Chronological

Kej wuuk ẍipbelte

6  Bix oc ncyeˈyena, bix el tiiˈn Tal Carnel jtneel ẍipbelte cyxol wuuk. Tejtzen tel tiiˈn, e xiˈ nbiˈna tej tjaw ts̈iˈn tneel wik iˈtz cyxolj cyaja. Tkˈajkˈajel tisenj kˈancyok. E xiˈ tkbaˈn:

―¡Ttzaja bix cyeˈnc!

² Bix e wila jun tz̈ej sak. Jtjax tibajjil tz̈ej kˈiˈn jun xoobl tuˈn te tkˈojbil. Bix e jax kˈoˈn jun corona tuj twiˈ. Bix ex tuˈn t‑xcye tibaj cykilca, bix e xcye.

³ Tejtzen tel tiiˈnxin tcab ẍipbelte, e xiˈ nbiˈna tcab wik iˈtz. E xiˈ tkbaˈn:

―¡Ttzaja bix cyeˈnc!

⁴ Bix etz juntl tz̈ej. Cyak tilbil. Jtjax tibajjil e xiˈ kˈoˈn te tuˈn miˈn chi ten xjal tuj ttz̈yal, bix tuˈn tbaj cybyon cyiib xjal cyxolx. Bix e xiˈ kˈoˈn jun ma tij espada te.

⁵ Tejtzen tel tiiˈnxin toxen ẍipbelte, e xiˈ nbiˈna toxen wik iˈtz. E xiˈ tkbaˈn:

―¡Ttzaja bix cyeˈnc!

Bix e wila jun tz̈ej kˈek. Jtjax tibajjil jun malbil tuj tkˈab. ⁶ Bix e xiˈ nbiˈna jun tkˈajkˈajel n‑etz cyxol ke cyaja jwik iˈtz. E xiˈ tkbaˈn tej tjax tibaj tz̈ej kˈek:

―Bincham tuˈn tbint tuˈn jun xjal tuˈn tlokˈonte caˈba libra triwa bix ka kak libra cebada nuk tuˈnj twiˈ tcˈuˈj ctcama te jun kˈij. Pero txiˈ tkbaˈna tuˈn cyxilanx xjal loˈpj te olivos bix uva―tz̈itzen.

⁷ Tejtzen tel tiiˈn Tal Carnel tcyaaˈn ẍipbelte, e xiˈ nbiˈna tkˈajkˈajel tyol tcyaaˈn jwik iˈtz. E xiˈ tkbaˈn:

―¡Ttzaja bix cyeˈnc!

⁸ Bix e wila jun tz̈ej spela kˈent. Jtjax tibajjil toc tbi Cyamecy, bix lepch Cynajbil Cyimne tiˈj. Jaaˈjxa iyˈyake kej caˈba lu, e cyim xjal cyuˈn. E xiˈ kˈoˈn cye tuˈn tcub cybyoˈn tcyaaˈn tkiyˈ xjal tuˈn kˈoj, tuˈn weyaj, tuˈn yabel, bix cyuˈn jil twitz txˈotxˈ.

⁹ Tejtzen tel tiiˈn Tal Carnel tjweˈyan ẍipbelte, e wila cyanem kej xjal otk chi cub byet cuma otk chi ocslan tyol Dios bix cuma otk chi kˈumen tyol Dios. Tocx cyanem tjakˈ altar. ¹⁰ Ejeeˈ tzunj lu e jaw s̈‑in cyiw:

―Jay Kman Dios xjan bix jaxxix, ¿jteˈtltzen tyem tyoˈy tuˈn tcub cykˈoˈna cycastiwa xjal twitz txˈotxˈ, tuˈntzen cykˈoj cye t‑xel kcyamecya?―tz̈i ke xjal otk chi cub byet cyuˈn aj il twitz txˈotxˈ.

¹¹ E xiˈ kˈoˈn te teeyle juun jun xbalen sak, bix e xiˈ tkbaj cye tuˈn cyayon chˈintl, ojxe cybyet cykilcatl ocslal at tuˈn tcub byet tisenx cye otk chi cub byet.

