Chronological

सिमोन बरे प्रदेस

19 सिमोन क परिवार बरे दूसर पाँसा डावा गवा रहा। जउन ओनका मिली, यहूदा क अधिकार-छेत्र क भीतर रही। ² इ उ भुइँया क विवरण रही जउन ओनका मिली: बेर्सबा जउन सेबा भी कहलावत ह। मोलादा, ³ हसर्सूआल, बाला, एसेम, ⁴ एलन्तोलद, बतूल, होर्मा, ⁵ सिक्लग, बेत्मर्काबोत, हसर्सूसा, ⁶ बेतलबाओत अउ सारुहने, इ सबइ तेरह सहर अउर ओनकर सारा खेत सिमोन क रहेन।

⁷ ओनका ऐन, रिम्मोन, एतेर अउ आसान सहर भी एकर खेतन क साथ पाए रहेन। ⁸ उ पचे उ सबइ सारा खेत सहरन क साथे पाएन जउन बालत्बेर तलक फइला रहेन। (इ नेगव छेत्र मँ रामा ही अहइ।) इ तरह इ उ प्रदेस रहा, जउन सिमोनी लोगन क परिवार समूह क दीन्ह गवा। हर एक इ भुइँया क पाएस। ⁹ सिमोनी लोगन क भुइँया यहूदा क प्रदेस क भाग स लीन्ह गइ रही। यहूदा क लगे ओनँ लोगन क जरुरत स जियादा भुइँया रही। ऍह बरे सिमोनी लोगन क ओनकी भुइँया क हींसा मिला।

जबूलूनी बरे प्रदेस

¹⁰ जबूलून क परिवार समूह अउर ओकरे कबीलन बरे तीसर पाँसा डावा गवा रहा। जबूलून क प्रदेस सारीद तलक जात रही। ¹¹ फिन उ पच्छिम मँ दब्बेसेत स होत भइ मरला क छेत्र क निचके तलक पहोंचत रहा। तब इ चउहद्दी संकरी घाटी स होत भए योकनाम क छेत्र तलक जात रही। ¹² तब इ चउहद्दी पूरब कइँती मुड़ी रही। इ सारीद स किसलोत्ताबोर क छेत्र तलक पहोंचत रही। तब इ चउहद्दी दाबरत अउ यापी तलक चलत गइ रही। ¹³ तब चउहद्दी पूरब मँ गथेपेर अउर इत्कासीन तलक लगातार रही। इ चउहद्दी रिम्मोन पइ खतम भइ। तब चउहद्दी मुड़ी अउर नेआ तलक गइ। ¹⁴ नेआ पइ फिन चउहद्दी मुड़ी अउ उत्तर कइँती गइ। इ चउहद्दी हन्नातोन तलक पहोंची अउर लगातार यिप्तहेल क घाटी तलक गइ। ¹⁵ इ चउहद्दी क भीतर कत्तात, नहलाल, सिम्रोन यिदला अउर बेतलेहेम सहर रहेन। सब मिलाइके इ सबइ बारह सहर आपन खेतन क साथे रहेन।

¹⁶ ऍह बरे इ सबइ सहर अउ छेत्र अहइँ जउन जबूलून क कबीलन क दीन्ह गएन।

इस्साकार बरे प्रदेस

¹⁷ चउथा पाँसा इस्साकार क परिवार समूह क कबिलन बरे डावा गवा रहा। ¹⁸ उ परिवार समूह क जउन भुइँया दीन्ह गइ रही उ इ अहइ: यिज्रेल, कसुल्लोत, सूनेम ¹⁹ हपारैम, सीओन, अनाहरत, ²⁰ रब्बीत, किस्योन, एबेस, ²¹ रेमेत, एनगन्नीम, एन हददा अउर बेतपस्सेस।

²² ओनकर प्रदेस क चउहद्दी ताबोरसहसूसा अउर बेतसेमेस क छुअत रही। इ चउहद्दी यरदन छेत्र पइ खतम होत रही। सब मिलाइके सोहाह सहर अउर ओनकर खेत रहेन। ²³ इ सबइ सहर अउर कस्बा इस्साकार परिवार समूह अउर ओनकइ कबीलन क दीन्ह गएन प्रदेस क हींसा रहेन।

