Chronological
Dee 6 Psalm
To dän haupt Musikaunt opp Neginot opp Scheminit, en Psalm fonn Doft.
1 O Herr Gott, doo mie nijch dodle enn dien Oaja; un doo mie uk nijch strofe enn dee Hett fonn dien Rach;
2 Doo die äwa mie erboarme, O Herr Gott, dan ekj sie schwack; heel mie O Herr Gott, dan miene Knoakes sent enn Trubbel.
3 Miene Seel es uk emm deepe jetrubbelt - en Du, O Herr Gott, woo lang?
4 O Herr Gott, komm trigj, rad miene Seel, rad mie omm dien Erboarme haulwe.
5 Dan enn dän Doot es doa kjeen Aunjedenkj aun die; wäa woat die danke fonn utem Grauf?
6 Ekj sie meed enn mien Stäne; mien Bad schwamt derjch dee gaunse Nacht; miene Rubenk schmelt met miene Trone.
7 Mien Uag es Dunkel wäajen mien Trua, daut woat moaga wäajen aul miene Fiend.
8 Wajch fonn mie, aul jie dee Gottloosijchkjeit oabeide, dan dee Herr Gott haft dee Stem fonn mien Hiele jeheat.
9 Dee Herr Gott haft mien Jeschrejcht jeheat, dee Herr Gott woat mien Jebäd aun näme.
10 Lot aul miene Fiend sikj schäme un emm deepe jetrubbelt senne; dee sele trig dreihe, un sikj schäme enn eene Moment.
Dee 8 Psalm
To däm haupt Musikaunt opp Jittit, en Psalm fonn Doft.
1 O Herr Gott onns Herr, woo Madastijch es dien Nome enne gaunse Ead; du hast diene Harlijchkjeit hejcha jestalt aus dee Himels!
2 Ut dee Bäbes un soone aune Brosst äare Miele hast du Macht ennjeordent wäajen diene Fiend, soo daut dee Fient un dee Racheewa nojäwe motte.
3 Wan ekj mie äwa diene Himels, daut Woakj fonn diene Finjasch bedenkje doo, dee Mon un dee Stearns dee du bestädijcht hast;
4 Waut es dee Mensch daut du aun am denkje susst, un dee Säns fonn Mensche daut du dän beseakje susst?
5 Dan du hast am en bät läaje jemoakt aus Gott; un hast am met Harlijchkjeit un Ea jekroont.
6 Du hast am dee Harschoft jejäft äwa daut Woakj fonn diene Henj, du hast aules unja siene Feet jestalt -
7 Aule Schop un Osse, un uk dee Tiare emm Flekj,
8 dee Fäajel enne Lofft un dee Fesch em See, aule dee derjch dän See-stijch schwame.
9 O Herr Gott, onns Herr, woo Madastijch es dien Nome enne gaunse Ead!
Dee 9 Psalm
To dän haupt Muskaunt opp Mut-labben, en Psalm fonn Doft.
1 Ekj woa die danke, O Herr Gott, met mien gaunset Hoat; ekj woa fonn diene wundafolle Woakje fetale;
2 Ekj woa mie freihe, un enn die Froo senne, ekj woa dien Nome preise, O du Aulahejchsta.
3 Wan miene Fiend trigj jedreit sent, woare dee dol faule un ommkome fer die.
4 Dan du hast mien Rajcht un miene Sach bestädijcht, du sautst opp daen Troon un deetst rajcht rejchte.
5 Du hast dee Natsjoone jedodelt; du hast dee Beese fenijcht, en hast äa Nome utjelascht fa emma un emma.
6 Dee Fiend äa Felotenheit es befoadijcht fa emma, un du hast dee Grootstaede utjewartelt, un äa Jedajchtnis es feschwunje met an.
