Chronological

⁴ “मोर सिकाइत मनइयन क खिलाफ नाहीं अहइ,
    मइँ काहे सहनसील नाहीं अहउँ ओकर खास वजह अहइ।
⁵ तू मोका लखा अउर चकित होइ जा,
    आपन सोक दिखाइ बरे आपन हाथ आपन मुँहे पइ धरा।
⁶ जब मइँ सोचत हउँ ओन सब क जउन मोर संग घटा
    तउ मोका डर लागत ह अउर मोर देह थर थर काँपत ह।
⁷ काहे बुरे लोगन क उमर लम्बी होत ह?
    काहे उ पचे बूढ़ाइ जात हीं अउर कामयाब होत हीं?
⁸ बुरे लोग आपन संतानन क आपन संग बढ़त भए लखत हीं।
    बुरे लोग आपन-आपन नाती पोतन क लखइ क जिअत रहत हीं।
⁹ ओनकर घर सुरच्छित रहत हीं अउर उ पचे डेरातेन नाहीं।
    परमेस्सर दुस्टन क सजा देइ बरे आपन सजा काम मँ नाहीं लिआवत ह।
¹⁰ ओकर साँड़ कबहुँ भी मिला कइ मँ नाहीं चुकत ह।
    ओनकर गइयन बछवन क जनम देइ बरे गाभिन होत।
    ओनकर गर्भ कबहुँ नाहीं गिरत हीं।
¹¹ बुरे लोग गदेलन क बाहेर खेलइ पठवत हीं मेमनन क जइसे,
    ओनकर गदेलन नाचत हीं चारिहुँ ओर।
¹² मजीरा, वीणा अउर बाँसुरी क धून पइ उ पचे गावत हीं अउर नाचत हीं।
¹³ बुरे लोग आपन जिन्नगी भइ कामयाबी क आनन्द लेत हीं।
    फुन बिना दुख भोगे उ पचे मरि जात हीं अउर आपन कब्रन क बीच चला जात हीं।
¹⁴ मुला बूरे लोग परमेस्सर स कहा करत हीं, ‘हमका अकेला तजि दया।
    अउर एकर हमका परवाह नाहीं कि तू हमसे कइसा जिन्नगी जिअइ चाहत ह।’
¹⁵ दुट्ठ लोग कहा करत हीं, ‘सर्वसक्तीमान परमेस्सर कउन अहइ?
    हमका ओकरी सेवा क जरुरत नाहीं अहइ।
    ओकरी पराथाना करइ क कउनो लाभ नाहीं।’

¹⁶ “दुस्ट मनई सोचत हीं कि ओनका आपन ही करण कामयाबी मिलत ह,
    मुला मइँ ओनकर विचारन क नाहीं अपनाइ सकत हउँ।
¹⁷ मुला का अइसा होत ह कि दुस्ट जन क प्रकास बुताइ जावा करत ह?
    केतनी दाई दुस्टन क दुःख घेरा करत हीं?
    का परमेस्सर ओनसे कोहाइ जात ह, अउर ओनका सजा देत ह?
¹⁸ का परमेस्सर दुस्ट लोगन क अइसे उड़ावत ह जइसे हवा तिनके क उड़ावत ह
    अउर तेज हवा अनाजे क भूसा उड़ाइ देत हीं?
¹⁹ मुला तू कहत ह: ‘परमेस्सर एक गदेला क ओकरे बाप क पापन्क सजा देत ह।’
    नाहीं, परमेस्सर क चाही कि बुरे जन क राजा देइ।
    तबहीं उ बूरा मनई जानी कि ओका ओकरे निज पापन बरे सजा मिलती अहइ।
²⁰ तू पापी क ओकरे आपन राजा क देखाँइ दया,
    तब उ सर्वसक्तीसाली परमेस्सर क कोप क अनुभव करी।
²¹ जब बुरा मनई क उमर क महीना खतम होइ जात हीं अउर उ मर जात ह:
    उ उ परिवार क परवाह नाहीं करत जेका उ पाछे तजि जात ह।

