Chronological

इस्राएल परमेस्सर क अहइ

19 यहोवा मूसा स कहेस, ² “इस्राएल क सबहिं लोगन स कहा: कि मइँ तोहार परमेस्सर अहउँ मइँ पवित्तर हउँ! एह बरे तू सबन्क पवित्तर होइ चाही!

³ “तू पचन मँ स हर एक मनई क आपन महतारी बाप क सम्मान करइ चाही अउ मोर बिस्राम क खास दिनन क मनावइ चाही। मइँ तोहार पवित्तर परमेस्सर अहउँ!

⁴ “मूतिर्यन क उपासना जिन करा। आपन बरे देवतन क मूतिर्यन क धातु गलाइके जिन बनावा। मइँ तू लोगन क परमेस्सर यहोवा अहउँ।

⁵ “जबहिं तू यहोवा क मेलबलि चढ़ावा तउ तू पचे ओका अइसे ठीक तरीका स चढ़ावा कि यहोवा तोहार बलि क स्वीकार कइ लेइ। ⁶ जउने दिन चढ़उब्या तू ऍका खाइ सकब्या अउ दूसरे दिना भी। मुला अगर बलि क कछू हींसा तीसर दिन भी बचि जाइ तउ ओका तू पचन क आगी मँ बारि देइ चाही। ⁷ कउनो भी बलि क तीसर दिन नाहीं खाइ चाही। इ असुद्ध बाटइ। इ अंगीकार नाहीं होइ। ⁸ अगर कउनो मनई अइसा कामन करत ह तउ उ दोखी होइ। काहेकि उ यहोवा क पवित्तर चीजन क दूसित किहेस। उ मनई क ओकर लोगन स अलग कइ दीन्ह जाई।

⁹ “जबहिं तू कटनी क समइ आपन फसल काट्या तउ तू पचे सब कइँती स खेत क कोनन ताई जिन काट्या अउर अगर अन्न जमीन पइ गिरि जात ह तउ तू पचन्क ओका बटोरइ नाहीं चाही। ¹⁰ आपन अंगूरे क बगिया क सारा अंगूर जिन तोड़्या। जउन अंगूर भुइँया पइ गिरि जाइँ ओनका जिन उठावा। काहेकि तू पचन्क उ सबइ चीजन गरीब लोगन अउर जउन तोहार बीच रहइवाला बिदेसियन बाटइ ओनके बरे छोड़इ चाही। मइँ यहोवा तोहार परमेस्सर अहउँ!

¹¹ “तू पचन्क चोरी नाहीं करइ चाही। तू पचन्क लोगन्क ठगी नाहीं करइ चाही। तू पचन्क आपुस मँ झूठ नाहीं बोलइ चाही। ¹² तू पचन्क मोरे नाउँ पइ झूठा बचन नाहीं देइ चाही। अगर तू पचे अइसा करत ह्या तउ तू पचे आपन परमेस्सर क नाउँ क अपमान करत ह। मइँ यहोवा तोहार परमेस्सर अहउँ!

¹³ “तू पचन्क आपन पड़ोसी क धोखा नाहीं देइ चाही। तू पचन्क ओकर चोरी नाहीं करइ चाही। तू पचन्क मजदूर क मजदूरी पूरी रात, भिन्सारे तलक नाहीं रोकइ चाही।^[a]

¹⁴ “तू पचन्क कउनो बहिरे मनई क सरापइ नाहीं चाही। तू पचन्क कउनो आँधर क भहरावइ बरे ओकरे अगवा कउनो चीज नाहीं रखइ चाही। मुला तू पचन्क आपन परमेस्सर यहोवा क सम्मान करइ चाही। मइँ यहोवा अहउँ!

¹⁵ “तू पचन्क क निआव करइ मँ ईमानदार होइ चाही। न तउ तू पचन्क गरीबन क संग खास पच्छपात करइ चाही अउ न ही बड़कन अउ धनी मनइयन बरे कउनो आदर देखावइ चाही। तू पचन्क आपन पड़ोसी क संग निआव करत समइ ईमानदार होइ चाही। ¹⁶ तू पचन्क दूसर लोगन्क खिलाफ चारिहुँ कइँती अफवाह सँचरावत भए नाहीं चलइ चाही। अइसा कछू जिन करा जउन तू पचन्क पड़ोसी क खतरा मँ डाइ देइ। मइँ यहोवा अहउँ!