7 Oba dee Herr Gott es bestädijcht fa emma; Hee haft sien Troon fa Jerejcht fa emma bestädijcht.
8 En hee woat dee Welt enn Jerajchtijchkjeit rejchte, hee woat dee felkja rajcht rejchte.
9 Dee Herr Gott woat uk ne Tooflucht senne fa dän dee bedrekjt sent, ne Tooflucht wan doa Trubbel es.
10 En dee, dee dien Nome bekjane woare äa Toofetruehe enn die habe; dan, du, Herr Gott, hast dän nijch felote dee die seakje.
11 Singt Preis to däm Herr Gott dee enn Zion wont; moakt sien Doone bekaunt mank dee Natsjoone.
12 Dan Hee behelt dän dee no Bloot seakje; un fejat nijch dee Betriebte äa Schriehe.
13 Doo die äwa mie erboarme O Herr Gott; see mien Betriebtet aun, derjch dän dee mie hause, häw mie enopp fonn dee doodes Puate,
14 Soo daut ekj aul diene Preise erkjläare kaun enn dee Zions Dochta äare Puate; ekj woa mie freihe enn diene Radunk.
15 Dee Natsjoone sent enn dee Kul enenn jesunke dän see muake; äa eajna Foot es enn daut Nat jejräpe daut see festuake.
16 Dee Herr Gott haft bekaunt jemoakt, hee haft Jerejcht je-eeft; dee Beesa es jejräpe enn siene eajne Henj äare Oabeit. En Bedenkje. Selah.
17 Dee Beese sele trigj jedreit woare no de Hal, un aul dee Natsjoone dee fonn Gott fejäte.
18 Dan dee Bederftje woare niemols fejäte woare, dee Natsjoone dee Gott fejäte, woare opp emma felote senne.
19 Sto opp, O Herr Gott! Lot däm Mensch nijch dee Äwahaunt kjriehe. Lot dee Natsjoone fer die jerejcht woare.
20 O Herr Gott, doo an enjste; lot dee Natsjoone weete daut see mau Mensche sent. Selah.
Dee 10 Psalm
1 Wuaromm steist du soo wiet auf, O Herr Gott? Woascht du die festäakje enn schwearije Tiede?
2 Dee Beesa woat enn siene Stolltheit dee Oame hinjaraun joage; dee woare jejräpe woare enn äare eajne Plone dee see utjedocht habe.
3 Dan dee Beese puche sikj äwa äa Seele Janke, un kjneet sikj dol fer dee Jietsje; dan hee haft däm Herr Gott fe-acht.
4 Enn siene Stolltheit woat dee Beesa nijch seakje - doa es kjeen Gott enn aul sien Fäanäme.
5 Siene Wäaj sent emma äwareen, diene Jerejchte sent wiet wajch fonn sien Aunseene; waut siene Fiend aunbelangt, hee pust opp daen.
6 Hee haft enn sien Hoat jesajcht: "Ekj woa nijch wieda jerekjt woare!" Fonn eene Jeschlajcht no daut näakjste, niemols enn Onnjlekj.
7 Sien Mul es foll Lastre un Lest un Schwindlarie; unja siene Tunj es Schowanak un Beeset.
8 Hee set enn dee festoakne Städe enn dee Darpe; enn dee Jeheeme Städe deit hee dee onnschuldje ommbrinje, siene Uage sent jäajen dee Oame.
9 Hee luat emm Jeheeme soo aus aus en Leiw enn siene Gruft; hee luat festoake dee Oame to jriepe, dän enn sien Nat enenn.
10 En wan hee feschmatat haft, beajcht hee sikj dol; dee Oame sent jefolle derjch siene Stoakje.
11 Hee haft enn sien Hoat jesajcht: "Gott haft fejäte, hee haft sien Jesejcht festoake, hee woat niemols seene."
12 O Herr Gott, sto opp! O Gott, doo diene Haunt opphäwe, fejat nijch fonn diene Jerinje.
13 Wuaromm deit dee Beesa Gott fe-achte? Dee haft enn sien Hoat jesajcht daut du an nijch woascht feauntwuatlijch hoole.
14 Du hast jeseene, dan du hast äa Schowanakjet un Fedruss beoobacht, met diene Haunt trigj to tole. Dee Oama äwajeft sikj aun die, du best dee Weisekjinje äa Help.