¹² Bix e wila tej tel tiiˈn Tal Carnel twukakan ẍipbelte. Bix e tzaj jun xcyaklajnab cyiwxsen. Biˈx oc kˈij kˈek tisen jun xbalen kˈek te bisbajil. Biˈx oc xjaw cyak tisen tz̈iyˈ. ¹³ Biˈx e cuˈtz tzˈak ke cheˈw twitz cyaˈj. Nuk nluˈle twitz cyaˈj tisen yucch jun tken higo tuˈn nim cykˈiˈk bix ntzaj tzˈak twitz. ¹⁴ E tzaj tzˈak cyaˈj tisen jun uˈj oj njaw balkˈet. Bix cykilca ke witz bix cykilca ke chˈin txˈotxˈ tmij mar iyˈ kˈiˈnke tuj cylugar. ¹⁵ Bix ke cawel twitz txˈotxˈ cyuyax cykilca nejenel cye xjal cyuyax capitán cyuyax ke kˈina cyuyax ke jawnex xjal cyuyax cykilca akˈanal bix kej xjal yaaˈn eteˈ tjakˈ tcawbil taaw akˈuntl, cykilca kej lu ocx ewenke cyuj jul bix tiˈ t‑xeeˈ xak cywiˈ witz. ¹⁶ Bix e xiˈ cykbaˈn cye xak bix cye witz:

―Cytzaj tzˈaka kibaja, tuˈntzen miˈn chicˈaj koˈya twitzj Dios kˈuklec tuj tkˈukbil, bix tuˈntzen miˈn tzaj tkˈoj Jtal Carnel kibaja―tz̈i ke xjal. ¹⁷ E jaw yolenke juˈwa cuma otk tzul cana jjawnex kˈij tuˈn tcub tkˈoˈn Dios tkˈoj tibaj twitz txˈotxˈ, bix min‑al jun xjal at tipemal tuˈn tiyˈx tuˈn.

Kej xjal cˈoquel jun techel cyiˈj cyxol aj Israel

7  Tbajlenxitltzen jlu, e wila cyaja tsanjel Dios tuj cyaˈj waˈlke tuj cyaja plaj ttxaˈn twitz txˈotxˈ. Nchi makon cywitzj cyaja wik cykˈiˈk nchi xumen twitz txˈotxˈ, tuˈntzen miˈn chi xumen twitz txˈotxˈ mi nuk twitz mar mi nuk cyiˈ tzeeˈ. ² Bix e wila juntl tsanjel Dios tuj cyaˈj te ocne. E jaw jaaˈ njatza kˈij. Tej tjatz ángel, kˈiˈn jsello te Dios iˈtz tuˈn. Bix e jaw ts̈iˈn cyiw cyiˈj cyajatl ángel kˈoˈn cyipemal tuˈn cyqˈuixbisante twitz txˈotxˈ bix mar. ³ E xiˈ tkbaˈn cye:

―Miˈn cyqˈuixbisaya twitz txˈotxˈ mi tiˈ mar mi cyiˈj tzeeˈ, cuma tneelxix il tiˈj cˈoquel kkˈoˈna jtechel tibaj cywitz ke t‑akˈanal Dios, te yecˈbil ka te Dioske―tz̈i ángel.

⁴ Bix e xiˈ nbiˈna cyajlal kej otk tzˈoc sello cyiˈj. Ciento cuarenta y cuatro mil otk tzˈoc sello cyiˈj cyxol cykilca cyiyˈjil aj Israel. ⁵ Cyxol ke tiyˈjil Judá at cablaaj mil oc sello cyiˈj. Jax cyxol ke tiyˈjil Rubén at cablaaj mil oc sello cyiˈj. Jax cyxol ke tiyˈjil Gad at cablaaj mil oc sello cyiˈj. ⁶ Jax cyxol ke tiyˈjil Aser at cablaaj mil oc sello cyiˈj. Jax cyxol ke tiyˈjil Neftalí at cablaaj mil oc sello cyiˈj. Jax cyxol ke tiyˈjil Manasés at cablaaj mil oc sello cyiˈj. ⁷ Jax cyxol ke tiyˈjil Simeón at cablaaj mil oc sello cyiˈj. Jax cyxol ke tiyˈjil Leví at cablaaj mil oc sello cyiˈj. Jax cyxol ke tiyˈjil Isacar at cablaaj mil oc sello cyiˈj. ⁸ Jax cyxol ke tiyˈjil Zabulón at cablaaj mil oc sello cyiˈj. Jax cyxol ke tiyˈjil José at cablaaj mil oc sello cyiˈj. Jax cyxol ke tiyˈjil Benjamín at cablaaj mil oc sello cyiˈj.