आसेर बरे प्रदेस

²⁴ पाँचवाँ पाँसा आसेर क परिवार समूह अउर ओनकइ कबीलन बरे डावा गवा रहेन। ²⁵ उ परिवार समूह क जउन भुइँया दीन्ह गइ उ इ अहइ: हेल्कत, हली, बेतेन, अच्छाप, ²⁶ अलाम्मेल्लेक, अमाद अउ मिसाल।

पच्छिमी चउहद्दी लगातार कर्मेल पहाड़ अउ सीहोलिब्नात तलक रही। ²⁷ तब चउहद्दी पूरब कइँती मुड़ी। इ चउहद्दी बेतदागोन तलक गइ। इ चउहद्दी जबूलून अउ यिप्तहेल क घाटी क छुअत रही। तब इ चउहद्दी बेतेमेक अउ नीएल क उत्तर क गइ। इ चउहद्दी काबुल क उत्तर स गइ रही। ²⁸ तब इ चउहद्दी एब्रोन, रहोब अउर हम्मोन होत भइ काना तलक गइ रही। इ प्रदेस लगातार एक सक्तीसाली सहर सिदोन तलक गइ रही। ²⁹ इ चउह्ददी रामा कइँती मुड़ी अउर फुन किलाबन्द सहर सूर तलक गइ। तब फुन मुड़ी अउर होसा तलक गइ। इ चउहद्दी अकज़ीब, ³⁰ उम्मा, अपेक अउर रहोब क छेत्र मँ समुद्दर पइ खतम होत रही।

सब मिलाइके हुआँ बाईस सहर अउ ओनकर खेत रहेन। ³¹ इ सबइ सहर अउ ओनके खेत आसेर परिवार समूह क दीन्ह गए भुइँया क हींसा रहेन। उ परिवार समूह क हर एक कबिला इ भुइँया क कछू हींसा पाएस।

नप्ताली बरे प्रदेस

³² छठा पाँसा नप्ताली क परिवार समूह अउर ओनकर कबीलन बरे डावा गवा रहेन। ³³ ओनकर प्रदेस क चउहद्दी सानन्नीम क छेत्र मँ बिसाल बृच्छ स सुरू भइ। इ हेलेप क निअरे रहा। तब इ चउहद्दी अदानीमेकेब अउ यब्नेल स होइके गइ। इ चउहद्दी लक्कूम पइ खतम भइ। ³⁴ तब इ चउहद्दी पच्छिम क अजनोत्ताबोर होइके गइ। इ चउहद्दी हुक्कोक पइ खतम भइ। इ चउहद्दी दक्खिन क जबूलून छेत्र तलक गइ। इ चउहद्दी पच्छिम मँ आसेर क छेत्र तलक पहोंचत रही। इ चउहद्दी पूरब मँ यरदन नदी पइ यहूदा क जात रही। ³⁵ इ चउहद्दी क भीतर कछू बहोत सक्तीसाली सहर रहेन। इ सबइ सहर सिद्दीम, सेर, हम्मत, रक्कत, किन्नेरेत, ³⁶ अदामा, रामा, हासोर, ³⁷ केदेस, एद्रेइ, अन्हासेर, ³⁸ यिरोन, मिगदलेल, होरेम, बेतनात अउ बेतसेमेस रहेन, सब मिलाइके हुआँ उन्नीस सहर अउर ओनकर खेत रहेन।

³⁹ इ सबइ सहर अउर ओनकर चारिहुँ कइँती क कस्बन उ प्रदेस क हींसा रहेन, जउन नप्ताली क परिवार समूह क ओनकइ कबीलन क अनुसार दीन्ह ग रहेन।

दान बरे प्रदेस

⁴⁰ तब सताएँ पाँसा दान क परिवार समूह अउर ओनकर कबीलन बरे डावा गवा रहेन। ⁴¹ ओनका जउन कछू प्रदेस दीन्ह गवा उ इ अहइ: सोरा, एस्ताओल, ईरसेमेस, ⁴² सालब्बीन, अय्यालोन, यितला, ⁴³ एलोन, तिम्ना, एकोन, ⁴⁴ एलतके, गिब्बतोन, बालात, ⁴⁵ यहूद, बेनेबराक, गत्रिम्मोन, ⁴⁶ मेयर्कोन, रक्कोन अउ यापो क निचके क छेत्र।

