Chronological

Oj tjaw nimset tbi Dios

19  Tbajlenxitltzen lu, e xiˈ nbiˈna tkˈajkˈajel cyyol nimxsen cyajlal xjal tuj cyaˈj. Cyiwxix e xiˈ cykbaˈn:

―¡Jawnexxit Kman Dios! Nuk tuˈn Dios ma ko clet. Nimsxen tipemal. Nimjxit tbi, ² cuma jiquenxix bix tuj tumel jcastiwa ma txiˈ tkˈoˈn. Ma txiˈ tkˈoˈn tcastiwa jawnex aj paj e xiˈ tiiˈn kej xjal twitz txˈotxˈ tuj il tuˈnj tbinchben kaˈ. Bix ma tzaj tkˈoˈn Dios t‑xel te xuuj tuˈnj cycyamecy t‑akˈanal―tz̈i ke xjal tuj cyaˈj.

³ Bix e xiˈ cykbaˈntl:

―¡Jawnexxit Dios! cuma te junx maj njaw tsibel jkˈakˈ ncub tpaten tnom―tz̈ike.

⁴ Jax juˈx kej winakcyaja tij cyuyax cyaja jwik iˈtz e cub mutzkˈaj twitz Dios kˈukl tuj jawnex tkˈukbil tuˈn tjaw cynimsaˈn jaxin. E xiˈ cykbaˈn:

―Juˈxit ttena. Jawnexxit Dios―tz̈ike.

⁵ Bix e tzaj tkbaˈn jun nka tcub tkˈukbil Dios:

―Cykilca key t‑akˈanal Dios cyuyax key at cynimbil Dios cyuyax key chˈin bix key nintzaj, cynimsanx Kdios―tz̈i jun tcub nka ttxlaj Dios.

⁶ Bix e xiˈ nbiˈna cyyol jun nimxsen cyajlal aj tuj cyaˈj, tisen tkˈajkˈajel jun nimaˈ oj n‑etz wajtzˈaj twitz xak bix ka oj ntininin cyiw kˈancyok. E xiˈ cykbaˈn:

―¡Jawnexxit Dios! cuma at tuˈn tcawen Kman Dios tuya cykil tipemal. ⁷ Ko tzalajxix bix ko tenx aleyre bix ko nimsal ja Dios, cuma ma pon tumel tuˈn tten Jtal Carnel, ja Jesús, cyuya t‑xjal. Ma bint cyten t‑xjal, tisen oj nbint tten jun xuuj tuˈn tmaje tuya tchmil. ⁸ Ma tzaj kˈoˈn amleˈn cye t‑xjal tuˈn toc cyxbalen sak bix ntxakakan, te techel ka jiquenxix―tz̈i kej eteˈ tuj cyaˈj.

Mejoblenel te Tal Carnel

⁹ Bix e tzaj tkbaˈn ángel weya:

―Tzˈiˈbeqˈuey cyjulu: “At t‑xtalbil Dios cyibaj kej xjal txcoˈnke tuˈn cywaaˈn tuj mejoblenel tej Tal Carnel,”―tz̈i ángel.

Bix e tzaj tkbaˈntl weya:

―Kej yol lu jaxxix tyol Dioske―tz̈i weya.

¹⁰ Bix in cub majeya t‑xeeˈ tken ángel tuˈn nnimsana jaxin. Pero e tzaj tkbaˈn weya:

―Miˈn tbinchaya jlu, cuma nuk jun t‑akˈanal Dios kena tisen jay bix tisen ke niyˈtl ocslal nxiˈ cykˈumen yol tiˈj Jesús. Jyol tiˈj Jesús junx taˈ tuyaj yol e cykˈume tyolel Dios―tz̈i ángel.

