Chronological

⁷ “इ सबइ ओ दिन रहेन जब मइँ नगर क दुआर अउर गलीयन क चौराहन पइ जात रहेउँ,
    अउर नगर नेता लोगन क संग बइठत रहेउँ।
⁸ हुवाँ सबइ लोग मोर सन्मान किहा करत रहेन।
    जवान मनसेधू जब मोका लखत रहेन तउ मोरी राह स हट जावा करत रहेम
    अउर बुढ़वा मनसेधू मोरे बरे सन्मान देखाँवइ बरे उठ खड़ा होत रहेन।
⁹ जब लोगन क नेता लोग मोका लखि लेत रहेन,
    तउ बोलब बंद कइ देत रहेन।
¹⁰ हिआँ तलक कि बहोतइ महत्ववाले नेता भी आपन स्वर हल्का कइ लेत रहेन, जब मइँ ओनके नियरे जात रहेउँ।
    हाँ! अइसा लागत रहा कि ओनकर जिभियन ओनकर तालु स चिपक गइ होइँ।
¹¹ जउन कउनो भी मोका बोलत सुनेस, मोरे बारे मँ नीक बात कहेस,
    जउनो कउनो भी मोका लखे रहा, मोर बड़कई किहे रहा।
¹² काहेकि जब कउनो दीन मदद बरे गोहँराएस, मइँ मदद किहेउँ।
    उ गदेला क मइँ सहारा दिहेउँ जेकरे महतारी बाप नाहीं अउर जेकर कउनो भी नाहीं धियान रखइ क।
¹³ मोका मरत भए मनई क आसीस मिला,
    मइँ ओन राँड़ मेहररुअन क जउन जरुरत मँ रहिन,
    मइँ सहारा दिहेउँ अउर ओनका खुस किहेउँ।
¹⁴ मोर ओढ़ना पहिरब मोर खरी जिन्नगी रही,
    निस्पच्छ होब मोर चोगा अउर मोर पगड़ी सी रहीं।
¹⁵ मइँ आँधरन बरे आँकी बन गएउँ
    अउर मइँ ओनकर गोड़ बनेउँ जेनकर गोड़ नाहीं रहेन।
¹⁶ दीन लोगन बरे मइँ बाप तरह रहेउँ,
    मइँ पच्छ लेत रहेउँ अहसे अनजानन क जउन विपत्तियन मँ पड़ा रहेन।
¹⁷ मइँ दुस्ट लोगन क सक्ती नस्ट करत रहेउँ।
    निर्दोख लोगन क मइँ दुस्टन स अजाद करावत रहेउँ।

¹⁸ “मइँ सोचत रहेउँ कि मइँ बहोत लम्बी जिन्नगी^[a] जिअब
    अउर फुन आपन ही घरे मँ प्राण तजब।
¹⁹ मइँ एक ठु अइसा बृच्छ बनब जेकर जड़न सदा जल मँ रहत होइँ
    अउर जेकर डारन सदा ओस स भीजी रहत होइँ।
²⁰ मोर सान सदा ही नई बनी रही,
    मइँ सदा ही वइसा बलवान रहब जइसे मोरे हाथे मँ एक नवा धनुष।

