Chronological

एप्रैम अउ मनस्से बरे प्रदेस

16 इ उ प्रदेस अहइ जेका यूसुफ क परिवार पाएस। इ प्रदेस यरीहो क लगे यरदन नदी स सुरु भवा अउ आगे पूरब मँ यरीहो पानी तलक रहा। तउ इ प्रदेस यरीहो स बेतेल क रेगिस्तानी पहाड़ी तलक चली गइ। ² सीमा लगातार बेतेल स लूज तलक अउर फुन अतारोत पइ एरेकी सीमा तलक चली गइ रही। ³ तब इ चउहद्दी पच्छिम मँ यपलेती लोगन क चउहद्दी तलक चली गइ। इ चउहद्दी लगातार खाले बेथोरोन तलक चली गइ रही। इ चउहद्दी गेजेर तलक गइ अउर समुद्दर तलक चलतइ चलत गइ।

⁴ इ तरह मनसे अउर एप्रैम आपन प्रदेस पाएस। (मनस्से अउ एप्रैम यूसुफ क पूत रहेन।)

⁵ इ उ प्रदेस अहइ जेका एप्रैम क कबिलन क दीन्ह गवा: ओनकर पूरबी चउहद्दी ऊपरी बेथोरोन क निअरे अत्रोतदार पइ सुरु भइ। ⁶ अउर इ हुआँ स सागर तलक जात रही। चउहद्दी उत्तर मँ मिकमतात क छोड़ कर तानतसीलो क मुड़ी अउ लगातार पूरब कइँती यानोह तलक चली गइ रही। ⁷ तब चउहद्दी यानोह स अतारोथ अउ नारा तलक चली गइ। इ चउहद्दी लगातार चलत भइ यरीहो छुअत ह अउर यरदन नदी पइ खतम होइ जात ह। ⁸ इ चउहद्दी तप्पूह स होत भइ पच्छिम कइँती कानाह नाला क जात ह अउर सागर पइ खतम होइ जात ह। इ उ प्रदेस अहइ जउन एप्रैम क लोगन क ओकरे परिवार समूह क अनुसार दीन्ह गवा रहा। ⁹ एप्रैम क बहोत स चउहद्दी क सहर असल मँ मनस्से क चउहद्दी मँ रहेन मुला एप्रैम क लोगन ओन सहरन अउर आपन खेतन क पाएन। ¹⁰ मुला एप्रैम लोग कनानी लोगन क गेजेर सहर छोड़इ क मजबूर करइ मँ समर्थ नाहीं होइ सकेन। ऍह बरे कनानी लोग अब तलक एप्रैमी लोगन क बीच रहत हीं।^[a] मुला कनानी लोग एप्रैमी लोगन क दास क रूप मँ रहत रहेन।

17 तब मनस्से क परिवार समूह क भुइँया दीन्ह गइ। मनस्से यूसुफ क पहिला पूत रहा। मनस्से क पहिला पूत माकीर रहा जउन गिलाद क बाप^[b] रहा। माकीर महान जोधा रहा, ऍह बरे गिलाद अउ बासान माकीर क परिवार क दीन्ह गएन। ² मनस्से क परिवार समूह क दूसर कबिलन क भी भुइँया दइ दीन्ह गइ। उ सबइ कबिलन अबीएजेर, हेलेक, अस्त्रीएल, सेकेम, हेपेर अउ समीदा रहेन। इ सबहिं मनस्से क दूसर पूत रहेन, जउन यूसुफ क पूत रहा।

³ सलोफाद हेपेर क पूत रहा। हेपेर गिलाद क पूत रहा। गिलाद माकीर क पूत रहा अउर माकीर मनस्से क पूत रहा। मुला सलोफोद क कउनो पूत नाहीं रहा। ओकर पाँच बिटियन रहिन। बिटियन क नाउँ महला, नोआ, होग्ला, मिल्का अउर तिर्सा रहेन। ⁴ बिटियन याजक एलीआज़ार अउर नून क पूत यहोसू क इलावा सबहिं प्रमुखन क लगे गइन। बिटियन कहेन, “यहोवा मूसा स निर्देस दिहस कि उ हमका वइसेन ही भुइँया देइँ जइसेन हमार भाईयन क दीन्ह जात हीं।” ऍह बरे एलीआज़ार, यहोवा क हुकुम मानत भए एन बिटियन क वाइसेन ही भुइँया दिहेस जइसन ओनके चाचा लोगन क मिली रही।