Nimxsen cyajlal xjal toc cyxbalen sak

⁹ Tbajlenxitltzen jlu, oc ncyeˈyena, bix e wila nimxsen cyajlal xjal. Min‑al jun xjal jacˈa bint tajlante. Otk chi tzaj cyuj cykilca tnom bix cykilca cyiyˈjil xjal bix te cykilca wik xeˈchel bix te cykilca wik yol. Waˈlke twitz jawnex tkˈukbil Dios bix twitz Jtal Carnel. Toc cyxbalen sak, bix tzyuˈn tkˈab xaˈj cyuˈn. ¹⁰ Bix cyiwxix e jaw cys̈iˈn:

―Ma ko clet tuˈn Kman Dios kˈukl tuj tkˈukbil bix tuˈnj Tal Carnel―tz̈ikexin.

¹¹ Cykilcatzen ke tsanjel Dios tuj cyaˈj waˈlke tiˈjele tkˈukbil Dios bix cyiˈjele ke tij bix cyiˈjele ke cyaja wik iˈtz. E cub mutzkˈajke twitz tkˈukbil Dios tuˈn tjaw cynimsaˈn jaxin. ¹² E xiˈ cykbaˈn:

―At toclen Dios tuˈn tiikˈente cyˈiwlabl bix tuˈn tjaw nimset tbixin. At tnaabl, bix tipemal, bix tipen, bix kˈoˈnxit chjonte te tuyax nimbilte. Juˈxit tten te junx maj―tz̈i ke ángel.

¹³ At jun cyxol kej tij e tzaj tkanen weya:

―¿Alcye kej lu toc cyxbalen sak, bix jaaˈ ma chi tzaaˈ?―tz̈i jun tij weya.

¹⁴ Bix aj ntzakˈbeˈna te:

―Taat, ja tey etzkilte―ntz̈iya.

Bix e tzaj tkbaˈn weya:

―Kej xjal lu, ejeeˈ tzunja ma chi ex tuj nintzaj yajbil. Ma txjet cyxbalen tuˈnj ttz̈qˈuel Tal Carnel, tuˈntzen toc cyxbalen sakxix. ¹⁵ Juˈ tzunj, lu ke eteˈ twitz tkˈukbil Dios, bix nchi ajben texin te kˈij bix te koniyen tuj lugar jaaˈ taˈxin, bix at cynajbil tuyaxin, bix cˈojlaˈnke tuˈnxin. ¹⁶ Mintiiˈtl weyaj bix takˈ aˈ cyiˈj, bix mintiiˈtl qˈuixcˈaj cyiˈj tuˈn tken kˈij bix mintiiˈtl takˈ cyak cyiˈj, ¹⁷ cuma Jtal Carnel tcub twitz tkˈukbil Dios, ja te cˈojlal cye, cxeˈl tiiˈn ejeeˈ jaaˈ nchi jatza itzˈj twiˈ aˈ te chunkˈlal. Bix ja te Dios qˈuelel suˈnte cykil taˈl cywitz―tz̈i tij.