²¹ “पहिले, लोग मोर बात सुनत रहत रहेन,
    अउर उ सबइ जब मोर सलाह मसवरा क इंतजार करत रहेन, तउ चुप रहा करत रहेन।
²² मोर चुकइ पाछे, ओन लोगन क लगे जउन मोर बात सुनत रहेन, कछू भी बोलइ क नाहीं होत रहा।
    मोर सब्द धीरे-धीरे ओनकर काने मँ बर्खा क तरह पड़ जात रहेन।
²³ लोग जइसे बर्खा क बाट जोहत हीं वइसे ही उ पचे मोर बोलइ क बाट जोहा करत रहेन।
    मोरे सब्दन क उ पचे पी जावा करत रहेन, जइसे मोर सब्द बसन्त मँ बरसा होइ।
²⁴ जब मइँ दाया करइ क ओन पइ मुस्कात रहेउँ, तउ ओनका पहिले पहल ए पइ बिस्सास नाहीं होत रहा।
    फुन मोर खुस मुँह दुखी जन क सुख देत रहा।
²⁵ मइँ जिम्मेदारी बिहेउँ अउर लोगन बरे पइसला किहेउँ, मइँ नेता बन गएउँ।
    मइँ ओनकर सोना क दलन क बीच राजा जइसा जिन्नगी जिएउँ।
    मइँ अइसा मनई रहेउँ जउन लोगन क चइत देत रहा जउन बहोत ही दुःखी बाटइ।
30 “अब, उमर मँ छोटा लोग मोर मसखरी करत हीं।
    ओन जवान मनसेधुअन क बाप बिल्कुल ही निकम्मा रहेन।
    ओन कूकुरन जउन मोर भेड़िन क रखवारा करत ह ओन लोगन स बेहतर अहइँ।
² ओन जवान मनसेधुअन क बाप मोका मदद देइ क कउनो सक्ती नाहीं राखत हीं,
    उ पचे बुढ़वा होइ चुका अहइँ अउ थका भवा अहइँ।
³ उ सबइ मनई भूख स मरत अहइँ
    यह बरे उ पचे झुरान अउर उजाड़ धरती खावत ह।
⁴ उ सबइ मनई रेगिस्तान मँ खारे पउधन क उखाड़त हीं
    अउर उ पचे झाड़ीदार बृच्छन क जड़न क खात हीं
⁵ उ पचन्क दूसर लोगन स भगाइ दइ गएन।
    उ पचे ओन लोगन पइ अइसे गोहरावत हीं जइसे लोग चोर पइ गोहरावत हीं।
⁶ अइसे उ सबई बुढ़वा लोग झुरान भइ नदी क तलन मँ चट्टानन क सहारे
    अउ धरती बिलन मँ रहइ क मजबूर अहइँ।
⁷ उ पचे झाड़ियन क बीच गुर्रात हीं।
    कँटहरी बृच्छन क नीचे उ पचे आपुस मँ बटुर जात हीं।
⁸ ओन पचन्क फसादी लोगन क दल अहइ, जेनकर नाउँ तलक नाहीं अहइ।
    ओनका आपन भुइँया तजि देह क मजबूर कीन्ह गवा अहइ।

⁹ “अब अइसे ओन लोगन क पूत मोर हँसी उड़ावइ क मोरे बारे मँ गीत गावत हीं।
    मोर नाउँ ओनके बरे अपसब्द जइसा बन गवा अहइ।
¹⁰ उ सबइ नउजवान मोहसे घिना करत हीं।
    उ पचे मोसे दूर खड़ा रहत हीं।
    हिआँ तलक कि उ पचे मोरे मुँहे पइ थूकत हीं।
¹¹ परमेस्सर मोरे धनुष स ओकर डोर छोर लिहस ह अउर मोका दुर्बल किहस ह।
    उ पचे मोह पइ कोहान होत भए मोरे खिलाफ होइ जात ह।
¹² उ सबइ जवान मोर दाहिनी कइँती स मोह पइ प्रहार करत हीं।
    उ पचे मोर गोड़न पइ हमला कइके मोका गिरावत ह
    अउर मोका चारिहुँ कइँती स घेर लेत ह।
¹³ उ पचे नव जवान मोरी राह पइ निगरानी रखत हीं कि मइँ बचिके निकरिके पराइ न सकउँ।
    उ पचे मोका नस्ट करइ मँ सफल होइ जात हीं।
    ओनके खिलाफत मँ मोर मदद करइ क मोरे संग कउनो नाहीं अहइ।
¹⁴ उ पचे मोह पइ अइसे वार करत हीं जइसे कि सहर क दिवार क दरार स होत ह।
    उ पचे टुटे हुए हिस्से स अन्दर आवत हीं।
¹⁵ मोका भय जकड़ लेत ह।
    जइसे हवा चिजियन क उड़ाइ लइ जात ह, वइसेन ही उ पचे जवान मोरे इज्जत धुवस्त करइ देत हीं।
    जइसे बादर अदृस्य हेइ जात ह, वइसे ही मोर सुरच्छा अदृस्य होइ जात ह।