15 Bräakj dee Beese un Gottloose äa Oarm; doo sien Gottlooset utforsche bott doa nuscht meeha to finje es.
16 Dee Herr Gott es opp emma un emma Kjeenijch, dee Natsjoone sent ut sien Launt feschwunje.
17 O Herr Gott, du hast dee Deemietje äa Janka jeheat, du woascht äa Hoat reed moake, dien Ua woat heare
18 Dee Weisekjinje un Bedrekjte to rejchte, un dee Maun fonne Ead saul sikj nijch meeha enjste.
Dee 14 Psalm
To daen haupt Musikaunt, en Psalm fonn Doft.
1 Dee Noa haft enn sien Hoat jesajcht: "Doa es kjeen Gott." Äa Benäme es fe-ädelt, waut see deede, deede see enn Haus, doa es kjeena dee Goots deit.
2 Dee Herr Gott kjikjt rauf fomm Himel opp dee Mensche Säns, tom seene auf doa irjent waut fa Festentnis wea, dee no Gott socht:
3 Dee ha sikj aule auntsied jedreit, dee sent toop schwiensch jeworde, doa es kjeena dee Goots deit, nijch emol eena!
4 Ha aul dee, dee Beeset eewe kjeen Festaunt? Dee Mien Folkj oppjefräte ha soo aus Broot; dee ha däm Herr Gott nijch aunjeroopt.
5 Donn deede see sikj enjste fa dän Schrakj, dan Gott es enn dee Jerajchte äa Jeschlajcht.
6 Du hast dee Oama äa Rot jeschämt, dan dee Herr Gott es siene Tooflucht.
7 Wäa woat dee Radunk ut Zion brinje? Wan dee Herr Gott dee Jefangenschoft fonn sien Folkj trigj brinje woat, dan woat Joakopp sikj freihe, un Iesrael woat froo senne.
Dee 16 Psalm
En Jeheemnet Schats fonn Doft.
1 Doo äwa mie wajchta, O Gott, dan ekj sat mien Toofetruehe enn die.
2 Du hast to däm Herr Gott jesajcht: "Du best mien Herr, ekj ha kjeen Goots buta enn die."
3 Waut dee Heilje enne Ead aunbelanjt, dee sent dee fetraflijche, enn wäm aul mien Fejneaje es.
4 Soone äa Trua saul femeat woare dee en aundra Gott hinjaraun rane. Ekj woa äa Drunk Opfa fonn Bloot nijch utjeete, un äare Nomes woare nijch ut miene Leppe kome.
5 Dee Herr Gott es daut Poat fonn mien Oawgoot un mien Kuffel. Du woascht sejchalijch miene Tookunft bestädje.
6 Dee Lienjes sent mie enn scheene Städe jefolle, jo, ekj ha en straumet Oawgoot.
7 Ekj woa däm Herr Gott säajne dee mie Rot jeft; mien Hoat deit mie uk enne Nacht beleare.
8 Ekj ha däm Herr Gott emma fer mie, dan hee es bie miene rajchte Haunt, ekj woa nijch jescheddat woare.
9 Daut es dee Uaosoak wuaromm mien Hoat froo es, en miene Harlijchkjeit freit sikj, mien Fleesch saul uk en Hopninj ruehe,
10 Dan du woascht miene Seel nijch enn dän Grauf lote, du woascht dien Heilja nijch lote Fewäsunk seene.
11 Du woascht mie dän Laewes Wajch ennleare, enn dien Doasenne es folle Freid; bie diene rajchte Haunt es Fejneaje fa emma en emma.
Dee 19 Psalm
To dän haupt Musikaunt, en Psalm fonn Doft.