⁴⁷ मुला दान क लोगन क आपन प्रदेस लेइ मँ परेसानी उठावइ क पड़ी। हुआँ सक्तीवाला दुस्मन रहेन अउर दान क लोग ओनका आसानी स हराइ नाहीं सकत रहेन। ऍह बरे दान क लोग गएन अउर लेसेम क खिलाफ लड़ेन। उ पचे लेसेम क हराएन अउ जउन लोग हुआँ रहत रहेन, ओनका मार डाएन। ऍह बरे दान क लोग लेसेम सहर मँ रहेन। उ पचे ओकर नाउँ बदलिके दान कइ दिहन काहेकि इ नाउँ ओनके परिवार समूह क पुरखा क रहा। ⁴⁸ इ सबइ सबहिं सहरन अउर खेत उ भुइँया मँ रहेन जउन दान क परिवार समूह क ओनकर कबीलन क अनुसार दीन्ह ग रहेन।

यहोसू बरे प्रदेस

⁴⁹ इ तरह प्रदेसन क बँटवारा करब अउर अलग-अलग परिवार समूहन क ओनका देब पूरा किहन। तब इस्राएल क सब लोग नून क पूत यहोसू क भी कछू प्रदेस देइ क निहचय किहन। ⁵⁰ यहोवा हुकुम दिहस कि ओका उ भुइँया मिलइ। ऍह बरे उ पचे एप्रैम क पहाड़ी प्रदेस मँ यहोसू क विम्नत्सेरह सहर दिहन। इहइ उ सहर रहा, जेकरे बरे यहोसू कहे रहा कि मइँ ओका चाहत हउँ। यहोसू उ सहर क फुन: बनाएस अउर उ ओहमाँ रहइ लाग।

⁵¹ इ तरह इ सबइ प्रदेस इस्राएल क अलग-अलग परिवार समूहन क दीन्ह गएन। याजक एलीआजार, नून क पूत यहोसू अउ हर एक परिवार समूह क नेता लोग सिलोह मँ मिलापवाला तम्बू क दुआर पइ यहोवा क मौजूदगी मँ बटुरा रहेन। इ तरह उ पचे प्रदेस क बँटवारा पूरा कइ लिहन।

सुरच्छा क सहर

20 तब यहोवा यहोसू स कहेस: ² “मइँ मूसा क उपयोग तू लोगन क हुकुम देइ बरे किहेउँ ह। मूसा तू लोगन स सुरच्छा क विसेस सहर बनवइ बरे कहे रहा। तउ सुरच्छा बरे ओन सहरन क चुनाव करा। ³ अगर कउनो मनई कउनो मनई क मार डावत ह, मुला अइसा संजोग क कारण होत ह अउर ओकर इरादा ओका मार डावइ क नाहीं होत तउ उ मरे मनई क ओन रिस्तेदारन स जउन बदला लेइ बरे ओका मारि डावइ चाहत हीं, आत्मरच्छा बरे सुरच्छा नगर मँ सरण लइ सकत ह।

⁴ “उ मनई क इ करइ चाही। जब उ पराइ अउर ओन सहरन मँ कउनो एक मँ पहोंचइ तउ ओकर सहर दुआर पइ रुकइ चाही। ओका सहर दुआरे पइ खड़ा रहइ चाही अउर नगर प्रमुखन क बतावइ चाही कि का घटा अहइ। तब नगर प्रमुख ओका सहर मँ प्रवेस करइ दइ सकत हीं। उ सबइ ओका आपन बीच मँ रहइ क जगहिया देइहीं। ⁵ मुला उ मनई जउन ओकर पाछा करत अहइ उ सहर तलक ओकर पाछा कइ सकत ह। अगर अइसा होत ह तउ नगर प्रमुखन क ओका यो ही नाहीं तजि देइ चाही, बल्कि ओनका उ मनई क रच्छा करइ चाही जउन ओनके लगे सुरच्छा बरे आवा अहइ। उ सबइ उ मनई क रच्छा ऍह बरे करिहीं कि उ जेका मार डाएस ह, ओका मारि डावइ क ओकर इरादा नाहीं रहा। इ संजोग क कारण होइ गवा। उ कोहान नाहीं रहा अउर उ मनई क मारइ क निहचय नाहीं किहे रहा। इ कछू अइसा रहा, जउन होइ ही गवा। ⁶ उ मनई क तब तलक सहर मँ रहइ चाही जब तलक उ सहर क निआव क कचहरी क जरिये ओकरे मोकदमा क निर्णय नाहीं होइ जात अउर ओका तब तलक उहइ सहर मँ रहइ चाही जब तलक महा याजक नाहीं मर जात। तब उ आपन घर मँ उ सहर मँ लउटि सकत ह, जहाँ स उ भागत भवा आवा रहा।”

