Chronological

2 Aum dredde Dach wea enn Kana enn Gailiaea ne Kjast, en Jesus siene Mutta wea uk doa.

² En Jesus en siene Jinja weare uk to de Kjast ennjeloda.

³ En aus doa nich mea Wien wea, saed Jesus siene Mutta to am: "Dee ha nich Wien."

⁴ Jesus saed to aea: "Fru, waut haft daut met die en mie to doona? Miene Tiet es noch nich hea."

⁵ Siene Mutta saed to de Deena: "Doot wautema hee to ju sajcht."

⁶ Doa weare sas steenane Wotakrucke dee de Jude bruckte to aeare reinjunks Tsermoonja, en hilde bie twintich ooda dartich Galoon jieda.

⁷ Jesus saed to an: "Felt dee Krucke Foll Wota!" En see felda dea gauns opp bottem Raunt.

⁸ "Donn saed hee to an: "Nu schapt waut erut en brinjt daem FastMeista!" En see deede daut.

⁹ Aus de FastMeista daut Wota, daut nu Wien wea, jeschmakjt haud, en nich wist wua daut haea kjeem, (oba de Deena dee daut Wota jeschapt haude wiste), roopt de FastMeista daen Briegaum,

¹⁰ En saed to am: "Aulemaun sat daem basta Wien faea emm Aunfank, en dan wan de Jast eascht goot jedrunke habe, dan daut waut bilja es; oba du hast de baste bott nu jehoole."

¹¹ Dit Aunfank fonn siene Wundateakjen deed Jesus enn Kana enn Galilaea, en oppenboad siene Harrlijchkjeit, en siene Jinja jleewde aun am.

¹² Nodaem jinkj hee, siene Mutta en siene Jinja no Kapernaum, en bleewa bloos en poa Doag.

¹³ En dee Jude aea Pasafast wea dichtbie, en Jesus jinkj no Jerusalem.

¹⁴ Doa funk hee emm Tempel dee, dee Osse en Shop en Duwe fekoffte, uk dee Jeltwakjsle sette.

¹⁵ He muak sikj ne Pitsch fonn Strenj en juach daen aule utem Tempel rut, met de Osse en Schop; en sched de Jeltwakjsla aea Jelt ut, en schmeet aeare Desche omm.

¹⁶ En saed to de Duwehaundla: "Naemt dise Dinje hia wach; moakt ut mien Foda sien Hus nich en Haundelsplauts!"

¹⁷ Donn dochta de Jinga doaraun daut jeschraewe stunnt: "Dee Iewa omm dien Hus haft mie fetaeat!"

¹⁸ De Jude jeewe am auntwuat en saede to am: "Waut jefst du onns fa en Teakjen daut du daut Racht hast dit to doone?"

¹⁹ Jesus auntwuad an en saed: "Braekjt dis Temple dol, en ekj woa daen enn dree Doag wada uppbuhe."

²⁰ Donn saede de Jude: "Daut neem sasefeatich Joa dis Tempel to buhe, en du west daem enn dree Doag upbuhe?"

²¹ He raed oba fonn sien Lief aus en Tempel.

²² Aus hee donn nohaea fomm Doot oppjestone wea, dochte siene Jinja doaraun, daut hee dit to an jesajcht haud, en see jleewde dee Schreft, en daut Wuat waut Jesus an jesajcht haud.

²³ Aus Jesus donn enn Jerusalem oppem Pasafast wea, jleewda fael aun sien Nome aus see aul de Teakjens sage waut hee deed.

²⁴ Oba Jesus aewajeef sikj an nich, wiel hee kjand aulamaun,

²⁵ en haud daut nich needich daut am irjentwaea en Jeteakjnes fonn en Mensch jeef, wiel he wist waut enn Mensche benne wea.

3 Doa wea en Maun dee heet Nikodeemus, en Farisaea, waut utem huage Rot wea.

² Disa kjeem no Jesus enne Nacht en saed: "Meista, wie weete daut du en Leara best fonn Gott, dan kjeena kaun dee Teakjens doone dee du deist, bueta Gott es met am."

³ Jesus auntwuad en saed to am: "Enn Woarheit, enn Woarheit saj ekj die: Waea nich wadajebuare es fonn Bowe, kaun Gott sien Rikj nich seene."

⁴ Nikodeemus saed to am: "Woo kaun en Mensch noch eemol jebuare woara wan hee oolt es? Kaun he tom tweeda mol em Muttalief enenn gone en wada jebuare woare?"

