Chronological

Tcab uˈj e xiˈ ttzˈiˈben apóstol Juan

Jun kˈolbebl tuˈn apóstol Juan

¹ Inayena, jun nejenel cyxol ocslal, nxiˈ ntzˈiˈbena te cyey ocslal. Ejeeˈy tisen jun jawnex xuuj ma scyˈet tuˈn jun cawel te t‑xuˈl. N‑oc cyakˈa weya tuya cykil wanema, bix yaaˈn nuk oˈcx weya, pero n‑oc cyakˈa cye cykilca xjal ma chi ocslan tiˈ yol jaxxix. ² N‑oc cyakˈa weya cuma junx taˈ knaabl tuˈnj tocx yol jaxxix tuj kanem. Bix ctemel yol jaxxix tuj kanem te junx maj. ³ Tzajxit xtalbil cyibaja tuˈn Kman Dios tuyax Kaaw Jesucristo, Tcwal Kman Dios. Bix tzajxit kˈaˈben cycˈuˈj cyiˈja, bix tuˈn cytena tuj ttz̈yal cyuˈn. Cbinel jlu ka ma tzˈoc cybiˈna yol jaxxix bix ka ma tzˈoc cyakˈ cyuyey cyey.

At nim tzpetsal cyxol kej xnakˈtzal

⁴ Nim in tzalaja tej t‑xiˈ nbiˈna nchi oc lpey tiˈj yol jaxxix, tisen e tzaj tkbaˈn Kman Dios ke. ⁵ Key ocslal, jaˈlewe cxeˈl ncubsaˈna nwitza cyey tuˈn toc cyakˈ cyuyey cyey. Jnxiˈ nkanena cyey yaaˈn jun acˈaj tley Dios. Jatxe tuj tneel o tajbe Dios tuˈn toc cyakˈ cyuyey cyey. ⁶ Bix tuˈn toc cyakˈ cyuyey cyey, il tiˈj cbinel cyuˈna cykilcaj ma tkba Dios tuˈn tbint cyuˈna. Juntl maj cxeˈl nkbaˈna cyey, jatxe tuj tneel o tkba Dios tuˈn toc cyakˈ cyuyey cyey.

⁷ At nim xnakˈtzal ẍtakˈ nchi bet twitz txˈotxˈ. Tzin cykbaˈn ka nuk ten jyol oc Jscyˈoˈn tuˈn Dios te jun xjal Jesús tbi. Pero jun xjal nyolen juˈwa, nuk jun xnakˈtzal ẍtakˈ bix jun aj kˈoj tiˈ Dios. ⁸ O ko akˈanana tuˈn cyiikˈena t‑xtalbil Dios. Cycˈojlanx cyiiba tuˈn miˈn tzˈel cyxooˈna ja xtalbil lu.

⁹ Alcyej xjal ncyaj tcyeˈyen t‑xnakˈtzbil Cristo, sino n‑oc lpe tiˈ juntl xnakˈtzbil, min‑altzen Dios tuya. Pero alcyej xjal ncyaj ten tujx xnakˈtzbil tiˈj Cristo, attzen Kman Dios tuya bix Tcwalxin.

¹⁰ Ka at jun xnakˈtzal ẍtakˈ taj tzˈocx tuj cyjay tuˈn tyolen cyuyey tiˈj jun xnakˈtzbil yaaˈn junx taˈ tuya yol jaxxix tiˈ Cristo, miˈn txiˈ cykˈoˈna amleˈn tuˈn tocx. Miˈn txiˈ cykanena t‑xtalbil Dios tibaj, ¹¹ cuma alcyej xjal nxiˈ tkanen t‑xtalbil Dios tibaj, tzin tyeecˈan n‑el jtbinchben baˈn tuj twitz.

Mancˈbil yol

¹² At nimtl waja txiˈ nkbaˈna cyey. Pero mas waja tuˈn t‑xiˈ nkbaˈna cyey oj toc ncyeˈyena cywitza twitzj tuˈn tcub ntzˈiˈbena mas twitz ja uˈj lu. Waja chin pona cyuyey, tuˈntzen ktzalaj nim. ¹³ Kej ocslal tzalu nxiˈ cykˈoˈn jun cykˈolbebl cyey.

Toxen uˈj e xiˈ ttzˈiˈben apóstol Juan

Jun kˈolbebl tuˈn apóstol Juan

¹ Inayena, jun nejenel cyxol ocslal, nxiˈ ntzˈiˈbena ja uˈj lu te tey, Gayo. N‑oc takˈa weya tuya cykil ncˈuˈja.

