Chronological

डीबट

8 यहोवा मूसा स कहेस, ² “हारून स बात करा अउ ओसे कहा, ‘उ ठउरन प सात दिया धरा जेका मइँ तोहका देखाँएउँ ह। उ सबइ दियन डीबट क समन्वा क डेबरा क रोसन करिहीं।’”

³ हारून इ किहेस। हारून ओनॅ दियन क ठीक ठउर प धरेस अउ ओनकइ मुँह अइसा कइ दिहस कि ओसे डीबट क समन्वा क पहँटा उजियर होइ सकइ। उ मूसा क दीन्ह गवा यहोवा क हुकुम क मानेस। ⁴ डीबट सोने क पाटी स बना रहा। सोना क उपयोग पावा स लइ क उपर डीबट क सोना क फूल तलक कीन्ह गवा रहा। इ सब उहइ तरह बना रहा जइसा यहोवा मूसा क देखॉए रहा।

लेवी बंस क मनइयन क समर्पण

⁵ यहोवा मूसा स कहेस, ⁶ “लेवी बंस क मनइयन क इस्राएल क दूसर मनइयन स अलग लइ जा। ओनॅ लेवी बंसी मनइयन क सुद्ध करा। ⁷ इ तोहका सुद्ध बनावइ बरे करइ क होइ। पापबलि स खास पानी^[a] ओन प छिरका। इ पानी ओनका सुद्ध करी। तब उ पचे पूरा सरीर स बार उस्तरा स कटवइहीं अउ आपन ओढ़ना क धोइहीं। इ ओनके सरीर क सुद्ध करी।

⁸ “तब उ पचे एक नवा बर्धा अउ ओकरे संग प्रयोग मँ आवइवाली अन्नबलि लेइहीं। इ अन्नबलि तेले स साना भवा आटा होइ। तब दूसर बर्धा क पाप बरे भेंट क रूप मँ ल्या। ⁹ लेवी बंस क मनइयन क मिलापवाला तम्बू क समन्वा पहँटा मँ लिआवा। तब इस्राएल क सबहिं मनइयन क चारिहुँ कइँती स बटोरा। ¹⁰ तब तोहका लेवी बंस क मनइयन क यहोवा क समन्वा लइ आवा। अउ इस्राएल क लोग आपन हाथ ओन प धरीहीं। ¹¹ तब हारून लेवी बंस क लोगन क यहोवा क समन्वा लाइ। उ पचे यहोवा बरे उत्तोलनबलि क रूप मँ होइहीं। इ ढंग स लेवी बंस क लोग यहोवा क विसेस काम करइ बरे तइयार होइहीं।

¹² “लेवी बंस क लोगन स कहा कि उ पचे आपन हाथ बर्धा क मूँड़े प धरिहीं। एक बर्धा यहोवा क पापबलि क रूप मँ होइ। दूसर बर्धा यहोवा क होमबलि क रूप मँ काम आइ। इ भेंट लेवी-बंस क मनइयन क पाप बरे प्रायस्चित करी। ¹³ लवि बंस क मनइयन स कहा कि उ पचे हारून अउ ओकरे पूतन क अगवा खड़ा होइ। तब यहोवा क समन्वा लेवी बंस क मनइयन क उत्तोनबलि क रूप मँ अर्पण करा। ¹⁴ इ तरीका स लेवी बंस क लोग खास होइहीं। उ पचे इस्राएल क दूसर मनइयन स अलग होइहीं। अउर लेवी बंस क लोग हमार होइहीं।

