Chronological

साऊल पहली गल्ती करत ह

13 अब ताई साऊल एक बरिस तलक राज कइ चुका रहा। अउर फुन जब साऊल इस्राएल प दुइ बरिस राज कइ चुका, ² उ इस्राएल स तीन हजार मनई चुनेस। ओहमाँ दुइ हजार उ पचे रहेन जउन बेतेल क पहाड़ी पहँटा क मिकमास मँ ओकरे संग ठहरा रहेन। अउर एक हजार उ मनई रहेन जउन बिन्यामीन क अंदर गिबा मँ योनातान क संग ठहरा रहेन। साऊल फउज क दूसर सिपाहियन क ओनकइ आपन घर पठइ दिहस।

³ योनातान गिबा मँ जाइके पलिस्तियन क ओनकइ सिबिर पइ हमला किहस। पलिस्तियन एकरे बारे मँ सुनेन। उ पचे कहेन, “हिब्रू लोग बगावत किहे अहइ।”

साऊल कहेस, “हिब्रू मनइयन क जउन कछू भवा अहइ ओका सुनावा।” ऍह बरे साऊल लोगन्स कहेस कि उ पचे समूचइ इस्राएल देस मँ तुरही बजावइँ। ⁴ सबइ इस्राएलियन इ खबर सुनेन। उ पचे कहेन, “साऊल पलिस्ती फउज प्रमुख क मारि डाएस। अब पलिस्तियन फुरे इस्राएलियन स घिना करत हीं।”

इस्राएली लोगन्क साऊल स भेंटइ बरे गिलगाल मँ बोलावा गवा। ⁵ पलिस्ती इस्राएल स लड़इ बरे बटुर गएन। पलिस्तियन क लगे तीन हजार रथ अउ छ: हजार घुड़सवार ओकरे फउज मँ रहेन। हुवाँ ऍतना जिआदा पलिस्ती फउजी रहेन जेतँना समुद्दर क किनारे बालू क कन। पलिस्तियन मिकमास मँ सिबिर डाएन। मिकमास बेतावेन क पूरब मँ बाटइ।

⁶ इस्राएलियन लखेन कि उ पचे विपत्ति मँ अहइँ। उ पचे आपन क जालि मँ अरझा पाएन। उ पचे गुफा अउ चट्टान क खोदंरे मँ छुप जाइ बरे परानेन। उ सबइ चट्टान, कुआँ अउ भुइयाँ क गड़हा मँ छुप गएन। ⁷ कछू हिब्रू यरदन नदी पार कइके गाद अउ गिलाद प्रदेस मँ पराइ गएन। साऊल गिलगाल मँ रहा। ओकरी फउज क सबइ फउजी सिपाहियन डर स थरथरात रहेन।

⁸ समूएल कहेस कि उ साऊल स गिलगाल मँ मिली। साऊल हुवाँ सात दिनाँ तलक ओकर प्रतीच्छा किहस। मुला समूएल तब भी गिलगाल नाहीं पहोंचा। सिपाहियन साऊल क तजि देइ लागेन। ⁹ ऍह बरे साऊल कहेस, “मोरे बरे होमबलि अउ मेलबलि लइ आवा।” तब साऊल होमबलि चढ़ाएस। ¹⁰ जइसन साऊल बलि-भेंट चढ़ाउब खतम किहेस, समूएल आइ गवा। साऊल ओसे भेंटइ गवा।

¹¹ समूएल पूछेस, “इ तू का कइ दिहे अहा?”

साऊल जवाब दिहेस, “मइँ सिपाहिन क आपन क तजत लखा अउर तू तब तलक हियाँ नाहीं रह्या, अउर पलिस्ती मिकमास मँ ऍकट्ठा होत रहेन। ¹² मइँ आपन मने मँ सोचेउँ, ‘पलिस्ती हियाँ गिलगाल मँ आइके मोह प हमला करिहीं। अउर मइँ अबहुँ तलक यहोवा स मदद करइ बरे बिनती नाहीं किहेउँ ह। ऍह बरे मइँ आपन क दबाइ दिहेउँ अउ होमबलि चढ़ाएउँ।’”