Tej tel tiiˈn twuukan ẍipbelte bix tej tlonte Juan juntl tsanjel Dios kˈiˈn jun tcublel incienso tuˈn

8  Tejtzen tel tiiˈn Jtal Carnel twuukan ẍipbelte, yutˈl cykilca tuj cyaˈj niyˈjan hora. ² Bix e wila kej wuuk tsanjel Dios tuj cyaˈj waˈlke twitz Dios. E xiˈ kˈoˈn wuuk xux cye. ³ Bix ul juntl tsanjel Dios tuj cyaˈj, bix e cub weˈ twitz altar, kˈiˈn jun tcublel incienso tuˈn. Nim incienso e xiˈ kˈoˈn te, tuˈntzen toc te tmoj cynaˈj Dios cykilca ocslal, tuˈn t‑xiˈ toyet twiˈ altar te oro tcub twitz tkˈukbil Dios. ⁴ Bix tuj tkˈab ángel e jaw tsibel incienso, junx tuyaj cynaˈj Dios ocslal, bix e pon twitz Dios. ⁵ E jawtzen tiiˈn ángel tcublel incienso, bix e cuˈx tnojsaˈn tuya kˈakˈ tcub twiˈ altar, bix e cuˈtz t‑xooˈn twitz txˈotxˈ. Ntzajtltzen kˈancyok nrumumun tuyax nim s̈itz̈ˈ tuyax tken kˈancyok bix tuyax jun xcyaklajnab.

Kej wuuk xux

⁶ Entonces, kej wuuk tsanjel Dios tuj cyaˈj kˈiˈn wuuk xux cyuˈn, e bint cyten tuˈn toc cyxuxen. ⁷ Tej toc t‑xuxen tneel ángel, e tzaj skbaken tuyax kˈakˈ cysmoˈn cyiib tuya tz̈iyˈ. Bix e cuˈtz t‑xooˈn twitz txˈotxˈ, bix e baj tzˈeyˈ toxen paˈ twitz txˈotxˈ bix toxen paˈ tzeeˈ bix cykilca chaˈx cˈul e baj tzˈeyˈ.

⁸ Tejtzen toc t‑xuxen tcab ángel, e wila jun ma tij kˈakˈ, tisencˈa jun ma tij witz, e cuˈtz xooˈn tuj mar. Bix toxen paˈ mar oc te tz̈iyˈ. ⁹ Bix e cyim toxen paˈ jil eteˈ tuj mar, bix toxen paˈ barc e baj.

¹⁰ Tejtzen toc t‑xuxen toxen ángel, e tzaj tzˈak jun ma tij cheˈw tuj cyaˈj. Njululun tisen jun tzaj, bix e tzaj tzˈak cyibaj toxen paˈ nimaˈ bix cyibaj twiˈ aˈ. ¹¹ Jatzen tbi cheˈw Cˈa Itzaaj. Toxen paˈ aˈ twitz txˈotxˈ oc puro cˈa. Nim xjal e cyim tuˈn tlaj aˈ otk tzˈoc te cˈa.

¹² Tejtzen toc t‑xuxen tcyaaˈn ángel, oc qˈuixbisaˈn jtoxen paˈ kˈij tuyax toxen paˈ xjaw tuyax toxen paˈ cheˈw. Juˈ tzunj, e cubxsen klolj toxen paˈ cywitz, tuˈn miˈn ten spiˈyenal cyaja hora te kˈij, bix juˈx toxen paˈ koniyan.

¹³ Bix e wila jun ikel eyˈ npurpan twitz cyaˈj tuj lugar mas jawnex. Bix e xiˈ tkbaˈn tuya tkˈajkˈajel tyol cyiwxix:

―¡Ayxsen, ayxsen, ayxsen cyej xjal najl twitz txˈotxˈ! cuma chˈixcˈa cyoc xuxet oxet xux cyuˈn oxetl ángel―tz̈itzen ikel eyˈ.

