Chronological
Dee 134 Psalm
En leet fonn nehejcht gone.
1 See, säajent däm Herr Gott aul jie dee däm Herr Gott deene; dee enn däm Herr Gott sien Hus stone enne Nacht.
2 Häft june Henj nehejcht enn dee Aundachts Städ, un säajent däm Herr Gott.
3 Mucht dee Herr Gott die säajne ut Zion; Hee, dee de Himmels un Ead jemoakt haft.
Dee 146 Psalm
1 Preis däm Herr Gott; preis däm Herr Gott, O miene Seel.
2 Soo lang aus ekj läw woa ekj däm Herr Gott preise; ekj woa Preis sinje to Gott soo lang aus ekj woa romm senne.
3 Doo dien Fetruehe nijch enn Helte stale, enn en Mensch sien Sän, dan doa es kjeene Radunk enn am.
4 Sien Odem woat oppheare, hee jeit trigj no dee Ead; siene Jedanke feschwinje enn dän Dach.
5 Jesäajent es dee, dee Joakopp sien Gott haft to Help; sien Fetruehe es enn däm Herr Gott, sien Gott;
6 Dee de Himmels un dee Ead jemoakt haft, dän See, un aules daut doabenne es; dee Woarheit bewoat fa emma;
7 Dee Jerejcht towäaj brinjt fa dän dee bedrekjt sent; dee Äte jeft to dee hungrije; un deit dee Jefangne frie moake;
8 Dee Herr Gott moakt dee Blinje äare Uage op; dee Herr Gott häft dän opp dee dol jeboage sent; dee Herr Gott haft dee Jerajchte leef;
9 Dee Herr Gott bewoat dee framde; Hee moakt dee Weisekjinje un Wätfruhes äare Laust leijchta; oba Hee deit dee Beese äa Wajch feschmiete.