² Hermano, nchin cubsana nwitza te Dios tiˈja, tuˈn tel baˈn cykilcaj te tey bix tuˈn baˈn taˈy, tisen baˈn taˈ tchunkˈlala tuya Dios. ³ Ntzkiˈna baˈn taˈ tanema tuya Dios, cuma ul cab ocslal te kbalte weya ti ttena, bix nim in jaw tzalaja tej ttzaj cykbaˈn kˈiˈnxix yol jaxxix tuˈna. ⁴ Jawnex ntzalajebla jaca maj oj nbintiya ka nchi oc lpe tiˈj jaxxix yol kej xjal ocslan tuˈnj waakˈena.

Tej tyole Juan baˈn tiˈj jxin Gayo

⁵ Hermano, baˈnxix nbint tuˈna, cuma nxiˈ tonena cyiˈj ocslal. Amale mint ttzkiˈna cywitz t‑akˈanal Dios nchi bet cyuj tnom, pero nxiˈ tonena cyiˈj. ⁶ Tej cyul tzalu, e xiˈ cykˈumen cywitz ke ocslal ti tten e xiˈ tyeecˈana tnaabla cye. Cxeˈl ncubsaˈna nwitza tey tuˈn t‑xiˈ tkˈoˈntla chˈin onbil cye oj cypon tuyey, tuˈntzen cyitzˈj tuj cybe oj cyiyˈ ttanema tuˈn tkˈumj tyol Dios cyuˈn, cuma nchi ajben te Dios. ⁷ Nchi bet cyuj tnom tuˈn ttz̈itpaj yol tiˈj colbil cye xjal tuˈn Cristo, bix mintiiˈ chˈin onbil ccyiikˈel cyuˈn ke xjal yaaˈn ocslal. ⁸ Juˈ tzunj, ilxix tiˈj tuˈn t‑xiˈ kkˈoˈn onbil cyej t‑akˈanal Dios lu, tuˈntzen kakˈanan junx cyuya tuj cyaakˈen te kbalte tpocbal Cristo.

Jun tley Diótrefes yaaˈn baˈn

⁹ E xiˈ ntzˈiˈbena jun wuˈja cye ocslal jaaˈ taˈy, pero nuk wajxa e xiˈ nsmaˈna, cuma at jxin Diótrefes cyxola. Tajxin tuˈn tocxin te nejenel cyxol ocslal, bix juˈ tzunj min oc tbiˈnxin nyola. ¹⁰ Juˈ tzunj, ka ma chin pona cyxola, cxeˈl nkbaˈna cywitz ocslal jma tbinchaxin, tuˈn tchicˈajax ti ttenxin. Nyolenxin kaˈ yol wiˈja, pero ẍtakˈ. Bix yaaˈn nuk jaj lu, pero jax juˈx tcyˈixin tuˈn ttzaj tkˈoˈnxin cyposada t‑akˈanal Dios. Bix ka at ocslal cyaj tuˈn t‑xiˈ cykˈoˈn cyposada t‑akˈanal Dios, mintiiˈ nxiˈ tkbaˈnxin cye tuˈn t‑xiˈ cykˈoˈn cyposada, sino nuk n‑etz tlojoˈnxin ejeeˈ cyxol ke ocslal.

Jun tbanel tbinchben jxin Demetrio

¹¹ Hermano, miˈn tzˈoc lpey tiˈj kaˈ, nuk oˈcx tiˈj baˈn. Kej xjal nchi binchan baˈn, te Dioske, pero kej xjal nchi binchan kaˈ, min cytzkiˈn Dios.

¹² Kˈonx tonbila tej xin Demetrio. Cykilca xjal nchi yolen baˈn tiˈjxin. Junx taˈ tbinchbenxin tuyaj yol jaxxix, bix chicˈaj jiquen jun xjal. Jax juˈx weya, ntzkiˈna ka baˈn jun xjal, bix cytzkiˈna baˈn tuˈn toc ke cycˈuˈja tiˈj nyola.

Mancˈbil kˈolbebl

¹³ At nimtl waja txiˈ nkbaˈna tey, pero ncyˈiya tuˈn tcub ntzˈiˈbena twitz jun t‑xak uˈj. ¹⁴ Waja mas tuˈn npona tuyey tuˈn nyolena tuyey oj toc ncyeˈyena twitza tuj cabtl kˈij.

¹⁵ Tenxita tuj ttz̈yal. Kej ocslal tzalu cytzkiˈn twitza nxiˈ cykˈoˈn cykˈolbebl tey. Kˈonxa jun nkˈolbebla cye ocslal at tuyey, teeyle juun.