Chronological

होमबलि क नेम

1 यहोवा परमेस्सर मूसा क मिलापवाला तम्बू स बोलाएस अउ ओसे कहेस। यहोवा कहेस, ² “इस्राएल क मनइयन क निदेर्स द्या कि जब तू लोगन मँ स कउनो मनई यहोवा बरे भेंट लइ आवइ तउ उ ओकर झुण्ड या खरका स होइ चाही।

³ “अगर कउनो मनई आपन झुण्ड मँ स कउनो क होमबलि देइ तउ उ नर होइ चाही अउ गोरु मँ कउनो दोख नाहीं होइ चाही। उ मनई क चाही कि गोरु क मिलापवाला तम्बू क दुआरे प लइ जाइ। तब यहोवा भेंट क अंगीकार करी। ⁴ इ मनई क आपन हाथ क गोरु क मूँड़ि प धरइ चाही। जब एकॉ बलि दीन्ह जाइ क होइ। यहोवा होमबलि क ओकर पाप बरे प्रायस्चित क खातिर अंगीकार करी।

⁵ “मनई क चाही कि बछवा क यहोवा क समन्वा मारइ। तब हारून क याजक बेटवन क बछवा क रकत मिलापवाला तम्बू क दुआरे प वेदी क चारिहुँ कइँती बहावइ चाही। ⁶ याजक उ गोरु क चाम हटाइ देइ अउ ओका टूका मँ काटी। ⁷ हारून क याजक बेटहनन क वेदी प काठ अउ आगी धरइ चाही। ⁸ हारून क याजक बेटहनन क उ सबइ टूकन, (मूँड़ि अउ चबीर्र्) क काठे प धरइ चाही। उ काठ वेदी प आगी क ऊपर होत ह। ⁹ याजक क गोरू क भितरे क हींसा अउ गोड़ी क पानी स धोवइ चाही। तब याजक क गोरू क इ सबइ हींसा क वेदी प बारइ चाही। इहइ होमबलि अहइ यानी एक ठु उपहार, यहोवा क खुस करइ बरे एक ठु सुगन्ध।

¹⁰ “अगर कउनो मनई भेड़ी या बोकरी क होमबलि चढ़ावइ तउ उ एक अइसा नर गोरु क भेंट देइ जेहमाँ कउनो दोख न होइ। ¹¹ उ मनई क वेदी क उत्तर कइँती यहोवा क समन्वा गोरु क मारइ चाही। हारून क याजक बेटवन वेदी क चारिहुँ कइँती रकत छिड़कइ चाही। ¹² तब याजक क चाही कि उ गोरु क टूकन मँ काटइ। गोरु क मूँड़ी अउ चबीर् काठे क ऊपर सिलसिला स धरइ चाही। काठ वेदी प आगी क ऊपर रहत ह। ¹³ याजक क गोरु क भीतर क हींसन क अउ ओकरे गोड़े क पानी स धोवइ चाही। तब याजक क चाही कि उ गोरु क इ सबहिं हींसन क वेदी प बारइ। इ होमबलि अहइ यानी एक ठु उपहार यहोवा क खुस करइ बरे एक ठु सुगन्ध।

¹⁴ “अगर कउनो व्यक्ति यहोवा क एक ठु पंछी होमबलि क रूप चढ़ावत ह तउ इ पंछी फाख्ता या नान्ह कबूतर होइ चाही। ¹⁵ याजक भेंट क वेदी प लिआइ। याजक पंछी क मूँड़ि क काट देइ। तब उ पंछी क वेदी प बारी। पंछी क खून वेदी कइँती बहइ चाही। ¹⁶ याजक क पंछी क गटइ क थइली अउ ओकरे पखना क वेदी क पूरब कइँती लोकइ देइ चाही। इ उहइ जगह अहइ जहाँ उ पचे वेदी स निकारिके राखी रखई जात हीं। ¹⁷ तब याजक क पखना क लगे पंछी क जरूर काटइ चाही, मुला पंछी क दुइ हींसा मँ नाहीं बाँटइ चाही। याजक क वेदी क ऊपर आगी प धरी काठे क ऊपर पंछी क जरूर बारइ चाही। इ होमबालि अहइ यानी एक ठु उपहार, यहोवा क खुस करइ बरे एक ठु सुगन्ध।