10 Dee Herr Gott woat fa emma rejeare; O Zion, dien Gott fonn Jennerazion no Jennerazion. Preis däm Herr Gott.
Dee 147 Psalm
1 Preis däm Herr Gott; dan daut es goot Preis to sinje to onns Gott; wiels Preis es fejneajcht un aunjenäm.
2 Dee Herr Gott deit Jerusalem oppbuhe; Hee saumelt dee rutjedrengde fonn Iesrael toop.
3 Hee heelt dän dee en jebroaknet Hoat habe, en binjt äare Sorj opp.
4 Hee bestemmt daut Numma fonn dee Stearns; Hee nant dee aule bie Nome.
5 Onns Herr es Groot un foll groote Macht; doa es kjeene Jrens to sien Festentnis.
6 Dee Herr Gott deit dee Bedrekjte äare Laust leijchta moake; Hee schmitt dee Beese dol no de Ead.
7 Sinjt to däm Herr Gott met Danksagunk, sinjt Preise to Gott opp ne Jittoa,
8 Dee de Himmels bedakjt met Wolkje; dee Räajen reed moakt fa dee Ead, dee daut Grauss wausse moakt.
9 Hee jeft dee Tiare äa Äte, to dee junje Krauge dee schriehe.
10 Hee haft kjeen Fejneaje enn en Piat siene Macht; un kjeen Fejneaje enn en Maun siene Been.
11 Dee Herr Gott haft Fejneaje enn dän dee Am ferjchte; soone dee enn sien Erboarme hope.
12 Preis däm Herr Gott, O Jerusalem; preist jun Gott, O Zion.
13 Dan Hee haft dee Stange fonn june Puate stoakj jemoakt; Hee haft diene Säns enn die jesäajent.
14 Hee moakt Fräd enn diene Jrense, Hee moakt die tofräd met daut Fattet fomm Weit.
15 Hee schekjt sien Aunkommendeare rut opp dee Ead; siene Wead ranne pienijch.
16 Hee jeft Schnee soo aus Woll; Hee festreit dän witta Frost soo aus Ausch.
17 Hee schmitt sien Ies rut soo aus Kjreemle; wäa kaun bestone fer siene Kold?
18 Hee schekjt sien Wuat rut un deit dee schmelte; Hee moakt sien Wint to blose, un dee Wotasch rane.
19 Hee jeft sien Wuat to Joakopp; siene Fäaschrefte un siene Jerejchte to Iesrael.
20 Hee haft nijch soo jedone to irjent ne Nazion; un dee ha siene Jerejchte nijch jewist. Preist däm Herr Gott.
Dee 148 Psalm
1 Preist däm Herr Gott! Preis däm Herr Gott fonn dee Himmels; Preist Am enn daut Hejchste.
2 Preist Am, aul jie sien Enjel; Preist Am, aul siene groote Menj Mensche.
3 Preist Am, Sonn un Mon; Preist Am, aul jie Lijcht Stearns.
4 Preist Am, O Himmels fonn Himmels; un Wotasch dee bowe dee Himmels sent.
5 Lot dän däm Herr Gott sien Nome preise; dan Hee haft aunkommendeat un dee weare erschaufe.
6 Un Hee deed dee bestädjen fa emma un emma; Hee jeef en Befäl daut dee nijch feschwinje sulle.
7 Lot dee See-Beeste un aulet Deepe däm Herr Gott preise fonn dee Ead;
8 Fia un Hoagel; Schnee un Ruak; stormja Wint dee sien Wuat erfelle;
9 Boaj un aule Humpels; fruchtboare Beem un aule Zeedabeem;
10 Beeste un aulet Fee, krupende Dinje un Fäajel fonn Flijchte,
11 Kjeenije oppe Ead un aule Felkja; Helte un aule Rejchte oppe Ead;
12 Beides junje Mane un Eentletsje Mäakjes uk; oole Mane met dee Junje.
13 Lot dän däm Herr Gott sien Nome preise; dan bloos sien Nome es huach je-eat; siene Harlijchkjeit es bowe dee Ead un dee Himmels.
14 Hee deit uk dän Huarn fonn sien Folkj opphäwe, siene Heilje äa Preis, fonn dee Iesrael Säns, en Folkj daut dijch bie Am es. Preis däm Herr Gott!
Dee 149 Psalm
1 Preis däm Herr Gott! Sinjt to däm Herr Gott en niehet Leet, sien Preis enn dee Heilje äare Fesaumlunk.
2 Lot Iesrael sikj enn Am freihe dee am jemoakt haft; lot dee Zion Säns froo senne enn äa Kjeenijch.
3 Lot an sien Nome Preise enn dän Dauns; lot dän to Am Preis sinje met Hoap en Jittoa.
4 Dan dee Herr Gott haft Fejneaje enn sien Folkj; Hee moakt dee Make straum met dee Radunk.
5 Lot dee Heilje sikj freihe enn Harlijchkjeit, lot an lud sinje opp äa Bad;
6 Un lot Gott siene Ea enn äa Hauls senne, un en Schweat fonn Miele enn äare Haunt,
7 Rach to eewe opp dee Nazione, Strof opp dee Felkja;
8 äare Kjeenijchs to binje met Kjäde, un äare Odelmensche met iesane Bande;
9 opp an daut Jerejcht to brinje daut beschräwe es: dit es ne Ea fa aul siene Heilje. Preis däm Herr Gott!
Dee 150 Psalm
1 Preis däm Herr Gott! Preis Gott enn siene heilje Städ; preis Am enn daut Grootet fonn siene Macht.
2 Preis Am enn siene majchtje Woakje; Preis Am doano aus sien prachtfollet Grootet es.
3 Preis Am met daut Schaul fonn dän Trompeet; Preis Am met dee Hoap en Jittoa.
4 Preis Am met daut Kjlinjre un Dauns; preist Am met Seid Instrumente un Piepe.
5 Preis Am met en Speldinkj; preis Am met daut Jelud fonn en Speldinkj.
6 Lot aules daut odme deit, däm Herr Gott priese. Preis däm Herr Gott.
Copyright © 2001 by Elmer Reimer