¹⁷ “तू पचन्क आपन हिरदइ मँ आपन भाइयन स घिना नाहीं करइ चाही। अगर तोहार पड़ोसी कछू बुरा करत ह तउ एकरे बारे मँ ओका समझावा। मुला ओका छिमा करा! ¹⁸ लोग, जउन तोहार बुरा करइँ, ओका बिसरि जा। ओसे बदला लेइ क कोसिस जिन करा। आपन पड़ोसी स वइसेन ही पिरेम करा जइसे अपने आप स करत ह्या। मइँ यहोवा अहउँ!

¹⁹ “तू पचन्क मोरे नेमन क पालन जरूर करा। दुइ जाति क जनावरन क प्रजनन बरे आपुस मँ जिन मिलावा। तू पचन क खेते मँ दुइ तरह क बिआ नाहीं मिलावइ चाही। तू पचन्क दुइ तरह क मिलावट स बना ओढ़ना क नाहीं पहिरइ चाही।

²⁰ “इ होइ सकत ह कि कउनो दूसर मनई क दासी स कउनो मनई क यौन संबंध होइ। अगर इ दासी न तउ खरीदी गइ अहइ अउर न ही अजाद कराई गइ अहइ तउ ओनका जरूर दण्ड दीन्ह जाइ चाही। मुला उ पचे मउत न पइहीं। काहेकि स्त्री अजाद नाहीं रही। ²¹ उ मनई क आपन अपराध बरे मिलापवाला तम्बू क दुआरे पइ यहोवा बरे जरूर दोखबलि चढ़ावइ चाही। मनई क एक ठु भेड़ा दोखबलि क रूप मँ लावइ चाही। ²² याजक उ मनई बरे जउन पाप किहेस ह क प्रायस्चित करी। याजक यहोवा क दोखबलि क रुप मँ भेड़ा क चढ़ाइ। इ मनई क कीन्ह गए पापन बरे भेंट होइ। तब मनई आपन कीन्ह गए पापन बरे छिमा पाइहीं।

²³ “भविस्स मँ तू पचे आपन प्रदेस मँ प्रवेस करब्या। उ समइ भोजन बरे तू पचे किसिम किसिम क बृच्छ लगउब्या। पौधा लगावइ क पाछे बृच्छ क कउनो फले क प्रयोग करइ बरे तोहका तीन बरिस तलक जोहइ चाही। तू पचन क ओसे पहिले क फल क प्रयोग नाहीं करइ चाही। ²⁴ चउथे बरिस उ बृच्छ क फले यहोवा क होइहीं। इ यहोवा क स्तुति बरे पवित्तर भेंट होइ। ²⁵ तब, पँचवें बरिस तू सब उ बृच्छ क फल चखि सकत ह अउ बृच्छ तोहरे बरे जियादा स जियादा फल पइदा करी। मइँ तोहार परमेस्सर यहोवा अहउँ।

²⁶ “तू सबन्क क कउनो गोस जेहमा रकत बाटइ नाहीं खाइ चाही।

“तू पचन्क भविस्सबाणी करइ बरे जादू या कउनो दूसर चीजियन क प्रयोग नाहीं करइ चाही।

²⁷ “तू पचन्क आपन मूँड़े क बगल क बाढ़ भवा बार कटवावइ नाहीं चाही या तोहका आपन दाढ़ी क छटवावइ नाही चाही। ²⁸ कउनो मरे मनई क सुमिरन बनए रहइ बरे आपन तन क काटइ नाहीं चाही। तू पचन्क आपन सरीर प गोदना गोदवावइ नाहीं चाही। मइँ यहोवा अहउँ!

²⁹ “तू पचे आपन बिटिया क बेस्या जिन बनइ द्या। एहसे सिरिफ इ पता लागत ह कि तू ओकर इज्जत नाहीं करत ह्या। तू पचे आपन देस मँ स्त्रियन क बेस्या जिन बनइ द्या। तू पचे आपन देस क इ तरह क पापन स जिन भर जाइ द्या।

³⁰ “तू पचन्क मोरे बिस्राम क बिसेस दिनन मँ काम नाहीं करइ चाही। तू पचन्क मोरे पवित्तर ठउर क सम्मान जरूर करइ चाही। मइँ यहोवा अहउँ!

