Chronological

Jun xuuj bix jil alimaj dragón tbi

12  Bix e tzaj jlet jun jawnex techel twitz cyaˈj. At jun xuuj toc kˈij tiˈj tisen jun xbalen, bix tcub xjaw tjakˈ tken. Tjax jun corona tuj twiˈ, bix toc cablaaj cheˈw tiˈj tcorona. ² At tal tuj tcˈuˈj, bix e jaw s̈iˈn tuˈn tchyonel tal, cuma tuˈn talen.

³ Bix e tzaj jlet juntl techel twitz cyaˈj. At jun nintzaj jil, dragón tbi. Cyak tiˈj, bix at wuuk twiˈ bix laaj tcache. Bix tjax juun tcorona tuj juun twiˈ. ⁴ Tuˈn tjeeˈ etz tmsoˈn toxen tkiyˈ cheˈw twitz cyaˈj bix e cuˈtz t‑xooˈn twitz txˈotxˈ. Bix e cub weˈ dragón twitzj xuuj at tuˈn talen, tuˈntzen t‑xiˈ tchyoˈn tal jxuuj oj tul itzˈj. ⁵ Bix ul itzˈj jun talxuj xinak. Ja talxuj tuˈn tcawen tibaj cykilca tnom twitz txˈotxˈ tuya nim tipemal, tisenj jun xinj cylel ncylenxin cyiˈ carnel tuya jun bardón cyiw. Bix e jaw kˈiˈn talxuj tuˈn Dios bix e ponxin tuj jawnex tkˈukbilxin. ⁶ Yaltzen te xuuj, el ok tuj jun lugar yaaˈn nimxix xjal tuj, jatztzen taˈ jun tnajbilxuj otk bint tuˈn Dios, tuˈntzen titzˈjxuj tuj ja lugar lu jun mil kˈij tuya caˈba syent tuya oxcˈal.

⁷ Tbajlenxitltzen jlu, oc jun kˈoj twitz cyaˈj. Jjawnex ángel Miguel cyuyax ke t‑ángel e kˈoj tiˈj jil dragón. Jax juˈx e kˈoj dragón cyuyax tbiman cyiˈ Miguel. ⁸ Pero min e xcyeke cyiˈ Miguel. Juˈ tzunj, min e cyaj tentlke twitz cyaˈj. ⁹ Etz xooˈn jnintzaj jil dragón, jlbaj te ootxa, jtaaw il Satanás tbi nsbun cykilca xjal twitz txˈotxˈ. E cuˈtz xooˈn twitz txˈotxˈ cyuyax ke tbiman. ¹⁰ Bix e xiˈ nbiˈna jun cyiwxix tkˈajkˈajel tuj cyaˈj. E xiˈ tkbaˈn:

―Jaˈlewe ma pon tumel tuˈn ttzaj tyeecˈan Kdios tcolbil bix tipemal bix tcawbil bix tcawbil Jscyˈoˈn tuˈn, cuma ma tzˈex xooˈn taaw il. Te kˈij bix te koniyan min e weˈ yol tuˈn tyolen kaˈ cyiˈj ocslal twitz Kdios. ¹¹ E cub tiˈj taaw il cyuˈn tuˈnj ttz̈qˈuel Tal Carnel tej tcyim bix tuˈnj cyyol ka junx eteˈ tuya Tal Carnel. Min e cyaj cykˈoˈn cyocslabl tiˈj, amale e cyimetke tuˈn. ¹² Cuma ma tzˈex xooˈn taaw il, juˈ tzunj, chi tzalaja ejeeˈy najl tuj cyaˈj. Pero ay xsunkej xjal najl twitz txˈotxˈ, cuma ma cuˈx taaw il cyuya. Nimxsen tkˈoj, cuma n‑el niyˈ tiˈj yaaˈn nim kˈij tuˈn ttentl tuˈn tkˈojl cyiˈj ocslal―tz̈i kej eteˈ tuj cyaˈj.

¹³ Tejtzen tel tniyˈ dragón tiˈj otk cuˈx xooˈn twitz txˈotxˈ, oc ten kˈojlel tiˈj xuuj otk tzul itzˈj tal xinak. ¹⁴ Bix oc kˈoˈn tiˈ xuuj caˈba t‑xiicyˈ ikel eyˈ, tuˈntzen tel purpan twitz lbaj. E pon purpan tuj lugar min‑al xjal najl tuj, jatztzen e takˈ Dios tlugar, tuˈntzen titzˈj oxe jnabkˈi tuya niyˈjan. ¹⁵ Jatzen te lbaj, etz t‑xupan aˈ tuj ttzi tisen jun nimaˈ. E xiˈ t‑xupan aˈ tiˈj xuuj tuˈn t‑xiˈ iken xuuj tuˈn aˈ. ¹⁶ Pero e tzaj tonen txˈotxˈ ja xuuj. El cˈabch txˈotxˈ, bix e xiˈ tcˈaˈn txˈotxˈ aˈ e jatz tuj ttzi dragón. ¹⁷ Juˈ tzunj, e tzaj nimxix tkˈoj dragón tiˈj xuuj, bix e xiˈ kˈojlel cyiˈj niyˈtl tal xuuj, kej n‑oc cybiˈn tley Dios bix kej ncheˈx lpe tiˈj jaxxix tyol Jesús.

