Chronological

4 समूएल क बारे मँ खबर समूचइ इस्राएल मँ सँचर गइ। एली बहोत बुढ़ाइ गवा रहा। ओकर पूत यहोवा क समन्वा कुकरम करत रहेन।^[a]

पलिस्तियन इस्राएलियन क हराइ दिहेन

उ समइया इस्राएलियन पलिस्ती क खिलाफ जुद्ध बरे तइयार भएन। इस्राएलियन आपन डेरा एबेनेजर मँ डाएन। पलिस्तियन आपन डेरा अपेक मँ डाएन। ² पलिस्ती इस्राएल प हमला बोलइ बरे तइयार भएन। जुद्ध सुरु होइ गवा।

पिलिस्तियन इस्राएलियन क ओकर लगभग चार हजार मनइयन क जुद्‌ध क मइदान मँ मारि के ओका जुद्ध मँ हराएन। ³ इस्राएलियन क बाकी सिपाही आपन डेरा मँ लौटि आएन। इस्राएल क बुजुर्गन पूछेन, “यहोवा पिलिस्तियन स हमका काहे हराइ दिहेन ह? आवा हम पचे सीलो स यहोवा क करार क सन्दूख क लइ आई। इ तरह परमेस्सर हम पचन क संग जुद्ध मँ जइहीं। उ पचे हमरे दुस्मनन स हमार रच्छा करिहीं।”

⁴ ऍह बरे लोग दूतन स करूब सरगदूतन क सिंहासन पइ विराजमान सैनिकन क यहोवा क करार क सन्दूख लिवाइ बरे सीलो पठएन। एली क दुइनउँ बेटवन होप्नी अउ पीनहास सन्दूख क लइ आएन।

⁵ जबहिं यहोवा क करार क सन्दूख डेरा क भीतर आवा तउ सारे इस्राएली ऍतने जोर स गरजेन कि उ अवाज स धरती काँप उठी। ⁶ पलिस्तियन इस्राएलियन क गरजब सुनेन। उ पचे पूछेन, “हिब्रू मनइयन क डेरा मँ अइसा गरजब काहे अहइ?”

तब पलिस्तियन जानेन कि इस्राएल क डेरा मँ यहोवा क करार क सन्दूख आवा अहइ। ⁷ पलिस्ती डेराइ गएन। पलिस्तियन कहेन, “परमेस्सर ओनकइ डेरा मँ आइ ग अहइँ। हम सबइ विपत्ती मँ अही। अइसा पहिले कबहुँ नाहीं भवा। ⁸ हमका फिकिर अहइ कि इ बरिआर देवतन स हमका कउन बचाइ सकत ह? इ सबइ उहइ देवता अहइ जउन मिस्रियन क उ सबइ बेरामियन अउर महामारियन दिहे रहा। ⁹ पलिस्तिनियो, हिम्मत करा। बहादुरन क तरह लड़ा। पुराने जमाने मँ हिब्रू लोग हमार दास रहेन। ऍह बरे बहादुरन क नाई लड़ा नाहीं तउ तू पचे ओनकइ गुलाम होइ जाब्या।”

¹⁰ पलिस्ती बहोत बहादुरी स लड़ेन अउ उ पचे इस्राएलियन्क हराइ दिहेन। हर एक इस्राएली जोधा आपन डेरा मँ पराइ गवा। इस्राएल बरे खउफनाक हार रही। तीस हजार इस्राएली फौजी मारा गएन। ¹¹ पलिस्तियन ओनसे परमेस्सर क पवित्तर सन्दूख छीन लिहेस। अउर उ पचे एली क दुइनउँ बेटवन होप्नी अउ पीनहास क मार डाएन।