⁵ Jesus auntwuad: "En Woarheit, en Woarheit, saj ekj die: Wea nich ut Wota en Jeist jebuare es, kaun nich enn Gott sien Rikj ennen kome.

⁶ Daut waut fomm Fleesch jebuare es, es Fleesch; en daut waut fomm Jeist jebuare es, es Jeist.

⁷ Doo die nich wunndre daut ekj die saj: Jie motte fonn bowe wadajebuare senne.

⁸ De Wint blost wua he wel, en du kaust daen heare, oba du weetst nich wua he haea kjemt, oda wua he han jeit. Soo es en jiedre dee fom Jeist jebuare es."

⁹ Nikodeemus auntwuad en saed to am: "Woo kaun sowaut paseare?"

¹⁰ Jesus auntwuad en saed to am: "Du best en Leara enn Iesrael en weetst daut nich?

¹¹ Enn Woarheit, enn Woarheit saj ekj die: Wie raede daut waut wie weete, en jaeawe Zeichnes fonn daut waut wie jeseene ha, en jie naeme onns Zeichnes nich aun.

¹² Wann ekj ju fonn irdische Dinje saj, en jie nich jleewe, woo wudd jie jleewe wan ekj ju fonn himlische Dinje fetal?

¹³ Noch es kjeena nom Himel gefoare bueta dee, dee fom Himel erauf kaum, - dee Menschesaen.

¹⁴ En soo aus Moses dee Schlang enne Wiltnes nehecht hoof, jrod soo mott de Menschesaen uk nehecht jehowa woare.

¹⁵ Daut aul dee, dee aun am jleewe, daut eewje laewe habe.

¹⁶ Dan Gott haft dise Welt so Leef jehaut, daut hee sien eentsje Saen jeef, daut aula, dee aun am jleewe, nich feloare gone, oba daut eewje Laewe habe.

¹⁷ Dan Gott schekjt sien Saen nich enn dise Welt enenn omm dee to rechte, oba daut dee Welt derch am kunn seelich woare.

¹⁸ Waea aun am jleeft es nich jerecht; waea oba nich jleeft es aul jerecht, wiel hee nich aun daen eenstje Gottes Saen sien Nome jleeft.

¹⁹ En dit es daut Rechta-uadeel: daut Licht es en dise Welt ennen gekome, oba de Mensche leewda Diestennes leewa es daut Licht, wiel aeare Woakje bees weare.

²⁰ Dan waea sikj enn beese Woakje eeft, haust daut Licht en kjemt nich tom Licht, daut siene Woakje nich saele ferndach kome.

²¹ Oba dee waut Woarheit deit, kjemt tom Licht, daut siene Woakje ferndach kome, daut dee fonn Gott jedone sent."

²² No dit kjeeme Jesus en siene Jinja em judaeasche Launt enenn, en bleef doa met an en deept uk.

²³ Jehaun deept doa uk bie Aenoon, dichtbie Salim, wiel doa fael Wota wea, en dee Mensche kjeeme en leete sikj deepe.

²⁴ Dann Jehaun wea noch nich em Jefenkjnes jestoppt.

²⁵ Donn unjahilde Jehaun siene Jinja sikj met en Jud aewa reinjunks Faeaschrefte,

²⁶ En kjeeme no Jehaun en saede to am: "Meista, dee, dee aun jantsied Jordan bie die wea, fonn daem du zeije deetst, kjikj emol: dee deept doa, en aulamaun jeit no am."

²⁷ Jehaun auntwuad en saed: "En Mensch kaun nuscht naeme waut am nich fom Himel jejaeft es.

²⁸ Jie selfst jaewe mie Zeichnes daut ekj saed, daut ekj nich dee Christus sie, oba daut ekj fer am jeschekjt sie.

²⁹ Dee waut de Brut haft es de Briegaum: oba daen Briegaum sien Frint, dee doa steit en am heat, freit sikj seeha daen Briegaum siene Stem to heare. Dise miene Freid es nu follkome.

³⁰ He mott toonaeme, ekj oba mott aufnaeme.

³¹ Dee waut fonn Bowe kjemt es aewa aulem; dee waut fonne Ead kjemt es irdisch, en raet fonne Ead. Dee waut fomm Himel kjemt es aewa aules.