Caˈba xinak kaˈxsen cycyeˈnc tisen jun jil ntzaj nim txobajil kiˈj

13  Yajcˈatltzen bix in cub weˈya tibaj ttxa tzˈaˈn ttziiˈ mar, bix e wila jun kaˈxsen jil njatz tuj mar. At laaj tcache bix wuuk twiˈ. Tjax juun corona twiˈ jaca juun tcache. Bix tzˈiˈbec yasbil te Dios tiˈ juun twiˈ. ² Tcyeˈncjil tisen jun tiire. Tkenjil tisen tken jun oso, bix ttzijil tisen ttzi jun león. Bix e xiˈ tkˈoˈn dragón nim tipemaljil bix tajwaleljil tuˈn tcawenjil. ³ Bix e wila jun twiˈjil tisencˈa otk tiikˈ jun is̈jnin tuˈn tcyimjil. Pero e kˈanj twiˈjil. Juˈ tzunj, cykilca xjal twitz txˈotxˈ e jaw kleeˈke tiˈjjil, bix oc lpeke tiˈjjil. ⁴ Bix a jaw cynimsaˈn ja dragón otk txiˈ tkˈoˈn tipemal tejil. Jax juˈx e jaw cynimsaˈn jajil. E xiˈ cykbaˈn:

―Min‑al tisen jil. Min‑al jacˈa bint t‑xcye tiˈjjil tuj jun kˈoj―tz̈i ke xjal.

⁵ Bix e kˈoj tejil jun tnaabljil tuˈn tjaw niman tiibjil bix tuˈn tyasenjil tiˈj Dios, bix tuˈn tcawenjil cyaˈwnak xjaw tuya caˈba. ⁶ Bix oc tenjil yasel tiˈj Dios bix tiˈ tbi bix tiˈj tja bix cyiˈj kej najl tuj cyaˈj. ⁷ E kˈoj tejil tuˈn tkˈojjil cyiˈj ocslal bix tuˈn tcub cyiˈj tuˈnjil. Bix e kˈoj toclenjil te tuˈn tcawenjil tibaj cykilca wik tiyˈjil xjal bix cykilca wik xeˈchel bix cykilca wik yol bix cykilca tnom. ⁸ Bix cykilca xjal twitz txˈotxˈ cjawel cynimsaˈn jajil, kej yaaˈn tzˈiˈben cybi tuj uˈj te chunkˈlal jatxe tbintlen twitz txˈotxˈ, jatxetzen tcub ttzˈiˈben Dios cybi kej xjal at tuˈn cyclet tuˈnj tcyimlen Jtal Carnel. ⁹ Cyjkom cyẍquina tuˈn tel cyniˈya tiˈj kej yol lu. ¹⁰ Alcyej ocslal ma kˈumj cyiˈj tuˈn cyocx tuj tzeeˈ, il tiˈj chi oquex tuj tzeeˈ. Bix alcyej ocslal ma kˈumj cyiˈj tuˈn cycub byet tuˈn espada, il tiˈj tuˈn cycub byet tuˈn espada. Juˈ tzunj, il tiˈj tuˈn cyten ocslal cyiw tuj cyocslabl bix tuˈn tten cypasensya.

¹¹ Tbajlenxitltzen jlu, e wila juntl jil njatz twitz txˈotxˈ. At caˈba tcachejil tisen tcache jun tal carnel, pero e yolenjil tisen junjil dragón. ¹² Junx taˈ tipemaljil tuyaj jil tneel, bix najbenjil te tyoleljil tneel. Taakˈenjil tcab tuˈn tbinchantejil tuˈn tjaw cynimsaˈn cykilca xjal najl twitz txˈotxˈ ja jil tneel e tiikˈ jun jawnex is̈jnin tuˈn tcyim pero e kˈanj. ¹³ Jax juˈx tzin tyeecˈanjil jawnex tipemaljil, hasta tuˈn tcuˈtz kˈakˈ twitz cyaˈj tuˈnjil cywitz xjal. ¹⁴ Cyuˈnj techel lu nkˈoj tejil tuˈn tbint tuˈnjil twitz jil tneel, nsbunjil cye xjal najl twitz txˈotxˈ. Nxiˈ tkbaˈnjil cye xjal tuˈn tcub cybinchaˈn jun tsant jil tneel e tiikˈ jun is̈jnin tuˈn tcyim tuˈn jun espada pero e cyaj itzˈj. ¹⁵ Bix e kˈoj tipemal jil tcab tuˈn tocx tkˈoˈn t‑xew tsant jil tneel, tuˈntzen tbint tyolen tsant. Bix e tkba tsant tuˈn tcub tbyet ejeeˈj xjal min e jaw cynimsaˈn tsant. ¹⁶ Bix e tkba jil tcab tuˈn toc jun techel tiˈj cymankˈab bix ka tiˈj tibaj cywitz cykil xjal. Ajnintzleke, jawnexleke, kˈinaleke, mebeleke, tzakpiˈnleke, akˈanal‑leke, cykilca il tiˈj cˈoquel jun techel cyiˈj. ¹⁷ E tkbajil tuˈn miˈn cylokˈon xjal bix tuˈn miˈn cyqˈueyen ka min ma tzˈoc techel jil tneel cyiˈj. Jatzen techel tbijil, jatzen tajlal tbijil.