Jun xjal tjax tibaj tz̈ej sak

¹¹ Tbajlenxitltzen jlu, e wila tej tjket twitz cyaˈj. Bix e wila jun tz̈ej sak, bix tjax tibaj tz̈ej jxjal jaxxix bix njapan tyol tuˈn. Tuj tumelxix ncawen, bix jiquenxix tkˈoj cyiˈj aj kˈoj tiˈj. ¹² Ke tbakˈ twitz tisen tken kˈakˈ, bix tjax nim corona tuj twiˈ. Bix tzˈiˈben jun biybaj tiˈj. Min‑al jun xjal n‑el tniyˈ tiˈj biybaj, nuk oˈcx jaxin. ¹³ Bix toc jun t‑xbalen otk cuˈx meˈt tuj tz̈iyˈ, bix Tyol Dios tbi. ¹⁴ Bix ncheˈx lpe nimxsen cyajlal kej eteˈ tuj cyaˈj tiˈj, tisen soldado. Toc cyxbalen sak, mintiiˈ tzˈil cyiˈj, bix eteˈwex cyibaj tz̈ej sak. ¹⁵ Bix n‑etz jun machet binne tten tuj ttzixin, tuˈntzen tajben texin tuˈn t‑xiˈ tkˈoˈnxin castiwa cye tnom. Ccawelxin cyibaj tuya nim tipemalxin, tisenj jun cylel ncylen cyiˈ carnel tuya jun bardón cyiw. Cwel tkˈoˈnxin tcastiwa binne tuˈn Dios at cykilca tipemal, tisen oj nbaj waˈbet uva tuj ttemlel uva. ¹⁶ Bix tzˈiˈben tiˈj tcux‑xin bix tiˈj t‑xbalenxin, jatzen tbi jlu: Rey tibaj cykilca rey bix Cawel tibaj cykilca cawel.

¹⁷ Bix e wila jun tsanjel Dios tuj cyaˈj waˈlcˈa twitz kˈij. Bix tuya jun cyiw tyol e xiˈ tkbaˈn te cykilca chˈit nchi purpaj twitz cyaˈj:

―Cytzaja tzalu, bix cychmon cyiiba tuˈn cytena tuj jun nin waaˈn cxeˈl tkˈoˈn Dios. ¹⁸ Cxeˈl cychyoˈna cychuˈl cawel bix capitán bix jawnex xjal bix tz̈ej bix kej xjal otk chi jax cyibaj bix cykilca xjal, akˈanal‑le, yaaˈnle akˈanal, chˈinle, jawnexle―tz̈i ángel cye chˈit.

¹⁹ Yajcˈatltzen, bix e wila jjiljil ul jlet cyuyax ke cawel twitz txˈotxˈ cyuyax cysoldado. Otk baj cychmon cyiib tuˈn cykˈoj tiˈj xjal tjax tibaj tz̈ej bix cyiˈj ke nim xjal tuya. ²⁰ Bix e tzyetjil jil tuyax tyolel ẍtakˈ otk yeecˈan tipemal twitzjil tuˈntzen tsbun cye xjal, ejeeˈj otk cyiikˈ techeljil tuj cyxumlal bix otk chi nimsan tsantjil. Cycaˈbel jlu e cuˈx xeˈtke iˈtzke tuj tnijabel kˈakˈ te azufre. ²¹ Jatzen ke mastl xjal eteˈ tuyajil jil, e cub byet tuˈn machet n‑etz tuj ttzi jxjal tjax tibaj tz̈ej, bix cykilca chˈit twitz cyaˈj e nojke tuˈn cychuˈl kej cyimne.

Kej mil jnabkˈi

20  Tbajlenxitltzen jlu, e wila juntl tsanjel Dios tuj cyaˈj. E cuˈtz tuj cyaˈj, bix kˈiˈn tal jaaˈ tuˈn te tej ttzi jul mintiiˈ tumel t‑xeeˈ, bix tuyax jun ma tij cadena tzyuˈn tuˈn tuj tkˈab. ² Bix e cub ttzyuˈn ja dragón, jatzenj lbaj te ootxa, jatzenj taaw il, jatzenj Satanás. Bix e xiˈ tẍpoˈn ja taaw il, tuˈn tten ẍpoˈn jun mil jnabkˈi. ³ Bix e cuˈx t‑xooˈn tuj jul mintiiˈ tumel t‑xeeˈ, bix e cyaj tlomoˈn ttzi jul. Bix e cub tkˈoˈn jun tlemel ttzi jul, tuˈntzen miˈn jatz taaw il tuˈn tsbuntl cyiˈ xjal. Pero oj tbaj mil jnabkˈi, il tiˈj ctzakpetel, pero yaaˈn nimtl kˈij.