¹³ समूएल कहेस, “तू मूरख क काम किहे ह। तू आपन परमेस्सर यहोवा क हुकुम क नाहीं मान्या। जदि तू परमेस्सर क हुकुम क माने होत्या तउ परमेस्सर तोहरे परिवार क सदा इस्राएल प राज करइ देत। ¹⁴ मुला अब तोहार पहँटा लगातार नाही रहीं। यहोवा अइसे मनई क खोज मँ रहेन जउन ओकरे हुकुम क मानइ चाहत होइ। उ उ मनई क पाइ लिहेस ह अउर उ ओका आपन मनइयन क नवा प्रमुख चुनिहीं। तू सबइ यहोवा क हुकुम क मान्या नाहीं। ऍह बरे यहोवा नवा प्रमुख चुनिहीं।” ¹⁵ तब समूएल उठा अउर उ गिलगाल क तजि दिहेस।

मिकमास क जुद्ध

साऊल अउ ओकर बची भइ फउज गिलगाल क तजि दिहेस। उ पचे बिन्यामीन मँ गिबा क गएन। साऊल उ मनइयन क गनेस जउन ओकरे संग रहेन। हुवाँ करीब छ: सौ मनसेधू रहेन। ¹⁶ साऊल, ओकर पूत योनातान अउ फउजी बिन्यामीन मँ गिबा क गएन।

पलिस्तियन मिकमास मँ डेरा डाएन। ¹⁷ पलिस्तियन उ पहँटा मँ रहइवालन इस्राएलियन क सजा देइ क ठान लिहेन। ऍह बरे ओनकइ सबन्ते बरिआर फउज हमला करइ खातिर आपन ठउर तजि दिहेस। पलिस्ती फउज तीन हींसा मँ बँट गइ रहिन। एक टुकड़ी उत्तर मँ ओप्रा क जाइवाली सड़क स समूएल क पहँटा मँ गइ। ¹⁸ दूसर टुकड़ी दक्खिन पूरब बेथोरोन क जाइवाली सड़के प गइ। अउ तीसर टुकड़ी पूरब मँ चौहद्दी तलक जाइवाली सड़क स गइ। इ सड़क सबोईम क घाटी मँ रेगिस्तान कइँती खुलत रही।

¹⁹ इस्राएली मनइयन मँ स कउनो लोहा क सामान नाहीं बनाइ सकत रहा। ओन दिन इस्राएल मँ लोहार नाहीं रहेन। पलिस्ती इस्राएलियन क लोहा क सामान बनवइ नाहीं सिखात रहेन काहेकि पलिस्ती डेरात रहेन कि इस्राएलियन कहूँ लोहा क तरवार अउ भाला न बनावइ लग जाइँ। ²⁰ सिरिफ पलिस्ती लोहा क औजारे प धार चढ़ाइ सकत रहेन। ऍह बरे जदि इस्राएली आपन हरे क फार कुदार अउ कुल्हाड़ी या दराती प धार चढ़ावइ चाहतेन तउ ओनका पलिस्तियन क लगे जाइ क पड़त रहा ²¹ पलिस्ती लुहार एक तिहाइ औसे चाँदी क हरे क फार अउ कुदाल पइ धार चढ़ावइ बरे लेत रहेन। अउर एक छटा औंस चाँदी क फरुआ, कुल्हड़ी अउ बैल क साँटी क लोहा क सिरे प धार चढ़ावइ बरे लेत रहेन। ²² ऍह बरे जुद्ध क दिन इस्राएलियन फउजी मँ स कउनो क लगे लोहा क तरवार या भाला नाहीं रहा। सिरिफ साऊल अउ ओकर पूत योनातान क लगे लोहा क औजार रहेन।

²³ पलिस्ती सिपाहियन क एक ठु टुकड़ी मिकमास क दर्रा क रच्छा करत रही।

योनातान पलिस्तियन प हमला करत रहेन

14 उ दिना, साऊल क पूत उ नउजवान स बात किहेस जउन ओकरे औजारन क लइके चलत रहा। योनातान कहेस, “हम पचे घाटी क दुसरी कइँती पलिस्तियन क डेरा प चली।” मुला योनातान आपन बाप क नाहीं बताएस।