¹⁸ Cˈoquel cycˈuˈja tiˈj jlu. Alcyekej at cynaabl, chi ximanx tiˈj alcyej tajlal tzin techlaˈn jil. Jtajlal tzin techlaˈn jil, jatzenj tajlal tzin techlaˈn jun xjal, jatzen tajlal wukak syent tuya oxcˈal tuya wukak.

144,000 xjal waˈlcˈake twiˈj witz Sión

14  Bix juntl maj oc ncyeˈyena, bix jeyˈ, waˈltej Tal Carnel twiˈj witz Sión, bix at jun syent cyaˈwnak tuya cyaja mil xjal tuya. Tzˈiˈbenc tbi Jtal Carnel tibaj cywitz bix tuyax tbi Tman. ² Bix e xiˈ nbiˈna tkˈajkˈajel cywiˈ nim tuj cyaˈj. Tkˈajkˈajel cywiˈ tisen jun nimaˈ oj n‑etz wajtzˈaj twitz xak bix tisen kˈancyok oj ntininin cyiw bix tisen oj chi chimban xjal tiˈ arpa. ³ E xiˈ cybitzen jun acˈaj bitz twitz tkˈukbil Dios bix cywitz kej cyaja wik iˈtz bix kej jawnex tij. Yaltzen cye xjal twitz txˈotxˈ, min‑al e bint tuˈn tuˈn tbitzen tiˈj bitz. Nuk oˈcx kej syent cyaˈwnak tuya cyaja mil xjal otk chi clet. ⁴ Ejeeˈtzen xjal jlu min o chi chucj cyuya xuuj. Sakxix cynaabl. Ejeeˈtzen kej lu nchi oc lpe tiˈj Tal Carnel nuk jaaˈxja nxaˈ. Ma chi clet cyxol xjal tuˈn cyajben te jun oybil te Dios bix tej Tal Carnel. ⁵ Min tzaj ẍtakˈ yol tuj cytzi, bix mintiiˈ cyil.

Jcyyol oxe ángel

⁶ Bix e wila juntl tsanjel Dios tuj cyaˈj npurpaj tmij cyaˈj. E xiˈ tkˈumen jbaˈn tpocbal colbil te junx maj cyej xjal najl twitz txˈotxˈ. E tkˈume cye xjal te cykilca wik tiyˈjil xjal bix te cykilca wik xeˈchel bix te cykilca wik yol bix te cykilca tnom. ⁷ Bix e tzaj tkbaˈn tuya jun tyol cyiw:

―Cynimanx Dios bix cynimajaw jaxin, cuma ma pon tumel tuˈn tcub tkˈoˈnxin cycastiwa xjal. Cˈoquel cybiˈna ja Dios e cub tbinchaˈnxin twitz cyaˈj bix twitz txˈotxˈ bix mar bix cywiˈ aˈ―tz̈i ángel.

⁸ Bix e tzaj juntl tsanjel Dios tuj cyaˈj tiˈj tneel ángel. E xiˈ tkbaˈn:

―Chˈixcˈa tcub baj jnintzaj tnom te Babilonia. Tuya cykil tcˈuˈj ma tzˈoc lpe Babilonia tiˈj yaaˈn baˈn, bix ma chi oc lpe cykilca tnom tiˈj yaaˈn baˈn tuˈn, tisen n‑oc tzˈeyˈxix oj nchiˈlen tcˈuˈj jun bolo tiˈ kˈeˈn―tz̈i tcab ángel.

⁹ Bix e tzaj toxen tsanjel Dios tuj cyaˈj cyiˈj. E xiˈ tkbaˈn tuya jun tyol cyiw:

―Alcye kej xjal ma jaw cynimsaˈn jajil jila tzul jlet bix cywitz tsantjil, bix alcye kej xjal ma cyiikˈ jtecheljil tibaj cywitz bix ka tiˈj cykˈab, ¹⁰ cweltzen jawnex tkˈoj Dios cyibaj. Cxeˈlxsen cycˈaˈn xjal tkˈoj Dios, tisen nxiˈ tcˈaˈn jun bolo kˈeˈn, cuma nojnexsen vaso tuya tkˈoj Dios. Cycastiwa cwel cyibaj, jatzen tuˈn cytzˈeyˈ tuˈn kˈakˈ bix tuˈn azufre cywitz ke ángel xjan bix twitzj Tal Carnel. ¹¹ Bix tsibel kˈakˈ nqˈuixbisan ejeeˈ njatz te junx maj. Mintiiˈ cyajlabl kej xjal lu e jaw cynimsaˈn jajil jil ul jlet bix jtsantjil bix e cyiikˈ jtechel tbi. Nimxsen qˈuixcˈaj cyiˈj te kˈij bix te koniyan―tz̈i toxen ángel.

¹² Juˈ tzunj, il tiˈj tuˈn cyniman ocslal tley Dios bix tuˈn cyten cyiw tuj cyocslabl tiˈj Jesús.

¹³ Bix e xiˈ nbiˈna tkˈajkˈajel jun tyol tuj cyaˈj. E tzaj tkbaˈn weya:

―Tzˈiˈbeqˈuey jlu: “At t‑xtalbil Dios tibaj kej xjal junx eteˈ tuya Cyaaw tuˈnj cycyim tuj ja tyem lu, cuma ya mintiiˈ qˈuixcˈaj chi iˈyela, bix cxeˈl tkˈoˈn Dios cyxel jqˈuixcˈaj iyˈx cyuˈn tuˈn tlaj cybinchben baˈn,” cwel ttzˈiˈbena―tz̈i Espíritu Santo weya.