⁴ Bix e wila nim kˈukbil jawnex. Bix kˈuklke tuj kˈukbil ke ocslal at tuˈn cycawen. Cyxoltzen ke ocslal eteˈ kej otk tzˈel txˈomet cywiˈ tuˈn tlaj cyocslabl tiˈ Jesús bix tuˈn tyol Dios, bix eteˈ kej min otk chi cub maje twitz jil jil bix twitz tsantjil, bix min otk tzˈoc techeljil tibaj cywitz bix ka tiˈ cykˈab. Otk chi jaw itzˈj tuj cyamecy juntl maj, bix oc chi cawel tuya Cristo jun mil jnabkˈi. ⁵ Yaltzen ke niyˈtl xjal yaaˈn ocslal, min e jatz itzˈj juntl maj ojxe tbaj mil jnabkˈi. Min e jatz itzˈj tuj tneel maj tej cyjatz itzˈj ocslal tuj cyamecy. ⁶ At t‑xtalbil Dios tibaj kej xjal nchi jatz itzˈj tneel maj, cuma t‑xjal Dioske. Oj cycyim xjal te junx maj, ja tcab cyamecy lu. Mintiiˈ tipemal cyibaj ke t‑xjal Dios lu. Nuk oˈcx chi oquel te pala tuˈn cyajben te Dios bix te Cristo, bix chi cawel tuya Cristo jun mil jnabkˈi.

⁷ Ojtzen tbaj mil jnabkˈi, cjawetztzen tzakpet taaw il, ja Satanás, tuj jul mintiiˈ tumel t‑xeeˈ. ⁸ Qˈuelextzen sbul cykilca tnom eteˈ twitz txˈotxˈ, jtnom te Gog tuyax Magog. Chi oquel tchmon cyiib tuˈn cykˈoj tiˈj Cristo. Nimxsen cybaj aj kˈoj tiˈj Cristo, tisentzen ttxa tzˈaˈn ttziiˈ mar mlay bint cyajlaj. ⁹ Bix e baj tzaj tuj cykilca twitz txˈotxˈ, bix e baj cytxolban cyiib tiˈjxe cynajbil ocslal bix tiˈjxe jtnom n‑oc takˈ te Dios. Pero e cuˈtz kˈakˈ tuj cyaˈj tuˈn Dios, biˈx e cub tzˈeyˈ cykilca tuˈn. ¹⁰ Bix taaw il, j‑e sbun cye, e cuˈx xooˈn tuj tnijabel kˈakˈ bix azufre, jatztzen eteˈjil jil tuyax tyolel ẍtakˈ. Bix chi tel tuj qˈuixcˈaj te kˈij bix te koniyan cykilca tyem te junx maj.

Jun castiwa twitz nintzaj kˈukbil sak

¹¹ Bix e wila jun nintzaj kˈukbil sak. Bix e wila jkˈukl tuj. El ok twitz txˈotxˈ tuyax twitz cyaˈj twitzxin. E cub najke. ¹² Bix e wila ke cyimne, kej jawnex bix kej chˈin. Waˈlke twitz Cristo. Bix e jket ke uˈj. Bix at juntl uˈj e jket, j‑uˈj jatztzen tzˈiˈben cybi xjal at cychunkˈlal te junx maj. Bix e cykba uˈj cybinchben xjal. Bix e kˈoj castiwa cye xjal, teeyle juun laˈ alcye otk bint tuˈn. ¹³ E takˈ mar kej cyimne e cyim tuj. Jax juˈx e takˈ cykilca camposant bix cynajbil cyimne ke xjal otk chi cyim. Bix e takˈ Dios castiwa te cykilca, teeyle juun laˈ alcye otk bint tuˈn. ¹⁴ Bix cyamecy tuyax cynajbil cyimne e cuˈx xooˈn tuj tnijabel kˈakˈ. Ja tnijabel kˈakˈ lu, jatzenj tcab cyamecy lu. ¹⁵ Alcye kej xjal min e cnet cybi tuj ja uˈj jaaˈ tzˈiˈbena cybi kej xjal at cychunkˈlal te junx maj, e cuˈx xeˈtke tuj tnijabel kˈakˈ.

Acˈaj twitz cyaˈj bix acˈaj twitz txˈotxˈ

21  Tbajlenxitltzen jlu, e wila jun acˈaj twitz cyaˈj bix acˈaj twitz txˈotxˈ. Otk chi baj tneel twitz cyaˈj tuyax tneel twitz txˈotxˈ tuyax mar. ² Bix e wila jnintzaj tnom xjan, j‑acˈaj Jerusalén tbi, ncuˈtz tuj cyaˈj. Juˈ e tzaj tuya Dios. Binnexsen tten tisen jun xuuj binne tten tuya t‑xbalen cyeca tuˈn tmaje tuya tchmil. ³ Bix e xiˈ nbiˈna jun cyiwxix tkˈajkˈajel tuj cyaˈj. E xiˈ tkbaˈn:

―Ma tzul Dios tuˈn tten cyuya xjal. Ma pon tumel tuˈn tnajan Dios cyuya xjal. Chi oquel xjal te t‑xjal Dios, bix jax Dios ctemel cyuya te Cydios. ⁴ Bix ja te Dios qˈuelel suˈnte cykil taˈl cywitz. Mintiiˈtl cyamecy. Mintiiˈtl bis. Mintiiˈtl ookˈel. Mintiiˈtl qˈuixcˈaj. Kej pena te nejl, ma chi baj te junx maj―tz̈i jun aj cyaˈj.