अन्नबलि क नेम

2 “जब कउनो मनई यहोवा क अन्न बलि चढ़ावइ तउ ओकर भेंट पातर आटा क होइ चाही। उ मनई उ आटे प तेल नावइ अउ ओह प लोहबान धरइ। ² तब उ ऍका हारून क याजक बेटवन क लगे जरूर लिआवइ चाही। तब याजक तेल अउ लोहबान स मिला भवा एक मूठी आटा लेइ अउर एकॉ वेदी प स्मृति भेंट क रुप मँ बारइ देइ। इ यहोवा बरे एक भेंट एक सुहावना सुगन्ध होइ। ³ बची भई अन्नबलि हारून अउ ओकरे पूतन बरे होइ। इ भेटं यहोवा क दीन्ह जाइवाली भेंटन मँ स सब त परमपवित्तर होइ।

चूल्हा मँ पकी अन्नबलि क नेम

⁴ “जबहिं तू चूल्हा मँ पकी भइ अन्नबलि क भेंट लिआवा तउ इ बे खमीरे तेल मिला भवा बढ़िया आटा क फुलका या ऊपर स तेल डावा भवा बिना खमीरा क पतला केक होइ चाही। ⁵ अगर तू भूँजइ वाली कड़ाही स अन्नबलि लिआवत ह तउ इ तेल स मिला भवा बे खमीरे क गेहूँ क बढ़ियाँ आटा क केक होइ चाही। ⁶ तोहका ऍका टूका कइके कइउ हींसा मँ तोड़इ चाही अउ ऍन प तेल चुपरइ चाही। इ अन्नबलि अहइ। ⁷ अगर तू अन्नबलि क भूँजइ वाली कड़ाही स लिआवत ह तउ इ तेल स मिला भवा गेहूँ क बढ़ियाँ आटा क होइ चाही।

⁸ “तू इ चीजन स बनी अन्नबलि यहोवा खातिर लइ अउब्या। तू इ चीजन क याजक क लगे लइ अउब्या अउ उ ओनका वेदी प धरी। ⁹ फिन याजक उ अन्नबलि मँ स ऍकर कछू हींसा लइके ओका स्मृति भेंट क रुप मँ वेदी प बारि देइ। अउर इ एक ठु उपहार, यहोवा क खुस करइ बरे एक ठु सुगन्ध होइ। ¹⁰ बची भइ अन्नबलि हारून अउ ओकरे बेटवन बरे होइ। इ भेंट यहोवा बरे चढ़ाई जाइवाली भेंटन मँ स परमपवित्तर होइ।

¹¹ “तोहका यहोवा क खमीर स या मधु स बना भवा अन्नबलि क भेंट क रूप मँ नाहीं चढ़ावइ चाही। ¹² तू पहिली फसल क खमीर स बना भवा अन्न भेंट यहोवा बरे भेंट क रूप मँ लाइ सकत ह, मुला एका खुस करइ बरे सुगन्ध क रुप मँ वेदी प बारइ नाहीं चाही। ¹³ तोहका आपन लिआइ भइ हर एक अन्नबलि प नोन भी जरूर धरइ चाही। यहोवा स तोहरे करार क मुताबिक नोन क जरूरत क अनुसार अन्नबलि मँ धरइ स तोहका नाहीं रोकइ चाही। तोहका आपन सबहिं भेंटन प नोन धरइ चाही।

पहली पकी फसल स अन्नबलि क नेम

¹⁴ “अगर तू पहिली पकी फसल स अन्नबलि लिआवत ह तउ तोहका भूँजी भइ ताजा अनाज लिआवइ चाही। इ अनाजे क दरिके नान्ह नान्ह टूकन मँ तोरा जाइ चाही। इ भेंट तोहार पहिली पकी फसल क जइसा अन्नबलि होइ। ¹⁵ तोहका ऍह प तेल नावइ अउ लोहबान जरूर धरइ चाही। इ अन्नबलि अहइ। ¹⁶ अउर याजक क चाही कि उ स्मृति भेंट क रुप मँ दरा भवा अनाजे क कछू हींसा, तेल अउ ऍह पइ धरा पूरा लोहबान क बारइ। इ यहोवा बरे उपहार होइ।