³¹ “ओझा लोगन अउ भूत सिद्ध लोगन लगे सलाह बरे जिन जा। उ पचे सिरिफ तोहका असुद्ध बनइहीं। मइँ तोहार परमेस्सर यहोवा अहउँ।

³² “बुढ़वा मनइयन क सम्मान करा। जब उ पचे कमरा मँ आवइँ तउ खड़ा होइ जा। आपन परमेस्सर क सम्मान करा। मइँ यहोवा अहउँ।

³³ “आपन देस मँ बिदेसी लोगन क संग बुरा बेउहार जिन करा! ³⁴ तू पचन्क बिदेसी लोगन क संग वइसा ही बेउहार ही करइ चाही जइसा तू पचे आपन नागरिकन क संग करत ह्या। तू बिदेसियन स वइसेन पियार करा जइसा आपन स करत ह्या। काहेकि तू पचे भी एक समइ मिस्र मँ बिदेसी रह्या। मइँ तोहार परमेस्सर यहोवा अहउँ!

³⁵ “तू पचन्क निआव करत समइ लोगन बरे ईमानदार होइ चाही। तू पचन्क चीजन क जोखइ अउ तउलइ मँ ईमानदार होइ चाही। ³⁶ तोहार झउअन ठीक नाप क होइ चाही। तोहरे नाप करइ क बासन मँ द्रव क ठीक मात्रा आवइ चाही। तोहरे तराजू अउ बटखरा चीजन्क ठीक तउलइवाला होइ चाही। मइँ तोहार परमेस्सर यहोवा अहउँ। मइँ तू पचन्क मिस्र देस स बाहेर लिआएउँ!

³⁷ “तोहका पचन्क सबहिं नेम अउ निर्णयन क सुमिरिके रखइ चाही अउ तू सबन्क ओनका पालन करइ चाही। मइँ यहोवा अहउँ!”

मूतिर् पूजा क खिलाफ चिताउनी

20 यहोवा मूसा स कहेस, ² “तोहका इस्राएल क लोगन स इ भी कहइ चाही: तोहरे देस मँ कउनो मनई आपन गदेलन मँ स कउनो क लबार देवता मोलेक क दइ सकत ह। उ मनई क जरूर मार डावइ चाही। एहसे फरक नाहीं पड़त कि उ इस्राएल क नागरिक अहइ या इस्राएल मँ बसइया कउनो बिदेसी। तू पचन क ओका पाथर लोकाइ लोकाइ के मारि डावइ चाही। ³ मइँ उ मनई क खिलाफ होब। मइँ ओका ओकरे लोगन स अलग कइ देब। काहेकि उ आपन गदेलन क मोलेक क दिहस। उ मोरे पवित्तर नाउँ क अपमान किहेस। उ मोरे पवित्तर ठउरे क असुद्ध किहस। ⁴ होइ सकत ह कि साधारिन लोग उ मनई क उपेच्छा करइ। होइ सकत ह कि उ मनई क न मारइ जउन गदेलन क मोलेक क दिहस ह। ⁵ मुला मइँ उ व्यक्ति अउ ओकरे परिवार क खिलाफ होब। मइँ ओका ओकरे लोगन स अलग करब। मइँ कउनो भी अइसे व्यक्ति क ओकरे लोगन स अलग करब, जउन मोलेक क पाछे वेस्या क तरह करत ह।

⁶ “मइँ उ मनई क खिलाफ होब जउन कउनो ओझा या भूतसिद्ध क लगे सलाह लेइ बरे जात ह। अइसा करइके उ मोहे स अबिस्सासी होइ जात ह। एह बरे मइँ उ मनई क ओकरे लोगन स अलग करब।

⁷ “बिसेस बना। आपन क पवित्तर बनावा। काहेकि मइँ यहोवा तोहार परमेस्सर अहउँ। ⁸ मोर सबइ आग्या क पालन करा अउ ओनका सुमिरा। मइँ यहोवा अहउँ अउर मइँ तू लोगन क आपन बिसेस लोग बनाएउँ ह।

⁹ “अगर कउनो मनई आपन महतारी-बाप क सराप देत ह तउ उ मनई क मारि डावइ चाही। उ आपन पिता या महतारी क सराप देत ह, एह बरे उ आपन मउत क खुद जिम्मेदार होइ।