⁵ इ तरह मनस्से क परिवार क लगे यरदन नदी क पच्छिम मँ भुइँया क दस छेत्र रहेन अउर यरदन नदी क दुसरी कइँती दुइ ठु दूसर छेत्र गिलाद अउ बासान रहेन। ⁶ मनस्से क पोतियन क वइसेन ही भुइँया दीन्ह गइ जइसेन मनस्से क दूसर बेटवन सन्तानन क दीन्ह गइ रही। गिलाद प्रदेस मनस्से क सेस परिवार क दीन्ह गवा।

⁷ मनस्से क भुइँया आसेर अउ मिकमतात क छेत्र क बीच रही। इ सकेम क निअरे अहइ। एकर चउहद्दी एनतप्पूह स दक्खिन तलक जात रही। ⁸ तप्पूह क भुइँया मनस्से क रही मुला तप्पूह सहर ओकर नाहीं रहा। तप्पूह सहर जउन कि मनस्से क प्रदेस क चउहद्दी पइ रहा उ एप्रैम क बेटवन स आबाद रहा। ⁹ मनस्से क चउहद्दी काना नाले क दक्खिन मँ रही। मनस्से क इ छेत्र क सहर एप्रैम क रहेन। मनस्से क चउहद्दी नदी क उत्तर मँ रही अउर इ पच्छिम मँ लगातार भूमध्य सागर तलक चली गइ रही। ¹⁰ दक्खिन क भुइँया एप्रैम क रही अउर उत्तर क भुइँया मनस्से क रही। भूमध्य सागर पच्छिम क चउहद्दी बनावत रहा। इ चउहद्दी उत्तर मँ आसेर क प्रदेस क छुअत रही अउ पूरब मँ इस्साकार क प्रदेस क।

¹¹ इस्साकार अउ आसेर क छेत्र क बेतसान अउ एकर चारिहुँ कइँती क गाँव उ यिबलाम अउ एकर चारिहुँ कइँती क गांव मनस्से क रहेन। मनस्से क कब्जा मँ दोर अउ एकर चारिहुँ कइँती क गाँव अउ एनदोर अउर एकर चारिहुँ कइँती क गाँव भी रहेन। नापात क तीन ठु सहरन समेत तानाक अउर ओकर चारिहुँ कइँती क गाँव भी मनस्से क कब्जा मँ रहा। ¹² मनस्से क लोग ओन सहरन क नाहीं हराइ सका रहेन। ऍह बरे कनानी लोग हुआँ रहत रहेन। ¹³ मुला इस्राएल क लोग सक्तीसाली भएन। जबहिं अइसा भवा तउ उ पचे कनान क लोगन क गुलामी मँ जाइ बरे मनबूर किहेन। मुला उ पचे कनानी लोगन क उ भुइँया तजि देइ बरे मजबूर नाहीं किहेस।

¹⁴ यूसुफ क परिवार समूहन यहोसू स बातन किहेन अउर कहेन, “तू भुइँया क हमका एक हींसा दिह्या ह। मुला हम बहोत स लोग अहइँ। तू हम लोगन क उ देस क एक हींसा ही काहे दिह्या जबकि यहोवा हम लोगन क आसीर्बाद दिहस?”

¹⁵ अउर यहोसू ओनका जवाब दिहस, “अगर तू लोग गनती मँ जियादा ह्वा तउ पहाड़ी प्रदेस क जंगलन मँ ऊपर चढ़ा अउर हुआँ रहइ बरे अपन जगह बनावा। इ प्रदेस परिज्जन अउ रपाई लोगन क अहइ। अगर एप्रैम क पहाड़ी प्रदेस तू लोगन क जरुरत स छोटवार अहइ तउ उ भुइँया क लइ ल्या।”

¹⁶ यूसुफ क लोग कहेन, “इ फुरइ अहइ कि एप्रैम क पहाड़ी प्रदेस हम लोगन बरे काफी नाहीं अहइ। मुला इ प्रदेस जहाँ कनानी लोग रहत हीं खतरनाक बाटइ। उ सबइ वुसल जोधा अउ ओनके लगे लोहा क रथ अहइँ। अउर उ सबइ यिज्रेल क घाटी अउर एकर चारिहुँ कइँती क गाँव क इलावा बेतसान क छेत्र पइ दबदबा रखत हीं।”