¹² उ दिना बिन्यामीन परिवार क एक मनई भी जुद्ध स परान रहा। उ आपन दुःख क परगट करइ बरे आपन ओढ़ना क फाड़ि डाएस अउ आपन मुँड़वा प धूरि दुःख परगट करइ बरे धइ लिहेस। ¹³ जब इ मनई सीलो पहुँचा तउ एली आपन कुर्सिया प नगर क दुआरे बइठा रहा। उ परमेस्सर क पवित्तर सन्दूख बरे परेसान रहा, ऍह बरे उ जोहत भवा बइठा रहा। तबहिं बिन्यामीन क एकउटे परिवार क एक मनई सीलो आवा अउ उ दुःखे क हाल बताएस। सहर क सब मनई जोर स रोवइ लागेन। ^14-15 एली अल्ठाननब्बे बरिस क बूढ़ा अउ आँधर रहा। उ इ नाहीं लखि सका कि का होत बा? मुला एली रोवइ क अवाज सुनेस तउ एली पूछेस, “इ जोर क सोर काहे होत अहइ?”

उ बिन्यामीन परिवारे क मनई एली क लगे दौड़िके गवा अउ जउन कछू भवा रहा ओका बताएस। ¹⁶ बिन्यामीन परिवार क मनई कहेस कि “मइँ आज जुद्ध स पराइ आएउँ ह।”

एली पूछेस, “बेटवा, का भवा?”

¹⁷ बिन्यामीन परिवार क मनई जवाब दिहेस, “इस्राएलियन पलिस्तियन क समन्वा पराइ गएन। इस्राएली फउज क ढेर सिपाही मारा गवा अहइँ। तोहार दुइनउँ पूत मारि डावा ग अहइँ। अउर पिलिस्ती परमेस्सर क पवित्तर सन्दूख छीन लिहेन ह।”

¹⁸ एली दुआरे क नगिचे आपन कुर्सिया स पाछे गिर परेस अउ ओकर गटइ टूटि गएन जब उ परमेस्सर क पवित्तर सन्दूख क बारे जानेस। एली बुढ़वा अउ मोट मनइ रहा अउ उ हालि मरि गवा। एली चालीस बरिस तलक इस्राएल क नेता रहा।

महिमा खतम भइ

¹⁹ एली क पतोहू क फिनहस क मेहरारु, उ दिना कोख भरी रही। बच्चा पइदा होइ क उ निचकान रही। जब उ इ खबर सुनेस कि परमेस्सर क पवित्तर सन्दूख छीन लइ ग अहइ। उ इहउ सुनेस कि ओकरे ससुर एली क मउत होइ ग अहइ अउ ओकर भतार फिनहस मारि डावा ग अहइ। जइसे ही उ इ खबर सुनेस ओकर कोख पिराय लाग। अउर उ बच्चा बेटवा क जन्मब सुरु किहेस। ²⁰ उ मरइवाली रही। नउकरानी कहेस, “दुःखी जिन होवा, तोहका एक ठु बेटवा जन्मी।”

मुला एली क पतोहू न तउ जवाब दिहेस अउर न ओह प धियान दिहेस। ²¹ उ आपन बचवा क नाउँ इकबाद राखेस काहेकी “इस्राएल क महिमा मटियामेट होइ गइ। परमेस्सर क पवित्तर सन्दूख चला गवा अउ ओकर ससुर अउ मनसेधू मरि गवा रहेन।” ²² उ कहेस, “इस्राएल क महिमा मिट गइ।” काहेकि पलिस्ती परमेस्सर क पवित्तर सन्दूख लइ गएन।

परमेस्सर क पवित्तर सन्दूख पलिस्ती क सतावत ह

5 पलिस्ती परमेस्सर क पवित्तर सन्दूख लिहे क पाछे, एबनेज़ेर स ओका उ पचे असदोद लइ गएन। ² पलिस्ती परमेस्सर क पवित्तर सन्दूख क दागोन क मन्दिर मँ लइ गएन। उ पचे परमेस्सर क पवित्तर सन्दूख क दागोन क बगल मँ धरेन। ³ दुसरे दिन भिन्सारे असदोद क मनइयन उठेन अउ लखेन कि दागोन मुँह क बल ओलरा बा।