9  Tejtzen toc t‑xuxen jweˈyan ángel, e wila jun ma tij cheˈw otk tzaj tzˈak tuj cyaˈj bix e cuˈx twitz txˈotxˈ. Bix e xiˈ kˈoˈn tal jaaˈ te tuˈn tjket ttzi jul jaaˈlen ponina baj t‑xeeˈ. ² Tej tjket ttzi jul jmintiiˈ tumel t‑xeeˈ tuˈn, e jatz sib tuj jul, tisen oj njatz sib tuj jun ma tij jorno. Bix oc klolj twitz kˈij tuyax twitz cyaˈj tuˈnj sib e jatz tuj jul. ³ Tujtzen sib etz nimjil cuchiˈ. E xiˈkejil twitz txˈotxˈ. E xiˈ kˈoˈn cyejil cyoclenjil tuˈn cytxˈaˈnjil, tisen ke jil siˈcy at twitz txˈotxˈ. ⁴ E xiˈ kbet cyejil tuˈn miˈn tzˈoc cytxˈaˈnjil tz̈ˈim bix chaˈx cˈul bix tzeeˈ at twitz txˈotxˈ. Nuk oˈcx tuˈn toc cytxˈaˈnjil cyiˈ kej xjal mintiiˈ techel Dios toc tibaj cywitz. ⁵ Min e xiˈ kˈoˈn cyejil tuˈn cybyon xjal. Nuk oˈcx tuˈn toc qˈuixcˈaj cyiˈ xjal tuj jweˈ xjaw cyuˈnjil. Bix jqˈuixcˈaj iyˈx cyuˈn xjal tisenj is̈jnin niyˈx tuˈn jun xjal oj n‑oc ttxˈaˈn jun siˈcy tiˈj. ⁶ Tuj ja tyem lu, cxeˈl cycubsaˈn xjal cywitz tuˈn cycyim, pero mlay chi cyim. Tuya cykil cycˈuˈj chi oquel cyipen tuˈn cycyim, pero mlayx chi cyim. ⁷ Cycyeˈnc cuchiˈ tisenj ke tz̈ej binne cyten tuˈn cyxiˈ tuj kˈoj. Bix tjax tuj cywiˈjil tisencˈa corona te oro. Bix cywitzjil tisen cywitz xinak. ⁸ Jatzen ttzmal cywiˈjil tisen ttzmal cywiˈ xuuj, bix twitz cyejil tisen twitz cye león. ⁹ Bix toc cyxbalenjil ttziiˈ cyxuucˈjil tisencˈa ttxˈotxˈel xcbil. At cyxiicyˈjil, bix tzinxsen rinininjil cyxiicyˈjil tisen nchi rininin nimxsen carwaj noˈn cyuˈn tz̈ej nchi ajkelen tuj kˈoj. ¹⁰ At cyjeeˈjil tisen cyjeeˈ siˈcy, tuˈntzen toc cytxˈaˈnjil cyiˈj xjal. At tipemal cyjeeˈjil tuˈn cyqˈuixbisanjil cyiˈ xjal tuj jweˈ xjaw. ¹¹ At jun cycaweljil tuˈn tcawen, jatzenj ángel ncawen tibaj jul mintiiˈ tumel t‑xeeˈ. Tuj yol hebreo, Abadón tbi cawel, bix tuj yol griego, Apolyón tbi.

¹² Jtneel qˈuixbisabl ma tziyˈ. Pero at‑x caˈbatl qˈuixbisabl chi ul tibajxe jlu.

¹³ Tejtzen toc t‑xuxen twukakan ángel, e xiˈ nbiˈna jun yol etz kˈajtl cyxol kej cyaja cache eteˈcˈa twiˈ altar te oro tcub twitz Dios. ¹⁴ E xiˈ tkbaˈn te twukakan ángel kˈiˈn xux tuˈn:

―Tzakpimela kej cyaja biman ẍpoˈnke ttziiˈ jnintzaj nimaˈ Eufrates tbi―tz̈i.