¹⁶ “जब मोर जिन्नगी बीतइ क अहइ अउर मइँ हाली ही मर जाब।
    मोका, संकट क दिन दहबोच लिहे अहइँ।
¹⁷ मोर सबइ हाड़न राति क दुख देत हीं,
    पीरा मोका चबाव नाही छोड़त ह।
¹⁸ मोरे कोट क गिरेबान क परमेस्सर बड़ी ताकत स धरत ह,
    उ मोरे लिबास क ताकत स पकड़ लेत ह।
¹⁹ परमेस्सर मोका कीचं मँ बहाइ दिहस
    अउर मइँ माटी व राखी स बनत हउँ।

²⁰ “हे परमेस्सर, मइँ सहारा पावइ क तोहका गोहरावत हउँ, मुला तू उत्तर नाहीं देत ह।
    मइँ खड़ा होत हउँ अउ पराथना करत हउँ, मुला तू मोह पइ धियान नाहीं देत्या।
²¹ हे परमेस्सर, तू मोर बरे निर्दयी होइ गवा अहा
    तू मोका नोस्कान पहोंचावइ क आपन सक्ती क प्रयोग करत अहा।
²² हे परमेस्सर, तू मोका तेज आँधि स उड़ाइ देत ह।
    तू मोका तूफाने क बीच मँ डाल देत ह।
²³ मइँ जानत हउँ तू मोका मोर मउत कइँती लइ जात अहा
    आखीर माँ हर कउनो क जाब अहइ।

²⁴ “मुला इ निहचय ह कि तू कउनो मनई जउन मदद बरे गोहरावत ह,
    ओन स नाहीं मुड़त ह।
²⁵ हे परमेस्सर, तू तउ जानत ह कि मइँ ओनके खातिर रोएउँ जउन संकट मँ पड़ा अहइँ।
    तू तउ इ जानत ह कि मोर मन गरीब लोगन बरे बहोत दुखी रहत रहा।
²⁶ मुला जब मइँ भला चाहत रहा, तउ बुरा होइ जात रहा।
    मइँ प्रकास हेरत रहेउँ अउर अँधियारा छाइ जात रहा।
²⁷ मइँ भितरे स फट गवा हउँ अउर इ अइसा अहइ कि संकट कबहुँ नाहीं थम जात।
    अउर जियादा संकट आवइ क अहइ।
²⁸ मइँ सोक क ओढ़ना पहिनके माना बगइर सूरज की गर्मी स करिया होइ गना हूँ।
    मइँ सभा क बीच मँ खड़ा होत हउँ, अउर मदद क गोहरावत हउँ।
²⁹ मइँ जंगली कूकुरन क भइया
    अउर सुतुरमुर्ग क मीत होइ गवा हउँ।
³⁰ मोर चमड़ी करिया पड़ि गइ बाटइ।
    मोर तन बुखारे स तपत बाटइ।
³¹ मोर वीणा करुण गीत गावइ क सधी बाटइ
    अउर मोर बाँसुरी स दुःख क रोवइ जइसे स्वर निकरत हीं।

31 “मइँ आपन अँखिन क संग एक समझौता किहेउ ह
    कि उ सबइ कउनो लड़िकी क वासना क निगाह स न लखहीं।
² सर्वसक्तीमान परमेस्सर लोगन क संग कइसा करत ह
    उ कइसे आपन ऊँच सरगे क घरे से ओनकर करमन क प्रतिफल देत ह
³ परमेस्सर दुस्ट लोगन बरे संकट अउ विनास पठवत ह,
    अउर जउन बुरा करम करत हीं ओनके बरे बर्बादी पठवत ह।
⁴ मइँ जउन भी करत हउँ परमेस्सर जानत ह।
    अउर मोरे हर कदम क उ लखत ह।