दागोन यहोवा क सन्दूख क समन्वा गिरइ पड़ा। असदोद क मनइयन दागोन क मूरति क फुन हुवँइ खड़ा कइ दिहन। ⁴ मुला जब दुसरे दिन भिन्सारे असदोद क मनई उठेन तउ उ पचे दागोन क फुन जमीन प ओलरा पाएन। दागोन फुन यहोवा क पवित्तर सन्दूखे क समन्वा गिरइ पड़ा। दागोन क हाथ अउ गोड़ टूट गवा रहेन अउ चौखट प पड़ा रहेन। सिरिफ दागोन क देह एक खण्ड मँ रहा। ⁵ इहइ कारण बा कि आजु तलक दागोन क याजक या असदोद मँ दागोन क मन्दिर मँ घुसइवाला दूसर मनई ड्योढ़ी प चलइ स मना कइ देत ह।

⁶ यहोवा असदोद क मनइयन अउ ओनकइ पड़ोसियन क जिन्नगी दूभर कइ दिहन। यहोवा ओनका मुसीबत मँ डाइ दिहन। उ ओन सबन्क गिलटी दिहेस। यहोवा ओनके लगे मूस पठएस। मूस ओनकइ सबहिं जहाजे अउ भुइयाँ प दौड़त रहेन। सहर मँ सब मनइयन डेराइ गएन। ⁷ असदोद क मनइयन लखेन कि का होत अहइ। उ पचे कहेन, “इस्राएल क परमेस्सर क सन्दूख हिआँ नाहीं रहि सकत। परमेस्सर हमका अउ हमरे देवता दागोन क सजा देत बा।”

⁸ असदोद क मनइयन पलिस्ती सासकन क बोलाएन। असदोद क मनइयन राजा लोगन स पूछेन, “हम पचे पवित्तर सन्दूख क का करी?”

राजा लोगन जवाब दिहेन, “इस्राएल क परमेस्सर क पवित्तर सन्दूख क गथ लइ जा।” ऍह बरे पलिस्तियन परमेस्सर क पवित्तर सन्दूख क हटाइ दिहन।

⁹ मुला जब पलिस्ती परमेस्सर क पवित्तर सन्दूख क गथ क पठइ दिहन तब यहोवा उ सहर क सजा दिहेस। मनइयन बहोत डेराइ गएन। अउर परमेस्सर सहर क लोगन छोट स बड़ा सबइ क फड़ा-फुंसी क मसीबत मँ मुबतला कइ दिहेस। ¹⁰ ऍह बरे पलिस्ती परमेस्सर क पवित्तर सन्दूख क एक्रोन पठइ दिहेन।

मुला जब परमेस्सर क पवित्तर सन्दूख एक्रोन आवा, एक्रोन क मनइयन सिकाइत किहेन। उ पचे कहेन, “तू पचे इस्राएल क परमेस्सर क पवित्तर सन्दूख हमरे सहर एक्रोन मँ काहे लइ आवत ह? का तू पचे हमरे मनइयन क मारा चाहत ह?” ¹¹ एक्रोन क मनइयन सबहिं पलिस्ती राजा लोगन्क एक संग बोलाएस। एक्रोन क मनइयन राजा लोगन्स कहेन, “इस्राएल क परमेस्सर सन्दूख क, ओकरे पहिले कि उ हमका अउ हमरे मनइयन क मारि डावइ, एकरे पहिले क ठउर प पठइ द्या।”

एक्रोन क मनइयन बहोत डेराइ ग रहेन। परमेस्सर उ ठउर प ओनकइ जिन्नगी क बहोत दुःखमय बनइ दिहस। ¹² बहोत स मनई तउ मर बिलाइ गएन। अउर जउन लोग नाहीं मरेन ओनका गिलटी निकरि आइ। एक्रोन क मनइयन जोर स रोइके अकास दहलाएन।