⁷ ऍह बरे इस्राएल क लोग “सुरच्छा सहर” नाउँ क सहरन क चुनेन। उ सबइ सहर इ सबइ सहर रहेन: नप्ताली क पहाड़ी प्रदेस मँ गलील क केदेस; एप्रैम क पहाड़ी प्रदेस मँ सकेम; किर्य्यतर्बा जउन यहूदा क पहाड़ी प्रदेस मँ रहा। ⁸ रूबेन क प्रदेस क रेगिस्तान मँ, यरीहो क निअरे यरदन नदी क पूरब मँ बेसेर; गाद क प्रदेस मँ गिलाद मँ रमोत; मनस्से क प्रदेस मँ बासान मँ गोलान।

⁹ कउनो इस्राएली मनई या ओनके बीच रहइवाला कउना भी विदेसी, अगर कउनो क मार डावत ह, मुला इ संजोग क कारण होइ जात ह, तउ उ ओन सुरच्छा नगरन मँ स कउनो एक मँ सुरच्छा बरे पराइके जाइ सकत रहा। तब उ मनई हुआँ सुरच्छित होइ सकत रहा अउर पाछा करइवाला कउनो क जरिये मारा नाहीं जाइ सकत रहा। उ सहर मँ उ मनई क मोकदमा क निबटारा उ सहर क निआव क कचहरी क जरिये होइ।

याजकन अउ लेबी बंसियन क सहर

21 लेवी परिवार समूह क सासक लोग याजक एलीआज़ार, नून क पूत यहोसू अउ इस्राएल क दूसर परिवार समूहन क सासक लोगन स बात किहेस। ² इ कनान देसा मँ सीलो सहर मँ भवा। लेवी परिवार समूह क सासक लोग ओनसे कहेन, “यहोवा मूसा क आदेस दिहे रहा कि तू हम लोगन क रहइ बरे सहर देब्या अउर तू हम लोगन क मइदान देब्या जेहमाँ हमार जनावर चरि सकिहीं।” ³ ऍह बरे उ पचे यहोवा क आदेस क माना। उ पचे लेवी परिवार समूह क इ सबइ सहर अउर ओनके गोरुअन बरे खेत दिहेन:

⁴ पहिला पाँसा कोहात कबीला बरे जउन लेवी परिवार समूह स रहा। कछू कोहात कबिलन क एक हींसा स तेरह सहर दीन्ह ग रहेन। इ सबइ सहर उ प्रदेस मँ रहेन जउन यहूदा, सिमोन अउ बिन्यामीन क होत रहा। इ सबइ सहर ओन कोहातियन क दीन्ह ग रहेन जउन महा याजक हारून क संतान रहिन।

⁵ कोहात कबीला क दूसर सारे सदस्य क दस सहर दीन्ह ग रहेन। इ सबइ दस सहर एप्रैम, दान अउर मनस्से क आधा परिवार क समूहन क प्रदेसा मँ स रहेन।

⁶ गेर्सोन कबीला क तेरह सहर दीन्ह ग रहेन। इ सबइ सहर उ प्रदेस मँ रहेन जउन इस्साकार, आसेर, नप्ताली अउर बासान मँ मनस्से क आधा परिवार समूह क भुइँया मँ रहेन।

⁷ मरारी कबीला क बारह सहर दीन्ह ग रहेन। इ सबइ सहर ओन प्रदेसन मँ रहेन जउन रूबेन, गाद अउ जबूलून क रहेन।