Jawnex tawal Dios twitz txˈotxˈ

¹⁴ Tej toc ncyeˈyena juntl maj, e wila jun muj sak, bix kˈuklcˈa tibaj jmuj ja xjalja Smaˈn tuˈn Dios tuˈn tten cyuya xjal. Tjax jun tcorona te oro tuj twiˈ, bix tzyuˈn jun semel tuˈn bix binne ttziiˈ. ¹⁵ Bix etz juntl tsanjel Dios tuj cyaˈj tuj tja Dios tuj cyaˈj, bix e xiˈ tkbaˈn tuya jun tyol cyiw tej xjal kˈukl tibaj muj:

―Binchamxsen tiiba tuya tsemela tuˈn tjaw chmet twitz awal, cuma ma pon tumel tuˈn tchmet twitz awal. Ma tzkij twitz awal twitz txˈotxˈ―tz̈i ángel.

¹⁶ Bix jxjal kˈukl tibaj muj e tzaj tnukpiˈn tkˈab tuyax semel, bix e cub tchmoˈn awal twitz txˈotxˈ.

¹⁷ Yajxitltzen bix etz juntl tsanjel Dios tuj cyaˈj tuj tja Dios at tuj cyaˈj. Jax juˈxte, tzyuˈn jun semel tuˈn binne ttziiˈ. ¹⁸ Bix etz j‑ángel at taakˈen tuˈn tcˈojlan jkˈakˈ twiˈj altar tuj cyaˈj. Etz twitz altar, bix e xiˈ tkbaˈn tuya jun tyol cyiw tej ángel tzyuˈn semel tuˈn binne ttziiˈ:

―Binchanxsen tiiba tuya tsemela binne ttziiˈ, tuˈn tel joset ke tzkˈaj uva twitz txˈotxˈ, cuma ma chi tzkij―tz̈i ángel.

¹⁹ Bix e baj tchmoˈn ángel twitz awal twitz txˈotxˈ tuya tsemel, tuˈn tel keset tzkˈaj uva twitz txˈotxˈ, bix e cub tkˈoˈn ke uva tuj jun ttemlel, tuˈntzen tel yetzˈet taˈl, jatzen elpeninaj jawnex tkˈoj Dios. ²⁰ Bix e baj waˈbet uva tiˈjxe tnom, bix etztzen tz̈iyˈ tuj ttemlel uva jaaˈ e cwaˈ chmet. E jaw tz̈ˈiy tz̈iyˈ, bix e japan tpiman maa tuj ttzi tz̈ej, bix jun mutxˈ ajlab jaaˈ e pon baj tz̈iyˈ.

Kej wuuk tsanjel Dios bix kˈiˈn wuuk xitbil cyuˈn

15  Bix e wila juntl jawnex techel twitz cyaˈj in jaw kleeˈya tiˈj. At wuuktl tsanjel Dios tuj cyaˈj, bix kˈiˈn wuuk xitbil tchiyonelxsen cyuˈn, jatzen mancˈbil xitbil jlu, cuma ojtzen tjapan baj kej lu, otktzen japan baj tkˈoj Dios tuj ja tyem lu. ² Jax juˈx e wila jun chkˈajlaj tisencˈa jun mar te viiyre smoˈn tuya kˈakˈ. Waˈlke tibaj ja mar lu kej ocslal min otk chi ten tjakˈ tcawbiljil jil kaˈxsen bix twitz tsantjil bix tajlal tbijil. Tzyuˈn cyuˈn kej arpa otk tzaj tkˈoˈn Dios cye. ³ Bix e bitzenke jun bitz, jatzenj bitz e t‑xnakˈtza Moisés, jt‑akˈanal Dios, cye xjal jatxe ootxa, jbitz e cybitze xjal tej Tal Carnel mas yaj. Tzin tkbaˈn bitz cyjulu: “Jawnex bix nintzaj tbinchbena, jay Kaaw Dios te cykil tipemala. Jiquenxix bix jaxxix jnbint tuˈna, jay Cawel tibaj cykilca tnom. ⁴ Kman Dios, cykilca xjal il tiˈj chi nimal jay bix il tiˈj chi nimsal tbiy, cuma nuk oˈcx jay xjan. Cykilca xjal tuj cykilca tnom chi pomel cywitza tuˈn cysuken t‑xeeˈ tkena, cuma ma cub tkˈoˈna cycastiwa xjal kaˈ kwitza,” tz̈i bitz.

⁵ Tbajlenxitltzen jlu, oc ncyeˈyena juntl maj, bix e wila tej tjket jcwart mas xjan tuj tja Dios, jatztzen tocx jxak tzˈiˈben tley Dios twitz. ⁶ Bix etz tuj tja Dios kej wuuk ángel kˈiˈn kej wuuk xitbil tchiyonelxsen cyuˈn. Toc cyxbalen sakxix bix nkoptzˈaj, bix toc jun cyqˈuelbil ttziiˈ cyxuucˈ te oro. ⁷ Bix jun wik cyxol kej cyaja jawnex wik iˈtz e xiˈ tkˈoˈn wuuk lak te oro cyej wuuk ángel, jun te jaca juun. Nojne ke lak tuya tkˈoj Dios iˈtz te junx maj. ⁸ Bix e noj tja Dios tuya sib tuˈnj tspiˈyen Dios bix tipemal, bix min‑al jun baˈn tuˈn tocx tuj tja Dios tejxe tbaj kej wuuk xitbil tchiyonelxsen kˈiˈn cyuˈn wuuk ángel.