परमेस्सर क पवित्तर सन्दूख घर लौटि आइ

6 पलिस्ती पवित्तर सन्दूख क आपन देस मँ सात महीना तलक धरेन। ² पलिस्तियन आपन याजक अउ जादूगरन्क बोलाएन। पलिस्तियन कहेन, “हम यहोवा क सन्दूखे क का करी? बतावा कि हम कइसे सन्दूखे क वापिस एकरे घरे पठइ।”

³ याजकन अउ जादूगरन जवाब दिहेन, “अगर तू पचे इस्राएल क परमेस्सर क पवित्तर सन्दूखे क पठवत ह तउ एकॉ बिना दोखबलि चढ़ाए जिन पठवा। तोहका इस्राएल क परमेस्सर क दोख बलि चढ़ावइ चाही, ताकि तू पचे चंगा होब। तोहका इ ऍह बरे करइ चाही कि जेहसे परमेस्सर तू सबन्क सजा देब बंद कइ देइ।”

⁴ पलिस्ती पूछेन, “हम पचन्क कउन स भेंट, आपन क छिमा करइ क इस्राएल क परमेस्सर क पठवइ चाही?”

याजक अउ जादूगरन कहेन, “हिआँ पाँच पलिस्ती प्रमुख अहइँ। हर एक सहर क एक प्रमुख बा। तू सब मनइयन अउ तोहरे प्रमुखन क एक समस्या अहइ। ऍह बरे तोहका पाँच सोना क अइसा नमूना जउन पाँच गिल्टियन क तरह होइँ देखावइ बरे बनवइ चाही। अउर पाँच नमूना मूसे क तरह देखावइ बरे बनवइ चाही। ⁵ इ तरह गिल्टी अउर मूसे क नमूना बनावा जउन देस क मटियामेट करत अहइँ। इस्राएल क परमेस्सर क इ सोना क नमूना अदा करइ क रुप मँ दइ द्या। तब इ होइ सकत ह कि इस्राएल क परमेस्सर तोहका, तोहरे देवतन क अउर तोहरे देस क सजा देब रोक देइँ। ⁶ फिरौन अउ मिस्री मनइयन क तरह जिद्दी न बना। परमेस्सर मिस्री मनइयन क सजा दिहेस। इहइ कारण रहा कि मिस्री मनइयन इस्राएलियन क मिस्र तजि देइ दिहेन।

⁷ “तोहका एक नई बंद गाड़ी बनवइ चाही अउर दुइ गाइ जउन बछवा जन्मे होइँ लइ आवइ चाही। इ गइयन अइसी होइ चाही जउन खेते मँ न जोती गइ होइँ। गइयन क बन्द गाड़ी मँ जोत द्या अउ बछवन क घरे लौटाइ द्या। बछवन क गउसाला मँ राखा। ओनकइ आपन महतारी क पाछे न जाइ द्या। ⁸ यहोवा क पवित्तर सन्दूखे क बंद गाड़ी मँ धरा। तोहका सोना क नमूनन क पेटी मँ सन्दूख क बगल मँ राखइ चाही। सोना क नमूनन परमेस्सर बरे तोहार दोखबलि अहइ। बंद गाड़ी क सोझइ रस्ता प पठवा। ⁹ बंद गाड़ी क लखत रहा। जदि बंद गाड़ी बेतसेमेस कइँती इस्राएल क भुइयाँ मँ जात ह तउ इ संकेत अहइ कि ओकर परमेस्सर हम पचन्क इ बड़का रोग दिहे अहइँ। मुला जदि इ गइयन बेतसेमेस क नाहीं जातिन तउ हम पचे समझब कि इस्राएल क परमेस्सर हमका सजा नाहीं दिहे अहइ। हम समझ जाब कि हमार बेरामी खुद होइ गइ।”