मेलबलि क नेम

3 “अगर कउनो मनई आपन झुण्ड मँ स एक ठु नर या मादा जनावर यहोवा क समन्वा मेलबलि क रूप मँ भेंट चढ़ावत ह तउ ओहमाँ कउनो दोख नाहीं होइ चाही। ² इ मनई क आपन हाथ गोरु क मूँड़ि प जरूर धरइ चाही। मिलापवाला तम्बू क दुआरे प उ मनई क जरिये उ गोरु क जरूर मारि डावइ चाही। तब हारून क याजक पूतन क वेदी क चारिहुँ कइँती रकत बहावइ चाही। ³ मेल बलि मँ स यहोवा क उपहार क रूप मँ भीतरी हींसन क ढाँपइ वाली अउ भितरे क हींसा मँ रहइवाली चबीर् क भेंट जरूर चढ़ावइ चाही। ⁴ ओका दुइनउँ गुर्दन अउर ओका ढाँकइ वाला चर्बी क अउर पुट्ठा के चर्बी क भी भेंट चढ़ावइ चाही। तउ उ झिल्ली जउन करेजा स चिपका भवा ह ओका भी गुर्दन क संग निकारि लेइ चाही। ⁵ तब हारून क बेटवन चबीर् क वेदी प बरिहीं। उ पचे चर्बी क आगी प धरी भइ लकड़ी प राखी। इ एक उपहार अहइ। एकर सुगन्धि यहोवा क खुस रखत ह।

⁶ “अगर एक मनई यहोवा बरे आपन झुण्ड मँ स मेलबलि क रुप मँ नर अउर मादा गोरु लिआवत ह तब ओका सिरिफ उ गोरु क भेंट देइ चाही जेहमाँ कउनो दोख न होइ। ⁷ अगर उ आपन बलि क रूप मँ एक ठु मेमना लिआवत ह तउ ओका यहोवा क समन्वा बलि देइ चाही। ⁸ ओका आपन हाथ गोरु क मूँड़े प धरइ चाही अउ मिलापवाला तम्बू क समन्वा ओका मारइ चाही। तब हारून क बेटवन वेदी प चारिहुँ कइँती गोरु क रकत बहावइ चाही। ⁹ इ मनई क चबीर् स भरी पूरी पूँछ गोरु क पिछली हड्डी क आखरी हींसा स कटा भवा चर्बी, अउ उ चर्बी जउन भीतरी हींसा क ढाँपि रहत ह अउ उ सबइ चर्बी जउन भितरे मँ अहइ क यहोवा क उपहार क रूप मँ भेंट चढ़ावइ चाही। ¹⁰ ओका दुइनउँ गुर्दन अउर ओनका ढाँपइ वाला चर्बी क अउर पुट्ठा क चर्बी क भी भेंट चढ़ावइ चाही। उ झिल्ली जउन करेजा स चिपका भवा ह ओका भी निकारि लेइ चाही अउर गुर्दन क संग चढ़ावई चाही। ¹¹ तब याजक वेदी प ऍका जरूर बारी। इ खइया अहइ, इ यहोवा बरे एक ठु उपहार होइ।

¹² “अगर ओकर बली एक ठु बोकरा अहइ तउ उ ओका यहोवा क समन्वा जरूर भेंट देइ। ¹³ उ व्यक्ति क बोकरा क मूँड़ी प हाथ धरइ चाही। ओका मिलापवाला तम्बू क समन्वा एकॉ मारइ चाही। तब्बइ हारून क बेटवन बोकरा क रकत वेदी प चारिहुँ कइँती बहाइहीं। ¹⁴ तब उ व्यक्ति क बोकरा क एक हींसा यहोवा बरे उपहार क रुप मँ चढ़ावइ बरे लिआवइ चाही। इ मनई क भीतरी हींसा क अउ ओकरे चारिहुँ कइँती क चबीर् क भेंट जरूर चढ़ावइ चाही। ¹⁵ ओका दुइनउँ गुर्दन अउर ओनका ढाँपइ वाला चर्बी क अउर पुट्ठा के चर्बी क भी भेंट चढ़ावइ चाही। उ झिल्ली जउन करेजा स चिपका भवा ह ओका भी निकारि लेइ चाही अउर गुर्दन क संग चढ़ावी चाही। ¹⁶ याजक क वेदी प बोकरा क हींसा क जरूर बारइ चाही। इ खइया अहइ, यहोवा बरे एक ठु उपहार। सबहिं चर्बी यहोवा क अहइ। ¹⁷ इ नेमॅ तोहार सबहिं अगुवा पीढ़ियन मँ हमेसा चलत रही। तू जहाँ कहूँ भी रहा, तोहका खून या चबीर् नाहीं जरूर खाइ चाही।”

संजोग स भवा पाप बरे पापबलि क नेम

4 यहोवा मूसा स कहेस, ² “इस्राएल क मनइयन स कहा: अगर कउनो व्यक्ति स संजोग क कारण कउनो अइसा पाप होइ जाइ जेका यहोवा न करइ क हुकुम दिहे अहइ तउ उ व्यक्ति क नीचे लिखी भई बात करइ चाही:

³ “अगर अभिसिक्त याजक स कउनो पाप भवा होइ अउ इ लोगन क बुरा बनावत हीं तउ ओका आपन कीन्ह गए पाप बरे यहोवा क बलि चढ़ावइ चाही। ओका एक बछवा यहोवा क भेंट मँ जरूर देइ चाही जेहमाँ कउनो दोख न होइ। ओका यहोवा क बछवा पापबलि क रुप मँ जरूर चढ़ावइ चाही। ⁴ अभिसिक्त याजक क उ बछवा क यहोवा क समन्वा मिलापवाला तम्बू क दुआरे प जरूर लावइ चाही। ओका आपन हाथ उ बछवा क मूँड़े प जरूर धरइ चाही अउ यहोवा क समन्वा ओका मारि देइ चाही। ⁵ तब अभिसिक्त याजक क बछवा क कछू रकत जरूर लेइ चाही अउ मिलापवाला तम्बू क अन्दर लइ जाइ चाही। ⁶ याजक क आप अँगुरी खून मँ डावइ चाही अउ महा पवित्तर ठउर क पर्दा क समन्वा खून क सात दाई परमेस्सर क समन्वा छिछकारइ चाही। ⁷ याजक क कछू खून महकउआ धूप क वेदी क सींगन प जरूर लगावइ चाही। (इ वेदी यहोवा क समन्वा मिलापवाला तम्बू क अन्दर अहइ।) याजक क बछवा क सारा खून होमबलि क वेदी क आधार प जरूर उड़ेरइ चाही। (इ वेदी मिलापवाला तम्बू क दुआर प अहइ।) ⁸ अउर ओका पापबलि कीन्ह गइ बछवा क सारी चबीर् जरूर निकारि लेइ चाही। ओका भितरे क हींसा क ढाँपि भइ चर्बी अउ ओकरे चारिहुँ कइँती क चबीर् क निकारि लेइ चाही। ⁹ ओका दुइनउँ गुर्दन अउर ओनका ढाँपइ वाला चबीर् अउ पुट्ठा प क चबीर् क भी भेंट चढ़ाई चाही। ओका उ झिल्ली जउन करेजा स चिपका भवा ह ओका भी निकारि लेइ चाही अउर गुर्दन क संग चढ़ावइ चाही। ¹⁰ याजक क इ सबइ चीजन ठीक उहइ तरह लेइ चाही जउने तरह उ इ सबइ चीजन मेलबलि क बछवा स लिहे रहा। याजक क होमबलि क वेदी प गोरु क भितरे क हींसन क जरूर बारि देइ चाही। ¹¹ मुला याजक क बछवा क चाम, मूँड़, गोड़, भीतर क हींसन अउ तने क बेकार हींसा जरूर निकारि देइ चाही। ¹² याजक क डेरा क बाहेर खास ठउरे इ हींसन जउन बछवा क सरीर क बचा भवा हींसा अहइ क हुँआ लइ जाइ चाही जहाँ राखी डारी जात ह। याजक क हुआँ काठ क आगी पइ जहाँ राखी क डारी दीन्ह गवा ह इन हींसन क जरूर बारइ चाही।

¹³ “अइसा होइ सकत ह कि समूचइ इस्राएल रास्ट्र स बे जाने भए कउनो अइसा पाप होइ जाइ जेका न करइ बरे परमेस्सर हुकुम दिहे होइ। मुला अइसा होइ जात ह तउ उ सबइ दोखी होइहीं। ¹⁴ जदि ओनका इ पापे क पता लगि जात ह तउ समूचइ रास्ट्र बरे एक ठु बछवा पापबलि खातिर चढ़ावा जाइ चाही। ओनका बछवा क मिलापवाला तम्बू क समन्वा लइ आवइ चाही। ¹⁵ बुर्जुगन क बछवा क मूँड़े प आपन हाथ धरइ चाही। बछवा क यहोवा क अगवा मारइ चाही। ¹⁶ तबहिं अभिसिक्त याजक क बछवा क तनिक खून मिलापवाला तम्बू मँ लइ आवइ चाही। ¹⁷ याजक क आपन अँगुरियन रकत मँ जरूर बोरइ चाही अउ पर्दा क समन्वा सात दाई रकत क छिछकारइ चाही। इ यहोवा क अहइ। ¹⁸ तब याजक क कछू रकत वेदी क सिंगियन प डावइ चाही। (उ वेदी मिलापवाला तम्बू मँ यहोवा क समन्वा बा।) याजक क सारा रकत होमबलि क वेदी क नींव प डावइ चाही। (उ वेदी मिलापवाला तम्बू क दुआरे प बा।) ¹⁹ तब याजक क गोरु क सारी चबीर् निकारि लेइ चाही अउ ओका वेदी प बारइ चाही। ²⁰ उ बछवा क संग जरूर वइसा ही करी जइसा उ पापबलि क रूप मँ चढ़ावा भवा बछवा क संग किहे रहा। इ तरह याजक मनइयन क पाप क पछतावा करत ह एहसे लोग छिमा पाइहीं। ²¹ याजक डेरा क बाहेर बछवा क लइ जाइ अउर ओका हुआँ बारि देइ। इ पहिले क तरह होइ। इ पूरे समाज बरे पापबलि होइ।