⁵ Bix e tzaj tkbaˈn Dios kˈukl tuj tkˈukbil:

―Jeyˈ, cykilca oquel te acˈaj wuˈna. Tzˈiˈbeqˈuey jma tila, cuma jaxxix kej yol lu, bix baˈn tuˈn tke cycˈuˈja tiˈj―tz̈i Dios weya.

⁶ Bix e tzaj tkbaˈntl Dios weya:

―Ma bint. Inayena tuj tneel bix mancˈbil. Alcye kej xjal at takˈ aˈ cyiˈj, cxeˈl nkˈoˈna aˈ cye nuk cotz, jaj twiˈ aˈ te chunkˈlal te junx maj. ⁷ Alcye kej xjal ma chi xcye tibaj cykilcaj luwe, ccyiikˈel ja cotz lu te cykab. Bix chin oquela te Cydios, bix chi oquel te ncwala. ⁸ Pero kej xjal at ttz̈i cyiˈj tuˈn cyxiˈ lpe wiˈja, bix kej min n‑oc ke cycˈuˈj wiˈja, kej at cyil, kej byol xjal, kej nchi binchan pajlel, kej chmambaj, kej nchi suuken cyxeeˈ cyken sant, kej ẍtakˈel, cykilca kej lu chi xeˈl tuj tnijabel kˈakˈ bix azufre, jatzen tcab cyamecy―tz̈i Dios weya.

J‑acˈaj Jerusalén

⁹ E tzajtzen jun tsanjel Dios tuj cyaˈj wuyena, jun cyej wuuk ángel e wila nejl kˈiˈn wuuk lak cyuˈn nojne tuya wuuk jxitbil te tchiyonel. E tzaj tkbaˈn weya:

―Quixtey. Cxeˈl nyeecˈana tey jxuuj tuˈn tmaje tuyaj Tal Carnel―tz̈i ángel.