²² “कउनो मनई परमेस्सर क गियान नाहीं दइ सकत,
    उ ऊँच ओहदन क लोगन क भी निआउ करत ह।
²³ एक पूरा अउ सफल जिन्नगी क जिअइ क पाछे एक मनई मरत ह,
    उ एक सुरच्छित अउ सुखी जिन्नगी जिअत ह।
²⁴ ओकर लगे पिवइ बरे भरपूर दुध रहा।
    अब समइ तलक ओकर हाड़ तन्दुरुस्त रहीन।
²⁵ मुला कउनो एक अउर मनई कठिन जिन्नगी क पाछे दुःख भरे मने स मरत ह,
    उ जिन्नगी क कबहुँ कउनो रस नाहीं चाखेस।
²⁶ इ सबइ दुइनउँ मनई एक संग माटी मँ गड़ा सोवत हीं
    किरउनन दुइनउँ क एक संग ढाँपि लेइहीं।

²⁷ “मुला मइँ जानत हउँ कि तू का सोचत अहा,
    अउर मोका पता अहइ कि तोहरे लगे मोरा बूरा करइ क कुचाल अहइ।
²⁸ मोरे बरे तू इ कहा कहत ह, ‘अब कहाँ बाटइ उ महामानुस क घर?
    कहाँ बा उ घर जेहमाँ उ दुस्ट रहत रहा?’

²⁹ “मुला तू कबहुँ बटोहियन क नाहीं पूछ्‌या?
    का तू ओकर कहानियन पइ बिस्सास नाहीं किहस?
³⁰ उ दिन जब परमेस्सर कोहाइके सजा देत ह
    दुस्ट मनई सदा बच जात ह?
³¹ अइसा कउन मनई नाहीं जउन ओकरे समन्वा ही ओकरे करमन क बूराइ करइ।
    ओकरे पाप क सजा कउनो मनई ओका नाहीं देत ह।
³² जब कउनो मनई कब्र मँ लेइ जावा जात ह,
    तउ ओकरे कब्र क लगे एक पहरुवा खड़ा ह।
³³ उ दुट्ठ मनई बरे उ घाटी क माटी मुलायम होइ।
    अनगिनत लोग भी ओकर समन्वा कब्र गएन ह, अउर भी लोग ओहस मिली।

³⁴ “तउ आपन कोरे सब्दन स तू मोका चइन नाहीं दइ सकत्या,
    तोहार जवाब सिरिफ झुठा अहइँ।”

¹² “परमेस्सर अकास क सब स ऊँच हींसा मँ रहत ह।
    उ आपन जगह स सबन स ऊँच तारन क लखइ बरे खाले लखत ह।
¹³ मुला अय्यूब, तू का करत ह, ‘परमेस्सर कछू नाहीं जानत,
    करिया बदरन स कइसे परमेस्सर हमका जाँच सकत ह
¹⁴ धना बादर ओका छुपाइ लेइ हीं,
    एह बरे जब उ आकास क सबन ऊँच हींसा मँ बिचरत ह तउ हमका ऊपर अकासे स लखि नाहीं सकत।’

¹⁵ “अय्यूब, तू उ ही पुरानी राह पइ
    जेन पइ दुस्ट लोग चला करत हीं, चलत अहा।
¹⁶ आपन मउत क समइ स पहिले ही दुट्ठ लोग मर गएन।
    बाढ़ ओनका बहाइके लइ गइ रही।
¹⁷ इ सबइ उहइ लोग अहइँ जउन परमेस्सर स कहत हीं, ‘हमका अकेल्ले तजि द्या।’
    उ पचे सोचेन कि ‘सर्वसक्तीमान परमेस्सर हमार कछू नाहीं कइ सकत ह।’
¹⁸ मुला परमेस्सर ओन लोगन क कामयाब बनाएस ह अउर ओनका धनवान बनाइ दिहा।
    मुला मइँ उ ढंग स जेहसे दुस्ट सोचत हीं, अपनाइ नाहीं सकत हउँ।
¹⁹ सज्जन जब बुरे लोगन क नास देखत हीं, तउ उ पचे खुस होत हीं।
    पाप स रहीत लोग दुस्टन पइ हँसत हीं, अउर कहा करत हीं।
²⁰ ‘हमार दुस्मन फुरइ नस्ट होइ गएन।
    आगी ओनके धने क बारि देत ह।’