⁵ “अउर मइँ झूठी जिन्नगी जिया हउँ
    या झूठ बोलिके लोगन क मुरख बनाए हउँ।
⁶ तउ उ मोका खरी तरजू स तौलेइ,
    तब परमेस्सर जान लेइ कि मइँ निरपराध हउँ।
⁷ अगर मइँ खरा रास्ता स हटा होउँ,
    अगर मइँ आपन आप क बुरे लालसा मँ लइ गइ होइ
    या अगर मइँ आपन हाथ क पवित्तर नाहीं राखत हइँ।
⁸ तउ मोर उपजाई भइ फसल दूसर लोग खाइ जाइँ
    अउर मोर फसलन क उजारिके लइ जाइँ।

⁹ “अगर मइँ मेहररुअन बरे कामुक रहा होउँ,
    या अगर मइँ आपन पड़ोसी क दुआरे क ओकरी पत्नी क संग व्याभिचार करइ क बरे ताकत रहा होउँ,
¹⁰ तउ मोर पत्नी दूसर लोगन क भोजन बनावइ
    अउर ओकरे संग दूसर लोग सोवइँ।
¹¹ काहेकि यौन पाप लज्जा स भरा होत ह?
    इ अइसा पाप अहइ जेका निहचय ही सजा पावइ चाही।
¹² व्याभिचार उ पाप क समान अहइ, जउन बारत अउ बर्बाद कइ डावत ह।
    मोरे लगे जउन कछू भी अहइ बिभिचार क पाप ओका बारि डाइ।

¹³ “अगर मइँ आपन दास-दासियन क समन्वा उ समइ निस्पच्छ नाहीं रहेउँ
    जब ओनका मोसे कउनो सिकाइत रही।
¹⁴ तउ जब मोका परमेस्सर क समन्वा जाइ क होइ, तउ मइँ का करब?
    जब उ मोका मोरे करमन क सफाई माँगइ बोलइ तउ मइँ परमेस्सर क का जावाब देब?
¹⁵ परमेस्सर मोका अउर मोरे सेवकन क
    हमरी आपन-आपन महतारी क गर्भ मँ बनाएस ह।

¹⁶ “मइँ कबहुँ भी दीन जन क मदद क मना नाहीं किहेउँ।
    मइँ राँड़ मेहररुअन क सहारे क बिना नाहीं रहइ दिहेउँ।
¹⁷ मइँ स्वार्थी नाहीं रहेउँ।
    मइँ आपन भोजन क संग अनाथ बच्चन क भूखा नाहीं रहइ दिहेउँ।
¹⁸ मइँ अइसे गदेलन क जेनके बाप नाहीं अहइँ, मइँ बाप जइसा रहेउँ ह।
    मइँ जिन्नगी भइ राँड़ मेहररुअन क धियान रखेउँ ह।
¹⁹ जब मइँ कउनो क एह बरे कस्ट भोगत भए पाएउँ ह कि ओकरे लगे ओढ़ना नाहीं अहइ,
    या मइँ कउनो दीन क बगैर कोट क पाएउँ।
²⁰     तउ मइँ सदा ओन लोगन क ओढ़ना देत रहेउँ,
मइँ ओनका गरम राखइ क मइँ खुद आपन भेड़िन क ऊन बइपरेउँ,
    तउ उ पचे मोका समूचइ मने स असीसत रहेन।
²¹ मइँ कउनो अनाथे क खिलाफ कबहुँ आपन हाथ नाहीं उठाएस
    जब कबहुँ मइँ ओका सहर क फाटके पइ मदद माँगत भए निहारेउँ।
²² अगर मइ अइसा किहेउँ तउ मोर काँधा आपन जगह स छूट कइ गिर जाइ
    अउर मोर बाजू आपन जोड़ स अलग होइ जाइ।
²³ मुला मइँ तउ ओनमाँ स कउनो बुरा करम नाहीं किहेउँ।
    मइँ परमेस्सर क दण्ड स डेरात हउँ।
    ओकरी तेजस्विता स डेरात हउँ।