¹⁵ “एह बरे लेवी बंस क मनइयन क सुद्ध करा। अउर ओनका यहोवा क समन्वा उत्तोलन बलि क रूप मँ हाजिर करा। जब इ पूरा हो जाइ तब उ पचे आइ सकत हीं अउर मिलापवाला तम्बू मँ आपन काम कइ सकत हीं। ¹⁶ इ सबइ लेवी बंसी इस्राएल क लोग अहीं जउन मोका दीन्ह ग अहइँ। मइँ ओनका आपन लोग क रूप मँ अंगीकार किएउँ ह। बीते भए जमाना मँ हर एक इस्राएली परिवार मँ पहिलौटी क पइदा लरिका मोका दीन्ह जात रहा मुला मइँ लेवी बंस क मनइयन क इस्राएल क दूसर परिवारन क पहिलौटी क बेटवन क जगह प अंगीकार किहेउँ ह। ¹⁷ इस्राएल क हर मनई जउन हर एक परिवार मँ पहिले पइदा भवा ह, मोर अहइ। जदि उ मनई या गोरु अहइ तउ भी मोर अहइ। मइँ मिस्र मँ सबहिं पहिला पइदा गदेलन अउ जनावर क मारि डाएउँ रहा। एह बरे मइँ पहिला पइदा पूतन क अलग किहेउँ जेहँसे उ पचे मोर होइ सकइँ। ¹⁸ अब मइँ लेवी बंस क मनइयन क लइ लिहेउँ ह। मइँ इस्राएल क दूसर लोगन क परिवारन मँ पहिला पइदा भएन गदेलन क ठउर प ऍनका अंगीकार किहेउँ ह। ¹⁹ मइँ इस्राएल क सबहिं लोगन स लेवी बंस क मनइयन क चुनेउँ ह। मइँ ओनका हारून अउ ओकरे पूतन क ऍनका उपहार क रूप मँ दिहेउँ ह। मइँ चाहत हउँ कि उ पचे मिलापवाला तम्बू मँ काम करइँ। उ पचे इस्राएल क सबहिं मनइयन बरे सेवा करिहीं। अउर उ पचे ओन बलिदानन क देइ मँ मदद करिहीं जउन इस्राएल क लोगन क पापन क प्रायस्चित करिहीं। तब कउनो बड़ा रोग या कष्ट इस्राएल क लोगन क नाहीं होइ जब उ पचे पवित्तर ठउर क लगे अइहीं।”

²⁰ एह बरे मूसा, हारून अउ इस्राएल क सबहिं लोगन यहोवा क हुकुम मानेन। उ पचे लेवी बंस क खातिर वइसा ही किहेन, जइसा यहोवा ओनके बरे मूसा क हुकुम दिहे रहा। ²¹ लेवी लोग आपन क फर्छा किहेन अउ आपन ओढ़ना क धोएन। तब हारून ओनका यहोवा क समन्वा उत्तोलन बलि क रूप मँ हाजिर किहेस। हारून उ भेंटन क भी चढ़ाएस जेका ओनकर पापन क प्रायस्चित करइ बरे चढ़ावा गवा रहा जउन ओनका पवित्तर कइ दिहे रहा। ²² ओकरे पाछे लेवी बंस क लोग आपन काम करइ बरे मिलापवाला तम्बू क आएन। हारून अउ ओकर पूतन ओनकइ देखरेख किहेन। उ पचे लेवी बंस क मनइयन क काम बरे जिम्मेदार रहेन। हारून अउ ओकर पूतन ओन आदेसन क मानेन जेका यहोवा मूसा क दिहे रहेन।

²³ यहोवा मूसा स कहेस, ²⁴ “लेवी बंस क मनइयन बरे इ विसेस आदेस अहइ: हर एक लेवी बंस क मनसेधू क, जउन पचीस बरिस या ओसे जिआदा उमर क अहइ, जरुर आवइ चाही अउ मिलापवाला तम्बू मँ क काम मँ हाथ बटावइ चाही। ²⁵ जब कउनो मनई पचास साल क होइ जाइ तउ ओका रोजाना क कामे स छुट्टी लेइ चाही। ओका फुन काम करइ क जरुरत नाहीं अहइ। ²⁶ पचास साल या ओसे जियादा उमर क लोग मिलापवाला तम्बू मँ आपन भाइयन क ओनके काम मँ मदद दइ सकत हीं। मुला उ पचे खुद काम नाहीं करिहीं। तोहका इ सब करइ चाही जब तू लेवि मनइयन क ओनका काम करइ क द्या।”