1 Dee Himels behaupte Gott siene Harlijchkjeit, un dee Weltaul behaupt sien Hauntwoakj.
2 Dach enn un Dach ut räde dee, Nacht no Nacht brinjt Wissenschoft fäa.
3 Doa es kjeene Räd, un doa sent kjeene Wead wua dän äare Stem nijch to heare es.
4 Daen äare Motlien es derjch dee gaunse Welt jegone, un äare Wead bott dee Enje fonne Ead. Enn dän haft hee ne Woninj oppjestalt fa dee Sonn,
5 Dee oppkjemt soo aus en Briegaum fonn sien Schorm. Hee freit sikj soo aus en Helt dän Speltstriet to ranne;
6 En kjemt fäa fonn daut Enj fonn dee Himels, un sien Krauns es bott daut aundre Enj; un doa es nuscht daut fonn siene Hett festoake es.
7 Däm Herr Gott sien Jesats es follkome, un deit dee Seel rade. Däm Herr Gott sien Zeijchnes es Ajcht, un moakt dee Eefeltje Weis.
8 Däm Herr Gott siene Fäaschrefte sent rajcht, un moake daut Hoat Froo. Däm Herr Gott siene Aunkommendearunje sent Kloa, dee jäwe Lijcht to dee Uage.
9 Däm Herr Gott siene Forjcht es rein, un blift fa emma en emma; däm Herr Gott siene Jerejchte sent Woa, dee sent gaunsentgoa Jerjacht.
10 Dee ha meeha Weat aus Golt, soogoa ajchtet Golt, un seeta aus Honnijch, un Dreppe fonn Honnijchkorf.
11 Derjch dän es dien Deena jewoarnt; un enn dän jehuarsaum senne es doa grootet Loon.
12 Wäa kaun aul siene Fäla unjascheede? Rad mie fonn jeheemne Fäla.
13 Hool mie uk wajch fonn fäadrenjlijche Sind; lot dän nijch Macht habe äwa mie; dan woa ekj Opprajcht senne, un woa onnschuldijch senne fonn daut grootet Äweträde.
14 Lot dee Wead ut mien Mul, en daut Bedenkje fonn mien Hoat aunjenäm senne enn dien Aunseene, O Herr Gott, mien Groota Steen un mien Rada.
Dee 21 Psalm
To dän haupt Musikaunt, en Psalm fonn Doft.
1 Dee Kjeenijch freit sikj enn diene Macht, O Herr Gott; un woo seeha deit hee sikj freihe enn diene Radunk.
2 Du hast am sien Hoat Janke jejäft, un hast daut Jebäd fonn siene Leppe nijch wajch jehoole. Selah.
3 Dan du woascht fer am feropp gone met Saeajens fonn Goots. Du hast ne Kroon fonn ajchtet Golt opp sien Kopp jesat.
4 Hee fruach die no Läwe: du jeefst am dee Lengd fonn Doag fa emma en emma.
5 Siene Harlijchkjeit es groot enn diene Radunk; du hast Ea un Madastijchkjeit opp am jelajcht.
6 Dan du hast am fa Säajens jesat fa emma; du hast am Freid jejäft enn dee Freid fonn dien Jesejcht.
7 Dan dee Kjeenijch deit enn däm Herr Gott fetruehe, un enn däm Aulahejchsta sien Erboarme; hee woat nijch wajch jeriemt woare.
8 Diene Haunt woat aul diene Fiend utfinje; diene rajchte Haunt woat dän utfinje dee die hause.
9 Du woascht dän soo aus en fiarija Owe sate enn dee Tiet fonn dien Doasenne; dee Herr Gott woat dän oppschlucke enn sien Rach, un daut Fia woat dän fenijchte.
10 Du woascht dän äa Frucht fonne Ead fenijchte, un äare Nokome fonn mank dee Mensche Saens.
11 Dan dee plonde Beeset jäajen die, see dochte aun en Beeset Dinkj; dee kjenne oba nijch jewenne,
12 dan du woascht dän moake trigjaun gone; du woascht diene Fiele reed moake opp dän Baunt jäajen äare Jesejchte.
13 O Herr Gott, sie je-eat enn diene Macht; soo woa wie sinje, un Psalme fonn diene Krauft sinje.
Copyright © 2001 by Elmer Reimer