³² En waut hee jeseene en jeheat haft, doa fonn jeft hee Zeichnes, oba kjeena nemt sien Zeichnes aun.

³³ Wea sien Zeichnes aun nemt, bewiest doamet daut Gott woarhauftich es.

³⁴ Dan dee waem Gott jeschekjt haft, raet Gott siene Wead, dan Gott deit sien Jeist nich toomaete.

³⁵ Gott haft sien Saen leef, en haft aules enn siene Henj gefaeft.

³⁶ Waea aun daen Saen jleeft, haft daut eewje Laewe, en waea daen Saen nich jehuarsaum es, saul daut Laewe nich seene, oba blift unja Gott sien Oaja."

4 Aus donn de Herr daut eascht wist daut dee Farisaea jeheat haude daut Jesus meeha Jinga kjreajch en deept aus Jehaun,

² Wan Jesus selfst uk nich deept, dee Jinja deede,

³ feleet hee Judaea en jinjk wada no Galilaea.

⁴ Hee musst oba derch Samaria reise.

⁵ Donn kjeem hee no ne Staut enn Samaria dee heet Siekar, dichtbie daut biet Launt waut Joakopp sien Saen Joosaf jejaeft haud.

⁶ Doa wea dee Joakoppsborm. Jesus wea meed fonn de Reis, en saut doa biem Borm, wiel daut wea Medach.

⁷ Donn kjeem doa ne Fru fonn Samaria Wota to hole. Jesus saed to aea: "Jeff me to drinkje."

⁸ Siene Jinga oba weare no dee Staut jegone Aete to kjeepe.

⁹ Dee Samarietische Fru saed donn to am: "Wu kjemt daut, daut du, en Jud, mie, ne samarietische Fru, no en Drunk Wota frajchst?" Dan de Jude habe nuscht met de Samarieta to doone.

¹⁰ Jesus auntwuad en saed to aea: "Wan du de Gottesgow kjansd, en waea dit es dee die frajcht: 'jef mie to drinkje!' dan wusscht du am jefroagt habe, en hee wudd die laewendjet Wota jejaeft habe".

¹¹ Dee Fru saed to am: "Herr, du hast hea nuscht wuamet du schappe kaunst, en dee Borm es deep; fonn wua hast du daut laewendje Wota?

¹² Du best doch nich jrata, best du, aus uns Foda Joakopp de onns dis Borm jeef, ut daen he selfst, uk siene Saens en sien Fee jedrunke ha?"

¹³ Jesus auntwuad en saed to aea: "Waea fonn dit Wota drinkjt, daem woat wada darschte;

¹⁴ Oba waea fonn daut Wota drinkjt waut ekj jaewe woa, woat niemols wada darschte; oba daut Wota waut ekj jaeawe woa, woat en daem ne aewaranende Kjwal, waut nehecht kjwalt enn daut eewjet Laewe."

¹⁵ Dee Fru saed to am: "Herr, jef mie daut Wota, daut mie nich meeha darschte woat, en ekj nich meeha bruck kome en schape!"

¹⁶ Jesus saed to aea: "Go roop dien Maun, en komm haea."

¹⁷ De Fru saed to am: "Ekj hab kjeen Maun." Jesus saed to aea: "Daut hast du Rajcht wan du sajchst, Ekj hab kjeen Maun.

¹⁸ Dan du hast fief Manne jehaut, en daen du nu hast es nich dien Maun. En daem hast du de Woarheit jeraet."

¹⁹ De Fru saed to am: "Herr, ekj woa enn daut du en Profeet best.

²⁰ Onnse Fodasch habe up disen Boajch aunjebaet, en jie saje daut enn Jerusalem es de Staed wua Mensche sulle aunbaede."

²¹ Jesus saed to aea: "Fru, jleew mie, de Tiet woat kome wan jie nich opp disen Boajch, uk nich enn Jerusalem daem Foda woare aunbaede.

²² Jie weete nich waut jie aunbaede; wie weete waut wie aunbaede, dan daut Heil kjemt fonne Jude.

²³ Oba doa woat ne Stund kome, en es nu aul, wan dee woarhauftje Aunbaeda daem Foda em Jeist en enne Woarheit woare aunbaede; dan de Foda seakjt no soone Aunbaeda.

²⁴ Gott es Jeist, en dee am aunbaede, motte aunbaede em Jeist en enne Woarhiet."

