Chronological

⁸ “अय्यूब का तू सोचत अहा कि मइँ निआउ स पूरा नाहीं हउँ।
    का तू मोका बुरा काम करइ क दोखी मानत अहा ताकि तू इ देखाँइ सका कि तू उचित अहा?
⁹ अय्यूब, बतावा का मोर सस्त्र एँतना सक्तीसाली अहइँ जेतँना कि मोर (परमेस्सर) सस्त्र अहइ!?
    का तू आपन वाणी क ओतँना ऊँच गरजिके बोल सकत ह जेतँना मोर वाणी अहइ!?
¹⁰ अगर तू वइसा कइ सकत ह तउ तू खुद क आदर अउर महिमा द्या
    अउ ओढ़ना क तरह वफादारी क सान क ओढ़ ल्या।
¹¹ अय्यूब, अगर तू मोरे समान अहा, तउ अभिमानी लोगन स घिना करा।
    अय्यूब तू ओन अंहकारी लोगन पइ आपन किरोध बरसावा अउ तू ओनका विनम्र बनाइ दया।
¹² हाँ, अय्यूब, ओन अंहकारी लोगन क लखा अउर तू ओनका विनम्र बनाइ दया।
    ओन दुस्टन क तू कुचर दया जहाँ भी उ पचे खड़ा होइँ।
¹³ तू सबहिं घमण्डियन क माटी मँ गाड़ दया
    अउर ओनकइ देहन पइ कफन लपेटिके तू कब्रन मँ धइ दया।
¹⁴ अय्यूब, अगर तू एँन सबइ बातन क कइ सकत ह तउ मइँ तहार परसंसा करब
    काहेकि तू खुद क बचाइ सकत ह।

¹⁵ “अय्यूब, लखा मइँ उ बहमोथ (जलगजे)^[a] क पैदा किहेउँ।
    अउर उ मइँ ही ह जउऩ तोहका बनाएउँ ह।
    उ बहमोथ उहइ तरह घास खात ह, जइसे गइया घास खात ह।
¹⁶ बहमोथ क बदन मँ बहोत ताकत होत ह।
    ओकरे पेटे क माँसपेसियन बहोत ताकतवर होत हीं।
¹⁷ बहमोथ क पूँछ मजबूत अइसी होत ह जइसे देवदार क बृच्छ खड़ा रहत ह।
    ओकरे गोड़े क माँसपेसियन बहोत मजबूत होत हीं।
¹⁸ बहमोथ क हाड़न काँसा क तरह मजबूत होत हीं,
    अउर गोड़ ओकरे लोहे क ढूड़न जइसे।
¹⁹ बहमोथ महानतम पसु अहइ जेका मइँ बनाएउँ ह।
    हिआँ तलक कि ओकर सिरजनहार भी ओका लगे तरवार लइ क जात ह।
²⁰ बहमोथ ओन घासे क खात ह जउन पहाड़े पइ उपजात ह
    जहाँ बनेर पसु खेलत हीं।
²¹ बहमोथ कमल क पउधन क नीचे सोवत रहत ह
    अउ कीचंड़ मँ सरकणडन क आड़ मँ छूपा रहत ह।
²² कमल क पउधन बहमोथ क आपन छाया मँ छिपावत हीं।
    उ बेंत क पेड़न क खाले रहत ह, जउन नदी क निचके उगत हीं।
²³ अगर नदी मँ बाढ़ आइ जाइ तउ भी जलगज परात नाहीं ह।
    अगइ यरदन नदी भी ओकरे मुँहे पइ थपड़ियावइ तउ भी उ डेरात नाहीं ह।
²⁴ बहमोथ क कउनो भी हुक लगाइ क नाहीं पकड़ सकत ह।
    कउनो भी ओका जाली मँ नाहीं फँसाइ सकत।

41 “अय्यूब बतावा, का तू लिब्यातान क कउनो मछरी क काँटा स धइ सकत ह
    का तू एकर जिभ क रसी स बंध सकत ह?
² अय्यूब, का तू लिव्यातान क नाक मँ नकेल डाइ सकत हया
    ओकरे जबड़न मँ काँटा फँसाइ सकत ह
³ अय्यूब, का तू लिव्यातान क अजाद होइके बरे तोहसे बिनती करी?
    का उ तोहसे मीठी मीठी बातन करीं?
⁴ अय्यूब, का तू लिब्यातान तोहसे सन्धि करी
    अउर सदा तोहरी सेवा क तोहका वचन देइ?
⁵ अय्यूब, का तू लिब्यातान क वइसे ही खेलब्या जइसे तू कउनो चिड़िया स खेलत ह
    का तू ओका रस्सा स बँधब्या जेहसे तोहार दासियन ओहसे खेल सकइँ।
⁶ अय्यूब, का तू मछुआरा लिब्यातान क तोहसे बेसहइ क कोसिस करिहीं?
    का उ पचे ओका कटिहीं अउर ओनका बइपारियन क हाथे बेचि सकहीं?
⁷ अय्यूब, का तू लिब्यातान क खाल मँ अउर माथे पइ भाला फेंक हमला कइ सकत ह?