¹⁰ Bix e xiˈ tiiˈn ángel wanema twiˈ jun jawnex witz te nim tweˈ, bix e tzaj tyeecˈan jnintzaj xjan tnom, ja Jerusalén. Ncuˈtz tuj cyaˈj ntzaj tuya Dios. ¹¹ Nkoptzˈaj tnom tuˈn tspiˈyemal Dios. Ntxakakanxsen tisen jun xak wiˈyelxix, tisenj jun wik xak diamante. ¹² At jun tapya tiˈj tnom te nim tweˈ, bix at cablaaj ttzi pwert. At juun ángel ttzi juun ttzi pwert. Tzˈiˈben cybi jcablaaj cyiyˈjil aj Israel cyiˈ kej ttzi pwert. ¹³ At oxe ttzi pwert ttxlaj tnom te ocne, bix at oxe ttzi pwert ttxlaj tnom te cubne, bix at oxe ttzi pwert ttxlaj tnom te jawne, bix at oxe ttzi pwert ttxlaj tnom te elne. ¹⁴ Bix tjakˈ tapya at cablaaj xak te t‑xeeˈ tapya. Tzˈiˈben cybi kej cablaaj t‑xnakˈatz Jtal Carnel tiˈj juun xak t‑xeeˈ tapya. ¹⁵ J‑ángel e yolen wuyena jun tal ptzˈunt kˈiˈna tuˈn tuˈn tcub tmloˈn tnom cyuyax ttzi pwert tuyax tapya. ¹⁶ Junelne cykena kej cyaja plaj te tnom. Tej tcub tmloˈn jtnom tuya ptzˈunt, at wukak syent ajlab tkene. Junx taˈ tweˈ tisenx tkene tuya twitz tuya tweˈ. ¹⁷ Bix e cub tmloˈn ángel jtapya. Oxcˈal tuya cablaaj bara tweˈ. Amale ángelet, pero e cub tmloˈn tisen jun xjal. ¹⁸ Ttxˈotxˈel jtapya tisenj xak diamante. Yaltzen te tnom, ttxˈotxˈel puroxsen oro, bix tisen viiyre tuˈn tex kcyeˈyen tuj. ¹⁹ Yaltzen kej cablaaj xak ajben te tkˈuklel tnom, e baj bint tuya juun wik xak wiˈyelxix. Jtneel xak, diamante. Jatzen tcab xak, zafiro. Jatzen toxen xak, ágata. Jatzen tcyaaˈn xak, esmeralda. ²⁰ Jatzen tjweˈyan xak, ónice. Jatzen twukakan xak, cornalina. Jatzen twuukan xak, crisólito. Jatzen twajxakan xak, berilo. Jatzen tbeljajan xak, topacio. Jatzen tlajan xak, crisoprasa. Jatzen tjunlajan xak, jacinto. Bix jatzen tcablajan xak, amatista. ²¹ Yaltzen kej cablaaj ttzi pwert, perla cytxˈotxˈel. Jaca juun ttzi pwert jun perla. Yaltzen ke be tuj tnom, puro oro cytxˈotxˈel, bix tisen viiyre, tuˈn tex kcyeˈyen tuj. ²² Bix mintiiˈ tja Dios e wila tuj tnom, cuma at Kman Dios te cykilca tipemal tuj, tuyax Jtal Carnel, tuˈntzen cyjaw nimsaj. ²³ Mintiiˈ il tiˈj tuˈn tkˈon kˈij bix xjaw cyken luz tuj tnom, cuma tuˈnx tspiˈyemal Dios bix Jtal Carnel spiˈyenxsen taˈ. ²⁴ Tuˈnj spiˈyel lu, cykilca xjal twitz txˈotxˈ nchicˈajaxsen tuj cybe. Bix cykilca cawel twitz txˈotxˈ chi kˈol nimbil te tnom. ²⁵ Mintiiˈ koniyan, nuk oˈcx kˈij. Juˈ tzunj, mlay chi lmet ttzi pwert. ²⁶ Cykilca xjal twitz txˈotxˈ cxeˈl cykˈoˈn nimbil bix cykˈinemal te tnom. ²⁷ Pero mlay tzˈocx jun tzˈil tuj. Min‑al jun binchal il bix ka ẍtakˈel chi oquex tuj. Nuk oˈcx kej xjal tzˈiˈben cybi tuj tuˈj Jtal Carnel tzin tkbaˈn alcyej ma tiikˈ tchunkˈlal te junx maj.

22  Bix e tzaj tyeecˈan ángel jun nimaˈ weya n‑etz twitz tkˈukbil Dios bix tuyaj Tal Carnel, j‑aˈ te chunkˈlal te junx maj. Nkoptzˈaj aˈ tisen viiyre. ² Nbet nimaˈ tmij be tej tnom. Bix tuj cycaˈbel ttziiˈ nimaˈ tcub jun wiyˈ tzeeˈ te chunkˈlal te junx maj. Tzin tkˈoˈn twitz cablaaj maj tuj jnabkˈi. Cykilca xjaw tzin tkˈoˈn twitz. Bix t‑xak tzeeˈ najben te kˈanel cye cykilca xjal. ³ Mintiiˈtl castiwa. Bix jawnex tkˈukbil Dios bix Jtal Carnel ctemel tuj tnom. Bix chi ajbel t‑xjal te. ⁴ Cˈoquel cycyeˈyen twitz, bix cˈoquel tbi tibaj cywitz. ⁵ Mintiiˈtl koniyan. Bix mintiiˈtl il tiˈj tuˈn cyajben cantil bix kˈij cye xjal, cuma jax Kman Dios ctemel tuˈn tkˈon spiˈyen cye xjal. Bix chi cawel xjal tuya Dios te junx maj.

Tz̈i Cristo cyjulu chin ul meltzˈaj naja

⁶ Bix e tzaj tkbaˈn ángel weya:

―Jaxxix kej yol lu, bix baˈn tuˈn tke cycˈuˈja cyiˈj. Ja te Dios, Jkaaw, jatzenj Dios e tzaj tkˈoˈn tyol cye tyolel nejl tuˈnj Espíritu Santo, ma tzaj tsmaˈn tsanjel tuj cyaˈj jaˈlewe tuˈn ttzaj tyeecˈan cye t‑xjal j‑at tuˈn tul. ⁷ Ma txiˈ tkbaˈn Jesucristo: “Chin ul naja,” tz̈i. At t‑xtalbil Dios cyibaj kej xjal nxiˈ cyniman kej yol ma cub ttzˈiˈbena tuj uˈj―tz̈i ángel weya.