²¹ “अय्यूब, अब खुद क तू परमेस्सर क अर्पित कइ दया, तब तू सान्ति पउब्या।
    अगर तू अइसा करा तउ तू धन्य अउर कामयाब होइ जाब्या।
²² ओकर सीख अपनाइ ल्या
    अउर ओकरे सब्द आपन मने मँ सुरच्छित रखा।
²³ अय्यूब, अगर तू फुन सर्वसक्तीमान परमेस्सर क लगे आवा तउ फिन स पहिले जइसा होइ जाइ।
    तोहका अपने घरे स पाप क बहोत दूर करइ चाही।
²⁴ तोहका सोना क धूरि क नाई
    अउर ओफीर क सोना क नदी क तराई क चट्टान क नाई समझइ चाही।
²⁵ तब सर्वसक्तीमान परमेस्सर तोहरे बरे सोना
    अउर चाँदी बन जाइ।
²⁶ तब तू बहोत खुस होब्या अउर तोहका सुख मिली।
    परमेस्सर क समन्वा तू बिना कउनो सर्म क मूँड़ि उठाइ सकब्या।
²⁷ जब तू ओकर बिनती करब्या तउ उ तोर सुना करी,
    जउन प्रतिग्या तू ओहसे किहे रह्या, तू ओका पूरा कइ सकब्या।
²⁸ जउन कछू तू करब्या ओहमाँ तोहका कामयाबी मिली,
    तोहरे रास्ते पइ प्रकास चमकी।
²⁹ परमेस्सर अहंकारी जन क लज्जित करी,
    मुला परमेस्सर नम्र मनई क रच्छा करी।
³⁰ परमेस्सर जउन मनई भोला नाहीं अहइ ओकर भी रच्छा करी,
    तोहरे हाथन क सफाई स ओका उद्धार मिली।”

⁸ “मुला अगर मइँ पूरब क जाउँ तउ परमेस्सर हुआ नाहीं अहइ
    अउर अगर मइँ पच्छिउँ क जाउँ तउ भी परमेस्सर मोका नाहीं देखात ह।
⁹ परमेस्सर जब उत्तर मँ छिपत ह^[a] तउ मइँ ओका देख नाहीं पावत हउँ।
    जब परमेस्सर दक्खिन क छिपत ह तउ भी उ मोका नाहीं देखात ह।
¹⁰ मुला परमेस्सर मोरे हर चरण क लखत ह, जेका मइँ उठावत हउँ।
    जब उ मोर परीच्छा लइ उठी तउ उ लखी कि मोहमाँ कछू भी बुरा नाहीं अबइ,
    उ लखी कि मइँ खरा सोना जइसा अहउँ।
¹¹ परमेस्सर जउन चाहत ह मइँ हमेसा उहइ पइ चलत हउँ
    मइँ कबहुँ भी परमेस्सर क राहे पइ चलइ स नाहीं रुकेहउँ।
¹² मइँ हमेसा उहइ बात करत हउँ जेनकर आसा परमेस्सर देत ह।
    मइँ आपन मुँहे क भोजन स जियादा परमेस्सर क मुँहे क सब्दन स पिरेम किहेउँ ह।

¹³ “मुला परमेस्सर एक मन वाले अहा,
    अउर कउनो भी ओका बदल नाहीं बदलत।
    परमेस्सर जउन चाहत ह उहइ करत ह।
¹⁴ परमेस्सर जउन भी जोजना मोरे विरोध मँ बनाइ लिहस ह उहइ करी,
    ओकरे लगे मोरे बरे अउर भी बहोत सारी जोजना अहइँ।
¹⁵ एह बरे मइँ ओसे डेरात हउँ।
    एह बरे परमेस्सर मोका भयभीत करत ह।
¹⁶ परमेस्सर मोर हिरदइ क दुर्बल करत ह अउर मोर हिम्मत टूट जात ह।
    सर्वसक्तीमान परमेस्सर मोका भयभीत करत ह।
¹⁷ अगर तउ मोर मुहँ सघन अँधियारा ढकत ह
    तउ भी अँधियारा मोका चुप नाहीं कइ सकत ह।