¹⁷ तब यहोसू यूसुफ, एप्रैम अउर मनस्से क लोगन स कहेस, “मुला तू लोगन क गनती बहोतइ जियादा अहइ। अउर तू लोग बड़की ताकत धरत ह। तू लोगन क जियादा भुइँया मिलइ चाही। ¹⁸ तू लोगन क पहाड़ी प्रदेस लेइ क होइ। इ जंगल अहइ, मुला तू लोग बृच्छन क काटि सकत ह अउर रहइ जोग्ग नीक जगह बनाइ सकत ह। इ सारा पचन्क होइ। तू लोग कनानी लोगन क उ प्रदेस क तीज देइ बरे मजबूर करब्या। तू लोग ओनका सक्तीसाली रथ क होत भए भी जउन ओनका सक्ती प्रदान करत ह हराइ देब्या।”

बचे भए प्रदेस क बँटवारा

18 इस्राएल क सबहिं लोग सीलो नाउँ क ठउर पइ बटुर गएन। उ ठउरे पइ उ पचे मिलापवाला तम्बू खड़ा किहन। इस्राएल क लोग उ प्रदेस क सबहिं दुस्मन क हराए रहेन अउर उ प्रदेस ओनके अघिकार मँ रहेन। ² मुला उ समइ भी इस्राएल क सात परिवार समूह अइसेन रहेन, जेनका परमेस्सर क जरिये वचन दीन्ह जाइ पइ भी ओनका दीन्ह गइ भुइँया नाहीं मिली रही।

³ ऍह बरे यहोसू इस्राएल क लोगन स कहेस, “तू लोग आपन प्रदेस लेइ मँ ऍतनी देर काहे जोहत अहा? यहोवा, तू पचन्क परमेस्सर इ प्रदेस तू पचन्क दिहे अहइ। ⁴ ऍह बरे तेाहरे सबन्क हर एक परिवार समूह क तीन मनई चुनइ चाही? मइँ ओन मनइयान क ओन प्रदेसन क जाँच बरे पठउब। उ सबइ उ पूरे प्रदेस स होइ क जाब अउर उ प्रदेस क विवरन तइयार करिहीं तब उ सबइ मोरे लगे लउटिहीं। ⁵ उ पचे देस क सात ठु हींसा मँ बँटि देइहीं। यहूदा क लोग आपन प्रदेस दक्खिन मँ रखिहीं। यूसुफ क लोग आपन प्रदेस उत्तर मँ रखिहीं। ⁶ मुला तू लोगन क भुइँया क उल्लेख करत भवा विवरण तइयार करइ चाही अउ प्रदेस क सात ठु हींसन मँ बाँटि देइ चाही। विवरण मोरे लगे लिआवा। अउर मइँ हिआँ यहोवा हमार परमेस्सर क मौजूदगी मँ तोहार बरे पाँसा (लोटरी) डालब। ⁷ मुला लेवी परिवार समूह ऍन प्रदेसन क कउनो हींसा नाहीं पइहीं। उ सबइ याजक अहइँ अउर ओनकर कारज यहोवा क सेवा करब अहइ। गाद अउर रूबेन क परिवार समूह अउ मनस्से क आधा क परिवार समूहन क लोग पहले वचन क अनुसार दीन्ह गवा आपन प्रदेस पाइ चुका अहइँ। इ सबइ प्रदेस यरदन नदी क पूरब मँ अहइँ। यहोवा क सेवक मूसा उ प्रदेस क पहिले ही दइ दिहे रहा।”

⁸ ऍह बरे चुने भए मनई उ भुइँया क लखइ अउ ओकर नक्सा बनावइ बरे चला गएन। यहोसू ओनसे कहेस, “जा, अउर उ प्रदेस क जाँच करा अउर ओकर नक्सा तइयार करा। तब मोरे लगे लउटि आवा। उ समइ मइँ यहोवा स कहबउँ कि जउन देस तू पचन्क मिली ओका चुनइ मँ उ पचे मोर मदद करइँ।”

⁹ ऍह बरे ओन मनसेधुअन उ जगह तजेन अउर उ देस मँ उ पचे चला गएन। उ पचे देस क जाँच किहेन अउर यहोसू बरे नक्सा तइयार किहेन। उ पचे हर सहर क जाँच किहेन अउर पाएन कि प्रदेस क सात ठु हींसा अहइँ। उ पचे आपन नकसा क तइयार किहन अउर यहोसू क लगे गएन। यहोसू तबहुँ सीलो क डेरा मँ रहा। ¹⁰ उ समइ यहोसू यहोवा स मदद माँगेस। यहोसू हर एक परिवार समूह क देइ बरे एक ठु प्रदेस चुनेस। यहोसू प्रदेस क बाँटेस अउर हर एक परिवार समूह क ओकरे हींसा क प्रदेस दिहस।