⁸ इ तरह इस्राएल क लोग लेवी परिवार समूह क इ सबइ सहर अउर ओनके चारिहुँ ओर क खेत दिहन। उ पचे इ मूसा क आदेस क अनुसार यहोवा क हुकूम क मानइ बरे किहन।

⁹ यहूदा अउ सिमोन परिवार समूहन क प्रदेस क सहरन जेका कि लेवी परिवार समूह क दीन्ह ग रहेन इ सबइ रहेन। ¹⁰ इ सहरन कोहात कबीला क सदस्य क रहेन जउन कि लेवी परिवार समूह स हारून क संतानन रहेन। ¹¹ उ पचे ओनका किर्यत-अर्बा जेका नाउँ अनाक क पिता अरबा क नाउँ पाइ धरा गवा रहेन, एकर चारिहुँ कइँती क खेतन क संग दिहेस। इ कसबा क यहुदा क पहाड़ी देस मँ हेब्रोन स भी जाना जात ह। ¹² मुला खेत अउर किर्यत-अर्बा सहर क चारिहुँ कइँती क छोटकन सहर यपुन्ने क पूत कालेब क रहेन।

¹³ इ तरह उ पचे हेब्रोन सहर क हारून क संतानन क सुरच्छा क सहर क रूप मँ अउ लिब्ना अउर ऍकर चारिहुँ कइँती क घास क मइदान दइ दिहस। ¹⁴ उ पचे यत्तीर, एसतमो अउर ओनकर घास क मइदान, ¹⁵ होलोन, दबीर, ¹⁶ ऐन, युत्ता अउर बेतसेमेस भी ओनकइ चारिहुँ कइँती क घास क मइदान समेत पाएन। ऍन दुइनउँ समूहन क यहूदा अउ सिम्मोन क जरिये नौ सहर दीन्ह गएन।

¹⁷ उ पचे हारून क संतानन क उ सबइ सहर भी दिहन जउन बिन्यामीन परिवार समूह क रहेन। इ सबइ सहर गिबोन, गेबा अउर ओनकर घास क मइदान, ¹⁸ अनातोत अउ अल्मोन रहेन। उ पचे इ सबइ चार सहर अउर ऍनकइ चारिहुँ कइँती क सब खेत दिहन। ¹⁹ इ तरह इ सबइ सहर याजकन क दीन्ह गएन। (इ सबइ याजक, याजक लोग हारून क संतान रहेन।) सब मिलाइके तेरह सहर अउ ओनकइ सब खेत ओनके जनावरन क दीन्ह गएन।

²⁰ कोहाती कबीला क दूसर लोगन क इ सहर दीन्ह गएन, जउन कि एप्रैम परिवार समूह क रहेन: ²¹ उ पचे ओनका एप्रैम क पहाड़ी मुल्क मँ सेकेम सहर जउन कि सुरच्छा क सहर रहा एकर चारिहुँ कइँती क घास क मइदान क संग दिहन। उ पचे गेजरे, ²² किबसैम अउर, बेथोहरोन भी ओनका दिहन। सब मिलाइके उ पचे चार सहर अउ ओनकर चारिहुँ कइँती क सारा खेत ओनका दिहन।

²³ दान क परिवार समूह ओनका एलतके, गिब्बतोन, ²⁴ अय्यालोन अउ गत्रिम्मोन दिहन। सब मिलाइके इ सबइ चार सहर अउ ओनकर सारा खेत ओनके जनावरन क बरे रहेन।

²⁵ मनस्से क आधा परिवार समूह ओनका तानाक अउ गत्रिम्मोन दिहन। ओनका उ सबइ सारा खेत भी दीन्ह गएन जउन ऍन दुइनउँ सहरन क चारिहुँ ओर रहेन।

²⁶ इ तरह इ सबइ दस जियादा सहर अउ ऍन सहरन क चारिहुँ कइँती क भुइँया ओनकर जनावरन बरे कोहाती समूह क दिन्ह गइ रही।