यौन पापन्क दण्ड

¹⁰ “अगर कउनो मनई आपन पड़ोसी क पत्नी क संग यौन सम्बंध रखत ह तउ स्त्री अउ मनसेधू दुइनउँ व्यभिचारी क अपराधी अहइँ। एह बरे दुइनउँ क जरूर मारि डावइ चाही। ¹¹ अगर कउनो मनई आपन सौतेली महतारी स यौन सम्बंध करत ह तउ उ मनई क मारि डावइ चाही। उ मनई क अउ ओकर सौतेली महतारी दुइनउँ क मार डावइ चाही।^[b] उ मनई आपन पिता क खिलाफ खुद पाप किहेस ह।

¹² “अगर कउनो मनई आपन पतोहू क संग यौन सम्बंध करत ह तउ दुइनउँ क मारि डावइ चाही। उ पचे बहोत बुरा यौन पाप किहेन ह। ओनका दण्ड जरुर मिलइ चाही।

¹³ “अगर कउनो मनई कउनो मनई क संग मेहरारु जइसा यौन सम्बंध करत ह तउ दुइनउँ क मारि डावइ चाही। उ पचे बहोत बुरा पाप किहन ह। ओनका दण्ड जरुर मिलइ चाही।

¹⁴ “अगर कउनो मनई कउनो मेहरारु अउ ओकरी महतारी क संग यौन सम्बंध करत ह तउ इ यौन पाप अहइ। लोगन्क उ मनई अउ दुइनउँ मेहररुअन क आगी मँ बारि देइ चाही। इ यौन पाप क आपन लोगन मँ जिन होइ द्या।

¹⁵ “अगर कउनो मनई कउनो गोरु स यौन सम्बंध करइ तउ उ मनई क मारि डावइ चाही अउ तोहका उ गोरु क मारि डावइ चाही। ¹⁶ अगर कउनो मेहरारु कउनो गोरु स यौन सम्बंध करत ह तउ तू पचन क उ मेहरारु अउ उ गोरु क मारि डावइ चाही। ओनका जरुर मारि डावइ चाही।

¹⁷ “इ एक भाई अउ ओकरी बहिन या सोतेली बहिन बरे लज्जा क बात अहइ कि उ पचे आपुस मँ यौन सम्बंध करइँ। ओनका समाज कइँती स दण्ड मिलइ चाही। उ पचन क आपन लोगन स अलगाइ देइ चाही। उ मनई जउन आपन बहिन क संग यौन सम्बंध किहस ह, आपन पाप बरे जरूर दण्ड पाइ।

¹⁸ “अगर कउनो मनई कउनो मेहरारु क संग मासिक धर्म क रकत बहइ क समइ यौन सम्बंध करी, तउ दुइनउँ क आपन लोगन स अलगाइ देइ जाई। उ पचे पाप किहन क काहेकि उ पचे रकत क स्रोत क उघारेन ह।

¹⁹ “तू सबन्क आपन महतारी क बहिन या पिता क बहिन क संग यौन सम्बंध नाहीं करइ चाही। इ आपन नगीचे क रिस्तेदार क नंगापन क उघारेन ह। ऍह बरे दुइनउँ क ओनके पाप बरे जरूर दण्ड मिली चाही।

²⁰ “कउनो मनई क आपन चाचा-मामा क पत्नी क संग नाहीं सोवइ चाही। इ मनई अउ ओकर चाची अउ मामी क ओनके पापन बरे दण्ड मिली। उ पचे बगैर कउनो सन्तान क मरिहीं।

²¹ “कउनो मनई क बरे इ बुरा अहइ कि उ आपन भाई क स्त्री क संग यौन सम्बंध करइ। उ मनई आपन भाई क खिलाफ पाप किहे बाटइ। ओकर कउनो सन्तान नाहीं होइ।

²² “तू पचन क मोर सारे नेम अउ निर्णय क सुमिरइ चाही अउ तोहका ओनकर पालन जरुर करइ चाही। मइँ तू पचन क तोहरे प्रदेस लइ जात अहउँ। तू लोग उ प्रदेस मँ रहब्या। अगर तू लोग मोर नेमन अउ सबइ निर्णय क मानत रहब्या तउ उ प्रदेस तू लोगन क निकारिके बाहेर न करी। ²³ मइँ दूसर लोगन क उ प्रदेस क तजइ क मजबूर करत हउँ। काहेकि ओन लोगन उ सबइ पाप किहेन। मइँ ओन पापन स घिना करत हउँ। एह बरे तू पचन्क ओकरे जीवन-सैली क नकल नाहीं करइ चाही। ²⁴ मइँ कहेउँ ह कि तू पचे ओनकर प्रदेस पउब्या। मइँ ओनकर प्रदेस तू पचन क देबउँ। उ तोहार प्रदेस होइ। उ प्रदेस दूध अउ सहद क नदियन बहत हीं। मइँ तोहार परमेस्सर यहोवा अहउँ!

