किरिया तोहका अउर तोहरे सिपाहियन क मरि जाइ चाही। काहेकि तू आपन सुआमी अउर यहोवा क चुना भवा राजा क रच्छा नाहीं किहा। साऊल क मूँड़े क लगे भाला अउ पानी क गगरी क खोज करा। उ सबइ कहाँ बाटेन?”

¹⁷ साऊल दाऊद क अवाज पहिचानत रहा। साऊल कहेस, “मोर पूत दाऊद, का इ तोहार आवाज बाटइ?”

दाऊद जवाब दिहस, “मोर सुआमी अउ राजा, हाँ! इ मोर अवाज अहइ।” ¹⁸ दाऊद इ भी पूछेस, “महाराज, आप मोर पाछा काहे करत अहइँ? मइँ कउन सी गल्ती किहेउँ ह? मइँ का करइ क अपराधी अहउँ? ¹⁹ मोर सुआमी अउ राजा, हमरउँ सुना। जदि यहोवा मोरे खिलाफ कोहाइ बरे किहेन ह तउ ओनका एक ठु भेंट अंगीकार करइ द्या। जदि मनई मोरे खिलाफ आपक कोहाएन ह तउ यहोवा क जरिए ओनकइ बरे कछू मुसीबत आवइ द्या। मनइयन मोका इ देस तजइ बरे मजबूर किहन ह, जेका यहोवा मोका दिहन ह। लोग मोसे कहेन, ‘जा। बिदेसी मनइयन क संग रहा। जा दूसर देवतन क पूजा करा।’ ²⁰ मोका यहोवा क हाजिरी स दूर जिन मरइ द्या। इस्राएल क राजा एक मच्छर क हेरइ निकरा बा। आप उ मनई क तरह अहइँ जउन पहाड़े मँ तीतर क सिकार करइ निकरा होइँ।”

²¹ तबहिं साऊल कहेस, “मइँ पाप किहेउँ ह। मोर पूत दाऊद लउटि आवा। आज तू देखाँइ दिहा कि मोर जिन्नगी तोहरे बरे अनमोल बाटइ। यह बरे मइँ तोहका चोट पहुँचावइ क कोसिस न करब। मइँ मूरखपन क काम किहेउँ ह। मइँ एक ठु बहोत बड़ी गलती किहेउँ ह।”

²² दाऊद जवाब दिहेस, “राजा क भाला इ बाटइ। आपन कउनो नउ जवान क हिआँ आवइ द्या अउर उ लइ जाइ। ²³ यहोवा मनइयन क करमे क फल देत हीं। जदि उ नीक करत ह तउ ओका ईनाम देत हीं अउर ओका सजा देत हीं जउन बुरा करत ह। यहोवा आज आप क मोका हरावइ दिहन, मुला मइँ यहोवा क चुना भवा राजा प चोट नाहीं करब। ²⁴ आजु मइँ आपक देखाँइ दिहेउँ ह कि आपक जिन्नगी मोरे बरे अनमोल अहइ। इ तरह यहोवा देखाँइहीं कि मोर जिन्नगी ओनकइ बरे महत्व क बाटइ। यहोवा मोर रच्छा हर मुसीबते स करिहीं।”

²⁵ तब साऊल दाऊद स कहेस, “मोर पूत दाऊद, परमेस्सर तोहका आसीर्बाद देइँ। तू बड़का कारज करब्या अउ सुफल होब्या।”

दाऊद आपन राहे प गवा, अउर साऊल घर लउटी आवा।

दाऊद पलिस्तियन क संग रहत ह

27 दाऊद सोचेस, “होइ सकत ह साऊल मोका कउनो दिन धइ लेइ। सबन ते बढ़िया इहइ अहइ मइँ कि पलिस्तियन क देस स बचि निकरुँ। तब साऊल इस्राएल मँ मोर खोज मँ थक जाब इ तरह मइँ साऊल स बचि निकरब।”

² ऍह बरे दाऊद अउ ओकर छ: सौ मनइयन इस्राएल तजि दिहन। उ सबइ माओक क पूत आकीस क लगे गएन। आकीस गत क राजा रहा। ³ दाऊद, ओकर मनइयन आपन पूरा परिवार क साथ आकीस क संग गत मँ रहइ लागेन। दाऊद क संग ओकर दुइ पत्नी रहिन। उ पचे यिज्रेली क अहीनोअम अउ कार्मेल क अबीगैल रहिन। अबीगैल नाबाल क राँड़ रही। ⁴ मनइयन साऊल स कहेन कि दाऊद गत क पराइ ग अहइ। अउर साऊल ओकर खोज बन्द कइ दिहस।

⁵ दाऊद आकीस स कहेस, “जदि आप मोसे खुस अहइँ तउ मोका आपन देस क नगरन मँ स एक मँ एक ठउर दइ देइँ। मइँ आप क सिरिफ एक सेवक अहउँ। मोका हुवाँ रहइ चाही, आप क संग हुवाँ राजधानी-सहर मँ नाहीं।”

⁶ उ दिना आकीस दाऊद क सिकलग नगर दिहस। अउर तब स सिकलग अब तलक यहूदा क राजा लोगन क बना अहइ। ⁷ दाऊद पलिस्तियन क संग एक बरिस अउ चार महीना रहा।

दाऊद आकीस राजा क मूरख बनावत ह

⁸ दाऊद अउ ओकर मनई अमालेकी अउ गसूर मँ रहइवालन मनइयन क संग जुद्ध करइ गएन। दाऊद क मनइयन ओका हराएन अउ ओनकइ धन दौलत लइ लिहन। लोग उ पहँटा मँ सुर क नगिचे तेलम स लइके लगातार मिस्र तलक रहत रहेन। ⁹ दाऊद उ पहँटा मँ मनइयन क हराएस। दाऊद ओनकइ सब भेड़िन, पसु, गदहा, ऊँट अउ ओढ़ना लिहस। तब उ इ सबन क आकीस लइ आवा।

¹⁰ दाऊद इ कई दाई किहेस। हर दाई आकीस पूछत कि उ कहाँ लड़ा अउ ओन चीजन क कहाँ स लइ आवा। दाऊद कहत रहा, “मइँ यहूदा क दक्खिन कइँती लड़ा।” इ “सब मइँ यरहमेलियन क दक्खिनी भाग मँ लड़ा” या “मइँ केनियन क दक्खिनी भाग मँ लड़ा।” ¹¹ दाऊद गत क कबहुँ जिअत मेहरारु या मनसेधू नाहीं लइ आवा। दाऊद सोचेस, “जदि हम कउनो मनई क जिअत रहइ देइत ह तउ उ आकीस स कहि सकत ह कि सचमुच मइँ का किहेउँ ह।”

दाऊद पूरे टेमॅ, जब तलक पलिस्तियन क देस मँ रहा, इहइ किहस। ¹² आकीस दाऊद प पतियाब सुरु किहस। आकीस अपने आप सोचेस, “अब दाऊद क आपन लोग ही ओसे घिन करत हीं। इस्राएलियन दाऊद स बहोत जिआदा घिन करत हीं। अब दाऊद मोर सेवा करत रही।”