²⁵ De Fru saed to am: "Ekj weet daut dee Mesias kjemt, dee doa Christus heet. Wan dee kome woat, dee woat onns aules dietlich moake."

²⁶ Jesus saed to aea: "Ekj, dee met die raed, sie dee Mesias."

²⁷ En doaraewe kjeeme siene Jinja en fewunndade sikj daut he met de Fru raed, oba kjeena saed, "Waut seakjst du? oda: woaromm raetst du met aea?"

²⁸ Dee Fru leet aeare Wotakruck stone en jinjk aea Wajch enne Staut ennen en saed to de Maunslied:

²⁹ "Komt, seet en Maun dee mie aules jesajcht haft waut ekj jemols jedone hab! Kunn dit dee Christus senne?"

³⁰ Donn jinje see ute Staut erut en kjeeme no am.

³¹ Enntwesche saede siene Jinja to am: "Meista, at doch!."

³² Oba hee saed to an: "Ekj hab aete to aete wua jie nusscht fonn weete."

³³ Dee Jinja saede eena tom aundra: "Haft irjentwaea am waut to aete jebrocht?"

³⁴ Jesus saed to an: "Mien Aete es daem sien Wele to doone dee mie jeschekjt haft, en sien Woakj foadich to moake.

³⁵ Saj jie nich doa sent noch feeha Moonat en dann kjemt de Eifst? Oba ekj saj ju: Kjikjt emol, en seet de Arnt, dee es aul Riep en reed toom arnte.

³⁶ en waea doa arnte deit, kjricht Loon, en saumelt Frucht fa daut eewjet Laewe, soo daut dee waut doa seit, en dee waut doa arnte deit, sikj beid toop freie kjenne.

³⁷ Dan hia es dee Spruch woa: Eena seit, en sestwea arnt.

³⁸ Ekj schekjt ju daut to arnte wuafaea jie nich jeoabeit haude; aundre ha jeoabeit en jie sent enn aeare Oabeit ennen jekome."

³⁹ En fael fonn dee Samarieta en dee Staut jleewda aun am, wiel dee Fru to an jesajcht haud: "Hee saed mie aules waut ekj jedoone hab."

⁴⁰ Aus dee Samarieta donn no am kjeeme, prachade see am daut hee bie an bliewe sull; en hee bleef doa twee Doag. En fael mea jleewde aun am weajen siene Wead,

⁴² en saede to de Fru: "Nu jleew wie nich meeha bloos waeajen diene raed, wie habe selfst jeheat, en weete daut dit werkjlich Christus, de Welt aea Heilaunt es."

⁴³ Omm twee Doag jinkj he fonn doa no Galilaea,

⁴⁴ Dann Jesus selfst saed, daut en Profeet haft enn sien eajen Launt kjeene Ea.

⁴⁵ Aus he donn no Galilaea jekome wea, neeme de Galilaea am opp, wiel see haude aules jeseene waut hee enn Jerusalem jedone haud: see jinje uk no daut Fast.

⁴⁶ Jesus kjeem donn wada no Kana enn Galilaea wua hee daut Wota to Wien jemoakt haud. En doa wea enn Rejearunks-be-aumte fonn Kapernaum, daem sien Saen wea Krank.

⁴⁷ Aus dee head daut Jesus fonn Galilaea jekome wea, jinkj hee han en prachad am tom kome en sien Saen to heele, wiel dee wea doodes krank.

⁴⁸ Donn saed Jesus to am: "Wan jie nich Teakjens en Wuunda seene, wel jie nich jleewe.

⁴⁹ De Rejearungs-be-aumta saed to am: "Herr, komm eeha mien Kjint stoaft!"

⁵⁰ Jesus saed to am: "Go dien Wajch, dien Saen laeft!" Dee Maun jleewd daut Wuat waut Jesus to am jesajcht haud, en jinkj sien Wajch.

⁵¹ En aus he oppem Trigwajch wea, kjeeme siene Deena en saede to am: "Dien Saen laeft!"

⁵² Donn fruach hee an omm woone Tiet daut met am wea baeta jeworde, en see saede: "Jistre, klok eent no Medach feleet am daut Feeba."

⁵³ Donn wist dee Foda daut daut krakjt dee Teit wea aus Jesus to am jesajcht haud: "Dien Saen laeft." En hee selfst en siene gaunse Famielje jleewde.

⁵⁴ Dit es nu daut tweede Teakjen daut Jesus deed aus hee fonn Judaea no Galilaea jekome wea.