² साऊल एक अनार क पेड़ क नीचे पहाड़ी क सिरे प मिग्रोन मँ बइठा रहा। इ एक ठउर प खरिहान क नगिचे रहा। साऊल क संग उ समइ 600 जोधा रहेन। ³ एक मनई क नाउँ अहिय्याह रहा। एली सीलो मँ यहोवा क याजक रहा। अब अहिय्या याजक रहा। अहिय्या अब एपोद याजक रहा। अहिय्या ईकाबोद क भाई अहीतूब क पूत रहा।

ईकाबोद पीनहास क पूत रहा। पीनहास एली क पूत रहा। ⁴ दर्रा क दुइनउँ कइँती एक ठु बड़की चट्टान रही। योनातान पलिस्ती डेरा मँ उ दर्रा स जाइ क तजबीजेस। बड़की चट्टान क एक कइँती बोजज रहा अउर उ बड़की चट्टान क दूसर कइँती सेने रहा। ⁵ एक बड़की चट्टान उत्तर क मिकमास क देखत भइ ठाड़ रही। दूसर बड़की चट्टान दक्खिन कइँती गीबा क अउर लखत स ठाड़ रही।

⁶ योनातान आपन उ जवान मददगार स कहेस जउन ओकरे औजार क ढोइ के चलत रहा, “आवा, हम ओन बिदेसियन क डेरा मँ चली। इ होइ सकत ह यहोवा हम मनइयन क बइपरइ इ मनइयन क हरावइ मँ करइँ। यहोवा क कछू भी नाहीं रोक सकत ऍहसे कउनो फर्क नाहीं पड़त कि हमरे लगे ढेरि फउजी अहइँ कि तनिक फउजी।”

⁷ योनातान क अउजार ढोवइया जवान ओसे कहेस, “जेका तू सब स नीक समझा, करा। मइँ हर कइँती स तोहरे संग हउँ।”

⁸ योनातान कहेस, “हम सबइ क चलि द्या! हम पचे घाटी पार करब अउर ओन पलिस्ती रच्छक तलक जाबइ। तबहीं हम सबइ ओनका आपन क लखइ देब। ⁹ जदि उ पचे हम स कहत हीं, ‘तू हुवँइ रुकि जा जब तलक हम तोहरे लगे आवत अही।’ तउ हम पचे हुवँइ ठहरब जहाँ हम होब। हम ओनके नगिचे न जाब। ¹⁰ मुला अगर पलिस्ती लोग इ कहत हीं, ‘हमरे लगे आवा’ तउ हम ओनकइ लगे ताई चढ़ जाब। काहे? काहेकि इ परमेस्सर कइँती स इ एक इसारा होइ। ओकर अरथ इ होइ कि यहोवा हम पचन क ओनका हरावइ देइ।”

¹¹ ऍह बरे योनातान अउ ओकर सहायक आपन क पलिस्तियन स लखइ देइ दिहस। पलिस्ती रच्छक कहेन, “लखा, हिब्रू ओन बिलिन स निकरिके आवत बाटेन जेहमाँ उ सबइ लुकान रहेन।” ¹² किला क पलिस्ती योनातान अउ ओकरे सहायक बरे चिचिआइँ, “हमरे लगे आवा। हम तोहका अबहीं पाठ पढ़ावत अही।”

योनातान आपन सहायक स कहेस, “पहाड़ी क ऊपर तलक मोका पछिआवा। यहोवा इस्राएल बरे पलिस्तियन क दइ दिहे बाटइ!”

^13-14 ऍह बरे योनातान आपन हाथ अउ गोड़ क पहाड़ी प चढ़इ बरे बइपरेस। ओकर सहायक सोझ ओकरे पाछे चढ़ा। योनातान अउ ओकर सहायक पलिस्तियन क हराएन। पहिले हमला मँ उ पचे लगभग आधा एकड़ पहँटा मँ पलिस्तियन क मारेन। योनातान उ मनइयन स लड़ा जउन समन्वा स हमला बोलत रहेन। अउ योनातान क सहायक ओनकइ पाछे आवा अउ ओन मनइयन क मारत चला गवा जउन अबहीं सिरिफ चोटाइ होइ ग रहेन।