²² “जब कउनो सासक यहोवा आपन परमेस्सर क हुकुम तोड़इ क पाप अनजाने मँ करत ह, तउ उ दोखी समुझा जाई। ²³ अगर सासक क इ पाप क पता लागत ह तब ओका एक अइसा बोकरा जरूर लावइ चाही जेहमाँ कउनो दोख न होइ। इहइ ओकर भेंट होइ। ²⁴ सासक क बोकरा क मूँड़ि प हाथ जरूर धरइ चाही अउ ओका उ ठउरे प मारइ चाही जहाँ उ पचे होमबलि क यहोवा क समन्वा मारत हीं। इ एक पापबलि अहइ। ²⁵ याजक क पापबलि क कछू रकत आपन अँगुरियन प जरूर लेइ चाही। याजक क होमबलि क वेदी क सिंगियन प रकत जरूर छिछकारइ चाही। याजक क बचा भवा रकत होमबलि क वेदी क आधार प जरूर डावइ चाही। ²⁶ अउ याजक क बोकरा क सारी चबीर् वेदी प जरूर बारइ चाही। ओका एका उहइ तरह बारइ चाही जउने तरह उ मेलबलि क चबीर् बारत ह। इ तरह याजक सासक क पाप क पछतावा करत ह अउ सासक छिमा पाइहीं।

²⁷ “अइसा होइ सकत ह कि साधारण जनता मँ स कउनो मनई स संजोग स कउनो अइसा पाप होइ जाइ जेका यहोवा न करइ क हुकुम दिहेस ह। ²⁸ अगर उ व्यक्ति क आपन पाप क पता लगि जाइ तउ उ एक ठु मादा बोकरी जरूर लियावइ जेहमाँ कउनो दोख न होइ। इ उ व्यक्ति क पापबलि होइ। उ इ बोकरी क उ पाप खातिर लियावइ जउन उ किहस ह। ²⁹ ओका आपन हाथ गोरु क मूँड़ी प धरइ चाही अउ होमबलि क ठउरे प ओका बाँधइ चाही। ³⁰ याजक क उ बोकरी क कछू रकत आपन अँगुरियन प जरूर लेइ चाही अउ याजक क होमबलि क वेदी क सिंगियन प रकत जरूर छिड़कइ चाही। याजक क बचा भवा रकत होमबलि क आधार प जरूर डावइ चाही। ³¹ तब याजक क बोकरी क सारी चबीर् उहइ तरह निकारइ चाही जउने तरह मेलबलि स चर्बी निकारी जात रहा। याजक क ऍका यहोवा बरे सुहावना सुगंध क रूप मँ धूप क वेदी प बारइ चाही। इ तरह याजक उ मनई क पापे क पछतावा कइ देइ अउ व्यक्ति छिमा पाइहीं।

³² “अगर उ मनई पापबलि क रुप मँ एक ठु भेड़ी क बच्चा लिआवत ह तउ ओका एक मादा भेड़ी क बच्चा लइ आवइ चाही जेहमाँ कउनो दोख न होइ। ³³ मनई क ओकरे मूँड़ी प हाथ धरइ चाही अउ ओका उ ठउरे प पापबलि क रुप मँ मारइ चाही जहाँ उ पचे होमबलि क गोरु क मारत हीं। ³⁴ याजक क उ बोकरी क कछू रकत आपन अँगुरियन प जरूर लेइ चाही अउ याजक क होमबलि क वेदी क सिंगियन प रकत जरूर छिड़करइ चाही। याजक क बचा भवा रकत होमबलि क आधार प जरूर डावइ चाही। ³⁵ याजक क मेमना क सारी चबीर् उहइ तरह लेइ चाही जउने तरह मेलबलि क चबीर् लीन्ह जात ह। याजक क मेमना क सारी चर्बी क यहोवा क उपहार क रूप मँ जरूर बारइ चाही। इ तरह याजक उ व्यक्ति क पापे क पछतावा करी अउ उ व्यक्ति छिमा पाइहीं।