²⁴ “मइँ कबहुँ आपन धन दौलत क भरोसा नाहीं किहेउँ,
    अउर मइँ कबहुँ नाहीं चोखा सोने स कहेउँ कि ‘तू मोर आसा अहा।
²⁵ मइँ धने स सम्पन्न रहेउँ।’
    मुला मइँ ओसे घमण्डी नाहीं भएउँ।
मइँ खूवइ धन कमाएउँ।
    मुला उहइ नाहीं जेहसे आनन्दित भएउँ।
²⁶ मइँ कबहुँ भी नाहीं चमकत सूरज क पूजा किहेउँ
    या मइँ सुन्नर चाँद क पूजा नाहीं किहेउँ।
²⁷ मइँ कबहुँ भी आपन हाथ क चूम कइ सूकज
    अउर चाँद क पूजा करइ क मूरखता नाहीं किहा रहा।
²⁸ अगर मइँ एनमाँ स कछू किहेउँ तउ उ मोर पाप होइ अउ मोका सजा मिलइ।
    अगर मइँ ओन बातन क पूजा किहे होतेउँ तउ सर्वसक्तीसाली परमेस्सर क अबिस्सासी होइ जातेउँ।

²⁹ “जब मोर दुस्मन बर्बाद भएन
    तउ मइँ खुस नाहीं भएउँ।
जब मोरे दुस्मनन क दुख-मुसीबत डाली गवा,
    तउ मइँ ओकर बरे खूस नाहीं भवा।
³⁰ मइँ आपन मुहँ खोलिके आपन दुस्मनन क सरापत भए पाप नाहीं किहेउँ
    अउ मइँ ओकरे मोत क इच्छा नाहीं कहेस।
³¹ मोरे घरे क सबहिं लोग जानत हीं
    कि मइँ सदा अजनबी लोगन क खइया क दिहेउँ।
³² मइँ सदा अजनबी लोगन क घरे मँ बोलाएउँ,
    ताकि ओनका राति मँ गलियन मँ सोवइ क न पड़इ।
³³ दूसर लोग आपन पापे क छूपावइ क जतन करत हीं,
    मुला मइँ आपन दोख कबहुँ नाहीं छुपाएउँ।
³⁴ मइँ कबहुँ नाहीं डेराउँ कि लोग का कहत रहत हीं।
    मइँ कबहुँ चुप नाहीं रहेउँ अउ मइँ आपन घर बाहेर जाइ बरे कबहुँ नाहीं डेराउँ।

³⁵ “कास! कउनो होत जउन मोर सुनत।
    मोका आपन बात अपनी कइँती स समझावइ द्या।
कास! सक्तीसाली परमेस्सर मोका अउर कास उ ओनँ बातन क लिखत
    जउन मइँ ओकरी निगाहे मँ गलत किहे रहेउँ।
³⁶ काहेकि फुरइ ही मइँ उ लिकावट आपन खुद क काँधे पइ धइ लेब
    अउर मइँ ओका मुकुट क तरह मूँड़े पइ धइ लेब।
³⁷ “अगर परमेस्सर किहेस तउ जउन कछू मइँ किहेउँ ह, मइँ ओका परमेस्सर क समुझाउब।
    मइँ परमेस्सर क लगे आपन मूँड़ि उठाइके जाब, जइसे मइँ कउनो मुखिया होउँ।

³⁸ “मइँ आपन भुइँया पइ कबहुँ बेगुनाह क खुन नाहीं बहाया हउँ
    एँह बरे मोर मिट्टी या मोर धरती क खिलाफ कबहुँ आवाज़ नाहीं उठाएस।
³⁹ मइँ हमेसा मजदूरन क फसल काटइ बरे ओनकर मजूरी दिहेउँ।
    मइँ कबहुँ भी ओकर मालिक स जबरदस्ती अनाज़ नाहीं लिहेउँ।
⁴⁰ हाँ! एनमाँ स अगर कउनो भी बुरा काम मइँ किहे होउ,
    तउ गोहूँ क जगह पइ काँटा अउर जौ क बजाय खर-पतवर खेतन मँ उग जाइँ।”