¹⁰ पलिस्तियन उहइ किहेन जउन याजक अउ जादूगरन कहेन। पलिस्तियन वइसी दुइ गइया लिहेन जउन हाली ही बछवा दिहे रहिन। पलिस्तियन गइयन क बंद गाड़ी स जोड़ दिहन। पलिस्तियन बछवन क घरे प गउसाला मँ राखेन। ¹¹ तब पलिस्तियन यहोवा क पवित्तर सन्दूख क उ पेटी क साथ जे मँ सोना क मूस अउर फोड़ा क नमूना रहा बंद गाड़ी मँ धरेन। ¹² गइयन सोझइ बेतसेमेस क गइन। गइयन लगातार चोकड़त भइ सड़क पइ ही चलत रहिन। गइयन दाहिन बाऍ नाहीं मुड़िन। पलिस्ती राजा गइयन क पाछे बेतसेमेस क सहर क पहँटा तलक गएन।

¹³ बेतसेमेस क मनई घाटी मँ आपन गोहूँ क फसिल काटत रहेन। उ पचे निगाह उठाएन अउ पवित्तर सन्दूख क लखेन। उ पचे सन्दूखे क लखिके बहोत खुस भएन। उ सबइ ओका लेइ बरे दौड़ेन। ^14-15 बन्द गाड़ी उहइ खेत मँ आइ जउन बेतसेमेस क यहोसू क रहा। बन्द गाड़ी खेते मँ एक बहोत बड़की चट्टान क समन्वा रुक गइ। बेतसेमेस क मनइयन बन्द गाड़ी क काट दिहन। तब उ पचे गाइयन क मारि डाएन। उ पचे यहोवा बरे गइयन क बलि दिहन।

लेवि बंसी परिवार क मनइयन यहोवा क पवित्तर सन्दूखे क उतारेन। उ पचे उ पेटी क भी उतारेन जेहमा सोना क नमूना धरा रहेन। लेवीबंसियन परिवार क मनइयन यहोवा क सन्दूख अउ पेटी क बड़की चट्टान प धरेन। उहइ दिना, बेतसेमेस क लोगन यहोवा बरे बलि चढ़ाएन।

¹⁶ पाँचउ पलिस्ती राजा लोगन बेतसेमेस क मनइयन क इ सब करत लखेन। तबहिं उ पचे पाँचउ पलिस्ती राजा लोग उहइ दिना एक्रोन लौटि गएन।

¹⁷ इ तरह पलिस्तियन सोना क गिल्टियन क नमूना क दोखबलि क रूप मँ यहोवा क दिहस। उ पचे हर एक ठु पलिस्ती सहर बरे गिल्टी क एक सोना क नमूना पठएन। इ सबइ पलिस्ती सहर असदोद, अज्जा, असकालोन, गत अउ एक्रोन रहेन। ¹⁸ अउर पलिस्तियन सोना क मूसा क नमूना पठएन। सोना क मूसन क उहइ गनती रही, जउन पाँचउ पलिस्ती राजा लोगन्क सहर क रही। इ सहरन क चारिहुँ कइँती चहरदेवार रही। अउ हर सहर क चारिहुँ कइँती गाँव रहेन।

बेतसेमेस क मनइयन यहोवा क पवित्तर सन्दूख क चट्टान प धरेन। उ चट्टान आजु भी बेतसेमेस क जोसुआ क खेत मँ अहइ। ¹⁹ मुला जउन टेमॅ बेतसेमेस क मनइयन यहोवा क पवित्तर सन्दूख क लखेन, उ समइया हुआँ कउनो याजकन नाहीं रहा। ऍह बरे परमेस्सर बेतसेमेस क सत्तर मनइयन क मार डाएन। बेतसेमेस क मनइयन रोवइ लागेन काहेकि यहोवा ऍतनी कठोर सजा दिहेन। ²⁰ ऍह बरे बेतसेमेस क मनइयन कहेन, “याजक कहाँ अहइ जउन इ पवित्तर सन्दूख क देखरेख कइ सकइ? हिआँ स सन्दूख कहाँ जाइ?”