Kej wuuk lak tcuˈx nimxsen tchiyonel cyuj

16  Bix e xiˈ nbiˈna jun yol cyiw etz kˈajt tuj tja Dios. E xiˈ tkbaˈn cye wuuk ángel:

―Cu txiˈy bix cykonxa twitz txˈotxˈ jtcuˈx tuj wuuk lak, jatzen tkˈoj Dios―tz̈i yol.

² Bix e xiˈ tneel ángel, bix e xiˈ tkoˈn twitz txˈotxˈ jtcuˈx tuj lak. Bix e takˈ jun wik yabel cyakcˈun cyiˈ xjal. Nimxsen chiyonel te cyej xjal toc techel jil jil ul jlet cyiˈj cyxumlal bix kej e naˈn dios twitz tsantjil.

³ Bix e xiˈ tkoˈn tcab ángel jtcuˈx tuj lak tibaj mar. Bix oc mar te tz̈iyˈ tisen ttz̈qˈuel jun cyimne, bix e baj cyim cykilca kej najl tuj mar.

⁴ Bix e xiˈ tkoˈn toxen ángel jtcuˈx tuj lak cyibaj nimaˈ bix cyibaj twiˈ aˈ. Bix ocke te tz̈iyˈ.

⁵ Bix e xiˈ nbiˈna tyol jtsanjel Dios tuj cyaˈj cˈojlal cykilca aˈ. E xiˈ tkbaˈn:

―Jay Dios xjan, ata jaˈlewe bix ma tena te junx maj, jiquen jma bint tuˈna. Jiquen taˈy tuˈn t‑xiˈ tkˈoˈna tz̈iyˈ cye xjal tuˈn t‑xiˈ cycˈaˈn, ⁶ cuma ma tzˈel cytz̈qˈuel ocslal bix ke tyolela cyuˈn. Juˈ tzunj, ma txiˈ tkˈoˈna tz̈iyˈ tuˈn t‑xiˈ cycˈaˈn te t‑xel, cuma cyilx jlu―tz̈i ángel taaw aˈ.

⁷ Bix e xiˈ nbiˈna tyol j‑ángel cˈojlal altar. E xiˈ tkbaˈn:

―Jax tuˈna tej tbint juˈwa tuˈna, jay Kman Dios te cykil tipemal. Jiquen taˈy tuˈn tcub tkˈoˈna cycastiwa xjal tuˈnj cyoc nimaˈ bix cywiˈ aˈ te tz̈iyˈ―tz̈i ángel cˈojlal altar.

⁸ Bix e xiˈ tkoˈn tcyaaˈn ángel jtcuˈx tuj lak tiˈj kˈij, bix e xiˈ kˈoˈn tipemal kˈij tuˈn cytzˈeyˈ ke xjal tuˈn tkˈakˈel. ⁹ Bix e baj tzˈeyˈ ke xjal tuˈn nim cyak. Pero min e cyaj cykˈoˈn xjal cyil tuˈn tjaw cynimsaˈn ja Dios. Nuk oˈcx oc ten yolel kaˈ tiˈj Dios, jatzen Dios at tipemal tuˈn tkˈonte kej xitbil lu nimxsen cychiyonel.

¹⁰ Bix e xiˈ tkoˈn tjweˈyan ángel jtcuˈx tuj lak tibaj tkˈukbiljil jil ul jlet, jatztzen ncawen. Biˈx e cyaj ten tuj klolj cykilca lugar jaaˈ ncawen, bix e cub cytxˈaˈn xjal cyaakˈ tuˈn takˈ qˈuixcˈaj. ¹¹ Bix e jaw yolen kaˈ tiˈj Dios tuj cyaˈj tuˈn takˈ cyqˈuixcˈaj bix cyakcˈun cyiˈj. Min e cyaj cykˈoˈn cybinchben kaˈ.

¹² Bix e xiˈ tkˈoˈn twukakan ángel jtcuˈx tuj tlak. E xiˈ tkoˈn tibaj jnintzaj nimaˈ Eufrates tbi. Biˈx e tzkij nimaˈ, tuˈntzen tajben cye cawel te ocne tuˈn cyiyˈx tibaj nimaˈ cyuya soldado. ¹³ Bix e wila oxe biman etz tuj ttzi dragón bix tuj ttzi jil kaˈ bix tuj ttzi ẍtakˈ tyolel jil kaˈ. Cycyeˈnc biman tisen wooˈ. ¹⁴ Biman ke cyoxele, bix nchi yeecˈan nimxsen cyipemal. Bix nchi pon cyuya cawel tuj cykilca twitz txˈotxˈ, tuˈntzen toc cychmoˈn ejeeˈ, tuˈntzen cykˈojl cawel cyuya soldado tiˈj Dios te cykilca tipemal tuj jkˈij oj tchicˈajax at mas tipemal Dios. ¹⁵ Cˈoquel cycˈuˈja tiˈj ja tyol Jesús lu: “Chin ul meltzˈaj jun kˈij mintiiˈ tumel, jacˈaj min chi ayon xjal wiˈja, tisen min chi ayon xjal tiˈ jun alakˈ oj tocx tuj cyja te koniyan. At t‑xtalbil Dios cyibaj kej xjal nchi ayon wiˈja bix binne cyten, yaaˈn tisen jun xjal ẍbikl tten oj tul alakˈ bix tzul tchˈixew,” tz̈i Jesús.