“मइँ तू पचन्क खास बनाएउँ ह। मइँ तोहरे संग दूसर रास्ट्रन स अलग बेउहार किहेउँ ह। ²⁵ एह बरे तू पचन क सुद्ध जनावरन क संग असुद्ध जनावरन स जरूर अलग बेउहार करइ चाही। तू पचन क सुद्ध पंछियन क संग असुद्ध पंछियन स जरूर अलग बेउहार करइ चाही। ओनमाँ स कउनो भी असुद्ध पंछी, जनावरन अउ कीड़ा-पतंगा क जिन खा जउन भुइयाँ प रेंगत हीं। मइँ ओन चीजन क असुद्ध बनएउँ ह। ²⁶ तू पचन क मोरे बरे पवित्तर होइ चाही। काहेकि मइँ यहोवा अहउँ अउ मइँ पवित्तर हउँ। मइँ तोहका दूसर रास्ट्रन स अलग कइ दिहे हउँ तोहका बिसेस लोग बनावई बरे जउन कि मोर अहइ।

²⁷ “अगर कउनो मनसेधू या मेहरारु ओझा होइ या कउनो जादूगर होइ, ओनका निहचय ही मार दीन्ह जाइ। लोगन क चाही कि उ पचे पाथर मारि मारिके मार देइँ। उ आपन मउत क खुद ही कसूरवार होइ।”

याजकन बरे नेम

21 यहोवा मूसा स कहेस, “इ सबइ बातन हारून क याजक पूतन स कहा: कउनो मरे भए मनई क छुइके याजक आपन क असुद्ध न करइ। ² मुला अगर मरा भवा मनई ओकरे निजके रिस्तेदारन मँ स कउनो अहइ तउ उ मरे भए क ल्हास क छुइ सकत ह। याजक आपन क असुद्ध कइ सकत ह अगर मरा मनई ओकर महतारी, बाप, ओकर पूत, या बिटिया, ओकर भाई, ³ ओकर बिन बियाही बहिन अहइ। (इ बहन ओकर निचके क रिस्तेदार अहइ काहेकि ओकर भतार नाहीं अहइ।) एह बरे याजक आपन क असुद्ध कइ सकत ह, अगर उ मरत ह। ⁴ मुला याजक आपन क असुद्ध नाहीं करइ चाही, अगर मरा भवा व्यक्ति बियाहे क कारण ओकर रिस्तेदार होइ।^[c]

⁵ “याजकन क आपन मूँड़े क मूडन नाहीं करावइ चाही। याजकन क आपन दाढ़ी क सिरा नाहीं कटवावइ चाही। याजकन क आपन चाम पइ कहूँ भी काटइ नाहीं चाही। ⁶ याजकन क आपन परमेस्सर बरे पवित्तर होइ चाही। उ पचे आपन परमेस्सर क नाउँ क दूसित नाहीं करइ चाही। काहेकि उ पचे आपन भोजन अउ भेंट यहोवा क चढ़ावत ह एह बरे ओनका पवित्तर होइ चाही।

⁷ “याजक परमेस्सर बरे पवित्तर अहइ। एह बरे याजक क अइसी मेहरारु स बियाह नाहीं करइ चाही जउन कउनो क संग यौन सम्बंध किहे होइ। याजक क कउनो पतुरिया, या तलाक दीन्ह गइ मेहरारु स बियाह नाहीं करइ चाही। ⁸ याजक परमेस्सर बरे पवित्तर अहइ। एह बरे तू पचन क ओकरे साथे खास तरह स बेउहार करइ चाही। काहेकि उ पवित्तर चीजन क लइ चलत बाटइ। उ पवित्तर रोटी परमेस्सर क चढ़ावत ह अउर मइँ पवित्तर अहउँ। मइँ यहोवा अहउँ, अउर मइँ तू पचन क पवित्तर बनावत अहँउ।