फसह त्यौहार

9 यहोवा मूसा स सीनै रेगिस्तान मँ कहेस। उ टेमॅ दूसर बरिस क पहिला महीना रहा। जब इस्राएल क मनइयन मिस्र स निकरा रहेन। यहोवा मूसा स कहेस, ² “लोगन क तय कीन्ह गवा टेमॅ पइ फसह क दावत जरूर मनावइ चाही। ³ उ तय कीन्ह गवा समइ इ महीना क चउदहवाँ दिन अहइ। ओनका गोधूरि क टेमॅ फसह क भोजन खाइ चाही। ओका इ सबइ कानून अउ नेम क पालन करइ चाही जेका त्यौहार मँ कीन्ह जात ह।”

⁴ एह बरे मोसा इस्राएल क लोगन क फसह क त्यौहार मनावई बरे कहेस। ⁵ अउर लोग पहिला महीन क चउदहवाँ दिन वइसा ही किहेन। इस्राएल क मनइयन हर एक काम वइसन किहेन जइसा यहोवा मूसा क हुकुम दिहे रहेन।

⁶ मुला कछू लोग फसह त्यौहार क भोज उ दिन नाहीं खाइ सकेन। उ पचे एक ल्हास क कारण सुद्ध नाहीं रहेन। एह बरे उ दिन उ पचे मूसा अउ हारून क लगे गएन। ⁷ उ पचे मूसा स कहेन, “हम पचे एक ल्हासे क छुअइ क कारण असुद्ध भवा अहेन। याजकन लोग तय कीन्ह ग टेमॅ प हमेका यहोवा क चढ़ावा देइ स रोक दिहस। तउ हम पचे इस्राएल क दूसर मनइयन क संग फसह त्यौहार नाहीं मनाइ सकित। हमका का करइ चाही?”

⁸ मूसा ओनसे कहेस, “मइँ यहोवा स पूछब कि उ एकरे बारे मँ का कहत ह।”

⁹ तब यहोवा मूसा स कहेस, ¹⁰ “इस्राएल क लोगन स इ बातन कहा: इ विधि तोहार अउर तोहारे सन्तानन बरे होब्या। इ होइ सकत ह कि तू ठीक टेमॅ प फसह त्यौहार न मनाइ सका काहे की तू या तोहरे सन्तानन क कउनो मनई ल्हास क छुइ जाइ क कारण असुद्ध होइ या होइ सकत ह कि उ कउनो लम्बी जात्रा प गवा भवा अहा।” ¹¹ उ फसह त्यौहार दूसर महीना क चउदहवाँ दिन गोधूरि क समइ मनावइ। उ मेमना, बे खमीरे क रोटी अउ करुआ सागपात खाइ। ¹² दूसर दिन क भिन्सारे तलक ओका ओहमाँ स कउनो भी भोजन नाहीं तजइ चाही। ओका भेड़ी क कउनो हाड़ क भी नाहीं तोड़इ चाही। उ मनई क फसह क नेमॅ क मानइ चाही। ¹³ कउनो भी व्यक्ति जउन पवित्तर अहइ अउर लम्बी जात्रा पइ नाहीं अहइ तउ फसह त्यौहार ठीक समइ पइ ही मनावइ चाही। जदि उ मनई फसह त्यौहार ठीक समइ पइ नाहीं मनावत ह तउ ओका आपन मनइयन स अलगइ पठइ दीन्ह जाइ। उ अपराधी बा काहे की उ यहोवा क ठीक टेमॅ प भेंट नाहीं चढ़ाएस। तउ ओका जरुर सजा दीन्ह जाइ चाही।