⁸ Inayena, Juan, e nbiˈya bix e wila cykilcaj lu, bix tej t‑xiˈ nbiˈna bix e wila, in cub mutzkˈaja t‑xeeˈ tken j‑ángel otk tzaj tyeecˈan jlu weya. ⁹ Pero e tzaj tkbaˈn weya:

―Miˈn tbinchaya juˈwa, cuma nuk jun t‑akˈanal Dios kena tisen jay bix tisen ke niyˈtl ocslal nxiˈ cykˈumen tyol Dios bix tisen kej nchi niman kej yol kˈoˈn tey tuˈn Dios. Nuk oˈcx nimsanwe Dios―tz̈i ángel weya.

¹⁰ Bix e tzaj tkbaˈntl ángel weya:

―Miˈn cub tewena ja uˈja lu jaaˈ ma cub ttzˈiˈbena tyol Dios, cuma tzul tyem tuˈn tjapan baj cykilcaj ma cub ttzˈiˈbena. ¹¹ Bix oj tjapan baj cykilcaj, kej xjal aj il, tuˈn cyten aj il. Bix kej xjal tzˈil, tuˈn cyten tzˈilx. Pero kej xjal jiquen, tuˈn cybinchante jtzˈaklxix. Bix kej xjal sakxix, tuˈn cyajben oˈcx te Dios―tz̈i ángel weya.

¹² Ma txiˈ tkbaˈn Cristo cyjulu: “Jeyˈ, chin ul meltzˈaj naja. Bix tzul wiiˈna chojbil te teeylex juun laˈ alcyej xbint tuˈn. ¹³ Inayena tuj tneel bix mancˈbil, t‑xeeˈ tneel bix bajsbil, tisen kej letra A bix Z. ¹⁴ At t‑xtalbil Dios cyibaj kej xjal n‑el cytxjoˈn tiˈj cyxbalen, tuˈntzen at cyoclen tiˈj twitzj tzeeˈ te chunkˈlal te junx maj, bix tuˈn cyocx ttzi pwertel te tnom. ¹⁵ Pero kej xjal at tzˈil cyiˈj, ke chmambaj, ke aj pajlel, ke byol xjal, kej nchi suuken t‑xeeˈ tken sant, bix cykilca xjal cyaj tuˈn cyẍtakˈen, mintiiˈ cyoclen tuˈn cyocx tuj tnom. ¹⁶ Inayena, Jesús, ma tzaj nsmaˈna n‑ángela tuˈn ttzaj tkˈumen cyey ocslal cykilcaj lu tiˈj ti pjel. Inayena tcwal jrey David, jcheˈw njawen te skixa ntxakakan,” tz̈i Cristo.

¹⁷ Tzin tkbaˈn Espíritu Santo tuyax cykilca ocslal, jt‑xuˈl Jtal Carnel, cyej xjal yaaˈn ocslal: “Cytzaja.” Bix kej xjal n‑oc cybiˈn ja yol lu, chi tzajxit. Chi tzajxit kej xjal at cyajbil tuˈn cycˈan j‑aˈ te chunkˈlal te junx maj. Chi cˈanxit. Mintiiˈ twiˈ.

¹⁸ Cxeˈl nkbaˈna cyej xjal nxiˈ cybiˈn kej tyol Dios ma cub ntzˈiˈbena tuj ja uˈj lu, ka at jun xjal ma tzˈoc kˈoˈn mi nuk juntl yol tibaj jyol tzˈiˈben tuj ja uˈja, ctzaal tkˈoˈn Dios te kej xitbil tzˈiˈben tuj ja uˈj lu. ¹⁹ Bix ka at jun xjal ma tzˈel kˈinte mi nuk jun tyol Dios tzˈiˈben tuj ja uˈj lu, qˈueleltzen tiiˈn Dios toclen tiˈj jtzeeˈ te chunkˈlal te junx maj, bix mintiiˈtl toclen tuˈn tocx tuj nintzaj tnom xjan.

²⁰ Jxjal ma tzaj tkˈoˈn kej yol tzˈiˈben tuj ja uˈj lu, ja Jesús, tzin tkbaˈn: “Chin ul meltzˈaj naja.” Juˈxit ttena. Ctzaja, Kaaw Jesús.

²¹ Tenxittzen t‑xtalbil Kaaw Jesucristo tibaj cykilcakey. Oˈcx nyolja.