⁹ “अगर याजक क बिटिया पतुरिया बन जात ह तउ उ आपन इज्जत बरबाद करत ह अउ अपने भतारे पइ कलंक लगावत ह। एह बरे ओका बारि देइ चाही।

¹⁰ “महा याजक आपन भाइयन मँ स चुना जात रहा। अभिसेक क तेल ओकरे मूँड़े पइ नावा जात रहा। इ तरह उ महा याजक क बिसेस कर्तव्य बरे तैनात कीन्ह जात रहा। ओका महा याजक क खास ओढ़ना पहिरइ बरे चुना जात रहा। ओका आपन बार जंगली ढंग स नाहीं बिखेरइ चाही। ओका आपन ओढ़ना बढ़ाइ देइ नाहीं चाही। ¹¹ ओका मुर्दा क छुइके आपन क असुद्ध नाहीं बनावइ चाही। ओका कउनो मुर्दा क लगे नाहीं जाइ चाही। चाहे उ ओकर महतारी-बाप का ही काहे न होइ। ¹² महा याजक क परमेस्सर क पवित्तर ठउर क बाहेर नाहीं जाइ चाही। अगर उ अइसा किहस तउ उ असुद्ध होइ जाइ अउ उ परमेस्सर क पवित्तर ठउर क भी अपमान कइ देइ। अभिसेक क तेल महा याजक क मूँड़े पइ नावइ चाही। मइँ यहोवा अहउँ।

¹³ “महा याजक क सिरिफ ओकर संग बियाह करइ चाही जउन कुवाँरी होइ। ¹⁴ महा याजक क अइसी मेहरारु स बियाह नाहीं करइ चाही जउन कउनो दूसर मनई क संग यौन सम्बंध रख चुकी होइ। महा याजक क कउनो रण्डी, तलाक दीन्ह गइ मेहरारु या राँड़ मेहरारु स बियाह नाहीं करइ चाही। महा याजक क आपन लोगन मँ स एक कुवाँरी स बियाह करइ चाही। ¹⁵ ओका आपन गदेलन क अपवित्तर नाहीं करइ चाही। मइँ, यहोवा, याजक क ओकरे खास कामे बरे पवित्तर बनाएउँ ह।”

¹⁶ यहोवा मूसा स कहेस, ¹⁷ “हारून स कहा: अगर तोहरे बंस मँ जन्मइवालन क सन्तानन मँ स कउनो आपन मँ कउनो दोख पावइ तउ ओनका खास रोटी परमेस्सर तलक नाहीं लइ जाइ चाही। ¹⁸ कउनो मनई, जेहमाँ कउनो दोख होइ, याजकन क काम न कइ सकत ह। उ मोरे लगे भेंट नाहीं लिआइ सकत ह। इ सबइ लोग याजक क रुप मँ सेवा नाहीं कइ सकतेन। आँधर मनई, लँगड़ा मनई, भयंकर चेहरा वाला मनई, बहोत जियादा लम्बी बाँह अउर टाँगवाला मनई। ¹⁹ टूटा गोड़ या हाथवाला मनई, ²⁰ कुबड़ा मनई, बौना, आँखी मँ दोखवाला मनई, खजुरी अउ चरम रोग क मनई, बधिया कीन्ह गवा मनई।

²¹ “अगर हारून क कउनो बंसे मँ कछु दोख अहइ। अहइ तउ उ यहोवा क होमबलि नाहीं चढ़ाइ सकत अउर उ खास रोटी परमेस्सर क लगे नाहीं लइ जाइ सकत ह। ²² बहरहाल उ पवित्तर रोटी खाइ सकत ह। उ सबन त पवित्तर रोटी भी खाइ सकत ह। ²³ मुला उ सबन त जियादा पवित्तर ठउरे मँ पर्दा स होइके नाहीं जाइ सकत अउर न ही उ वेदी क लगे जाइ सकत ह। काहेकि ओहमाँ कछू दोख अहइ। ओका मोरे पवित्तर ठउर क अपवित्तर नाहीं बनावइ चाही। मइँ यहोवा ओन ठउरन क पवित्तर बनवत हउँ।”

²⁴ एह बरे मूसा इ सबइ बातन हारून स, हारून क पूतन अउ इस्राएल क सबहिं लोगन स कहेस।