¹⁴ “तू सबइ क बीच बसइया गेर इस्राएली फसह त्यौहार मँ आवइ चाहइ तउ तोहरे संग हींसा लइ सकत ह। इ कनून मँ अहइ मुला उ मनई क फसह क सब नेमॅ मानइ चाही। उहइ नेमॅ सब बरे अहइँ।”

बादर अउ आगी

¹⁵ जउने दिन पवित्तर तम्बू अउ करार क तम्बू लगावा गवा। यहोवा क बादर ऍका घेरि लिहस। रात मँ, उ बादर आगी क नाईं देखाइ देत रहा। ¹⁶ बादर पवित्तर तम्बू प बराबर थमा रहा। अउर राति मँ बादर आगी क तरह देखाँत रहा। ¹⁷ जब बादर पवित्तर तम्बू प आपन ठउर स तम्बू प ठहरत रहा, इस्राएलियन ऍकर पाछा करत रहेन। जब बादर थमि जात रहा तब इस्राएल क लोग हुवँइ सिबिर डावत रहेन। ¹⁸ इहइ ढर्रा रहा कि यहोवा मनइयन क देखाएस कि कब जात्रा करइँ, कब रुकि जाइँ अउ कब सिबिर डावइँ। अउ जबहिं तबहिं बादर पवित्तर तम्बू क ऊपर ठहरि जात, लोग उहइ ठउर प सिबिर दसाए रहतेन। ¹⁹ कबहुँ कबहुँ बादर बहोत दिन तलक पवित्तर तम्बू प जमा रहत। इस्राएलियन यहोवा क हुकुम मनतेन अउ जात्रा नाहीं करत रहेन। ²⁰ कबहुँ कबहुँ बादर पवित्तर तम्बू प कछू दिन बरे ठहरत रहत रहा यहोवा क हुकुम क अनुसार उ ठहरत अउ यहोवा क हुकुम क अनुसार उ चलत। ²¹ कबहुँ कबहुँ बादर रात मँ ठहरि जात अउ दूसर दिन भिन्सारे चलि पड़त। तउ मनइयन आपन चीजन क बटोरतेन अउ एकर पाछा करतेन। या अगर बादर एक दिन अउ एक रात ठहरत अउर तब इ चलि सुरू करत तउ मनइयन ओकर साथ चलि रहत। ²² जदि बादर तम्बू क ऊपर दुइ दिन, या एक महीना या एक बरिस ठउरत तउ लोग यहोवा क हुकुम मनतेन। उ पचे उहइ सिबिर मँ ठउरतेन अउ तब ताई न चलतेन जब तलक बादर न चलत। जब बादर आपन ठउर स उठत अउ चलत रहत तबहिं लोग चलतेन। ²³ इ तरह लोग यहोवा क हुकुम क मनतेन। उ पचे हुवइँ सिबिर जमउतेन जहाँ यहोवा बतावत। उ पचे तब चलतेन जब यहोवा ओनका अइसा बतावत। लोग धियान स निहरतेन अउ यहोवा क हुकुम मूसा क जरिए मनतेन।

चाँदी क तुरहियन

10 यहोवा मूसा स कहेस, ² “तुरहियन बनवइ बरे चाँदी क प्रयोग करा। चाँदी क पतरी बनाइके ओसे दुइ तुरहियन बनावा। इ सबइ तुरहियन क उपयोग मनइयन क एक संग बोलावइ अउ इ बतावइ बरे कि सिबिर क लइक कब चलइ चाही। ³ जब तू इ तुरहियन क बजउब्या, तउ सबहिं मनइयन क मिलापवाला तम्बू क प्रवेस दुआर प बटुर जाइ चाही। ⁴ अगर तू एक ही तुरही दर तलक बजउब्या तब सिरिफ नेता लोग अइहीं। (इस्राएल क बारहु परिवारे क मुखिया तोहरे समन्वा बटुर जइहीं।)