¹⁵ Bix el tzakpet kej cyaja biman, tuˈntzen tcub cybyoˈn toxen tkiyˈ xjal, cuma nuk binne cyten tuˈn cycyim toxen tkiyˈ xjal cyuˈn tej tpon j‑hora bix jkˈij bix jxjaw bix jjnabkˈi. ¹⁶ E xiˈ cyiiˈn nimxsen soldado tjax cyibaj tz̈ej. Jatzen cyajlal xinj soldado caˈba syent millón. E nbiˈya cyajlal. ¹⁷ Tej ttzaj tyeecˈan Dios weya ke tz̈ej cyuyax soldado tjax cyibaj, e wila cyjulu: Tilbil xcbil ttziiˈ cyxuucˈ soldado cyak tisen kˈakˈ bix chaˈx bix kˈent. Cywiˈ tz̈ej tisen cywiˈ león, bix tuj cytzi etz kˈakˈ tuyax sib tuyax azufre. ¹⁸ Bix tuˈnj kˈakˈ bix sib tuyax azufre etz tuj cytzijil, e baj cyim toxen tkiyˈ xjal. ¹⁹ At cyipemal tz̈ej tuj cytzijil tuˈn cybyonjil xjal, pero jax juˈx at cyipemal tuj cyjeeˈjil. Cyjeeˈjil tisen ke lbaj, bix at cywiˈjil tiˈj cyjeeˈjil. Bix cyuˈn tzunj luwe nchi qˈuixbisanjil xjal. ²⁰ Pero amale e cyimet nim xjal, pero ke niyˈtl xjal min e cub byetke cyuˈn kej qˈuixbisabl lu, min e cyaj cykˈoˈn tuˈn mintl chi naˈn cywitz biman. Cuc e naˈn ke Dios cywitz biman bix ke sant te ttxˈotxˈel oro bix plata bix bronce bix xak bix tzeeˈ, kej mlay chi cyeˈyen bix mlay chi bin bix mlay chi bet. ²¹ Bix min e cyaj cykˈoˈn tuˈn mintet e byontl ke xjal bix tuˈn cyxiˈ lpe cyiˈ chmambaj bix tuˈn cyyas̈en bix tuˈn cyalkˈan.

Juntl jawnex tsanjel Dios tocx jun chˈin uˈj tuj tkˈab

10  Bix e wila juntl jawnex tsanjel Dios tuj cyaˈj. Nimxsen tipemal, bix e cuˈtz tuj cyaˈj tuj muj. Bix tjax arc tuj twiˈ, bix ntxakakan twitz tisen tken kˈij. Jatzen ke tken tisen tken kˈakˈ. ² Tuj tkˈab at jun chˈin uˈj. Jkoˈn uˈj. Bix e cub tkˈoˈn tken te tmankˈab tibaj mar, bix tken te tneẍ e cub tkˈoˈn tibaj twitz txˈotxˈ. ³ Bix cyiwxsen e jaw ts̈iˈn, tisen oj njaw ts̈iˈn jun león. Tej tjaw ts̈iˈn, e kˈajt kej wuuk kˈancyok. ⁴ Tej cybaj kˈajt kej wuuk kˈancyok, at tuˈn tcub ntzˈiˈbena j‑otk txiˈ cykbaˈn wuuk kˈancyok. Pero e xiˈ nbiˈna jun tkˈajkˈajel tuj cyaˈj e tzaj tkbaˈn weya:

―Eˈwencja jma cykba wuuk kˈancyok. Miˈn cub ttzˈiˈbena―tz̈i jun weya.

⁵ Bix j‑ángel e wila waˈlcˈa tibaj mar bix tibaj twitz txˈotxˈ, e jaw tkˈoˈn tmankˈab twitz cyaˈj, ⁶ bix e cywix tyol tuˈnj tjurament tiˈ Dios iˈtz te junx maj, Jdios e binchante twitz cyaˈj bix twitz txˈotxˈ bix mar tuyax cykilcaj at cyuj. Bix e tkˈume ángel:

―Mlay tuˈn tweˈtl jkˈij tuˈn tjapan baj jma cub tnincˈuˈn Dios. ⁷ Oj toc t‑xuxen twuukan ángel xux, at tuˈn tchicˈajax jma cub tnincˈuˈn Dios jatxe tuj tneel, tisen e tkˈume cye tyolel―tz̈i jawnex tsanjel Dios tuj cyaˈj.