⁸ “अय्यूब, लिब्यातान पइ अगर तू हाथ डावा तउ जउन भयंकर जुदध होइ,
    तू कबहुँ भी बिसाहि नाहीं पउब्या अउर फुन तू ओहसे कबहुँ जुद्ध न करब्या।
⁹ अउर अगर तू सोचत ह कि तू लिब्यातान क पकड़ सकत ह, तउ इ बात क तू भूल जा।
    काहेकि ओका पकड़इ बरे कउनो आसा नाहीं अहइ।
    तू तो बस ओका लखइ भर सही डेराइ जाब्या।
¹⁰ कउनो भी एतना वीर नाहीं अहइ,
    जउन लिब्यातान क जगाइके भड़कावइ।

“तउ फुन अय्यूब बतावा, मोरे विरोध मँ कउन टिक सकत ह!
¹¹ कउनो भी मनई जउन कि मोहे स मुकाबला करह उ सुउच्छित नाहीं रब्या।
    सारे अकासे क खाले जउन कछू भी अहइ, उ सब कछू मोर ही अहइ।

¹² “अय्यूब मइँ तोहका लिब्यातान क सक्ती क बारे मँ बताउब।
    मइँ ओकर सक्ती अउर रुप क सोभा क बारे मँ बताउब।
¹³ कउनो भी मनई ओकर बाहरी आवरण (खाल) क भेद नाहीं सकत।
    ओकर खाल दोहरी कवच क नाई अहइ।
¹⁴ लिव्यातान क कउनो भी मनई मुँह खोलइ बरे मजबूर नाहीं कइ सकत ह।
    ओकरे भी जबडे क दाँत सबहिं क भयभीत करत हीं।
¹⁵ लिव्यातान क पिठिया पइ ढालन क कतार होत हीं,
    जउन आपुस मँ जुड़ी होत हीं।
¹⁶ इ सबइ ढालन आपुस मँ एँतनी सटी होत हीं
    कि हवा तलक ओहमाँ प्रवेस नाहीं कइ पावत ह।
¹⁷ इ सबइ ढालन एक दूसर स जुड़ी होत हीं।
    उ सबइ मजबूती स एक दूसरे स जुड़ी भई अहइ कि कउऩो भी ओनका उखाड़िके अलग नाहीं कइ सकत।
¹⁸ लिव्यातान जब छींकत ह तउ अइसा लागत ह जइसे बिजली सी कौधं गइ होइ।
    आँखी ओकर अइसी चमकत हीं जइसे कउनो तेज प्रकास होइ।
¹⁹ ओकरे मुँहना स बरत भइ मसान निकरत हीं,
    अउर ओहसे आगी क चिनगारियन बिखत हीं।
²⁰ लिब्यातान क नथुनन स धुआँ अइसा नकरत ह,
    जइसे उबलत भइ हाँड़ी स भाप निकलत होइ।
²¹ लिब्यातान क फूँक स कोयला सुलग उठत हीं
    अउर ओकरे मुँहे स लपक निकरत हीं।
²² लिब्यातान क गटई बड़ी जबरदस्त अहइ,
    अउर लोग ओसे उरिके दूर पराइ जात हीं।
²³ ओकरे खाल मँ कहीं भी कोमल जगह नाहीं अहइ।
    उ लोहा क तरह कठोर अहइ।
²⁴ लिब्यातान क हिरदइ चट्टान क तरह होत ह।
    ओकर हिरदइ चक्की क नीचे क पाट क तरह सख्त अहइ।
²⁵ लिब्यातान स सरगदूत भी डर जात हीं।
    लिब्यातान जब पूँछ फटकारत ह, तउ ओन सबइ भाग जात हीं।
²⁶ लिब्यातार पइ जइसे ही भालन,
    तीर अउ तरवार पड़त हीं उ सबइ उछरिके दूर होइ जात ह।
²⁷ लोहा क मोटी छड़न क उ तिनका जइसा
    अउर काँसा क सड़ी लकड़ी क तरह तोड़ देत ह।
²⁸ बाण लिब्यातान क नाहीं भगाइ पावत हीं।
    ओह पइ पाथर फेंकना, एक सुखा तिन्का फेंकन क नाई अहइ।
²⁹ लिब्यातान पइ जब मुगदर पड़त ह तउ ओका अइसा लागत ह माना उ कउनो बिनका होइ।
    जब लोग ओह पइ भालन फेंकत हीं, तब उ हँसा करत ह।
³⁰ विब्यातान क पेट क नीचे सिरा टूटा भए मट्टी क बासन क नाई तेज अहइ।
    जब उ चलत ह तउ कीचड़ मँ अइसा निसान छोड़त ह माना कि खेतन मँ हेगा लगावा गवा होइ।
³¹ लिब्यातान पानी क अइसे मथत ह, माना कउनो हाड़न उबलत होइँ।
    उ अइसे बुलबुले बनावत ह माना बासन मँ खउलत भवा तेल होइ।
³² लिब्यातान जब सागर मँ तैरत ह तउ आपन पीछे उ सफेद झागन जइसी राह छोड़त ह,
    जइसे कउनो उज्जर बारे क सफेद बिसाल पूँछ होइ।
³³ लिब्यातान सा कउनो अउर जन्तु धरती पइ नाहीं अहइ।
    उ अइसा पसु अहइ जेका निडर बनावा गवा।
³⁴ उ हर एक घमण्डी जानेबर क ऊपर नजर रखत ह
    सबहिं जंगली पसुअन क उ राजा अहइ।”

⁴ “यहोवा, तू मोस् कहया, ‘हे अय्यूब सुना अउर मइँ बोलब।
    मइँ तोहसे सवाल पूँछब अउर तू मोका जवाब देब्या।’
⁵ यहोवा, बीते भए काल मँ मइँ तोहरे बारे मँ सुने रहेउँ
    मुला खुद आपन आँखिन स मइँ तोहका देखि लिहेउँ ह।
⁶ एह बरे अब मइँ खुद आपन बरे लज्जात हउँ।
    मइँ आपन जिन्नगी क राह बदलइ क इच्छा दिखावइ बरे
    धूर अउर राखी मँ बैठा करत हउँ।”