Chronological

Dee 3 Psalm

Doft sien Psalm aus hee fonn sien Saen Absalom flijchte must.

¹ O Herr Gott, woo sikj miene Fiend femeat ha! Doa sent fäl dee jäajen mie oppjestone sent.

² Fäl saje fonn miene Seel: "Doa es kjeene Radunk fa am enn Gott." Selah.

³ Oba du, O Herr Gott, best en Schilt romm mie; miene Harlijchkjeit, un dee, dee mien Kopp opphäft.

⁴ Ekj schreajch no mien Herr Gott met miene Stem, un Hee head mie fonn ut sien heilja Boajch. Selah.

⁵ Ekj läd mie dol en schleep; ekj wuak opp, dan dee Herr Gott bewoad mie.

⁶ Ekj woa mie nijch enjste fa dusende fonn Mensche dee sikj jäajen mie jestalt ha runnt omm.

⁷ Sto opp, O Herr Gott! Rad mie, O mien Gott! Dan du hast aul miene Fiend aune Backknoake jeschmattat; du hast dee Gottloose äare Täne jebroake.

⁸ Dee Radunk jeheat daem Herr Gott; dien Säajen es opp dien Folkj. Selah.

Dee 4 Psalm

¹ Horjch no mie wan ekj roop, O du Gott fonn miene Jerajchtijchkjeit; du jeefst mie Rum enn mien Älend. Doo die äwa mie erboarme, un hea mien Jebäd.

² O jie Mensche Säns, woo lang woa jie miene Harlijchkjeit to Schaund moake? Woa jie Nutslooset leef habe? Woa jie ne Leaj hinjaraun rane? Selah.

³ Oba dit sel jie weete daut dee Herr Gott haft dee jetlijche fa sikj selfst auntsied jesat; dee Herr Gott heat mie wan ekj am aunroop.

⁴ Doot tsetre, un doot nijch sindje, räd met die selfst opp dien Bad un sie stel. Selah.

⁵ Doot dee Opfa fonn Jerajchtijchkjeit opfre, un doot enn däm Herr Gott fetruehe.

⁶ Fael saje: "Wäa woat onns irjent waut Goots wiese?" O Herr Gott, lot onns daut Lijcht fonn dien Jesejcht seene.

⁷ Du hast mie enn mien Hoat Freid jejäft, meeha aus donn aus äa Jeträajd un Wien tooneem.

⁸ Ekj woa mie beides dol laje enn Fraed, un uk schlope, dan du, O Herr Gott, moakst mie enn Fräd läwe.

Dee 12 Psalm

To daen haupt Musikaunt opp Scheminot, en Psalm fonn Doft.

¹ Halp, O Herr Gott, dan dee Heilje sent feschwunje; dan dee Tru sent, sent nijch to finje mank dee Mensche Säns.

² Dee raede Nutslooset, en jieda met sien Noba, met Leppe dee schmeijchle un räde met en dobbeldet Hoat.

³ Dee Herr Gott woat aule aufschniede dee met schmeijchel Leppe räde, un ne Tunj dee Stolltet räde deit;

⁴ dee saje: "Wie woare jewenne met onnse Tunje, onnse Leppe jeheare onns, wäa es Herr äwa onns?"

⁵ "Ekj woa nu oppstone fa dee Oame äa Bedrekje un daut Sefte fa dee Bederftje," sajcht dee Herr Gott. "Ekj woa dän fesejchre, hee stänt doafäa."

⁶ Däm Herr Gott siene Wead sent ajchte Wead, soo aus Selwa daut jereinijcht es enn en eadna Owe, säwen mol jereinijcht.

⁷ Du woascht dän behoole, O Herr Gott; du woascht dän behoole fonn dit Jeschlajcht fa emma.

⁸ Dee Beese wanke romm aun aule Siede wan dee Beese Mensche Säns daut Beeset lowe.

Dee 13 Psalm

To daen Haupt Musikaunt, en Psalm fonn Doft.

¹ Woo lang woascht du fonn mie fejäte, O Herr Gott? Fa emma? Woo lang woascht du dien Jesejcht fonn mie festäakje?

² Woo lang saul ekj Rot näme enn miene Seel, un jieda Dach Trua ha enn mien Hoat? Woo lang saul mien Fient fäajetrocke woare fer mie?

³ Kjikj! Jeff mie Auntwuat, O Herr Gott, mien Gott. Doo miene Uage oppdache, daut ekj nijch ennschlop emm Doot;

⁴ Daut mien Fient nijch meteemol sajcht: "Ekj ha jewonne äwe am," un miene Fiend sikj freihe wan ekj fescheddat sie.

⁵ Oba ekj ha enn dien Erboarme Toofetruehe jehaut; mien Hoat woat sikj freihe enn diene Radunk.

⁶ Ekj woa to däm Herr Gott sinje, wiels hee mie beloont haft.

Dee 28 Psalm

En Psalm fonn Doft.

¹ Ekj woa to die roope, O Herr Gott; Mien Groota Steen, sie nijch Doof to mie, sest wan du stel best woa ekj soona senne dee fejlikjt woat met soone dee rauf gone no dee Kul.