²¹ किर्यत्यारीम मँ एक याजक रहा। बेतसेमेस क मनइयन किर्यत्यारीम क मनइयन क लगे दूत पठएन। दूतन कहेन, “पलिस्तियन यहोवा क पवित्तर सन्दूख लौटाइ दिहन। आवा अउ ऍका आपन सहर मँ लइ आवा।”

7 किर्यत्यारीम क मनइयन आएन अउ यहोवा क पवित्तर सन्दूख क लइ गएन। उ पचे यहोवा क सन्दूख क पहाड़ी प अबीनादब क घर लइ गएन। उ पचे अबीनादब क बटवा एलीआज़ार क यहोवा क सन्दूखे क रच्छा करइ बरे नियुक्त किहेन। ² सन्दूख किर्यत्यारीम मँ बहोत समइ तलक धरा रहा। उ हुवाँ बीस बरिस तलक रहा।

यहोवा इस्राएलियन क रच्छा करत ह

इस्राएल क मनइयन यहोवा क कइँती लउटब सुरू किहेन। ³ समूएल इस्राएल क मनइयन स कहेस, “अगर तू फुरे यहोवा क नगिचे सच्चा मन स लौटत बाट्या तउ तोहका बिदेसी देवता लोगन्क बहाइ देइ चाही। तोहका अस्तोरेत क मूरत लोकाइ देइ चाही। अउ तोहका पूरी तरह यहोवा क अपने क न्यौछावर कइ देइ चाही। तोहका सिरिफ यहोवा क ही सेवा करइ चाही। तबहिं यहोवा तोहका पलिस्तियन स बचइहीं।”

⁴ ऍह बरे इस्राएलियन आपन बाल अउ अस्तोरेत क मूरत क लोकाइ दिहेन। इस्राएलियन सिरिफ यहोवा क सेवकाई करइ लागेन।

⁵ समूएल कहेस, “सबहिं इस्राएलियन मिस्पा मँ बटुर जाइँ। मइँ तोहरे बरे यहोवा स पराथना करब।”

⁶ इस्राएलियन मिस्पा मँ बटुर गएन। उ सबइ जल लइ आएन अउ यहोवा क समन्वा जल चढ़ाएन। इ तरह उ पचे उपवास क समइ सुरु किहेन। उ पचे उ दिन खइया क नाहीं खाएन, अउ आपन पापन्क कबूलेन। उ पचे कहेन, “हम पचे यहोवा क खिलाफ पाप किहे अही।” इ तरह समूएल मिस्पा मँ इस्राएल क जज क तरह काम किहेस।

⁷ पलिस्तियन इ सुनेन कि इस्राएलियन मिस्पा मँ बटुर ग अहइँ। पलिस्ती राजा इस्राएलियन क खिलाफ हमला करइ गएन। इस्राएलियन सुनेन कि पलिस्ती आवत अहइँ, अउर उ पचे डेराइ गएन। ⁸ इस्राएलियन समूएल स कहेन, “हमार परमेस्सर यहोवा क पराथना हमरे बरे करब बन्द जिन करा। यहोवा स माँगा कि उ पलिस्तियन स हमार रच्छा करइ।”

⁹ समूएल एक ठु मेमना लिहस। उ यहोवा बरे होमबलि क रुप मँ मेमना क बारेस। समूएल यहोवा स इस्राएल बरे पराथना किहेस अउर यहोवा ओका क जवाब दिहेस। ¹⁰ जब समूएल बलि क बारत रहा, पलिस्ती इस्राएल स लड़इ आएन। मुला यहोवा पलिस्तियन क नगिचे खूब जोर क गर्जब कराएस। ऍहसे पलिस्ती घबराइ गएन। अउ उ पचे गरजइ स ससाइ गएन। ओनकइ मुखिया ओनका बस मँ नाहीं कइ सकेन। इ तरह पलिस्तियन क इस्राएली जुद्ध मँ हराइ दिहेन। ¹¹ इस्राएल क मनइयन मिस्पा स बाहेर भागेन अउ पलिस्तियन क पाछा किहेन। उ पचे लगातार बेत कर तलक ओनकइ पाछा किहेन। उ सबइ रस्ता भइ पलिस्ती सिपाही क मार डाएन।