⁸ Bix juntl maj e xiˈ nbiˈna tkˈajkˈajel tuj cyaˈj. E tzaj tkbaˈn weya:

―Cu txiˈy, bix qˈueletz tiiˈna j‑uˈj tjkoˈn taˈ tuj tkˈab j‑ángel waˈlcˈa tibaj mar bix tibaj twitz txˈotxˈ―tz̈itzen weya.

⁹ Juˈ tzunj, in pon lkˈeya tiˈj ángel, bix e xiˈ nkanena te tuˈn ttzaj tkˈoˈn jneeˈ chˈin uˈj weya. Bix e tzaj tkbaˈn ángel weya:

―Kˈiiˈnxa, bix waaˈnxa. Cˈa cˈoquel tuj tcˈuˈja, pero jatzen tuj ttziy, tisen taˈl xiiˈ―tz̈i ángel.

¹⁰ Bix e tzaj wiiˈna jneeˈ chˈin uˈj tuj tkˈab ángel, bix e xiˈ nwaaˈna. Bix tz̈iˈ eˈla uˈja tuj ntziya tisen taˈl xiiˈ. Pero tej tcuˈx tuj ncˈuˈja, e jawxsen qˈueybe tuj ncˈuˈja. ¹¹ Bix e tzaj tkbaˈn weya:

―At mastl tuˈn t‑xiˈ tkˈumena cye nim wik xjal bix tnom bix yol bix cawel―tz̈i ángel weya.

Kej caˈba tyolel Dios

11  Bix e tzaj kˈoˈn weya jun ptzˈunt te echquete, bix e tzaj kbet weya:

―Weyˈtza, bix mlonxa tja Dios tuyax altar, bix ajlanxa jteˈ xjal nchi naˈn Dios tuj. ² Pero miˈn cub tmloˈna twitz peˈn tiˈjxe tja Dios, cuma o txiˈ kˈoˈn cye jun wikxitl xjal yaaˈn judío. Nuk pjel cywaˈben jtnom xjan te cyaˈwnak tuya caˈba xjaw. ³ Bix cxeˈl nkˈoˈna wipemala cyej caˈba nyolela, bix cxeˈl cykˈumen jnyola jun mil tuya caˈba syent tuya oxcˈal kˈij. Bix toc cyxbalen te bisbajil―tz̈i Dios.

⁴ Kej caˈba tyolel Dios lu, jatzen kej caˈba tzeeˈ olivo bix kej caˈba cantil waˈlke twitz Taaw twitz txˈotxˈ. ⁵ Ka at jun xjal taj tzˈoc ipan cyiˈj, qˈueletz kˈakˈ tuj cytzi tuˈn tcub tzˈeyˈ. Alcye kej xjal cyaj tzˈoc ipan cyiˈj, il tiˈj chi cymel tuˈn kˈakˈ n‑etz tuj cytzi. ⁶ At cyipemal caˈba tyolel Dios lu tibaj twitz cyaˈj tuˈn miˈn ttzaj jbal cyuj kˈij nchi kˈumen tyol Dios. Bix at cyipemal cyibaj nimaˈ bix mar tuˈn cyoc te tz̈iyˈ, bix tuˈn cyqˈuixbisante twitz txˈotxˈ, bix tibaj cykilca xitbil, nuk jteˈxja maj cyaj. ⁷ Ojtzen tjapan baj cyaakˈenj xin kbalte tyol Dios, jawel tzunjjil jil tuj jul mintiiˈ tumel t‑xeeˈ. Kaˈ xsunjil. Bix kˈojleljil cyiˈjxin. Bix cwel cyiˈjxin tuˈnjil, bix cwel tbyoˈnjil ejeeˈxin. ⁸ Yaltzen cyxumlal cyimnewe, txˈilchcˈa cywitz xjal tuj jnintzaj tnom yaaˈn baˈn. Cynaabl xjal te ja tnom lu tisen cynaabl xjal te Sodoma bix te Egipto nejl, bix e cub cybyoˈn Kaaw twitz cruz. ⁹ Kej xjal te cykilca wik tiyˈjil bix te cykilca wik xeˈchel bix te cykilca wik yol bix te cykilca tnom, oc cycyeˈyen tiˈ cyxumlal kej e cyim oxe kˈij tuya niyˈjan. Min e cycuya tuˈn cycuˈx maket. ¹⁰ Kej xjal te twitz txˈotxˈ chi tzalajel tiˈj cycyamecyxin, bix chi iyˈsal jun ninkˈij tuˈnj otk chi cyimxin. Cxeˈl cykˈoˈn cotz cye cyuya te iyˈsal ninkˈij te cycyamecyxin, cuma kej caˈba tyolel Dios lu nim otk chi yolen tiˈj cyil xjal najl twitz txˈotxˈ. ¹¹ Pero oj tbaj oxe kˈij tuya niyˈjan, ctzaal tkˈoˈn Dios cyxewxin, bix chi jawel itzˈjxin, bix nimxsen ctzaal cytz̈ixin cyiˈj xjal n‑oc cycyeˈyen ejeeˈxin. ¹² Bix cxeˈl cybiˈn caˈba tyolel Dios jun cyiw tkˈajkˈajel ctzaal tuj cyaˈj:

―Cyjatza tzalu―tz̈i tbel Dios. Bix chi jawex tuj cyaˈj tuj jun muj, bix cˈoquel cycyeˈyen ke cyaj kˈoj oj cyjax. ¹³ Bix jaxj hora ctzaal jun nintzaj xcyaklajnab, bix tlajan tkiyˈ tnom cwel xitj. Wuuk mil xjal chi cymel tuˈnj xcyaklajnab. Jatzen kej niyˈtl xjal, chi jawel seyˈpaj, bix cxeˈl cykbaˈn at nim tipemal Dios tuj cyaˈj.

¹⁴ Tcab qˈuixbisabl ma tziyˈ. Pero at‑x toxen qˈuixbisabl tzul naj tibaj jlu.

Ti pjel oj tkˈajt xux tuˈn twuukan ángel

¹⁵ Tejtzen toc t‑xuxen twuukan ángel, e jaw jun cyiwxix tkˈajkˈajel cywiˈ kej eteˈ tuj cyaˈj. E xiˈ cykbaˈn:

―Ma pon tumel tuˈn cyoc kej tnom eteˈ twitz txˈotx tjakˈ tcawbil Kman Dios bix tcawbil Jscyˈoˈn tuˈnxin. Bix ccawel te junx maj―tz̈ike.

¹⁶ Kej winakcyaja tij kˈuklke tuj cykˈukbil twitz Dios, e cub mutzkˈajke twitz Dios, bix e jaw cynimsaˈn jaxin. ¹⁷ E xiˈ cykbaˈn:

―Cxeˈl kkˈoˈna chjonte tey, Kman Dios. At tipemala tuˈn tbint cykilca tuˈna. Ata jaˈlewe bix ma tena te junx maj. Cxeˈl kkˈoˈna chjonte tey cuma ma tzˈakˈa cawel tuya nim tipemala. ¹⁸ Nejl, e jaw cykˈoj xjal tiˈja, pero jaˈlewe, ma pon tumel tuˈn tjaw tkˈoja cyiˈj. Ma pon tumel tuˈn ttzaj tkˈoˈna cycastiwa kej xjal ma chi cyim, bix tuˈn ttzaj tkˈoˈna cotz cyej t‑akˈanala, bix kej tyolela, bix cykilca ocslal bix cykilca xjal nchi niman tbiy, jawnexleke, chˈinleke. Bix ma pon tumel tuˈna tuˈn cyxiˈ tuj il kej xjal e cybincha kaˈ tiˈj twitz txˈotxˈ―tz̈i ke tij.

¹⁹ Bix e jket ttzi tja Dios tuj cyaˈj, bix tuj tja Dios e chicˈajax jcaxa jaaˈ e cyjaˈ tkˈoˈn Dios tyol cyuya xjal. E tzaj tken kˈancyok tuyax nim s̈itz̈ˈ tuyax kˈancyok nrininin, tuyax jun xcyaklajnab tuya nim skbaken.