¹⁵ सबहिं पलिस्ती सिपाही जंग क मैदान मँ सिपाही अउ किला क सिपाही ससाइ गएन। हिआँ तलक कि सबन त बरिआर जोधा भी डेराइ गएन। धरती काँपइ लाग अउ पलिस्ती सिपाही भयानक तरीका स डेराइ गएन।

¹⁶ साऊल क रच्छक बिन्यामीन देस मँ गिबिया क पलिस्ती सिपाहियन क अलग-अलग दिसा मँ भागत परात लखेन। ¹⁷ साऊल आपन संग क सेना स कहेस, “सिपाहियन क गनती करा। मइँ इ जानइ चाहत हउँ कि डेरा क कउन छोड़ि दिहस।”

उ पचे सिपाहियन क गनेन। योनातान अउ ओकर सहायक चला ग रहेन।

¹⁸ साऊल अहिय्या स कहेस, “परमेस्सर क पवित्तर सन्दूख लइ आवा।” (उ टेमॅ परमेस्सर क पवित्तर सन्दूख इस्राएलियन क संग रही।) ¹⁹ साऊल याजक अहिय्या स बतियात रहा। साऊल परमेस्सर क परामर्स क जोहत रहा। मुला फिलिस्तीनी छावनी मँ सोर अउ धमाचउकड़ी लगातार बढ़त जात रही। साऊल धीरा खोइ चुका रहा। आखिर मँ साऊल याजक अहिय्या स कहेस, “बहोत होइ गवा। आपन हाथ नीचे हइँचा अउ पराथना करब बन्द करा।”

²⁰ साऊल आपन फउज क बटोरेस अउर लड़ाई मँ चला गवा। पलिस्ती सिपाही बहोत उलझन मँ रहेन। उ सबइ आपन तरवारे स आपुस मँ ही एक दूसर स जुद्ध करत रहेन। ²¹ हुवाँ हिब्रू भी रहेन जउन ऍकरे पहिले पलिस्तियन क सेवा मँ रहेन अउर जउन पलिस्ती डरा मँ रुका रहेन। मुला अब उ हिब्रू लोग साऊल अउ योनातान क संग क इस्राएलियन क साथ दिहेन। ²² उ इस्राएलियन जउन एप्रैम क पहाड़ी देस मँ लुकान रहेन, पलिस्ती सिपाहियन क पराइ क बात सुनेन। तउ इ इस्राएलियन भी जुद्ध मँ साथ दिहन अउ पलिस्तियन क पाछा करब सुरु किहेन।

²³ इ तरह यहोवा उहइ दिन इस्राएलियन क बचाव किहेन। जुद्ध बेतावेन क बाहेर फैलि गवा। सारी फउज साऊल क संग रही, ओनकइ लगे लगभग दस हजार मनईयन रहेन। एप्रैम क पहाड़ी पहँटा क हर सहर मँ जुद्ध फइलत गवा।^[a]

साऊल दूसर गल्ती करत ह

²⁴ उ दिना साऊल एक भारी गल्ती किहेस।^[b] इस्राएलियन भुखान अउ थका माँदा रहेन। इ ऍह बरे भवा कि साऊल मनइयन क प्रण करइ क मजबूर किहेस। साऊल कहेस, “अगर कउनो मनई साँझ होइ स पहिले खइया क खात ह या मोरे जरिया दुस्मन क हरावइ क पहिले खाइया क खात ह तउ उ मनई क सजा दीन्ह जाइ।” ऍह बरे कउनो भी इस्राएली सिपाही भोजन नाहीं किहेन।

^25-26 जुद्ध क कारण मनई जंगल मँ चला गएन। उ पचे हुआँ भुइँया प पड़ा भवा मधु क छत्ता लखेन। इस्राएली लोग उहइ ठउरे प आएन जहाँ मधु क छत्ता रहा। मनइयन भुखान रहेन, मुला उ पचे तनिक भी मधु नाहीं पिएन। उ पचे उ प्रण तोड़इ स डेरान रहेन। ²⁷ मुला योनातान उ प्रण क बारे मँ नाहीं जानत रहा। योनातान इ नाहीं सुने रहा कि ओकर बाप उ प्रण करइ क मनइयन क बेबस किहे रहा। योनातान क हाथे मँ एक टहरइ क छड़ी रही। उ मधु क छत्ता मँ ओकरे सिरा क घुसेड़ेस। उ तनिक मधु निकारेस अउ खाएस। अउर उ आपन क चंगा किहेस।