बिन्यामीन बरे प्रदेस

¹¹ तब बिन्यामीन क परिवार समूह अउर ओनकइ कबीलन बरे पाँसा डावा गवा रहा अउर पाँसा यहोदा अउर यूसुफ क परिवार समूहन क भुइँया क बीच पड़ेन। ¹² ऍकर उत्तरी चउहद्दी यरदन नदी स सुरु भइ। इ चउहद्दी यरीहो क उत्तरी छोरे स गइ रही। तब इ चउहद्दी पच्छिम क पहाड़ी प्रदेस मँ गइ रही। इ चउहद्दी लगातार बेतावेन क ठीक पूरबी ढलान तलक रही। ¹³ तब इ चउहद्दी लूज़ (यानी बेतेल) क दक्खिनी ढलान तलक गइ। फिन इ चउहद्दी अत्रोद्दार तलक खाले गइ। अत्रोतद्दार खाले बेथोरोन क दक्खिनी पहाड़ी क ढलान पइ अहइ। ¹⁴ चउहद्दी दक्खिन कइँती मड़ी अउर बैथ-हेरोन क लगे उ पहाड़ी क पच्छिमी कइँती क निचके स गइ। इ चउहद्दी आगे किर्यत बाल (जउन किर्यत-यारीम भी कहलावत ह) तलक गएन। इ एक सहर रही जहाँ यहूदा क लोग रहत रहेन। इ पच्छिमी चउहद्दी रही।

¹⁵ दक्खिन क चउहद्दी किर्यत्यारीम स सुरु भइ अउर नेप्तोह क पानी क चसमा तलक गइ। ¹⁶ तब चउहद्दी हिन्नोम क घाटी क निचके पहाड़ी क तलहटी मँ गइ। इ रपाईम घाटी क उत्तरी छोर रहा। इ चउहद्दी यबूसी सहर क ठीक दक्खिन हिन्नोम घाटी मँ चलत भइ चली गइ। तब चउहद्दी एनरोगेल तलक चली गइ। ¹⁷ हुआँ, चउहद्दी उत्तर कइँती मुड़ी अउर एन सेमेस क गइ। इ चउहद्दी लगातार गलीलोत तलक जात ह। (गलीलोत, पहाड़न मँ अदुम्मीम दर्रे क निअरे अहइ।) इ चउहद्दी उ बड़की चट्टान तलक गइ जेकर नाउँ रूबेन क पूत, बोहन बरे धरा गवा रहा। ¹⁸ इ चउहद्दी बेतअरबा क उत्तरी भाग तलक लगातार चली गइ। ¹⁹ तब इ बेथोग्ला क उत्तरी भाग क जाइके, लवण सागर क उत्तरी तट पइ खतम भइ। इ उहइ जगह अहइ जहाँ यरदन नदी समुद्र मँ गिरत ह। इ दक्खिनी चउहद्दी रही।

²⁰ पूरब कइँती यरदन नदी क चउहद्दी रही। इ तरह इ भुइँया रही जउन बिन्यामीन क परिवार समूह क दीन्ह गइ। इ सबइ चारिहुँ कइँती क चउहद्दी रहीन। ²¹ बिन्यामीन क हर एक परिवार समूह क, इ तरह, इ भुइँया मिली। ओनके कब्जा मँ इ सबइ सहर रहेन। यरीहो, बेथोग्ला, एमेक्कसीस, ²² बेतराबा, समारैम, बेतेल, ²³ अव्वीम, पारा, ओप्रा, ²⁴ कपरम्मोनी, ओप्नी अउ गेबा। इ सबइ बारहु सहर, उस छोटके छेत्र मँ, ओनके आसपास खेतन क साये रहेन।

²⁵ बिन्यामीन क परिवार समूह क लगे गिबोन, रामाबेरोत, ²⁶ मिस्पा, कपीरा, मोसा, ²⁷ रेकेम, र्पेर्ल, तरला, ²⁸ सेला, एलेप, यबूस सहर (यरुसलेम), गिबत अउर किर्यत-यरीम सहर भी रहेन। इ सबइ चउदह सहर, उ छोटके छेत्र मँ ओनके आसपास क खेतन क साथे रहेन। इ सबइ पहाँटा बिन्यामीन क परिवार समूह पाए रहा।