इस्राएल मँ सान्ति आइ गइ

¹² एकरे पाछे, समूएल एक खास पाथर खड़ा किहेस। उ ऍह बरे किहेस कि मनइयन याद राखइँ कि परमेस्सर का किहेस। समूएल पाथर क मिस्पा अउ सेन क बीच राखेस। समूएल पाथर क नाउँ “मदद क पाथर” धरेस। समूएल कहेस, “यहोवा लगातार पूरी राह भइ हमार मदद किहेस।”

¹³ पलिस्ती हार गएन। उ पचे इस्राएल देस मँ फुन नाहीं घुसेन। समूएल क बाकी जिन्नगी मँ यहोवा पलिस्तियन क खिलाफ रहेन। ¹⁴ पलिस्तियन एक्रोन स गथ तलक क पहँटा क सहर क लइ लिहे रहेन। मुला इस्राएली ओनका जीतके फुन लइ लिहेन। अउर इस्राएली इ सहरन क चारिहुँ कइँती क भुइँया क भी फुन लइ लिहेन।

इस्राएल अउ अमोरियन क बीच भी सान्ति रही।

¹⁵ समूएल आपन पूरी जिन्नगी भइ इस्राएल क निआव करत रहेस। ¹⁶ समूएल एक ठउर स दूसर ठउर ताई इस्राएल क मनइयन क निआव करत गवा। हर बरिस उ देस क चारिहुँ कइँती जात्रा किहेस। उ बेथेल, गिलिगाल अउ मिस्पा क गवा। ऍह बरे उ इ सबहिं ठउरन मँ इस्राएली मनइयन निआव अउ ओन पइ राज किहेस। ¹⁷ मुला समूएल क घर रामा मँ रहा। ऍह बरे समूएल हमेसा रामा क लौट जात रहा। समूएल उहइ सहर स इस्राएल क निआव अउ राज किहेस। अउ समूएल रामा मँ यहोवा बरे एक वेदी बनाएन।

इस्राएल एक राजा क माँग करत ह

8 जब समूएल बुढ़ाइ गवा तउ उ आपन पूतन क इस्राएल क निआवाधिस बनाएस। ² समूएल क पहिलौटी क बेटवा योएल नाउ क रहा। ओकर दूसर पूत अबिय्याह नाउँ क रहा। योएल अउ अबिय्याह बेर्सबा मँ निआवाधिस रहेन। ³ मुला समूएल क पूत वइसे ही नाहीं रहत रहेन जइसे उ रहत रहा। योएल अउ अबिय्याह घूस लेत रहेन। उपचे चुप्पे स घूस लेतेन अउ अदालत मँ आपन निर्णय बदल देत रहेन। उ पचे अदालत मँ मनइयन क ठगत रहेन। ⁴ ऍह बरे इस्राएल क सबहिं बुजुर्गन मिलिके बटुर गएन। उ पचे समूएल स भेंटइ रामा गएन। ⁵ बुजुर्गन लोग समूएल स कहेन, “तू बुढ़ाइ गया, अउ तोहार पूत ठीक स नाहीं रहतेन। उ पचे तोहरे तरह नाहीं अहइँ। अब तू दूसर रास्ट्र क तरह हम सबन प राज करइ बरे एक राजा द्या।”

⁶ इ तरह बुजुर्गन अपने क राह देखावइ बरे एक राजा मांगेन। समूएल सोचेस कि इ बिचार बुरा अहइ। ऍह बरे समूएल यहोवा क पराथना किहेस। ⁷ यहोवा समूएल स कहेस, “उहइ करा जउन लोग तोहसे करइ क कहत हीं। उ पचे तोहका अस्वीकार नाहीं करत हीं। उ पचे मोका आपन राजा बनावन बरे अस्वीकार करत हीं। ⁸ उ पचे उहइ करत अहइँ जउन हमेसा करत रहेन। मइँ ओन सबन्क मिस्र स बाहेर लइ आएउँ। मुला उ पचे मोका तजि दिहेन, अउर दूसर देवतन क पूजेन। उ पचे तोहरे संग भी वइसा करत अहइँ। ⁹ ऍह बरे मनइयन क सुना अउर जउन उ पचे कहइँ करा। मुला ओनका चिताउनी द्या। ओनका बतावा कि राजा ओनकइ संग का करी। ओनकइ बताना कि एक राजा मनइयन प कइसे राज करत ह।”