²⁸ सिपाहियन मँ स एक ठु योनातान स कहेस, “तोहार बाप एक खास प्रण करइ बरे सिपाहियन क मजबूर किहेस ह। तोहार बाप कहेस ह कि जउन कउनो आज खाइ, सजा पाइ। इहइ कारण रहा कि मनई कछू खाएन नाहीं। इहइ कारण अहइ कि मनई कमजोर अहइ।”

²⁹ योनातान कहेस, “मोर बाप धरती बरे परोसानी पइदा किहे अहइ। लखा इ तनिक मधु चाटे स मइँ केतना चंगा महसूस करत हउँ। ³⁰ बहोत नीक होत कि मनइयन उ खइया क खातेन जउन उ पचे आजु दुस्मनन स लिहे अहइँ। हम बहोत जिआदा पलिस्ती मनइयन क मारि सकित रहे।”

³¹ उ दिना इस्राएलियन पलिस्ती मनइयन क हराएन। उ पचे ओनसे मिकमास स अय्यालोन तलक क पूरा रस्ता प लड़ेन। काहेकी मनइयन बहोत भुखान अउ थका माँदा रहेन। ³² उ पचे पलिस्ती स भेड़ी, गाइ अउ बछवा लिहे रहेन, काहेकि अब इस्राएल क मनइयन ऍतना भुखान रहेन कि उ सबइ पसु क भुइँया प मारि डाएन अउ ओनका गोस रकत क साथ खाइ लिहेन।

³³ एक मनई साऊल स कहेस, “लखा! लोग यहोवा क खिलाफ पाप करत अहइँ। उ पचे अइसा गोस खात अहइँ जेहमाँ खून बा!”

तब साऊल कहेस, “तू पचे पाप किहे अहा। हिआँ एक ठु बड़का पाथर टहराइ क लिआवा।” ³⁴ तब साऊल कहेस, “मनइयन क लगे जा अउर कहा कि हर मनई आपन साँड़ अउ भेड़ी मोरे लगे हिआँ लिआवइ। तब्बहिं मनइयन क आपन साँड़ अउ भेड़ी हिआँ मारइ चाही। यहोवा क खिलाफ पाप जिन करा। उ गोस क जिन खा जेहमाँ रकत बा।”

उ राति मँ हर मनई आपन गोरु क लइ आवा अउ ओनका हुवाँ मारेस, ³⁵ फिन साऊल एक ठु वेदी बनएस। साऊल यहोवा बरे खुद इ वेदी बनउब सुरु किहेस।

³⁶ साऊल कहेस, “हम पचे आजु रात क पलिस्तियन क पाछा करब। हम सबइ हर चीज क लइ लेब। हम ओन सब क मारि डाउब।”

फउज जवाब दिहेस, “वइसा ही करा जइसा ठीक समुझत ह।”

मुला याजक कहेस, “हमका परमेस्सर स पूछइ द्या।”

³⁷ ऍह बरे साऊल परमेस्सर स पूछेस, “का मोका पलिस्तियन क पाछा करइ चाही? का आप लोग हम पचन क पलिस्तियन क हरावइ देइहीं?” मुला परमेस्सर साऊल क उ दिन जवाब नाहीं दिहेस।

³⁸ ऍह बरे साऊल कहेस, “मोरे लगे सबहिं प्रमुखन क लइ आवा। हम सबइ मालूम करी कि आज कउन पाप किहेस ह। ³⁹ मइँ इस्राएल क रच्छा करइवाला यहोवा क किरिया खाइके इ प्रण करत हउँ। जदि मोर आपन पूत योनातान भी पाप किहेस ह तउ उ जरुर मरी।” फउज मँ कउनो भी कछू नाहीं कहेस।

⁴⁰ तब साऊल सबहिं इस्राएलियन स कहेस, “आप लोग इ कइँती खड़ा ह्वा। मइँ अउर मोर पूत योनातान दूसर कइँती खड़ा होइहीं।”