⁵ “जब तू तुरहियन क चेताउनी क रूप मँ बजाउब इ मनइयन क सिबिर क लेकइ चलइ चाही। जब तू पहिली दाईं तू तुरहियन क चेताउनी क रूप मँ बजउब्या, तउ मिलापवाला तम्बू क पूरब कइँती क परिवार दलन क चलब सुरू करइ चाही। ⁶ दूसरी दाई जब तू तुरहियन क चेताउनी क रूप मँ बजउब्या, मिलापवाला तम्बू क ढक्खिन कइँती क परिवार दलन क सिबिर जमाए भए मनइयन क आगे चलब सुरू करइ क होइ। ⁷ जब तू कउनो खास सभा बरे मनइयन क बटोरइ चाहा, तउ तुरहियन क दूसरे ढंग स लम्बी थिरान अवाजे मँ बजावा। ⁸ सिरिफ हारून क याजक बेटवन ही तुरहियन बजाइ सकत हीं। इ तू सब पचन बरे नेमॅ अहइ जउन हमेसा अगवा क पीढ़ी दर पीढ़ी चलत रही।

⁹ “जदि तू आपन देस मँ दुस्मन स लड़त रहा हवा तउ ओनसे लड़इ स पहिले तुरहियन क चेताउनी क रूप म बजावा। तब यहोवा तोहार परमेस्सर तोहार बात सुनी अउ तू सबन क दुस्मनन स बचाइ। ¹⁰ तू सबन क आपन खास बइठक, नवा चन्द्रमा क दिना पइ अउ खुसी क टेमॅ प तुरहियन बजावइ चाही। जब तू पचे होमबलि अउ मेलबलि द्या, तउ तुरहियन बजावा। इ यहोवा तोहार परमेस्सर बरे तोहका याद रखइ बरे खास तरीका होइ।”

इस्राएल क लोग सिबिर लइ जात हीं

¹¹ जब इस्राएल क मनइयन मिस्र छोड़ी दिहेन ओकरे पाछे दूसर बरिस क दूसर महीना क बीसवाँ दिन करार क तम्बू क ऊपर स बादर उठा। ¹² एह बरे इस्राएल क मनइयन आपन जात्रा सुरु किहेन। उ सबइ सीनै क रेगिस्तान तजि दिहेन अउ तब तलक जात्रा करत रहेन जब ताई बादर पारान क रेगिस्तान मँ नाहीं थमा। ¹³ इ पहिली दाईं रही जब मनइयन सिबिर लइ गएन। जइसा यहोवा मूसा क हुकुम दिहेस वइसा सिबिर क चलाएन।

¹⁴ सबसे पहिले यहूदा क सिबिर स तीन दल गएन। उ पचे झण्डा लइके जात्रा किहेन। पहिला समूह यहूदा क परिवार समूह क रहा। अम्मीनादाब क पूत नहसोन उ दल क नेता रहा। ¹⁵ ओकरे पाछे इस्साकार क परिवार समूह आवा। सूआर क पूत नतनेल उ समूह क नेता रहा। ¹⁶ अउर तब जबूलून क परिवार समूह आवा। हेलोन क पूत एलीआब उ समूह क नेता रहा।

¹⁷ तब पवित्तर तम्बू उतारा गवा। गेर्सोन अउ मरारी परिवार क मनइयन पवित्तर तम्बू क लइके चलेन। एह बरे इ परिवारे क लोग कतार मँ ठीक पाछे रहेन।

¹⁸ तब रूबेन क सिबिर स तीन दल आएन। उ पचे आपन निसान लइके जात्र किहेन। पहिला समूह रूबेन परिवार क रहा। सदेऊर क पूत एलीआज़ार इ समूह क नेता रहा। ¹⁹ ओकरे पाछे सिमोन क परिवार समूह आवा। सूरीसद्दै क पूत सलूमीएल उ समूह क नेता रहा। ²⁰ अउर तब गाद क परिवार समूह आवा। दूएल क पूत एलिअसफ इ समूह क नेता रहा। ²¹ तब कोहात परिवार क लोग आएन। उ पचे ओन परित्र चीजन क ढोएन जउन पवित्तर ठउर मँ धरी रहिन। अब पवित्तर तम्बू क इ समूहन क नवा सिबिर मँ पहुँचइ क पहिले लगाइ द्या।