¹⁰ उ पचे एक राजा बरे माँग किहेन। ऍह बरे समूएल मनइयन स उ सबइ बात किहेन जउन यहोवा कहे रहेन। ¹¹ समूएल कहेस, “अगर तू आपन पइ राज करइ वाला राजा राखत बाट्या तउ उ इ करी। उ तोहरे बेटवन क लइ लेइ। उ तोहरे बेटवन क सेवा बरे मजबूर करी। उ ओन पचन्क सिपाही बनवइ बरे मजबूर करी, ओन पचन्क ओकरे रथे स लड़इ क पड़ी अउर उ पचे ओकरी फउज क घोड़सवार होइहीं। तोहार पूत राजा क रथे क आगे धावइवाला रच्छक बनिहीं।

¹² “राजा तोहरे पूतन्क फौजी बनइ बरे मजबूर करी। ओहमाँ स कछू एक हजार मनई क ऊपर अफसर होइहीं। अउर दूसर, पचास मनई क ऊपर अफसर होइहीं।

“राजा तोहरे पूतन मँ स कछू क आपन खेत जोतइ क अउर फसिल काटइ क मजबूर करी। उ ओनका आपन रथे क सामान बनवइ बरे मजबूर करी।

¹³ “एक राजा तोहरी बिटियन क लइ लेइ। उ तोहरी बिटियन मँ स कछू क आपन बरे महकउआ चीज बनवइ क मजबूर करी। अउर उ तोहरी बिटियन मँ स कछू क पकावइ अउ रोटी सेकइ क मजबूर करी।

¹⁴ “राजा तोहार सब स बढ़िया खेत, अंगूर क बाग अउर जैतून क बाग लइ लेई। उ ओन चीजन्क तोहसे लइ लेई अउर आपन अफसरन्क दइ देई। ¹⁵ उ तोहार अन्न अउ अंगूर क दसवाँ हींसा लइ लेइ। उ इन चीजन्क आपन नउकरन अउ अफसरन्क दइ देइ।

¹⁶ “इ राजा तोहरे मनसेधू नउकरन अउ नउकरनियन क लइ लेइ। उ तोहार सबन त बढ़िया गोरु अउ गधा क लइ लेइ। उ ओनकइ आपन कामे बरे बइपरी। ¹⁷ उ तोहरे भेड़ी अउ बोकरी क दसवाँ हींसा लेई।

“अउर तू खुद इ राजा क दास होब्या। ¹⁸ जब उ टेमॅ आई तब तू राजा क चुनइ क कारण रोउब्या। मुला उ टेमॅ यहोवा तू पचन्क जवाब न देइहीं।”

¹⁹ मुला लोगन समूएल क अनसुनि किहेन। उ पचे कहेन, “नाहीं! हम पचे आपन ऊपर राज करइ बरे एक ठु राजा चाहित ही। ²⁰ तब हम पचे दूसर रास्ट्रन क जइसा होइ जाब। हमार राजा हम पचन्क रास्ता देखाँई। उ हम पचन्क संग जाइ अउर हमरे जुद्धन क लड़ी।”

²¹ समूएल जब मनइयन क सब कछू कहा भवा सुनेस तबहिं उ यहोवा क समन्वा ओनकइ कहब क दोहराएस। ²² यहोवा उत्तर दिहेस, “ओनकइ बात सुना। ओनका एक राजा द्या।”

तबहिं समूएल इस्राएल क मनइयन स कहेस, “ठीक बा! तोहार एक नवा राजा होइ। अबहिं आप सब लोग घरे जाइँ।”