सिपाहियन जवाब दिहेन, “महाराज, आप जइसा चाहइँ।”

⁴¹ तब साऊल पराथना किहेस, “इस्राएल क परमेस्सर यहोवा मइँ आपका सेवक हउँ आजु आप मोका जवाब काहे नाहीं देत अहइँ? अगर मइँ या मोर पूत योनातान पाप किहेस ह तउ इस्राएल क परमेस्सर यहोवा आप उरीम देइँ। अउर जदि आप क मनई इस्राएलियन पाप किहेन ह तउ तुम्मिम देइँ।”

साऊल अउ योनातान चुनि लीन्ह गएन अउ मनइयन अजाद होइ गएन। ⁴² साऊल कहेस, “ओनका फिन स लोकाइ द्या कि कउन पाप करइवाला अहइ मइँ या मोर पूत योनातान।” योनातान चुनि लीन्ह गवा।

⁴³ साऊल योनातान स कहेस, “मोका बतावा कि तू का किहे अहा?”

योनातान साऊल स कहेस, “मइँ आपन कुबरी क नोंक स सिरिफ तनिक मधु चाटे रहे। का मोका उ करइ क कारण मरइ चाही?”

⁴⁴ साऊल कहेस, “जदि मइँ आपन प्रण पूर नाहीं करत हउँ तउ परमेस्सर मोरे बरे बहोत खराब करइ। योनातान क मरइ चाही।”

⁴⁵ मुला सिपाहियन साऊल स कहेन, “योनातान आज इस्राएल क बड़की जीत ताई पहोंचाएस। का योनातान क मरइ ही चाही? कबहुँ नाहीं। हम पचे परमेस्सर क किरिया खाइके बचन देइत ह कि योनातान क एक ठु बार भी बाँका नाहीं होइ। परमेस्सर आज पलिस्तियन क खिलाफ लड़इ मँ योनातान क मदद किहेस ह।” इ तरह मनइयन योनातान क बचाएस। ओका फाँसी क सजा नाहीं दिन्ह गइ।

⁴⁶ साऊल पलिस्तियन क पाछा नाहीं किहेस। पलिस्ती आपन ठउर क लौटि गएन।

साऊल क इस्राएल क दुस्मनन स जुद्ध

⁴⁷ साऊल इस्राएल प पूरा कब्जा कइ लिहेस अउ देखाइ दिहस कि उ राजा अहइ। साऊल इस्राएल क चारिहुँ कइँती रहइवालन दुस्मनन स लड़ा। साऊल अम्मोनी राजा मोआबी, सोबा क राजा एदोम, अउ पलिस्तियन स लड़ा। जहाँ कहूँ साऊल गवा, उ इस्राएल क दुस्मनन क हराइ दिहस। ⁴⁸ साऊल बहोतइ बहादुर रहा। साऊल अमालेकियन क हराई अउर इस्राएलियन क ओकरे ओन दुस्मनन स बचाएस जउन इस्राएल क मनइयन स ओकर धन-दौलत छोरइ चाहत रहेन।

⁴⁹ साऊल क पूत रहेन योनातान, यिसवी अउ मलकीस। साऊल क बड़की बिटिया क नाउँ मेरब रहा। साऊल क ननकी बिटिया क नाउँ मीकल रहा। ⁵⁰ साऊल क मेहरारु क नाउँ अहीनोअम रहा। अहीनोअम अहीमास क बिटिया रही।

साऊल क फउज क सेनापति क नाउँ अब्नेर रहा, जउन नेर क पूत रहा। नेर साऊल क काका रहा। ⁵¹ साऊल क बाप कीस अउ अब्नेर क बाप नेर, अबीएल क पूत रहेन।

⁵² साऊल आपन जिन्नगी भइ बीर बना रहा अउ पलिस्तियन क खिलाफ बहादुरी स लड़ा। साऊल जब भी कबहुँ कउनो मनई क अइसा बहादुर लखत जउन ताकतवर होत तउ उ ओका लइ लेत अउर ओका उ फौजियन क टुकड़ी मँ धरत जउन ओकरे निअरे रहतेन अउर ओकर रच्छा करत रहेन।