²² ऍकरे पाछे एप्रैम क सिबिर क तीन समूह आएन। उ पचे आपन झण्डा लइके जात्रा किहेन। पहिला समूह एप्रैम क परिवार समूह रहा। अम्मीहूद क पूत एलीसामा उ समूह क नेता रहा। ²³ ओकरे पाछे मनस्से क परिवार समूह आवा। पदासूर क पूत गम्लीएल उ दले क नेता रहा। ²⁴ तब बिन्यामीन क परिवार समूह आवा। गिदौनी क पूत अबीदान उ दले क नेता रहा।

²⁵ कतार मँ आखिरी तीन ठु परिवार समूह दूसर सबहिं परिवार समूह बरे पीछ रच्छक रहेन। इ सब समूह दान क सिबिर स रहेन। उ पचे आपन निसान क संग जात्रा किहन। पहिला समूह दान क परिवार समूह क रहा। अम्मीसद्दै क पूत अहीएजेर उ समूह क नेता रहा। ²⁶ ओकरे ठीक पाछे आसेर क परिवार समूह आवा। ओक्रान क पूत पजीएल उ समूह क नेता रहा। ²⁷ तब नप्ताली क परिवार समूह आवा। एनान क पूत अहीरा उ समूहे क नेता रहा। ²⁸ इहइ तरह इस्राएल एक जगह स दूसर जगह पइ आपन समूहन क साथ, जब कबहुँ भी उ सिबिर लइ जाइ जात्रा करत रहेन।

²⁹ रुएल क पूत होबाब मिद्यानी रहा। (रुएल मूसा क ससुर रहा।) मूसा होबाब स कहेस, “हम पचे उ देस क जात्रा करत अही जेका यहोवा हम पचन क देइ क बचन दिहे अहइ। एह बरे हम लोगन क संग आवा। हम पचे तोहरे संग नीक बेउहार करब। यहोवा इस्राएल बरे नीक चीज देइ क बचन दिहे अहइ।”

³⁰ मुला होबाब जवाब दिहेस, “नाही; मइँ तोहरे संग न जाब। मइँ आपन देस अउ मनइयन क लगे जाब।”

³¹ तब मूसा कहेस, “मेहरबानी कइके हमका जिन तजा। तू जानत अहा कि रेगिस्तान मँ हम पचन्क कइसा सिबिर लगाइ क होइ। तू हमार राह क देखइया होब्या। ³² अगर तू हमरे संग आवत ह्या तउ यहोवा जउन कछू नीक चीज देइहीं, हम तोहर संग हींसा बाँटब।”

³³ उ सबइ यहोवा क पहाड़े स जात्रा सुरू किहेन। याजक लोग करार क सन्दूख लिहन अउ मनइयन क अगवा चलेन। उ पचे सिबिर डावइ बरे उचित ठउर क निहारत निहारत तीन दिना तलक लोगन क आगे-आगे सन्दूख लइ चलत रहेन। ³⁴ यहोवा क बदरा ओनके ऊपर मँड़रात रहा। अउर हर एक भिन्सारे जब उ पचे आपन सिबिर क तजि देत रहेन तउ ओनका राह देखाँवइ बरे बदरा हुवाँ रहत रहा।

³⁵ जब पवित्तर सन्दूख सिबिर स बाहर कइ जात रहा। मूसा हमेसा कहत रहा:

³⁶ अउर जब पवित्तर सन्दूख आपन ठउर प धरा जात रहा, तब मूसा सदा कहत रहा,