²⁷ लेवी परिवार समूह क गेर्सोनी कबीला क इ सबइ सहर दीन्ह ग रहेन।

मनस्से परिवार समूह क आधा परिवार ओनका बासान मँ गोलान दिहस। (गोलान एक सुरच्छा सहर रहा।) मनस्से ओनका बे-एसतरा भी दिहस। उ पचे इ दुइनउँ सहरन क चारिहुँ ओर क घास क मइदान भी पाएन।

²⁸ इस्साकार क परिवार समूह ओनका किस्योन, दाबरत, ²⁹ यरमूत अउ एनगन्नीम अउर ओनकर घास क मइदान दिहेस। कुल मिलाइके चार सहर।

³⁰ आसेर क परिवार समूह ओनका मिसाल, अब्दोन, ³¹ हेल्कात अउ रहोब दिहस। एन चारिहुँ सहरन क चारिहुँ कइँती क भुइँया भी ओनका ओनकर जनावरन बरे दीन्ह गइ।

³² नप्ताली क परिवार समूह ओनका गलील मँ केदेस क सुरच्छा क सहर क रूप मँ दिहस। नप्ताली क परिवार समूह ओनका हम्मोतदोर अउ कर्तान भी दिहस। ओनकर घास क मइदान क संग तीन सहर।

³³ सब मिलाइके गेर्सोनी कबीला तेरह सहर अउ ओनकर चारिहुँ ओर क खेतन पाएस।

^34-39 दूसर लेवी कबीला मरारी कबीला रहा। मरारी लोगन क इ सहर दीन्ह ग रहेन: जबूलून क परिवार समूह ओनका योक्नाम, कर्ताह, अउर ओनकर घास क मइदान, दिम्ना अउ नहलाल अउर ओनकर घास क मइदान – चार सहर दिहेन। रूबेन क परिवार समूह ओनका यरदन क पूरब मँ बेसेर, यहसा, केदमोत अउ मेपात सहर दिहन। सारी भुइँया, जउन ऍन चारिहुँ सहरन क चारिहुँ कइँती रही, मरारी लोगन क ओनकर जनावरन बरे दीन्ह गइ। गाद क परिवार समूह ओनका गिलाद मँ सुरच्छा क सहर रामोत अउर एकर घास क मइदान दिहस। उ पचे ओनका महनैम अउर एकर घास क मइदान, हेस्बोन अउ याजेर भी दिहन। गाद ऍन चारिहुँ सहरन क चारिहुँ कइँती क सारी भुइँया भी ओनकर जनावरन बरे दिहन।

⁴⁰ सब मिलाइके मरारी कबीला जउन कि आखिरी लेवी कबीला रहा क बारह सहर दीन्ह गएन।

⁴¹ सब मिलाइके लेवी परिवार समूह अड़तालीस सहर अउर ओकर संग ऍन सहरन क चारिहुँ कइँती क खेत पाएन। इ सबइ सहर उ प्रदेसन मँ रहेन, जउन इस्राएल क दूसर परिवार समूह क लोगन क कबजा मँ रहेन। ⁴² हर एक सहर क साथ ओनकइ चारिहुँ कइँती क अइसी भुइँया अउर खेत रहेन। जेन पइ जनावरन जिन्नगी बिताइ सकत रहेन। इहइ बात हर सहर क साथे रही।

⁴³ इ तरह यहोवा इस्राएल क लोगन क जउन वचन दिहे रहा, ओका पूरा किहस। उ ओनका सारा प्रदेसन दइ दिहस जेका देइ क उ ओनकर पुरखन क वचन दिहे रहा। लोग उ प्रदेसन क लिहन अउर ओहमाँ रहइ लागेन। ⁴⁴ अउर यहोवा ओनकर प्रदेस क चारिहुँ कइँती सान्ति स्थापित होइ दिहस काहेकि उ ओनकइ संतानन स वचन दइ रहा। ओनकर कउनो दुस्मन ओनका नाहीं हराएन। यहोवा इस्राएल क लोगन क हर एक दुस्मन क हरावइ दिहस। ⁴⁵ यहोवा इस्राएलियन क दीन्ह गए आपन सबहीं वचनन क पूरा किहस। कउनो अइसा वचन नाहीं रहा, जउन पूरा न भवा होइ। हर एक वचन पूरा भवा।