² Hea dee Stem fonn mien Jebäd enn mien schriehe to die, wan ekj miene Henj opphäw to daut Wuat fonn diene Heilijchkjeit.

³ Nem mie nijch wajch met dee Beese, oda met soone dee Gottloosijchkjeit eewe; dee fonn Fräd raede met aeare Nobasch, oba Beeset es enn äa Hoat.

⁴ Jef an no äa Doone, no daut Beeset daut see aungone; soo aus enn äare Henj äare Oabeit es, soo jef an.

⁵ Wiels see jaewe kjeene Oobacht to däm Herr Gott siene Woakje, un to dee Oabeit fonn siene Henj; Hee woat dän fenijchte, un woat dän nijch oppbuehe.

⁶ Jesäajent es dee Herr Gott, wiels hee haft dee Stem fonn mien Jebäd jeheat.

⁷ Dee Herr Gott es mien Krauft un mien Schilt, mien Hoat Toofetruehe es enn am, doaromm freit sikj mien Hoat butamote, un ekj woa am Dank jäwe met mien Jesank.

⁸ Dee Herr Gott es Macht to an, un hee es dee Fastinj fonn sien Ennjesaulwda siene Radunk.

⁹ Rad dien Folkj, en doo dien Oawgoot säajne; un jef daen Äte, un häw dän fa emma nehejcht.

Dee 55 Psalm

To dän Haupt Musikaunt opp Neginot; En Nodenkje; En Psalm fonn Doft.

¹ Horjch no mien Jebaed, O Gott, en doo die nijch festäakje fonn mien Jeschrejcht.

² Horjch no mie, un doo auntwuate; ekj sie onnruehijch, un stän enn mien kloage,

³ Wäajen däm Fient siene Stem, un wäajen daut bedrekje fonn dän Fient, dan dee scheddre Beeset äwa mie, un enn äa Oaja hausse see mie.

⁴ Mien Hoat es enn Weedoag enn mie, un daut Schrakj fonn dän Doot es opp mie jefolle.

⁵ Forjcht un Tsettre kome opp mie; un Schrakj haft mie bedakjt.

⁶ Un ekj saed: "Wäa woat mie Flijchte jäwe soo aus ne Duw?" dan wudd ekj wajch fleaje un enn Rue senne.

⁷ See, ekj wudd wiet waundre, wajch rane; ekj wudd enne Wiltnes bliewe. Selah.

⁸ Ekj wudd mie spoode wajch to rane fonn dän ruzhenda Wint, fonn dän Storm.

⁹ Schluck opp, O Herr; doo äare Tunj spoole, dan ekj see Jewault un Striet enne Staut.

¹⁰ Dach un Nacht gone see runnt omm opp dee Wenj, un Trubbel un Schowanackjet es enn äare Med.

¹¹ Jietsjet es enn äare Med un Bedrekje un Lest felat äare Gause nijch.

¹² Dan daut es nijch en Fient dee mie waut fäaschmiete deit, dan kunn ekj daut fedroage; daut es uk nijch eena dee mie hausst dee sikj jäajen mie opphäwe deit, dan kunn ekj mie fonn am festäakje.

¹³ Oba daut best du, en Maun dee so es aus ekj sie, mien Frint, un mien Metoabeida.

¹⁴ Wie neeme seeta Rot toop; wie mascheade toop no Gott sien Hus met dee Menj Mensche.

¹⁵ Lot dän Doot dän tohoole kjriehe! Dee gone läwendijch rauf no de Hal, dan Gottloosijchkjeit es enn äare Wonstaede.

¹⁶ Ekj woa Gott aunroope, un dee Herr Gott woat mie rade.

¹⁷ Oppenowent un Tsemorjenst un opp Meddach woa ekj bäde un äwalud schriehe, un Hee woat miene Stem heare.

¹⁸ Hee deit miene Seel rade enn Fräd fonn dän Kjrijch jäajen mie; dan doa weare fäl dee met mie weare.

¹⁹ Gott woat heare un dän auntwuate, soogoa dee, dee fonn jeehäa es oppem Troon jewast. Selah. To dän es doa kjeene Enndanis, Jo, dee doone Gott nijch ferjchte.

²⁰ Hee schekjt siene Haunt rut jäajen dän dee am Fräd wensche doone; hee bruak sien Bunnt.

²¹ Siene Wead ut sien Mul weare glaute aus Botta, oba Kjrijch wea enn sien Hoat; siene Wead weare weakja aus Eelj, oba dee weare soo aus Schweate dee rut jetrocke weare.

²² Schmiet diene Laust opp däm Herr Gott, un hee woat die bewoare; Hee woat niemols erlaube daut dee Jerajchte sulle schwanke, fa emma.

²³ Oba du, O Gott, woascht dän rauf brinje no dee Fenijchtunj Kul; Blootdarschtje un Lestje Mane woare nijch haulf fonn äare Doag utlaewe, oba ekj woa enn die fetruehe.