¹⁶ Yaltzen cyej biman, oc cychmoˈn ke cawel cyuyax cysoldado tuj jun lugar Armagedón tbi tuj yol hebreo.

¹⁷ Jatzen te twuukan ángel, e xiˈ tkoˈn jtcuˈx tuj lak tuj cykˈiˈk. Bix etz jun tkˈajkˈajel yol cyiwxix tuj tja Dios tuj cyaˈj, jatztzen taˈ tkˈukbil Dios. E xiˈ tkbaˈn:

―Oˈcx xsunj. Ma pon tumel tuˈn tbaj cykilca―tz̈i Dios.

¹⁸ Bix e tzaj tken kˈancyok tuyax nim s̈itz̈ˈ bix tuyax ntininin kˈancyok. Bix e tzaj jun nintzaj xcyaklajnab. Bajx tzaaˈ jun xcyaklajnab cyiwxsen tisen ja lu jatxe tej tbint xjal twitz txˈotxˈ. Jawnexsen jun xcyaklajnab, tuya nimxsen tipemal. ¹⁹ Biˈx e cub pax jjawnex tnom. Te oxe eˈla. Bix e cub xitj cykilca tnom twitz txˈotxˈ. Cykilcaj til tnom te Babilonia ul tuj tcˈuˈj Dios, bix e tzaj nim tkˈoj Dios tibaj. Tisen jun vaso nojnexsen tuya vino bix n‑el koj, juˈtzen ttena jtkˈoj Dios e tzaj cyibaj kaˈ aj Babilonia. ²⁰ Cykilca kej neeˈ chˈin txˈotxˈ tmij mar e baj cyuyax cykilca witz. ²¹ Bix e tzaj jun jawnex skbaken twitz cyaˈj tuˈn tcub cyibaj xjal. Jun syent libra talel juun twitz skbaken. Bix e jaw yolen ke xjal kaˈ tiˈj Dios tuˈnj skbaken, cuma nimxsen jun skbaken.

Jxuuj aj paj

17  Bix ul wuyena jun cyej wuuk ángel cyxol kej kˈiˈn wuuk lak cyuˈn, bix e tzaj tkbaˈn weya:

―Juˈ tzaja tzalu. Cxeˈl nyeecˈana tey jcastiwa cwel tibaj jxuuj aj paj, jxuuj kˈukl cyibaj nim aˈ. ² Tuya cykil cycˈuˈj, ke cawel twitz txˈotxˈ ma chi oc lpe tiˈj jyaaˈn baˈn e tkba ja xuuj lu, bix ke xjal najl twitz txˈotxˈ ma chi oc lpe tiˈj kaˈ, tisen oj n‑oc tzˈeyˈxix tcˈuˈj jun bolo tiˈj kˈeˈn―tz̈i ángel weya.

³ Bix e xiˈ tiiˈn ángel wanema tuj jun lugar min‑al xjal najl tuj. Bix e wila jun xuuj kˈukljawx tibaj jun jil cyak tilbiljil. Nimxsen yol kaˈ tiˈj Dios tzˈiˈben tiˈjjil, bix at wuuk twiˈjil tuyax laaj tcachejil. ⁴ Toc t‑xbalen xuuj puro tbanelxix bix wiˈyelxix. E cyaj tbint tuya oro cyuyax nintzaj xak cyuyax perla. Tzyuˈn jun vaso te oro tuˈn. Nojnexsen tvaso tuyaj kaˈ bix jpajbaj e bint tuˈnxuj. ⁵ Tzˈiˈben jun biybaj tibaj twitzxuj, pero jun biybaj mintiiˈ tumel ti japenina. Tz̈i cyjulu: “Jnintzaj tnom Babilonia, jaaˈ taˈ cytxu aj paj, bix jaaˈ n‑itzˈja kej kaˈ nbint twitz txˈotxˈ.” ⁶ E wila otk tzˈoc xuuj tisencˈa jun bolo, cuma otk txiˈ tcˈaˈnxuj cytz̈qˈuel kej otk chi cyim tuˈnxuj tuˈn tlaj cyocslabl tiˈ Jesús. Tej nlontiya jaxuj, nim in jaw kleeˈya. ⁷ Bix e tzaj tkbaˈn ángel weya:

―¿Tikentzen njaw kleeˈya? Cxeˈl nkbaˈna tey tiˈj ti japenina jxuj xuuj tuyax jil ikl texuj bix at wuuk twiˈxuj tuyax laaj tcachexuj. ⁸ Jjil e tila, jatzenj jil e ten nejl pero mintiiˈtl jaˈlewe. Chˈixcˈa tpon tumel tuˈn tjatz tuj jul mintiiˈ tumel t‑xeeˈ bix tuˈn t‑xiˈjil tuj il te junx maj. Yaltzen kej xjal twitz txˈotxˈ, kej yaaˈn tzˈiˈben cybi jatxe tej tbint twitz txˈotxˈ tuj uˈj te chunkˈlal te junx maj, chi jawel kleeˈ oj toc cycyeˈyen jajil, cuma e tenjil pero min‑altljil bix tzuljil juntl maj. ⁹ Alcyekej at cynaabl, cˈoquel cycˈuˈja tiˈj jlu. Kej wuuk wiˈybaj, jatzen japeninaj kej wuuk witz cwel ke xuuj cyibaj. ¹⁰ Ejeeˈ tzunj lu tzin cyechlaˈn wuuk cawel. Jweˈ cawel ma chi el. Jun at‑x jaˈlewe. Jatzen juntl, minaˈx tul. Ojtzen tul, ilxix tiˈj tuˈn tten, pero yaaˈn nim kˈij. ¹¹ Yaltzenj jil e ten nejl bix min‑altl jaˈlewe, ja tzunja twajxakan cawel. Jax jun cyxol kej wuuk, bix cxeˈl tuj il te junx maj. ¹² Yaltzen kej laaj cache e tila, tzintzen cyechlaˈn laaj cawel. Minaˈx cyoc te cawel. Pero oj tul jletjil tzul, chi cawel tuyajil jun niˈ rato. ¹³ Junx cynaabl kej laaj cawel lu, jatzenj tuˈn t‑xiˈ cykˈoˈn cycawbil tej jil ul jlet. ¹⁴ Kej cawel lu chi kˈojlel tiˈj Tal Carnel. Pero cwel cyiˈj tuˈnj Tal Carnel, cuma jatzen Cawel cyibaj cykil cawel bix Rey cyibaj cykil rey. Bix tuyaj Tal Carnel oj tcub cyiˈj tuˈn, eteˈ kej t‑xjal Dios min e cyaj cykˈoˈn cyocslabl tiˈjxin―tz̈i ángel weya.

¹⁵ Bix e tzaj tkbaˈntl weya:

―Kej aˈ xtila jaaˈ ncuba kej xuuj aj paj, xjalke. Tzin cyechlaˈn aˈ nim xjal bix tnom bix cykilca wik yol. ¹⁶ Yaltzen kej laaj cache tuyax ja jil jil xtila, qˈuelel cyiiqˈuen ja xuuj aj paj, bix qˈuelel cyiiˈn tipemal bix t‑xbalen wiˈyelxix. Cxeˈl cychyoˈn tchuˈlxuj, bix cwel cypaten jaxuj tuya kˈakˈ. ¹⁷ Ma takˈ Dios tuj cyanem tuˈn cybinchante jtaj Dios tuˈn tbint cyuˈn, jatzenj tuˈn tten jun cynaabl junx bix tuˈn t‑xiˈ cykˈoˈn cycawbil tej jil kaˈ, ojxe tjapan baj cykilca tyol Dios. ¹⁸ Yaltzen jxuuj xtila, tzintzen techlaˈn jawnex tnom ncawen cyibaj cawel eteˈ twitz txˈotxˈ―tz̈i ángel weya.

Oj tcub xitj jnintzaj tnom Babilonia

18  Tbajlenxitltzen jlu, e wila juntl tsanjel Dios ncuˈtz tuj cyaˈj. At nim tipemal, bix e cub spiˈyen twitz txˈotxˈ tuˈn tspiˈyenal. ² Bix e jaw ts̈iˈn tuya jun yol cyiw:

―Ma cub xitj, ma cub xitj jnintzaj tnom Babilonia. Ma tzˈoc nuk oˈcx te jun cynajbil biman bix tisen jun cynajbilkejil cykilca wik chˈit kaˈ. ³ Tuya cykil cycˈuˈj ma chi oc lpe cykilca tnom tiˈj yaaˈn baˈn tuya, tisen oj n‑oc takˈ kˈeˈn te jun bolo. Ma chi oc lpe tiˈj kaˈ ke cawel twitz txˈotxˈ tuya, bix ke qˈueyel ma chi oc kˈina tuˈnj cycˈaˈs̈ tiˈj. Pero jaˈlewe ma cub xitj―tz̈i ángel.

⁴ Bix e xiˈ nbiˈna juntl tkˈajkˈajel yol e tzaj tuj cyaˈj. E tzaj tkbaˈn:

―Key nxjala, cyetza cyxol kej xjal te tnom lu, tuˈntzen miˈn cybinchana il junx cyuya, bix tuˈn miˈn cytena cyuya oj tcub cycastiwa. ⁵ Ma chmet‑xix ke til ja tnom lu maa japan baj tuj cyaˈj, bix ma tzul tuj tcˈuˈj Dios tuˈn t‑xiˈ tkˈoˈn castiwa te t‑xel―tz̈i Dios cye ttanem.

⁶ Bix e xiˈ tkbaˈn Dios:

―Cykˈonxa t‑xel te ja tnom lu tisenx ma tzaj tkˈoˈn kaˈ cyey. Cykˈonxa caˈba maj t‑xel cybinchben kaˈ. Tuj jvaso jaaˈ e cuˈxa tkˈoˈn jcˈaˈbj jkaˈ, cybinchama cab maj t‑xel, bix cykˈonxa te tcˈa. ⁷ Cykˈonxa qˈuixcˈaj bix bisbajil te tiˈ nimbil tiib bix tiˈ tachbil. Tzin tkbaˈn tuj tanem: “Jawnex cawel kena, yaaˈn jun mebe viuda kena. Mlay chin jaw ookˈa, cuma mintiiˈ bis wiˈja,” tz̈i. ⁸ Cuma juˈtzen ncub tbisen juˈwa, juˈ tzunj, cpol jkˈij oj tcub castiwa tibaj. Tzul cyamecy. Tzul bisbajil. Tzul weyaj. Bix cˈoquex patet tuj kˈakˈ, cuma at nim tipemal Dios kˈolte castiwa. ⁹ Bix chi ookˈel ke cawel twitz txˈotxˈ oj cylonte otk cub xitj ja tnom lu. El cyiiqˈuen ja Dios tuyax Babilonia bix ocke te kˈina tuˈnj cycˈaˈs̈ te. Juˈ tzunj, oj cylonte njaw tsibel jkˈakˈ ncub tpaten ja, nimxsen chi bisel. ¹⁰ Chi tzaal weˈ cyeyˈlte nakch tiˈj, tuˈn miˈn cub tcastiwa cyibaj, bix cxeˈl cykbaˈn: “¡Lastim jawnex tnom! ¡Lastim Babilonia nim tipemal nejl! Te junx hora ma cub tcastiwa,” tz̈i cybel. ¹¹ Jax juˈx kej qˈueyel twitz txˈotxˈ nim chi ookˈel tiˈj, cuma min‑altl tuˈn tlokˈonte cycˈaˈs̈. ¹² Min‑altl tuˈn tlokˈonte cycˈaˈs̈ oro bix plata bix xak wiˈyelxix bix perla bix xbalen sakxix bix jawnex, bix xbalen te seda, bix xbalen cyak, bix tzeeˈ tzin tkˈoˈn cˈocˈsbil, bix cotz nbint te twitz cye nmak jil, bix tzeeˈ tbanelxix, bix bronce, bix xcbil, bix xak mármol, ¹³ bix canela, bix cˈocˈsbil, bix s̈boˈs̈, bix remeda, bix juntl wik cˈocˈsbil incienso tbi, bix vino, bix aseyt te olivo, bix harina, bix triwa, bix wacẍ, bix carnel, bix tz̈ej, bix carwaj, bix akˈanal, bix te kˈopaj. ¹⁴ Yaltzen key xjal aj Babilonia, cykilcaj baˈn cyaja ma tzˈel kˈiˈn cyey. Cykilcaj at tajbil cyey bix cykˈinemala ma cub naj. Mlayx chi cnet juntl maj cyuˈna. ¹⁵ Kej xjal e qˈueyen kej cˈas̈jel lu, kej oc kˈina tuˈnj cyqˈueyen cyej aj Babilonia, chi tzaal weˈ nakch tiˈj tnom, tuˈntzen miˈn cub tcastiwa cyibaj. Ookˈke bix at nim cybis. ¹⁶ Cxeˈl cykbaˈn: “Lastim, lastim, jawnex tnom. Toc t‑xbalen sakxix bix jawnex bix cyak, bix e bajxse bint tuya oro tuyax xak wiˈyelxix tuyax perla tiˈj. ¹⁷ Te junx hora ma cub naj cykilca tkˈinemal.” Ke capitán te barc, cyuyax ke onel tiˈj, cyuyax ke cykilca nchi akˈanan tuj mar, el lkˈeke tiˈj. ¹⁸ Tej cylonte tej tjaw tsibel jkˈakˈ ncub tpaten tnom, e jaw cys̈iˈn: “Mintiiˈtl jun tnom jawnex tisen ja tnom lu,” tz̈ike. ¹⁹ Bix e jax kuk tuj cywiˈ, bix e jaw s̈iˈnke, bix ookˈke, bix e xiˈ cykbaˈn: “Lastim, lastim, jawnex tnom. Cykilca taaw barc tuj mar ocke kˈina tuˈnj tkˈinemal ja tnom lu. Lastim, cuma te junx hora ma cub naj tnom,” tz̈ike. ²⁰ Key najl tuj cyaˈj, bix key ocslal cyuyax t‑xel Jesús cyuyax tyolel Dios, chi tzalaja, cuma ma txiˈ tkˈoˈn Dios castiwa tibaj ja tnom lu, cuma nim ma yasen cyiˈja―tz̈itzen yol e tzaj tuj cyaˈj.

²¹ Bix at jun tsanjel Dios tuj cyaˈj nim tipemal e xiˈ ttzyuˈn jun ma tij xak tisen jun cyaaˈ, bix e cub t‑xooˈn tuj mar. Bix e xiˈ tkbaˈn:

―Tisenj e cuˈx xak tjakˈ mar, juˈtzen pjel te Babilonia. Cwel xitj tuj jun rato bix cyiw t‑xiˈlen, bix mlayx cnet juntl maj. ²² Miˈntl tzˈoc arpa bix xux bix trompeta cyuˈn xjal, bix miˈn chi bitzetl. Miˈn chi akˈanantl xjal, bix miˈn chi tz̈eeˈntl xuuj tiˈ cyaaˈ. ²³ Miˈn tentl tken luz tuˈn tkˈon spiˈyen, bix mintiiˈtl mejoblenel cˈoquel tuj. Cwel xitj, cuma kej xin at cycˈaˈs̈ najl tuj, e cawenkexin cyibaj cykilcatl xjal, bix cuma e sbun ke aj Babilonia cykilcatl tnom. ²⁴ Tuj ja tnom lu ma cnet cytz̈qˈuel ke tyolel Dios bix ke ocslal bix cykilca xjal o cub cybyet twitz txˈotxˈ―tz̈i ángel.